Ebereo Ma̧ȩ 3 - Biblia Pume

Jechu judi Moiche ju̧i̧ u̧i̧ ba chiade

¹ Ja̧di tara ca̧ oti̧, a̧ro̧rȩ Ütë tjamo̧ ja̧ oa china̧chjari̧ tutia̧ oa cjia tara, a̧ro̧rȩ a̧dëräpȩ baäpea̧ ji̧ ji̧mo̧ ëna̧diäa̧ oa cjia tara, jabechji̧ urëdi tjamo̧ oa jo̧rȩtatäreji̧ri̧rea̧ro̧jo̧ȩ Jechu pio ju̧i̧. Jabechji̧ Ütërë chjadüa̧ oa cjiadiibe Jechu judi. Ado pio ju̧i̧ tjamo̧ri̧ quëna̧ji̧ri̧pea̧rea̧ro̧jo̧ȩ. Tjamo̧ davä. Pio ibë chjiari ja̧bepamȩ pio ju̧i̧, Ütë tjamo̧ ja̧ dëbëräpȩ goë tuti ja̧bepamȩ pio ju̧i̧ tjamo̧ri̧ quëna̧ji̧ri̧pea̧rea̧ro̧jo̧ȩ.

² Jabechji̧ Ütërë yo̧a̧mi̧ chjadëri̧ ta̧rëdiärëremȩdejȩ Jechu judi. Aja̧, pio jȩa mitëa̧mȩ pio ju̧i̧ chjadëri̧ ta̧rëdiäa̧dejȩ, Moicherë ta̧rëdiärërea̧mi̧. Danȩrȩ, eami̧ bëräpȩ ju̧ri̧, jabechji̧ ja̧bepadirȩ mu̧i̧tjoi̧ judiro̧ bë ano̧mȩ pio ju̧i̧ ja̧ oa. Jabechji̧ bë ano̧mȩ pio judi ütarë yo̧a̧mi̧ japa maeadirȩ. Ado peaja̧dimi̧ dari̧ ja̧beparëremȩde Moiche judi Ütë tjamo̧ pio ju̧i̧ ja̧ bëmi̧ darä. Jabechji̧ pumȩ pio ji̧ri̧ chjadëri̧ jidamȩrȩ ja̧beparëremȩde, Ütë pio judi ütarë yo̧a̧mi̧.

³ Ado danȩrȩ ca̧ pumȩ, dabarea̧rȩ bë cji̧dämȩ pio ju̧i̧ chjiari. Jabechji̧ eami̧ pumȩ üdë bë boi̧dë tjamo̧ oa cji̧därä judi, bë chjacjiamȩ tjamo̧ oa cji̧därä judi, jabechji̧ bë pio ju̧i̧ chacjiamȩri̧ ni̧bädëpadiro̧jo̧ȩ pumȩ judiro̧. Tjamo̧ davä. Pio ju̧i̧ chjacjiamȩri̧ ni̧bädëpadiro̧jo̧ȩ jabo bë cji̧däa̧mȩ pio ju̧i̧iäpȩmo̧ ma chjacjiamȩri̧ ni̧bäpadiro̧jo̧ȩ. Jabechji̧ bë cji̧dämȩ pio judi bë pio ju̧i̧iä ji̧dë u̧i̧ ba chiade. Pio ju̧i̧ tjamo̧ri̧ dabarea̧rȩ. Ado danȩrȩ, Jechu judi Ütë tjamo̧ ja̧ bë oa cji̧dämi̧ dari̧ japea̧ tara, Ütë tjamo̧ ja̧ bëmi̧ da üdë Jechu pio ju̧i̧iä tarupea̧ tara, jabechji̧ Moiche pio ju̧i̧iä ji̧dë u̧i̧ ba chiade.

