Epjecho Ma̧ȩ 4 - Biblia Pume

Quiricho pio ju̧i̧ ja̧ icjarami̧ darea̧rȩ

¹ Ja̧di tara, Ütë tjamo̧ judi Jechu pio ju̧i̧iä dibë chjadëri̧ japea̧ tara, yo̧tarequededibe mȩnȩro̧ Ütë ja̧ ma̧ȩrämo̧ cjo̧ro̧tä, pio judi dibë ëna̧diäa̧mi̧. Aja̧, chaäa̧ oa cjiamȩrȩ, ca̧ Ano̧mȩ pio ju̧i̧ ja̧ oa ja̧bepea̧ oaiä chaäa̧ oa cjiamȩrȩ yo̧tarequededibe mȩnȩro̧ coëma cjiari̧ cjo̧ro̧tä, Ütë tjamo̧ pio judi dibë ëna̧diäa̧mi̧.

² Pio ju̧i̧iä dibëa̧ chji̧rämo̧ quëna̧tadëchji̧vä jabo 'o judiro̧ pio coa u̧i̧ ba chiadiro̧da' quëna̧chji̧jȩrȩ. Jabechji̧ cjäri̧ri̧ cjia dachji̧jȩrȩ. Mai̧ dari̧ japadëchji̧jȩrȩ jabo ma̧ chjua ëba cjo̧ro̧chji̧jȩrȩ, ba chia da tjamo̧ji̧ri̧rȩ.

³ Ado Tjo tjamo̧ pio judi a̧doa̧ oaiä, jabechji̧ cja̧rȩmȩ chji̧ chiami̧ dari̧ jo̧rȩtachji̧vä jadüchiami̧ bubape bagami̧ dari̧ japarea̧ decjiari̧. Jabechji̧ mȩnȩro̧ ji̧mo̧ cara̧ oa cjiami̧ dari̧ cjia̧ oaiä chjara chiari̧ jo̧rȩtadëtäreji̧ri̧nȩrȩ, jabo chji̧ goaera̧ jo̧rȩtatäreji̧ri̧nȩrȩ.

⁴ Jabechji̧ Ütë tjamo̧ ju̧i̧ quëna̧ji̧ri̧ pio judiro̧, Jechu pio ju̧i̧ ja̧ icjarami̧ darea̧rȩ. Cja̧rȩmȩ bubarea̧rȩ. Ado Tjo tjamo̧ judi peaja̧di cja̧rȩmȩde. Pio ju̧i̧ chiaji̧ri̧pea̧rea̧rȩ cja̧rȩmȩ icjarami̧ dari̧. Ado a̧ro̧rȩ jidata̧ üdë peaja̧di cja̧rȩmȩde. Jabechji̧ Ütë tjamo̧ judi ëna̧diäa̧ tara, pio ibë yürüpea̧ pio ju̧i̧ jidataji̧ri̧rȩ cjo̧ro̧rea̧rȩ.

⁵ Ado ibëa̧ Ano̧mȩ judi peaja̧di cja̧rȩmȩde. Ado cja̧rȩmo̧ decjiade. Ado a̧ro̧rȩ quëna̧ji̧ri̧pea̧ ma̧ȩ üdë peaja̧di cja̧rȩmȩde. Yo̧a̧ri̧dëde. Jabechji̧ cja̧rȩmȩ maeade. Ado a̧ro̧rȩ go̧ȩ cjaeä chuda̧ oa cjiarërea̧ ji̧, jabechji̧ cja̧rȩmȩ quȩ pio ju̧i̧iämo̧i̧ chuda̧ oa cjiarëreji̧ri̧rea̧rȩ, Jechu ja̧ quȩ pio ju̧i̧iämo̧i̧.

⁶ Ado Ütë tjamo̧ judi peaja̧di cjarȩmȩde. Ibëa̧ Ama̧i̧ pio judimo̧de. Ütëbodärä ja̧ Ano̧mȩde. Pio ju̧i̧ ja̧ chja̧oerämo̧ cjiarea̧rȩ. Ado ibëa̧ icjararä bëpera̧pea̧de. Ado pio ju̧i̧ ja̧ mu̧i̧tjoi̧pea̧rea̧rȩ a̧ro̧rȩ. Ado pio judi ana̧ri̧ ja̧bepade pio ibëiä.

