Ebereo Ma̧ȩ 12 - Biblia Pume

Chjai̧dë oa chjätäräbo, ji̧dë ma dami̧ dari̧ jo̧rȩtatäreji̧ri̧rea̧ro̧jo̧ȩ Jechu pio ju̧i̧

¹ Ibëa̧ yaboi̧ cjo̧ro̧rëreji̧ri̧ pio judiro̧ noi̧dërë Ütë tjamo̧ pio ju̧i̧iäpȩmo̧ chjuari̧ quëna̧ji̧ri̧rȩ cjo̧ro̧rëreji̧ri̧dirȩ. Jabechji̧ ütara̧ no̧mi̧ da go̧a̧ti̧ pio ju̧i̧ goae tarari̧ baguraji̧ri̧mi̧ dari̧ cjo̧ro̧rëreji̧ri̧dirȩ chjadëri̧ go̧düdärämi̧ dari̧ cjo̧ro̧pea̧ oa. Ado judiro̧ pio yoa chirirä cjiadëji̧ri̧pea̧räbo, jabechji̧ pio ibë ütarë dami̧ dari̧ japadiro̧ibe. Tjamo̧ davä. Judiro̧ ibëa̧ yaboi̧ ja̧boa̧räbo, jabechji̧ pio ibë ütarë dami̧ dari̧ cjiadirȩ, ¿yö̧ta dari̧ quëna̧ji̧ri̧rȩ cjo̧ro̧padiro̧da, ibëa̧ duri oa cjo̧ro̧ji̧ri̧ pio judiro̧ yö̧ta dari̧ cjo̧ro̧padiro̧da’ quëna̧ jo̧rȩtaji̧ri̧rȩ ütarë dami̧ dari̧ japadiro̧ibe. Ado pio ju̧i̧iä jabechji̧, ütara̧ no̧mi̧ da pio ju̧i̧ goae tarari̧ baguraji̧ri̧mi̧ dari̧ cjo̧ro̧täreji̧ri̧rea̧rȩ, järidëpe bagarea̧ decjiari̧. Jabechji̧ ibë tja̧reparȩmi̧ dari̧ japamȩ pio ju̧i̧ daburäpȩmo̧ chjaodëri̧ mu̧i̧ cürëmi̧ dari̧ japatäreji̧ri̧rea̧ro̧jo̧ȩ, a̧ro̧rȩ bücjüchjami̧ dari̧ cjo̧ro̧pea̧ oa. Tjamo̧ davä. Eami̧ chachami̧ da oa, eami̧ chjai̧dërë ji̧chja̧ baramȩmi̧ da oa chjaodëri̧ aeno̧mi̧ dari̧ japatäreji̧ri̧rea̧ro̧jo̧ȩ a̧ro̧rȩ goae tarari̧ bagurami̧ dari̧ cjo̧ro̧pea̧ oa, a̧ro̧rȩ ji̧dë ma ma̧ chjuari̧ jo̧rȩtaji̧ri̧rȩ cjo̧ro̧pea̧ oa. Jabechji̧ baguraji̧ri̧mi̧ dari̧ cjo̧ro̧täreji̧ri̧rea̧rȩ ütara̧ no̧mi̧ da go̧a̧ti̧ pio ju̧i̧, a̧ro̧rȩ nö̧tarä yuro. Aja̧, a̧ro̧rȩ chjadëri̧ baguradäräa̧mi̧ darä yuro, a̧ro̧rȩ chjadëri̧ go̧düdäräa̧mi̧ darä yuro baguraji̧ri̧mi̧ dari̧ cjo̧ro̧täreji̧ri̧rea̧rȩ.

