Garata Ma̧ȩ 2 - Biblia Pume

Jechurë chjadüa̧ o judiro̧ ëba cjiarëreji̧ri̧diro̧jo̧ȩ Pablo ju̧i̧

¹ Japamitë ana̧ tjamo̧ chjätä ëte, ichi chjö̧na̧i̧ jadüchiami̧ ui chjätä ëte, 14 ui chjätä ëte, jabechji̧ ado järëremȩrequede Jerucharȩräpȩ. Bernabe pio ju̧i̧ nö̧ta jäa̧requede, Tito pio ju̧i̧bo ëba jämȩrȩ.

² Jabechji̧ Ütë tjamo̧ judi coa chjadëri̧ na̧rȩa̧ oaiä, jäa̧requede, 'jätä eadicoada' quëna̧ jo̧rȩtamȩrȩ. Ja̧dëa ji̧ cüdë pio ju̧ri̧pȩ go̧düdäräa̧rä, tjamo̧ jidaji̧ri̧ pio ji̧ri̧ nö̧ta ëba a̧doparëremȩrequedejȩrȩ, quëna̧ji̧ri̧ judiro̧ ba chia daea̧ pio ji̧ri̧ nö̧ta. Aja̧, cüdë ja̧bepea̧ pio ju̧i̧ chjiari chjadëri̧ ni̧bä chjaopea̧ oa, goadi ëba a̧doparëremȩrequedejȩrȩ. Jabechji̧ Quiricho pio ju̧i̧ chjiari ma̧ȩ oa a̧ra̧ano̧a̧ pio ju̧i̧ chjiari, cüdë judiodë pio ji̧ri̧iäpȩmo̧ a̧ra̧ano̧a̧ pio ju̧i̧ chjiari chjadëri̧ ta̧rë tänȩa̧requedejȩrȩ. Jabechji̧ cüdë ja̧bepea̧ üdë dëbëpe chjaoa̧ oa cjiami̧ dari̧ cjiachea oa, cüdë ja̧bepea̧ pio judi tja̧reparȩa̧ oa cjiami̧ dari̧ cjiachea oa, ni̧bä chjaoa̧requedejȩrȩ, cüdë ja̧bepea̧ pio ju̧i̧ chjiari badë jo̧rȩtachea oa.

³ Ado chjadëri̧ ta̧rëa̧diro̧coe. Cüdë ja̧bepea̧ pio ju̧i̧ dëbëpe chjaodëa̧diro̧jo̧ȩ, jabo ‘chjadëdida’ quëna̧ ta̧rëa̧diro̧coe, ‘oëra̧ a̧ra̧ano̧a̧ jirodida’ quëna̧rea̧ decjiari̧. Ado pio ju̧i̧iä ca̧ jadü Tito pio ju̧i̧ budoa̧ oa cjia tänȩtärea̧ ji̧, judiodëmȩ pio ju̧i̧ budoa̧ oa cjia tänȩtärea̧ ji̧, jabechji̧ japadëa̧diro̧jo̧ȩ na̧e chiape baga̧ oaiä.

⁴ Jabo pumȩ judiro̧ orë, quëna̧cji̧ quëna̧ japaji̧ri̧ pio judiro̧ goadi chjare yu̧ë a̧doparea̧ darëreji̧ri̧dirȩ pio ibë nö̧ta. Aja̧, o judiro̧ a̧doa̧ oaiä, goadi yu̧a̧rea̧ darëreji̧ri̧dirȩ. Jabo cjäri̧ madirȩ, pio ibëiä chjadëri̧ dabapatämi̧ cjiaji̧ri̧rȩ yu̧a̧dëa̧dirȩ, jabo chjai̧dëri̧ jo̧rȩtaji̧ri̧rȩ yu̧a̧rëreji̧ri̧dirȩ pio a̧ro̧rȩ ni̧bä chjaoa̧ pio ju̧i̧ ütarë ta̧rëpea̧ oa, a̧ro̧rȩ Jechu Quiricho pio ju̧i̧iä jare chjadüa̧ oa cjiami̧ dari̧ cjo̧ro̧chea oa. Tjamo̧ davä. A̧ro̧rȩ ado chjereno̧ mu̧i̧tjoi̧mi̧ dari̧ cjo̧ro̧pea̧ oa, a̧ro̧rȩ ado chjereno̧ tabüa̧mi̧ dari̧ cjo̧ro̧pea̧ oa, goadi yu̧a̧rëreji̧ri̧dirȩ. Jabechji̧ Moicherë go̧ȩparërea̧ ma̧ȩrä ji̧dë ma cjo̧ro̧tä eatarëreji̧ri̧diro̧ibe, a̧ro̧rȩ pio jiro chja̧oeri go̧düa̧räbo.

