Ebereo Ma̧ȩ 13 - Biblia Pume

Cjiadiärea̧ chi̧dëearea̧ ma̧ȩ

¹ Danȩrȩ ca̧ pumȩ, eachji̧vä dibëa̧ dëbëti̧ra̧ chia. Aja̧, dibëdi ja̧ji̧ri̧ pio ji̧ri̧, Quiricho pio judiri ja̧ji̧ri̧ pio ji̧ri̧ ji̧dë ma eachji̧vä dibëa̧ dëbëti̧ra̧ chia.

² Ado mȩnȩro̧ cja̧rȩmȩ co dadëa̧ pumȩ pio ji̧ri̧ a̧dë dami̧ dari̧ japadëchji̧jȩrȩ, jabo chjadëri̧ jea ëte, yu̧a̧rea̧ yürüchji̧jȩrȩ dibëa̧ bërä. Jabechji̧ pumȩ judiro̧ orë ja̧di dari̧ japea̧ oaiä, pumȩ chjarämi̧ cjiaji̧ri̧rȩ ëba cjo̧ro̧rëreji̧ri̧diro̧jȩrȩ a̧dëriji̧ri̧ mu̧i̧tjoi̧ pio ji̧ri̧. Ado pio ju̧i̧iä yo̧requededibe pumȩ pio ji̧ri̧ chjadëri̧ ëba cjo̧ro̧tä.

³ Ado danȩrȩ, cjäri̧ri̧ cjia jo̧rȩtachji̧jȩrȩ chaärea̧ bëräpȩ tutia̧ oa cjo̧ro̧ji̧ri̧ pio ji̧ri̧. Jabechji̧ pio ji̧ri̧ nö̧ta ëba cjiami̧ dari̧, pio ji̧ri̧ nö̧ta tarami̧ dari̧ jo̧rȩtachji̧jȩrȩ, chjadëri̧ a̧doji̧ri̧rȩ. Ado gitoi̧ dari̧ conȩda̧ oa cjiaji̧ri̧ pio ji̧ri̧ peaja̧di cjäri̧ri̧ cjia jo̧rȩtachji̧jȩrȩ. Jabechji̧ dibëa̧ icjarabo conȩda̧ oa cjiami̧ dari̧ cjäri̧ri̧ cjia jo̧rȩtachji̧jȩrȩ, pio ji̧ri̧ ëba taraji̧ri̧mi̧ dari̧.

⁴ Ado danȩrȩ, üi̧ üdë jibëa̧ iei̧ ji̧ ëbarä, ba chia tjamo̧de. Chjadë tjamo̧de. Ado üi̧ judi jibëa̧ iei̧ ji̧ ëba mo̧a̧rä, peaja̧di ba chia tjamo̧de. Chjadë tjamo̧de. China̧chjadëde. Jabo cjäri̧ madejȩ, jibëa̧ jadü maea oa jo̧rȩtadëmȩ pio ju̧i̧, jabo china̧chja pio ji̧ri̧ baë ëba mo̧a̧mȩ pio ju̧i̧, jabechji̧ Ütë tjamo̧ pio judi bape chjaopadejȩ. Ado peaja̧dimi̧ dari̧ japajadejȩ jibëa̧ üi̧ maea oa jo̧rȩtadëyi̧ pio ji̧, jabo china̧chja pio ji̧ri̧ baë ëba mo̧a̧yi̧ pio ji̧. Tjamo̧ davä ca̧ oti̧, bape chjaopadejȩrȩ jibëa̧ jadüdë oa baë ëba mo̧a̧ji̧ri̧ pio ji̧ri̧.

⁵ Ado danȩrȩ ca̧ pumȩ, chëre goara tjamo̧ji̧ri̧rȩ cjo̧ro̧dëchji̧vä. Jabechji̧ mȩnȩro̧ jabëtari̧mi̧ maea oa goarä judi, cjiadiämi̧ tarari̧ jo̧rȩtachji̧vä. Ado mȩnȩro̧ ji̧ra̧ri̧ goarä judi, peaja̧di cjiadiämi̧ tarari̧ jo̧rȩtatäreji̧ri̧nȩrȩ. Ado mȩnȩro̧ goa̧ pio ju̧i̧, jabechji̧ ba chia dachji̧jo̧ȩ, chjadëri̧ jidaji̧ri̧rȩ. Jabechji̧ ji̧dë ma cjiadiämi̧ tarari̧ jo̧rȩtaji̧ri̧rȩ cjo̧ro̧täreji̧ri̧rea̧rȩ ibëa̧ Ano̧mȩ pio judi ja̧di ta̧rëri̧ yo̧rërea̧ oaiä: “Cüdë pio dibë nö̧ta ji̧dë ma ëba cjiaparequededibe, pio dibë a̧dë baärea̧mi̧dëri̧.” Aja̧, ja̧di ta̧rëri̧ yo̧rëremȩde ibëa̧ Ano̧mȩ judi.

