Epjecho Ma̧ȩ 1 - Biblia Pume

Taruparea̧ Ma̧ȩ

¹ Pablo quȩmȩrequede cüdë. Jechurë chjadüa̧requede. Ütë tjamo̧ judi ütara̧ oa chjadürëremȩdique Jechu Quiricho judi. Ja̧di tara go̧ȩpe chjadürequededibe Epjechoräpȩ quëna̧ji̧ri̧ pio ji̧ri̧. Aja̧, Ütë tjamo̧ ja̧ pumȩ oa, Jechu Quiricho pio judiri ja̧ maea oa go̧ȩpe chjadürequededibe. ¿Jabënȩrȩ? ¿Jabëti̧ cjianȩrȩ? 'Jabë jirodiro̧da' quëna̧ jo̧rȩtamȩrȩ go̧ȩpe chjadürequededibe.

² Ibëa̧ Ama̧i̧ judi, Ütë tjamo̧ pio judi chjadëri̧ yürütädidibe. Ado ibëa̧ Ano̧mȩ Jechu Quiricho pio judiborë chjadëri̧ yürütädidibe. Aja̧, Ütërë cjäri̧ri̧ cjia da̧ pio ju̧i̧ yürütädidibe, ma̧ chjupi̧ cjiari̧ jo̧rȩtarea̧ pio ju̧i̧bo.

Ütë tjamo̧ judi chjadëri̧ yürürëremȩdiibe ibëa̧ tjo ja̧ oa

³ Ütë tjamo̧ judi chjacjiamȩri̧ jo̧rȩtapea̧de. Jabechji̧ ibëa̧ Ano̧mȩ Jechu pio ju̧i̧ ja̧ Ama̧i̧de. Quiricho pio ju̧i̧ ja̧ Ütëde. Pio judi chjacjiamȩri̧ jo̧rȩtapea̧de. 'Aja̧, pio judi chjadëri̧ japea̧diibëda, chjadë tjamo̧diibëda' quëna̧ jo̧rȩtapea̧de. Ado pio judi a̧dë chjäte chjadëri̧ japarëremȩdiibe Jechu pio judiri ja̧ mapea̧ji̧ri̧ oa. Ado chjadëri̧ yürürëremȩdiibe davä ibëa̧ tjo ja̧ oa. Aja̧, chjö̧na̧i̧däräti̧ oa, ba chiati̧ oa, a̧dëräpȩ cjiamȩ oa yürürëremȩdiibe Jechu pio ju̧i̧iä.

⁴ Jabechji̧ jabë dabu decjiarä judirä mitërëremȩdiibe Ütë tjamo̧ judi, jibëa̧ mape bagapea̧ oa. Aja̧, jabërä judirä mitërëremȩdiibe Jechu pio judiri ja̧ maea oa a̧ro̧rȩ tutia̧ oa cjiami̧ dari̧ cjiatä, chjai̧dë chiadëji̧ri̧rȩ cjiatä ju̧i̧ ja̧ dëbëräpȩ.

⁵ ¿Jabo tjana̧ ju̧i̧iä ja̧di dari̧ japarëremȩdiibe? Tjana̧ ju̧i̧iädë, jabechji̧ pio ibë ütararea̧mi̧dëri̧ ea tara, mitërëremȩdiibe. 'Aja̧, mitëtäremȩquiji̧ri̧da, Jechu Quiricho pio ju̧i̧iä ca̧ u̧ri̧ mape bagapea̧ oa mitëtäremȩquiji̧ri̧da' quëna̧ jo̧rȩtamȩrȩ mitërëremȩdiibe Ütë tjamo̧ judi, jënȩ japatämi̧ cjiami̧.

⁶ Ado jënȩ ba chia da̧ pio ju̧i̧ tuti yürürëremȩdiibe Joja oa. Ado Joja pio ju̧i̧iä cjäri̧ri̧ cjia da̧ pio ju̧i̧ yürürëremȩdiibe ütararea̧mi̧dëri̧. Ado pio ju̧i̧iä jabechji̧, chjacjiamȩri̧ jo̧rȩtapea̧de davä Ütë tjamo̧ judi. Jabechji̧ a̧dë chjäte chjadë tjamo̧ri̧ japarëremȩdiibe.

