Epjecho Ma̧ȩ 6 - Biblia Pume

U̧ri̧ judiro̧ ta̧rëdiätäreji̧ri̧diro̧jȩrȩ jibë nö̧riji̧ri̧ pio ji̧ri̧, chji̧ goaera̧ jo̧rȩtaji̧ri̧rȩ

¹ Ado mȩnȩro̧, bori̧ pio judiro̧, chjadëri̧ ta̧rëdiächji̧vä dibë nö̧riji̧ri̧ pio ji̧ri̧. Jabechji̧ Ütë tjamo̧ pio judi tänȩa̧ oa nö̧rirëreji̧ri̧diro̧dibe. Pio ji̧ri̧ ja̧ chja̧oerä cjo̧ro̧nȩrȩ. Ja̧di tara chjadëri̧ ta̧rëdiächji̧jȩrȩ. Ja̧di dari̧ cjo̧ro̧tä eadidibe Ütë tjamo̧ judi.

^2-3 Jabechji̧ ja̧di ta̧rëri̧ go̧ȩpea̧ oa cjiade ma̧ȩ üdë. "Dibëa̧ ama̧i̧ ju̧i̧ ba chia dachji̧jo̧ȩ, dibëa̧ ai̧ pio ji̧bo. Jabechji̧ nö̧riji̧ri̧ pio ji̧ri̧ ba chia damȩ judi, japamitë ana̧ri̧ cjo̧ro̧rea̧ dapade pio yoa chiri oa. Chjadëri̧ cjo̧ro̧rea̧ dapade." Aja̧, ja̧di ta̧rëri̧ go̧ȩpea̧ oa cjiade ma̧ȩ üdë no̧mȩ go̧ȩparëreji̧ri̧ pio judiro̧ go̧ȩpea̧ oaiä. Ado pio ju̧i̧iä ba chia daji̧ri̧rȩ chjadëri̧ ta̧rëdiätäreji̧ri̧diro̧jȩrȩ.

Nö̧riji̧ri̧ judiro̧ chjadëri̧ a̧ra̧ano̧täreji̧ri̧diro̧jȩrȩ jibëa̧ bori̧ pio ji̧ri̧

⁴ Ado mȩnȩro̧, nö̧riji̧ri̧ pio judiro̧, jabechji̧ ërecjia tänȩdëchji̧jȩrȩ dibëa̧ bori̧ ji̧ri̧, jabo jabechji̧ chjadëri a̧ra̧ano̧chji̧jȩrȩ. Chjadëri̧ dabapa tänȩchji̧jȩrȩ ya̧rea̧ decjiari̧, uapai̧ tärëri̧ yo̧ë cji̧därea̧ decjiari̧. Jabechji̧ babui̧ra̧ a̧ra̧ano̧jȩrȩ. 'Aja̧, Ano̧mȩ ja̧ ma̧ȩ üdë ja̧di ta̧rëri̧ yo̧dicoada, ado Ano̧mȩ judi ja̧di dari̧ cjo̧ro̧tä eadicoada' quëna̧rea̧mi̧ dari̧ chjadëri̧ chi̧dëea̧täreji̧ri̧renȩro̧jȩrȩ, tüdüa̧mi̧ darä cjo̧ro̧pea̧ oa.

Mu̧i̧tjoi̧ judiro̧ chji̧ goaera̧ jo̧rȩtaji̧ri̧rȩ chjadëri̧ ta̧rëdiätäreji̧ri̧dirȩ jibëa̧ ano̧ji̧ri̧ pio ji̧ri̧

⁵ Ado mȩnȩro̧, mu̧i̧tjoi̧ pio judiro̧, jabechji̧ chjadëri̧ ta̧rëdiächji̧jȩrȩ dibëa̧ ano̧ji̧ri̧ pio ji̧ri̧. Ba chia dachji̧jȩrȩ chjadëri̧ ja̧bepë yürüji̧ri̧rȩ. Quiricho pio ju̧i̧ ja̧ oa ja̧bepami̧ dari̧ ja̧bepë yürüchji̧jȩrȩ chjadëri̧.

