Ebereo Ma̧ȩ 4 - Biblia Pume

A̧ro̧rȩ quëna̧dërä judi, Ütë tjamo̧ judi yürüa̧ järätä chjaparea̧räpȩ yu̧a̧rea̧ dadëparea̧rȩ

¹ Ado danȩrȩ ca̧ oti̧, järätä chjaparea̧räpȩ yu̧a̧pea̧ ma̧ȩ üdë pio ibëa̧bode. Tjamo̧ davä. Ütë tjamo̧ judi Icharai pio judiri ja̧ji̧ri̧ pio ji̧ri̧iäpȩmo̧ järätä chjaparea̧räpȩ yu̧a̧pea̧ pio ju̧i̧ chjiari yo̧ë cji̧därërea̧ ma̧ȩ üdë, pio yaba̧ domȩ oa cjo̧ro̧ji̧ri̧ pio ji̧ri̧ ja̧bode. Jabechji̧ pio a̧ro̧rȩborë yu̧a̧pai̧ darea̧rȩ. Pio a̧ro̧rȩborë yu̧a̧pai̧ darea̧rȩ järätä chjaparea̧räpȩ. Jabechji̧ ma̧ chjupi̧ cjiari̧ jo̧rȩtarea̧räpȩ yu̧a̧pea̧ pio ju̧i̧ chjiari yo̧ë cji̧däa̧ ma̧ȩ üdë, jabechji̧ pio yaba̧ domȩ oa cjo̧ro̧ji̧ri̧ pio ji̧ri̧ ja̧bode. Tjamo̧ davä ca̧ oti̧, ibëa̧bode. Ado pio ju̧i̧iä a̧ro̧rȩ ütëbodärärë uapaji̧ri̧rȩ na̧e chia tjamo̧täreji̧ri̧rea̧rȩ yu̧a̧pea̧ ji̧, a̧ro̧rȩ orë yu̧a̧rea̧ dadëchea oa.

² Jabechji̧ pio a̧ro̧rȩ ma̧ȩ chjadëi̧ oa ta̧rëa̧mi̧ ta̧rërëreji̧ri̧dirȩ peaja̧di ibëa̧ ütëti̧rea̧ judiro̧. Tjamo̧ davä. Pio a̧ro̧rȩ järätä chjaparea̧räpȩ yu̧a̧pea̧ pio ju̧i̧ chjiari ma̧ȩ chjadëi̧ oa ta̧rëa̧mi̧ ta̧rërëreji̧ri̧dirȩ peaja̧di. Jabo cjäri̧ madirȩ, quëna̧dëa̧diro̧jo̧ȩ. Jabechji̧ judiro̧ ta̧rë ëte quëna̧tärea̧ ji̧, quëna̧dëa̧diro̧jo̧ȩ. Ado pio ju̧i̧iä a̧dodëa̧dejȩrȩ.

³ Jabechji̧ quëna̧ji̧ri̧ pio ji̧ri̧mo̧i̧ a̧dodejȩrȩ ma̧ȩ chjadëi̧ üdë. Ado pio ju̧i̧iä yo̧requededibe. Quëna̧ji̧ri̧ pio judiro̧mo̧dirȩ ma̧ chjupi̧ cjiari̧ jo̧rȩtarea̧räpȩ yu̧a̧rea̧mi̧ daji̧ri̧ judiro̧. Tjamo̧ davä. Quëna̧ji̧ri̧ pio judiro̧mo̧dirȩ Ütërë yürüa̧ järätä chjaparea̧räpȩ yu̧a̧rea̧mi̧ daji̧ri̧ judiro̧. Jabo quëna̧dëji̧ri̧ pio judiro̧ yu̧a̧rea̧mi̧dëdirȩ. Ado pio ju̧i̧iä ja̧di ta̧rëri̧ yo̧rëremȩde Ütë tjamo̧ judi quëna̧dëji̧ri̧ pio ji̧ri̧ chjiari: “Aja̧, ërecjiamȩrȩ uapai̧ ta̧rëri̧ yo̧ë cji̧däa̧requede pio ji̧ri̧ chjiari. Jabechji̧ judiro̧ yu̧a̧tärea̧ ji̧, cüdë jëdano̧a̧ järätä chjaparea̧räpȩ chjadëri̧ yu̧a̧tärea̧ ji̧, yu̧a̧ tänȩdëparequedejȩrȩ bucho ana̧.” Aja̧ ca̧ oti̧, ja̧di ta̧rëri̧ yo̧rëremȩde Ütë tjamo̧ judi yu̧a̧rea̧ dadërëreji̧ri̧ pio ji̧ri̧ chjiari. Jabechji̧ yu̧a̧rea̧ dadërëreji̧ri̧dirȩ. Ütë tjamo̧ judi järätä chjaparea̧räpȩ peadëri ja̧ jëdano̧a̧ oa goa̧räbo, judi chjö̧na̧i̧ oa pareapadäräa̧ pio judiri yurori chjadëri̧ jëdano̧a̧ oa goa̧räbo, jabechji̧ yu̧a̧rea̧ dadërëreji̧ri̧dirȩ. Ma̧ chjupi̧ cjiari̧ jo̧rȩtarea̧räpȩ yu̧a̧rea̧ dadërëreji̧ri̧dirȩ.