⁴ Jabechji̧ eami̧ bë üdë jibëa̧ ma̧na̧ri̧ cjitëdë made jabo bë cji̧dämȩ pio ju̧i̧iämo̧i̧ cjitëde. Ado peaja̧dide Ütë tjamo̧ ja̧ bëmi̧ da pio ju̧i̧iä. Jabechji̧ Ütë tjamo̧ pio ju̧i̧iämo̧i̧ cjitëa̧ oa cjiami̧ dari̧ cjiade. Jabechji̧ Ütë tjamo̧ pio judi tjamo̧de bë cji̧dämȩ judi. Jabechji̧ pio ju̧i̧iämo̧i̧ cjitëde chjö̧na̧i̧rȩ. Pio ju̧i̧iämo̧i̧ tarupade chjö̧na̧i̧rȩ.

⁵ Ado Moiche judi, dëdë, chjadëri̧ ja̧beparëremȩde Ütë tjamo̧ ja̧ bëmi̧ darä. Jabechji̧ Ütërë yo̧a̧mi̧ chjadëri̧ ja̧beparëremȩde, Ütë tjamo̧ pio ju̧i̧ ja̧ pumȩ ji̧ri̧ jidamȩrȩ. Jabo danȩrȩ ca̧ pumȩ, judi chjadëri̧ ja̧bepamȩborë, jabomo̧ mu̧i̧tjoi̧mȩrȩ ja̧beparëremȩde. Ado judi ja̧beparërea̧ üdë, jabomo̧ na̧rȩrea̧rëremȩde. Jabechji̧ Ütë tjamo̧ judi ibë ji̧dë duri oa chjadëri̧ dabarea̧ yürübëmi̧, Moicherë ja̧beparërea̧ pio ju̧i̧ chjiari chjadëri̧ dabarea̧ yürübëmi̧ jabërä ja̧beparëremȩde Moiche judi chja̧oemi̧ da oa, na̧rȩrea̧ maea oa.

⁶ Jabo Quiricho judi, cjäri̧ made, jabomo̧ mu̧i̧tjoi̧dëde jabo Ütë tjamo̧ pio ju̧i̧ ja̧ Joja pio judide. Ado judi, jabechji̧ Ütërë yo̧a̧mi̧ chjadëri̧ jidarëremȩde Ütë tjamo̧ ja̧ bëmi̧ da pio ji̧ri̧. Jabechji̧ bëmi̧ da pio ji̧ri̧ tjamo̧ jidamȩ pio judide. Ado danȩrȩ, ¿chjia tjamo̧dirȩ Ütë tjamo̧ ja̧ bëmi̧ da judiro̧? Chjiadëdirȩ, jabechji̧ pio a̧ro̧rȩrea̧rȩ. Jabechji̧ a̧ro̧rȩ ji̧dë ma chjuari̧ quëna̧rä judi, a̧ro̧rȩ Quiricho pio ju̧i̧ ma̧ chiadëri̧ cjiaji̧ri̧rȩ jidatarä judi, pio ju̧i̧ chjuari̧ jidataji̧ri̧rȩ cjo̧ro̧rä judi, dëdë, Ütë tjamo̧ ja̧ bëmi̧ darea̧rȩ.

Järätä chjaparea̧ oa yürüdiibe Ütë tjamo̧ judi

⁷ Pio ju̧i̧iä pio yoa ma̧ȩ oa ta̧rë ja̧botäreji̧ri̧rea̧rȩ, Tjo tjamo̧rȩ yürürërea̧ ma̧ȩ pio ju̧i̧. Ta̧rëchji̧vä: “Mȩnȩro̧ pio yaba̧ domȩ oa Ütë tjamo̧ ja̧ ma̧ȩ oa ta̧rërä,

⁸ jabechji̧ chjuari̧ jiadadëchji̧jo̧ȩ. Icharai pio judiriji̧ri̧ judiro̧ jiadarërea̧mi̧ jiadadëchji̧jo̧ȩ. Jabechji̧ judiro̧ chiri tjo maräpȩ chjätäti̧ cjiarërea̧ ji̧, ji̧dë ma dëbëpe chjaorëreji̧ri̧diro̧jo̧ȩ Ütë tjamo̧ ju̧i̧, pio ju̧i̧ ütaraji̧ri̧mi̧ dari̧. ‘Aja̧, ¿napai̧rä yuro cjäri̧ri̧ cjia dapadiibëda, a̧ro̧rȩ chjai̧dë oa jape chjaoji̧ri̧ oa, ¿napai̧rä yuro cjäri̧ri̧ cjia dapadiibëda, eami̧ oa japadaemȩ jirodiibëda’ quëna̧ jo̧rȩtaji̧ri̧rȩ dëbëpe chjaorëreji̧ri̧diro̧jo̧ȩ.

