Ebereo Ma̧ȩ 5 - Biblia Pume

Quiricho judi nö̧tade pumȩ pio ji̧ri̧ chjiari tjamo̧ goë tuti ja̧bepapea̧ ji̧

¹ Ado yaba̧ tjamo̧ goë tuti ja̧bepaji̧ri̧ pio ji̧ri̧ chjiari ni̧bä chjaotämi̧ cjiarequededibe. Danȩrȩ, tjamo̧ goë tuti ja̧bepamȩ pio ju̧i̧ mitëa̧mi̧ nö̧ta, pumȩ pio ji̧ri̧ ja̧ chjarerä cjo̧ro̧mȩ pio ju̧i̧ mitëa̧ oa cjiarëremȩde Ütë tjamo̧ pio ju̧i̧iä. Ado mitëa̧ oa cjiarä, pumȩ pio ji̧ri̧ chjiari goë tuti ja̧bepamȩrȩ cjo̧ro̧rëremȩde Ütë tjamo̧ ja̧ dëbëmi̧ daräpȩ ju̧ri̧. Ado pio ju̧i̧iä pumȩ judiro̧ yürüpea̧ oa goa jäa̧rä, jabechji̧ yürürëremȩdejȩ Ütë tjamo̧ ju̧i̧. Ado pumȩ judiro̧ cäë yürüpea̧ pio ju̧i̧ mu̧i̧ jäa̧rä, goe gu̧rori̧ ja̧bo tänȩmȩrȩ cäë yürürëremȩde Ütë tjamo̧ pio ju̧i̧iäpȩmo̧ pumȩ judiro̧ chjai̧dëri̧ japea̧ pio ju̧i̧ chjiari.

² Ado pio jiro üi̧ üdë pumȩ tara, jabechji̧ cjäri̧ri̧ cjiamȩrȩ darëremȩdejȩrȩ o ji̧ri̧. Jabechji̧ pio judiborë ju chiadë tara, pio judiborë oëra̧diäpai̧ da tara, jabechji̧ cjäri̧ri̧ cjiamȩrȩ darëremȩdejȩrȩ na̧e chiadëji̧ri̧ pio ji̧ri̧, oëra̧diäa̧ji̧ri̧ pio ji̧ri̧.

³ Ado pio judiborë oëra̧diäpai̧ da oaiä, jabechji̧ pio jȩa chjiaribo cäë yürüpea̧ chiarëremȩde. Jabechji̧ jibëa̧ pumȩ judiro̧ chjai̧dëri̧ japea̧ pio ju̧i̧ chjiari cäë yürüa̧ pio ju̧i̧ uëri cäë yürürëremȩde pio jȩa chjiaribo.

⁴ Ado eami̧ pumȩ üdë pio jiro ja̧beparea̧ ba chia tjamo̧ oa, jabechji̧ jibëa̧ ma̧na̧ri̧ jo̧rȩtamȩrȩ mitërea̧mi̧dëde. Jabechji̧ Ütë tjamo̧ pio judi ëna̧diäa̧rämo̧ ja̧beparea̧mi̧ dade, pio judi mitëa̧rämo̧. Ado peaja̧dirëremȩde Aro̧ judi. Ütë tjamo̧ judi ëna̧diäa̧ oaiä taruparëremȩde ja̧di dari̧ ja̧bepapea̧ ji̧.

⁵ Ado peaja̧dirëremȩde Quiricho judi. Jabechji̧ jibëa̧ ma̧na̧ri̧ jo̧rȩtamȩrȩ tjamo̧ goë tuti ja̧bepamȩpe bagadëa̧de, jabo Ütë tjamo̧ pio judi mitëa̧ oaiä ja̧bepamȩpea̧de. Danȩrȩ, ja̧di ta̧rëri̧ yo̧rëremȩdejȩ Joja oa: “Aja̧, ca̧ Jarenȩ. Ado na̧ Ama̧i̧ tjamo̧requede cüdë. Ado pio yaba̧ domȩ oa, ‘ca̧ Jadida’ quëna̧ jo̧rȩtamȩrȩ yo̧requedemȩ.” Aja̧, ja̧di ta̧rëri̧ yo̧rëremȩdejȩ Joja oa Ütë tjamo̧ judi.

⁶ Ado pio yoa ma̧ȩbo a̧de yo̧rëremȩdejȩ: “O ji̧ri̧ chjiari tjamo̧ goë tuti ja̧bepamȩrȩ ja̧bapaparenȩ bucho ana̧, Mequichede quȩmȩ pio judi ja̧bepami̧ dari̧." Aja̧, ja̧di ta̧rëri̧ yo̧rëremȩdejȩ Joja oa peaja̧di.

⁷ Ado Jechu judi pio yoa chirirä cjo̧ro̧a̧ nö̧ta, ji̧dë ma goë cjo̧dërëremȩdejȩ jibëa̧ Ama̧i̧ pio ju̧i̧iä. To̧bari̧ yo̧mȩrȩ, ejaro cjiamȩrȩ ni̧bärëremȩdejȩ tuti japamȩ pio ju̧i̧iä jënȩ ja̧bochea oa. Ado jibëa̧ Ama̧i̧ ju̧i̧iäpȩmo̧ ba chia jo̧rȩtamȩrȩ ta̧rëdiäa̧ oaiä, jabechji̧ ta̧rë ja̧borëremȩdejȩ.

