Garata Ma̧ȩ 3 - Biblia Pume

Moicherë go̧ȩparërea̧ ma̧ȩrä cjo̧ro̧dëpea̧de, jabo quëna̧ji̧ri̧rȩ cjo̧ro̧pea̧de

¹ Jabo cjäri̧ manȩrȩ, japë taraji̧ri̧nȩrȩ. Jabechji̧ pio mȩnȩro̧, Garachia quȩmȩräpȩ quëna̧ji̧ri̧ pio judiro̧ urëdi oa jo̧rȩtarea̧ chiadëji̧ri̧mi̧ dari̧ cjo̧ro̧nȩrȩ. Dibëa̧ chji̧ra̧ jo̧rȩtadëji̧ri̧mi̧ dari̧ cjoronȩrȩ. Danȩrȩ, ¿chjiarë u̧i̧pea̧ oa cjoronȩrȩ? ¿Chjiarë u̧i̧pea̧ oaiä a̧dë jo̧rȩtaji̧ri̧pea̧renȩro̧jo̧ȩ tjamo̧i̧ cjiari̧ baämȩ ma̧ȩ pio ju̧i̧? Danȩrȩ, dibëa̧ dachora̧ chjadë maeari̧ darea̧mi̧ dari̧ carupë a̧ra̧ano̧rëremȩrequededibe davä Jechu Quiricho pio ju̧i̧ chjiari, toro ja̧boa̧mȩ pio ju̧i̧ chjiari. Aja̧, ütëbodärärë chjadë maeari̧ darea̧mi̧ dari̧ a̧ra̧ano̧a̧requededibe. ¿Jabo chjiarë u̧i̧pea̧ oa cjiadiäa̧nȩrȩ?

² Danȩrȩ, pio yoamo̧i̧ ma̧ȩra̧ iëno̧ë ta̧rëtämi̧ cjiarequededibe. ¿Tjana̧ ju̧i̧iä chiaji̧ri̧pea̧renȩro̧jo̧ȩ Tjo tjamo̧ pio ju̧i̧? Moicherë go̧ȩparërea̧ ma̧ȩ pio ju̧i̧ ta̧rëdiäa̧ oaiä chiaji̧ri̧pea̧? Jabo ma̧ȩ chjadëi̧ pio ju̧i̧ quëna̧ oaiä chiaji̧ri̧pea̧?

³ Cjäri̧ ma, a̧dë chjäte oëra̧ti̧ oa jo̧rȩtaji̧ri̧pea̧nȩrȩ. Danȩrȩ ca̧ oti̧, mȩnȩro̧ ma̧ȩ chjadëi̧ oa pearä quëna̧rërea̧ ji̧, jabechji̧ Ütë tjamo̧ judi yürüa̧didibe Tjo tjamo̧ oa pio dibë chjadëri̧ a̧dopea̧ oa. Ado pio ju̧i̧ ja̧ ju chiarea̧ra̧ pio ju̧ri̧ra̧ chjadëri̧ taruparëreji̧ri̧nȩrȩ. Jabo yaba̧ ¿yö̧ta japanȩrȩ? ¿Yö̧ta dari̧ jo̧rȩtanȩrȩ? 'Chja ja̧di ibëa̧ ju chiarea̧ra̧ pio ju̧ri̧ra̧ ano̧ mire cjo̧ro̧paa̧ro̧da yaba̧, ibëa̧ ju chiarea̧ra̧ pio ju̧ri̧ra̧ ütëchjai̧padärärea̧ dapai̧ da jiroa̧ro̧da' ¿quëna̧ji̧ri̧pea̧? Cjäri̧ ma, ja̧di dari̧ quëna̧rea̧mi̧dëde.

⁴ Danȩrȩ, mȩnȩro̧ Jechu pio ju̧i̧ pearä quëna̧rërea̧ ji̧, conȩdae chjaorëreji̧ri̧diro̧dibe judio judiro̧. Jabo goaedëräbo, jabechji̧ chjuari̧ quëna̧rëreji̧ri̧nȩrȩ uapadëji̧ri̧rȩ. Ado ¿yö̧ta jo̧rȩtapea̧de yaba̧? 'Aja̧, a̧ro̧rȩ chjai̧dëri̧ chjätäa̧ chjö̧na̧i̧rȩ a̧dodëa̧diibëda, badëri̧ cjiadiäa̧mi̧ dari̧ cjiadida' ¿quëna̧pea̧? Mȩnȩro̧ chjai̧dëri̧ chjätäa̧rä pio dibë a̧doremȩ quëna̧rea̧ üdë 'badëdida' ¿quëna̧pea̧ yaba̧? ¿Mȩnȩro̧ chjuari̧ quëna̧ pio ju̧i̧ aeno̧pea̧?

