Epjecho Ma̧ȩ 3 - Biblia Pume

Ütë tjamo̧ judi pearä judi ütarë jo̧rȩtarërea̧ üdë goadia̧ oa cjiami̧ dari̧ cjiarërea̧ ji̧, jabechji̧ na̧rȩa̧ oa cjiami̧ dari̧ cjiamȩpea̧de yaba̧

¹ Ja̧di tara cüdë, Pablo pio judi, Ütërë judiodë pio ji̧ri̧ chjiari ana̧ri̧ tuti japea̧ tara, jabechji̧ pio ju̧i̧iä goë cjo̧dërequede pio dibë chjiari. Aja̧, chaärea̧ bëräpȩ tutia̧ oa cjiamȩrȩ, judiodë pio ji̧ri̧iäpȩmo̧ Jechu Quiricho pio ju̧i̧ chjiari a̧ra̧ano̧a̧ ba oa tutia̧ oa cjiamȩrȩ, goë cjo̧dërequede pio dibë chjiari.

² Aja̧ ca̧ oti̧, Ütë tjamo̧ judi pio coa mitëa̧ pio ju̧i̧ chjiari ta̧rëa̧ jironȩrȩ. Jabechji̧ pio coaiäpȩmo̧ cjäri̧ri̧ cjiamȩrȩ a̧dë chjäte chjadëri̧ japarëremȩdique. Jabechji̧ pio coa mitërëremȩdique judiodë pio ji̧ri̧iäpȩmo̧ a̧ra̧ano̧pea̧ oa, pio dibëiäpȩmo̧ ma̧ȩ chjadëi̧ pio ju̧i̧ ni̧bä chjaopea̧ oa.

³ Aja̧, goadia̧ oa cjiarërea̧ ma̧ȩ pio ju̧i̧ daba tänȩrëremȩdique. Ado pio jiro ma̧ȩ pio ju̧i̧ chjiari jabëtari̧mi̧ oa go̧ȩpea̧requededibe pio yoa ma̧ȩrä.

⁴ Ado pio ju̧i̧iä mȩnȩro̧ pio yoa ma̧ȩ oa go̧ȩ ni̧bärä, cüdë dibë go̧ȩpea̧ ma̧ȩ pio yoa go̧ȩ ni̧bärä, 'jabechji̧ Pablo judi tjamo̧ri̧ dabamȩdida, Ütë tjamo̧ judi Quiricho pio ju̧i̧ chjiari pearä ütarë jo̧rȩtarërea̧ pio ju̧i̧ chjiari tjamo̧ri̧ dabamȩdida' quëna̧ jo̧rȩtarea̧ dapanȩrȩ.

⁵ Jabechji̧ Ütë tjamo̧ judi dabarea̧ yürüdërërea̧ ji̧, judi pio jiro ma̧ȩ oa jabërä cjo̧ro̧rëreji̧ri̧ pio ji̧ri̧ dabarea̧ yürüdërërea̧ ji̧, jabechji̧ china̧chjari̧ tutia̧ oa cjiaji̧ri̧ pio ji̧ri̧ dabarea̧ yürürëremȩdiibe yaba̧. Tjamo̧ davä. Jënȩ mitëa̧ pumȩ pio ji̧ri̧, jënȩ chjadüa̧ pio ji̧ri̧ dabarea̧ yürürëremȩdibe, Ütërë ea jana̧ chjadüa̧ oa ni̧bäji̧ri̧ pio ji̧ri̧bo. Aja̧, jibëa̧ Tjo pio ju̧i̧iä dabarea̧ yürürëremȩdiibe.

