Ebereo Ma̧ȩ 9 - Biblia Pume

Dëbëdiärea̧ bë üdë na̧rȩdiibe a̧dëräpȩ cjiamȩ bë pio ju̧i̧ chjiari

¹ Ütë tjamo̧ judi jibëa̧ pumȩ ji̧ri̧ pearä yürürërea̧ ma̧ȩ pio ju̧i̧iä, tüdüa̧mi̧ darä cjo̧ro̧rëreji̧ri̧dirȩ ibëa̧ ütëti̧rea̧ judiro̧. Jabechji̧ pio jiro ma̧ȩ oaiä dabarëreji̧ri̧dirȩ Ütë tjamo̧ pio ju̧i̧iäpȩmo̧ chjacjiamȩri̧ ni̧bäpea̧ ji̧. Ado pio jiro ma̧ȩ oaiä peaja̧di cji̧däa̧ oa goarëreji̧ri̧dirȩ dëbëdiärea̧ jo̧ oa dai chirirä.

² Ado pio jiro bë üdë yo̧a̧ri̧ jo̧ tjo chiarëremȩde tuti märärea̧ oaiä. Dai oa cjiamȩ jo̧ tjo üdë, "china̧chja jo̧ tjo̧" quȩmȩde. Ado pio jiro jo̧ tjoro cjiarëremȩde tataparea̧ chiamȩ to üdë. Ado chja̧pe chiamȩ mechja üdë peaja̧di cjiarëremȩde, Ütë tjamo̧ ju̧i̧iäpȩmo̧ yürüpea̧ chja̧peborë.

³ Ado tuti märärea̧ oëräpȩmo̧ cjiamȩ jo̧ tjo üdë, "a̧dë chjäte china̧chja jo̧ tjo" quȩmȩde.

⁴ Ado pio jiro jo̧ tjoro cjiarëremȩde goaeri̧ pjȩa̧mȩ cäarea̧ mechja judi. Jabechji̧ oro maeara̧ japea̧ oa cjiarëremȩde. Ado yo̧ë cji̧därea̧ ma̧ȩ chiamȩ to cjara üdë peaja̧di pio ju̧ri̧pȩ a̧rȩrëremȩde. Jabechji̧ yuro nö̧ta oa ina̧ oa cjiarëremȩde oro quȩmȩ chjipararira̧, chjiparari ba chia tjamo̧ra̧. Ado pio jiro to cjara üdë peaja̧di chiarëremȩde tachja oa, orora̧ japea̧ oa cjiamȩ tachja oa, ma̧na̧ quȩmȩ jurarea̧ oa chiamȩ tachja oa. Ado pio ju̧i̧ uëri Aro̧ quȩmȩ pio ju̧i̧rea̧ ja̧ tjätjäpë tai̧rea̧ tobo chiarëremȩde, pjö̧da buiuremȩ to pio ju̧i̧. Ado yo̧ë cji̧därea̧ ma̧ȩ chiamȩ ta̧dë pjatë pio ju̧i̧bo chiarëremȩde.

⁵ Ado to cjara uërä ju̧ri̧ cji̧däa̧ oa cjiarëreji̧ri̧dirȩ Jeovarë chamȩmi̧ daräpȩ jidaji̧ri̧ mu̧i̧tjoi̧mi̧ da pio judiro̧. Orora̧ mo̧ȩa̧ ëte cji̧däa̧ oa cjiarëreji̧ri̧dirȩ. Ado ji̧ri̧ ja̧ pjö̧dato a̧re cjia̧ chja̧oerä cjiarëremȩde cjae ina̧rea̧ ya üdë. Ado pio jiro ina̧rea̧ yarä pjo̧dechäa̧ oa cjiarëremȩde goe üdë pumȩ judiro̧ chjai̧dëri̧ japea̧ pio ju̧i̧ cjae ina̧ oa cjiami̧ dari̧ cjiapea̧ oa. Jabo yaba̧ dëbëdiärea̧ bërä ja̧ pio ju̧i̧ chjiari ana̧ri̧ ni̧bä chjaorea̧mi̧dëde.

⁶ Ado dëbëdiärea̧ bë üdë chjadëri̧ jëdano̧a̧ oa cjiadäräa̧rä, o ji̧ri̧ chjiari goë tuti ja̧bepaji̧ri̧ pio judiro̧ doti̧mi̧ yu̧a̧diärëreji̧ri̧dirȩ dai oa cjiamȩ jo̧ tjoräpȩ ju̧ri̧, Ütë tjamo̧ ja̧ oa ütara̧mi̧ japapea̧ oa.

