Ebereo Ma̧ȩ 7 - Biblia Pume

Mequichede pio ju̧i̧ chjiari dabapatäreji̧ri̧rea̧rȩ

¹ ¿Chjiarëremȩde Mequichede quȩmȩ judi? Chjiadëde, jabechji̧ Charȩ quȩmȩ bë ma̧ri̧räpȩ ütëmȩrȩ cjo̧ro̧rëremȩde. Aja, pio ju̧ri̧pȩ cjo̧ro̧ji̧ri̧ pio ji̧ri̧ ja̧ ütërëremȩde. Ado o ji̧ri̧ chjiari goë tuti ja̧bepamȩrȩ cjo̧ro̧rëremȩde peaja̧di. Aja̧, a̧dë chjäte ba chiamȩ Ütë pio ju̧i̧ ja̧ oa ja̧bepamȩrȩ cjo̧ro̧rëremȩde, o ji̧ri̧ chjiari goë tuti ja̧bepamȩrȩ. Ado danȩrȩ, Abaraa̧rea̧ pio judi dëbëdiärëremȩ pio judide. Aja̧, Abaraa̧ judi chiri ütëti̧ cjo̧ro̧ji̧ri̧ jadüchiami̧ oa boadäräa̧ duri oa, jabechji̧ Mequichede pio ju̧i̧ dëbëdiärëremȩdejȩ. Aja̧, jibëa̧ bëräpȩ baämȩrȩ dëbëdiärëremȩdejȩ.

² Ado pio ju̧i̧iä Abaraa̧ judi pio ju̧i̧ dëbëdiäa̧rä, o oa china̧chjari̧ tuti ëte yürürëremȩdejȩ cja̧rȩmȩmi̧ da oa. Aja̧, jënȩ chiri ütëti̧ pio ji̧ri̧iä pea mitëa̧ pio ju̧i̧ yürürëremȩdejȩ. Chjö̧na̧i̧ oa yürüdëa̧dejȩ, jabo o oamo̧i̧ oa yürürëremȩdejȩ cja̧rȩmȩmi̧ da oa. Jabo mȩnȩro̧ dabadëchea oa, ‘ji̧dë u̧i̧ ni̧bä chjaotäremȩquiji̧ri̧da’ quëna̧ jo̧rȩtarequededibe. Danȩrȩ, Abaraa̧ judi goa̧ pio ju̧i̧ chjiari tjamo̧ri̧ dabadërequede. Jabo Abaraa̧ judi 10 baca goarä judi, cja̧rȩmȩ baca maea oa yürüa̧täremȩdejȩ. Jabo judi 100 baca goarä judi, 10 baca oa yürüa̧täremȩdejȩ. Ado judi 50 oveja goarä judi, 5 oveja oa yürüa̧täremȩdejȩ. Ja̧di ma ja̧di ma yürüa̧täremȩdejȩ cja̧rȩmȩmi̧ da oa. Tjamo̧ davä ca̧ oti̧, Abaraa̧ judi ji̧ra̧dë oa goarä judi, ji̧ra̧ tjamo̧dë oa yürüa̧täremȩdejȩ, jabo o oamo̧i̧. Jabo ji̧ra̧ tjamo̧ oa goarä judi, peaja̧di ji̧ra̧ tjamo̧ oa yürüa̧täremȩdejȩ, jabo o oamo̧i̧. Aja̧, ja̧di dari̧ yürüpea̧ marëremȩde. Ado ja̧di dari̧ japamȩrȩ yürürëremȩdejȩ Abaraa̧ judi, cja̧rȩmȩmi̧ da oa. Ado Mequichede ja̧ quȩ üdë, “Coëma cjiari̧ japamȩ ütë” yo̧rea̧de. Ado judi Charȩ quȩmȩ bë ma̧ri̧ ja̧ ütë tara, peaja̧di “Ma̧ chjupi̧ cjiari̧ cjo̧ro̧rea̧ yürümȩ ütë” yo̧rea̧de peaja̧di.