² Ado ja̧di dari̧ japarea̧ darea̧rȩ a̧ro̧rȩ Jechu pio ju̧i̧iäpȩmo̧ ji̧dë ma dami̧ dari̧ jo̧rȩta̧ oaiä. Jabechji̧ pio ju̧i̧iä taruparëremȩde a̧ro̧rȩ quëna̧ üdë. Ado pio ju̧i̧iä peaja̧di nö̧tadäräri̧ quëna̧rea̧ darea̧rȩ. Jabechji̧ Jechu pio ju̧i̧iä peaja̧di ju chiarea̧ darea̧rȩ nö̧tadäräri̧ quëna̧pea̧ oa, pio judimi̧ dari̧ quëna̧pea̧ oa. Jabechji̧ pio judi toro cji̧däa̧ oa cjia̧rä, ‘Aja̧, ca̧ goe oaiä noi̧dërë chjätärea̧ dapadiro̧da’ quëna̧ jo̧rȩta̧ oaiä, jabechji̧ ma̧ chiadëri̧ cjiari̧ jo̧rȩtamȩrȩ chjätärëremȩde pio jiro ma̧i̧ da chjai̧dë oa. Jabechji̧ ma̧ chjua jo̧rȩtamȩrȩ chjätärëremȩde, pio jȩa idëri̧ cjia tänȩa̧ pio ju̧i̧ chjiari bücjüri̧ cjiadëmȩrȩ. Ado yaba̧ chadäräa̧ oa cjiade tjamo̧ yo̧mȩ Ütë pio ju̧i̧ ja̧ mu̧i̧ chjuaräpȩ ju̧ri̧.

³ Ado pio ju̧i̧iä yo̧requededibe ca̧ pumȩ. Ji̧dë ma carupë jo̧rȩtachji̧vä Jechu pio ju̧i̧, mȩnȩro̧ duriräpȩmo̧diämi̧ dari̧ cjiachea oa. Jabechji̧ ërecjiaji̧ri̧ judiro̧ Jechu pio ju̧i̧iäpȩmo̧ ma̧i̧ dari̧ conȩda̧räbo, ji̧dë ma chjuari̧ quëna̧rëremȩde. Ado pio ju̧i̧iä ana̧ri̧ tararëremȩ pio ju̧i̧ carupë jo̧rȩtachji̧jo̧ȩ, mȩnȩro̧ pio ju̧i̧ cho̧rë cjo̧ro̧pea̧ oa, mȩnȩro̧ järidëpe bagachea oa.

⁴ Jabo dëdë, chjai̧dë pio ju̧i̧ dëbëpe chjaoji̧ri̧mi̧ dari̧ jiadaji̧ri̧rȩ cjo̧ro̧renȩrȩ, jabo jabënȩrȩ. Jechu pio judi tararërea̧mi̧ taradëa̧renȩre. Jabechji̧ mȩnȩro̧ quëna̧ pio oaiä jabë goe chiari̧ ja̧bo tänȩdëa̧diro̧dibe.

Ütë tjamo̧ judi ibë eamȩrȩ chi̧dëeadiibe ibë a̧dopea̧ oa

⁵ Ado ¿a̧dë jo̧rȩtadëa̧nȩrȩ mȩnȩro̧? Ütë tjamo̧ judi jibëa̧ u̧ri̧ pio ji̧ri̧ chi̧dëearërea̧ ji̧, pio dibë chi̧dëearërea̧ ji̧, pio dibë chjadëri̧ a̧dopea̧ oa chi̧dëearërea̧ ji̧, ¿a̧dë jo̧rȩtadëa̧nȩrȩ? Danȩrȩ, ja̧di ta̧rëri̧ yo̧mȩrȩ yo̧rëremȩdejȩrȩ Ütë tjamo̧ judi jibëa̧ u̧ri̧ pio ji̧ri̧iäpȩmo̧, pio dibëiäpȩmo̧. Ta̧rëchji̧vä: “Ca̧ u̧ri̧, dibëa̧ Ano̧mȩ pio judirequede. Ado cüdë dibë tüdüa̧mi̧ darä cjo̧ro̧ tänȩrä, cüdë dibë chi̧dëearä, jabechji̧ badë jo̧rȩtadëchji̧jo̧ȩ cüdë yo̧a̧ pio ju̧i̧. Ado jabechji̧ järidëpe bagadëchji̧vä cüdë dibë bide cjaeämi̧ dari̧ japarä.