⁶ Ado pio ju̧i̧iä tjamo̧ri̧ dabarea̧rȩ. Jabechji̧ judi ibë ji̧dë ma ëba cjia oaiä, ja̧di ta̧rëri̧ yo̧pai̧ darea̧rȩ, uapadëji̧ri̧rȩ: “Aja̧, Ano̧mȩ judi coa a̧domȩ pio judide. Ado pio ju̧i̧iä uapadëmȩrȩ cjo̧ro̧requede. Jabechji̧ pumȩ ji̧ri̧ uapadëmȩrȩ cjo̧ro̧requede.” Aja̧ ca̧ pumȩ, ja̧di ta̧rëri̧ go̧ȩpea̧ oa cjiade Ütë tjamo̧ ja̧ ma̧ȩ üdë, a̧ro̧rȩ uapadëji̧ri̧rȩ cjiadiämi̧ tarari̧ jo̧rȩtaji̧ri̧rȩ cjo̧ro̧pea̧ oa.

Chorëdiächji̧jȩrȩ pio dibë pearä a̧ra̧ano̧rëreji̧ri̧ pio ji̧ri̧

⁷ Ado dibë pearä a̧ra̧ano̧rëreji̧ri̧ pio ji̧ri̧, Ütë tjamo̧ ja̧ ma̧ȩ oa dibë pearä a̧ra̧ano̧rëreji̧ri̧ pio ji̧ri̧ jo̧rȩtachji̧jȩrȩ, urëdi oa jo̧rȩtaji̧ri̧rȩ. ‘Aja̧, judiro̧ ibëa̧ chjarerä cjo̧ro̧a̧ nö̧ta ja̧di dari̧ cjo̧ro̧rëreji̧ri̧diro̧da, ja̧di dari̧ ni̧bärëreji̧ri̧diro̧da, jabechji̧ ja̧di dari̧ ja̧beparëreji̧ri̧diro̧da, ado pio ju̧i̧iä jabechji̧ pio ji̧ri̧ cho̧rë cjo̧ro̧täreji̧ri̧a̧ro̧ji̧ri̧da, jabechji̧ pio judiro̧ cjo̧ro̧mi̧ dari̧ cjo̧ro̧täreji̧ri̧ra̧ro̧da’ quëna̧pea̧ oa chjadëri̧ jo̧rȩtachji̧jȩrȩ ca̧ oti̧.

⁸ Jabechji̧ Jechu Quiricho judi tjaoëdiä tjaoëdiäpe bagadëmȩde. Jabechji̧ judi no̧mȩ cjiarërea̧mi̧ cjiamȩde yaba̧. Ado judi yaba̧ cjiami̧ bucho ana̧ cjiapade. Jabechji̧ cjiamȩde. Tjaoëdiäpe bagadëmȩde.

⁹ Ado pio ju̧i̧iä ado cja̧rȩmo̧ a̧ra̧ano̧rea̧ ma̧ȩ oaiä oëra̧diäpe bagadëchji̧vä. Teracaba a̧ra̧ano̧rea̧ oaiä u̧i̧pea̧ oa cjiadëchji̧vä. Danȩrȩ, Ütërë cjäri̧ri̧ cjiamȩrȩ yürüa̧ pio ju̧i̧iämo̧i̧ ju chiaparȩa̧ oa cjiade ibëa̧ chji̧ üdë. Jabechji̧ jurarea̧ pio ju̧i̧ chjiari a̧ra̧ano̧rea̧ ma̧ȩ oaiä ju chiaparȩa̧ oa cjiadëde. Ado pio ju̧i̧iä yo̧requededibe. Jurarea̧ pio ju̧i̧ chjiari ma̧ȩra̧ tüdüa̧mi̧ darä cjo̧ro̧mȩ judi, ju chiaparȩa̧ oa cjiadëpade jibëa̧ chji̧ üdë. Jabechji̧ ibëa̧ chji̧ üdë jurarea̧ chja oaiä, ju chiaparȩrea̧mi̧dëde.

