Garata Ma̧ȩ 4 - Biblia Pume

¹ Ado mȩnȩro̧, ¿tjana̧ yo̧cjivadi? quëna̧chea oa, jabechji̧ ji̧dë u̧i̧ ni̧bätämi̧ cjiarequededibe boi̧chji̧ judi mitëpea̧ pio ju̧i̧ chjiari, jäjäarea̧ ja̧remȩ pio ju̧i̧ mitëpea̧ pio ju̧i̧ chjiari. Danȩrȩ, boi̧chji̧ judi, jäjäarea̧rë ji̧ra̧ tjamo̧ oa goaräbo, jäjäarea̧ pio ju̧i̧ ja̧remȩ pio ju̧i̧ mitërea̧ daparäbo, jabechji̧ eami̧ oa mitërea̧ dadëpade. Jabë boi̧chji̧ tara, jabë na̧e chiape bagadëa̧ tara, jabechji̧ bë ana̧mȩmi̧ dari̧ cjo̧ro̧rea̧mi̧dëde, jabo mu̧i̧tjoi̧mi̧ darë cjo̧ro̧pade jëa̧ jidaji̧ri̧ pio ji̧ri̧ ja̧ ma̧ȩrä. Aja̧ mu̧i̧tjoi̧mi̧ darë cjo̧ro̧de, jidaji̧ri̧ ja̧ chja̧oerä cjiamȩrȩ.

² Tjamo̧ davä. Jidaji̧ri̧ pio judiro̧ jidadiro̧jo̧ȩ, jibëa̧pamȩ pio ju̧i̧bo. Aja̧, tüdüa̧mi̧ darä cjo̧ro̧pea̧ oa jidadiro̧jo̧ȩ jäjäarea̧rë ütara̧rä yuro, boi̧chji̧ üdë na̧e chia tjamo̧pea̧rä yuro. Ado judirämo̧ mitërea̧ dapade jäjäarea̧ ja̧remȩ oa. Judirämo̧ yürüpadirojo̧ȩ jäjäarë goë boea̧ pio ju̧i̧, jënȩ china̧chjari̧ tutia̧ pio ju̧i̧.

³ Ado peaja̧dimi̧ dari̧ cjiarëreji̧ri̧rea̧rȩ. Jabechji̧ ibëa̧ ütëti̧rea̧ judiro̧ yo̧rërea̧ ma̧ȩrä pearä cjo̧ro̧rërea̧ ji̧, pio ji̧ri̧ ja̧ chja̧oerä cjo̧ro̧rërea̧ ji̧, jabechji̧ bori̧mi̧ da maearë cjo̧ro̧rëreji̧ri̧rea̧rȩ. Jabechji̧ jidaji̧ri̧ ja̧ pio ji̧ri̧ ja̧ mu̧i̧tjoi̧mi̧ dari̧ cjo̧ro̧rëreji̧ri̧rea̧rȩ.

⁴ Jabo ütara̧ doro Ütë tjamo̧ pio judi chjadürëremȩdejȩ jibëa̧ Ja oa. Ado iei̧ jini̧ ara̧ oa cjo̧ro̧mȩpea̧de pumȩ chjarerä. Ado Moicherë go̧ȩparërea̧ ma̧ȩrä cjo̧ro̧rëremȩde.

⁵ Jabo danȩrȩ, pio ibë go̧dü tänȩpea̧ oa chjadürëremȩdejȩ Ütë tjamo̧ judi. Tjamo̧ davä. A̧ro̧rȩ Moicherë go̧ȩparërea̧ ma̧ȩrä cjo̧ro̧chea oa, a̧ro̧rȩ mu̧i̧tjoi̧mi̧ dari̧ cjo̧ro̧rërea̧ ji̧, jare chjadüa̧ oa cjiami̧ dari̧ go̧dürea̧ dapea̧ oa chjadürëremȩdejȩ, a̧ro̧rȩ Ütë tjamo̧ pio ju̧i̧ ja̧ u̧ri̧pe jäpea̧ oa, judi ibëa̧ Ama̧i̧pe jäpea̧ oa.