⁶ Jabechji̧ dibëa̧ Ano̧mȩ tara ea tjamo̧requededibe. Ado dibë ea tara, dëdë, chi̧dëeaparequededibe. Jabechji̧ dibë ea tjamo̧mȩrȩ bide cjaeämi̧ dari̧ japaparequededibe peaja̧di dibë chjadëri̧ a̧dopea̧ oa. ‘Jabechji̧ ca̧ u̧ri̧ pio judiro̧ tjamo̧diro̧ca̧da’ quëna̧ jo̧rȩtamȩrȩ chjadëri̧ a̧dotämi̧ cjiarequededibe.” Aja̧, ja̧di ta̧rëri̧ yo̧diibe jibëa̧ u̧ri̧ pio ji̧ri̧ Ütë tjamo̧ judi.

⁷ Ado pio ju̧i̧iä yo̧requededibe. Jabechji̧ Ütë tjamo̧ judi dibë tüdüa̧mi̧ darä cjo̧ro̧ tänȩrä judi, jabechji̧ ma̧ chjua jo̧rȩtachji̧vä ca̧ pumȩ. Jabechji̧ dibë ja̧di dari̧ japea̧ oaiä, tjamo̧ri̧ jo̧rȩtarea̧ danȩrȩ. ‘Aja̧, pio ju̧i̧ ja̧ joja tjamo̧pea̧quëda, jabomo̧ yo̧rea̧dëdida, jabo pio ju̧i̧ ja̧ joja tjamo̧pea̧quëda, ado pio ju̧i̧iä bide cjaeämi̧ dari̧ japadicoada, chjadëri̧ japadicoada’ quëna̧ jo̧rȩtarea̧ danȩrȩ. Danȩrȩ, dai chirirä nö̧riji̧ri̧ pio judiro̧ peaja̧di dari̧ japadiro̧jȩrȩ jibëa̧ bori̧ ji̧ri̧. Peaja̧di chi̧dëeariä bide cjaeädiro̧jȩrȩ, judiro̧ tüdüa̧mi̧ darä cjo̧ro̧pea̧ oa. Jabechji̧ jibëa̧ bori̧ tara, chi̧dëeariä bide cjaeädiro̧jȩrȩ.

⁸ Jabo danȩrȩ ca̧ pumȩ, Ütë tjamo̧ judi dibë chi̧dëeadërä judi, dibë bide cjaeämi̧ dari̧ japadë marä judi, ¿tjana̧ na̧rȩtäremȩde? Tjana̧ na̧rȩtäremȩdë, ‘jabechji̧ Ütë tjamo̧ ja̧ u̧ri̧ tjamo̧dëdiro̧da, jabechji̧ pio ju̧i̧ ja̧ u̧ri̧ tjamo̧rä judi, bide cjaeämi̧ dari̧ japatäremȩdiji̧ri̧da, jabo cjäri̧ madiro̧da, ju̧i̧ ja̧ u̧ri̧ tjamo̧dë tara, chi̧dëeadëdiji̧ri̧da’ quëna̧rea̧mi̧ dari̧ na̧rȩtäremȩde. Jabechji̧ nö̧riji̧ri̧ pio judiro̧ jibëa̧ u̧ri̧ tjamo̧ pio ji̧ri̧ chi̧dëeariä bidë cjaeä madiro̧jȩrȩ.