⁵ ¿Tjana̧ ju̧i̧iä yürürëremȩdidibe Tjo tjamo̧ oa Ütë tjamo̧ judi? ¿Tjana̧ ju̧i̧iä jauëchja cjiari̧ na̧rȩrea̧ yürürëremȩdidibe? Mȩnȩro̧ Moicherë go̧ȩparërea̧ pio ju̧i̧ ta̧rëdiäa̧ oaiä, ¿yürüa̧? Cjäri̧ madidibe, pio ju̧i̧iädë, jabo jabechji̧ mȩnȩro̧ ma̧ȩ chjadëi̧ pio ju̧i̧ quëna̧ oaiä yürürëremȩdidibe.

⁶ Aja̧ ca̧ oti̧, jo̧rȩtatäreji̧ri̧rea̧ro̧jo̧ȩ Abaraa̧rea̧ pio ju̧i̧. Danȩrȩ, ja̧di ta̧rëri̧ go̧ȩpea̧ oa cjiarëremȩde ma̧ȩ üdë pio ju̧i̧ chjiari: “Ado jibëa̧ ma̧ȩ pio ju̧i̧ ta̧rëa̧ oaiä, jabechji̧ Ütë tjamo̧ pio ju̧i̧ quëna̧mȩpea̧de Abara̧ judi. Ado quëna̧mȩpea̧mȩ oa jabechji̧parȩrëremȩdejȩ Ütë tjamo̧ judi.” Aja̧, ja̧di ta̧rëri̧ go̧ȩpea̧ oa cjiade ma̧ȩ üdë Abaraa̧rea̧ pio ju̧i̧ chjiari.

⁷ Ado pio ju̧i̧iä tjamo̧ri̧ dabarea̧ darea̧rȩ Abaraa̧ri ja̧ji̧ri̧ pio ji̧ri̧ chjiari. Jabechji̧ pio ju̧i̧ cho̧rë quëna̧ji̧ri̧ pio judiro̧ tjamo̧dirȩ pio judiri ja̧ji̧ri̧ judiro̧.

⁸ Ado danȩrȩ, Ütë tjamo̧ ja̧ ma̧ȩ üdë judiodë pio ji̧ri̧ chjiaribo jabërä go̧ȩpea̧ oa cjiarëremȩde, judiro̧ quëna̧ oaiä jabechji̧parȩa̧ oa cjiapea̧ pio ju̧i̧ chjiari. Ado pio jiro ma̧ȩ chjadëi̧ pio ju̧i̧ chjiari jabërä ni̧bärëremȩdejȩ Ütë tjamo̧ judi Abaraa̧ pio ju̧i̧iäpȩmo̧. Ado ja̧di ta̧rëri̧ yo̧a̧dejȩ: “Ado chiri nö̧tai̧ oa cjo̧ro̧ji̧ri̧ pumȩ pio judiro̧ ütëborë chjadëri̧ cjo̧ro̧rea̧ dapadirȩ pio mȩaiä.” Aja̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë judiodë quëna̧pea̧ pio ju̧i̧ chjiari.

⁹ Ado pio ju̧i̧iä tjamo̧ri̧ dabarea̧rȩ. Jabechji̧ eami̧ pumȩ judiro̧ Quiricho pio ju̧i̧ quëna̧rä judi, jabechji̧ chjadëri̧ cjo̧ro̧rea̧ dapadirȩ. Aja̧, Abaraa̧ pio judi quëna̧ oaiä chjadëri̧ cjo̧ro̧rea̧ darërea̧mi̧ dapadirȩ peaja̧di Abaraa̧ pio ju̧i̧ cho̧rë quëna̧ji̧ri̧ pio judiro̧.