⁶ Aja̧, ji̧dë ma chjadëri̧ japë yürüchji̧jȩrȩ, judiro̧ ütarë darämo̧dë. 'Aja̧, Quiricho pio ju̧i̧ ja̧ mu̧i̧tjoi̧mi̧ dari̧ ja̧bepamȩquëda, Ütë tjamo̧ judi ja̧di dari̧ ja̧bepatä eadicoada' quëna̧ jo̧rȩtariä ja̧bepatäreji̧ri̧nȩrȩ chjadëri̧.

⁷ Aja̧, goae tarari̧ ja̧bepë yürüchji̧vä, 'chjadëri̧ ja̧bepatämi̧ cjiaquëda' quëna̧ji̧ri̧rȩ. 'Jabechji̧ pio coa tänȩmȩ pio ju̧i̧ ja̧ oa tjamo̧ri̧ ja̧bepadëquëda, jabo ca̧ Ano̧mȩ Ütë pio ju̧i̧ ja̧ oa ja̧bepaquëda, ca̧ Ano̧mȩ tjamo̧ pio judidida' quëna̧ jo̧rȩtaji̧ri̧rȩ ja̧bepachji̧vä.

⁸ Jabechji̧ ütara̧ doro ibëa̧ Ano̧mȩ pio judi ütëbodärä oa ütarë dae chjaopadiibe. Ado a̧ro̧rȩ chjadëri̧ japea̧ ba oa ba ano̧padiibe mu̧i̧tjoi̧ pio ji̧ri̧, mu̧i̧tjoi̧dë pio ji̧ri̧bo. Aja̧, pio ju̧i̧ tjamo̧ri̧ dabarea̧rȩ. Ja̧di tara chjadëri̧ ja̧bepë yürü matäreji̧ri̧rea̧rȩ ibëa̧ Ano̧mȩ ja̧ oa.

Mu̧i̧tjoi̧ goaji̧ri̧ pio judiro̧ jibëa̧ Ano̧mȩ pio ju̧i̧ ja̧ dachoro cjo̧ro̧ tara, jabechji̧ chjadëri̧ japa matäreji̧ri̧diro̧jȩrȩ jibëa̧ mu̧i̧tjoi̧ ji̧ri̧

⁹ Ado mȩnȩro̧, mu̧i̧tjoi̧ goaji̧ri̧ pio judiro̧ peaja̧di dari̧ japatäreji̧ri̧nȩrȩ dibëa̧ mu̧i̧tjoi̧ pio ji̧ri̧. Chjadëri̧ japachji̧jȩrȩ. Uapai̧ ta̧rëri̧ yo̧ë cji̧dädëchji̧jȩrȩ jabo chjadëri̧ japachji̧jȩrȩ. Danȩrȩ, a̧dëräpȩ cjiamȩ Ano̧mȩ judi dibëa̧ Ano̧mȩde. Ado dibëa̧ mu̧i̧tjoi̧ ja̧ Ano̧mȩ pio judide peaja̧di. Ado cja̧rȩmȩ ba chia maeara̧ dadejȩrȩ pumȩ ütëbodärä oa, mu̧i̧tjoi̧ ji̧ri̧ ado ano̧ji̧ri̧bo. Tjamo̧ davä. Tjamo̧ cjo̧ro̧ji̧ri̧ pio ji̧ri̧mo̧i̧ ea ma ja̧didë, jabo ütëbodärä oa cja̧rȩmȩ ba chia maeara̧ dadejȩrȩ. Ja̧di tara chjadëri̧ japachji̧jȩrȩ dibëa̧ mu̧i̧tjoi̧ pio ji̧ri̧.

Chjiparari pjatë chiamȩ ina̧rea̧mi̧ dara̧ ina̧ oa cjiatäreji̧ri̧nȩrȩ yaröca pio ji̧ri̧ dëbëpe chjaopea̧ oa

¹⁰ Ado yaba̧ cjiadiäa̧mȩ ma̧ȩ pio ju̧i̧ go̧ȩparequededibe. Danȩrȩ, ji̧dë u̧i̧ to̧bape jächji̧vä Ano̧mȩ pio ju̧i̧ ja̧ ju chiarea̧ra̧. Jabechji̧ pio judiri ja̧ji̧ri̧nȩrȩ. Ado pio ju̧i̧iä pio judiri ma̧na̧mȩ ju chiarea̧ maeara̧ to̧bari̧ cjiatäreji̧ri̧nȩrȩ.

