Epjecho Ma̧ȩ 5 - Biblia Pume

Ja̧di dari̧ cjo̧ro̧tädirȩ Ütë tjamo̧ ja̧ u̧ri̧ judiro̧

¹ Mȩnȩro̧ yaba̧ Ütë tjamo̧ ja̧ u̧ri̧pea̧ tara, pio dibë ea tjamo̧ tara, pio judimi̧ dari̧ cjo̧ro̧chji̧vä.

² Jabechji̧ Quiricho judi dibë ea̧ra̧ pio ju̧ri̧ra̧ eachji̧jȩrȩ dibëa̧ pumȩ ji̧ri̧. Danȩrȩ, ibë ea tjamo̧mȩrȩ ja̧boera̧parëremȩde. Aja̧, Ütë tjamo̧ pio ju̧i̧iäpȩmo̧ goaeri̧ pjȩa̧ cjitëmi̧ dari̧ ja̧bopea̧ oa yürürëremȩde jibëa̧ icjara oa, ovejami̧darë ja̧bopea̧ oa. Ado pio jiro earea̧ra̧ pio ju̧ri̧ra̧ eatäreji̧ri̧rea̧ro̧jȩrȩ ibëa̧ pumȩ ji̧ri̧ peaja̧di.

³ Mȩnȩro̧ Ütë tjamo̧ ja̧ pumȩpea̧ tara, chjadëri̧ ëba mo̧a̧chji̧vä dibëa̧ iei̧ pio ji̧mo̧i̧. Jabechji̧ aurerë japarëmi̧ cjiari̧ japadëchji̧vä. Ado cja̧rȩmo̧ ja̧ jadü oa dae ja̧bo dae ja̧bo dadë machji̧vä. Ja̧di dari̧ japea̧ üdë, jabechji̧ ma ja̧didë. “Aja̧, ja̧di dari̧ japadirȩ” yo̧a̧ oa ta̧rëdë matäreji̧ri̧rea̧rȩ quëna̧ji̧ri̧ ja̧ chjarerä.

⁴ Ado danȩrȩ, chjai̧dëri̧ ni̧bädëchji̧vä. Peaja̧di idi̧ ta̧rëri̧ ni̧bädëchji̧vä. Ado ëba mo̧a̧pea̧ pio ju̧i̧ chjiari chjaoriä yo̧dëchji̧vä. Jabechji̧ japëtaraji̧ri̧ pio judiro̧ ni̧bäa̧mi̧ ni̧bädëchji̧vä. Jabechji̧ chjadëri̧ ni̧bäpea̧ ji̧ yürü matäreji̧ri̧nȩrȩ dibëa̧ ya oa. Jabechji̧ “Ütë tjamo̧ judi chjadë tjamo̧diibe” yo̧pea̧ ji̧ yürütäreji̧ri̧nȩrȩ.

⁵ Tjamo̧ri̧ yo̧requededibe ca̧ oti̧. Bae ëba mo̧a̧ji̧ri̧ judiro̧, auremi̧ dari̧ japaji̧ri̧ pio judiro̧ Quirichorë yo̧a̧ chja̧oeräpȩ yu̧a̧rea̧mi̧dëdirȩ. Ado cja̧rȩmo̧ ja̧ oa dae ja̧bo dae chjaoji̧ri̧ judiro̧, chëre maea oa jo̧rȩte chjaoji̧ri̧ judiro̧ peaja̧di yu̧a̧rea̧mi̧dëdirȩ. Jabechji̧ chëre goaraji̧ri̧ judiro̧ ütëmi̧ da oa jo̧rȩte chjaodiro̧jo̧ȩ chëre pio ju̧i̧mo̧i̧. Ado pio ju̧i̧iä Ütërë yo̧a̧ chja̧oeräpȩ yu̧a̧rea̧ dadëpadirȩ.