⁵ Jabo cjäri̧ marea̧ro̧jȩrȩ, ta̧rë ja̧bodëa̧rea̧ro̧jȩrȩ. Jabechji̧ Quiricho pio ju̧i̧ chjiari a̧ra̧ano̧rea̧ ma̧ȩ üdë oëra̧pe bagachea oa, teracaba a̧ra̧ano̧rea̧ ma̧ȩra̧ mirea̧ oa cjiami̧ dari̧ cjiachea oa, jabechji̧ chjuari̧ jiada̧rea̧ro̧jȩrȩ chjaodëri̧. Aja̧, tjamo̧i̧ cjiari̧ baämȩ ma̧ȩ chjadëi̧ pio judi pumȩ ütëbo ja̧ oa chjadëri̧ boea̧ oa cjiapea̧ oa, jabechji̧ chjaodëri̧ jiada̧rea̧ro̧jȩrȩ.

⁶ Ado Jerucharȩräpȩ tjamo̧ jidaji̧ri̧ judiro̧ pio coa ta̧rëdäräa̧rä, 'jabechji̧ oëra̧ yo̧a̧diibëda, judi a̧ra̧ano̧a̧ üdë nö̧tadëdida, ado nö̧tadë oaiä jabechji̧ pio yoa ma̧ȩbo a̧de a̧ra̧ano̧pea̧dida' quëna̧ jo̧rȩtadëa̧diro̧coe. Jabo pio jiro oari judiro̧ ba chiarë eami̧ oa yo̧a̧bo, idëri̧ cjiadëa̧täremȩrequedejȩrȩ. Jabechji̧ cja̧rȩmȩ ba chia maeara̧ dadiibe Ütë tjamo̧ judi.

⁷ Jabo pio coaiä ta̧rëa̧ oaiä, jabechji̧ coëma cjiari̧ jo̧rȩtaji̧ri̧pea̧dirȩ pio coa chjiari. 'Aja̧, Ütërë yürüa̧ oa judiodë pio ji̧ri̧iäpȩmo̧ a̧ra̧ano̧rea̧ chiadida, Pedro pio ju̧i̧iäpȩmo̧ yürüa̧mi̧ yürüa̧diji̧da, Pedrorë judio pio ji̧ri̧iäpȩmo̧ a̧ra̧ano̧rea̧ chiami̧ dari̧ a̧ra̧ano̧rea̧ chiadida, judiodë pio ji̧ri̧iäpȩmo̧ a̧ra̧ano̧rea̧ chiadida' quëna̧ jo̧rȩtaji̧ri̧pea̧diro̧coe.

⁸ Jabechji̧ Ütë tjamo̧ judi Pedro pio ju̧i̧iä ana̧ri̧ ja̧beparërea̧mi̧ ja̧beparëremȩde pio coaiä peaja̧di judiodë pio ji̧ri̧iäpȩmo̧ a̧ra̧ano̧pea̧ oa. Danȩrȩ, Jechurë chjadüa̧ oa järëremȩde Pedro judi judio pio ji̧ri̧iäpȩmo̧ a̧ra̧no̧pea̧ oa. Ado Jechurë chjadüa̧ oa peaja̧di jäa̧requede judiodë pio ji̧ri̧iäpȩmo̧ a̧ra̧ano̧pea̧ oa.

⁹ Ado a̧doparea̧ tjamo̧ jidaji̧ri̧ pio judiro̧borë ja̧di dari̧ jo̧rȩtaji̧ri̧pea̧diro̧coe. Aja̧, Santiago judi, ado Pedro judi, ado Juan judi peaja̧di dari̧ jo̧rȩtaji̧ri̧pea̧dirȩ. 'Aja̧, Pablo pio ju̧i̧ yürüa̧diji̧da, Ütërë yürüa̧ oa judiodë pio ji̧ri̧iäpȩmo̧ a̧ra̧ano̧rea̧ chiadida' quëna̧ jo̧rȩtaji̧ri̧rȩ chjadëri̧ daea̧diro̧coe, Bernabe pio ju̧i̧bo. Ado pio ju̧i̧iä, 'Aja̧, pio jiro oari judiro̧ ibëa̧ jadüdiro̧da, ado ibëa̧ jadüpea̧ tara, jabechji̧ a̧ro̧rȩ ütëborë ji̧mo̧ ja̧beparea̧mi̧ daa̧ro̧da' quëna̧ jo̧rȩtaji̧ri̧rȩ ba chia daea̧diro̧ibe. Ado pio ju̧i̧iä jabechji̧, pio a̧ro̧rȩ judiodë pio ji̧ri̧iäpȩmo̧ a̧ra̧ano̧pea̧ oa tutia̧ oa cjiadiäa̧rea̧rȩ. Ado o judiro̧, jabechji̧ judio pio ji̧ri̧iäpȩmo̧ a̧ra̧ano̧pea̧ oa tutia̧ oa cjiadiäa̧dirȩ.