⁹ Ado pio ju̧i̧iä ja̧di ta̧rëri̧ yo̧de Ütë tjamo̧ judi: “Aja̧, ja̧di dari̧ japaji̧ri̧rȩ ütarami̧ dari̧ jape chjaorëreji̧ri̧diro̧coe. Jabechji̧ dibëa̧ ütëti̧rea̧ judiro̧ 40 ui nö̧ta irä dae chjaoa̧räbo, cüdë jauëchja cjiari̧ na̧rȩ chjaoa̧ pio ju̧i̧ irä daea̧räbo, jabechji̧ chjaocjiami̧ dari̧ dëbëpe chjaorëreji̧ri̧diro̧coe, ‘a̧ro̧rȩ jiada̧ oaiä ütarami̧ dari̧ japatäreji̧ri̧a̧ro̧ju̧i̧da’ quëna̧ jo̧rȩtaji̧ri̧rȩ.

¹⁰ Ado pio ju̧i̧iä ërecjiapea̧requedejȩrȩ pio jiro pumȩ ji̧ri̧. Ado ërecjiape bagamȩrȩ ja̧di ta̧rëri̧ yo̧rëremȩrequede pio ji̧ri̧ chjiari: “Ji̧dë ma oëra̧diädirȩ jibëa̧ chji̧rä, pio coa putu jura̧ a̧dë chami̧ dari̧. Ji̧dë ma jiadadiro̧coe, ca̧ no̧ro tai̧dëri̧ cjiaji̧ri̧mi̧ dari̧.

¹¹ Ado pio ju̧i̧iä jabechji̧, uapai̧ ta̧rëri̧ yo̧ë cji̧därequede pio ji̧ri̧ chjiari. Aja̧, judiro̧ yu̧a̧tärea̧ ji̧, cüdë jëdano̧a̧ järätä chjaparea̧räpȩ chjadëri̧ yu̧a̧tärea̧ ji̧, jabechji̧ yu̧a̧ tänȩdëparequedejȩrȩ bucho ana̧.” Aja̧, ja̧di ta̧rëri̧ yo̧mȩrȩ yo̧rëremȩde Ütë tjamo̧ judi Icharai pio judiri ja̧ji̧ri̧ pio ji̧ri̧ chjiari.

¹² Ado pio ju̧i̧iä yo̧requededibe ca̧ oti̧. Jabechji̧ uapaji̧ri̧rȩ na̧e chia tjamo̧chji̧vä mȩnȩro̧ chjai̧dëri̧ jo̧rȩtachea oa, mȩnȩro̧ Ütë tjamo̧ pio ju̧i̧ quëna̧dëri̧ cjiamȩ chji̧ra̧ jo̧rȩtachea oa. Jabechji̧ dibëa̧ chji̧ üdë chjaodëri̧ a̧dë jo̧rȩta tänȩpai̧ dadidibe yuropadëmȩ Ütë pio ju̧i̧, putu jura̧ a̧dë chami̧ dari̧.

¹³ Ado pio ju̧i̧iä yo̧requededibe. Doti̧mi̧ chi̧dëeachji̧vä dibëa̧ dëbëti̧ra̧ chia, chi̧dëeadëpe bagarea̧ decjiari̧. Jabë chi̧dëearea̧mi̧ darä chi̧dëeachji̧vä. Jabechji̧ mȩnȩro̧ chjai̧dëra̧ pio ju̧ri̧ra̧ u̧i̧pea̧ oa cjiachea oa, dibëa̧ chji̧ üdë dabu chjuami̧ dari̧ jo̧rȩtachea oa, mȩnȩro̧ Ütë tjamo̧ pio ju̧i̧ chjuari̧ jiadachea oa, jabechji̧ chjadëri̧ chi̧dëeachji̧vä.