⁹ Tjamo̧ davä. Pio ibë nö̧riji̧ri̧ judiro̧, dai chirirä cjo̧ro̧ji̧ri̧ pio judiro̧ peaja̧di chi̧dëearëreji̧ri̧diro̧ibe. Peaja̧di bide cjaeärëreji̧ri̧diro̧ibe. Ado ibë bide cjaeäa̧räbo, jabechji̧ ba chia darëreji̧ri̧rea̧ro̧jȩrȩ. Ado pio ji̧ri̧ ba chia daea̧rä judi, ji̧dë u̧i̧ ba chia jo̧rȩtatäreji̧ri̧rea̧ro̧jo̧ȩ a̧dëräpȩ cjiamȩ Ama̧i̧ pio ju̧i̧, ibë bide cjaeämi̧ dari̧ japamȩ pio ju̧i̧. Jabechji̧ pio judide ibë bucho ana̧ cjo̧ro̧rea̧ yürümȩ judi.

¹⁰ Ado ibëa̧ ama̧i̧ judiro̧ oëra̧ japapai̧ daräbo, jabechji̧ chi̧dëeariä bide cjaeärëreji̧ri̧diro̧ibe a̧ro̧rȩ ütëchjai̧pea̧rä yuro, jënȩro̧ ütarë jo̧rȩta̧mi̧. Jabo a̧dëräpȩ cjiamȩ Ama̧i̧ üdë, pio ibë chjiari a̧dë chjäte dabamȩ pio judi, jabechji̧ chjadëri̧ bide cjaeämi̧ dari̧ japa madiibe oëra̧ japarea̧mi̧dëri̧. Jabechji̧ a̧ro̧rȩ tüdüa̧mi̧ darä cjo̧ro̧pea̧ oa, a̧ro̧rȩ chjai̧dë oa mirea̧ oa cjiami̧ dari̧ cjiachea oa, a̧ro̧rȩ pio judimi̧ dari̧ cjo̧ro̧pea̧ oa, jabechji̧ chi̧dëeariä bide cjaeämi̧ dari̧ japadiibe chjadëri̧.

¹¹ Ado goaedëde ibëiä. Jabechji̧ ibëa̧ Ama̧i̧ Ütë judi ibë chi̧dëeariä bide cjaeämi̧ dari̧ japarä goaedëde, jabo gitoi̧ dari̧ jo̧rȩta tänȩpai̧ dadiibe ji̧dëri̧. Jabo danȩrȩ ca̧ oti̧, a̧ro̧rȩ bide cjaeäa̧ oa cjiami̧ dari̧ cjia̧ pio ju̧i̧iä chjadëri̧ dabaparea̧ darea̧rȩ tüdüa̧mi̧ darä cjo̧ro̧pea̧ ji̧. Ado tüdüa̧mi̧ darä cjo̧ro̧ tänȩa̧ oaiä, jabechji̧ chjadë tjamo̧diibe. Ma̧ chjupi̧ cjiari̧ jo̧rȩtariä cjo̧ro̧rea̧ yürüdiibe. Ado coëma cjiari̧ cjo̧ro̧rea̧ yürüdiibe peaja̧di, jurarea̧ torë chacha oa chiami̧ dari̧, na̧rȩrea̧mi̧ dari̧.

Uapai̧ da tjamo̧de Ütë tjamo̧ ja̧ ma̧ȩ oa jiadapea̧ ji̧

¹² Ja̧di tara yo̧requededibe ca̧ oti̧. Mȩnȩro̧ ju chiadëji̧ri̧mi̧ dari̧ cjo̧ro̧ji̧ri̧ pio judiro̧, jabechji̧ bëdü jämi̧ dari̧ jo̧rȩtachji̧vä Ütë tjamo̧ pio ju̧i̧iä. Ado dibëa̧ tjo üdë järätä järätä cjo̧ro̧ji̧ri̧mi̧ dari̧ cjo̧ro̧ji̧ri̧ pio judiro̧, jabechji̧ Ütë tjamo̧ pio ju̧i̧iä ju chiami̧ dari̧ cjiachji̧vä, järidëpe bagarea̧mi̧dëri̧. Jabechji̧ dibëa̧ ju chatu üdë, dibëa̧ ichi üdë ju chiadëmi̧ dari̧ cjia oaiä yo̧requededibe.