¹⁰ Ado pio ju̧i̧ uëri a̧de yo̧a̧diro̧ibe a̧ro̧rȩ chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧ a̧dotä, Jerucharȩräpȩ quëna̧ji̧ri̧ pio ji̧ri̧. Ado jabechji̧remȩde pio ibëiä. Tjamo̧ri̧ a̧dotämi̧ cjiarëreji̧ri̧rea̧ro̧jȩrȩ.

Pablo judi to̧bari̧ chi̧dëearëremȩdejȩ Pedro ju̧i̧

¹¹ Aja̧, Jerucharȩräpȩ tjamo̧ jidaji̧ri̧ pio ji̧ri̧ nö̧ta ni̧bä chjaopea̧ üdë goae tjamo̧rëremȩde. Jabo japamitë chjätä ëte Pedro judi A̧tioquia quȩmȩ bë ma̧ri̧räpȩ jana̧ ji̧, irä dëbëpe chjao ni̧bäa̧reconȩ quëna̧ji̧ri̧ ütëborë darea̧mi̧ dari̧. Tjamo̧ davä. Oëra̧ jo̧rȩtamȩ oa dëbëpe chjao ni̧bäa̧reconȩ coëma cjiari̧ jo̧rȩtadëmȩ oa.

¹² Jabechji̧ Pedro judi pea jana̧rä, ori̧ bagari̧ ëba jura charëremȩdejȩrȩ quëna̧ji̧ri̧ judiodë pio ji̧ri̧ nö̧ta, budoa̧ oa cjiadëji̧ri̧ pio ji̧ri̧ nö̧ta. Jabo ja̧dëa ji̧ japamitë chjätä ëte, chjaodëri̧ a̧dë cjarapea̧ oa cjiadiäa̧de, judiodë pio ji̧ri̧ nö̧ta ëba jura chadëri̧ cjiamȩrȩ. Jabechji̧ Santiago ja̧ jadü pio judiro̧ Jerucharȩ bë ma̧ri̧ri pio judiri go̧düna̧ra̧rä, jabechji̧ chjaodëri̧ a̧dë cjarapea̧ oa cjiadiäa̧de Pedro judi. Jabechji̧ pea jana̧ji̧ri̧ pio ji̧ri̧ ja̧ chja̧oerä cjia tara idëri̧ cjiamȩpea̧de, judiodë pio ji̧ri̧ nö̧ta, budoa̧ oa cjiadëji̧ri̧ pio ji̧ri̧ nö̧ta ëba juradëmȩcji̧ quëna̧ japamȩrȩ. 'Jabechji̧ ya̧pai̧ dadiro̧coada, judiodë pio judiro̧ budoa̧ oa cjiatä eaji̧ri̧ pio judiro̧ ya̧pai̧ dadiro̧coada' quëna̧ jo̧rȩtamȩrȩ uapamȩpea̧de idëri̧ cjiamȩrȩ.

¹³ Ado A̧tioquiaräpȩ quëna̧ji̧ri̧ judio judiro̧ Pedro pio ju̧i̧ daea̧ oaiä, peaja̧di dari̧ japea̧dirȩ, judiodë pio ji̧ri̧ nö̧ta ëba juradëcji̧ quëna̧ japaji̧ri̧rȩ. Ado Bernabe pio judiborë cho̧rëdiäa̧dejȩrȩ ji̧dëri̧.