⁶ Ado mȩnȩro̧ peadë Ütë tjamo̧ ja̧ u̧ri̧pea̧ tara, jabechji̧ chjadürëremȩdidibe Joja pio ju̧i̧ ja̧ Tjo ju̧i̧ dibëa̧ icjararä bëpapea̧ oa. Ado pio judi tänȩa̧ oa, Ama̧i̧pea̧rea̧ro̧jo̧ȩ yaba̧ Ütë tjamo̧ ju̧i̧. Tjamo̧ davä. “Ama̧i̧, ca̧ Ama̧i̧renȩ” yo̧rea̧ro̧jo̧ȩ.

⁷ Ado yaba̧ Ütë tjamo̧ judi pio dibë chjiari tuti chjadüa̧ oaiä, jabechji̧ mu̧i̧tjoi̧dë mapea̧nȩrȩ, jabo u̧ri̧ mapea̧nȩrȩ yaba̧. Tjamo̧ davä. Mȩnȩro̧ bori̧ maearë cjiarërea̧ ji̧, mu̧i̧tjoi̧mi̧ dari̧ cjo̧ro̧rërea̧ ji̧, jabechji̧ Ütë tjamo̧ ja̧ u̧ri̧pea̧nȩrȩ yaba̧. Ado pio ju̧i̧ ja̧ u̧ri̧pea̧ tara, peaja̧di mitërea̧ dapanȩrȩ. Tjamo̧ davä. Ütë tjamo̧ pio ju̧i̧ ja̧remȩ pio ju̧i̧ mitërea̧ dapanȩrȩ, judi jibëa̧ u̧ri̧ ja̧remȩ goë boea̧ pio ju̧i̧.

Gitori̧ jo̧rȩtarëremȩde Pablo judi Garachiaräpȩ quëna̧ji̧ri̧ pio ji̧ri̧ chjiari

⁸ Pearä judi Ütë tjamo̧ pio ju̧i̧ dabadërëreji̧ri̧nȩrȩ. Jabechji̧ mu̧i̧tjoi̧ maearë tabüa̧ oa cjiami̧ dari̧ cjo̧ro̧rëreji̧ri̧nȩrȩ yaröca ja̧ chja̧oerä, ütëdë maearë yo̧a̧ chja̧oerä.

⁹ Jabo Ütë tjamo̧ pio ju̧i̧ dabanȩrȩ yaba̧. Ado judi dabadidibe peaja̧di. Ado pio ju̧i̧iä iëno̧ë ta̧rërequededibe. ¿Tjana̧ ju̧i̧iä ado chjereno̧ jo̧rȩtatämi̧ cjianȩrȩ teracaba ma̧ȩ oa? ¿Tjana̧ ju̧i̧iä ado chjereno̧ jo̧rȩtatämi̧ cjianȩrȩ no̧mȩ tjamo̧ri ja̧ a̧ra̧ano̧a̧ oa cjiarërea̧ ma̧ȩ pio ju̧i̧? Danȩrȩ, mȩnȩro̧ Ütë pio ju̧i̧ tjamo̧ri̧ dabaji̧ri̧pea̧rä judi, ¿yö̧ta dari̧ ado chjereno̧ jo̧rȩtatämi̧ cjiarenȩro̧jo̧ȩ dibë a̧dodëmȩ ma̧ȩ pio ju̧i̧? ¿Tjana̧ ju̧i̧iä ado chjereno̧ tabüa̧ oa cjiami̧ dari̧ cjo̧ro̧tämi̧ cjianȩrȩ, teracaba ja̧ mu̧i̧tjoi̧mi̧ dari̧?