¹³ Ado chjereno̧ no̧bo tai̧ji̧ri̧mi̧ dari̧ cjo̧ro̧chji̧vä, no̧dë oa jämi̧ dari̧ japarea̧ decjiari̧. Jabechji̧ ca̧ oti̧, ja̧di dari̧ cjo̧ro̧chji̧vä, agȩno̧ agȩno̧ chjaoriä baäji̧ri̧mi̧ dari̧ cjo̧ro̧ji̧ri̧ pio judiro̧ dibë chjadëri̧ cho̧rë jämi̧ dari̧ cho̧rëdiäpea̧ oa, judiro̧ ta ano̧e cjatämi̧ dari̧ cjo̧ro̧chea oa, judiro̧ ji̧dë u̧i̧ ju chiami̧ dari̧ quëna̧pea̧ oa.

¹⁴ Ado danȩrȩ ca̧ pumȩ, eami̧ pumȩ üdë tatachjami̧ dari̧ cjo̧ro̧dërä judi, jabechji̧ Ano̧mȩ pio ju̧i̧ darea̧mi̧dëde. Ado pio ju̧i̧iä yo̧requededibe. Järi tjamo̧chji̧vä pumȩ ütëbodärä oa chjadëri̧ ëba cjo̧ro̧pea̧ oa, chjaodëri̧ jëdano̧ ëte ori̧ bagari̧ ëba chapea̧ oa. Jabechji̧ pio dibëiäpȩmo̧ ma̧ chiadëri̧ cjiaji̧ri̧rȩ dapea̧ oa chjaodëri̧ jëdano̧chi̧vä. Ado mȩnȩro̧ ji̧dë u̧i̧ ütëchjai̧pe bagapea̧ oa, jabechji̧ järi tjamo̧chji̧vä china̧chjari̧ tutia̧ oa cjiami̧ dari̧ cjo̧ro̧pea̧ oa, chjai̧dë pio ju̧i̧ chjuari̧ jiadapea̧ oa.

¹⁵ Ado danȩrȩ, dibëa̧ dëbëti̧ra̧ chia chjadëri̧ jidachji̧vä, mȩnȩro̧ Ütërë cjäri̧ri̧ cjia da̧ pio ju̧i̧ putu jura̧ a̧dë chami̧ dari̧ jo̧rȩtachea oa. Jabechji̧ eami̧ pumȩ üdë Ütërë cjäri̧ri̧ cjia da̧ pio ju̧i̧ jiadarä judi, to ëcarami̧ dari̧ cjiade. Jabechji̧ eami̧ chjai̧dëri̧ jo̧rȩtarea̧ üdë jibëa̧ chji̧rä ji̧dë ma cha̧ oaiä, buiude to ëcarami̧ darë. Ado pio jiro to tacö̧ri pio judiri a̧dë chjäte chjai̧dëri̧ cjiamȩ ëmi̧ da üdë cjitëde jibëa̧ yari pio judiri. Ado jibëa̧ yari pio judiri go̧dü chjaoa̧ oaiä, pumȩ noi̧dërë to ëcara ui oa jaraji̧ri̧mi̧ dari̧ ta̧rëpai̧ dadiro̧jo̧ȩ, pio judiro̧borë ëcarami̧ dari̧ jo̧rȩtaji̧ri̧pe bagari̧. Ado pio ju̧i̧iä chjadëri̧ jidachji̧vä dibëa̧ chji̧ oa, eami̧ jo̧rȩtarea̧ chjai̧dë üdë chachea oa.

