Ebereo Ma̧ȩ 2 - Biblia Pume

Badë jo̧rȩtadëtäreji̧ri̧rea̧rȩ Jechu judi ibë chjiari japea̧ pio ju̧i̧

¹ Ado Jechu judi o ji̧ri̧iä ji̧dë u̧i̧ ba chia tara, jabechji̧ järi tjamo̧täreji̧ri̧rea̧rȩ a̧ro̧rȩ ta̧rëa̧ ma̧ȩ pio ju̧i̧ acji mitëmi̧ dari̧ acji cjaeä jo̧rȩtapea̧ oa, a̧ro̧rȩ a̧dë jachipadärämi̧ dari̧ cjiachea oa. Aja̧, chara üdë to̧bari̧ ca̧mȩ oaiä aeno̧a̧ oa cjiami̧ dari̧ cjiachea oa, jabechji̧ a̧dë jo̧rȩtadëtäreji̧ri̧rea̧ro̧jo̧ȩ.

² Jabechji̧ a̧dëriji̧ri̧ mu̧i̧tjoi̧ judiro̧ no̧mȩrä judirä Chinai quȩmȩ ya̧mi̧räpȩ ju̧ri̧ ibëa̧ ütëti̧rea̧ pio ji̧ri̧ ichi chjö̧na̧i̧ ma̧ȩ oa yürürërea̧ ji̧, jabechji̧ tjamo̧i̧ cjiari̧ baämȩ ma̧ȩ oa yürürëreji̧ri̧diro̧jȩrȩ. Jabo cjäri̧ madiro̧jo̧ȩ, ibëa̧ ütëti̧rea̧ judiro̧ ta̧rëdiädëa̧diro̧jo̧ȩ. A̧dëriji̧ri̧ mu̧i̧tjoi̧ pio judiro̧ ma̧ȩ oa yürüa̧räbo, ta̧rë ja̧bodëa̧diro̧jo̧ȩ. Ado pio ju̧i̧iä bape chjaoa̧ oa cjiadiäa̧dirȩ, Ütë tjamo̧ pio judi coëma cjiari̧ ütara ëte.

³ Ado danȩrȩ, ibëa̧ ütëti̧rea̧ pio judiro̧ bape chjaoa̧ oa cjiarä judi, a̧dëriji̧ri̧ mu̧i̧tjoi̧ judiro̧ yürürërea̧ ma̧ȩ pio ju̧i̧ jiada̧ ba oa bape chjaoa̧ oa cjiarä judi, ¿yö̧ta dari̧ a̧dë chiquirea̧ daparea̧rȩ a̧ro̧rȩ chjätärea̧ ba chia tjamo̧ oa a̧dë jo̧rȩtarä judi? Cjäri̧ marea̧rȩ ca̧ pumȩ, a̧dë chiquirea̧ dadëparea̧rȩ. Danȩrȩ, pio jiro chjätärea̧ ba chia pio ju̧i̧ chjiari pearä a̧ra̧ano̧rëremȩ üdë Ano̧mȩ Jechu pio judide. Tjamo̧ davä. Jechu pio judide. Ado a̧ro̧rȩ Jechu pio ju̧i̧iä irä ta̧rërëreji̧ri̧ pio ji̧ri̧iiä ano̧ mire goë ta̧rëji̧ri̧pea̧rea̧rȩ. Jabechji̧ tjamo̧ri̧ jo̧rȩta tänȩrea̧ pio ju̧i̧ yürürëreji̧ri̧diro̧ibe.