⁶ Ado pio jiro ma̧ȩ üdë, pearä judi goadia̧ oa cjiarërea̧ ma̧ȩ üdë, ¿tjana̧ ju̧i̧ chjiari ma̧ȩde? Tjana̧ ju̧i̧ chjiari ma̧ȩdë, jabechji̧ pio ju̧i̧ chjadëri̧ yo̧parequededibe. Danȩrȩ, mȩnȩro̧ judiodë pio judiro̧ Jechu Quiricho pio ju̧i̧ chjiari ma̧ȩ chjadëi̧ pio ju̧i̧ quëna̧ji̧ri̧pea̧ oaiä, jabechji̧ a̧dë chjäte ba chiamȩti̧ chjö̧na̧i̧ oa ji̧mo̧ mitërea̧ dapanȩrȩ yaba̧ judio pio ji̧ri̧ nö̧ta. Jabechji̧ judio pio judiro̧mo̧rȩ mitërea̧ darërea̧ ji̧, pio judiro̧mo̧rȩ Ütërë yo̧ë cji̧därërea̧ pio ju̧i̧ mitërërea̧ ji̧, jabechji̧ judiodë pio mȩnȩro̧borë ji̧mo̧ mitërea̧ dapanȩrȩ yaba̧ Jechu pio ju̧i̧ chjiari quëna̧ji̧ri̧pea̧ oaiä, mȩnȩro̧ judio pio ji̧ri̧ nö̧ta cja̧rȩmȩ icjarape bagami̧ dari̧ cjiadiäa̧ oaiä.

⁷ Ado danȩrȩ ca̧ oti̧, pio jiro ma̧ȩ chjadëi̧ pio ju̧i̧ ja̧bepapea̧ oa mu̧i̧tjoi̧ tänȩrëremȩdique. Tjamo̧ davä. Pio jiro ma̧ȩ oa ja̧bepamȩpea̧requede pio judi coa cjäri̧ri̧ cjiamȩrȩ yürüa̧ oaiä, pio coa ju chiarea̧ yürüa̧ oaiä.

⁸ Jabechji̧ cüdë pumȩ ba chiadëräbo, cüdë Ütë ja̧ pumȩ pio ji̧ri̧ tjamo̧ri̧ nö̧tadëräbo, jabechji̧ pio coa cjäri̧ri̧ cjiamȩrȩ a̧ra̧ano̧rea̧ yürürëremȩdique Quiricho pio ju̧i̧ chjiari ma̧ȩ oa. Tjamo̧ davä. Ütë tjamo̧ ja̧ pumȩ judiro̧ ütëborë pio coaiä ji̧dë u̧i̧ ba chiaräbo, jabechji̧ pio coa yürürëremȩdique pio jiro ja̧beparea̧ oa. Aja̧, judiodë pio ji̧ri̧iäpȩmo̧ a̧ra̧ano̧pea̧ oa, judiro̧ Quiricho pio ju̧i̧ quëna̧ oaiä a̧dë chjäte ba chiamȩti̧ oa mitërea̧ dapea̧ oa, tjamo̧ri̧ dabarea̧mi̧dë oa mitërea̧ dapea̧ oa, yürürëremȩdique pio jiro ja̧beparea̧ oa.

^9-10 Jabo danȩrȩ ca̧ oti̧, jënȩ urëdi tjamo̧ oa jo̧rȩtarërea̧ pio ju̧i̧ chjiaribo daba tänȩtämi̧ cjiarëremȩde pio coaiä. Jabechji̧ chjö̧na̧i̧ti̧ oa Pareapamȩ Ütë judi pearä judirä ütarë jo̧rȩtarërea̧ ji̧, jabechji̧ quëna̧paji̧ri̧ pio judiro̧ ütëborë cja̧rȩmȩ pumȩ mape bagatä eamȩrȩ jo̧rȩtarëremȩde judio pio ji̧ri̧ chjiari, judiodë pio ji̧ri̧ chjiaribo. Jabo judi jo̧rȩtarërea̧ üdë goadia̧ oa cjiarëremȩde pearä judi. Tjamo̧ davä. Judi pearä ütarë jo̧rȩtarërea̧ üdë goadia̧ oa cjiarëremȩde, jabo yaba̧ pio coaiä daba tänȩa̧ oa cjiade. Pio coaiä ana̧ri̧ ni̧bäa̧ oa cjiade. Tjamo̧ davä. Ütërë jo̧rȩtarërea̧ üdë, pumȩ judiro̧ yo̧a̧ri̧rȩ cja̧rȩmȩ pumȩpe bagapea̧ pio ju̧i̧ chjiari jo̧rȩtarërea̧ üdë ana̧ri̧ daba tänȩa̧ oa cjiade. Ado pio ju̧i̧iä yaba̧ pumȩ judiro̧ ütëborë daea̧ oaiä, ëna̧diäa̧ oa a̧dopaji̧ri̧ pio ji̧ri̧ daea̧ oaiä, jabechji̧ ana̧ tjamo̧ri̧ jo̧rȩtaji̧ri̧rȩ dadiro̧jo̧ȩ. Tjamo̧ davä. Pumȩ judiro̧ ütëborë a̧dopaji̧ri̧ pio ji̧ri̧ daea̧ oaiä, ado a̧dëräpȩ tjamo̧ yo̧ji̧ri̧ pio judiro̧borë daea̧ oaiä, tjo maearë jauëchja pio judiro̧ daea̧ oaiä, jabechji̧ ana̧ tjamo̧ri̧ jo̧rȩtaji̧ri̧rȩ dadiro̧jo̧ȩ. Tjamo̧ davä. Judiro̧ ëna̧diäa̧ oa a̧dopaji̧ri̧ pio ji̧ri̧ daea̧ oaiä, 'chia chia, Ütë tjamo̧ pio judi a̧dë chjäte urëdi tjamo̧ oa jo̧rȩtarea̧ chiadida, ëna̧diäa̧ oa a̧dopaji̧ri̧ pio ji̧ri̧ chjiari chjadë tjamo̧ri̧ ütarë jo̧rȩtarëremȩdida' quëna̧ jo̧rȩtaji̧ri̧pea̧diro̧jo̧ȩ.