⁷ Tjamo̧ davä ca̧ oti̧, cja̧rȩmȩrea̧rȩ, jabo a̧ro̧rȩ pio ju̧i̧ ja̧ oa chjadëri̧ ja̧bepë yürüpea̧ oa tjaoëti̧ chia ja̧beparea̧ oa yürüchärëremȩdiibe quëna̧ji̧ri̧ nö̧tai̧ oa. Aja̧, Quiricho pio judi ütara̧mi̧ yürüchärëremȩdiibe. Chjamȩrȩ yürüchäa̧diibe pio judirimȩ marë.

⁸ Ado pio ju̧i̧iä ja̧di ta̧rëri̧ go̧ȩpea̧ oa cjiarëremȩde Ütërë go̧ȩpa tänȩrërea̧ ma̧ȩ üdë Quiricho pio ju̧i̧ chjiari: "Ado Quiricho judi pio jȩa dëbëpe chjaomi̧ dari̧ japaji̧ri̧ ütëbodärä oa boadärärëremȩdejȩrȩ, cjarȩmȩrȩ cjiadiädëri̧. Ado ja̧dëa ji̧ ütëbodärä oa chjadëri̧ na̧rȩpea̧ oa, pio ji̧ri̧ goae tarari̧ boadäräa̧ pio ju̧i̧ chjiari chjadëri̧ na̧rȩpea̧ oa, jabechji̧ buarëremȩde a̧dëräpȩ yuro ütëbodärärë coëma cjiari̧ quëna̧pea̧ oa. 'Aja̧, Quiricho pio judi tjamo̧dida, boadärämȩ tjamo̧ pio judimo̧dida' quëna̧ jo̧rȩtapea̧ oa a̧dëräpȩ yuro buarëremȩde. Ado pio ju̧i̧ uëri tjaoëti̧ chia ja̧beparea̧ oa yürüchärëremȩdejȩrȩ jibëa̧ pumȩ ji̧ri̧."

⁹ Aja̧ ca̧ oti̧, ja̧di ta̧rëri̧ go̧ȩpea̧ oa cjiade ma̧ȩ üdë. Jabo danȩrȩ, Quiricho pio ju̧i̧ chjiari yo̧a̧ ji̧, "Buarëremȩde a̧dëräpȩ yuro" yo̧a̧ ji̧, ¿tjana̧ yo̧rea̧de? Tjana̧ yo̧rea̧dë, jabechji̧ Quiricho judi a̧dëräpȩ yuro bua̧ pio ju̧i̧ chjiari yo̧rea̧de. Jabo danȩrȩ, a̧dëräpȩ yuro buarea̧ darëremȩde judi pearä judi pio yoa chiri oa a̧dëri pio judiri birë ma̧na̧rërea̧ oaiä.

¹⁰ Ado ibëa̧ chirirä birë ma̧na̧rëremȩ pio judide a̧dë chjäte uë tjamo̧räpȩ yuro cjitërëremȩ judi, a̧dë pio ju̧i̧ uëräpȩ yuro cjitërëremȩ pio judi. Tjamo̧ davä. A̧dë chjäte uëräpȩ yuro cjitërëremȩde Quiricho judi a̧dë oëra̧ti̧ tjamo̧ oa cjiapea̧ oa, chiri nö̧ta oa cjiapea̧ oa. Ado oëra̧ti̧ oa nö̧tadäräri̧ cjiamȩrȩ ba chia tjamo̧räpȩ cjiade yaba̧, tjamo̧ yo̧mȩrȩ cjiamȩrȩ.

¹¹ Ado pio judi tjaoëti̧ chia ja̧beparea̧ oa yürüchärëremȩdiibe a̧dopaji̧ri̧ pio ji̧ri̧. Judi ütara̧mi̧ mitërëremȩdiibe jibëa̧ ja̧beparea̧ pio ju̧i̧ ja̧bepapea̧ oa. O ji̧ri̧ mitërëremȩdejȩrȩ chjadüpea̧ oa. Jechurë chjadüa̧ pio judiro̧dirȩ. Ado o ji̧ri̧ mitërëremȩdejȩrȩ Ütërë ea jana̧ chjadüa̧ oa ni̧bäpea̧ oa. Ado Ütërë ea jana̧ chjadüa̧ oa ni̧bäji̧ri̧ pio judiro̧dirȩ. Ado o ji̧ri̧, ma̧ȩ chjadëi̧ pio ju̧i̧ to̧bari̧ ni̧bäpea̧ oa a̧de mitërëremȩdejȩrȩ. Ma̧ȩ chjadëi̧ pio ju̧i̧ to̧bari̧ ni̧bäji̧ri̧ pio judiro̧dirȩ. Ado ju̧i̧ uëri mitërëremȩdejȩrȩ jidaji̧ri̧ pio ji̧ri̧. Quëna̧ji̧ri̧ pio ji̧ri̧ chjadëri̧ jidapea̧ oa, quëna̧ji̧ri̧ pio ji̧ri̧ chjadëri̧ a̧ra̧ano̧pea̧ oa, mitërëremȩdejȩrȩ. Aja̧, tjaoëti̧ chia ja̧beparea̧ oa yürüchärëremȩdiibe quëna̧ji̧ri̧ pio ji̧ri̧ Quiricho judi.