⁷ Jabo ji̧dë u̧i̧ tjoro cjiamȩ jo̧ tjoräpȩ ju̧ri̧ tjamo̧ goë tuti ja̧bepamȩ pio judimo̧rȩ yu̧a̧diärëremȩde. Tjamo̧ davä. Cja̧rȩmȩ co uipamȩ nö̧ta yu̧a̧diärëremȩde a̧dë chjäte china̧chja jo̧ tjoräpȩ ju̧ri̧. Jabo goe decjiamȩrȩ yu̧a̧dërëremȩde, jabo goe chiamȩrȩ yu̧a̧rëremȩde jënȩ chjai̧dëri̧ japea̧ ba oa yürüpea̧ oa, pumȩ judiro̧ dabadëji̧ri̧rȩ chjai̧dëri̧ japea̧ ba pio ju̧i̧bo yürüpea̧ oa. Aja̧, ja̧di dari̧ japamȩrȩ yu̧a̧diärëremȩde cja̧rȩmȩ co uipamȩ nö̧ta.

⁸ Ado icharaita judiro̧ Moicherë go̧ȩparërea̧ ma̧ȩrä ja̧di dari̧ ji̧dë ma jape chjaoa̧ oaiä, jabechji̧ chjadëri̧ daba tänȩdiibe Tjo tjamo̧ judi. ‘A̧ja̧, jabë china̧chjadida, a̧dë chjäte china̧chja jo̧ tjo üdë china̧chjadida, Ütërë cjiamȩräpȩ yu̧a̧ üdë jabë china̧chjadida, eami̧ pumȩ üdë pio ju̧ri̧pȩ chjaodëri̧ yu̧a̧därätärea̧ ji̧, tjamo̧ri̧ yu̧a̧därärea̧mi̧dëdida, jabechji̧ dai cjiamȩ jo̧ tjo üdë jabë cjiami̧ nö̧ta tjamo̧ri̧ yu̧a̧därärea̧mi̧dëdida, judiro̧ Moicherë go̧ȩparërea̧ ma̧ȩrä jabë cjo̧ro̧a̧mi̧ nö̧ta tjamo̧ri̧ yu̧a̧därärea̧mi̧dëdida, jabo tutia̧ oa cjiadida’ quëna̧ daba tänȩdiibe Tjo tjamo̧ judi.

⁹ Jabechji̧ na̧rȩrea̧ maeade dëbëdiärea̧ bë üdë. Ado pearä yürürërea̧ ma̧ȩrä japea̧ üdë, peaja̧di na̧rȩrea̧ maeade. Jabechji̧ pio yaba̧mȩ oa cjo̧ro̧ji̧ri̧ oa chjadëri̧ na̧rȩdiibe. Danȩrȩ, pio jiro ma̧ȩrä cjo̧ro̧ji̧ri̧ pio judiro̧, dëdë, ütara̧mi̧ mu̧i̧ jädiärëreji̧ri̧dirȩ goë tuti ja̧bepaji̧ri̧ pio ji̧ri̧iäpȩ pio judiro̧ goe gu̧rori̧ cäë yürüpea̧ oa pio ji̧ri̧ chjiari. Jabo cjäri̧ madirȩ, tjamo̧ri̧ a̧doa̧ oa cjiadëa̧dirȩ. Judiro̧ ütara̧mi̧ mu̧i̧ jäa̧räbo, judiro̧ ütara̧mi̧ yürüa̧räbo, jabechji̧ cjatäcjie jo̧rȩtarea̧ dadëa̧dirȩ jënȩro̧ chjai̧dëri̧ japea̧ pio ju̧i̧ chjiari. Chji̧ goaera̧ jo̧rȩtarea̧ dadëa̧dirȩ, jabo jabechji̧ ji̧dë ma aechide yo̧mi̧ dari̧ japarëremȩdejȩrȩ jibëa̧ chji̧ üdë, judiro̧ cjo̧dërë tüe baämi̧ dari̧ jo̧rȩta maeari̧.

¹⁰ Jabechji̧ pearä yürürërea̧ ma̧ȩ üdë ibëa̧ tjo ja̧dëde, jabo dai oa cjiamȩ pio ju̧i̧ ja̧ maeade. Aja̧, jurarea̧ pio ju̧i̧ chjiari ma̧ȩde. Jararea̧ pio ju̧i̧ chjiari ma̧ȩde. Tjaoëpai̧ dari̧ joarea̧ pio ju̧i̧ chjiari ma̧ȩde. Ado icharaita judiro̧, jabechji̧ pio jiro ma̧ȩrä tüdüa̧ oa cjiami̧ dari̧ cjo̧ro̧pea̧ chiarëreji̧ri̧dirȩ Ütë tjamo̧ judi ma̧ȩ peaja̧ oa ano̧ mire yürüa̧rä yuro.