¹⁰ Jabo eami̧ pumȩ judi, 'Aja̧, Moicherë go̧ȩparërea̧ ma̧ȩ pio ju̧i̧iä jabechji̧parȩrea̧ dapaquëda' quëna̧mȩ pio ju̧i̧ acji cjatäpadejȩ Ütë ja̧ ërecjiarea̧ üdë. Peaja̧di ta̧rëri̧ go̧ȩpea̧ oa cjiade ma̧ȩ üdë. Ta̧rëchji̧vä: "Eami̧ pumȩ üdë Moicherë go̧ȩparërea̧ ma̧ȩ pio ju̧i̧ nö̧tadäräri̧ ta̧rëdiädërä judi, cja̧rȩmȩ coi̧ oëra̧diärea̧ decjiari̧ ta̧rëdiädërä judi, jabechji̧ Ütë ja̧ ërecjiarea̧ pio judi acji cjatäpadejȩ." Aja̧ ja̧di ta̧rëri̧ go̧ȩpea̧ oa cjiade.

¹¹ Ado pio ju̧i̧iä chjadë maeade ca̧ oti̧. Jabechji̧ eami̧ pumȩ üdë Moicherë go̧ȩparërea̧ ma̧ȩ pio ju̧i̧iä jabechji̧parȩrea̧mi̧dëde. Pio ju̧i̧iä ja̧di ta̧rëri̧ go̧ȩpea̧ oa cjiade ma̧ȩ üdë yabo yürüa̧ pënȩrä: "Quëna̧ pio ju̧i̧iä jabechji̧parȩa̧ oa cjiamȩ pumȩ pio judi goae tarari̧ cjo̧ro̧rea̧ dapade." Aja̧, ja̧di ta̧rëri̧ go̧ȩpea̧ oa cjiade.

¹² Jabo danȩrȩ, Moicherë go̧ȩparërea̧ ma̧ȩrä cjo̧ro̧a̧ üdë tjaoë tjamo̧de. Quëna̧ pio ju̧i̧iä ja̧ȩ cjiami̧ dari̧ cjiadëde, jabo ta̧rëdiäpea̧ maeade. Jabechji̧ pio jiro chja̧oerä cjo̧ro̧mȩ judi quëna̧mȩrȩ cjo̧ro̧rea̧mi̧dëde. Ado peaja̧di ta̧rëri̧ go̧ȩpea̧ oa cjiade ma̧ȩ üdë: "Moicherë go̧ȩparërea̧ ma̧ȩ chjö̧na̧i̧däräti̧ oa nö̧tadäräri̧ ta̧rëdiämȩ pio judimo̧rȩ cjo̧ro̧rea̧ dapade." Aja̧, pio ju̧i̧ yo̧de. Quëna̧rea̧ pio ju̧i̧ chjiari yo̧dë madiibe, jabo nö̧tadäräri̧ ta̧rëdiäpea̧ pio ju̧i̧mo̧i̧ yo̧diibe. Jabo cjäri̧ madirȩ, pumȩ judiro̧ nö̧tadäräri̧ ta̧rë ta̧rë japadärärea̧mi̧dëri̧ cjiade.

¹³ Jabo danȩrȩ, Quiricho pio judi tuti japarëremȩde Ütë ja̧ ërecjia üdë pio ibëiäpȩmo̧ acji cjatächea oa. Tjamo̧ davä. A̧ro̧rȩ Moicherë go̧ȩparërea̧ ma̧ȩ oa nö̧tadäräri̧ ta̧rëdiädëa̧ ba oa bape acji cjatätärea̧ ji̧, Quiricho pio ju̧i̧iäpȩmo̧ ano̧ mire acji cjatärëremȩdejȩ pio a̧ro̧rȩ Moicherë go̧ȩparërea̧ ma̧ȩrȩ yo̧a̧ chja̧oeri pio judiri go̧dürea̧mi̧ dari̧. Peaja̧di ta̧rëri̧ go̧ȩpea̧ oa cjiade ma̧ȩ üdë: "Eami̧ pumȩ üdë toro cji̧de ja̧bo tänȩa̧ oa cjiarä judi, jabechji̧ Ütë ja̧ ërecjiarea̧ pio judi acji cjatäpadejȩ."