Quiricho judi ibëa̧ yürürea̧de

¹⁰ A̧ro̧rȩ, Jechu Quiricho pio ju̧i̧ quëna̧ji̧ri̧ pio judiro̧, jabechji̧ ibëa̧ yürürea̧ oa goarea̧rȩ. Ado pio ju̧i̧iä dami̧ti̧ chjadë oa goaji̧ri̧pea̧rea̧rȩ Jechu judi pio ibë chjiari toro goe gu̧rori̧ ja̧boa̧ oaiä. Jabo ja̧di dari̧ goadëdirȩ Moicherë go̧ȩparërea̧ ma̧ȩrä ja̧bepaji̧ri̧ judiro̧, Ütë tjamo̧ ja̧ bëräpȩ ja̧bepaji̧ri̧ pio judiro̧. Jabechji̧ judiro̧ Jechu pio ju̧i̧ quëna̧dë oaiä, judiro̧ ji̧dë ma goe gu̧rori̧ cäë yürü oaiä, jabechji̧ Jechu judi dami̧ti̧ chjadë oa yürüa̧ pio ju̧i̧ mitërea̧ dadëdirȩ.

¹¹ Jabechji̧ pearä yürürërea̧ ma̧ȩ oaiä tjamo̧ goë tuti ja̧bepamȩ judi ja̧boa̧mȩ ja̧ goe oa goa järëremȩdejȩ a̧dë chjäte china̧chja jo̧ tjoräpȩ, pumȩ judiro̧ chjai̧dëri̧ japea̧ pio ju̧i̧ chjiari yürüpea̧ oa. Ado ja̧boa̧ji̧ri̧ ja̧ icjara üdë bë ma̧ri̧ dairäpȩ cäa̧ oa cjiarëremȩde. Baca üi̧ ja̧ icjararemȩ üdë, oveja ja̧ icjararemȩ üdë, chivo ja̧ icjararemȩ üdë, jabechji̧ bë ma̧ri̧ dairäpȩ cäa̧ oa cjia marëremȩde.

¹² Ado Jechu judi peaja̧di bë ma̧ri̧ dairäpȩ ja̧borëremȩde. Bë ma̧ri̧ tuti cararea̧ joë ya dairäpȩ ja̧borëremȩde, gito ana̧ri̧ taramȩrȩ. Jabechji̧ ja̧borëremȩde a̧ro̧rȩ jibëa̧ goe oaiä china̧chjari̧ tutia̧ oa cjiapea̧ oa.

¹³ Ado pio ju̧i̧iä jabechji̧, bë ma̧ri̧ dairäpȩ jämi̧ dari̧ jätäreji̧ri̧rea̧rȩ Jechu pio ju̧i̧ nö̧ta ëba cjiami̧ dari̧ cjiapea̧ oa, pio ju̧i̧ nö̧ta jiada̧ oa cjiapea̧ oa, pio ju̧i̧ nö̧ta conȩda̧ oa cjiapea̧ oa.

¹⁴ Jabechji̧ pio yoa chirirä tjamo̧ri̧ bëparea̧mi̧dëde. Tjamo̧ davä. Pio yoa chirirä goarijädëmȩ bë ma̧ri̧ oa goadë marea̧rȩ, jabo a̧dëräpȩ cjiamȩ bë ma̧ri̧ pio ju̧i̧mo̧i̧ datämi̧ cjiaji̧ri̧rȩ jidatarea̧rȩ.