⁶ Ado danȩrȩ, ma̧ȩ chjádëra̧ pio ju̧ri̧ra̧ u̧i̧pea̧ oa cjiadëchji̧vä. Jabechji̧ mȩnȩro̧ chjai̧dëri̧ japea̧ oa tëracaba ma̧ȩra̧ yo̧pai̧ dadiro̧dibe. “Aja̧, mȩnȩro̧ ja̧di dari̧ japarä judi, jabechji̧de. Chjai̧dëdëde jabo jabechji̧de" yo̧pai̧ dadiro̧dibe chjai̧dë pio ju̧i̧ chjiari. Jabo cjäri̧ ma ca̧ oti̧, pio judiro̧ yo̧a̧ oa u̧i̧pea̧ oa cjiadëchji̧vä. Pio judiro̧ ja̧di dari̧ japea̧ oaiä acji cjatäpadejȩrȩ davä, Ütë ja̧ ërecjiarea̧ üdë. Tjamo̧ davä, ta̧dëdiädëji̧ri̧ pio ji̧ri̧iäpȩmo̧ acji cjatäpadejȩrȩ.

⁷ Pio ju̧i̧iä yo̧requededibe. Pio jiro pumȩ ji̧ri̧ ëba cjiadëchji̧jȩrȩ. Jabechji̧ jachi a̧dë cjiachji̧jȩrȩ.

⁸ Jabo pearä judi, dëdë, mȩnȩro̧ bagönȩmi̧ darä cjo̧ro̧rëreji̧ri̧nȩrȩ, jabo ja̧didënȩrȩ yaba̧. Jabechji̧ Ano̧mȩ pio judiri ja̧ mapea̧renȩrȩ. Tatarä cjiami̧ dari̧ ano̧ mire cjo̧ro̧ji̧ri̧pea̧nȩrȩ. Ado tataräji̧ri̧mi̧ dari̧ cjiaji̧ri̧pea̧ oaiä, jabechji̧ tata u̧ri̧mi̧ dari̧ cjo̧ro̧chji̧vä.

⁹ Jabechji̧ dibëa̧ tjoro tatamȩ pio ju̧i̧iä chjacjiamȩri̧ na̧rȩriä cjo̧ro̧rea̧ dapanȩrȩ, jurarea̧ torë ji̧ra̧ri̧ chiamȩmi̧ dari̧. Aja̧, chjadëri̧ japarea̧ oa, coëma cjiari̧ cjo̧ro̧rea̧ oa, ado tjamo̧i̧ cjiari̧ quëna̧rea̧ oa chiami̧ dari̧ na̧rȩriä cjo̧ro̧rea̧ dapanȩrȩ, jurarea̧ goae tjamo̧ oa na̧rȩji̧ri̧mi̧ dari̧.

¹⁰ Ado danȩrȩ, järichji̧vä chjadëri̧ dabapapea̧ ji̧ chjadë pio ju̧i̧ chjiari. 'Jabechji̧ chjadë pio judidida, Ano̧mȩ judi ja̧di dari̧ japatä eadicoada' quëna̧ jo̧rȩtaji̧ri̧rȩ dabapachji̧vä.

¹¹ Ado o judiro̧ badë oa japarä judi, bagönȩri ja̧ chjai̧dë oa japarä judi, jabechji̧ ëba japadëchji̧jȩrȩ, jabo tatami̧ darä ji̧dë ma cjo̧ro̧chji̧vä pio judiro̧ chjai̧dë oa japea̧ üdë boë marä cjiami̧ dari̧ cjiapea̧ oa, tatarä cjiami̧ dari̧ cjiapea̧ oa.

¹² Jabechji̧ judiro̧ goadi japea̧ üdë a̧dë chjäte idi̧ dade. Ado judiro̧ japea̧ pio ju̧i̧ chjiari ni̧bä chjaorea̧mi̧dëde.

¹³ Jabo irä chi̧dëea̧ oaiä, tatami̧ darä cjia̧ oaiä, 'Aja̧, chjai̧dëri̧ japea̧quëda' quëna̧pai̧ dadirȩ. Tjamo̧ davä. Irä chi̧dëea̧ oaiä, arë dami̧ dari̧ japea̧ oaiä, boë marä cjiami̧ dari̧ cjiapade, goadirea̧mi̧dëri̧.