¹¹ Ütërë yürüa̧ oa chjiparari pjatë chiamȩ ina̧rea̧mi̧ da oa chjö̧na̧i̧därä oa chjadëri̧ tuti ina̧chji̧vä. Yaröca ütërë ibë chjai̧dëri̧ jo̧rȩta̧ pio ju̧i̧ chjadëri̧ dëbë järipea̧ oa tuti ina̧chji̧vä pio jiro ina̧rea̧mi̧ da oa.

¹² Danȩrȩ, ibë tjamo̧ri̧ dëbëpe chjaoji̧ri̧ judiro̧ dai oa cjo̧ro̧ji̧ri̧ pumȩ pio judiro̧dëdirȩ. Icjara chiaji̧ri̧ pio judiro̧ tjamo̧dëdirȩ, jabo icjara decjiaji̧ri̧ pio judiro̧ tjamo̧dirȩ ibë dëbëpe chjaoji̧ri̧ judiro̧. Aja̧, pio ji̧ri̧ ba dëbëpe chjaorea̧ro̧jȩrȩ, icjara decjiaji̧ri̧ pio ji̧ri̧. Tjamo̧ davä. Yaröca pio ji̧ri̧, buba ji̧ra̧ tjamo̧ oa ba dëbëpe chjaorea̧ro̧jȩrȩ. Tjamo̧ yo̧rea̧ chiaji̧ri̧ pio ji̧ri̧, tjamo̧ cjo̧ro̧ji̧ri̧ pio ji̧ri̧, tjamo̧ jauëchjaji̧ri̧ pio ji̧ri̧, uë tjamo̧räpȩ cjiaji̧ri̧ chjadëdëti̧ pio ji̧ri̧ dëbëpe chjaorea̧ro̧jȩrȩ ji̧ra̧ tjamo̧ oa. Jauëchjarea̧ chiaji̧ri̧rȩ oëra̧ti̧ oa cjiadirȩ, ado bagönȩmi̧ darä cjo̧ro̧ji̧ri̧ judiro̧ pio ji̧ri̧ ja̧ chja̧oerä cjo̧ro̧dirȩ pio yoa chirirä. Aja̧, pio ji̧ri̧ dëbëpe chjaorea̧ro̧jȩrȩ buba oa.

¹³ Ja̧di tara yo̧requediibe ca̧ oti̧. Jabechji̧ Ütërë yürüa̧ra̧ pio ju̧ri̧ra̧ tuti inëno̧chji̧vä. Chjiparari pjatë chiamȩ ina̧rea̧mi̧ dara̧ pio ju̧ri̧ra̧ inëno̧chji̧vä a̧dë ina̧rea̧ decjiari̧. Jabechji̧ chjadëri̧ ina̧ oa cjiami̧ dari̧ cjia oaiämo̧i̧ dëbëpe chjaodärärea̧ daparenȩro̧jȩrȩ dibë boata domȩ ju̧i̧iä. Aja̧, duriräpȩmo̧ a̧dë bagurarea̧ decjiari̧ dëbëpe chjaorea̧ daparenȩrȩ u̧i̧pataji̧ri̧ yaröca pio judiro̧ dibë a̧dë baäa̧rä yuro.

¹⁴ Ja̧di tara järiji̧ri̧rȩ cjiachji̧vä. Tjamo̧i̧ cjiari̧ baämȩ ma̧ȩ maea oa jo̧rȩtariä cjo̧ro̧chji̧vä to̧bari̧ cjiapea̧ oa. Danȩrȩ, domano guardia üdë cada abürea̧ oa cjae mu̧i̧ cji̧däa̧ oaiä, jabechji̧ to̧bari̧ cjiade. Ado peaja̧dimi̧ dari̧ cjianȩrȩ tjamo̧i̧ cjiari̧ baämȩ ma̧ȩ maea oa jo̧rȩtariä cjo̧ro̧a̧ oaiä. Aja̧, cada abürea̧ra̧ cjae mu̧i̧ cji̧dämi̧ dari̧ cjianȩrȩ ja̧di dari̧ jo̧rȩtariä cjo̧ro̧a̧ oaiä. Ja̧di tara chjadë maea oa jo̧rȩtariä dopachji̧vä to̧bari̧ cjiapea̧ oa. Ado chjai̧dërë yu̧i̧mi̧ dari̧ cjo̧ro̧dëchji̧vä jabo coëma cjiari̧ cjo̧ro̧chjivä. Jabechji̧ mȩnȩro̧ ja̧di dari̧ cjo̧ro̧a̧ oaiä, maito jidamȩ ina̧rea̧mi̧ da oa ina̧nȩrȩ. Ado ja̧di dari̧ cjo̧ro̧mȩ pio judi chjadëri̧ jida̧ oa cjiade.

