Ebereo Ma̧ȩ 6 - Biblia Pume

Uapai̧ da tjamo̧de Ütë tjamo̧ ja̧ ma̧ȩ pio ju̧i̧ bucho ana̧ putu jura̧ a̧dë chami̧ dari̧ jo̧rȩtapea̧ üdë

¹ Ado pio ju̧i̧iä ca̧ oti̧, jabechji̧ ibë üi̧padärämi̧ dari̧ cjia tänȩmȩ a̧ra̧ano̧rea̧ ma̧ȩ pio ju̧i̧ chjadëri̧ ano̧ mire a̧ra̧ano̧tärȩji̧ri̧rea̧rȩ yaba̧. Jabechji̧ ji̧dë ma carupë a̧ra̧ano̧dëtäreji̧ri̧rea̧rȩ yö̧cömi̧ da ma̧ȩ oa, Quiricho pio ju̧i̧ chjiari taruparea̧ ma̧ȩ oa. Tjamo̧ davä. Jo̧ taru yuimi̧ da ma̧ȩ pio ju̧i̧, chjai̧dë oa putu jura̧ a̧dë chami̧ dari̧ ano̧ mire jo̧rȩtapea̧ pio ju̧i̧ chjiari ma̧ȩ oa, ado Ütë tjamo̧ ju̧i̧ ano̧ mire quëna̧pea̧ pio ju̧i̧ chjiari ma̧ȩ oa ji̧dë ma carupë a̧ra̧ano̧dëtärȩji̧ri̧rea̧rȩ.

² Aja̧ peadë dabapea̧täreji̧ri̧nȩrȩ uirä go̧ȩ cjaeä chuda̧ pio ju̧i̧ chjiari a̧ra̧ano̧rea̧ ma̧ȩ oa, ado quëna̧ji̧ri̧ ja̧ tjübë oa ja̧ȩ cjiadäräa̧ pio ju̧i̧ chjiari a̧ra̧ano̧rea̧ ma̧ȩ oa. Pio ju̧i̧ chjiari ma̧ȩ oa ji̧dë ma carupë a̧ra̧ano̧dëtäreji̧ri̧rea̧rȩ. Ado ja̧boa̧ji̧ri̧ judiro̧ bëdüpea̧ a̧ra̧ano̧rea̧ ma̧ȩ oa, ado bucho ana̧ bape chjaopea̧ a̧ra̧ano̧rea̧ ma̧ȩ oa peaja̧di ji̧dë ma carupë a̧ra̧ano̧dëtäreji̧ri̧rea̧rȩ.

³ Ado ja̧di dari̧ ano̧ mire a̧ra̧ano̧parea̧rȩ Ütë tjamo̧ pio judi japarea̧ yürürä judi.

⁴ Ado danȩrȩ, pumȩ judiro̧ Ütë tjamo̧ ja̧ ma̧ȩ oa bucho ana̧ putu jura̧ a̧dë chami̧ dari̧ jo̧rȩtarä judi, jabechji̧ pio judiro̧ chjadëri̧ ano̧ mire jo̧rȩtapea̧ oa a̧dorea̧mi̧dëdirȩ. Tjamo̧ davä. Judiro̧ tatami̧ darä jo̧rȩta ëte jiadarä judi, judiro̧ Ütë tjamo̧ judi a̧dëri pio judiri yürüa̧ chjätärea̧ pio ju̧i̧ chjiari chjadëri̧ dabapa ëte jiadarä judi, cjäri̧ madirȩ, a̧dë chjäte ma̧i̧ dari̧ japadirȩ.

⁵ Tjamo̧ davä. Judiro̧ o ji̧ri̧ pio ji̧ri̧ nö̧ta Tjo tjamo̧ pio ju̧i̧ ji̧mo̧ chiaji̧ri̧pe baga ëte jiadarä judi, judiro̧ Ütë tjamo̧ ja̧ ma̧ȩ chjadëi̧ oa ta̧rë ja̧bo ta̧rë ja̧bo ta̧rë ëte jiadarä judi, ado judiro̧ Ütë tjamo̧ ja̧ jauëchja oa da ëte jiadarä judi, judi cjiadiäa̧ japamitërä ana̧ri̧ na̧rȩpea̧ jauëchja pio ju̧i̧ irä da ëte jiadarä judi, jabo cjäri̧ madirȩ, a̧dë chjäte ma̧i̧ dari̧ japadirȩ.