¹⁶ Ado danȩrȩ, chjadëri̧ ëbachji̧jȩrȩ dibëa̧ iei̧ pio ji̧. Jabechji̧ china̧chja pio ji̧ri̧ baë ëba mo̧a̧dë machji̧jȩrȩ. Ado danȩrȩ, Ütë tjamo̧ pio ju̧i̧, jabechji̧ putu jura̧ a̧dë chami̧ dari̧ japadë machji̧jo̧ȩ. Peaja̧dimi̧ dari̧ japarëremȩde Echaurea̧ pio judi. Yabomȩrȩ cjo̧ro̧rëremȩde, jabo yabomȩ mitërea̧ pio ju̧i̧ ba chia datärea̧ ji̧, cjäri̧ madejȩ, badë darëremȩdejȩ. Ado ta̧mȩcho̧ ja̧bomȩrȩ chjaodëri̧ gatë tänȩno̧rëremȩdejȩ Jacoborea̧ pio ju̧i̧iäpȩmo̧. Ado ja̧di dari̧ japa ëte, jënȩ oëra̧ japea̧ pio ju̧i̧ chjiari ana̧ri̧ jo̧rȩtatärea̧ ji̧, cjäri̧ made, jo̧rȩtadëa̧de.

¹⁷ Jabo ja̧dëa ji̧ ji̧dë duri oa japamitë chjätä ëte, jibëa̧ ama̧i̧ judi chjadëri̧ cjo̧ro̧pea̧ ma̧ȩ oa yürüa̧rä, jabechji̧ pio jȩaiäpȩmo̧ yürütä eatarëremȩdejȩ. Aja̧, yabomȩ mitërea̧ pio ju̧i̧ ado chjereno̧ mitëtämi̧ cjiarëremȩde. Jabo cjäri̧ made, ado chjereno̧ mitërea̧mi̧dëpea̧de. Jabechji̧ pio ju̧i̧ eatea̧räbo, judi ejaro cjiamȩrȩ cjo̧dëtea̧räbo, jabechji̧ jiada̧ oa cjiarëremȩde. Ado danȩrȩ ca̧ oti̧, Echaurea̧ pio ju̧i̧ chjiari jo̧rȩta tänȩrequededibe mȩnȩro̧ pio ju̧i̧ cho̧rëdiächea oa, mȩnȩro̧ Ütë tjamo̧ pio ju̧i̧ putu jura̧ a̧dë chami̧ dari̧ jo̧rȩtachea oa.

Pearä yürürërea̧ ma̧ȩ üdë yürüa̧ oa cjiarëremȩde Chinai quȩmȩ ya̧mi̧räpȩ ju̧ri̧

¹⁸ Danȩrȩ ca̧ oti̧, a̧ro̧rȩ quëna̧ üdë dai chirirä ja̧dë maeade. Darea̧mi̧dë maeade. Ibëa̧ ichira̧ ga̧re tararea̧mi̧dë maeade. Ado pio ju̧i̧iä a̧ro̧rȩ pearä judi quëna̧rërea̧ ji̧, Ütë tjamo̧ pio ju̧i̧ ja̧ queri̧räpȩ jämi̧ dari̧ quëna̧rërea̧ ji̧, jabechji̧ ibëa̧ dachora̧ pio ju̧ri̧ra̧ eami̧ oa dadëa̧rea̧rȩ. Tjamo̧ davä. A̧ro̧rȩ pearä quëna̧rërea̧ ji̧, eami̧ dadë marëreji̧ri̧rea̧rȩ ibëa̧ dachora̧ pio ju̧ri̧ra̧. Jabo ja̧didërëremȩde ibëa̧ ütëti̧rea̧ pio ji̧ri̧iä. Jabechji̧ dae chjaorëreji̧ri̧dirȩ. Chinai quȩmȩ ya̧mi̧ pio ju̧i̧ dae chjaorëreji̧ri̧diro̧jo̧ȩ. Uapai̧ da oa darëreji̧ri̧diro̧jo̧ȩ. Ma̧i̧ da cjitëmȩ chjä oa, ma̧i̧ da cjo̧dë chiamȩ oa darëreji̧ri̧diro̧jo̧ȩ. Ado ma̧i̧ da bagönȩra̧ pio ju̧ri̧ra̧ na̧rȩa̧ oaiä, peaja̧di dae chjaorëreji̧ri̧diro̧jo̧ȩ, uapai̧ dari̧ pupuripë tai̧mȩbo oa.