¹² Jabo ¿tjana̧pea̧ oa ja̧di dari̧ yürürëremȩdiibe? Tjana̧pea̧ oadë, jabechji̧ tutia̧ oa cjiaji̧ri̧ pumȩ pio judiro̧ ütëborë chjadëri̧ ja̧beparea̧ chiapea̧ oa, jibëa̧ Ano̧mȩ pio ju̧i̧ ja̧ oa chjadëri̧ ja̧bepë yürüpea̧ oa yürüchärëremȩdiibe, Quiricho ja̧ icjarami̧ da üdë ju to̧bape jämi̧ dari̧ cjiapea̧ oa.

¹³ Jabechji̧ a̧ro̧rȩ ütëborë cja̧rȩmȩ chji̧ chiami̧ dari̧ cjo̧ro̧pea̧ oa, a̧ro̧rȩ coëma cjiadiäa̧ maea oa jo̧rȩtapea̧ oa, Ja tjamo̧ pio ju̧i̧ chjiari urëdi tjamo̧ oa jo̧rȩtapea̧ oa, a̧rorȩ ibëa̧ tjoro üi̧padärämi̧ dari̧ cjiapea̧ oa, tjaoëti̧ chia ja̧beparea̧ oa yürüchärëremȩdiibe, Quiricho pio ju̧i̧ nö̧tadäräri̧ cho̧rë cjo̧ro̧rea̧ dapea̧ oa.

¹⁴ Ado a̧ro̧rȩ ja̧di dari̧ cjiarä, jabechji̧ pea nö̧ria̧ oa cjiami̧ dari̧ cjiadiädëparea̧rȩ. Chara boi̧chji̧ üdë ma̧i̧ da gö̧ma̧rä oëra̧ti̧ oa aenoa̧ oa cjiami̧ dari̧ cjiadëparea̧rȩ. Tjamo̧ davä. U̧i̧pea̧ oa cjiadëparea̧rȩ. Ado goaeri̧ a̧ra̧ano̧ji̧ri̧ oa, gari̧pe gari̧pe a̧ra̧ano̧ji̧ri̧ oa ta̧rë ja̧bodëpaparea̧ro̧jȩrȩ.

¹⁵ Jabechji̧ u̧i̧pea̧ oa cjiadëparea̧rȩ, jabo ibëa̧ dëbëti̧ra̧ chia eaji̧ri̧rȩ cjo̧ro̧parea̧rȩ, coëma cjiari̧ japaji̧ri̧rȩ. Jabechji̧ Quiricho pio judimi̧ dape järi̧ ütëchjape jäparea̧rȩ, ibëa̧ tjübëmi̧ damȩ pio ju̧i̧ ja̧ ma̧ȩrämo̧ cjo̧ro̧ji̧ri̧rȩ.

¹⁶ Jabechji̧ quëna̧ji̧ri̧ pio judiro̧ Quiricho pio ju̧i̧ ja̧ icjarami̧ darea̧rȩ. Ado danȩrȩ, pumȩ icjara üdë ji̧ra̧ri̧ chiade. Ado nö̧tai̧därärë chjadëri̧ ja̧bepea̧ oaiä, jabechji̧ ju to̧bape jäde icjara üdë. Ado peaja̧di dari̧ cjiarea̧rȩ quëna̧ji̧ri̧ pio judiro̧. Cja̧rȩmȩ codë oa, ji̧mo̧ maea oa cara̧ oa cjiami̧ dari̧ cjiarea̧rȩ no̧i̧dërë. Ado nö̧tai̧därärë chjadëri̧ ja̧bepea̧ oaiä, jabechji̧ ju to̧bape järea̧ dade Quiricho ja̧ icjarami̧ da üdë. Aja̧, tjübëmi̧ darë yo̧a̧ chja̧oerä cjo̧ro̧a̧ oaiä, jabechji̧ ju to̧bape järea̧ darea̧rȩ ibëa̧ dëbëti̧ra̧ chia eaji̧ri̧rȩ.