¹⁰ Danȩrȩ, dibëa̧ ütëti̧rea̧rȩ yo̧rërea̧ pio ju̧i̧ jo̧rȩte chjaonȩrȩ. Ado pio ju̧i̧iä ütara̧ doro japanȩrȩ judiro̧ yo̧rërea̧mi̧. Aja̧, gupënȩ üdë do ma cjiarä peaja̧di dari̧ japanȩrȩ, judiro̧ yo̧rërea̧mi̧. Ado pea uiparä, peaja̧di dari̧ japanȩrȩ judiro̧ yo̧rërea̧ pio ju̧i̧. Ado ja̧dëa ji̧ jono̧dë mapea̧rä, peaja̧di dari̧ ütara̧mi̧ japanȩrȩ. Ado mȩnȩro̧ pio ju̧i̧ japarä, 'Aja̧, ja̧di dari̧ japapea̧ üdë ba chiadida, ado Ütë tjamo̧ pio ju̧i̧iäbo ba chia jirodida’ quëna̧ jo̧rȩtaji̧ri̧rȩ japanȩrȩ.

¹¹ Jabo cjäri̧ marequede ca̧ oti̧, gito ana̧ tjamo̧ri̧ jo̧rȩtarequede pio dibë chjiari, ejaro cjiapai̧ tarari̧. Jabechji̧, 'dabapea̧diro̧da, jabo tjamo̧ri̧ quëna̧dëa̧ jirodiro̧da, badëri̧ a̧ra̧ano̧a̧ jiroquiji̧ri̧da’ quëna̧pai̧ darequede davä pio dibë chjiari.

¹² Danȩrȩ ca̧ oti̧, pio cüdëmi̧ dari̧ cjo̧ro̧tä eatarequededibe. Jabechji̧ cüdë Quiricho pio ju̧i̧ quëna̧ oaiä, judiorë yo̧rërea̧ chja̧oeri pio judiri go̧düa̧requede jare chjadüa̧ oa cjiami̧ dari̧. Ado pio ju̧i̧iä pio mȩnȩro̧mi̧ dari̧ cjo̧ro̧mȩpea̧requede, judiodë pio judiro̧mi̧ dari̧. Jabechji̧ judiorë yo̧rërea̧ ma̧ȩrä cjo̧ro̧dë marëreji̧ri̧nȩrȩ, ado peaja̧direquede yaba̧. Pio jiro ma̧ȩra̧ tabüa̧ oa cjiami̧ dari̧ cjo̧ro̧dëmȩpea̧requede yaba̧. Ado pio ju̧i̧iä pio cüdëmi̧ dari̧ cjo̧ro̧tä eamȩrȩ yo̧tarequededibe. Danȩrȩ ca̧ oti̧, cüdë Ütë tjamo̧ ja̧ ma̧ȩ oa pio dibëiäpȩmo̧ pearä a̧ra̧ano̧rërea̧ ji̧, chjai̧dëri̧ japadëa̧renȩro̧coe, jabo chjadëri̧ japarëreji̧ri̧renȩro̧coe.

¹³ Ado cüdë pearä taruparërea̧ ji̧ a̧dë jo̧rȩtadëa̧ jironȩrȩ. Jabechji̧ gito ja̧borëmȩrequede. Ado gito ja̧boa̧ oaiä, pio dibëiäpȩ cjiadiäa̧requede. Ado pio ju̧i̧iä tarupë a̧ra̧ano̧rëremȩrequededibe ma̧ȩ chjadëi̧ pio ju̧i̧, cüdë dibë pearä a̧ra̧ano̧rërea̧ ji̧.

¹⁴ Ado cüdë ana̧ri̧ tararea̧ gito üdë dibë ma̧i̧ dari̧ tja̧reparȩmi̧ dari̧ japea̧räbo, dibë cjarari̧ cjia tänȩmi̧ dari̧ japea̧räbo, jabechji̧ badë dadëa̧renȩro̧coe. Baä tänȩdëa̧renȩro̧coe, jabo jabechji̧ chjadëri̧ cjo̧ro̧ tänȩa̧renȩro̧coe. Chjadëri̧ jidarëreji̧ri̧renȩro̧coe. Jabechji̧ Ütërë a̧dëri pio judiri chjadüa̧ mu̧i̧tjoi̧mi̧ da oa a̧doa̧renȩro̧coe. Jabechji̧ Jechu Quiricho pio judimi̧ da oa chjadëri̧ japea̧renȩro̧coe.