Jechu ja̧ goe oaiä ba chiari̧ cjiadiärëremȩde ma̧ȩ peaja̧ üdë

¹¹ Ado peadë ma̧na̧rëremȩdiibe Quiricho judi pio ibë chjiari goë tuti ja̧bepamȩrȩ ja̧bepapea̧ oa, tjamo̧ goë tuti ja̧bepamȩrȩ ja̧bepapea̧ oa. Ado dami̧ti̧ chjadëra̧ pio ju̧ri̧ra̧ a̧do chjaodiibe yaba̧, a̧ro̧rȩ goae tarari̧ cjo̧ro̧rea̧mi̧ dari̧. Jabo danȩrȩ, pumȩrȩ ja̧pea̧ bëräpȩ ja̧bepapea̧ oa yu̧a̧dërëremȩde jabo. Dai chirirä cjiamȩ bëräpȩ yu̧a̧dëa̧de, jabo dai chiriri ja̧dëmȩ bëräpȩ yu̧a̧rëremȩde a̧dëräpȩ cjiamȩ bë ba chia tjamo̧räpȩ, Ütërë cjiamȩräpȩ.

¹² Jabechji̧ a̧dë chjäte china̧chja jo̧ tjoräpȩ ju̧ri̧ yu̧a̧rëremȩde, Ütë tjamo̧ ja̧ bëräpȩ ju̧ri̧. Jabo yo̧a̧ri̧ co yu̧a̧dëa̧de, jabo cja̧rȩmȩ co ma yu̧a̧rëremȩde goe chiamȩrȩ. Jabo baca üi̧ ja̧ goe oa chiamȩrȩ yu̧a̧dëa̧de. Chivo goe oa chiamȩrȩ yu̧a̧dëa̧de, jabo jibëa̧ goe pio ju̧i̧ chiamȩrȩ yu̧a̧rëremȩde. Jibëa̧ goera̧ ba ano̧pea̧ oa yu̧a̧rëremȩde pio ibë go̧dü tänȩpea̧ oa, pio a̧ro̧rȩ bucho ana̧ cjo̧ro̧rea̧ dapea̧ oa.

¹³ Danȩrȩ, pearä yürürërea̧ ma̧ȩrä cjo̧ro̧ji̧ri̧ pio judiro̧ jibëa̧ icjara pio ju̧i̧ chjiari ma̧ȩ oa nö̧tadäräri̧ japadëa̧ oaiä, jabechji̧ chivo ja̧ goera̧, jabo baca üi̧ ja̧ goera̧ pjo̧dechäa̧ oa cjiarëreji̧ri̧dirȩ. Ado ja̧dëa ji̧ baca iei̧ boi̧ ja̧ juremȩ tja oa uira̧ mire ëte, peaja̧di pjo̧dechäa̧ oa cjiarëreji̧ri̧dirȩ. Ado judiro̧ ja̧di dari̧ pjo̧dechäa̧ oa cjiadiäa̧ oaiä, jabechji̧ jibëa̧ icjara üdë chjai̧dë gȩrȩ chiadëpe bagami̧ dari̧ cjiadiäa̧de. Ado pio ju̧i̧iä Ütë tjamo̧ pio ju̧i̧iäpȩmo̧ ado chjereno̧ chjacjiamȩri̧ jo̧rȩtarea̧mi̧ dapea̧dirȩ.

¹⁴ Jabo danȩrȩ, ji̧dë u̧i̧ ba chiade davä Quiricho pio ju̧i̧ ja̧ goe üdë. Jabechji̧ yuropadëmȩ Tjo tjamo̧ pio judi ju chiarea̧ yürüa̧ oaiä Jechu judi jibëa̧ icjara oa yürürërëmȩdejȩ Ütë tjamo̧ ju̧i̧. Oveja co chjami̧ da oa yürürëremȩdejȩ goe gu̧rori̧ ja̧bopea̧ oa. Ado yaba̧ pio jiro goe oaiä ja̧bodëmȩ Ütë pio ju̧i̧ ja̧ oa ja̧beparea̧ daji̧ri̧pea̧rea̧rȩ. Ado pio jiro goe oaiä peaja̧di joa̧ oa cjiami̧ dari̧ cjiade ibëa̧ chji̧ üdë, a̧ro̧rȩ chji̧ chjadëra̧ jo̧rȩtariä cjo̧ro̧pea̧ oa, a̧ro̧rȩ teracaba ma̧ȩrä jo̧rȩtariä cjo̧ro̧chea oa.