¹⁴ Jabo cjäri̧ marequedejȩrȩ, judiro̧ no̧ coëma oa tai̧dëmi̧ dari̧ cjiaji̧ri̧ oa daea̧ oaiä, tjamo̧i̧ cjiari̧ baämȩ ma̧ȩ chjadëi̧rä cjo̧ro̧dëji̧ri̧ oa daea̧ oaiä, jabechji̧ Pedro pio ju̧i̧iäpȩmo̧ irä yo̧a̧reconȩ ütëbodärärë ta̧rërea̧mi̧ dari̧: —Danȩ Pedro, mȩnȩ judio chjamȩborë, jabechji̧ judiodë pio judiro̧mi̧ dari̧ cjo̧ro̧renȩ. Jabechji̧ judiorë a̧ra̧ano̧rërea̧ ma̧ȩrämo̧ cjo̧ro̧dërenȩ, jabo judiodë pio judiro̧mi̧ dari̧ cjo̧ro̧renȩ peaja̧di. Jabechji̧ mȩnȩ judiodë pio ji̧ri̧ ja̧ chjarerä cjiarä, judio pio judiro̧mi̧ dari̧ cjo̧ro̧dërenȩ, jabo judiodë pio judiro̧mi̧ dari̧ cjo̧ro̧renȩ. Ado mȩnȩ ja̧di dari̧ japarä judi, ¿tjana̧ ju̧i̧iä judio pio judiro̧mi̧ dari̧ cjo̧ro̧ tänȩtämi̧ cjiarenȩjȩrȩ judiodë pio ji̧ri̧? ¿Tjana̧ ju̧i̧iä judiorë a̧ra̧ano̧rërea̧ ma̧ȩrä ano̧ mire cjo̧ro̧tä earenȩjȩrȩ? Jabechji̧ mȩnȩ judiorë a̧ra̧ano̧rërea̧ ma̧ȩ oa nö̧tadäräri̧ ta̧rëdiädërä judi, ¿tjana̧ ju̧i̧iä pio jiro ma̧ȩrä cjo̧ro̧ tänȩtämi̧ cjiarenȩjȩrȩ yaba̧? Aja̧, ja̧di ta̧rëri̧ yo̧mȩrȩ iëno̧ë ta̧rëa̧reconȩ Pedro ju̧i̧ ütëbodärärë ta̧rërea̧mi̧ dari̧.

¹⁵ Jabo Pedro pio ju̧i̧ ji̧dë u̧i̧ ni̧bä chjaotämi̧ cjiamȩrȩ ja̧di ta̧rëri̧ a̧de yo̧a̧reconȩ, judio ütëborë ta̧rërea̧mi̧ dari̧: —Danȩrȩ, a̧ro̧rȩ judiorë ara̧ oa cjo̧ro̧ marea̧rȩ. Jabechji̧ judiodë pio judiro̧ tüdüa̧mi̧ darä cjo̧ro̧pea̧ ma̧ȩ oa dabadëji̧ri̧ pio judiro̧mi̧ dari̧ cjo̧ro̧dërea̧rȩ.

¹⁶ Jabo judio maearë cjo̧ro̧ji̧ri̧borë na̧e chiaji̧ri̧pea̧rea̧rȩ jabo. 'Jabechji̧ Jechu Quiricho pio ju̧i̧ quëna̧rämo̧ jabechji̧parȩrea̧mi̧ dadida, Moicherë go̧ȩparërea̧ ma̧ȩ oa ta̧rëdiäa̧ oaiä jabechji̧parȩrea̧mi̧dëdida' quëna̧ jo̧rȩtaji̧ri̧pea̧rea̧rȩ, tjamo̧ri̧ dabaji̧ri̧rȩ. Jabechji̧ judioji̧ri̧borë Jechu Quiricho pio ju̧i̧ quëna̧ji̧ri̧pea̧rea̧ro̧jo̧ȩ. Ado pio ju̧i̧ quëna̧ oaiä jabechji̧parȩa̧ oa cjiadiäa̧rea̧rȩ, Moicherë go̧ȩparërea̧ ma̧ȩ oa nö̧tadäräri̧ ta̧rëdiäa̧ oaiädë.

¹⁷ Ado pio ju̧i̧iä a̧ro̧rȩ quëna̧rërea̧ ji̧, 'Aja̧, Moicherë go̧ȩparërea̧ ma̧ȩ oaiä jabechji̧parȩrea̧mi̧ dadida' quëna̧rërea̧ ji̧, jabechji̧ ja̧di dari̧ quëna̧dë marea̧rȩ yaba̧ jabo jabechji̧, 'Quiricho pio ju̧i̧iämo̧i̧ jabechji̧parȩrea̧mi̧ dadida' quëna̧ jo̧rȩtaji̧ri̧pea̧rea̧rȩ. Jabo a̧ro̧rȩ ja̧di dari̧ cjo̧ro̧ji̧ri̧pea̧ oaiä, Moicherë go̧ȩparërea̧ ma̧ȩrä cjo̧ro̧pea̧ ji̧ järidëji̧ri̧pea̧ oaiä, jabechji̧ judio judiro̧ orë, 'jabo cjäri̧ madiro̧da, Ütë tjamo̧ pio ju̧i̧ nö̧ta ori̧ bagari̧ ëba cjiarea̧mi̧dëdiro̧da, jabechji̧ judiodë pio judiro̧mi̧ dari̧ cjo̧ro̧ji̧ri̧pea̧diro̧da' quëna̧ jo̧rȩtapai̧ dadiro̧dibe. Ado pio ju̧i̧iä, a̧ro̧rȩ Moicherë go̧ȩparërea̧ ma̧ȩrä cjo̧ro̧dëji̧ri̧pea̧ oaiä, 'jabechji̧ Quiricho pio judi tänȩa̧ oaiä chjai̧dëri̧ japaji̧ri̧pea̧diro̧da' quëna̧pai̧ dadiro̧ibe. Jaebo chjai̧ dadë. Ja̧di dari̧ quëna̧rea̧mi̧dëde. Quiricho pio judi tänȩa̧ oa chjai̧dëri̧ japaji̧ri̧pea̧ ma ja̧didë.