³ Jabo danȩrȩ, Mequichede ju̧i̧ nö̧rimȩ pio ju̧i̧ chjiari dabadë marea̧rȩ. Ado pio ju̧i̧ arayi̧ pio ji̧ chjiaribo dabadërea̧rȩ. Jibëa̧ ütëti̧rea̧ pio ji̧ri̧ chjiari, jibëa̧ taru pio ju̧i̧ chjiari peaja̧di dabadë marea̧rȩ. Ado ‘pio jiro doro ara̧ oa cjiarëremȩdida, ado pio jiro doro ja̧boa̧dida’ quëna̧ dabadërea̧rȩ peaja̧di. Jabechji̧ tarupadëmȩmi̧ dade. Ado ja̧bodëmȩmi̧ dade peaja̧di. Ado pio ju̧i̧iä Ütë tjamo̧ ja̧ Joja pio judimi̧ dade, judi bucho ana̧ tjamo̧ goë tuti ja̧bepamȩmi̧ da tara. Jabechji̧ judi ararërea̧ pio ju̧i̧ chjiari go̧ȩpea̧ oa cjiadëa̧ oaiä, judi ja̧borërea̧ pio ju̧i̧ chjiari go̧ȩpea̧ oa cjiadëa̧ oaiä, jabechji̧ ji̧dë ma goë tuti ja̧bepamȩmi̧ dade o pio ji̧ri̧ chjiari.

⁴ Jabo danȩrȩ ca̧ oti̧, ¿tjana̧ ju̧i̧iä yürürëremȩdejȩ Abaraa̧rea̧ judi Mequichede pio ju̧i̧iäpȩmo̧? Tjana̧ ju̧i̧iä cja̧rȩmȩmi̧ da oa yürürëremȩdejȩ? Tjana̧ ju̧i̧iädë, jabechji̧ Mequichede judi ba chia tjamo̧ tara yürürëremȩdejȩ. Jabechji̧ Abaraa̧ judi judio pio ji̧ri̧ ja̧ tarumȩborë, jabechji̧ cja̧rȩmȩmi̧ da oa yürürëremȩdejȩ, jënȩ chiri ütëti̧ cjo̧ro̧ji̧ri̧ pio ji̧ri̧iä ado chjereno̧ mitëa̧ pio ju̧i̧, ütëti̧ judiro̧ baë goa baätea̧ pio ju̧i̧.

⁵ Jabo danȩrȩ, Mequichede judi Devirea̧ pio judirimȩrä judi, chjadëri̧ dabatäreji̧ri̧rea̧rȩ. Jabechji̧ Devi pio judiri ja̧ji̧ri̧ judiro̧ goë tuti ja̧bepaji̧ri̧ maearë ja̧beparëreji̧ri̧dirȩ. Ado pio ju̧i̧iä chjadëri̧ dabatäreji̧ri̧rea̧rȩ Abaraa̧ judi Mequichede pio ju̧i̧iäpȩmo̧ yürüa̧ pio ju̧i̧ chjiari. ‘Aja̧, Devi pio judiri ja̧ tara, jabechji̧ Abaraa̧ judi yürüa̧diji̧da, Moicherë go̧ȩparërea̧ ma̧ȩ oaiä cja̧rȩmȩmi̧ da oa yürüpea̧dida, Devi pio judiriji̧ri̧ pio ji̧ri̧iäpȩmo̧ yürüpea̧dida, goë tuti ja̧bepaji̧ri̧ pio ji̧ri̧iäpȩmo̧ yürüpea̧dida, ütëbodärärë Abaraa̧ri ja̧ji̧ri̧borë ja̧di dari̧ yürüpea̧ chiadiro̧ji̧ri̧da, ado pio ju̧i̧iä Abaraa̧ judi cja̧rȩmȩmi̧ da oa yürüa̧diji̧da Mequichede pio ju̧i̧iäpȩmo̧’ quëna̧ dabatäreji̧ri̧rea̧rȩ chjaodëri̧.

