Ebereo Ma̧ȩ 8 - Biblia Pume

Jechu judi pio ibë chjiari ano̧ mire goë tuti ja̧bepamȩde

¹ Danȩrȩ ca̧ oti̧, ma̧ȩ ji̧ra̧ri̧ ni̧bä chjaoa̧requededibe. Jabo pio yoa ma̧ȩ ju̧i̧ chjadëri̧ chatä earequededibe dibëa̧ chji̧rä. Danȩrȩ, ibë ji̧dë ma a̧domȩ judi, pio ibë chjiari tjamo̧ goë tuti ja̧bepamȩ pio judi, jabechji̧ a̧dë chjäte ba chiaräpȩ chadärärëremȩde a̧dëräpȩ ju̧ri̧, Ütë tjamo̧ ja̧ mu̧i̧ chjua cotoräpȩ ju̧ri̧.

² Ado ju̧ri̧pȩ ja̧bepade Ütë tjamo̧ pio ju̧i̧iäpȩ, a̧dë chjäte china̧chjaräpȩ ju̧ri̧. Jabechji̧ pumȩrȩ japea̧ bëräpȩ ja̧bepadëde, jabo Ano̧mȩ pio judi jibëa̧ jauëchjara̧ japea̧ bëräpȩ ja̧bepade a̧dëräpȩ ju̧ri̧.

³ Danȩrȩ, dai chirirä tjamo̧ goë tuti ja̧bepaji̧ri̧ pio judiro̧ ütëborë mitëa̧ oa cjiarëreji̧ri̧dirȩ Ütë tjamo̧ pio ju̧i̧iäpȩmo̧ goe gu̧rori̧ yürüpea̧ oa, goe chiadë yürürea̧ oa peaja̧di yürüpea̧ oa. Jabechji̧ jibëa̧ yürürea̧ goarëreji̧ri̧dirȩ. Ado ibëa̧ Ano̧mȩ Jechu pio judiborë jibëa̧ yürürea̧ goapea̧ chiade. Tjamo̧ davä. Pio ibë chjiari tjamo̧ goë tuti ja̧bepamȩ pio judiborë jibëa̧ yürürea̧ goapea̧ chiade. Ado goadë ma ja̧didë jabo goadejȩ peaja̧di. Tjamo̧ davä. Jibëa̧ yürürea̧ oa goamȩrȩ yürürëremȩdejȩ jibëa̧ icjara pio ju̧i̧.

⁴ Jabo pio yoa chirirä ja̧bepadëmȩde jabo a̧dëräpȩ ju̧ri̧ ja̧bepamȩde. Jabo danȩrȩ, Jechu judi pio yoa chirirä pio yaba̧mi̧rä cjo̧ro̧rä judi, mitëa̧ oa cjiadëtäremȩde. Jabechji̧ goë tuti ja̧bepamȩrȩ cjo̧ro̧pea̧ oa mitëa̧ oa cjiadëtäremȩde judi Devi pio judiri ja̧dëmȩ tara. Jabechji̧ Devi pio judiri ja̧ji̧ri̧ judiro̧ peadëri ja̧ mitëa̧ oa cjiarëreji̧ri̧dirȩ. Ado ütara̧mi̧ yürü chjaorëreji̧ri̧dirȩ Moicherë go̧ȩparërea̧ ma̧ȩ pio ju̧i̧iä.

⁵ Jabo danȩrȩ, judiro̧ ja̧bepea̧ üdë jabomo̧ chja̧oemi̧ dade Quiricho judi a̧dëräpȩ ja̧bepabëmi̧. Tjamo̧ davä. Judiro̧ ja̧bepea̧ üdë jabomo̧ na̧rȩrea̧de Quiricho judi a̧dëräpȩ japapea̧ pio ju̧i̧ chjiari. Ado pio ju̧i̧iä jabërä ma̧ȩ yürürëremȩde Ütë tjamo̧ judi Moiche pio ju̧i̧iäpȩmo̧ dëbëdiärea̧ jo̧ pio ju̧i̧ ütara̧mi̧ cji̧däpea̧ oa. Jabechji̧ Jechu judi a̧dëräpȩ ja̧bepapea̧ pio ju̧i̧ chjiari chjadëri̧ na̧rȩpea̧ oa ma̧ȩ yürürëremȩdejȩ. Danȩrȩ, ja̧di ta̧rëri̧ yo̧mȩrȩ yo̧rëremȩdejȩ: “Danȩ Moiche, pio yirenȩ pio coadi ya̧mi̧ uëräpȩ” yo̧a̧dejȩ. “Ado cüdë mȩa na̧rȩa̧mi̧, cüdë mȩa ütarë yo̧a̧mi̧ cji̧dätä earequedemȩ dëbëdiärea̧ jo̧ oa, jabëdiärea̧ decjiari̧.” Aja̧ ca̧ oti̧, ja̧di ta̧rëri̧ yo̧mȩrȩ ütarë yo̧rëremȩdejȩ Moiche ju̧i̧ Ütë tjamo̧ judi dëbëdiärea̧ jo̧ oa japapea̧ pio ju̧i̧ chjiari, Joja pio ju̧i̧ chjiari chjadëri̧ na̧rȩpea̧ oa, judi a̧dëräpȩ ja̧bepabëmi̧ chjadëri̧ na̧rȩpea̧ oa.