¹⁵ Ado mȩnȩro̧ coa chjadëri̧ a̧doa̧ oaiä, jabechji̧ ma̧ chiadëri̧ cjia tjamo̧ji̧ri̧ oa darëremȩrequededibe. Jabo ja̧didënȩrȩ yaba̧. ¿Tjana̧ japea̧didibe? Danȩrȩ, mȩnȩro̧ coa a̧dorërea̧ ji̧, jabechji̧ pio coa tjamo̧ri̧ a̧dotämi̧ cjiaji̧ri̧ oa darëremȩrequededibe. Ado cüdë dibë yo̧a̧rä judi, “Aja̧, dibëa̧ dacho oa yürüchji̧coe” yo̧a̧rä judi, jabechji̧ yürürea̧ daea̧rä judi tjamo̧ri̧ yürüa̧täreji̧ri̧renȩro̧coe, coa tjamo̧ri̧ a̧dotämi̧ cjiaji̧ri̧rȩ.

¹⁶ Jabo ¿yö̧ta dari̧ jo̧rȩtaji̧ri̧pea̧renȩro̧coe yaba̧? ¿Pio coa eadëji̧ri̧pea̧? Cüdë dibë tjamo̧i̧ cjiari̧ baämȩ ma̧ȩ pio ju̧i̧ yürüa̧ oaiä, ¿dibë eadëmȩmi̧ da oa darenȩro̧coe yaba̧? Pio ju̧i̧ jo̧rȩtamȩrȩ iëno̧ë ta̧rërequededibe.

¹⁷ Danȩrȩ, dibë oëra̧ a̧ra̧ano̧ji̧ri̧ pio judiro̧ järi tjamo̧dirȩ davä pio dibë boapea̧ ji̧. Tjamo̧ davä. Judiorë yo̧rërea̧ ma̧ȩrä cjo̧ro̧tä a̧ra̧ano̧ji̧ri̧ pio judiro̧ goaeri̧ japaji̧ri̧rȩ ea tjamo̧cji̧ quëna̧ japadiro̧dibe jibëa̧ bubarä chjare yu̧ë a̧dopapea̧ oa, pio coa jiadapea̧ oa. Tjamo̧ davä. Pio jibëiäpȩmo̧ ma ba chia datä eatadiro̧dibe pio coa jiadapea̧ oa, pio coa ba chia jo̧rȩtachea oa. Aja̧ ca̧ oti̧, järi tjamo̧dirȩ ja̧di dari̧ japapea̧ ji̧.

¹⁸ Jabo dëdë, judiro̧ dibë tjamo̧ri̧ earä judi, pio dibë tjamo̧ri̧ a̧dotämi̧ cjiarä judi, jabechji̧ chjadëtäremȩde coaiä. Peaja̧di dari̧ jo̧rȩtarequededibe cüdë. Jabechji̧ ji̧dë ma a̧dotämi̧ cjiamȩrȩ jo̧rȩtarequededibe jachiräpȩ cjiamȩborë.

¹⁹ 'Jabechji̧ ca̧ u̧ri̧diro̧ca̧da' quëna̧ jo̧rȩtarequededibe, gito ana̧ri̧ jo̧rȩtamȩrȩ. Jabechji̧ cüdë pio dibë chjiari ana̧ri̧ ja̧beparërea̧ ji̧, jabechji̧ ado chjereno̧ ja̧beparequede pio dibë a̧dopea̧ oa. Jabechji̧ iei̧ jini̧ bomai̧yi̧rȩ boi̧chji̧ ji̧ gitori̧ arami̧ dari̧ ado chjereno̧ ja̧beparequede, gitori̧ jo̧rȩtamȩrȩ. Aja̧, mȩnȩro̧ Quiricho pio judimi̧ dapea̧rä yuro ja̧beparequede ca̧ oti̧.