⁴ Tjamo̧ davä. Peadëri ja̧ jëdano̧a̧ oa goarëremȩdejȩ Ütë tjamo̧ judi järätä chjaparea̧räpȩ. Pio ju̧i̧ tjamo̧ri̧ dabarea̧rȩ ma̧ȩ pio ju̧i̧iä. Jabechji̧ ta̧rëchji̧vä Moiche judi go̧ȩparërea̧ pio ju̧i̧ cjiadiärea̧ do pio ju̧i̧ chjiari, järätä chjaparea̧ do pio ju̧i̧ chjiari: “Cjiadiärea̧ doro Ütë tjamo̧ judi järätä chjapami̧ dari̧ cjiadiärëremȩde järätä chjaparea̧räpȩ ju̧ri̧, chjö̧na̧i̧ oa pareapadärä ëte.” Aja̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë.

⁵ Ado yaba̧ ado chjereno̧ jo̧rȩta tänȩtämi̧ cjiarequededibe Ütë tjamo̧ ja̧ ma̧ȩ oa, cüdë dibë pio yabo yo̧a̧rea̧ ma̧ȩ pio ju̧i̧. Danȩrȩ ja̧di ta̧rëri̧ baäde: “Cüdë jëdano̧a̧ järätä chjaparea̧räpȩ yu̧a̧rea̧ yürüdëparequedejȩrȩ bucho ana̧.” Aja̧ ca̧ pumȩ, ja̧di ta̧rëri̧ yo̧diibe ma̧ȩ üdë järätä chjaparea̧räpȩ yu̧a̧rea̧ dadëreji̧ri̧ pio ji̧ri̧ chjiari.

⁶ Ado danȩrȩ ca̧ pumȩ, pio jiro ma̧ȩ oa ta̧rë oaiä, tjamo̧ri̧ dabarea̧rȩ Ütë tjamo̧ judi jëdano̧a̧ järätä chjaparea̧räpȩ pio ju̧i̧ chjiari. Jabechji̧ pearä judirä jëdano̧a̧ oa goarëremȩdejȩ pumȩ pio judiro̧ yu̧a̧rea̧ dapea̧ oa. Ado pio ju̧i̧ chjiari ma̧ȩ chjadëi̧ oa yürürëremȩdejȩrȩ no̧mȩri ja̧ cjo̧ro̧rëreji̧ri̧ ji̧ri̧, ibëa̧ ütëti̧rea̧ pio ji̧ri̧. Jabechji̧ pumȩ ji̧ri̧ järätä chjaparea̧räpȩ yu̧a̧tä ea tjamo̧rëremȩdejȩrȩ. Jabo cjäri̧ madirȩ, pio jiro ma̧ȩ oa quëna̧tärea̧ ji̧, quëna̧dëa̧dirȩ jabo jiadarëreji̧ri̧diro̧jo̧ȩ. Ado pio ju̧i̧iä yu̧a̧rea̧ yürüdërëremȩdejȩrȩ Ütë tjamo̧ judi. Jabo danȩrȩ, judiro̧ pio jiro ma̧ȩ chjadëi̧ oa jiada̧räbo, judiro̧ yu̧a̧rea̧ dadëa̧räbo, jabechji̧ ji̧dë duri oa cjo̧ro̧paji̧ri̧ pumȩ pio judiro̧ yu̧a̧pai̧ dadirȩ orë. Tjamo̧ davä. Ma̧ chjupi̧ cjiari̧ jo̧rȩtarea̧räpȩ yu̧a̧rea̧ dapai̧ dadirȩ.