¹⁵ Ado mȩnȩro̧ jachidai̧parȩrea̧ ma̧ȩ pio ju̧i̧ quëna̧ji̧ri̧pea̧ oaiä, jabechji̧ ma̧ chjupi̧ cjiari̧ jo̧rȩtarea̧ daea̧nȩrȩ Ütë tjamo̧ ja̧ queri̧mi̧ daräpȩ cjiarea̧ daea̧ oaiä. Ado mȩnȩro̧ pio ju̧i̧ jo̧rȩta̧ oaiä, 'Aja̧, Ütë tjamo̧ ja̧ queri̧mi̧ daräpȩ cjiaquëda, ërecjiarea̧ decjiaräpȩ cjiaquëda' quëna̧ jo̧rȩta̧ oaiä, jabechji̧ ta joë chjuari̧ go̧ioa̧ oa cjiami̧ dari̧ cjianȩrȩ, coere a̧rȩdärärea̧mi̧dëri̧.

¹⁶ Ado danȩrȩ, chjuari̧ quëna̧chji̧vä. Jabechji̧ a̧dë chjäte ba chia tjamo̧de chjuari̧ quëna̧ üdë. Ado dibë jidamȩ chjiparari pjatëmi̧ dade. Chjadëri̧ jidadidibe. Pio ju̧i̧ ji̧dë ma ara cjiade guardia üdë jibëa̧ yaboi̧. Peaja̧dimi̧ dari̧ japariä cjo̧ro̧chji̧vä chjadëri̧ baë ja̧bo tänȩpea̧ oa cjo̧dë chiamȩ chjito̧ pio ju̧i̧, Ichiaerë apea̧ pio ju̧i̧. Jabechji̧ Ichiae judi u̧i̧pea̧ pio judi cjo̧dë chiamȩ chjito̧mi̧ dade, jabo chjadëri̧ jida̧ oa cjiarea̧rȩ Ütë tjamo̧ ju̧i̧iäpȩmo̧ chjuari̧ quëna̧ oaiä.

¹⁷ Ado danȩrȩ, Ütë tjamo̧ judi chjätärea̧ yürüa̧ oa jidatarea̧ chiarea̧rȩ. Ado chjätärea̧ üdë, jabechji̧ pachecherea̧mi̧ dade. Chjadëri̧ jidadejȩ tjübë oa. Ado a̧ro̧rȩ chjätäpea̧ pio ju̧i̧ järiji̧ri̧rȩ jidata oaiä, chjadëri̧ yua̧ oa cjiami̧ dari̧ cjiarea̧rȩ. Pio ju̧i̧ chjadëri̧ yuachji̧vä. Ado danȩrȩ, Ütë tjamo̧ ja̧ ma̧ȩ üdë dëbëribo jo̧dë chiamȩ tjapënȩ jujuai̧mi̧ dade. Pio ju̧i̧ yürüa̧didibe Tjo tjamo̧ judi mȩnȩro̧ ara cjiami̧ dari̧ cjo̧ro̧pea̧ oa, ma̧ȩra̧ pio ju̧ri̧ra̧ chjadëri dëbëpe chjaopea̧ oa.

¹⁸ Ado ju̧i̧ uëri ji̧dë ma goë cjo̧dëtäreji̧ri̧nȩrȩ Ütë tjamo̧ pio ju̧i̧iä. Jabechji̧ Ütë tjamo̧ judi dibë chjadëri̧ a̧dopea̧ oa ji̧dë ma goë cjo̧dë chjaotäreji̧ri̧renȩrȩ, goë cjo̧dëdëpe bagarea̧ decjiari̧. Aja̧, Tjo tjamo̧ pio judi tara tänȩa̧mi̧ goë cjo̧dëtäreji̧ri̧nȩrȩ ütëbodärä ja̧ oa.