¹⁹ Ado goae tarari̧ ea cjiamȩ pjurarea̧ pio ju̧i̧bo ta̧rërëreji̧ri̧diro̧jo̧ȩ. Ado Ütë tjamo̧ judi pio jibëiäpȩmo̧ ni̧bäa̧rä, peaja̧di uapai̧ ta̧rëri̧ ta̧rërëreji̧ri̧diro̧jo̧ȩ. Aja̧, i ma̧na̧gura jämi̧ tarari̧ ta̧rërëreji̧ri̧diro̧jo̧ȩ uapai̧ ta̧rëri̧ ni̧bämȩ oa. Ado pio ju̧i̧iä chjaodëri̧ cjo̧dëno̧a̧diro̧jo̧ȩ Moiche ju̧i̧iä, Ütë tjamo̧ judi pio jibëiäpȩmo̧ ni̧bädëtä.

²⁰ Jabechji̧ Ütë tjamo̧ judi yo̧rërea̧ oaiä, “Eami̧ pumȩ üdë ya̧mi̧ oa ga̧re tararä judi, ta̧dëra̧ ae ja̧bo tänȩpea̧ maeade” yo̧a̧ oaiä, a̧dë chjäte uapaji̧ri̧rȩ ta̧rërëreji̧ri̧diro̧jo̧ȩ. Tjamo̧ davä. Judi yo̧a̧ oaiä, “Aja̧, eami̧ baca üdë ya̧mi̧ oa ga̧re chjätärä judi, ado eami̧ oveja üdë, eami̧ chivo üdë ya̧mi̧ oa jibëa̧ ira̧ pio ju̧ri̧ra̧ ga̧rȩ chjätärä judi, ae ja̧bo tänȩpea̧ maeade ta̧dëra̧” yo̧ë ta̧rëa̧ oaiä, a̧dë chjäte uapaji̧ri̧rȩ ta̧rërëreji̧ri̧diro̧jo̧ȩ ibëa̧ ütëti̧rea̧ judiro̧.

²¹ Ado Moicherea̧ pio judiborë uapamȩpea̧de. Tjamo̧ davä. Ütë tjamo̧ judi uapai̧ ta̧rëri̧ ni̧bäa̧ oaiä, ma̧i̧ dari̧ na̧rȩ chjaoa̧ oaiä, pio judiborë uapa tjamo̧pea̧de. Ado pio ju̧i̧iä ja̧di ta̧rëri̧ yo̧rëremȩde: “Ma̧i̧ da uapea̧ üdë boa̧dique ca̧ chji̧ oa. Ado pio ju̧i̧iä i ma̧na̧gura jämi̧ tarari̧ jo̧rȩtarequede.” Aja̧ ca̧ pumȩ, ja̧di ta̧rëri̧ yo̧rëremȩde Moicherea̧ judi uapai̧ dari̧ dae chjaoa̧ oaiä.

²² Jabo cjäri̧ manȩrȩ ca̧ oti̧, judiro̧ go̧düdärärërea̧räpȩ go̧düdärädëa̧rea̧rȩ. Judiro̧ jibëa̧ dachora̧ darërea̧mi̧ dadëa̧rea̧rȩ jabo ado cja̧rȩmo̧räpȩ go̧düdäräa̧mi̧ dari̧ cjiarea̧rȩ. Jabechji̧ a̧dëräpȩ cjiamȩ Jerucharȩ quȩmȩ bë ma̧ri̧räpȩ ju̧ri̧ go̧düdäräa̧mi̧ dari̧ cjiarea̧rȩ, Chio̧ quȩmȩ ya̧mi̧räpȩ ju̧ri̧. Ja̧bodëmȩ pio ju̧i̧ ja̧ bë ma̧ri̧räpȩ ju̧ri̧ go̧düdäräa̧mi̧ dari̧ cjiarea̧rȩ. A̧dëräpȩ cjiamȩ mu̧i̧tjoi̧ ütararea̧mi̧dërë cjiamȩräpȩ ju̧ri̧ go̧düdäräa̧mi̧ dari̧ cjiarea̧rȩ, judiro̧ Ütë tjamo̧ pio ju̧i̧iäpȩmo̧ chjacjiamȩri̧ ni̧bäpea̧ oa a̧dopë cjiamȩräpȩ ju̧ri̧.