⁴ Ado Ütë tjamo̧ pio judiborë tjamo̧ri̧ jo̧rȩta tänȩrea̧ yürürëremȩdiibe. ‘Jabechji̧ pumȩ judiro̧ a̧ra̧ano̧a̧ ma̧ȩ üdë tjamo̧i̧ cjiari̧ baädida’ quëna̧rea̧ dapea̧ oa, Ütë tjamo̧ pio judiborë tjamo̧ri̧ jo̧rȩta tänȩrea̧ yürüa̧diibe dami̧ti̧ jauëchja oa japarea̧ yürüa̧ oaiä. Jabechji̧ ana̧ri̧ na̧rȩ chjaorëremȩde Ütë tjamo̧ judi pumȩ pio ji̧ri̧iä, japarea̧mi̧dë pio ju̧i̧bo japa tänȩmȩrȩ. Ado peaja̧di tjaoëti̧ chia ja̧beparea̧ oa yürüchärëremȩdejȩrȩ quëna̧ji̧ri̧ pio ji̧ri̧ Tjo tjamo̧ pio ju̧i̧iä. Jabechji̧ pio jënȩ jo̧rȩta̧mi̧ yürüchärëremȩdejȩrȩ.

Jechu judi ibëa̧ ayima̧i̧de

⁵ 'Jabechji̧ chiri peaja̧ üdë a̧dëräpȩ cjiaji̧ri̧ mu̧i̧tjoi̧ pio ji̧ri̧ ja̧ chja̧oerä cjiapadida' quëna̧ jo̧rȩtadërëremȩde Ütë tjamo̧ judi. Tjamo̧ davä. Ma̧na̧pamȩ chiri peaja̧rä cjo̧ro̧paji̧ri̧ judiro̧ pio ji̧ri̧ ja̧ chja̧oerä cjo̧ro̧dëpadirȩ. Aja̧, pio ju̧i̧ chjiari ni̧bärequededibe yaba̧. Danȩrȩ, pio jiro doro a̧dëräpȩ cjiaji̧ri̧ mu̧i̧tjoi̧ pio judiro̧ tjamo̧ yo̧ji̧ri̧rȩ cjiadëpadirȩ.

⁶ Tjamo̧ davä. Pio judiro̧ cjiadëpadirȩ jabo pumȩ pio judide tjamo̧ yo̧mȩrȩ cjo̧ro̧pamȩ judi. Jabechji̧ jabërä go̧ȩpea̧ oa cjiarëremȩde ma̧ȩ üdë, Ütërë go̧ȩpa tänȩrërea̧ ma̧ȩ pio judi. Danȩrȩ, ta̧rëchji̧vä cja̧rȩmȩrȩ go̧ȩparërea̧ pio ju̧i̧: “Jabo mȩnȩ Ütë, ¿tjana̧ ju̧i̧iä ba chia jo̧rȩtamȩrȩ darenȩjo̧ȩ pumȩ ju̧i̧? Jabomo̧ pumȩ made. Nö̧tadë madimȩ. ¿Tjana̧ ju̧i̧iä jidarenȩjo̧ȩ pumȩrȩ ara̧ tjamo̧ pio ju̧i̧? ¿Tjana̧ ju̧i̧iä chjadëri̧ a̧dorenȩjo̧ȩ?

⁷ Jabechji̧ mȩnȩ pumȩ pio ju̧i̧ pearä pareaparërea̧ ji̧, nö̧tadërëremȩdejȩrȩ a̧dëräpȩ cjiaji̧ri̧ mu̧i̧tjoi̧ pio ji̧ri̧. Tjamo̧ davä, japamitë boi̧chji̧ nö̧ta, nö̧tadërëremȩdejȩrȩ. Jabo a̧dëräpȩ cjiaji̧ri̧ pio ji̧ri̧ nö̧tadëa̧räbo, jabechji̧ dai chirirä ja̧ cjo̧ro̧mȩ ütëmi̧ dari̧ ba chia tjamo̧parȩa̧renȩjo̧ȩ pumȩ ju̧i̧. Jabechji̧ pio mȩnȩ tänȩa̧ oaiä, chiri tjamo̧ cjo̧ro̧mȩpea̧de.