Pea chjari̧ cjo̧ro̧rea̧rȩ Quiricho pio ju̧i̧iä

¹⁷ Ja̧di tara ibëa̧ Ano̧mȩ pio ju̧i̧ ja̧ ma̧ȩra̧ yo̧tarequededibe quëna̧dëji̧ri̧mi̧ dari̧ cjo̧ro̧chea oa. Danȩrȩ, teracabari̧ jo̧rȩte cjiaji̧ri̧rȩ cjo̧ro̧dirȩ.

¹⁸ Bagönȩmi̧ darä jo̧rȩtadirȩ tatarä cjiami̧ dari̧ jo̧rȩtarea̧ decjiari̧. Ado judiro̧ chjuari̧ jiade chjao oaiä, jabechji̧ da cotomi̧ dari̧ cjo̧ro̧dirȩ. Ja̧di tara Ütërë yürüa̧ oa bucho ana̧ cjo̧ro̧rea̧ oa goadëdirȩ.

¹⁹ Ado judiro̧ chjai̧dëri̧ japea̧ oaiä idëri̧ cjiape bagatärea̧ ji̧, cjäri̧ madirȩ, idëri̧ cjiarea̧ taradëji̧ri̧dirȩ. Jabechji̧ idi̧ dati̧ oa jape chjaoji̧ri̧rȩ cjo̧ro̧ cjiadirȩ. Tüdüa̧mi̧ darä cjo̧ro̧tärea̧ ji̧, jabechji̧ oëadëji̧ri̧ tjamo̧rȩ cjo̧ro̧dirȩ, chjai̧dëri̧ japapea̧ ji̧ goaraji̧ri̧rȩ.

²⁰ Jabo ja̧didënȩrȩ mȩnȩro̧. Jabechji̧ Quiricho ja̧ ma̧ȩ pio ju̧i̧iä, tjaoëpai̧ dari̧ cjo̧ro̧rea̧ dabaji̧ri̧pea̧nȩrȩ.

²¹ Tjamo̧ davä, chjadëri̧ dabapea̧nȩrȩ Jechu pio ju̧i̧iä. Judi ma̧ȩ coëma oa a̧ra̧ano̧a̧ oaiä chjadëri̧ dabapea̧nȩrȩ.

²² Jabechji̧ dibëa̧ pumȩrëremȩ üdë chjibo ütama̧i̧ oa mu̧i̧ cürë ana̧ oa cjiami̧ dari̧ cjiarëremȩde. Tjamo̧ davä. Mȩnȩro̧ pearä cjo̧ro̧rërea̧ üdë, ji̧dë ma chjadëdëpe järëremȩ üdë, u̧i̧pea̧ oa cjiarëremȩ üdë, ji̧dë ma dae ja̧bo dae ja̧bo cjiarëremȩ üdë, jabechji̧ chjibo ütama̧i̧ oa mu̧i̧ cürë ana̧ oa cjiami̧ dari̧ cjiarëremȩde.

²³ Ado yaba̧ jo̧rȩtarea̧ peaja̧ra̧ ano̧ mire jo̧rȩtaji̧ri̧pea̧nȩrȩ, chji̧ peaja̧ra̧ pio ju̧ri̧ra̧.

²⁴ Jabechji̧ chjibo peaja̧ra̧ ano̧ mire ina̧ oa cjiami̧ dari̧ cjiaji̧ri̧pea̧nȩrȩ yaba̧, pumȩ peaja̧ra̧. Tjamo̧ davä. Ütë pio judimi̧ dara̧ pio ju̧ri̧ra̧, Ütërë pareapea̧ pumȩra̧ pio ju̧ri̧ra̧ ano̧ mire ina̧ oa cjiami̧ dari̧ cjiaji̧ri̧pea̧nȩrȩ. Aja̧, coëma cjiari̧ cjo̧ro̧mȩ pumȩra̧ pio ju̧ri̧ra̧, china̧chjari̧ tutia̧ oa cjiamȩ pumȩra̧ pio ju̧ri̧ra̧ ano̧ mire ina̧ oa cjiami̧ dari̧ cjiaji̧ri̧pea̧nȩrȩ. Pio ju̧i̧ dabapea̧nȩrȩ Jechu pio ju̧i̧iä.