¹⁹ Ado pio coa chjiaribo goë cjo̧dëtä earequededibe. Danȩrȩ, cüdë eami̧räpȩ a̧ra̧ano̧rea̧ darä, jabechji̧ goae tarari̧ a̧ra̧ano̧tämi̧ cjiarequede, Ütërë yürüpea̧ ma̧ȩ pio ju̧i̧ to̧bari̧ a̧ra̧ano̧mȩrȩ. Aja̧, pio ju̧i̧ chjiari goë cjo̧dëchji̧vä. Aja̧, cüdë oëadëri̧ cjiami̧ dari̧ a̧ra̧ano̧rea̧ dapea̧ oa, goadia̧ oa cjiarëremȩ ma̧ȩ chjadëi̧ pio ju̧i̧ chjadëri̧ a̧ra̧ano̧pea̧ oa goë cjo̧dëtä earequededibe.

²⁰ Aja̧, ma̧ȩ chjadëi̧ pio ju̧i̧ a̧ra̧ano̧pea̧ oa cjo̧ro̧requede Jechu pio ju̧i̧ ja̧ oa ja̧bepamȩrȩ. Ado pio ju̧i̧iä chaäa̧ oa cjiarequede cüdë. Jabo goë cjo̧dë yürüchji̧coe cüdë oëadëri̧ cjiamȩrȩ to̧bari̧ a̧ra̧ano̧pea̧ oa.

Cjiadiärea̧ Ma̧ȩ

²¹ Ado mȩnȩro̧ pio coa chjiari dabadëchea oa, jabechji̧ chjö̧na̧i̧ oa yo̧padidibe ibëa̧ omȩ üdë, Tiquico quȩmȩ pio judi. Pio ju̧i̧ ea tjamo̧rea̧ro̧jo̧ȩ. Jabechji̧ ja̧bepa ano̧dëri̧ cjiamȩrȩ ja̧bepade ibëa̧ A̧no̧mȩ ja̧ oa, mu̧i̧tjoi̧ chjadërë. Aja̧ ca̧ oti̧, pio ju̧i̧iä chjadëri̧ ta̧rëpanȩrȩ pio coa chjiari.

²² Jabechji̧ pio ju̧i̧ chjadüa̧reconȩ mȩnȩro̧ pio ibë chjiari chjadëri̧ ta̧rëpea̧ oa. 'Aja̧, ja̧di dari̧ cjo̧ro̧ baädiro̧da' quëna̧pea̧ oa chjadüa̧reconȩ. Ado mȩnȩro̧ pio ibë chjiari ta̧rë oaiä, jabechji̧ järi tänȩpa jirodidibe.

²³ Danȩrȩ ca̧ oti̧, Ano̧mȩ Jechu Quiricho pio ju̧i̧ ja̧ Ama̧i̧ Ütë pio judi chjadëri̧ yürütädidibe Quiricho ja̧ oti̧ ütëbodärä oa. Cja̧rȩmȩ chji̧ chiami̧ dari̧ jo̧rȩtarea̧ pio ju̧i̧, dibëa̧ dëbëti̧ra̧ chia earea̧ pio ju̧i̧ chjadëri̧ yürütädidibe chjuari̧ quëna̧rea̧ra̧ a̧de.

²⁴ Ado Ütërë cjäri̧ri̧ cjia da̧ pio judi chjadëri̧ cjiana̧ra̧tädidibe Ano̧mȩ Jechu Quiricho pio ju̧i̧ ea tjamo̧ji̧ri̧ pio ji̧ri̧iäpȩmo̧, pio ju̧i̧ eadëpe jädëji̧ri̧ pio ji̧ri̧iäpȩmo̧. Aja̧, pio ju̧i̧ cjo̧dëreconȩ Ütë tjamo̧ ju̧i̧iä pio dibë chjiari. Aja̧, pio yoamo̧i̧ ma̧ȩ oa go̧ȩpe chjadürequededibe ca̧ oti̧. Cjo̧ro̧chjiibe. Dibëa̧ omȩ, Pablo