¹⁵ Ado pio ju̧i̧iä a̧ro̧rȩ jabë pio yoa chiri oa cjo̧ro̧a̧ nö̧ta, jabechji̧ Jechu pio ju̧i̧ jo̧rȩtaji̧ri̧rȩ ji̧dë ma chjacjiamȩri̧ jo̧rȩtaji̧ri̧rȩ ni̧bätäreji̧ri̧rea̧ro̧jo̧ȩ Ütë tjamo̧ ju̧i̧. Jabechji̧ cäë yürümi̧ dari̧ ji̧dë ma yürütäreji̧ri̧rea̧ro̧jo̧ȩ chjacjiamȩri̧ ni̧bärea̧ oa, chjacjiamȩri̧ go̧a̧rea̧ oa. Jabechji̧ ibëa̧ yara̧, “A̧ja̧, Ütë tjamo̧ judi ibëa̧ Ano̧mȩde” yo̧ji̧ri̧rȩ chjacjiamȩri̧ ni̧bätäro̧jo̧ȩ. Jabechji̧ a̧ro̧rȩ ja̧di dari̧ yürüa̧ oaiä, goaeri̧ pjȩa̧ cjitëmi̧ da oa yürürea̧ ba chia oa yürürea̧ro̧jo̧ȩ. Aja̧ ca̧ oti̧, ja̧di dari̧ japapea̧de.

¹⁶ Ado pio ju̧i̧ uëri ji̧dë ma chjadëri̧ japachji̧vä o ji̧ri̧iäpȩmo̧, aäpami̧ dari̧ jo̧rȩtarea̧ decjiari̧. Ado mȩnȩro̧ goa̧ pio ju̧i̧, jabechji̧ chjadëri̧ ëba goachji̧jȩrȩ o ji̧ri̧, nȩmȩparea̧ decjiari̧. Jabechji̧ ja̧di dari̧ cäë yürümi̧ dari̧ yürüa̧ üdë, goae tjamo̧de Ütë tjamo̧ pio ju̧i̧iä.

¹⁷ Ado danȩrȩ, a̧doparea̧ tjamo̧ yo̧ji̧ri̧ pio ji̧ri̧ chjadëri̧ ta̧rëdiächji̧jȩrȩ. Pio ji̧ri̧ ja̧ chja̧oerä cjo̧ro̧chji̧vä. Jabechji̧ cjiadiärea̧mi̧dëri̧ ja̧bepadirȩ dibë chjadëri̧ a̧dopea̧ oa, dibë chjadëri̧ jidapea̧ oa. Jabechji̧ ja̧bepadirȩ Ütë tjamo̧ pio judi tänȩa̧ oa. Ado pio ju̧i̧iä ütara̧ doro Ütë tjamo̧ pio judi ütarapadejȩrȩ jënȩro̧ ja̧bepea̧ pio ju̧i̧ chjiari. Iëno̧ iëno̧ cjiamȩrȩ ütarë ta̧rëpadejȩrȩ judiro̧ quëna̧ji̧ri̧ pio ji̧ri̧ jida̧ pio ju̧i̧ chjiari. Ado pio ju̧i̧iä tja̧reparȩrea̧ decjiari̧ chjadëri̧ ta̧rëdiätäreji̧ri̧renȩro̧jȩrȩ judiro̧ ma̧ chiadëri̧ cjiaji̧ri̧rȩ ja̧bepapea̧ oa, judiro̧ nö̧tadäräri̧ ja̧bepapea̧ oa. Jabechji̧ mȩnȩro̧ ji̧ri̧ jiadarä judi, gitori̧ jo̧rȩta tänȩrenȩro̧jȩrȩ. Ado gitori̧ jo̧rȩta tänȩrä judi, tjamo̧ri̧ tja̧reparȩa̧ oa cjiapadirȩ, dibë goae tarari̧ a̧dorea̧mi̧dëri̧, mȩnȩro̧ ütëchjape bagarea̧mi̧dëri̧. Pio ju̧i̧iä jabechji̧ chjadëri̧ ta̧rëdiächji̧jȩrȩ.

¹⁸ Ado danȩrȩ ca̧ oti̧, Ütë tjamo̧ pio ju̧i̧iä goë cjo̧dëchji̧ibe. 'Jabechji̧ cjo̧dërë tüe baämi̧ tarari̧ jo̧rȩtadëji̧ri̧rȩ cjo̧ro̧a̧ro̧da’ quëna̧ dabarea̧rȩ. Ado peaja̧di dari̧ ji̧dë ma cjo̧ro̧tämi̧ cjiarea̧rȩ ca̧ oti̧. Pio ju̧i̧iä chjadë maea oa japatämi̧ cjiaji̧ri̧rȩ cjo̧ro̧rea̧rȩ, ji̧dë ma chji̧ goae maeara̧ jo̧rȩtariä cjo̧ro̧pea̧ oa.