⁶ Jabo cjäri̧ made jabo. Mequichede judi Devi pio judiri ja̧dërëremȩde. Jabo pio judiri ja̧dëmȩbo oa, Abaraa̧ judi cja̧rȩmȩmi̧ da oa yürürëremȩdejȩ. Ado ju̧i̧ uëri Mequichede judi ma̧ȩ goae oa yürürëremȩdejȩ ji̧dëri̧. Jabechji̧ Abaraa̧ judi chjadëri̧ cjo̧ro̧bëmi̧ chjadëri̧ cjo̧ro̧pea̧ ma̧ȩ oa yürürëremȩdejȩ. Jabechji̧ Abaraa̧ judi Ütë tjamo̧ pio ju̧i̧iä irä ta̧rëa̧räbo, Ütë tjamo̧ judi pio ju̧i̧iäpȩmo̧ peadë yo̧ë cji̧däa̧räbo, jabechji̧ chjadëri̧ cjo̧ro̧pea̧ ma̧ȩ oa yürürëremȩdejȩ Mequichede pio judi.

⁷ Ado danȩrȩ ca̧ oti̧, o ji̧ri̧iäpȩmo̧ chjadëri̧ cjo̧ro̧pea̧ ma̧ȩ oa ni̧bämȩ pio ju̧i̧ chjiari daba marea̧rȩ. Jabechji̧ ji̧dë u̧i̧ ba chia tjamo̧mȩ pio judide chjadëri̧ cjo̧ro̧pea̧ ma̧ȩ oa yürümȩ judi. Pio judide jȩa nö̧tadëmȩ pio ju̧i̧iäpȩmo̧ chjadëri̧ cjo̧ro̧pea̧ ma̧ȩ oa yürümȩ judi. Jabechji̧ pio jȩa u̧i̧ ba chiamȩ pio ju̧i̧iäpȩmo̧ chjadëri̧ cjo̧ro̧pea̧ ma̧ȩ oa yürürea̧mi̧dëde. Pio ju̧i̧ chjadëri̧ dabapea̧rea̧rȩ peadëri ja̧. Ado pio ju̧i̧iä, ‘Aja̧, Abaraa̧ pio ju̧i̧ u̧i̧ ba chiadida, Mequichede judi ji̧dë u̧i̧ ba chiadida’ quëna̧ dabarea̧ darea̧rȩ.

⁸ Devirea̧ pio judiri ja̧ji̧ri̧ judiro̧, goë tuti ja̧bepaji̧ri̧ pio judiro̧, jabechji̧ cja̧rȩmȩmi̧ da oa boarëreji̧ri̧dirȩ jibëa̧ pumȩ pio ji̧ri̧iä, jënȩro̧ cjo̧ro̧a̧ nö̧ta. Jabo cjäri̧ madirȩ, ja̧borea̧ chia tara, japamitë ana̧ri̧ ja̧beparea̧ dadërëreji̧ri̧dirȩ. Jabechji̧ ja̧bo ga̧re baä marëreji̧ri̧dirȩ. Ado pio ju̧i̧iä ji̧dë u̧i̧ ba chiamȩde Mequichede judi, ja̧bodëmȩ goë tuti ja̧bepami̧ dari̧ cjia tara. Jabechji̧ judi ja̧boa̧ pio ju̧i̧ chjiari go̧ȩpea̧ oa cjiadë oaiä, jabechji̧ ji̧dë ma goë tuti ja̧bepamȩmi̧ dari̧ cjo̧ro̧de.

⁹ Ado danȩrȩ, goë tuti ja̧bapaji̧ri̧ judiro̧ Devi pio judiri ja̧ji̧ri̧borë, jabechji̧ yürümi̧ dari̧ yürürëreji̧ri̧diro̧jo̧ȩ Mequichede pio ju̧i̧. Jabechji̧ jojada taru pio ju̧i̧iä yürürëreji̧ri̧diro̧jo̧ȩ. Ado pio ju̧i̧iä yo̧requededibe. Devi pio judiri ja̧ji̧ri̧ judiro̧ jibëa̧ pumȩ pio ji̧ri̧iä cja̧rȩmȩmi̧ da oa boa̧räbo, cja̧rȩmȩmi̧ da oa yürümi̧ dari̧ yürürëreji̧ri̧diro̧jo̧ȩ Mequichede pio ju̧i̧iäpȩmo̧.

¹⁰ Jabechji̧ Abaraa̧ pio judiri ja̧ji̧ri̧ tara, yürümi̧ dari̧ yürürëreji̧ri̧diro̧jo̧ȩ jojada taru pio ju̧i̧iä.

