Epjecho Ma̧ȩ 2 - Biblia Pume

Pea chjari̧ cjo̧ro̧rea̧rȩ pearä cjo̧ro̧rërea̧mi̧dëri̧

¹ Pearä judi dibëa̧ tjo üdë ja̧boa̧mi̧ dari̧ cjiarëremȩde mȩnȩro̧ oëra̧diäa̧ oaiä, chjai̧dëri̧ japea̧ oaiä.

² Aja̧, ja̧di dari̧ cjo̧ro̧rëreji̧ri̧nȩrȩ. Ado dai chirirä chjai̧dëri̧ cjo̧ro̧ji̧ri̧ pio judiro̧mi̧ dari̧ cjo̧ro̧rëreji̧ri̧nȩrȩ. Jabechji̧ ta̧rë ja̧borëreji̧ri̧renȩro̧jo̧ȩ yaröca pio ji̧ri̧ ja̧ ütë oa, uëräpȩ cjiaji̧ri̧ pio ji̧ri̧ ja̧ ütë oa. Ado Ütë tjamo̧ ju̧i̧ ta̧rë ta̧rë japadëji̧ri̧ pio judiro̧ pio ju̧i̧ ja̧ chja̧oerämo̧ cjo̧ro̧dirȩ yaba̧mi̧rä.

³ Peaja̧di marëreji̧ri̧rea̧rȩ ütëborë quëna̧ji̧ri̧ pio judiro̧. Jabechji̧ ibëa̧ icjararä chjai̧dë üdë chi̧dëea̧ chja̧oerämo̧ cjo̧ro̧rëreji̧ri̧rea̧rȩ. Ado ibëa̧ chji̧ra̧ jo̧rȩta̧mi̧ japeno̧rëreji̧ri̧rea̧rȩ chjai̧dë pio ju̧i̧. Pio ju̧i̧iä Ütë tjamo̧ ja̧ ërecjia̧ pio ju̧i̧ tarapai̧ dari̧ cjo̧ro̧rëreji̧ri̧rea̧rȩ, o judiro̧mi̧.

^4-5 Jabo Ütë tjamo̧ judi a̧ro̧rȩ chjai̧dëri̧ japea̧ ba oa bape chjaotärea̧ ji̧, cjäri̧ri̧ cjiamȩrȩ jo̧rȩtarëremȩdiibe, pio ibë ütararea̧mi̧dëri̧ eamȩrȩ. Ado bëdü tänȩrëremȩdiibe Quiricho pio ju̧i̧ nö̧ta. Aja̧, nö̧tadäräri̧ japadëji̧ri̧ oa, ja̧boa̧mi̧ dari̧ cjiaji̧ri̧ oa bëdü tänȩrëremȩdiibe. Jabechji̧ cjäri̧ri̧ cjia tjamo̧mȩrȩ chjätärea̧ yürürëremȩdiibe, pio judirimȩ marë.

⁶ Ado cjitë tänȩrëremȩdiibe Quiricho pio ju̧i̧ nö̧ta. Aja̧, a̧dëräpȩ yuro cjitë tänȩrëremȩdiibe a̧ro̧rȩ Quiricho pio ju̧i̧ nö̧ta ëba chapea̧ oa. Tjamo̧ davä. Quiricho pio ju̧i̧ nö̧ta ëba cha tänȩrëremȩdiibe a̧dëräpȩ ju̧ri̧. Jabechji̧ Jechu Quiricho pio judiri ja̧ mape bagaji̧ri̧ oa ëba cha tänȩrëremȩdiibe pio ju̧i̧ nö̧ta a̧dëräpȩ ju̧ri̧.

⁷ Aja̧, ja̧di dari̧ japarëremȩde Ütë tjamo̧ judi jënȩ pio ibëiäpȩmo̧ cjäri̧ri̧ cjia da̧ pio ju̧i̧ ana̧ri̧ na̧rȩpea̧ oa bucho ana̧. 'Aja̧, Ütë tjamo̧ judi Quiricho pio ju̧i̧iä ütararea̧mi̧dëri̧ cjäri̧ri̧ cjia dae chjaoa̧diji̧ri̧da, Jechu pio ju̧i̧iä chjamȩ tjamo̧diji̧ri̧da, Jechu Quiricho pio judiri ja̧ji̧ri̧ oa a̧dë chjäte chjadëri̧ japea̧diji̧ri̧da' quëna̧pea̧ oa japarëremȩde ütëbodärä oa chjadëri̧ na̧rȩpea̧ oa.

^8-9 Tjamo̧ davä, Ütërë cjäri̧ri̧ cjia da̧ pio ju̧i̧iämo̧i̧ chjätärea̧ daea̧nȩrȩ, mȩnȩro̧ japea̧ pio ju̧i̧iädë. Jabechji̧ pio judirimȩ marë chjätärea̧ yürürëremȩdidibe quëna̧ji̧ri̧ oa, mȩnȩro̧ chjadëri̧ japadëa̧ ba oa. Ado pio ju̧i̧iä, 'Aja̧, pio cüdë chjadëri̧ japea̧ oaiä chjätärea̧ daea̧quëda' quëna̧rea̧mi̧dëde.