⁸ Aja̧, mȩnȩ yürüa̧ oaiä, pio mȩnȩ tjamo̧ yo̧rea̧ yürüa̧ oaiä, jabechji̧ pio ju̧i̧ ja̧ chja̧oerämo̧ cjiamȩpea̧de chjö̧na̧i̧rȩ.” Aja̧, ja̧di ta̧rëri̧ go̧ȩpea̧ oa cjiade ma̧ȩ üdë pumȩ pio ju̧i̧ ba chiaparȩa̧ pio ju̧i̧ chjiari. Jabo ¿tjana̧ yo̧rea̧de? “Pio mȩnȩ tjamo̧ yo̧rea̧ yürüa̧ oaiä, pumȩ pio ju̧i̧ ja̧ chja̧oerämo̧ cjiamȩpea̧de chjö̧na̧i̧rȩ” yo̧rea̧ üdë, ¿tjana̧ yo̧de? Tjana̧ yo̧dë, jabechji̧ "chjö̧na̧i̧däräti̧rȩ pumȩ pio ju̧i̧ ja̧ chja̧oerä cjiapade" yo̧rea̧de. Aja̧, "eami̧ üdë a̧dë chiquirea̧ decjiari̧ pumȩ ja̧ chja̧oerämo̧ cjiapade" yo̧rea̧de. Jabo danȩrȩ ca̧ oti̧, chjö̧na̧i̧rȩ pumȩ pio ju̧i̧ ja̧ chja̧oerä cjiadëde. Jabëde jabo. Pumȩ pio ju̧i̧ ja̧ chja̧oerä cjia maea oa dadërea̧rȩ.

⁹ Jabo Jechu pio ju̧i̧ chjiari dabarea̧rȩ jabo. Ado pio ju̧i̧iä tjamo̧i̧ cjiari̧ cjiadiäa̧de pio jiro ma̧ȩ üdë. Tjamo̧ davä. Jabërä yo̧rëremȩ ma̧ȩ üdë, “Pumȩ pio ju̧i̧ ja̧ chja̧oerä cjiamȩpea̧de chjö̧na̧i̧rȩ” yo̧mȩ ma̧ȩ üdë, jabechji̧ tjamo̧i̧ cjiari̧ cjia maeade Jechu pio ju̧i̧iä. Jabechji̧ Jechu pio judi pumȩpea̧de. Ado judi icjarabope bagarërea̧ oaiä, jabechji̧ a̧dëräpȩ cjiaji̧ri̧ mu̧i̧tjoi̧ pio ji̧ri̧ nö̧tadëmȩmi̧ dari̧ ano̧ mire cjiadiäa̧de. Jabechji̧ Ütë tjamo̧ judi pumȩ ji̧ri̧ cjäri̧ri̧ cjia darërea̧ oaiä, pumȩpea̧de pumȩ nö̧tadärä ja̧ oa ano̧ mire ja̧bopea̧ oa. Dëdë, japamitë boi̧chji̧ nö̧ta a̧dëräpȩ cjiaji̧ri̧ mu̧i̧tjoi̧ pio ji̧ri̧iä nö̧tadëmȩmi̧ dari̧ cjiadiäa̧de, jabo yaba̧ ja̧di dari̧ cjiadiärërea̧ ji̧, jabechji̧ ba chia tjamo̧räpȩ ju̧ri̧ ano̧ mire cjiadiäa̧de, a̧dë chjäte ba chiari̧ cjiamȩ chiri Ütë cjo̧ro̧mȩmi̧ dari̧.

¹⁰ Jabechji̧ chjadërëremȩdejȩ Ütë tjamo̧ pio ju̧i̧iä Jechu pio ju̧i̧ chjai̧dë oa chjätä tänȩpea̧ ji̧. Jabechji̧ chjö̧na̧i̧däräti̧ oa Pareapamȩ judi, Ano̧mȩ tjamo̧ pio judi, ‘Aja̧, ja̧di dari̧ japatäremȩquëda, ca̧ u̧ri̧ no̧i̧dë tjamo̧ oa a̧dëräpȩ ëba cjo̧ro̧tä eaqui̧ji̧ri̧da’ quëna̧ jo̧rȩtamȩrȩ gitoi̧ dari̧ tara tänȩrëremȩdejȩ. Ado Jechu judi chjai̧dë oa chjätäa̧ oaiä, jabechji̧ nö̧tarëremȩde pumȩ no̧i̧dë tjamo̧ oa chjätä tänȩpea̧ ji̧, Ütë tjamo̧ ja̧ u̧ri̧ pio ji̧ri̧ no̧i̧dë oa a̧dëräpȩ yabo ëba baämi̧ dari̧ ëba baäpea̧ oa. Jabechji̧ Jechu pio ju̧i̧iä taruparëremȩde a̧ro̧rȩ chjätäpea̧ üdë.