⁷ Pio ju̧i̧ tjamo̧ri̧ dabarea̧rȩ Ütë tjamo̧ ja̧ ma̧ȩ pio ju̧i̧iä. ‘Jabechji̧ ado cja̧rȩmo̧ doro yu̧a̧rea̧ dapadiro̧da’ quëna̧ jo̧rȩtamȩrȩ jabërä yo̧rëremȩde Ütë tjamo̧ judi pio yaba̧ domȩ oa yu̧a̧pea̧ pio ju̧i̧ chjiari. Jabechji̧ pio yaba̧ domȩ do üdë yu̧a̧pea̧ dode. Aja̧, järätä chjaparea̧räpȩ yu̧a̧pea̧ do üdë pio yaba̧ domȩ dode. Jabechji̧ pio jiro ma̧ȩ oa yürürëremȩdiibe Ütë tjamo̧ judi no̧mȩ tjamo̧ri ja̧ Davi quȩmȩrea̧ pio ju̧i̧iä. Jabechji̧ jabë cjo̧ro̧dërëreji̧ri̧ ja̧ oa jabërä go̧ȩparëremȩde pio judiro̧ järätä chjaparerea̧räpȩ yu̧a̧dëchea. Ja̧di ta̧rëri̧ yo̧mȩrȩ yo̧rëremȩde. Ta̧rëchji̧vä: “Aja̧, mȩnȩro̧ pio yaba̧ domȩ oa Ütë tjamo̧ ja̧ ma̧ȩ oa ta̧rërä, chjuari̧ jiadadëchji̧jo̧ȩ.” Aja̧, ja̧di ta̧rëri̧ yo̧rëremȩde Ütë tjamo̧ judi Davi pio ju̧i̧rea̧ ja̧ ya pio ju̧i̧iä, pumȩ judiro̧ jënȩ yürüa̧ järätä chjaparea̧räpȩ yu̧a̧dëchea oa. Ado pio ju̧i̧iä jiadadë matäreji̧ri̧rea̧rȩ.

⁸ Ado danȩrȩ ca̧ pumȩ, Ütë tjamo̧ judi järätä chjaparea̧räpȩ yu̧a̧pea̧ pio ju̧i̧ chjiari pearä yo̧rërea̧ ji̧, jabechji̧ Canaa̧ quȩmȩ chiri pio ju̧i̧ chjiari tjamo̧ri̧ ni̧bädërëremȩde. Jabo dëdë, Jochuerea̧ judi ibëa̧ ütëti̧rea̧ pio ji̧ri̧ pio jiro chiriräpȩ ëba baäa̧rä, jabechji̧ järätä chjaparea̧ darëreji̧ri̧dirȩ jënȩro̧ oëra̧ti̧ oa chjätäti̧ cjia̧rërea̧ ji̧. Jabo cjäri̧ madejȩrȩ jabo, järätä chjaparea̧ tjamo̧räpȩ ëba baädërëremȩdejȩrȩ. Jabechji̧ judi järätä chjaparea̧räpȩ tjamo̧ri̧ ëba baäa̧rä judi, ado cja̧rȩmo̧ pio ju̧i̧ chjiari ma̧ȩ yürüdëa̧täremȩde Ütë tjamo̧ judi. Jabo dëdë, ado cja̧rȩmo̧ ma̧ȩ oa yürürëremȩde ado cja̧rȩmo̧ järätä chjaparea̧ pio ju̧i̧ chjiari, ji̧dë duri oa ma̧na̧pea̧ pio ju̧i̧ chjiari.