¹⁵ Ado pio ju̧i̧iä Quiricho pio judide tjoromȩmi̧ da üdë, ma̧ȩ peaja̧ oa ba chiaparȩmȩ judi. Jabechji̧ jibëa̧ goe oa tuti yürürëremȩdejȩ Ütë tjamo̧ ju̧i̧iäpȩmo̧ pio ibë chjiari goë tuti japapea̧ oa. Ado pio ibë chjiari goë tuti japamȩrȩ ba chiaparȩrëremȩdejȩ ma̧ȩ peaja̧ oa jibëa̧ goera̧ pio ju̧ri̧ra̧. Jabechji̧ ëna̧diäa̧ oa cjiaji̧ri̧ pio judiro̧ Ütërë goë boea̧ pio ju̧i̧ mitërea̧ dapea̧ oa, judiro̧ Ütërë yo̧ë cji̧därëea̧ pio ju̧i̧ mitërea̧ dapea̧ oa, jabechji̧ jibëa̧ goera̧ pio ju̧ri̧ra̧ ba chiaparȩrëremȩdejȩ ma̧ȩ peaja̧ oa pio judiro̧ bucho ana̧ cjo̧ro̧rea̧ dapea̧ oa. Jabechji̧ pio judiro̧ duridëparȩa̧ oa cjiapea̧ oa, pio judiro̧ pearä yürürërea̧ ma̧ȩrä cjo̧ro̧a̧ nö̧ta chjai̧dëri̧ japea̧ üdë duridëparȩa̧ oa cjiapea̧ oa, jabechji̧ Quiricho pio judi ano̧ mire ja̧borëremȩde.

^16-17 Danȩrȩ ca̧ oti̧, na̧rȩrea̧ ma̧ȩmi̧ dara̧ ni̧bä chjaotämi̧ cjiarequededibe yaba̧. Danȩrȩ, eami̧ pumȩ judi, dai chirirä cjo̧ro̧mȩ pumȩ pio judi jabë ja̧bodëa̧rä go̧ȩ irä chjadëri̧ go̧ȩparä judi, jënȩ goa̧ pio ju̧i̧ chjiari go̧ȩparä judi, jibëa̧remȩ pio ju̧i̧ chjiari, jibëa̧ u̧ri̧ pio ji̧ri̧iäpȩmo̧ yürüpea̧ pio ju̧i̧ chjiari chjadëri̧ go̧ȩparä judi, jabechji̧ chjadëri̧ dabarea̧ dapadirȩ cjiadiäpaji̧ri̧ judiro̧ jibëa̧remȩ pio ju̧i̧ chjiari judi ja̧boa̧rä. Jabechji̧ judi go̧ȩ irä chjadëri̧ go̧ȩpea̧ oaiä, ‘Aja̧, ja̧di dari̧ chjarepë yürüpea̧dida, pea ja̧boa̧mȩ pio judirea̧ go̧ȩpea̧mi̧ chjarapë yürüpea̧dida’ quëna̧ dabarea̧ dapadirȩ jibëa̧ u̧ri̧ judiro̧ go̧ȩ i oa chjadëri̧ go̧ȩ ni̧bäa̧ oaiä. Jabo go̧ȩpamȩ judi ja̧boa̧rämo̧ ba chiade jënȩ go̧ȩpea̧ üdë. Judi jabë ja̧bodëa̧rä judi, jabë ba chiadëmi̧ dari̧ cjiade ma̧ȩ üdë. Ado eami̧ oa japarea̧mi̧dëde. Jibëa̧remȩ pio ju̧i̧ chjarepë yürürea̧mi̧dëde. Jabechji̧ judi ja̧boa̧rämo̧ ba chiape jäde jënȩ go̧ȩpea̧ ma̧ȩ üdë.

¹⁸ Ado peaja̧dirëremȩde pearä yürürërea̧ ma̧ȩ oaiä. Ja̧borea̧ decjiarä judi, ba chiadë maeari̧ cjiadiäa̧täremȩde. Jabechji̧ ja̧borea̧ pio oaiämo̧i̧ ba chiaparȩa̧ oa cjiarëremȩde ma̧ȩ üdë. Goe pio oaiämo̧i̧ ba chiaparȩa̧ oa cjiarëremȩde.