¹⁰ Jabechji̧ Ütë tjamo̧ judi japea̧ oa cjiarea̧rȩ pumȩ peaja̧ marë. Jabechji̧ Jechu Quiricho pio ju̧i̧iä pea chja maeari̧ jëdano̧rëremȩdiibe Ütë tjamo̧ judi. Aja̧, pea chja maeari̧ jëdano̧rëremȩdiibe a̧ro̧rȩ chjadëri̧ japariä cjo̧ro̧pea̧ oa, jënȩ pearä ütarë jo̧rȩtarërea̧ pio ju̧i̧.

Quiricho pio judi ji̧mo̧ cjia tänȩrëremȩdiibe yo̧a̧ri̧ pumȩrërea̧ ji̧

¹¹ Danȩrȩ, mȩnȩro̧ pio dibë chjiari chjadëri̧ jo̧rȩtatäreji̧ri̧nȩrȩ. Danȩrȩ, judiodë maea oa nö̧rirëreji̧ri̧diro̧dibe dibëa̧ ama̧i̧ judiro̧. Ja̧di tara badë dadiro̧dibe judio judiro̧. "Aja̧, budoa̧ oa cjiadëji̧ri̧nȩrȩ" yo̧diro̧dibe budoa̧ oa cjiaji̧ri̧ pio judiro̧.

¹² Ado pio ju̧i̧iä chjadëri̧ jo̧rȩtatäreji̧ri̧nȩrȩ ca̧ pumȩ. Danȩrȩ, Quiricho pio ju̧i̧ dabadërëreji̧ri̧nȩrȩ. Jabechji̧ judiodënȩrȩ. Ado pio ju̧i̧iä dairäpȩ tutia̧ oa cjiami̧ dari̧ cjiarëreji̧ri̧nȩrȩ, Abaraa̧ri ja̧dë maearë. Jabechji̧ Ütë tjamo̧ judi judio pio ji̧ri̧iäpȩmo̧ pearä yo̧ë cji̧därërea̧ ma̧ȩ pio judi, jabechji̧ dibëa̧bo yo̧ë cji̧däa̧ cjiadërëremȩde. Ado pio ju̧i̧iä jidatarea̧ chiadë maearë cjo̧ro̧rëreji̧ri̧nȩrȩ. Jabechji̧ 'Ütë tjamo̧ pio judidida' quëna̧ dabadëji̧ri̧rȩ cjo̧ro̧rëreji̧ri̧nȩrȩ.

¹³ Jaboti̧ri̧ cjiadë manȩrȩ yaba̧ Jechu Quiricho pio judiri ja̧ mapea̧ tara. Jabechji̧ jachimi̧ dari̧ cjiarërea̧ ji̧, queri̧diäa̧mi̧ dari̧ cjiaji̧ri̧pea̧nȩrȩ yaba̧ Jechu ja̧ goe pio oaiä.

¹⁴ Jabechji̧ Quiricho pio judi ji̧mo̧ cjia tänȩrëremȩdiibe a̧ro̧rȩ yo̧a̧ri̧ pumȩrërea̧ ji̧. Danȩrȩ, judio judiro̧ judiodë pio ji̧ri̧ nö̧ta cjarȩmȩ pumȩpea̧dirȩ Jechu pio ju̧i̧iä. Aja̧, ëba cjiarea̧mi̧dëji̧ri̧ oa, jibëa̧ dëbëti̧ra̧ chia goëdëri̧ cjiari̧ jo̧rȩte chjaoji̧ri̧ oa cja̧rȩmȩ pumȩpe bagari̧ japarëremȩdejȩrȩ, jibëa̧ icjara oa tuti yürürërea̧ oaiä.

¹⁵ Aja̧, jibëa̧ icjara oa tuti yürüa̧ oaiä, Moicherë go̧ȩparërea̧ ma̧ȩ pio ju̧i̧ badëpe bagari̧ japarëremȩdejȩ Quiricho judi. Tjamo̧ davä. Tüdüa̧mi̧ darä cjo̧ro̧pea̧ ma̧ȩ pio ju̧i̧ badëpe bagari̧ japarëremȩdejȩ jënȩ ja̧boa̧ pio oaiä. Ado Quiricho judi ja̧di dari̧ japea̧ oaiä, 'Aja̧, cja̧rȩmȩ pumȩ pea chjami̧ darë cjiadiäpadiro̧da, pio coaiä cja̧rȩmȩ pumȩpe bagapadiro̧da, ji̧mo̧ mape bagari̧ cjiadiäpadiro̧da, yo̧a̧ri̧ pumȩrërea̧ ji̧, pio coaiä cja̧rȩmȩ pumȩpe bagapadiro̧da' quëna̧ jo̧rȩtamȩrȩ japarëremȩde.