⁸ Jabechji̧ Ütë tjamo̧ ja̧ Jojamȩborë, jibëa̧ Ama̧i̧ ju̧i̧ ta̧rëdiäpea̧ ji̧ dabaparëremȩde jënȩ chjai̧dë oa chjätäa̧ pio ju̧i̧iä.

⁹ Ado jibëa̧ Ama̧i̧ pio ju̧i̧ nö̧tadäräri̧ ta̧rëdiäa̧ oaiä, jabechji̧ nö̧tamȩpea̧de goarijädëmȩ chjätärea̧ pio ju̧i̧ yürüpea̧ oa pio jȩa ta̧rëdiäji̧ri̧ ütëbodärä oa.

¹⁰ Jabechji̧ Ütë tjamo̧ judi Jechu pio ju̧i̧ mitërëremȩdejȩ. Aja̧, Mequichede quȩmȩ pio judimi̧ dari̧ ja̧bepapea̧ oa, tjamo̧ goë tuti ja̧bepamȩrȩ ja̧bepapea̧ oa, mitërëremȩdejȩ.

Ade cjiami̧ dari̧ cjo̧ro̧dëtäreji̧ri̧rea̧rȩ, jabo go̧a̧ choco oa jurami̧ dari̧ cjo̧ro̧täreji̧ri̧rea̧rȩ

¹¹ Danȩrȩ ca̧ oti̧, jabë pjärämȩde. Ma̧ȩ ji̧ra̧ tjamo̧ oa a̧de yürütämi̧ cjiarequededibe Jechu pio ju̧i̧ chjiari, judi Mequichede quȩmȩ pio judimi̧ dari̧ goë tuti ja̧bepapea̧ pio ju̧i̧ chjiari. Jabo chjao tjamo̧de pio dibë chjadëri̧ dabapa tänȩpea̧ ji̧. Jabechji̧ dibëa̧ chji̧ra̧ acji cjaeä ta̧rëdënȩrȩ. Birë jämi̧ dari̧ jo̧rȩtatärea̧ ji̧, ta̧ra̧ puë cotomi̧ dari̧ cjianȩrȩ.

¹² Danȩrȩ no̧mȩ tjamo̧ri ja̧ quëna̧ji̧ri̧pea̧nȩrȩ mȩnȩro̧. Ado Ütë tjamo̧ ja̧ ma̧ȩ oa a̧ra̧ano̧ji̧ri̧pe baga̧täreji̧ri̧nȩrȩ peadë. Jabo cjäri̧ manȩrȩ, o judiro̧ ado chjereno̧ carupë a̧ra̧ano̧pea̧ chiadiro̧dibe taruparea̧ ma̧ȩ pio ju̧i̧, yö̧cö̧mi̧ da ma̧ȩ pio ju̧i̧. Jabechji̧ go̧a̧ chocomi̧ da ma̧ȩ oa dabapatärea̧ ji̧, jabechji̧ yö̧cö̧mi̧ da ma̧ȩ maea oa ado chjereno̧ dabapapea̧ chianȩrȩ.

¹³ Danȩrȩ, yö̧cö̧mi̧ da ma̧ȩ maea oa dabapaji̧ri̧ judiro̧, jabechji̧ na̧e chia tjamo̧dëdirȩ. Jabë pjärämȩdirȩ. Ütë tjamo̧ ja̧ ma̧ȩ o oamo̧i̧ oa dabapea̧dirȩ, ji̧ra̧dë oa. Chjadë pio ju̧i̧mo̧i̧ mitëpea̧ ji̧ jabë pjärämȩde. Dabadëdirȩ. Coëma cjiari̧ cjo̧ro̧pea̧ ji̧ tjamo̧ri̧ dabadëdirȩ. Ado Ütë tjamo̧ ja̧ ma̧ȩ oa dabadë oaiä na̧e chiadë madirȩ. Jabechji̧ bori̧mi̧ dadirȩ jibëa̧ tjoro. Pea nö̧ria̧ oa cjiaji̧ri̧mi̧ dadirȩ.

¹⁴ Jabo üi̧padäräa̧ oa cjiami̧ dari̧ cjiaji̧ri̧ pio judiro̧, jabechji̧ go̧a̧ chocomi̧ da a̧ra̧ano̧rea̧ ma̧ȩ oa jurami̧ dari̧ cjo̧ro̧dirȩ. Ado pio judiro̧ na̧ȩ chia tjamo̧pe jädirȩ davä Ütë tjamo̧ ja̧ ma̧ȩ pio ju̧i̧iä. Urëdi tjamo̧ oa jo̧rȩtarea̧ dadirȩ Ütë tjamo̧ ja̧ ma̧ȩ pio ju̧i̧iä. Ado pio ju̧i̧iä dabadirȩ chjadë pio ju̧i̧ mitëpea̧ ji̧. Ado dabadirȩ peaja̧di chjai̧dë pio ju̧i̧ jiadapea̧ ji̧. Jabechji̧ chjadëri̧ ütarë jo̧rȩtarea̧ chiadirȩ.