⁹ Ado pio ju̧i̧iä a̧ro̧rȩ, Ütë tjamo̧ ja̧ pumȩ pio judiro̧, jabechji̧ yu̧a̧pai̧ darea̧rȩ. Tjamo̧ davä. Järätä chjaparea̧räpȩ yu̧a̧pai̧ darea̧rȩ. Jabechji̧ pio a̧ro̧rȩ yu̧a̧pea̧ oa jëdano̧a̧ oa cjiarëremȩde. Ado pio ju̧i̧iä yu̧a̧tä eadiibe Ütë tjamo̧ judi. Judi cjiadiärea̧ doro järätä chjapami̧ dari̧ cjiadiärërea̧mi̧ järätä chjapatä eadiibe. Tjamo̧ davä. Pio judi chjö̧na̧i̧ oa pareapea̧ duri oa cjiadiäa̧rä järätä chjapami̧ dari̧ cjiadiärërea̧mi̧ järätä chjapatä eadiibe.

¹⁰ Jabechji̧ Ütë tjamo̧ ja̧ järätä chjaparea̧räpȩ yu̧a̧ji̧ri̧ pio judiro̧, ja̧bepë ano̧mi̧ dari̧ cjiadiäpadirȩ Ütë tjamo̧ pio judimi̧ dari̧. Danȩrȩ, Ütë tjamo̧ judi chjö̧na̧i̧därä oa pareapa ëte, jabechji̧ ja̧bepë ano̧mi̧ dari̧ cjiadiärëremȩde, järätä chjapami̧ dari̧ cjiamȩrȩ. Ado peaja̧dimi̧ dari̧ cjiaparea̧rȩ yu̧a̧paji̧ri̧ pio judiro̧. Jabechji̧ järätä chjapami̧ dari̧ cjo̧ro̧parea̧rȩ cjiadiäa̧mi̧ tarari̧ jo̧rȩtaji̧ri̧rȩ, ma̧ chjupi̧ cjiari̧ jo̧rȩtaji̧ri̧rȩ.

¹¹ Ado pio ju̧i̧iä ca̧ oti̧, a̧ro̧rȩ nö̧tarä yuro järi tjamo̧täreji̧ri̧rea̧rȩ a̧ro̧rȩ Ütë ja̧ järätä chjaparea̧räpȩ chjadëri̧ yu̧a̧pea̧ ji̧. Jabechji̧ na̧e chia tjamo̧pea̧ chiarea̧rȩ a̧ro̧rȩ ütëborë Ütë tjamo̧ pio ju̧i̧ ta̧rëdiädëchea oa, a̧ro̧rȩ yu̧a̧rea̧ dadëchea oa, a̧ro̧rȩ ibëa̧ ütëti̧rea̧ pio ji̧ri̧ cho̧rëdiächea oa.

¹² Jabechji̧ Ütë tjamo̧ ja̧ ma̧ȩ üdë jauëchjade. Cjo̧ro̧rea̧ chiami̧ dade. Ana̧ tjamo̧mi̧ dari̧ ja̧bepade. Ado a̧dë chjäte gaipa tjamo̧mi̧ dade. Jabechji̧ dëbëribo jo̧dë chiamȩ tjapënȩ jujuai̧ pio ju̧i̧ u̧i̧ gaipami̧ dade. Ado gaipa tjamo̧mi̧ darë urëdi tjamo̧ oa guami̧ dari̧ ütaradiibe ibëa̧ chji̧ oa, ibëa̧ tjo oa, a̧ro̧rȩ goadi jo̧rȩtarea̧ decjiari̧. Na̧e chia tjamo̧mi̧ dari̧ daba tjamo̧de davä a̧ro̧rȩ tjamo̧ri̧ jo̧rȩta̧ pio ju̧i̧, a̧ro̧rȩ tjamo̧ri̧ ea̧ pio ju̧i̧, a̧ro̧rȩ tjamo̧ri̧ japatämi̧ cjia̧ pio ju̧i̧ chjiari̧. Jabechji̧ chjadë maearä areia̧ oa cjiami̧ dari̧ cjiaji̧ri̧ oa ütarë dami̧ dari̧ japadiibe Ütë tjamo̧ ja̧ ma̧ȩ üdë, a̧ro̧rȩ tjamo̧ri̧ goadirea̧mi̧dëri̧.

