Garata Ma̧ȩ 1 - Biblia Pume

Taruparea̧ Ma̧ȩ

¹ Pablo pio judirequede. Jechurë chjadüa̧ pio judirequede. Pumȩrȩ chjadüa̧ oa cjiadërequede. Pumȩ pio ju̧i̧iä ma̧ȩ ta̧rë ëte chjadüa̧ oa cjiadërequede, jabo Jechu Quiricho pio judi mitë chjadüa̧ oa cjiarequede. Ado ibëa̧ Ama̧i̧ Ütë pio judiborë mitë ëte chjadüa̧ oa cjiarequede. Tjamo̧ davä, Jechu pio ju̧i̧ bëdü tänȩrëremȩ pio judi chjadüa̧ oa cjiarequede.

² Ado pio judi chjadüa̧ oa go̧ȩpe chjadürequededibe. Ado danȩrȩ, jearea̧ chjadürequededibe, pio dibë cjäri̧ri̧ cjia jo̧rȩtamȩrȩ. Ado pio coadiji̧ri̧ pio judiro̧borë jearea̧ chjadüdiro̧dibe, ibëa̧ oti̧ pio judiro̧borë. Tjamo̧ davä. Garachia quȩmȩ chiriräpȩ a̧dopë cjiaji̧ri̧ oa, buba ji̧ra̧ oa, Ütë tjamo̧ pio ju̧i̧iäpȩmo̧ quëna̧ji̧ri̧ oa jearea̧ chjadürea̧ro̧dibe.

³ Ütë tjamo̧ judi cjäri̧ri̧ cjia da̧ pio ju̧i̧ chjadëri̧ yürütädidibe, ma̧ chjupi̧ cjiari̧ jo̧rȩtarea̧ pio ju̧i̧bo. Aja̧, ibëa̧ Ama̧i̧ Ütë judi, ibëa̧ Ano̧mȩ Jechu Quiricho pio judiborë chjadëri̧ yürütädidibe.

⁴ Danȩrȩ, jibëa̧ icjara oa tuti yürürëremȩ pio judide a̧ro̧rȩ chjai̧dëri̧ japea̧ pio ju̧i̧ chjiari. Aja̧, a̧ro̧rȩ chjai̧dërë yo̧a̧ chja̧oerä cjo̧ro̧chea oa, pumȩ chjai̧dërë yo̧a̧ chja̧oerä cjo̧ro̧chea oa tuti yürürëremȩde, ibëa̧ Ama̧i̧ Ütë pio judi pearä ütarë jo̧rȩtarërea̧mi̧.

⁵ Ado pio ju̧i̧iä bucho ana̧ chjacjiamȩri̧ jo̧rȩtapea̧de. Ja̧ditäde.

Ma̧ȩ chjadëi̧ üdë cja̧rȩmȩde. Ado cja̧rȩmo̧ decjiade.

⁶ Danȩrȩ, pio dibë chjiari dacho bëremi̧ cjiami̧ dari̧ jo̧rȩtarequede, ana̧ri̧ jo̧rȩtamȩrȩ. '¿Jabo tjana̧ japacjivadiro̧da?, japamitë boi̧chji̧ chjätä ëte pio jibë ëna̧diäa̧mȩ pio ju̧i̧ putu jura̧ a̧dë chaji̧ri̧mi̧ dari̧ a̧dë jo̧rȩtadiro̧ju̧i̧da' quëna̧ jo̧rȩtarequedediibe, ana̧ tjamo̧ri̧ jo̧rȩtamȩrȩ. Tjamo̧ davä. 'Quirichorë cjäri̧ri̧ cjiamȩrȩ ëna̧diäa̧mȩ pio ju̧i̧ chjaodëri̧ a̧dë baäa̧mi̧ dari̧ japea̧diro̧ju̧i̧da, ado cja̧rȩmo̧ ma̧ȩ oa chjaodëri̧ quëna̧ji̧ri̧pea̧diro̧da, o judiro̧ ‘ma̧ȩ chjadëi̧de’ yo̧a̧bea oaiä chjaodëri̧ ano̧ mire quëna̧ji̧ri̧pea̧diro̧da, jabo ma̧ȩ chjadëi̧dë oa, jabo teracaba ma̧ȩ maea oa ano̧ mire quëna̧ji̧ri̧pea̧diro̧ju̧i̧da, ¿tjana̧ ju̧i̧iä ja̧di dari̧ japacjivadiro̧da?' quëna̧ jo̧rȩtarequededibe, ya yabëcjiami̧ dari̧.

⁷ Jabo cjäri̧ made, pio jiro ma̧ȩ üdë ma̧ȩ chjadëi̧dëde jabo teracabade. Jabechji̧ ibë chjätä tänȩmȩ ma̧ȩ üdë cja̧rȩmȩ pio judimo̧de. Jabo o judiro̧ teracabari̧ jo̧rȩta tänȩtämi̧ cjiadiro̧dibe. Quiricho pio ju̧i̧ chjiari ma̧ȩ üdë oëra̧ cjiatä järitadirȩ.