¹⁴ Irä chi̧dëea̧ oaiä, da mirerea̧mi̧ darä cjiade. Ado pio ju̧i̧iä quëna̧dëji̧ri̧ pio ji̧ri̧ ja̧ oa go̧ȩpea̧ oa cjiade pio yoa ma̧ȩ üdë. Ta̧rëchji̧vä: "Mo̧a̧ oa cjiami̧ dari̧ cjiaji̧ri̧ judiro̧ cjitëchji̧vä. Ja̧boa̧ oa cjiami̧ dari̧ cjiaji̧ri̧ judiro̧ bëdüchji̧vä. Ado Quiricho pio judi bëdü tänȩa̧ oaiä, tatarämi̧ dari̧ cjiapade dibëa̧ tjo üdë." Aja̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë.

¹⁵ Ja̧di tara quëna̧chji̧vä coëma cjiari̧ cjo̧ro̧pea̧ oa. Jabechji̧ Ütë tjamo̧ ja̧ ma̧ȩ oa dabadëji̧ri̧mi̧ dari̧ cjo̧ro̧dëchji̧vä, jabo urëdi oa jo̧rȩtarea̧ra̧ pio ju̧ri̧ra̧ jo̧rȩtariä dopachji̧vä.

¹⁶ Jabechji̧ pio yaba̧mȩ yoaiä cjo̧ro̧ji̧ri̧ pio judiro̧ orë ma̧i̧ da chjai̧dë oa jape cjiaji̧ri̧rȩ cjo̧ro̧dirȩ. Pio judiro̧mi̧ dari̧ cjo̧ro̧dëchji̧vä, jabo ji̧dë ma järi tjamo̧chji̧vä chjadëri̧ cjo̧ro̧pea̧ ji̧, tjaoërämo̧dë.

¹⁷ Ado pio ju̧i̧iä yo̧requededibe. Japëtaraji̧ri̧mi̧ dari̧ cjo̧ro̧dëchji̧vä. Chumi̧dëri̧ cjiadëchji̧vä jabo chjadëri̧ dabaji̧ri̧rȩ cjo̧ro̧chji̧vä. 'Aja̧, ja̧di dari̧ cjo̧ro̧tä eadicoada, Ano̧mȩ tjamo̧ judi ja̧di dari̧ cjo̧ro̧tä eadicoada, jabechji̧ ja̧di dari̧ japea̧ üdë goae tjamo̧diji̧da' quëna̧ dabapea̧ ji̧ dabapatäreji̧ri̧nȩrȩ, järi tjamo̧ji̧ri̧rȩ.

¹⁸ Ado ërü pio oaiä yu̧i̧a̧ oa cjiadëchji̧vä. Jabechji̧ chjai̧dëri̧ cjo̧ro̧ tänȩmȩde. Pio ju̧i̧iä ërürë boami̧ dari̧ cjo̧ro̧dëchji̧vä, jabo Tjo tjamo̧rȩ boa̧rämo̧ cjo̧ro̧täreji̧ri̧nȩrȩ. Pio ju̧i̧iämo̧i̧ yu̧i̧a̧ oa cjiami̧ dari̧ cjiatäreji̧ri̧nȩrȩ.

¹⁹ Ado Tjo tjamo̧rȩ boa̧ oa cjiaji̧ri̧rȩ ni̧bä chjaochji̧vä dibëa̧ dëbëti̧ra̧ chia, Ütë tjamo̧ ja̧ ma̧ȩra̧ ni̧bäji̧ri̧rȩ. Ado ji̧mo̧ cjiaji̧ri̧rȩ go̧a̧chji̧vä Ano̧mȩ pio ju̧i̧iäpȩmo̧. Dibëa̧ yadë maeara̧ jabo dibëa̧ chji̧ra̧ jo̧rȩtaji̧ri̧rȩ go̧a̧chji̧jo̧ȩ, pio ju̧i̧iäpȩmo̧ chjacjiamȩri̧ jo̧rȩtaji̧ri̧rȩ.

²⁰ Ado ji̧dë ma jo̧rȩtachji̧jo̧ȩ ibëa̧ Ama̧i̧ Ütë pio ju̧i̧iäpȩmo̧. 'Jabechji̧ chjadë tjamo̧diibëda, a̧dë chjäte chjadëri̧ japea̧diibëda, jabechji̧ Ano̧mȩ Jechu Quiricho pio ju̧i̧iä chjätärea̧ yürüa̧diibëda' quëna̧ jo̧rȩtachji̧jo̧ȩ. Aja̧ ca̧ oti̧, chjai̧dëri̧ chjätäräbo, gitori̧ tararäbo, 'jabechji̧ chjadëri̧ japadiibëda, chjadëri̧ jidadiibëda' quëna̧ jo̧rȩta̧chji̧jo̧ȩ dibëa̧ Ütë oa, tjaoërämo̧dë.