¹⁴ Ado Jechu Quiricho pio ju̧i̧iäpȩmo̧ ano̧ mire acji cjatäa̧ oaiä, jabechji̧ Ütërë Abaraa̧ pio ju̧i̧iäpȩmo̧ yo̧ë cji̧därërea̧ ma̧ȩ üdë judiodë pio ji̧ri̧ ja̧bode. Tjamo̧ davä. Jechu Quiricho judi tuti ja̧beparërea̧ oaiä, jabechji̧ judiodë pio ji̧ri̧ ja̧bode. Ado pio ju̧i̧iä jabechji̧, a̧ro̧rȩ quëna̧ pio oaiä, Ütërë yo̧ë cji̧därërea̧ pio ju̧i̧ chiaji̧ri̧pea̧rea̧rȩ, Tjo tjamo̧ pio ju̧i̧.

Moicherë go̧ȩparërea̧ ma̧ȩ üdë badëri̧ cjiadiä tänȩdëa̧dejȩ Ütërë Abaraa̧ pio ju̧i̧iäpȩmo̧ yo̧ë cji̧därërea̧ ma̧ȩ oa

¹⁵ Danȩrȩ ca̧ oti̧, dai chirirä ja̧ na̧rȩrea̧ ma̧ȩmi̧ da oa go̧ȩpe chadürequededibe yaba̧, mȩnȩro̧ chjadëri̧ dabapapea̧ oa. Danȩrȩ, pumȩ judiro̧ yo̧a̧ri̧rȩ cja̧rȩmȩ chji̧ chiami̧ dari̧ yo̧ë cji̧därä judi, chjadëri̧ ni̧bäa̧ oa cjia ëte yo̧ë cji̧därä judi, jabechji̧ jënȩro̧ jo̧rȩta̧ chjö̧na̧i̧ oa chjadëri̧ ütarë go̧ȩpadiro̧jo̧ȩ go̧ȩ irä. Aja̧, cjiadiädëri̧ chjö̧na̧i̧ oa go̧ȩpadiro̧jo̧ȩ judiro̧ ni̧bä chjaoa̧ chjö̧na̧i̧rȩ chjadëri̧ go̧ȩpea̧ oa cjiapea̧ oa. Ado ja̧dëa ji̧ jibëa̧ quȩ oa a̧de go̧ȩpadiro̧jo̧ȩ. Aja̧, yo̧a̧ri̧borë jibëa̧ quȩ oa a̧de go̧ȩpadiro̧jo̧ȩ go̧ȩ i oa. Ado ja̧di dari̧ japea̧ oaiä, jabechji̧ judiro̧ yo̧ë cji̧däa̧ üdë chjadë maeari̧ cjiade, jiadarea̧ decjiari̧, tjaoëpe järea̧ decjiari̧, duridëparȩrea̧ decjiari̧.

¹⁶ Ado Ütë tjamo̧ judi peaja̧dimi̧ dari̧ yo̧ë cji̧därëremȩdejȩ Abaraa̧ pio ju̧i̧iäpȩmo̧, jibëa̧ ja pio ju̧i̧iäpȩmo̧bo. Ado danȩrȩ, a̧ro̧rȩ pio yabo go̧ȩpea̧ pio ju̧i̧ go̧ȩ ni̧bäa̧ ji̧, jabechji̧ "jibëa̧ u̧ri̧ pio ji̧ri̧iäpȩmo̧bo" yo̧mȩ ma̧ȩra̧ go̧ȩpea̧ oa cjiadëde jabo "jibëa̧ ja pio ju̧i̧iäpȩmo̧bo" yo̧mȩ ma̧ȩra̧ go̧ȩpea̧ oa cjiade. Jabechji̧ u̧ri̧ ji̧ra̧ pio ji̧ri̧ chjiari yo̧dërea̧de, jabo cja̧rȩmȩ pio ju̧i̧ chjiari yo̧rea̧ maeade. Jabechji̧ Quiricho pio ju̧i̧ chjiari yo̧rea̧de.