Mequichede pio judimi̧ damȩ pio ju̧i̧iä cjiadiärëreji̧ri̧dirȩ Devirea̧ pio judiriji̧ri̧ judiro̧, ji̧dë ma ja̧bepatärea̧ ji̧

¹¹ Ütë tjamo̧ judi tüdüa̧mi̧ darä cjo̧ro̧pea̧ ma̧ȩ pio ju̧i̧ yürürëremȩdejȩrȩ icharaita pio ji̧ri̧iäpȩmo̧. Ado pio jiro ma̧ȩ oaiä, Devirea̧ pio judiri ja̧ji̧ri̧ judiro̧ chjadëri̧ dabarëreji̧ri̧dirȩ pumȩ pio ji̧ri̧ chjiari goë tuti ja̧bepapea̧ ji̧. Jabo cjäri̧ madirȩ, pumȩ pio judiro̧ jabechji̧parȩa̧ oa cjiapea̧ oa ja̧beparea̧ dadë marëreji̧ri̧dirȩ. Judiro̧ pumȩ pio ji̧ri̧ chjiari chjadëri̧ goë tuti ja̧bepea̧räbo, jabechji̧ pumȩ judiro̧ jabechji̧parȩa̧ oa cjiarea̧ dadë marëreji̧ri̧dirȩ. Jabechji̧ nö̧tadë marëreji̧ri̧dirȩ pumȩ pio ji̧ri̧ jabechji̧parȩpea̧ oa. Ado pio ju̧i̧iä ado cja̧rȩmo̧rȩ ano̧ mire mitëa̧ oa cjiapea̧ chiarëremȩde, ado cja̧rȩmo̧ goë tuti ja̧bepamȩ pio judi. Devirea̧ pio judiri ja̧dëmȩ judi, ado Aro̧rea̧ pio judiri ja̧dëmȩ judi, jabo Mequichede pio judimi̧ damȩ pio judi ano̧ mire mitëa̧ oa cjiapea̧ chiarëremȩde.

¹² Ado danȩrȩ, peaja̧mȩ pio ju̧i̧ ano̧ mire mitërea̧ darä, pumȩ pio ji̧ri̧ chjiari goë tuti ja̧bepamȩ peaja̧ pio ju̧i̧ mitërea̧ darä, jabechji̧ pearä yürürërea̧ ma̧ȩ oaiä ja̧beparea̧mi̧dëde, jabo ma̧ȩ peaja̧rä ano̧ mire ja̧bepapea̧ chiade. Tjamo̧ davä. Moicherë go̧ȩparërea̧ ma̧ȩrä ja̧beparea̧mi̧dëde, jabo ma̧ȩ peaja̧rä ano̧ mire ja̧bepapea̧ chiade. Jabechji̧ Devi pio judiriji̧ri̧ judiro̧ ja̧beparëreji̧ri̧dirȩ pearä yürürërea̧ ma̧ȩrä. Jabo peaja̧mȩ judi Devi pio judiri ja̧ji̧ri̧ judiro̧ ja̧beparërea̧ ma̧ȩrä ja̧beparea̧mi̧dë tara, jabechji̧ ado cja̧rȩmo̧ ma̧ȩ peaja̧rä ja̧bepapea̧ chiade.

^13-14 Jabechji̧ ibëa̧ Ano̧mȩ Jechu judi Devi pio judiri ja̧dëmȩde, jabo tjaoërimȩde. Juda quȩmȩ pio judiri ja̧mȩde. Ado Juda pio judiri ja̧ji̧ri̧ judiro̧ cja̧rȩmȩrȩ o pio ji̧ri̧ chjiari goë tuti ja̧bepaji̧ri̧dë marëreji̧ri̧dirȩ. Jabechji̧ Moiche judi goë tuti ja̧bepaji̧ri̧ pio ji̧ri̧ chjiari pearä go̧ȩparërea̧ ji̧, Juda pio judiri ja̧ji̧ri̧ pio ji̧ri̧ chjiari go̧ȩpadë marëremȩde.