¹¹ Aja̧, ja̧di dari̧ earëremȩde Ütë tjamo̧ judi jënȩ pearä judiräri ja̧ ütarë jo̧rȩtarërea̧ ji̧. Ado judi ütarë jo̧rȩtarërea̧ pio ju̧i̧ japadärärea̧ darëremȩde davä Ano̧mȩ Jechu Quiricho pio ju̧i̧iä.

¹² Ado yaba̧ a̧ro̧rȩ Quiricho pio ju̧i̧ quëna̧ oaiä, jibëa̧ goera̧ pio ibë chjiari Ba Eamȩ pio ju̧i̧ nö̧tadäräri̧ tuti ba ano̧däräa̧ oaiä, jabechji̧ Ütë tjamo̧ ja̧ dëbëräpȩ go̧düdärämi̧ dari̧ japarea̧ darea̧rȩ, uapadëji̧ri̧rȩ, 'tjamo̧ri̧ go̧düdärärea̧mi̧dë jiroquëda' quëna̧ jo̧rȩtarea̧ decjiaji̧ri̧rȩ.

¹³ Ado pio ju̧i̧iä jabechji̧, järidëpe bagadëchji̧vä cüdë pio yi chaärea̧ bëräpȩ tutia̧ oa cjiapea̧ pio ju̧i̧ chjiari. Jabechji̧ pio yirequede cüdë pio dibëiäpȩmo̧ ma̧ȩ chjadëi̧ pio ju̧i̧ a̧ra̧ano̧a̧ tara, mȩnȩro̧ quëna̧ji̧ri̧pea̧ tara. Jabo cüdë chaärea̧räpȩ tutia̧ oa cjiamȩborë, jabechji̧ ma̧ chiadëri̧ cjiari̧ jo̧rȩtarequede cüdë pio dibë chjadëri̧ a̧ra̧ano̧rea̧ daea̧ tara, pio dibë a̧dorea̧ daea̧ tara.

Pablo judi ado goë cjo̧dërëremȩde quëna̧ji̧ri̧ pio ji̧ri̧ chjiari

¹⁴ Ja̧di tara ju chatura̧ cjiamȩrȩ ni̧bäreconȩ ibëa̧ Ama̧i̧ ju̧i̧.

¹⁵ Jabechji̧ pio judimo̧rȩ yürüa̧ oa quirë baä quirë baä cjiarea̧ darea̧rȩ pumȩ chjö̧na̧i̧däräti̧rȩ, a̧dëräpȩ cjiaji̧ri̧borë.

¹⁶ Pio ju̧i̧iä goë cjo̧dëreconȩ. Aja̧, a̧dë chjäte jauëchjamȩ pio ju̧i̧iä, a̧dëräpȩ ju̧ri̧ ütararea̧mi̧dëri̧ yürürea̧ goamȩ pio ju̧i̧iä goë cjo̧dëreconȩ ju chiarea̧ yürütä dibëa̧ tjoro, mȩnȩro̧ to̧bape järea̧ dapea̧ oa Tjo tjamo̧ pio ju̧i̧iä.