²⁰ Chia chia, pio ju̧ri̧pȩ tjamo̧ri̧ cjiatämi̧ cjiarequede pio dibë nö̧ta. Jabechji̧ chjadëri̧ ni̧bä chjaopea̧ oa, ma̧ȩ bücjüi̧ra̧ ni̧bä chjaopea̧ oa pio ju̧ri̧pȩ cjiatäremȩrequede. Jabo cjäri̧ marequede, jachi tjamo̧ cjiarequede. Ado ¿yö̧ta dari̧ a̧dotäremȩcjivaquiji̧ri̧? quëna̧ jo̧rȩtarequededibe, pio dibë chjiari bücjüri̧ cjia tjamo̧mȩrȩ.

Abaraa̧rea̧ ja ivi yo̧a̧ri̧rȩ na̧rȩni̧roibe yo̧a̧ri̧ jo̧rȩtarea̧ ma̧ȩ pio ju̧i̧ chjiari

²¹ Mȩnȩro̧ orë jabë oëra̧ jo̧rȩtanȩrȩ Moicherë go̧ȩparërea̧ ma̧ȩ pio ju̧i̧ chjiari. 'Jabechji̧ pio jiro ma̧ȩ oa ta̧rëdiäa̧ oaiä jabechji̧parȩrea̧mi̧ dadida' quëna̧ jo̧rȩtanȩrȩ. Jabo cjäri̧ manȩrȩ, jabë tjamo̧ri̧ dabadënȩrȩ pio jiro ma̧ȩ pio ju̧i̧ chjiari.

²² Ado pio ju̧i̧iä chjadëri̧ a̧dotämi̧ cjiarequededibe. Danȩrȩ, Ütë tjamo̧ ja̧ ma̧ȩ pio ju̧i̧iä dabarea̧rȩ Abaraa̧ pio ju̧i̧ chjiari. Ado jibëa̧ u̧ri̧ pio ji̧ri̧ chjiari dabarea̧rȩ peaja̧di, yo̧a̧ri̧ oa ëba̧ pio ju̧i̧ chjiari. Ado cja̧rȩmȩ oa nö̧rirëremȩdejȩ mu̧i̧tjoi̧ iei̧ pio ji̧iä. Ado cja̧rȩmo̧ oa nö̧rirëremȩdejȩ mu̧i̧tjoi̧dëyi̧ iei̧ pio ji̧iä.

²³ Ichama̧ȩ judi, mu̧i̧tjoi̧ iei̧ pio jini̧ ara̧ oa cjiarëremȩ pio judi, jabechji̧ Ütë tjamo̧ ja̧ ma̧ȩrä ara̧ oa cjiadërëremȩde, jabo jabechji̧ pumȩ judiro̧ jibëa̧ bori̧ ji̧ri̧ nö̧rirëmi̧ cjiari̧ nö̧ria̧ oa cjiarëremȩde. Jabo ja̧didërëremȩde ado cja̧rȩmo̧ pio ju̧i̧iä, Icha pio ju̧i̧iä. Jabechji̧ Ütë tjamo̧ judi yo̧ë cji̧därërea̧ ma̧ȩ pio ju̧i̧iä ara̧ oa cjiarëremȩde. Tjamo̧ davä. Mu̧i̧tjoi̧dëyi̧ iei̧ pio jini̧ ara̧ oa cjiarëremȩ judi, jabechji̧ ara̧ oa cjiarëremȩde Ütë tjamo̧ ja̧ ma̧ȩ pio ju̧i̧iä.