²¹ Ado danȩrȩ, mȩnȩro̧ Quiricho pio ju̧i̧ ba chia jo̧rȩta̧ oaiä, jabechji̧, dibëa̧ dëbëti̧ra̧ chia ta̧rë ta̧rë japaji̧ri̧rȩ cjo̧ro̧täreji̧ri̧nȩrȩ. Jabechji̧ ado cja̧rȩmo̧rȩ ibë yo̧ro, ta̧rëdiä matäreji̧ri̧rea̧rȩ, ma̧ chiadëri̧ cjiaji̧ri̧rȩ.

Ja̧di dari̧ cjo̧ro̧täreji̧ri̧dirȩ üi̧ ëbaji̧ri̧ jini̧ro̧

²² Ado mȩnȩro̧, üi̧ chiaji̧ri̧ pio jini̧ro̧, jabechji̧ chjadëri̧ ta̧rë ta̧rë japatäreji̧ri̧mȩnȩro̧ji̧ri̧ dibëa̧ oari pio ji̧ri̧ A̧no̧mȩ pio ju̧i̧ ta̧rë ta̧rë japami̧ dari̧.

²³ Danȩro̧, üi̧ judi tjübëmi̧ dadi. Iei̧ ji̧ tjamo̧ yo̧mȩ pio judidi. Peaja̧didi Quiricho judi. Tjübëmi̧ dadi. A̧doparea̧ ja̧ tjamo̧ yo̧mȩ pio judidi. Ado pio judidi a̧doparea̧ pio ji̧ Chjätä Tänȩmȩ judi. Aja̧ chjadëri̧ chjätä tänȩdiji̧ jibëa̧ icjarami̧ da oa.

²⁴ Ado a̧doparea̧ inȩ ta̧rë ta̧rë japapea̧ chiani̧ji̧ Quiricho pio ju̧i̧. Ado oari chiaji̧ri̧ ji̧ri̧ro̧ peaja̧di dari̧ chjadëri̧ ta̧rë ta̧rë japapea̧ chianȩro̧ji̧ri̧ dibëa̧ oari ji̧ri̧ a̧dë chiquirea̧ decjiari̧.

Ja̧di dari̧ cjo̧ro̧täreji̧ri̧dirȩ iei̧ chiaji̧ri̧ judiro̧

²⁵ Ado mȩnȩro̧, iei̧ chiaji̧ri̧ pio judiro̧, ea tjamo̧pea̧ chiarenȩro̧jȩrȩ dibëa̧ ivi ji̧ri̧ Quiricho judi a̧doparea̧ pio ji̧ ea tjamo̧rërea̧mi̧. Danȩrȩ, Quiricho pio judi ea tjamo̧mȩrȩ ano̧ mire ja̧boera̧pea̧de pio ji̧ chjiari.

²⁶ Ja̧di dari̧ japarëremȩde a̧doparea̧ pio ji̧ china̧chjari̧ tutipea̧ oa, chjai̧dë chiadë maeari̧ cjiapea̧ oa. Aja̧, uira̧ joami̧ dari̧ cjiapea̧ oa, Ütë ja̧ ma̧ȩ pio ju̧i̧ quëna̧ oaiä uira̧ joami̧ dari̧ cjiapea̧ oa ano̧ mire ja̧boera̧pea̧de.

²⁷ Jabo ¿tjana̧pea̧ oa ja̧boera̧pea̧de? Tjana̧pea̧ oadë, jabechji̧ pio jënȩ mitëpea̧ oa, a̧doparea̧ chjacjiayi̧ tjamo̧ pio ji̧ mitëpea̧ oa ja̧boera̧pea̧de. Tjamo̧ davä. Co chjami̧ dayi̧ pio ji̧ mitëpea̧ oa, chjai̧dë chiadëyi̧ pio ji̧ mitëpea̧ oa, cjari̧darea̧ decjiayi̧ pio ji̧ mitëpea̧ oa, chjadëri̧ tutia̧ oa cjiayi̧ pio ji̧ mitëpea̧ oa ja̧boera̧parëremȩde.