Jechu judi goë tuti ja̧bepamȩde Mequichede pio judimi̧ darë

^15-16 Ado yaba̧, ado cja̧rȩmo̧ goë tuti ja̧bepamȩ pio judi ma̧na̧diibe. Ado Jechu pio judide. Tjamo̧ davä. Mequichede pio judimi̧ darë ma̧na̧diibe. Ütë tjamo̧ pio judi mitëa̧ oaiä ma̧na̧diibe. Jabo Moicherë go̧ȩparërea̧ ma̧ȩrä mitëa̧ oa cjiadërëremȩde. Devi pio judiri ja̧mȩ tara mitëa̧ oa cjiadërëremȩde, jabo yuropadëmȩ cjo̧ro̧rea̧ chia tara mitëa̧ oa cjiarëremȩde. Jabechji̧ judi jauëchja tara mitëa̧ oa cjiarëremȩde. Aja̧, pio ju̧i̧iä mitëa̧ oa cjiarëremȩde Jechu judi tjamo̧ goë tuti ja̧bepamȩrȩ ano̧ mire ja̧bepapea̧ oa. Ado pio ju̧i̧iä tjamo̧ri̧ dabarea̧rȩ yaba̧ pearä goë tuti ja̧beparëreji̧ri̧ pio ji̧ri̧ chjiari. ‘Jabechji̧ cjiadiäpea̧ chiadiro̧da, pearä goë tuti ja̧beparëreji̧ri̧ pio judiro̧ cjiadiäpea̧ chiadiro̧da, ado peaja̧mȩ pio judi ano̧ mire goë tuti ja̧bepapea̧ chiadida, pio judi ano̧ mire mitëa̧ oa cjiadida’ quëna̧ji̧ri̧rȩ dabarea̧rȩ yaba̧.

¹⁷ Danȩrȩ, ja̧di ta̧rëri̧ go̧ȩpea̧ oa cjiade ma̧ȩ üdë Ütë tjamo̧ judi Joja oa ni̧bärërea̧ ji̧. Ta̧rëchji̧vä: “Bucho ana̧ goë tuti ja̧bepamȩrȩ ja̧bepaparenȩ Mequichede pio judimi̧ dari̧, tjamo̧ goë tuti ja̧bepadëmȩpe bagarea̧ decjiari̧.” Aja̧, ja̧di ta̧rëri̧ jabërä go̧ȩpea̧ oa cjiarëremȩde ma̧ȩ üdë. Jabechji̧ Jechu pio ju̧i̧, Mequichede pio judimi̧ da pio ju̧i̧ ano̧ mire mitërëremȩdejȩ Ütë tjamo̧ judi, pio ibë chjiari ano̧ mire goë tuti ja̧bepapea̧ oa.

¹⁸ Ado pio ju̧i̧iä tüdüa̧mi̧ darä cjo̧ro̧pea̧ ma̧ȩ oa cjiadiä tänȩmi̧ dari̧ japarëremȩdejȩ Ütë tjamo̧ judi. Jabechji̧ pio jiro ma̧ȩ üdë pumȩ ji̧ri̧ a̧dorea̧ chiadëmȩmi̧ da tara, pio jiro ma̧ȩ üdë ju chiadëmȩmi̧ da tara, jabechji̧ cjiadiämi̧ dari̧ japarëremȩdejȩ.

¹⁹ Jabechji̧ tüdüa̧mi̧ darä cjo̧ro̧pea̧ ma̧ȩ üdë pio ibë jabechji̧parȩrea̧mi̧dëdiibe. Jabo yaba̧ Jechu pio ju̧i̧iä, ibë jidatarea̧ yürümȩ pio ju̧i̧iä, dëdë, jidatarea̧ chiarea̧rȩ. Ado pio ju̧i̧iä Ütë tjamo̧ pio ju̧i̧ ja̧ queri̧mi̧ daräpȩ go̧düdärärea̧ darea̧rȩ, a̧ro̧rȩ jachi cjiami̧ dari̧ cjiarërea̧ ji̧.