¹⁶ Jabechji̧ Quiricho judi ja̧boa̧ ji̧, 'Jabechji̧ jibëa̧ dëbëti̧ra̧ chia goëdëri̧ cjiatä eadëquiji̧ri̧da, jabo ji̧mo̧pe bagatä eaquiji̧ri̧da, cja̧rȩmȩ pumȩpe bagatä eaquiji̧ri̧da' quëna̧ jo̧rȩtamȩrȩ ja̧borëremȩde pumȩ judiro̧ Ütë tjamo̧ pio ju̧i̧ nö̧ta ori̧ bagari̧ ëba cjiarea̧ dapea̧ oa.

¹⁷ Ja̧di tara Quiricho pio judi ma̧ȩ chjadëi̧ pio ju̧i̧ ni̧bäera̧pea̧didibe mȩnȩro̧ Ütë tjamo̧ pio ju̧i̧ nö̧ta jachidai̧parȩa̧ oa cjiapea̧ oa. Aja̧, judio pio ji̧ri̧, queri̧ cjiami̧ dari̧ cjiaji̧ri̧ pio ji̧ri̧ ni̧bäera̧pea̧dejȩrȩ. Ado judiodë pio ji̧ri̧, jachi cjiami̧ dari̧ cjiaji̧ri̧ pio ji̧ri̧bo ni̧bäera̧pea̧dejȩrȩ. Aja̧, jibëa̧ dëbëti̧ra̧ chia ori̧ bagari̧ ëba cjiarea̧ dapea̧ oa jachidai̧parȩrea̧ ma̧ȩ pio ju̧i̧ ni̧bäera̧pea̧dejȩrȩ.

¹⁸ Ado yaba̧ Quiricho judi pio ibë chjiari ja̧di dari̧ tuti japarërea̧ oaiä, jabechji̧ a̧ro̧rȩ ütëborë ni̧bärea̧ darea̧ro̧jo̧ȩ ibëa̧ Amai̧ pio ju̧i̧, judio judiro̧, ado judiodë pio judiro̧borë. Jabechji̧ a̧ro̧rȩ ütëborë cja̧rȩmȩ pio ju̧i̧iä ni̧bärea̧ darea̧ro̧jo̧ȩ, Tjo tjamo̧ pio ju̧i̧iä.

¹⁹ Ado pio ju̧i̧iä yo̧requededibe ca̧ oti̧, judiodë maea oa. Danȩrȩ, Quiricho pio judi tuti japea̧ oaiä, Ütë tjamo̧ ja̧ pumȩpea̧nȩrȩ. Jabechji̧ tjaoëriji̧ri̧mi̧ dari̧ cjiarërea̧ ji̧, ado cja̧rȩmo̧ chiririji̧ri̧mi̧ dari̧ cjiarërea̧ ji̧, jabechji̧ tutia̧ oa cjiaji̧ri̧ pumȩ pio ji̧ri̧ nö̧ta cjiami̧ dari̧ cjiaji̧ri̧pea̧nȩrȩ, chjare yu̧ë cjo̧ro̧mi̧ dari̧. Aja̧ ca̧ oti̧, pio ji̧ri̧ nö̧ta cja̧rȩmȩ pumȩpea̧nȩrȩ. Tjamo̧ davä. Ütë tjamo̧ ja̧ pumȩdërërea̧ ji̧, pio ju̧i̧ ja̧ pumȩpea̧nȩrȩ yaba̧.

²⁰ Jabechji̧ mȩnȩro̧ bëmi̧ darä goë cji̧däriä baämi̧ dari̧ cjia maeapea̧nȩrȩ. Danȩrȩ, Jechurë chjadüa̧ pio judiro̧ taru a̧rȩmi̧ dari̧ cjiadiärëreji̧ri̧dirȩ, Ütërë ea jana̧ chjadüa̧ oa ni̧bäji̧ri̧borë. Ado taru a̧rȩmȩ buro tjamo̧ goë chamȩ ta̧dëmi̧ da üdë, jabechji̧ Jechu Quiricho pio judide. Jabechji̧ tjamo̧ cjiamȩ jo̧ taru yuimi̧ dari̧ cjiamȩ üdë Jechu pio judide.

²¹ Ado Jechu pio ju̧i̧iä ji̧mo̧ ma cjiari̧ cjitëde bëmi̧ da üdë cjarȩmȩ codërë, popë bagarea̧mi̧dëri̧. Dabu chocora̧ pio ju̧ri̧ra̧ japarëmi̧ cjiari̧ ji̧mo̧ maearë cjitëde Ütë ju̧i̧iäpȩmo̧. Pio ju̧i̧ ja̧ maearë, china̧chjari̧ tutia̧ oa cjiamȩrȩ cjitëde bëmi̧ darë.

²² Ado pio mȩnȩro̧ Jechu pio ju̧i̧ nö̧ta cjarȩmȩpe baga̧ oaiä, jabechji̧ o ji̧ri̧ nö̧ta goë cji̧däriä baämi̧ dari̧ japadidibe peaja̧di pio jiro bërä. Aja̧, ji̧mo̧ ma cjiari̧ cjitëde bë üdë, Ütë tjamo̧ judi Tjo tjamo̧ pio ju̧i̧iä chjadëri̧ bëpapea̧ oa.