¹⁴ Jabechji̧ a̧ro̧rȩ ja̧boa̧rä yuro Ütë tjamo̧ ju̧i̧ ji̧dë ma chjuari̧ quëna̧ji̧ri̧rȩ cjo̧ro̧ oaiä, a̧ro̧rȩ pearä quëna̧rërea̧mi̧ ji̧dë ma acji mitëmi̧ dari̧ quëna̧ oaiä, jabechji̧ Quiricho pio ju̧i̧ ja̧ jadümi̧ dari̧ cjiarea̧rȩ, pio ju̧i̧ nö̧ta ori̧ bagari̧ ëba cjiarea̧mi̧ dari̧.

¹⁵ Jabo jo̧rȩtadëpe bagadëchji̧vä jabo. Jabechji̧ Ütë tjamo̧ judi no̧mȩrä judirä yürürërea̧ ma̧ȩ pio ju̧i̧ jo̧rȩtadëpe bagadëchji̧vä. Danȩrȩ, ja̧di ta̧rëri̧ yo̧rëremȩde: “Mȩnȩro̧ pio yaba̧ domȩ oa Ütë tjamo̧ ja̧ ma̧ȩ oa ta̧rërä, chjuari̧ jiadadëchji̧jo̧ȩ. Icharai pio judiri ja̧ji̧ri̧ pio judiro̧ jiadarërea̧mi̧ chjuari̧ jiadadëchji̧jo̧ȩ.” Aja̧ ca̧ oti̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë.

¹⁶ Ado yaba̧ iëno̧ë ta̧rërequededibe. Danȩrȩ, ¿chjiadirȩ judiro̧? Ütë tjamo̧ ja̧ ma̧ȩ oa ta̧rëa̧räbo, jiadarëreji̧ri̧ judiro̧ ¿chjiadirȩ? Chjiadëdirȩ, jabechji̧ Icharai pio judiri ja̧ji̧ri̧ pio judiro̧dirȩ. Moiche judi Ejito chiriri pio judiri ëba go̧dürërea̧ pio judiro̧dirȩ.

¹⁷ Ado 40 ui nö̧ta Ütë tjamo̧ pio ju̧i̧iäpȩmo̧ ërecjia tänȩrëreji̧ri̧ judiro̧, ¿chjiadirȩ? Chjiadëdirȩ, jabechji̧ ji̧dë ma chjai̧dëri̧ japarëreji̧ri̧ pio judiro̧dirȩ. Aja̧, chiri tjoräpȩ ju̧ri̧ ja̧borëreji̧ri̧ pio judiro̧dirȩ. Chiri tjo maräpȩ jaerira̧ ja̧bo ga̧re baärëreji̧ri̧ pio judiro̧dirȩ.

¹⁸ Ado Ütë tjamo̧ judi uapai̧ ta̧rëri̧ yo̧ë cji̧därërea̧ ji̧, judi yürüa̧ chiriräpȩ yu̧a̧dëpea̧ pio ju̧i̧ chjiari yo̧rërea̧ ji̧, ¿chjia ji̧ri̧ chjiari yo̧rëremȩde? Chjia ji̧ri̧ chjiaridë, jabechji̧ pio jȩaiäpȩmo̧ ji̧dë ma ta̧rëdiädërëreji̧ri̧ pio ji̧ri̧ chjiari yo̧rëremȩde. Tjamo̧ davä, judiro̧ yu̧a̧tärea̧ ji̧, jënȩ yürüa̧ chiriräpȩ yu̧a̧tärea̧ ji̧, judiro̧ järätä chjapapea̧ chiriräpȩ yu̧a̧tärea̧ ji̧, jabechji̧ yu̧a̧ tänȩdërëremȩdejȩrȩ, pio jȩaiäpȩmo̧ ji̧dë ma ta̧rëdiädëa̧ tara.

¹⁹ Aja̧ ca̧ oti̧, Ütë tjamo̧ judi yürüa̧ chiriräpȩ yu̧a̧rea̧ dadërëreji̧ri̧dirȩ judiro̧ Ütë tjamo̧ pio ju̧i̧ quëna̧dëa̧ oaiä.