¹⁸ Jabo cüdë Quiricho pio ju̧i̧ quëna̧mȩpea̧rä ado chjereno̧ Moicherë go̧ȩparërea̧ ma̧ȩ oaiä 'jabechji̧parȩrea̧mi̧ dadida' ano̧ mire quëna̧rä judi, jabechji̧dëtäremȩde. Jabechji̧, ichi chjö̧na̧i̧ ma̧ȩ üdë ado chjereno̧ jo̧rȩta tänȩtäremȩdique cüdë chjai̧dëri̧ japea̧ pio ju̧i̧ chjiari.

¹⁹ Jabo danȩrȩ, Moicherë go̧ȩparërea̧ pio ju̧i̧ ja̧ chja̧oerä cjo̧ro̧rërea̧ ji̧, pio jiro chja̧oeri pio judiri go̧düa̧requede, coa mitë ano̧mi̧ dari̧. Jabechji̧ a̧dë ja̧boa̧reconȩ. Pio ju̧i̧ ja̧ chja̧oerämȩ oa ja̧bo tänȩmi̧ dari̧ japea̧dique ichi chjö̧na̧i̧ ma̧ȩ pio judi, jabo ado chjereno̧ cjo̧ro̧requede Ütë tjamo̧ pio ju̧i̧ ja̧ chja̧oerä ano̧ mire cjo̧ro̧mȩrȩ.

²⁰ Jabechji̧ Quiricho pio ju̧i̧ nö̧ta toro cji̧däa̧ oa ja̧boa̧requede. Jabo pio ju̧i̧ nö̧ta ja̧boa̧mȩborë, jabechji̧ cjo̧ro̧requede ado chjereno̧. Jabo cüdë tjamo̧dërequede, jabo Quiricho pio judide. Jabechji̧ ca̧ icjararä chjai̧dërë chi̧dëea̧ chja̧oerä cjo̧ro̧dërequede, jabo tjamo̧ cjo̧ro̧mȩ Quiricho pio ju̧i̧ ja̧ chja̧oerämo̧ ano̧ mire cjo̧ro̧requede yaba̧. Aja̧, pio judi tjamo̧de pio coaiä ja̧bepamȩ judi. Ado yaba̧ Ütë tjamo̧ pio ju̧i̧ ja̧ Joja pio ju̧i̧ quëna̧mȩrȩ cjo̧ro̧requede, pio coa ea tjamo̧mȩ pio ju̧i̧. Aja̧, jibëa̧ icjara oa tuti yürürëremȩ pio ju̧i̧ quëna̧mȩrȩ cjo̧ro̧requede yaba̧ pio cüdë ano̧ mire cjo̧ro̧pea̧ oa.

²¹ Jabechji̧ Ütë tjamo̧ judi coa cjäri̧ri̧ cjia da̧ pio ju̧i̧ jiadadëreconȩ jabo ba chia jo̧rȩtareconȩ. Jabechji̧ pio ju̧i̧iä jabechji̧parȩa̧ oa cjiarea̧ daea̧rea̧rȩ. Jabechji̧ a̧ro̧rȩ Moicherë go̧ȩparërea̧ ma̧ȩ oaiä jabechji̧parȩrea̧ daea̧rä judi, badëri̧ ja̧boa̧täremȩde Quiricho judi. Ja̧di ta̧rëri̧ yo̧mȩrȩ go̧ȩpe chjadürëremȩdejȩrȩ Pablo judi Garachiaräpȩ quëna̧ji̧ri̧ pio ji̧ri̧iäpȩmo̧, judio pio ji̧ri̧ ado judiodë pio ji̧ri̧iäpȩmo̧bo.