⁶ Jabechji̧ judiro̧ ja̧di dari̧ jiada̧ oaiä, Ütë tjamo̧ ja̧ Joja pio ju̧i̧ ado chjereno̧ toro acji gu̧na̧mi̧ dari̧ cji̧dädiro̧jo̧ȩ. Ado ja̧dimi̧ dari̧ japea̧ oaiä, jabechji̧ Jechu pio ju̧i̧ ado chjereno̧ ma̧i̧ dari̧ idëri̧ cjia tänȩmi̧ dari̧ japadiro̧jo̧ȩ, pumȩ no̧i̧dë tjamo̧ ja̧ dachoro. Ado pio ju̧i̧iä yo̧requededibe ado. Pumȩ judiro̧ Ütë tjamo̧ ja̧ ma̧ȩ oa bucho ana̧ putu jura̧ a̧dë chami̧ dari̧ jo̧rȩtarä judi, jabechji̧ pio judiro̧ chjadëri̧ ano̧ mire jo̧rȩtapea̧ oa a̧dorea̧mi̧dëdirȩ.

⁷ Danȩrȩ ca̧ oti̧, pumȩ judiro̧ dabumi̧ dadirȩ. O judiro̧ cjümȩ ji̧ra̧räpȩ cjiamȩ dabumi̧ dadirȩ. Dabu chjadëmi̧ dadirȩ. Ado pio jiro dabu chjadë üdë, jabechji̧ jurarea̧ ji̧ra̧ri̧ yürüde. Ado jiro daburo ja̧bepaji̧ri̧ pio judiro̧ ma̧ chiadëri̧ cjiaji̧ri̧rȩ dadiro̧jo̧ȩ. Ado Ütë tjamo̧ judi pio jiro dabu chjadëmi̧ dari̧ cjiaji̧ri̧ pio ji̧ri̧, jabechji̧ cjäri̧ri̧ cjiamȩrȩ dapadejȩrȩ, pio ji̧ri̧ chjadëri̧ a̧domȩrȩ.

⁸ Jabo o judiro̧ ja̧di dari̧ jurarea̧ yürüdëmȩ dabu chjadëdëmi̧ dadirȩ. Jabechji̧ pio jiro dabu üdë jurarea̧ yürüdëmȩde jabo teracaba maea oa yürüde. Daö̧ cärä oa, o̧to chiamȩ cärä oa, pada cärä oa yürüde. Ado tjado ana̧mȩ judi pio jiro cärä oa, jabechji̧ acjürüpadejȩ. Ado pio jiro dabumi̧ dari̧ cjiaji̧ri̧ pio ji̧ri̧, jabechji̧ bape chjaopadejȩrȩ Ütë tjamo̧ judi.

Ütë tjamo̧ ju̧i̧ jidataji̧ri̧rȩ cjo̧ro̧a̧ oaiä, ju chiarea̧ darea̧rȩ

⁹ Danȩrȩ ca̧ oti̧, ea tjamo̧requededibe. Ado cüdë pio yabo ma̧ȩ uapai̧ da oa dibë ni̧bä chjaoa̧räbo, ‘Ütë tjamo̧ judi bape chjaodëpadiji̧ri̧da, jabo ji̧dë u̧i̧ chjadëri̧ cjo̧ro̧rea̧ dapadiro̧da, chjadëri̧ chjätärea̧ dapadiro̧da’ quëna̧ jo̧rȩtarequededibe.

¹⁰ Jabechji̧ Ütë tjamo̧ judi oëra̧ ütaradëmȩde, jabo coëma cjiari̧ ütaramȩde. Ado pio ju̧i̧iä a̧dë dami̧ dari̧ a̧dë jo̧rȩtadëpadejȩ mȩnȩro̧ ja̧bepea̧ pio ju̧i̧, mȩnȩro̧ pio ju̧i̧ ja̧ oa ana̧ri̧ ja̧bepea̧ pio ju̧i̧. Jabechji̧ Ütë tjamo̧ pio ju̧i̧ ea tjamo̧ji̧ri̧rȩ ana̧ri̧ na̧rȩa̧nȩrȩ ja̧bepea̧ pio ju̧i̧iä. China̧chjari̧ tutia̧ oa cjiaji̧ri̧ pumȩ pio ji̧ri̧ chjadëri̧ a̧doa̧ oaiä ana̧ri̧ na̧rȩa̧nȩrȩ. Ado ji̧ri̧ chjadëri̧ a̧dorëreji̧ri̧rȩ ji̧dë ma a̧do chjaorenȩro̧jȩrȩ yaba̧. Ado pio ju̧i̧iä yo̧requededibe. Mȩnȩro̧ japea̧ pio ju̧i̧ a̧dë jo̧rȩtadëpade Ütë tjamo̧ judi.

¹¹ Ado pio ju̧i̧iä jabechji̧, mȩnȩro̧ ütëbodärärë Ütë tjamo̧ ja̧ oa ji̧dë ma järiji̧ri̧rȩ ja̧bepatä ea tjamo̧requededibe. Jabechji̧ mȩnȩro̧ jidata̧ üdë ma̧na̧na̧ra̧rä yuro, ja̧di dari̧ cjo̧ro̧tä earequededibe, jidatadëpe bagarea̧ decjiari̧.