¹⁹ Ado pio ju̧i̧iä ja̧di dari̧ japarëremȩde Moiche judi. Danȩrȩ, Moiche judi icharaita ji̧ri̧ ni̧bä chjaoa̧ duri oa, jënȩ go̧ȩparërea̧ ma̧ȩ chjö̧na̧i̧ oa ni̧bä chjaoa̧ duri oa, jabechji̧ baca boi̧ ja̧ goe oa mitërëremȩde, chivo goebo. Ado ja̧dëa ji̧ uira̧ mirea̧dejȩ. Ado ja̧dëa ji̧ mitëa̧dejȩ oveja cö̧ oa, cö̧ coëcoëa oa. Jabechji̧ yu̧i̧ tänȩa̧ oaiä coëcoëape bagarëremȩde cö̧ üdë. Ado pio ju̧i̧ mitë ëte, ichopo quȩmȩ toro puria̧dejȩ cotoro. Ado ja̧dëa ji̧ oveja cö̧ra̧ goerä chuda ëte, pjo̧dechärëremȩdejȩ Ütërë pea yürüa̧ ma̧ȩrä, puria̧ oa cjiamȩ ma̧ȩrä. Ado ja̧di dari̧ japea̧ duri oa, pumȩ chjö̧na̧i̧ oa ano̧ mire pjo̧dechärëremȩdejȩrȩ peaja̧di.

²⁰ Ado pumȩ ji̧ri̧ pjo̧dechämȩrȩ ja̧di ta̧rëri̧ yo̧mȩrȩ yo̧rëremȩdejȩrȩ: “Pio yoa goe oaiä ba chiaparȩa̧ oa cjiade Ütë tjamo̧ judi ibë pea yürüa̧ ma̧ȩ üdë” yo̧a̧dejȩrȩ. “Jabechji̧ goe üdë chjadëri̧ na̧rȩdiibe Ütërë pea yürüa̧ ma̧ȩ pio ju̧i̧ chjiari. Pio jiro ma̧ȩ üdë ta̧rëdiäpea̧ pio ju̧i̧ chjiari na̧rȩdiibe.” Aja̧, ja̧di ta̧rëri̧ yo̧mȩrȩ goera̧ pjo̧dechärëremȩdejȩrȩ pumȩ ji̧ri̧ Moiche judi. Jabechji̧ ja̧borea̧ oaiä, goera̧ pjo̧dechjäa̧ oa cjia̧ oaiä ba chia maeari̧ cjiadiärëremȩde ma̧ȩ üdë.

²¹ Ado danȩrȩ, dëbëdiärea̧ bë oa peaja̧di goera̧ pjo̧dechärëremȩdejȩ, dëbëdiärea̧ bërä ja̧bo. Jabechji̧ judiro̧ Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtapea̧ oa, dëbëdiärea̧ bërä ja̧ chjö̧na̧i̧ oa pjo̧dechä marëremȩdejȩ goera̧.

²² Jabechji̧ goe oaiä chjai̧dë gȩrȩ chiadëmi̧ dari̧ cjiadiäa̧ maeade. Ado pio ju̧i̧iä goera̧ pjo̧dechäpea̧ marëremȩde. Aja̧, pio ju̧i̧ yo̧diibe tüdüa̧mi̧ darä cjo̧ro̧pea̧ ma̧ȩ üdë, Ütërë pearä yürürërea̧ ma̧ȩ üdë. Ta̧rëchji̧vä: “Jabechji̧ goe decjiarä judi, pumȩ judiro̧ chjai̧dëri̧ japea̧ üdë duridëparȩrea̧mi̧dëde. Goe gu̧roa̧rämo̧ duridëparȩrea̧mi̧ dade” yo̧diibe ma̧ȩ üdë, tüdüa̧mi̧ darä cjo̧ro̧pea̧ ma̧ȩ pio judi.