¹¹ Ado yaba̧ cja̧rȩmȩ pumȩ mapea̧rea̧rȩ. Jabechji̧ china̧chjari̧ tutia̧ oa cjiaji̧ri̧ pio judiro̧ cja̧rȩmȩ pumȩ mapea̧rea̧rȩ china̧chjari̧ tutia̧ oa cjia tänȩmȩ pio ju̧i̧ nö̧ta, Jechu pio ju̧i̧ nö̧ta. Jabechji̧ cja̧rȩmȩde ibëa̧ Ama̧i̧ judi. Ado pio ju̧i̧iä idëri̧ cjiadëde Jechu judi pio ibë ope ni̧bäpea̧ ji̧. Tjamo̧ davä. Jibëa̧ ayi̧ma̧i̧ pio ji̧ri̧, jibëa̧ ayi̧cai̧ pio ji̧ri̧, jibëa̧ pumȩ pio ji̧ri̧ ope ni̧bäpea̧ ji̧ idëri̧ cjiadë maeade.

¹² Jabechji̧ ja̧di ta̧rëri̧ yo̧mȩrȩ yo̧rëremȩdejȩ jibëa̧ Ütë oa Jechu judi, jibëa̧ oti̧ pio ji̧ri̧iä idëri̧ cjiadëmȩrȩ: “Pio mȩa chjiari ni̧bärequedejȩrȩ ca̧ oti̧ pio ji̧ri̧iäpȩmo̧” yo̧a̧dejȩ. “Jabechji̧ na̧ pumȩ chjarerä cjiamȩrȩ chjacjiamȩri̧ ni̧bäparequedemȩ.”

¹³ Aja̧, Jechu judi jibëa̧ Ama̧i̧ pio ju̧i̧ yo̧a̧ ji̧, ja̧di ta̧rëri̧ yo̧mȩrȩ yo̧rëremȩde jibëa̧ pumȩpea̧ pio ji̧ri̧ chjiari. Ado judi pumȩpea̧ oaiä, pumȩ pio judiro̧ tara̧mi̧ tara̧ oaiä, pio yoa ma̧ȩbo a̧de yo̧rëremȩdejȩ: “Chjuari̧ quëna̧parequedemȩ.” Aja̧, ja̧di ta̧rëri̧ yo̧a̧de. Ado pio yoa ma̧ȩbo ade yo̧rëremȩdejȩ Jäja ju̧i̧iäpȩmo̧: “Aja̧ ca̧ Ütë, pio yirequede na̧ u̧ri̧ pio ji̧ri̧ nö̧ta, mȩnȩ coa yürüa̧ pumȩ pio ji̧ri̧ nö̧ta.” Aja̧ ca̧ oti̧, ja̧di ta̧rëri̧ yo̧mȩrȩ yo̧rëremȩdejȩ Ütë tjamo̧ ju̧i̧iäpȩmo̧ Jechu judi jibëa̧ pumȩ pio ji̧ri̧ chjiari, pio jȩa nö̧ta cja̧rȩmȩ pumȩpea̧ pio ji̧ri̧ chjiari.

¹⁴ Jabechji̧ Ütë tjamo̧ ja̧ u̧ri̧ judiro̧ icjara chia tara, goe chia tara, peaja̧di pumȩpea̧de Jechu judi icjara chiape jämȩrȩ, goe chiape jämȩrȩ. Jabechji̧ pumȩpea̧de ano̧ mire ja̧bopea̧ oa, ja̧borea̧ chiamȩ pio ju̧i̧ boadäräpea̧ oa. Danȩrȩ, Ichiae pio ju̧i̧iä taruparëremȩde ja̧borea̧ üdë. Jabo Jechu judi pumȩpea̧de Ichiae pio ju̧i̧ boadäräpea̧ oa. Aja̧, Ichiae pio judi ja̧bo tänȩrea̧ chiachea oa pumȩpea̧de, pumȩ chja tjamo̧pe bagamȩrȩ.