⁶ Jabo Ütë tjamo̧ judi Quiricho pio ju̧i̧iäpȩmo̧ yürüa̧ ja̧beparea̧ üdë ji̧dë u̧i̧ ba chiade dai chirirä goë tuti ja̧bepaji̧ri̧ judiro̧ ja̧beparërea̧ pio ju̧i̧iä. Tjamo̧ davä. Jechu judi ibë chjiari goë tuti ja̧bepea̧ üdë ji̧dë u̧i̧ ba chiade goë tuti ja̧bepaji̧ri̧ judiro̧ pearä yürürërea̧ ma̧ȩrä ja̧beparërea̧ pio ju̧i̧iä. Ado Jechu judi ibë yürüa̧ ma̧ȩ peaja̧ üdë, no̧mȩ ja̧ ma̧ȩ pio ju̧i̧iä ji̧dë u̧i̧ ba chiade peaja̧di. Jabechji̧ ma̧ȩ peaja̧ üdë Ütë tjamo̧ judi yo̧ë cji̧därërea̧ ma̧ȩ pio ju̧i̧iä ja̧ȩ cjiami̧ dari̧ cjia̧ oaiä ji̧dë u̧i̧ ba chiade. Ji̧dë u̧i̧ ju chiami̧ dade.

Ma̧ȩ peaja̧ üdë pearä yürürërea̧ ma̧ȩ pio ju̧i̧ u̧i̧ ba chiade

⁷ Danȩrȩ, pumȩ judiro̧ pearä yürürërea̧ ma̧ȩ oaiä jabechji̧parȩrea̧ daea̧rä judicjȩ, ji̧dë duri oa ado cja̧rȩmo̧ ma̧ȩ peaja̧ oa ano̧ mirȩ yürüdëa̧täremȩde Ütë tjamo̧ judi.

⁸ Jabo cjäri̧ madirȩ, ta̧rëdiädërëreji̧ri̧dirȩ pumȩ judiro̧. Ado pio ju̧i̧iä ma̧ chiadëri̧ cjiamȩrȩ dadërëremȩdejȩrȩ Ütë tjamo̧ judi. Jabechji̧ pio ji̧ri̧ ma̧ chiadëri̧ cjiamȩrȩ datärea̧ ji̧, ja̧di dari̧ dadërëremȩdejȩrȩ. ‘Jabechji̧ ta̧rëdiädëdiro̧da, cüdë pearä yürürërea̧ ma̧ȩ pio ju̧i̧ nö̧tadäräri̧ ta̧rëdiädë madiro̧da’ quëna̧ jo̧rȩtamȩrȩ dae chjaorëremȩdejȩrȩ. Ado pio ju̧i̧iä ja̧di ta̧rëri̧ yo̧mȩrȩ yo̧rëremȩde Ano̧mȩ tjamo̧ judi jënȩ pearä yürürërea̧ ma̧ȩrä cjo̧ro̧rëreji̧ri̧ pio ji̧ri̧ chjiari: “Japamitë chjätä ëte ütara̧ doro, ado cja̧rȩmo̧ ma̧ȩ peaja̧ oa ano̧ mire yo̧ë cji̧däparequedejȩrȩ Icharai ja̧ pumȩ pio ji̧ri̧, ado Juda ja̧ pumȩ pio ji̧ri̧bo.