^7-8 Jabechji̧ Jechu pio ju̧i̧ ja̧ goe pio oaiä gatëa̧ oa cjiarëreji̧ri̧rea̧rȩ a̧ro̧rȩ jare chjadüa̧ oa cjiami̧ dari̧ cjiapea̧ oa. Pio ju̧i̧iä duridëparȩa̧ oa cjiadiäa̧de a̧ro̧rȩ chjai̧dëri̧ japea̧ üdë. Jabechji̧ Ütërë cjäri̧ri̧ cjia da̧ pio ju̧i̧ ana̧ri̧ yürürëremȩdiibe goarijärea̧ decjiari̧, jabëdiärea̧ decjiari̧.

⁹ Jabechji̧ Ütë tjamo̧ judi pearä judirä ütarë jo̧rȩtarërea̧ pio ju̧i̧ japarëmȩde. 'Aja̧, Quiricho pio ju̧i̧iä ja̧di dari̧ japatäremȩquëda' quëna̧ jo̧rȩtamȩrȩ daba tänȩrëremȩdiibe goadia̧ oa cjiami̧ dari̧ cjiarërea̧ ma̧ȩ pio ju̧i̧. Aja̧, pio ju̧i̧ daba tänȩrëremȩdiibe Quiricho pio ju̧i̧iä.

¹⁰ Ado danȩrȩ, ja̧di dari̧ jo̧rȩtarëremȩde Ütë tjamo̧ judi. 'Aja̧, ütara̧ doro chjö̧na̧i̧däräti̧rȩ tjübëmi̧ damȩ pio ju̧i̧ ja̧ chja̧oerämo̧ cjiapadiro̧da, cja̧rȩmȩ chji̧ chiami̧ dari̧ cjiapadiro̧da, a̧dëräpȩji̧ri̧ judiro̧, ado daburopȩji̧ri̧ pio judiro̧borë ji̧mo̧ cjiaji̧ri̧rȩ cjiapadiro̧da, jabechji̧ ütëbodärärë Quiricho pio ju̧i̧ ja̧ chja̧oerämo̧ cjiapadiro̧da' quëna̧ jo̧rȩtarëremȩde Ütë tjamo̧ judi.

¹¹ Danȩrȩ, Ütë tjamo̧ pio judi ütarë jo̧rȩta̧ chja̧oerä cjo̧ro̧rea̧rȩ. Ado pio ju̧i̧iä jabechji̧, judi pearä judirä ütarë jo̧rȩtarërea̧mi̧ mitërëremȩdiibe Quiricho pio judiri ja̧ji̧ri̧ oa. Aja̧, jibëa̧ pumȩpe bagapea̧ oa mitërëremȩdiibe. Aja̧, ja̧di dari̧ jo̧rȩtarëremȩde pearä judiräri ja̧.

¹² Pio ju̧i̧iä a̧ro̧rȩ, Quiricho pio ju̧i̧ yabo quëna̧rëreji̧ri̧ pio judiro̧, jabechji̧ ji̧dë ma chacjiamȩri̧ jo̧rȩtatäreji̧ri̧rea̧ro̧jo̧ȩ a̧dë chjäte tatari̧ cjiamȩ Ütë pio ju̧i̧iäpȩmo̧. Peaja̧di dari̧ japapea̧ oa ütarë mitërëremȩdiibe.

¹³ Ado mȩnȩro̧ orë peaja̧di quëna̧ji̧ri̧pea̧renȩro̧jo̧ȩ. Jabechji̧ chjätärea̧ yürümȩ ma̧ȩ chjadëi̧ pio ju̧i̧ ta̧rëa̧ oaiä, tjamo̧i̧ cjiari̧ baämȩ ma̧ȩ pio ju̧i̧ ta̧rëa̧ oaiä, peaja̧di quëna̧ji̧ri̧pea̧renȩro̧jo̧ȩ. Ado quëna̧ji̧ri̧pea̧ji̧ri̧ oa yürürëremȩdidibe Tjo tjamo̧ pio ju̧i̧ pio mȩnȩro̧ go̧ȩ cäa̧ oa cjiami̧ dari̧ cjiapea̧ oa. Aja̧, jënȩ yo̧ë cji̧därërea̧mi̧ yürürëremȩdidibe Tjo tjamo̧ pio ju̧i̧.