^20-21 Ado Ütë tjamo̧ judi Jechu pio ju̧i̧ goë tuti ja̧bepamȩ tänȩrërea̧ ji̧, jibëa̧ quȩ oa a̧de yo̧mȩrȩ yo̧ë cji̧därëremȩdejȩ, Jechu judi bucho ana̧ goë tuti ja̧bepapea̧ pio ju̧i̧ chjiari. Jabo Devi pio judiri ja̧ji̧ri̧ judiro̧ pearä goë tuti ja̧bepaji̧ri̧pea̧rä, cjäri̧ madejȩrȩ, jibëa̧ quȩ oa a̧de yo̧mȩrȩ yo̧ë cji̧dädëa̧de. Tjamo̧ davä. Pearä mitëa̧ oa cjiarëreji̧ri̧ pio judiro̧ tarupea̧rä, goë tuti ja̧bepaji̧ri̧ pio judiro̧ pea tarupea̧rä, Ütë tjamo̧ judi jibëa̧ quȩ oa a̧de yo̧mȩrȩ yo̧ë cji̧dädëa̧de, jabo Jechu pio ju̧i̧mo̧i̧ yo̧rëremȩdejȩ. Ado judi Joja oa yo̧rërea̧ ji̧, ja̧di ta̧rëri̧ yo̧mȩrȩ yo̧rëremȩdejȩ Ütë tjamo̧ judi: “Ano̧mȩ pio judirequede” yo̧a̧dejȩ. “Ado ca̧ quȩ oa a̧de yo̧mȩrȩ yo̧ë cji̧därequedemȩ, cüdë ano̧ mire jo̧rȩtarea̧mi̧dëri̧. Danȩ, bucho ana̧ goë tuti ja̧bepamȩpea̧renȩ, goë tuti ja̧bepadëmȩpe bagarea̧mi̧dëri̧.” Aja̧, ja̧di ta̧rëri̧ yo̧mȩrȩ yo̧ë cji̧därëremȩdejȩ Joja oa Ütë tjamo̧ judi jabërä, jibëa̧ quȩ oa a̧de yo̧mȩrȩ.

²² Ado Ütë tjamo̧ judi Joja oa jibëa̧ quȩ oa a̧de yo̧mȩrȩ yo̧ë cji̧däa̧ oaiä, jabechji̧ tjamo̧ri̧ dabarea̧rȩ. ‘Aja̧, ma̧ȩ peaja̧ üdë ji̧dë u̧i̧ chjadëdida, no̧mȩ ja̧ ma̧ȩ pio ju̧i̧ u̧i̧ chjadëdida, jabechji̧ Jechu pio judi ba chiaparȩa̧diji̧da, ma̧ȩ peaja̧ pio ju̧i̧ ba chiaparȩa̧diji̧da, ado yaba̧ Jechu pio ju̧i̧iä tjamo̧i̧ cjiari̧ cjiadiäa̧dida’ quëna̧rea̧mi̧ dari̧ tjamo̧ri̧ dabarea̧rȩ.

Mequichede pio judimi̧ dari̧ ano̧ mire goë tuti ja̧bepamȩ judi Devi pio judiri ja̧ji̧ri̧ pio ji̧ri̧ u̧i̧ ba chiade

²³ Moicherë go̧ȩparërea̧ ma̧ȩrä goë tuti ja̧bepaji̧ri̧ pio judiro̧ ji̧ra̧ tjamo̧rëreji̧ri̧dirȩ. Jabo cjäri̧ madirȩ, judiro̧ ji̧dë ma ja̧bepatärea̧ ji̧, ji̧dë ma ja̧beparea̧ dadë marëreji̧ri̧dirȩ jënȩro̧ ja̧bo ga̧re baäji̧ri̧rȩ cjo̧ro̧a̧ oaiä. Pio ju̧i̧iä ji̧ra̧ tjamo̧rëreji̧ri̧dirȩ.

²⁴ Jabo Jechu judi bucho ana̧mȩ tara, ji̧dë ma goë tuti ja̧bepamȩde o pio ji̧ri̧ chjiari. Jabechji̧ ja̧bepadëmȩpe bagarea̧ decjiari̧ ja̧bepamȩde.

²⁵ Ado pio ju̧i̧iä nö̧tade pumȩ ji̧ri̧ ji̧dë ma chjätä tänȩpea̧ ji̧. Ado pio ju̧i̧iä eami̧ pumȩ oa, Jechu pio ju̧i̧ quëna̧mȩ oa, Ütë tjamo̧ pio ju̧i̧iäpȩ jämi̧ dari̧ quëna̧mȩ oa, jabechji̧ chjätärea̧ yürüdejȩ. Jabechji̧ judi bucho ana̧mȩ tara, judi ja̧bodëmȩ tara, jabechji̧ pio ibë chjiari ji̧dë ma goë tuti cjo̧dëpai̧ dade Ütë tjamo̧ pio ju̧i̧iä.