^28-29 Tjamo̧ davä. Quiricho judi ea tjamo̧mȩrȩ, chjadëri̧ jidadejȩ a̧doparea̧ pio ji̧ jibëa̧ icjarami̧ da oa. Ado mȩnȩro̧, ivi chiaji̧ri̧ pio judiro̧ peaja̧di dari̧ jidapea̧ chiarenȩro̧jȩrȩ dibëa̧ ivi pio ji̧ri̧. Chjadëri̧ eapea̧ chiarenȩro̧jȩrȩ. Danȩrȩ, mȩnȩro̧ dibëa̧ icjara oa eadë ma ja̧didë. Ea tjamo̧nȩrȩ. Ado pio ju̧i̧iä chjadëri̧ jidarenȩro̧jo̧ȩ. Jurarea̧ yürürenȩro̧jo̧ȩ. Chjadëri̧ ina̧renȩro̧jo̧ȩ. Ado peaja̧dimi̧ dari̧ eatäreji̧ri̧nȩrȩ dibëa̧ ivi pio ji̧ri̧. Tjamo̧ davä. Dibëa̧ icjara oa eami̧ eatäreji̧ri̧renȩro̧jȩrȩ. Jabechji̧ jibëa̧ iei̧ ji̧ chjadëri̧ eamȩ pio judi chjadëri̧ eadejȩ jibëa̧ icjarami̧ da pio ji̧. Jabechji̧ ëbaji̧ri̧ pio judiro̧ cjarȩmȩpe baga̧ tara, jabechji̧ jibëa̧ icjarami̧ da pio ji̧ chjadëri̧ eadejȩ.

³⁰ Ado a̧ro̧rȩ pio ju̧i̧ ja̧ icjarami̧ da tara ea tjamo̧diibe Quiricho judi. Jabechji̧ quëna̧ji̧ri̧ pio judiro̧ Quiricho pio ju̧i̧ ja̧ icjarami̧ darea̧rȩ.

³¹ Danȩrȩ, üi̧ judi jibëa̧ iei̧ ji̧ ëba̧ pio ju̧i̧ chjiari ma̧ȩ üdë peadëri ja̧ go̧ȩpea̧ oa cjiarëremȩde no̧mȩ go̧ȩparëreji̧ri̧ pio ji̧ri̧iä. Ta̧rëchji̧vä. "Ja̧di tara üi̧ judi jibëa̧ iei̧ ji̧ ëbarä, jabechji̧ a̧dë baätäremȩdejȩrȩ jȩa nö̧riji̧ri̧ pio ji̧ri̧. Ado judiro̧ ëba mo̧a̧ oaiä, jabechji̧ cja̧rȩmȩ pumȩmi̧ dari̧ cjiadiäpadirȩ. Ado Ütë tjamo̧ judi, 'Aja̧ ëba̧diro̧da, cja̧rȩmȩ pumȩmi̧ dari̧ cjiadiäa̧diro̧da yaba̧' quëna̧ jo̧rȩtamȩrȩ dadejȩrȩ.” Aja̧, ja̧di ta̧rëri go̧ȩpea̧ oa cjiarëremȩde ma̧ȩ üdë.

³² Ado danȩrȩ ca̧ oti̧, peaja̧dimi̧ dari̧ cjiadirȩ quëna̧ji̧ri̧ judiro̧ Quiricho pio ju̧i̧ nö̧ta. Pio ju̧i̧ nö̧ta cja̧rȩmȩ pumȩmi̧ dari̧ cjiadirȩ. Ado pio jiro jo̧rȩtarea̧ üdë goadia̧ oa cjiami̧ dari̧ cjiarërea̧ ji̧, chjadë marä cjiami̧ dari̧ cjiade yaba̧.

³³ Ja̧di tara iei̧ chiaji̧ri̧ pio judiro̧ chjö̧na̧i̧rȩ, jabechji̧ chjadëri̧ eapea̧ chiadiro̧jȩrȩ jibëa̧ ivi ji̧ri̧, jibëa̧ icjara oa eami̧. Ado ivi pio jini̧ro̧ peaja̧di ba chia dapea̧ chiani̧ro̧jȩrȩ jibëa̧ oari pio ji̧ri̧.