⁸ Jabo yo̧requededibe. Danȩrȩ, pio a̧ro̧rȩ ado cja̧rȩmo̧ ma̧ȩ oa a̧ra̧ano̧rä judi, eami̧ pumȩ üdë ado cja̧rȩmo̧ ma̧ȩ oa a̧ra̧ano̧rä judi, a̧ro̧rȩ dibë pearä a̧ra̧ano̧rërea̧ ma̧ȩ pio judimi̧ dadë oa a̧ra̧ano̧rä judi, jabechji̧ cjo̧dë tja ana̧räpȩ aeno̧a̧ oa cjiatäde. Ado a̧dërämȩ ja̧ mu̧i̧tjoi̧ pio judiborë aeno̧a̧ oa cjiatäde judi ado cja̧rȩmo̧ ma̧ȩ oa a̧ra̧ano̧rä judi.

⁹ Ado pio yaboi̧ yo̧remȩrȩ yo̧requededibe ado chjereno̧. Danȩrȩ, eami̧ pumȩ üdë Jechu pio ju̧i̧ chjiari teracaba ma̧ȩ oa a̧ra̧ano̧rä judi, pio a̧ro̧rȩ dibë a̧ra̧ano̧a̧ pio judimi̧ dadë ma̧ȩ oa a̧ra̧ano̧rä judi, chja ja̧di cjo̧dë tja ana̧räpȩ aeno̧a̧ oa cjiatäde.

¹⁰ ¿Jabo tjana̧ ju̧i̧iä ja̧di ta̧rëri̧ ni̧bärequededibe ca̧ oti̧? ¿Pumȩ judiro̧ pio coa chjiari chjacjiamȩri̧ ni̧bäpea̧ oa ni̧bärequede? Cjäri̧ marequede, pumȩ pio ji̧ri̧ jo̧rȩtadërequede, jabo Ütë tjamo̧ pio ju̧i̧mo̧i̧ jo̧rȩtareconȩ. Jabechji̧ pio coa chjiari chjadëri̧ ni̧bätä eareconȩ. 'Aja̧, Pablo pio judi chjadëri̧ ja̧bepadida, pumȩ ji̧ri̧ chjadëri̧ chi̧dëeadiji̧ri̧da' quëna̧tä eareconȩ Ütë tjamo̧ ju̧i̧. Jabechji̧ pio ju̧i̧ ja̧ mu̧i̧tjoi̧mȩrȩ ja̧beparequede pio ju̧i̧ ja̧ dachoro. Ado pio ju̧i̧iä pumȩ judiro̧ pio coa chjiari chjacjiamȩri̧ ni̧bäpea̧ ji̧ jo̧rȩtadërequede. Jabechji̧ pio ju̧i̧ jo̧rȩtamȩrȩ cjo̧ro̧rä judi, Quiricho pio ju̧i̧ ja̧ mu̧i̧tjoi̧dëmi̧ dari̧ cjo̧ro̧täremȩrequede jabo pumȩ ja̧ mu̧i̧tjoi̧mi̧ dari̧ cjiadiätäremȩrequede.

Pablo judi pio jȩa chjiari ni̧bärëremȩde Jechurë chjadüa̧ oa ja̧bepamȩpea̧ pio ju̧i̧ chjiari

¹¹ Danȩrȩ ca̧ oti̧, chjadëri̧ dabatä earequededibe. Cüdë dibë a̧ra̧ano̧rërea̧ ma̧ȩ üdë pumȩ pio ju̧i̧iä tarupadëa̧de. Jechu pio ju̧i̧ chjiari ma̧ȩ üdë pumȩ pio ju̧i̧iä tarupadëa̧de.

¹² Jabechji̧ pumȩrȩ yürüa̧ oa mitëdëa̧reconȩ. Pumȩrȩ a̧ra̧ano̧a̧ oa dabapadëa̧reconȩ, jabo Jechu Quiricho pio judi ea jana̧ chjadüa̧ oaiä dabapea̧reconȩ ju̧i̧.

¹³ Danȩrȩ, ma̧ȩ ta̧rëa̧ jironȩrȩ cüdë pearä cjo̧ro̧rërea̧ pio ju̧i̧ chjiari, judiorë a̧ra̧ano̧a̧ chja̧oerä cjo̧ro̧rërea̧ pio ju̧i̧ chjiari. Uapai̧ da tjamo̧ri̧ conȩdae chjaorëremȩrequede Ütë tjamo̧ ja̧ a̧doparea̧ pio ju̧i̧. Jabechji̧ yuropatämi̧ cjiarëremȩreconȩ.