¹⁹ Ado danȩrȩ, cüdë japamitë boi̧chji̧ chjätä ëte ado chjereno̧ pio dibëiäpȩ go̧düdärärea̧ dapea̧ oa tjamo̧ri̧ goë cjo̧dëtä eatarequededibe. Aja̧ ca̧ oti̧, pio ju̧i̧ chjiari tjamo̧ri̧ goë cjo̧dëtä earequededibe.

Cjiadiärea̧ Ma̧ȩ

^20-21 Ado yaba̧ ibë ma̧ chjupi̧ cjiari̧ jo̧rȩtarea̧ yürümȩ Ütë pio judi dami̧ti̧ chjadë oa yürütädidibe, mȩnȩro̧ nö̧tadäräri̧ japadäräpea̧ oa, jënȩ dibë chjiari ütarë jo̧rȩtarërea̧ pio ju̧i̧ japadäräpea̧ oa. Jabechji̧ ji̧dë ma jëdano̧tädidibe, mȩnȩro̧ Jechu Quiricho pio judiri ma̧na̧mȩ ju chiarea̧ra̧ tjaoëpai̧ dari̧ cjo̧ro̧pea̧ oa, mȩnȩro̧ Ütë tjamo̧ pio ju̧i̧iä goae tjamo̧ pio ju̧i̧mo̧i̧ japariä cjo̧ro̧pea̧ oa. Jabechji̧ Ütë tjamo̧ judi ja̧boa̧remȩ pio ju̧i̧ bëdü tänȩrëremȩdejȩ ibëa̧ Ano̧mȩ Jechu pio ju̧i̧, oveja tjamo̧ jidamȩ pio ju̧i̧. Jabechji̧ pio ju̧i̧ ja̧ goe oaiä ba chia maeari̧ cjiadiärëremȩde ma̧ȩ peaja̧ üdë, goarijädëpamȩ ma̧ȩ peaja̧ üdë. Ado pio ju̧i̧iä ji̧dë ma chjacjiamȩri̧ jo̧rȩtapea̧de Jechu judi. Yuroparea̧ decjiari̧ chjacjiamȩri̧ jo̧rȩtariä cjo̧ro̧pea̧de bucho ana̧. Ja̧ditäde.

²² Danȩrȩ ca̧ oti̧, pio yoa ma̧ȩ go̧a̧ti̧ tjamo̧dë oa go̧ȩpe chjadürequededibe. Ado pio ju̧i̧ chjadëri̧ acji cjaeä ta̧rëtä eamȩrȩ yo̧tarequededibe, jëreeadëji̧ri̧rȩ ta̧rëtä, urëdi oa jo̧rȩtaji̧ri̧rȩ ta̧rëtä.

²³ Ado danȩrȩ, ma̧ȩ yürütämi̧ cjiarequededibe ibëa̧ omȩ Timoteo pio ju̧i̧ chjiari. Danȩrȩ, judi chaärea̧ bëräpȩ tutia̧ oa cjiarërea̧ ji̧, go̧dü tänȩa̧diro̧jo̧ȩ. Ado danȩrȩ, judi jauëräpȩmo̧ jabërä jana̧rea̧ darä judi, pio ju̧i̧ nö̧ta jäparequede pio dibëiäpȩ.

²⁴ Ado a̧doparea̧ tjamo̧ jidaji̧ri̧ pio ji̧ri̧iäpȩmo̧ cjäri̧ri̧ cjia jo̧rȩtamȩrȩ jearea̧ chjadürequedejȩrȩ ütëbo oa, Ütë tjamo̧ ja̧ pumȩ pio ji̧ri̧bo. Ado Itaria quȩmȩ chiriri pio judiri jana̧ji̧ri̧ pio judiro̧borë jearea̧ chjadüdiro̧dibe.

²⁵ Aja̧ ca̧ oti̧, Ütë tjamo̧ judi dibë ütëbo oa cjäri̧ri̧ cjiamȩrȩ yürütädidibe dibë chjadëri̧ a̧dopea̧ oa. Ja̧ditäde. Aja̧ ca̧ oti̧, pio ju̧i̧mo̧i̧ ma̧ȩ oa go̧ȩpe chjadürequededibe. Dibëa̧ omȩ.