¹⁴ Tjamo̧ davä. Jënȩ yo̧rërea̧ pio ju̧i̧ yürürëremȩdiibe yabo ba ano̧e cji̧dämi̧ dari̧. Ado pio ju̧i̧iä tjamo̧ri̧ dabarea̧rȩ davä, a̧ro̧rȩ cjiadiäa̧mȩ pio ju̧i̧ mitëpea̧ pio ju̧i̧ chjiari. 'Aja̧, Tjo tjamo̧ pio ju̧i̧ yürüa̧diibëda, yabo ba ano̧e cji̧dämi̧ dari̧ yürüa̧diibëda, ado cjiadiäa̧mȩ pio ju̧i̧ ji̧dë duri oa a̧de yürüpadiibëda, jënȩ goë boea̧ pio ju̧i̧ ji̧dë duri oa a̧de yürüpadiibëda, jabechji̧ pio ju̧i̧ tjamo̧ri̧ mitëdärärea̧ yürüpadiibëda' quëna̧rea̧ darea̧rȩ. Tjamo̧ davä. Tjo tjamo̧ pio ju̧i̧ yabo yürüa̧ oaiä ja̧di dari̧ quëna̧rea̧ darea̧rȩ. Ado pio ju̧i̧iäbo chjacjiamȩri̧ jo̧rȩtapea̧de Ütë tjamo̧ judi.

Pablo judi goë cjo̧dërëremȩde quëna̧ji̧ri̧ pio ji̧ri̧ chjiari

¹⁵ Ado pio dibë chjiari ta̧rëa̧requede ca̧ oti̧. 'Aja̧, ja̧di dari̧ cjo̧ro̧diro̧da, Ano̧mȩ Jechu pio ju̧i̧ chjuari̧ quëna̧ji̧ri̧rȩ cjo̧ro̧diro̧da, ado tutia̧ oa cjiaji̧ri̧ pumȩ pio ji̧ri̧ eaji̧ri̧rȩ cjo̧ro̧diro̧da' quëna̧ ta̧rëa̧requede.

¹⁶ Ado ja̧di tara cüdë Ütë tjamo̧ pio ju̧i̧iä goë cjo̧dërä, jabechji̧ ji̧dë ma ma̧ chiadëri̧ cjiari̧ jo̧rȩtarequededibe. 'Aja̧, chjadëri̧ a̧doa̧diji̧ri̧da, Ütë tjamo̧ judi chjadë tjamo̧dida' quëna̧ jo̧rȩtamȩrȩ goë cjo̧dërequede, ma̧ chiadëri̧ cjiamȩrȩ.

¹⁷ Aja̧, ibëa̧ Ano̧mȩ Jechu Quiricho pio ju̧i̧ ja̧ Ütë pio ju̧i̧iä goë cjo̧dërä, a̧dë chjäte ba chiamȩ Ama̧i̧ Ütë pio ju̧i̧iä goë cjo̧dërä, jabechji̧ pio dibëiäpȩmo̧ jibëa̧ dabarea̧ oa yürütä goë cjo̧dërea̧ro̧jo̧ȩ. Aja̧, a̧dërimȩ dabarea̧ pio ju̧i̧ yürütä, Tjo tjamo̧ pio ju̧i̧iä dabarea̧ yürütä goë cjo̧dëreconȩ. Jabechji̧ mȩnȩro̧ chjadëri̧ dabapea̧ oa, mȩnȩro̧ oëra̧ jo̧rȩtachea oa, goë cjo̧dëreconȩ, mȩnȩro̧ chjadë pio ju̧i̧mo̧i̧ mitëpea̧ oa.

¹⁸ Aja̧, mȩnȩro̧ urëdi tjamo̧ oa jo̧rȩtapea̧ oa, tatarä dami̧ dari̧ jo̧rȩtapea̧ oa goë cjo̧dë chjaorequede, mȩnȩro̧ a̧dë chjäte dabarea̧ dapea̧ oa. 'Aja̧, ja̧di dari̧ ëna̧diäa̧diibëda, ja̧di dari̧ chjätädärärea̧ dapea̧ oa mitëa̧diibëda, jidatarea̧ chiarë dopapea̧ oa mitëa̧diibëda' quëna̧ dabatä eamȩrȩ goë cjo̧dërequede. 'Aja̧, Ütë pio ju̧i̧ ja̧remȩ oa mitëpea̧ oa mitëa̧diibëda, Ütë ja̧ u̧ri̧ pio ji̧ri̧ ba chiati̧ oa yürüpea̧ oa mitëa̧diibëda' quëna̧ dabatä eamȩrȩ goë cjo̧dë chjaoreconȩ.