¹² Jabechji̧ mȩnȩro̧ chumi̧dëri̧ cjiachea oa ja̧di dari̧ cjo̧ro̧tä earequededibe, mȩnȩro̧ Ütë tjamo̧ pio ju̧i̧ ji̧dë ma chjuari̧ quëna̧ji̧ri̧ pio ji̧ri̧ chjadëri̧ cho̧rëdiäpea̧ oa. Tjamo̧ davä. Ütërë yo̧a̧ pio ju̧i̧ jëreeadëji̧ri̧rȩ jidataji̧ri̧ pio ji̧ri̧, Ütërë yo̧ë cji̧däa̧ pio ju̧i̧ mitëa̧mi̧ dari̧ quëna̧ji̧ri̧ pio ji̧ri̧ chjadëri̧ cho̧rë quëna̧tä earequededibe, järidëpe bagarea̧ decjiari̧.

Ütë tjamo̧ judi yo̧ë cji̧däa̧ üdë ma̧diä cjia tänȩdëdiibe

¹³ Danȩrȩ, Ütë tjamo̧ judi Abaraa̧rea̧ pio ju̧i̧ yo̧ë cji̧därërea̧ ji̧, jabechji̧ jibëa̧ quȩra̧ pio ju̧ri̧ra̧ yo̧mȩrȩ yo̧ë cji̧därëremȩdejȩ. Jabechji̧ Ütë tjamo̧ ja̧ quȩ üdë a̧dë chjäte ba chiade. Ado cja̧rȩmo̧ quȩ üdë nö̧tadë madejȩ. Ado pio ju̧i̧iä pio ju̧i̧ ja̧ quȩra̧ yo̧mȩrȩ yo̧ë cji̧därëremȩdejȩ.

¹⁴ Ta̧rëchji̧vä: “Tjamo̧ri̧ yo̧requedemȩ” yo̧a̧dejȩ. “Danȩ, chjadëri̧ cjo̧ro̧rea̧ yürüparequedemȩ. Ado na̧ea̧ri ja̧ji̧ri̧ pio ji̧ri̧ a̧dë chjäte ji̧ra̧ tjamo̧pe baga tänȩparequedejȩrȩ.” Aja̧, ja̧di ta̧rëri̧ yo̧mȩrȩ yo̧ë cji̧därëremȩdejȩ Abaraa̧rea̧ ju̧i̧ Ütë tjamo̧ judi.

¹⁵ Ado Abaraa̧rea̧ judi jëreeadëmȩrȩ chjuari̧ quëna̧ oaiä, mitërea̧ dami̧ dari̧ quëna̧rëremȩde Ütërë yo̧ë cji̧däa̧ pio ju̧i̧.

¹⁶ Danȩrȩ, eami̧ pumȩ üdë o judiro̧ jibëa̧ ma̧ȩ oa tjamo̧ri̧ quëna̧tä earä judi, jibëa̧ ma̧ȩ üdë ‘coëma cjiari̧ cjiadida’ quëna̧tä earä judi, jabechji̧ pio jȩa u̧i̧ ba chiamȩ ja̧ quȩra̧ pio ju̧ri̧ra̧ a̧de yo̧mȩrȩ yo̧dejȩrȩ pumȩ pio ji̧ri̧. Ado judiro̧ quȩ ba chia oa ta̧rëa̧ oaiä, ‘Aja̧ jabechji̧dida, quȩ ba chiara̧ a̧de yo̧diibëda, tjamo̧i̧ cjiari̧ yo̧diibëda’ quëna̧ jo̧rȩtaji̧ri̧rȩ ta̧rë ja̧bopadiro̧jo̧ȩ, ‘tjamo̧ri̧ yo̧dë jirodiibëda’ quëna̧rea̧ decjiari̧.

¹⁷ Ado peaja̧dimi̧ dari̧ japarëremȩde Ütë tjamo̧ judi pumȩ ji̧ri̧ yo̧ë cji̧därërea̧ ji̧. Tjamo̧ davä. Jibëa̧ quȩ ba chia pio ju̧i̧ a̧de yo̧mȩrȩ yo̧ë cji̧därëremȩdejȩrȩ, yo̧ë cji̧däa̧ ma̧ȩ pio ju̧i̧ mitëpaji̧ri̧ pio judiro̧ tjamo̧ri̧ dabapea̧ oa. ‘Aja̧, tjamo̧i̧ cjiari̧ yo̧diibëda, teracabari̧ yo̧rea̧ decjiari̧ yo̧diibëda, ji̧dë duri oa ano̧ mire jo̧rȩtadëpadida, jabo jabechji̧ quȩ ba chia maeara̧ a̧de yo̧mȩrȩ yo̧ë cji̧dädiibëda’ quëna̧ jo̧rȩtapea̧ oa yo̧ë cji̧därëremȩdejȩrȩ Ütë tjamo̧ judi quȩ ba chiara̧ pio ju̧ri̧ra̧.