¹⁷ Aja̧, mȩnȩro̧ chjuari̧ quëna̧tä goë cjo̧dëreconȩ Quiricho pio judi dibëa̧ chji̧rä goae tarari̧ cjo̧ro̧rea̧mi̧ dari̧. Ado mȩnȩro̧ Quirichorë ea̧ chja̧oerä chjuari̧ cjiatä eamȩrȩ goë cjo̧dërequede peaja̧di. Danȩrȩ, to tacö̧ üdë uredi tacö̧pe bagade ëteräpȩmo̧, to üdë chjua tjamo̧ri̧ cjiarea̧mi̧ dari̧. Ado peaja̧dimi̧ dari̧ cjiatä earequededibe Jechurë ea̧ chja̧oerä.

¹⁸ Ado mȩnȩro̧ ja̧di dari̧ cjo̧ro̧a̧ oaiä, jabechji̧ tutia̧ oa cjiaji̧ri̧ pio ji̧ri̧ nö̧ta coëma cjiari̧ quëna̧rea̧ dapanȩrȩ Quiricho judi dibë ea̧ pio ju̧i̧ chjiari. 'Aja̧, ea tjamo̧diibëda, Quiricho pio judi ütararea̧mi̧dëri̧ eadiibëda, jabechji̧ judi pio ibëiäpȩmo̧ earea̧ üdë ja̧di go̧a̧ti̧mi̧ dari̧ cjiadida, ja̧di ana̧mi̧ dari̧ cjiadida, uë tjamo̧rä yuro cjiami̧ dari̧ cjiadida, a̧dë chjäte ji̧ra̧dida' quëna̧rea̧ dapanȩrȩ.

¹⁹ Jabechji̧ tjamo̧ri̧ dabatä earequededibe davä Quiricho judi dibë earea̧ pio ju̧i̧ chjiari. Jabo ütëbo oa dabapadärärea̧mi̧dëde jabo. Jabechji̧ judi ibë ea̧ üdë ütararea̧mi̧dë tara, tjamo̧ri̧ dabapadärärea̧mi̧dëde. Jabo nö̧tadäräri̧ dabaparea̧mi̧dëbo, jabechji̧ ji̧dë ma dabapachji̧vä. Ado judi dibë ea̧ pio ju̧i̧ chjiari chjadëri̧ dabapea̧ oaiä, jabechji̧ Ütë tjamo̧ pio judiri ma̧na̧mȩ cjo̧ro̧rea̧ra̧ cjo̧ro̧rea̧ dapanȩrȩ pio judimi̧ dari̧ cjo̧ro̧ji̧ri̧pe bagari̧.

²⁰ Pio ju̧i̧iä chjacjiamȩri̧ jo̧rȩtapea̧de Ütë tjamo̧ judi. Jabechji̧ jibëa̧ jauëchja pio ju̧i̧iä a̧dë chjäte ana̧ tjamo̧ri̧ japapai̧ dade davä pio ibëiä, a̧ro̧rȩ quëna̧dërërea̧ pio ju̧i̧. Jabechji̧ a̧ro̧rȩ pearä quëna̧tarërea̧ pio ju̧i̧ uëri a̧dopai̧ dadiibe davä, ana̧ tjamo̧ri̧ japarea̧mi̧ dari̧.

²¹ Ado pio ju̧i̧iä jabechji̧, pio ibëiä ana̧ri̧ ja̧bepamȩ pio ju̧i̧iäpȩmo̧ ji̧dë ma chjacjiamȩri̧ jo̧rȩte chjaopea̧de bucho ana̧, yuroparea̧ decjiari̧. Jabechji̧ Jechu Quiricho pio judiri ja̧ji̧ri̧ judiro̧, a̧doparea̧rä cji̧däa̧ oa cjiaji̧ri̧ pio judiro̧, ji̧dë ma chjacjiamȩri̧ jo̧rȩtatädiro̧jo̧ȩ Ütë tjamo̧ ju̧i̧iäpȩmo̧. Ja̧ditäde.