⁹ Jabechji̧ jibëa̧ ütëti̧rea̧ pio ji̧ri̧ yürürërea̧mi̧ yürüdëparequedejȩrȩ, jabo tjaoëpai̧ dari̧ cjiamȩ ma̧ȩ pio ju̧i̧ ano̧ mire yürüparequedejȩrȩ. Jabechji̧ cüdë pio ji̧ri̧ ja̧ ütëti̧rea̧ pio ji̧ri̧ pearä ma̧ȩ yürüra̧rä, ji̧ri̧ ja̧ ichi oa mitëmi̧ dari̧ chjadëri̧ ëba go̧dürëremȩrequedejȩrȩ Ejito quȩmȩ chiriri pio judiri. Jabo cjäri̧ madiro̧coe, cüdë ji̧ri̧ yürürërea̧ ma̧ȩ pio ju̧i̧ ta̧rëdiädëa̧diro̧coe. Ado pio ju̧i̧iä putu jura̧ a̧dë chami̧ dari̧ japea̧requedejȩrȩ.

¹⁰ Jabo ütara̧ doro, cüdë pio ji̧ri̧iäpȩmo̧ ma̧ȩ peaja̧ oa yürürä, jabechji̧ jibëa̧ chji̧rä chjadëri̧ charea̧mi̧ dari̧ cha tänȩpareconȩ, judiro̧ chjadëri̧ bapë ta̧rërea̧mi̧ dari̧. Jabechji̧ pio jiro ma̧ȩ peaja̧ oa jibëa̧ chji̧rä go̧ȩparea̧mi̧ dari̧ yürüparequedejȩrȩ, judiro̧ pio coa chjadëri̧ ta̧rëdiäpea̧ oa. Ado pio jiro doro, jabechji̧ pio ji̧ri̧ ja̧ Ütëmȩrȩ cjo̧ro̧parequede. Ado judiro̧ ca̧ pumȩ mapadirȩ.

¹¹ Jabechji̧ ütëbodärärë quëna̧ji̧ri̧rȩ cjo̧ro̧padirȩ. Ado jibëa̧ bë queri̧räpȩ cjo̧ro̧mȩ pio ju̧i̧ a̧ra̧ano̧tärea̧ ji̧, pio jibëdi ja̧ji̧ri̧ pio ji̧ri̧ a̧ra̧ano̧tärea̧ ji̧, cjäri̧ madiro̧jȩrȩ, a̧ra̧ano̧dëpadiro̧jȩrȩ ütëbodärärë quëna̧ji̧ri̧rȩ cjo̧ro̧pa tara. Jabechji̧ yo̧tärea̧ ji̧, "Aja̧, Ano̧mȩ pio ju̧i̧ chjadëri̧ dabapea̧ oa dabapatäreji̧ri̧nȩrȩ" yo̧mȩ ma̧ȩ pio ju̧i̧ yo̧tärea̧ ji̧, cjäri̧ madirȩ, ja̧di ta̧rëri̧ yo̧rea̧mi̧dëpade. Jabechji̧ ütëbodärärë quëna̧ji̧ri̧rȩ cjo̧ro̧padirȩ pio jiro japamitërä, mu̧i̧tjoi̧ judiro̧ ado tjamo̧ cjo̧ro̧ji̧ri̧ pio judiro̧borë.

¹² Ado jabechji̧ cjäri̧ri̧ cjiamȩrȩ duridëparȩparequedejȩrȩ judiro̧ chjai̧dëri̧ japea̧ pio ju̧i̧ chjiari. Ado judiri ado chjereno̧ jo̧rȩtarea̧mi̧dëri̧ a̧dë jo̧rȩtapareconȩ bucho ana̧.” Aja̧, ja̧di ta̧rëri̧ yo̧mȩrȩ yo̧rëremȩde Ano̧mȩ judi Icharai pio judiri ja̧ji̧ri̧ pio ji̧ri̧ chjiari.

¹³ Jabo danȩrȩ ca̧ oti̧, Ütë tjamo̧ judi ma̧ȩ peaja̧ pio ju̧i̧ chjiari ni̧bä chjaoa̧ üdë, ¿tjana̧ na̧rȩdiibe? Tjana̧ na̧rȩdë, jabechji̧ judi pearä yürürërea̧ ma̧ȩ pio ju̧i̧ cjiadiä tänȩpea̧ pio ju̧i̧ chjiari na̧rȩdiibe. Jabechji̧ Ütërë pearä yürürërea̧ ma̧ȩ üdë chjibo ütama̧i̧mi̧ dari̧ cjiadiäa̧de. Ba chia tjamo̧dëpea̧de. Ütërë yo̧ë cji̧därërea̧ ma̧ȩ peaja̧ üdë ma̧na̧ oaiä, jabechji̧ cjiadiäa̧de pearä yürürërea̧ ma̧ȩ üdë. Jabechji̧ ma̧ȩ peaja̧ üdë ano̧ mire mitëa̧ oa cjiami̧ dari̧ cjiade yaba̧.