¹⁷ Ado Pablo judi ¿tjana̧ yo̧cji̧vadi? quëna̧chea oa, jabechji̧ chjadëri̧ yo̧parequededibe. Danȩrȩ, Ütë tjamo̧ judi no̧mȩ tjamo̧ri ja̧ Abaraa̧ pio ju̧i̧iäpȩmo̧ yo̧ë cji̧därërea̧ ji̧, ja̧di dari̧ yo̧rëremȩde jënȩ yo̧ë cji̧däa̧ pio ju̧i̧ chjiari: “Danȩ, cüdë yo̧a̧mi̧ japaparequede” yo̧rëremȩde. Aja̧, ano̧ mire jo̧rȩtarea̧ decjiari̧ yo̧rëremȩdejȩ Abaraa̧ ju̧i̧ Ütë tjamo̧ judi. Ado pio ju̧i̧iä ji̧dë duri oa Ütë tjamo̧ judi Moiche pio ju̧i̧iäpȩmo̧ ma̧ȩ yürürërea̧ ji̧, 430 ui chjätä ëte pio ju̧i̧iäpȩmo̧ yürürërea̧ ji̧, jabechji̧ pio jiro ma̧ȩ üdë badëri̧ cjiadiä tänȩdërëremȩdejȩ jënȩ Abaraa̧ pio ju̧i̧iäpȩmo̧ jabërä yo̧ë cji̧däa̧ pio ju̧i̧. Jabechji̧ Ütë tjamo̧ judi Moiche pio ju̧i̧iäpȩmo̧ ado cja̧rȩmo̧ ma̧ȩ oa yürüa̧räbo, jabechji̧ ba chia tjamo̧mȩrȩ cjiadiäa̧de jënȩ jabërä yo̧ë cji̧därërea̧ ma̧ȩ pio judi.

¹⁸ Jabechji̧ a̧ro̧rȩ Moicherë go̧ȩparërea̧ ma̧ȩ oa ta̧rëdiäa̧ oaiä mitërea̧ daea̧rä judi, pio jiro ma̧ȩ oa ta̧rëdiäa̧ oaiä Ütërë yo̧ë cji̧därërea̧ pio ju̧i̧ mitërea̧ daea̧rä judi, ¿tjana̧ ju̧i̧iä jabechji̧parȩrea̧ yürürëremȩdiibe Ütë tjamo̧ judi? ¿Moicherë go̧ȩparërea̧ ma̧ȩ pio ju̧i̧ ta̧rëdiäa̧ oaiä yürüa̧diibe? Cjäri̧ madiibe, pio ju̧i̧iä yürüdëa̧diibe. Jabechji̧ pio ibë cjäri̧ri̧ cjia da̧ pio ju̧i̧iämo̧i̧ yürüa̧diibe. Ado jënȩ Abaraa̧ pio ju̧i̧ yo̧ë cji̧därërea̧ pio ju̧i̧iä jabechji̧parȩrea̧ yürürëremȩdiibe. Ado peaja̧dirëremȩdejȩ Abaraa̧ pio ju̧i̧. Jabechji̧ Ütë tjamo̧ judi yo̧ë cji̧därërea̧ pio ju̧i̧iä jabechji̧parȩrea̧ yürürëremȩdejȩ.

¹⁹ Jabo Abaraa̧ pio ju̧i̧iäpȩmo̧ ma̧ȩ yürü ëte, ¿tjana̧ ju̧i̧iä a̧de yürürëremȩdejȩ Moiche pio ju̧i̧iäpȩmo̧? ¿Tjana̧ ju̧i̧iä jënȩ yo̧ë cji̧därërea̧ ma̧ȩ pio ju̧i̧ uëri a̧de yürürëremȩdejȩ ichi chjö̧na̧i̧ ma̧ȩ oa? Tjana̧ ju̧i̧iädë, jabechji̧ a̧ro̧rȩ chjai̧dëri̧ japea̧ pio ju̧i̧ chjiari coëma cjiari̧ jo̧rȩtapea̧ oa a̧de yürürëremȩdejȩ. Aja̧, pumȩ judiro̧ ütëborë ichi chjö̧na̧i̧ ma̧ȩrȩ yo̧a̧ chja̧oerä cjo̧ro̧pea̧ oa a̧de yürürëremȩdejȩ a̧ro̧rȩ pio jiro ma̧ȩrä cjo̧ro̧pea̧ oa Abaraa̧ri ja̧mȩ pio judi ma̧na̧rä yuro, Ütërë yo̧ë cji̧därërea̧ pumȩ pio judi ma̧na̧rä yuro. Ado danȩrȩ, Ütë tjamo̧ judi ichi chjö̧na̧i̧ ma̧ȩ oa icharaita pio ji̧ri̧iäpȩmo̧ yürürërea̧ ji̧, a̧dëriji̧ri̧ mu̧i̧tjoi̧ pio ji̧ri̧iä yürürërea̧ ji̧, jabechji̧ icharaita pio ji̧ri̧iäpȩmo̧ irä yürümȩmi̧ dari̧ yürüdëa̧dejȩrȩ jabo tjoromȩmi̧ da pio ju̧i̧iä yürürërëmȩdejȩrȩ, Moiche pio ju̧i̧iä.