²⁶ Pio ju̧i̧iä jabechji̧, Jechu pio judide pio ibë chjiari tjamo̧ goë tuti ja̧bepamȩ judi. Jabechji̧ chjadë tjamo̧de pio ibë chjadëri̧ a̧dopea̧ ji̧. Danȩrȩ, judi tata chja tara, judi cja̧rȩmȩ co chjai̧dëri̧ japadëa̧ tara, judi chjai̧dë oa mirea̧ oa cjiadëmȩ tara, jabechji̧ chjadë tjamo̧de ibë chjadëri̧ a̧dopea̧ ji̧. Ado danȩrȩ, ¿tjana̧räpȩde pio ibë chjiari goë tuti ja̧bepamȩ judi? Tjana̧räpȩdë, jabechji̧ baärëremȩde a̧dëräpȩ, a̧dë chäte ba chiaräpȩ ju̧ri̧ chapea̧ oa. Jabechji̧ Ütë tjamo̧ pio judi tänȩa̧ oaiä, chjai̧dëri̧ japaji̧ri̧ judiro̧ yu̧a̧rea̧mi̧dëräpȩ tutia̧ oa cjiade yaba̧, Jäjäa ja̧ mu̧i̧ chjua cotoräpȩ ju̧ri̧.

²⁷ Jabechji̧ dai oa cjiaji̧ri̧ tjamo̧ goë tuti ja̧bepaji̧ri̧ pio judiro̧mi̧ dadëde. Judiro̧ ja̧bepami̧ dari̧ ja̧bepadëde. Judiro̧ doti̧mi̧ goe gu̧rori̧ yürüa̧mi̧ yürüdëde. Danȩrȩ, judiro̧ goe gu̧rori̧ cäë yürüa̧rä, pio jibë chjiari yürüpea̧ chiarëreji̧ri̧dirȩ yabochja. Ado pio jibë chjiari yürü ëte, peaja̧di yürüpea̧ chiarëreji̧ri̧dirȩ pumȩ pio ji̧ri̧ chjiari. Jabo Jechu judi ja̧di dari̧ yürüdëpea̧ chiade. Jabechji̧ cja̧rȩmȩ co maea oa goe gu̧rori̧ yürürëremȩdejȩ jibëa̧ icjara oa Ütë tjamo̧ pio ju̧i̧iäpȩmo̧. Ütëbo ja̧ chjai̧dë pio ju̧i̧ nö̧tadäräri̧ ba ano̧pea̧ oa yürürëremȩdejȩ, ado judiri yürürea̧mi̧dëde.

²⁸ Jabechji̧ Moicherea̧rë go̧ȩparërea̧ ma̧ȩ oaiä mitëa̧ oa cjiarëreji̧ri̧dirȩ tjamo̧ goë tuti ja̧bepaji̧ri̧ judiro̧. Jabechji̧ chjai̧dë chiaji̧ri̧borë, ju chiadëji̧ri̧borë mitëa̧ oa cjiarëreji̧ri̧dirȩ. Jabo ja̧didëde Jechu pio ju̧i̧iä. Chjai̧dë chiadëde. Ju chiadëmȩrȩ cjo̧ro̧dëmȩde. Ado pio judi ano̧ mire mitëa̧ oa cjiade yaba̧. Jabechji̧ Moicherë go̧ȩparërea̧ ma̧ȩ oaiä mitëa̧ oa cjiadëde, jabo ado cja̧rȩmo̧ ma̧ȩrä, ji̧dë duri oa ma̧na̧mȩ ma̧ȩrä mitëa̧ oa cjiarëremȩde Ütë tjamo̧ pio judi mitëa̧ oaiä. Jabechji̧ jibëa̧ quȩ oa a̧de yo̧mȩrȩ mitërëremȩdejȩ. Ji̧dë ma coëma cjiari̧ cjo̧ro̧mȩ pio ju̧i̧, chjai̧dë chiadëmȩ pio ju̧i̧ mitërëremȩdejȩ, judi tjamo̧ goë tuti ja̧bepamȩrȩ cjiapea̧ oa, yuroparea̧ decjiari̧.