²⁴ Ado danȩrȩ, Abaraa̧ ja̧ ivi jini̧ro̧ yo̧a̧ri̧borë, jabechji̧ chjadëri̧ na̧rȩni̧ro̧ibe yo̧a̧ri̧ jo̧rȩtarea̧ ma̧ȩ pio ju̧i̧ chjiari. Jabechji̧ Aga jini̧, mu̧i̧tjoi̧ iei̧ pio jini̧, jabechji̧ Ütë tjamo̧ judi Moiche pio ju̧i̧iäpȩmo̧ yürürërea̧ ma̧ȩ pio ju̧i̧ chjiari na̧rȩni̧ibe. Aja̧, Chinai quȩmȩ ya̧mi̧räpȩ ju̧ri̧ yürürërea̧ ma̧ȩ pio ju̧i̧ chjiari na̧rȩni̧ibe. Ado pio jiro ma̧ȩrä cjo̧ro̧ji̧ri̧ pio judiro̧, jabechji̧ mu̧i̧tjoi̧mi̧ dari̧ cjo̧ro̧ maeadirȩ. Jare chjadüa̧ oa cjiami̧ dari̧ cjo̧ro̧dë madirȩ.

²⁵ Tjamo̧ davä. Aga jini̧ Arabia quȩmȩ chiriräpȩ chamȩ ya̧mi̧ pio ju̧i̧ chjiari na̧rȩni̧ibe, Chinai quȩmȩ ya̧mi̧ pio ju̧i̧ chjiari. Ütë judi jibëa̧ ma̧ȩ oa Moiche ju̧i̧iäpȩmo̧ yürürërea̧ ya̧mi̧ pio ju̧i̧ chjiari na̧rȩni̧ibe. Peaja̧di dai chirirä cjiamȩ bë ma̧ri̧ pio ju̧i̧ chjiari na̧rȩni̧ibe Aga jini̧, Jerucharȩ bë ma̧ri̧ pio ju̧i̧ chjiari. Ado pio jiro bë ma̧ri̧rä cjo̧ro̧ji̧ri̧ judio pio judiro̧ mu̧i̧tjoi̧mi̧ dari̧ cjo̧ro̧ maeadirȩ. Moicherë go̧ȩparërea̧ ma̧ȩrä cjo̧ro̧a̧ oaiä mu̧i̧tjoi̧mi̧ dari̧ cjo̧ro̧dirȩ.

²⁶ Jabo Chara jini̧ ja̧di dari̧ na̧rȩdëni̧ibe. Jabechji̧ tjaoëpai̧ dari̧ na̧rȩni̧ibe. Danȩrȩ, mu̧i̧tjoi̧ iei̧dënȩ jabo jare chjadüa̧ oa cjiami̧ dari̧ cjianȩ. Ado a̧ro̧rȩ Moicherë go̧ȩparërea̧ pio ju̧i̧ ja̧ chja̧oerädë tara, jabechji̧ Chara pio judiri ja̧ji̧ri̧mi̧ dari̧ cjiarea̧rȩ, jare chjadüa̧ oa cjiami̧ dari̧. Ado pio judiri ja̧ji̧ri̧mi̧ da oaiä, jabechji̧ japamitë chjätä ëte, a̧dëräpȩ cjo̧ro̧parea̧rȩ bucho ana̧, Jerucharȩ peaja̧räpȩ ju̧ri̧.

²⁷ Peaja̧di ta̧rëri̧ go̧ȩpea̧ oa cjiarëremȩde ma̧ȩ üdë jabërä a̧dëräpȩ cjiamȩ Jerucharȩ peaja̧ pio ju̧i̧ chjiari. Ta̧rëchji̧vä: “Damȩ iei̧, ma̧ chiadëri̧ cjiaje mȩnȩ cja̧rȩmȩ co aradëa̧räbo. Jabechji̧ ma̧ chiadëri̧ cjiayi̧rȩ ëna̧diäje, mȩnȩ ararea̧ gito oa jabë taradëa̧räbo. Jabechji̧ jibëa̧ üi̧ oa ëbayi̧ pio ji̧ u̧i̧ ëbapamȩ na̧ u̧ri̧ ji̧ri̧. Jabechji̧ na̧ea̧ri ja̧ji̧ri̧ pio judiro̧ a̧dë chjäte ji̧ra̧ri̧ cjiadiäpadiro̧. Pio ju̧i̧iä yo̧cama̧. Ma̧ chiadëri̧ cjiaje.” Aja̧, ja̧di ta̧rëri̧ go̧ȩpea̧ oa cjiade yabo yürüa̧ pënȩrä.