²⁰ Jabo danȩrȩ, ja̧di dari̧ japadërëremȩde Ütë tjamo̧ judi Abaraa̧ pio ju̧i̧iäpȩmo̧ yo̧ë cji̧därërea̧ ji̧. Jabechji̧ Abaraa̧ pio ju̧i̧ yo̧ë cji̧därërea̧ ji̧, tjoromȩ pio ju̧i̧iä ni̧bädërëremȩdejȩ jabo irä ni̧bämȩmi̧ dari̧ ni̧bärëremȩdejȩ, pio ju̧i̧iäpȩmo̧ tjamo̧i̧. Aja̧, cja̧rȩmȩrȩ, cja̧rȩmȩ jo̧rȩtarea̧ chiamȩrȩ irä yürümȩmi̧ dari̧ ni̧bärëremȩdejȩ, ado cja̧rȩmo̧ pumȩ pio ju̧i̧iä goë ni̧bärea̧ decjiari̧. Ado pio ju̧i̧iä chjadëri̧ dabarea̧rȩ. Jabechji̧ Ütë tjamo̧ judi Moiche pio ju̧i̧iäpȩmo̧ yürürërea̧ ma̧ȩ pio ju̧i̧iä ji̧dë u̧i̧ ba chiade davä Abaraa̧ pio ju̧i̧iäpȩmo̧ yo̧ë cji̧därërea̧ ma̧ȩ üdë.

²¹ Jabo ¿yö̧ta dari̧ jo̧rȩtapea̧de Moicherë go̧ȩparërea̧ ma̧ȩ pio ju̧i̧ chjiari? ¿Pio jiro ma̧ȩ üdë dëbëpe chjaomi̧ dari̧ japadejȩ Ütërë Abaraa̧ pio ju̧i̧iäpȩmo̧ yo̧ë cji̧däa̧ ma̧ȩ oa? Cjäri̧ madejȩ, dëbëpe chjaomi̧ dari̧ japadë madejȩ, jabo jabechji̧ chjadëri̧ a̧dodejȩ. Danȩrȩ, Moicherë go̧ȩparërea̧ ma̧ȩ üdë ibë bucho ana̧ cjo̧ro̧ tänȩrea̧ chiarä judi, jabechji̧ pio ju̧i̧iä jabechji̧parȩa̧ oa cjiadiäa̧täreji̧ri̧rea̧rȩ.

²² Jabo cjäri̧ made, ibë jabechji̧parȩrea̧mi̧dëde. Jabechji̧ chjai̧dë marea̧rȩ. Chjai̧dë pio ju̧i̧ ja̧ chja̧oerä cjo̧ro̧ marea̧rȩ chiri nö̧tai̧ oa cjo̧ro̧ji̧ri̧ judiro̧. Peaja̧di ta̧rëri̧ yo̧diibe ma̧ȩ üdë. Ado chjai̧dë pio ju̧i̧ ja̧ chja̧oerä cjia̧ oaiä, jabechji̧ tutia̧ oa cjiarea̧rȩ chaärea̧ bëmi̧ daräpȩ. Jabo danȩrȩ, Jechu Quiricho pio ju̧i̧iäpȩmo̧ quëna̧mȩ pio judi, jabechji̧ go̧dürea̧ dapade. Tjamo̧ davä. Jechu pio ju̧i̧ quëna̧mȩ judi Ütërë yo̧ë cji̧däa̧ pio ju̧i̧ mitërea̧ dapade. Jabechji̧ pio ju̧i̧iämo̧i̧ mitërea̧mi̧ dade.