¹⁵ Jabechji̧ ja̧di dari̧ japarëremȩde Jechu judi pumȩ pio ji̧ri̧ go̧dü tänȩpea̧ oa, ja̧bopea̧ chja̧oerä cjo̧ro̧chea oa. Jabechji̧ pumȩ judiro̧ ütëbodärärë ara̧ domȩri ja̧ uapaji̧ri̧ maearë cjo̧ro̧rëreji̧ri̧dirȩ, ja̧bopea̧ pio ju̧i̧ uapa tjamo̧ji̧ri̧rȩ. Ado pio jiro uaparea̧ra̧ pio ju̧ri̧ra̧ tabüa̧ oa cjiami̧ dari̧ cjia̧ oaiä, jabechji̧ mu̧i̧tjoi̧mi̧ dari̧ cjo̧ro̧ marëreji̧ri̧dirȩ. Jabo Jechu judi ja̧boa̧ chja̧oeri pio judiri go̧dü tänȩrëremȩdejȩrȩ. Aja̧, uapea̧ chja̧oeri pio judiri go̧dü tänȩrëremȩdejȩrȩ.

¹⁶ Jabechji̧ Jechu judi a̧dëräpȩ cjiaji̧ri̧ mu̧i̧tjoi̧ pio ji̧ri̧ chjätä tänȩpea̧ ji̧ bücjüri̧ cjiadërëremȩde, jabo Abaraa̧ pio judiri ja̧ji̧ri̧ pio ji̧ri̧ chjiari bücjüri̧ cjiarëremȩdejȩrȩ. Aja̧, pio ji̧ri̧ tjamo̧ri̧ a̧dotämi̧ cjiarëremȩdejȩrȩ.

¹⁷ Ado pio ju̧i̧iä jabechji̧, jibëa̧ pumȩ pio judiro̧mi̧ dari̧ cjiadiäpea̧ chiarëremȩde jabëdiärea̧ decjiari̧. Aja̧, Ütë tjamo̧ ja̧ oa chjadëri̧ ja̧bepapea̧ oa, tjamo̧ goë tuti ja̧bepamȩ chjadërë ja̧bepapea̧ oa, pumȩ chjapea̧de. Tjamo̧ davä. Jibëa̧ pumȩ pio ji̧ri̧ cjäri̧ri̧ cjiamȩrȩ a̧dopea̧ oa, pio ji̧ri̧ chjiari ji̧dë ma ja̧bepë yürüpea̧ oa, jabechji̧ pumȩ pio judiro̧mi̧ dari̧ cjiadiäpea̧ chiarëremȩde pio ji̧ri̧ chjiari chjadëri̧ goë cjo̧dëpea̧ oa, pio ji̧ri̧ chjiari chjadëri̧ ja̧bepapea̧ oa. Ado pio ju̧i̧iä pumȩ chjapea̧de. Ado pumȩ chjapea̧mȩrȩ goe gu̧rori̧ yürürea̧ darëremȩde pumȩ judiro̧ chjai̧dëri̧ japea̧ üdë duridëparȩa̧ oa cjiapea̧ oa.

¹⁸ Jabechji̧ judi ma̧i̧ da chjai̧dë oa chjätäa̧ oaiä, judi Ichiaerë chjai̧dëri̧ japa tänȩtea̧ pio ju̧i̧ chjätäa̧ oaiä, jabechji̧ chjadëri̧ dabade davä pio ibë a̧dopea̧ ji̧. Jabechji̧ ibëa̧ yaboi̧ chjai̧dë oa chjätärëremȩde. Ado pio ju̧i̧iä a̧ro̧rȩ oëra̧diäpea̧ ji̧ ana̧ri̧ tararä judi, Ichiae judi ibë chjai̧dëri̧ japa tänȩtarä judi, a̧ro̧rȩ dami̧ti̧ chjai̧dë oa chjätärä judi, jabechji̧ pio judi chjadëri̧ dabade davä pio ibë chjadëri̧ a̧dopea̧ ji̧.