¹⁴ Ado a̧dë chjäte järirëremȩrequede davä judiorë a̧ra̧ano̧a̧ pio ju̧i̧ dabapapea̧ oa, ibëa̧ ütëti̧rȩ goëje a̧ra̧ano̧a̧ pio ju̧i̧ chjiari na̧e chiape jäpea̧ oa. Jabechji̧ dabapadäräpea̧ ji̧ järi tjamo̧rëremȩrequede pio coa nö̧ta dabapareji̧ri̧ pio ji̧ri̧ a̧dë bagurami̧ dari̧, judiro̧ duriräpȩ cjiadiärea̧mi̧ dari̧.

^15-16 Jabo cüdë ma̧i̧ dari̧ japea̧räbo, jabechji̧ Ütë tjamo̧ pio judi cjäri̧ri̧ cjiamȩrȩ china̧chjari̧ tutirëremȩdique, cüdë jabë ara̧ oa cjiadërä. Aja̧, jabërä ëna̧diärëremȩdique. Ado ja̧dëa ji̧ judi ütara̧ doro, ma̧ chiadëri̧ cjiamȩrȩ na̧rȩrëremȩdique Joja pio ju̧i̧. Aja̧ cüdë pio ju̧i̧ chjiari ma̧ȩ oa judiodë pio ji̧ri̧iäpȩmo̧ a̧ra̧ano̧tä na̧rȩrëremȩdique Joja pio ju̧i̧. Ado Ütë tjamo̧ judi pio coaiäpȩmo̧ chjadëri̧ na̧rȩa̧ oaiä, ‘jabechji̧ ca̧ pumȩ pio ji̧ri̧iä yabochja ta̧rëtäremȩquëda, pio coa chi̧dëeapea̧ oa pio ji̧ri̧iä ta̧rëtäremȩquëda' quëna̧dëa̧requede.

¹⁷ Ado peaja̧di jädëa̧requede Jerucharȩräpȩ. 'Aja̧, ca̧ yaboi̧ mitëa̧ oa cjiarëreji̧ri̧ pio ji̧ri̧ goëdetäremȩquiji̧ri̧da, Jechurë chjadüa̧ pio ji̧ri̧iä yabochja ta̧rë tänȩtäremȩquëda' quëna̧dëa̧requede jabo tjamo̧i̧ baäa̧requede davä, Arabia quȩmȩ chiriräpȩ. Ado ju̧ri̧pȩ japamitë ana̧ri̧ cjo̧ro̧ ëte ma̧na̧requede Damacoräpȩ.

¹⁸ Ado Damacoräpȩ tjarari̧ ui chjätä ëte, dëdë, jäa̧requede Jerucha̧räpȩ Pedro pio ju̧i̧ dapea̧ oa, pio ju̧i̧ nö̧ta ni̧bä chjaopea̧ oa. Yo̧a̧ri̧ chemana nö̧ta cjiadiäa̧requede pio ju̧i̧ nö̧ta.

¹⁹ Jabo Jechurë chjadüa̧ pio ji̧ri̧ o oa dadëa̧requedejȩrȩ, jabo Santiago pio ju̧i̧mo̧i̧ oa daea̧reconȩ, ibëa̧ Ano̧mȩ ja̧ durimȩ pio ju̧i̧.

²⁰ Danȩrȩ ca̧ oti̧, pio yoa ma̧ȩ oa go̧ȩpe chjadürequededibe, ma̧ȩ chjádë oa yürüdëmȩrȩ. Jabechji̧ daba dadique Ütë tjamo̧ judi. 'Ado ma̧ȩ chádë oa yürüdëmȩdiji̧ri̧da, jabo chjadëri̧ yo̧diji̧ri̧da' quëna̧ damȩrȩ cjacjarë dadique.

²¹ Ja̧dëa ji̧ Jerucharȩräpȩ jä ëte, pumȩ ji̧ri̧ pio ju̧ri̧pȩ da ëte, peaja̧di järëremȩrequede Chiria quȩmȩ chiriräpȩ, Chirichia quȩmȩ chiriräpȩbo.

²² Jabo Judea quȩmȩ chiriräpȩ a̧dopaji̧ri̧ judiro̧ tjamo̧ri̧ dabadëa̧diro̧coe.

²³ Pumȩ judiro̧ orë yo̧a̧ pio ju̧i̧iämo̧i̧ goë goë ta̧rërëreji̧ri̧dirȩ. "Aja̧, pio ibë conȩdarëremȩ pio judi a̧ra̧ano̧mȩpea̧de yaba̧” yo̧a̧ oa ta̧rëa̧dirȩ. “Aja̧, Pablo judi pearä goarijätea̧ ma̧ȩ pio ju̧i̧ ano̧ mire araano̧mȩpea̧de” yo̧a̧ oa ta̧rëa̧dirȩ.

²⁴ Ado pio ju̧i̧ ta̧rëa̧ oaiä, jabechji̧ Ütë tjamo̧ pio ju̧i̧iäpȩmo̧ chjacjiamȩri̧ ni̧bärëreji̧ri̧diro̧jo̧ȩ, 'Pablo judi chjätärea̧ daea̧dida' quëna̧ jo̧rȩtaji̧ri̧rȩ.