Jechu judi goe gu̧rori̧ ja̧boa̧ oaiä duridëparȩrea̧mi̧ dade

²³ Ado pio ju̧i̧iä yo̧requededibe ca̧ oti̧. Dai chirirä ja̧ bë üdë jabomo̧ na̧rȩrea̧de. A̧dërä ja̧ bë pio ju̧i̧ chjiari na̧rȩrea̧de. Ado pio ju̧i̧iä goera̧ ji̧dë ma pjo̧dechäa̧ oa cjiarëremȩde dai chirirä ja̧ bë üdë, chjai̧dë gȩrȩ chiami̧ dari̧ cjiadiächea oa. Jabo ja̧didëde a̧dërä ja̧ bë üdë. A̧dërä ja̧ bë üdë bë tjamo̧ tara, dai chirirä cjo̧ro̧mȩ ja̧ goera̧ pio ju̧ri̧ra̧ pjo̧dechärea̧mi̧dëde, jabo ji̧dë u̧i̧ ba chiamȩ goe maeara̧ pjo̧dechäpea̧de.

²⁴ Ado pio ju̧i̧iä Quiricho judi yu̧a̧därärëremȩde a̧dëräpȩ ju̧ri̧ Ütë tjamo̧ ja̧ dëbëräpȩ cjiapea̧ oa, pio ibë chjiari goë tuti ja̧bepapea̧ oa. Dai chirirä ja̧ bërä yu̧a̧dëa̧de. Pumȩrȩ japea̧ oa bëräpȩ yu̧a̧dëa̧de. Jabomo̧ chja̧oemi̧ da bëräpȩ yu̧a̧dëa̧de jabo a̧dëräpȩ pio ju̧ri̧ yu̧a̧därärëremȩde a̧dëräpȩ ja̧ bërä ja̧bepapea̧ oa.

²⁵ Ado judi a̧dëräpȩ go̧düdäräa̧rä, dai chirirä tjamo̧ goë tuti ja̧bepaji̧ri̧ pio judiro̧ japami̧ dari̧ japadëa̧de. Danȩrȩ, dai chirirä tjamo̧ goë tuti ja̧bepaji̧ri̧ judiro̧ uipamȩ nö̧ta yu̧a̧diärëreji̧ri̧dirȩ a̧dë chjäte china̧chja jo̧ tjoräpȩ. Ado cja̧rȩmo̧ uirä, ado cja̧rȩmo̧ uirä yu̧a̧diä marëreji̧ri̧dirȩ. Ado judiro̧ yu̧a̧rä, jibëa̧ goedëra̧, jabo chirirä cjo̧ro̧mȩ ja̧ goera̧ yu̧a̧diärëreji̧ri̧dirȩ. Jabo ja̧di dari̧ japadëa̧de Jechu judi. Ui nö̧ta ja̧bopea̧ oa yürüdërëremȩdejȩ jibëa̧ icjara oa.

²⁶ Jabo dëdë, judi ja̧di dari̧ yürüa̧rä judi, judi uipamȩ nö̧ta yürüa̧rä judi, dabu üdë pea pareapea̧ pio judiri yurori jibëa̧ icjara oa ji̧dë ma yürüa̧rä judi, co ji̧ra̧ri̧ ja̧bo chjaoa̧täremȩde uipamȩ nö̧ta, ji̧dë ma conȩda̧ oa cjiamȩrȩ. Jabo cjäri̧ made ca̧ oti̧, ja̧di dari̧ yürüdëa̧de. Jabechji̧ ütara̧ doro cjiadiäa̧ japamitërä, cja̧rȩmȩ co ma birë ma̧na̧rëremȩde goe gu̧rori̧ ano̧ mire ja̧bopea̧ oa, pumȩ judiro̧ chjai̧dëri̧ japea̧ üdë duridëparȩa̧ oa cjiapea̧ oa. Aja̧, cja̧rȩmȩ co maea oa ja̧borëremȩde.

^27-28 Ado pio a̧ro̧rȩborë ütara̧ doro ja̧bopea̧ chiarea̧rȩ. Ado ja̧bo ëte, Ütë tjamo̧ pio judi ütarë dapadiibe. Jabo dëdë, pio a̧ro̧rȩ cja̧rȩmȩ co ja̧bopea̧ chiami̧ ja̧bopea̧ chiarëremȩde Quiricho judi peaja̧di. Aja̧, pumȩ judiro̧ noi̧dërë chjai̧dëri̧ japea̧ pio ju̧i̧ duridëparȩpea̧ oa cja̧rȩmȩ co ja̧bopea̧ chiarëremȩde. Ado japamitë chjätä ëte, ado chjereno̧ jana̧pade. Jabo judi ado jana̧rä, a̧ro̧rȩ chjai̧dëri̧ japea̧ pio ju̧i̧ duridëparȩpea̧ oa jana̧dëpade, jabo jabechji̧ pio jȩa jidataji̧ri̧ pio ji̧ri̧ chjätä tänȩpea̧ oa jana̧pade.