²³ Danȩrȩ, pearä judi Jechu judi jabë ma̧na̧dëa̧rä, ma̧ȩ chjadëi̧ pio ju̧i̧ jabë quëna̧rea̧mi̧dërä, Moicherë go̧ȩparërea̧ ma̧ȩ pio judi chaäa̧ oa cjia tänȩmi̧ dari̧ japarëremȩdiibe, a̧ro̧rȩ quëna̧rea̧mi̧ dapea̧rä yuro.

²⁴ Tjamo̧ davä, pio ju̧i̧ ja̧ cha̧oerä cjo̧ro̧rëreji̧ri̧rea̧rȩ, pio ibë jidamȩmi̧ da pio ju̧i̧ ja̧ chja̧oerä. Jabechji̧ tüdüa̧mi̧ darä cjo̧ro̧ tänȩmi̧ dari̧ japarëremȩdiibe a̧ro̧rȩ Quiricho pio ju̧i̧iäpȩmo̧ quëna̧pea̧ ji̧ daea̧rä yuro. Ado ja̧dëa ji̧ a̧ro̧rȩ pio ju̧i̧iäpȩmo̧ quëna̧ji̧ri̧pea̧rä, jabechji̧parȩa̧ oa cjiadiäa̧rea̧rȩ.

²⁵ Ado yaba̧ Quiricho pio ju̧i̧iäpȩmo̧ quëna̧ji̧ri̧rȩ cjo̧ro̧a̧ oaiä, jabechji̧ Moicherë go̧ȩparërea̧ pio ju̧i̧ ja̧ chja̧oerä cjo̧ro̧dëji̧ri̧pea̧rea̧rȩ. Tjamo̧ davä. Pio ibë jidamȩmi̧ darëremȩ judi tüdüa̧mi̧ darä cjo̧ro̧ tänȩmi̧ dari̧ japadë madiibe yaba̧.

²⁶ Ado mȩnȩro̧ ütëborë Jechu Quiricho pio ju̧i̧iäpȩmo̧ quëna̧ oaiä, jabechji̧ Ütë tjamo̧ ja̧ u̧ri̧ mapea̧nȩrȩ, Quiricho pio judiri ja̧ mape bagaji̧ri̧rȩ.

²⁷ Jabechji̧ go̧e cjaeä chuda̧ oa cjiaji̧ri̧pea̧nȩrȩ Quiricho pio ju̧i̧ nö̧ta cja̧rȩmȩpe bagari̧, pio judiri ja̧ mape bagari̧. Jabechji̧ chjibo peaja̧ra̧ pio ju̧ri̧ra̧ ano̧ mire ina̧mi̧ dari̧ cjiaji̧ri̧pea̧nȩrȩ Quirichora̧ pio ju̧ri̧ra̧.

²⁸ Ado pio ju̧i̧iä jabechji̧, Ütë tjamo̧ judi cja̧rȩmȩ ba chia maeara̧ dadejȩrȩ pumȩ ütëbodärä oa, 'pio judi tjaoëdida' quëna̧rea̧ decjiari̧. Jabechji̧ judio ji̧ri̧, judiodë pio ji̧ri̧, gatëa̧ oa cjiaji̧ri̧ mu̧i̧tjoi̧ ji̧ri̧, ado mu̧i̧tjoi̧dë pio ji̧ri̧, ado oari ji̧ri̧, ado ivi pio ji̧ri̧, jabechji̧ cja̧rȩmȩ ba chia maeara̧ dadejȩrȩ ütëbodärä oa. Jabechji̧ Jechu Quiricho pio judiri ja̧ji̧ri̧pe baga maea oa dadidibe, cja̧rȩmȩ ba chia maeara̧.

²⁹ Ado mȩnȩro̧ Quiricho pio ju̧i̧ ja̧pe baga̧ oaiä, jabechji̧ Abaraa̧ pio judiri ja̧ji̧ri̧ tjamo̧pea̧nȩrȩ. Aja̧, pio ju̧i̧ ja̧ pumȩpea̧nȩrȩ. Ado pio judiri ja̧ji̧ri̧pea̧ oaiä, jabechji̧ Ütërë Abaraa̧ pio ju̧i̧iäpȩmo̧ yo̧ë cji̧därërea̧ pio ju̧i̧ mitërea̧ daea̧nȩrȩ peaja̧di, Ütë tjamo̧ judi goë boea̧ chjö̧na̧i̧ oa.