¹⁹ Ado danȩrȩ, peaja̧di goë cjo̧dëreconȩ mȩnȩro̧ chjadëri̧ dabatä jibëa̧ jauëchja pio ju̧i̧ chjiari. 'Jabechji̧ jibëa̧ jauëchjara̧ ana̧ri̧ ja̧bepadida, quëna̧ji̧ri̧ pio ibëiä ana̧ri̧ ja̧bepadida, ütararea̧mi̧dëra̧ ja̧bepadida' quëna̧ dabatä eamȩrȩ goë cjo̧dëreconȩ.

²⁰ Ado pio jiro jauëchjara̧ bëdü tänȩrëremȩdejȩ Quiricho pio ju̧i̧. Aja̧, pio ibë a̧domȩ jauëchjara̧ pio ju̧ri̧ra̧ bëdü tänȩrëremȩdejȩ davä ja̧boa̧remȩ pio ju̧i̧, Quiricho pio ju̧i̧. Ado pio jiro jauëchjara̧ peaja̧di cjitë tänȩrëremȩdejȩ a̧dëräpȩ ju̧ri̧ chadäräpea̧ oa. Tjamo̧ davä. Ama̧i̧ tjamo̧ ja̧ mu̧i̧ chjuari cotoräpȩ ju̧ri̧, ba chia tjamo̧räpȩ ju̧ri̧ chadäräpea̧ oa cjitë tänȩrëremȩdejȩ.

²¹ Ado yaba̧ a̧dë chjäte ba chia tjamo̧parȩa̧dejȩ Quiricho ju̧i̧ Ütë tjamo̧ pio judi, Jabechji̧ ado cja̧rȩmo̧rȩ nö̧tarea̧mi̧dëri̧ tjamo̧ yo̧mȩrȩ cjiamȩpea̧de. Tjamo̧ davä. A̧dëräpȩ cjiaji̧ri̧ pio judiro̧, Ichiae pio judi, ado yaröca pio judiro̧ nö̧tadë madiro̧jo̧ȩ. Ado daburopȩ cjiaji̧ri̧ pio judiro̧borë nö̧tadë madiro̧jo̧ȩ. Jabechji̧ ütëbodärä ja̧ Ütëde. Aja̧, a̧dë chjäte Ütë tjamo̧mȩrȩ cjiade, pio yoa japamitërämo̧dë jabo ma̧na̧pamȩ japamitëräbo. Jabechji̧ bucho ana̧ Ütëmȩde, ütëdëpe bagarea̧ decjiari̧.

²² Jabechji̧ Ütë tjamo̧ pio judi tänȩa̧ oa ütëbodärärë pio ju̧i̧ ja̧ chja̧oerämo̧ cjiadiäji̧ri̧pea̧dirȩ, cja̧rȩmȩrȩ a̧dë cjiadiärea̧ decjiari̧. Ado pio ju̧i̧ uëri a̧doparea̧ Ano̧mȩ tänȩrëremȩdejȩ peaja̧di. Tjamo̧ davä. A̧doparea̧ ja̧ Tjübëmi̧ dari̧ cjiapea̧ oa tänȩrëremȩdejȩ Ütë tjamo̧ judi.

²³ Jabechji̧ a̧doparea̧ üdë Jechu pio ju̧i̧ ja̧ icjarami̧ dade. Ado Jechu pio judi jabëdiächea oa, jabechji̧ nö̧tadäräri̧ cjiarea̧mi̧ dari̧ a̧dodejȩ a̧doparea̧ pio judi. Ado a̧doparea̧ üdë jabëdiächea oa, peaja̧di nö̧tadäräri̧ cjiarea̧mi̧ dari̧ a̧dodejȩ Jechu judi, nö̧tadäräri̧ japamȩ tjamo̧ pio judi. Aja̧, ja̧di dari̧ japaji̧ri̧rȩ jibëa̧ dëbëti̧ra̧ chia a̧dodirȩ jabëdiärea̧ decjiari̧.