²⁵ Ja̧di tara, mȩnȩro̧ pumȩ peaja̧ mapea̧ tara, jabechji̧ ma̧ȩ chjádë yürüdë machji̧vä. Danȩrȩ, Quiricho pio ju̧i̧ ja̧ icjarami̧ darea̧rȩ. Ji̧mo̧ cjiarea̧rȩ. Ja̧di tara ma̧ȩ tjamo̧i̧ cjia maea oa ni̧bätäreji̧ri̧rea̧ro̧jȩrȩ ibëa̧ oti̧ ji̧ri̧.

²⁶ Ado danȩrȩ, mȩnȩro̧ chjai̧dë pio ju̧i̧ chjiari ërecjiape järä judi, jabechji̧de. Jabo chjai̧dëri̧ japaji̧ri̧rȩ ërecjiadëchji̧vä jabo. Jabechji̧ ërecjiape järä judi, jabërä cjatäcjie jo̧rȩtapea̧de dorë birabea yaboi̧.

²⁷ Ado u̧i̧parea̧ oa yürüdëchji̧jo̧ȩ Ichiae ju̧i̧, jabo chjuari̧ dëbë järichji̧jo̧ȩ.

²⁸ Ado mȩnȩro̧ garüji̧ri̧rȩ cjo̧ro̧rërea̧ ji̧, garüdëchji̧vä yaba̧. Jabechji̧ dibëa̧ ichira̧ garüji̧ri̧rȩ cjo̧ro̧rërea̧ ji̧, chjadëri̧ ano̧ mire ja̧bepachji̧vä cjäri̧ ja̧boji̧ri̧ pio ji̧ri̧iäpȩmo̧ chjadëri̧ a̧dopea̧ oa.

²⁹ Ado chjai̧dëri̧ ni̧bädëchji̧vä, jabo chjadëri̧ ni̧bäji̧ri̧rȩ cjo̧ro̧chji̧vä o ji̧ri̧ chjadëri̧ a̧dopea̧ oa. Aja̧, ma̧ȩ goaera̧ pio ju̧ri̧ra̧ chjadëri̧ ni̧bächji̧vä dibëa̧ pumȩ pio ji̧ri̧ ju chiaparȩpea̧ oa.

³⁰ Ado danȩrȩ, Tjo tjamo̧ pio ju̧i̧ gitori̧ jo̧rȩta tänȩdëchji̧jo̧ȩ. Jabechji̧ pio ju̧i̧iä go̧ȩ cäa̧mi̧ dari̧ cjianȩrȩ. Pio ju̧i̧iä chjadëri̧ jida̧ oa cjianȩrȩ mȩnȩro̧ a̧dëräpȩ go̧düdäräa̧rä yuro. Ja̧di tara Ütë ja̧ Tjo pio ju̧i̧ gito ana̧ri̧ jo̧rȩta tänȩdëchji̧jo̧ȩ.

³¹ Ado pio ju̧i̧iä yo̧requededibe ca̧ oti̧. Jabechji̧ chjai̧dëri̧ japadëchji̧jȩrȩ dibëa̧ pumȩ ji̧ri̧. Dibëa̧ chji̧ urëdi oa goëdëri̧ cjiari̧ jo̧rȩtadëchji̧jȩrȩ. Goadi jo̧rȩtaji̧ri̧rȩ ërecjiadëchji̧jȩrȩ. Goëdëtä bagadëchji̧jȩrȩ. Chamacho coëta̧ cjiadëchji̧jȩrȩ. Ado ya̧dëchji̧jȩrȩ dibëa̧ pumȩ ji̧ri̧. Ya coëri̧ ni̧bädëchji̧jȩrȩ, jabo jabechji̧ chjibo ütama̧i̧mi̧ da oa mu̧i̧ cürë ana̧ machji̧jo̧ȩ chjai̧dë pio ju̧i̧.

³² Ado chjaji̧ri̧chji̧vä dibëa̧ dëbëti̧ra̧ chia. Aja̧, cjäri̧ri̧ cjia dachji̧jȩrȩ dibëa̧ pumȩ ji̧ri̧. Danȩrȩ, Ütë tjamo̧ judi duridëparȩrëremȩdidibe Quiricho pio ju̧i̧iä. Peaja̧di dari̧ japachji̧vä dibëa̧ pumȩ pio ji̧ri̧. Duridëparȩmi̧ dari̧ japachji̧jȩrȩ dibë chjai̧dëri̧ japaji̧ri̧ pio ji̧ri̧. Aja̧, dibëa̧ dëbëti̧ra̧ chia duridëparȩmi̧ dari̧ japachji̧vä, goadi ërecjiarea̧ decjiari̧.