²⁸ Ado pio mȩnȩro̧ ca̧ oti̧, Icha pio judimi̧ danȩrȩ. Jabechji̧ Icha judi Ütërë yo̧ë cji̧därërea̧ ma̧ȩ oaiä ara̧ oa cjiarëremȩde. Ado peaja̧dide pio dibëiä. Ütërë yo̧ë cji̧därërea̧ ma̧ȩ oaiä ado nö̧ria̧ oa cjiami̧ dari̧ cjiarëreji̧ri̧nȩrȩ, pio ju̧i̧ ja̧ u̧ri̧pe järea̧mi̧ dari̧.

²⁹ Jabo Aga joja pio judi ja̧di dari̧ ara̧ oa cjiadërëremȩde. Ütërë yo̧ë cji̧därërea̧ ma̧ȩ oaiä ara̧ oa cjiadërëremȩde. Ado Danȩrȩ, Ütërë yo̧ë cji̧därërea̧ oaiä ara̧ oa cjiadërëremȩ judi conȩdarëremȩdejȩ Tjo tjamo̧ pio ju̧i̧iä ara̧ oa cjiarëremȩ pio ju̧i̧. Tjamo̧ davä. Ja̧di dari̧ japarëremȩdejȩ Ichama̧i̧ judi Icha pio ju̧i̧. Ado yaba̧ pio mȩnȩro̧borë conȩda̧ oa cjianȩrȩ Moicherë go̧ȩparërea̧ ma̧ȩrä cjo̧ro̧tä eataji̧ri̧ pio ji̧ri̧iä. Tjamo̧ davä. Ichama̧i̧ judi jibëa̧ durimȩ ju̧i̧ conȩdarërea̧mi̧ conȩdadiro̧dibe peaja̧di. Aja̧, cja̧rȩmȩ co nö̧ria̧ oa cjiaji̧ri̧ pio judiro̧ conȩdadiro̧ibe yaba̧ Tjo tjamo̧ pio ju̧i̧iä jauëchja cjiari̧ ado nö̧ria̧ oa cjiaji̧ri̧ pio ji̧ri̧.

³⁰ Jabo ¿tjana̧ yo̧diibe ma̧ȩ üdë Aga pio ji̧ chjiari, ado joja pio ju̧i̧ chjiari? Tjana̧ yo̧dë, jabechji̧ ja̧di ta̧rëri̧ yo̧diibe: “Aja̧, baä tänȩjȩ iei̧ mu̧i̧tjoi̧ pio ji̧. Joja pio ju̧i̧bo baä tänȩjo̧ȩ. Jabechji̧ mu̧i̧tjoi̧ iei̧ ja̧ joja üdë jäjäa pio ju̧i̧ ja̧remȩ pio ju̧i̧ mitërea̧ dadëpade. Jäjäarë goë boea̧ pio ju̧i̧ mitërea̧ dadëpade. Ado pio ju̧i̧iä jabechji̧, baä tänȩjȩrȩ mu̧i̧tjoi̧ iei̧ ji̧, jojabo. Jabo Icha judi jäjäa pio ju̧i̧ ja̧remȩ pio ju̧i̧ mitërea̧ dapade. Jabechji̧ mu̧i̧tjoi̧ iei̧rȩ ara̧ oa cjiadë tara, mitërea̧ dapade.” Aja̧, ja̧di ta̧rëri̧ yo̧diibe ma̧ȩ üdë.

³¹ Ado pio ju̧i̧iä yo̧requededibe ca̧ oti̧. Danȩrȩ, a̧ro̧rȩ mu̧i̧tjoi̧ iei̧ pio ji̧ ja̧ u̧ri̧dë marea̧rȩ, jabo iei̧ mu̧i̧tjoi̧dëyi̧ pio ji̧ ja̧ u̧ri̧rea̧rȩ.