¹⁸ Ado ja̧di dari̧ japamȩrȩ chjadëri̧ dabarea̧ yürürëremȩdiibe Ütë tjamo̧ judi, jënȩ coëma cjiari̧ yo̧a̧ pio ju̧i̧ chjiari. Jabechji̧ yo̧a̧ri̧ ma̧ȩmi̧ dara̧ na̧rȩrëremȩdiibe chjadëri̧. Pearä judi yo̧ë cji̧därëremȩdiibe. Ado ju̧i̧ uëri jibëa̧ quȩ ba chiara̧ a̧de yo̧rëremȩdiibe. Tjamo̧ davä. Jibëa̧ quȩra̧ a̧de yo̧mȩrȩ yo̧ë cji̧därëremȩdiibe. Ado jabechji̧ ja̧di dari̧ japea̧ oaiä, yo̧a̧ri̧ ma̧ȩmi̧ dari̧ na̧rȩrëremȩdiibe. Jabo Ütë tjamo̧ judi jabomo̧ yo̧ë cji̧däa̧rä judi, jabechji̧täremȩde. Nö̧tatäremȩde. Jabechji̧ judi yo̧ë cji̧däa̧mi̧ japamȩ tara, jabechji̧täremȩde. Jabo danȩrȩ ca̧ pumȩ, judi yo̧ë cji̧däa̧ pio ju̧i̧ uëri a̧de yo̧rëremȩde jibëa̧ quȩ ba chiara̧. Ado pio ju̧i̧iä yo̧requededibe. Yo̧a̧ri̧ ma̧ȩmi̧ dara̧ pio ju̧ri̧ra̧ chjadëri̧ na̧rȩrëremȩdiibe jënȩ coëma cjiari̧ yo̧a̧ pio ju̧i̧ chjiari. Ado judi jibëa̧ quȩra̧ a̧de yo̧ë cji̧däa̧ oaiä, jabechji̧ ano̧ mire jo̧rȩtarea̧mi̧dëde, jabo jënȩ yo̧ë cji̧däa̧mi̧ chjadëri̧ japadäräpadiibe. Ado pio ju̧i̧iä tjamo̧ri̧ dabarea̧rȩ ca̧ oti̧. Ado tjamo̧ri̧ daba̧ oaiä, ji̧dë u̧i̧ järi tjamo̧pe bagarea̧ darea̧rȩ. Tjamo̧ davä. A̧ro̧rȩ quëna̧ji̧ri̧ pio judiro̧, Ütë tjamo̧ pio ju̧i̧ ja̧ i̧äräpȩ bagureno̧mi̧ dari̧ quëna̧ji̧ri̧ pio judiro̧ tjamo̧ri̧ daba̧ oaiä, ji̧dë u̧i̧ järi tjamo̧pe bagarea̧ darea̧rȩ. Jabechji̧ a̧ro̧rȩ pio ju̧i̧ chjiari tjamo̧i̧ cjiari̧ daba̧ oaiä ji̧dë u̧i̧ chjuari̧ mitëmi̧ dari̧ jidatarea̧ro̧jo̧ȩ Ütërë yo̧ë cji̧därërea̧ pio ju̧i̧, ‘yürüdaemȩdiibëda’ quëna̧rea̧ decjiari̧.

¹⁹ Ado a̧ro̧rȩ Ütërë yo̧ë cji̧däa̧ pio ju̧i̧ chjuari̧ quëna̧ji̧ri̧rȩ jidata̧ üdë, jabechji̧ urëdi tjamo̧ cjiamȩ tacö̧mi̧ dade ibëa̧ tjo ja̧ oa. Jabechji̧ pio jiro jidatarea̧ üdë ëba jämi̧ dari̧ japadiibe a̧dë chjäte china̧chja jo̧ tjomi̧ daräpȩ yuro, tuti märäa̧ tjomi̧ daräpȩ yuro, Ütërë cjiamȩräpȩ yuro a̧dëräpȩ ju̧ri̧.

²⁰ Peaja̧dira̧ go̧düdärärëremȩde Jechu judi peadë. Ibëa̧ yabo go̧düdärärëremȩde pio ibë chjiari goë tuti ja̧bepapea̧ oa. Jabechji̧ bucho ana̧ tjamo̧ goë tuti ja̧bepamȩpea̧de pio ibë chjiari ja̧bepapea̧ oa. Jabechji̧ Mequichede quȩmȩ pio judi ja̧bepami̧ dari̧ ja̧bepamȩpea̧de.