¹³ Jabechji̧ goadirea̧ decjiade Ütë tjamo̧ pio ju̧i̧iä. Jënȩ pareapea̧ üdë goadirea̧mi̧dë maeade. Ju̧i̧ ja̧ dachoro cjo̧ro̧ marea̧rȩ chäteji̧ri̧mi̧ dari̧. Ado Ütë tjamo̧ pio ju̧i̧ ja̧ dëbëräpȩ cjiadäräparea̧rȩ chjö̧na̧i̧ oa chjadëri̧ dëbë yo̧pea̧ oa, judi ibë iëno̧ iëno̧ cjiarä. Tjamo̧ davä. A̧ro̧rȩ japea̧ pio ju̧i̧ chjiari, a̧ro̧rȩ goaditea̧ pio ju̧i̧ chjiari, a̧ro̧rȩ jo̧rȩta̧ pio ju̧i̧ chjiari dëbë yo̧pea̧ chiarea̧ro̧jo̧ȩ, judi ibë iëno̧ iëno̧ cjiarä.

Quiricho judi pio ibë chjiari tjamo̧ goë tuti ja̧bepamȩ pio judide

¹⁴ Ado pio ju̧i̧iä ca̧ oti̧ chjuari̧ mitëmi̧ dari̧ quëna̧täro̧jo̧ȩ a̧ro̧rȩ dabapea̧ ma̧ȩ oa, mitë ano̧mi̧ dari̧ japarea̧ decjiari̧. Jabechji̧ ëbarea̧ro̧jo̧ȩ ibë chjiari tjamo̧ goë tuti ja̧bepamȩ pio ju̧i̧. A̧dë chjäte ba chiade. Ütë tjamo̧ pio ju̧i̧ ja̧ Joja pio judide. Jechu pio judide. Ado a̧dëräpȩ baärëremȩde pio ibë chjiari goë tuti ja̧bepapea̧ oa. Ado pio ju̧i̧ chjuari̧ idami̧ dari̧ jo̧rȩtatäreji̧ri̧rea̧ro̧jo̧ȩ, quëna̧dëpe bagarea̧ decjiari̧.

¹⁵ Jabechji̧ ibë chjiari tjamo̧ goë tuti ja̧bepamȩ judi tjamo̧ri̧ dabade pio ibë chjiari. Ado pio ju̧i̧iä cjäri̧ri̧ cjiamȩrȩ dadiibe ju chiadëji̧ri̧ oa, ibë ju chiarea̧ yürütämi̧ cjiamȩrȩ. Jabechji̧ Ichiaerë chjai̧dëri̧ japa tänȩta̧ chja̧oerä cjiamȩborë cja̧rȩmȩ co chjai̧dëri̧ japadëmȩrȩ daba dadiibe a̧ro̧rȩ u̧i̧pea̧ oa cjiapai̧ daji̧ri̧ oa, ibë a̧dotämi̧ cjiamȩrȩ. Ado ma̧i̧ da chjai̧dë oa chjätärëremȩrȩ peaja̧di daba dae chjaodiibe chjai̧dëri̧ chjätäji̧ri̧ oa, ibë cjäri̧ri̧ cjia damȩrȩ. Jabechji̧ a̧ro̧rȩ chjai̧dë oa chjätärä, ‘cjäri̧ madida, ibë chjiari tjamo̧ri̧ dabarea̧mi̧dëdida, pio ibë tjamo̧ri̧ a̧dorea̧mi̧dëdiibëda’ quëna̧rea̧mi̧dëde. Jabechji̧ ibë chjiari tjamo̧ri̧ dabamȩrȩ daba dadiibe yaba̧, ibë tjamo̧ri̧ a̧dotämi̧ cjiamȩrȩ.

¹⁶ Ado pio ju̧i̧iä uapadëji̧ri̧rȩ ni̧bätäreji̧ri̧rea̧ro̧jo̧ȩ Ütë tjamo̧ ju̧i̧, a̧dëräpȩmȩ oa. Jabechji̧ cjäri̧ri̧ cjiamȩrȩ dadiibe. Ado cjäri̧ri̧ cjiamȩrȩ chjadëri̧ a̧dopadiibe a̧ro̧rȩ cjo̧dëa̧mi̧. Tjamo̧ davä. A̧ro̧rȩ ju chiadërä judi, a̧ro̧rȩ oëra̧diäpai̧ darä judi, a̧ro̧rȩ järidëpe bagapai̧ darä judi, a̧ro̧rȩ gitori̧ jo̧rȩtapai̧ darä judi, jabechji̧ pio ju̧i̧iä cjo̧dëpea̧de, judi ibë chjadëri̧ a̧dopea̧ oa.