²³ Jabechji̧ go̧düdäräa̧mi̧ dari̧ cjiarea̧rȩ Ütë tjamo̧ ja̧ u̧ri̧rȩ cjiamȩräpȩ ju̧ri̧, yabo ara̧ oa cjiaji̧ri̧mi̧ da pio ji̧ri̧iäpȩ. Jabechji̧ go̧düdäräa̧mi̧ dari̧ cjiarea̧rȩ a̧dëräpȩ ju̧ri̧, a̧dëräpȩ cjiamȩ joërä go̧ȩpea̧ oa cjiaji̧ri̧ pumȩ pio ji̧ri̧iäpȩ. Tjamo̧ davä. Ütëbodärä ja̧ Ütë pio ju̧i̧iäpȩ, pumȩ ütëbodärä oa tjamo̧ ütarë dapamȩ pio ju̧i̧iäpȩ go̧düdäräa̧mi̧ dari̧ cjiarea̧rȩ ca̧ oti̧, jabechji̧parȩa̧ oa cjiaji̧ri̧ pio ji̧ri̧iäpȩ, ji̧ri̧ ja̧ tjorë cjiamȩräpȩ ju̧ri̧.

²⁴ Jabechji̧ Jechu pio ju̧i̧iäpȩ, tjoromȩmi̧ da pio ju̧i̧iäpȩ, ma̧ȩ peaja̧ oa ba chiaparȩa̧mȩ pio ju̧i̧iäiäpȩ go̧düdäräa̧mi̧ dari̧ cjiarea̧rȩ, pio ibë chjiari goe gu̧rori̧ ja̧boa̧mȩ pio ju̧i̧iäpȩ. Danȩrȩ, Jechu judi Ütërë yo̧ë cji̧därërea̧ ma̧ȩ pio ju̧i̧ ja̧bepadärärëremȩdejȩ jibëa̧ goera̧ pio ju̧ri̧ra̧. Pio ju̧i̧iä ba chiaparȩa̧ oa cjiarëremȩde pio jiro ma̧ȩ üdë. Ado pio ju̧i̧iä yo̧requededibe ca̧ oti̧, ma̧ȩ peaja̧ oa ba chiaparȩa̧mȩ pio ju̧i̧iäpȩ go̧düdäräa̧mi̧ dari̧ cjiarea̧rȩ. Aja̧, Jechu ja̧ goe üdë gu̧roa̧ oa cjiarëremȩde Aberea̧ pio ju̧i̧ ja̧ goemi̧ dari̧. Tjamo̧ davä. Jojadirea̧ pio judi ja̧bo tänȩa̧ oaiä, gu̧roa̧ oa cjiarëremȩde. Jabo danȩrȩ, ju̧i̧ ja̧ goe üdë a̧dodëdiibe. Tjamo̧ri̧ yo̧requededibe. Aberea̧ pio ju̧i̧ ja̧ goe üdë a̧dodë madiibe. "Jabechji̧ bape chjaorea̧ pio ju̧i̧ earequede” yo̧mi̧ tarari̧ ëna̧diärëremȩde ju̧i̧ ja̧ goe üdë. Jabo ja̧didëde Jechu ja̧ goe oaiä. Pio ju̧i̧ ja̧ goe üdë chjadëri̧ a̧dodiibe. Jabechji̧ Jechu pio ju̧i̧ ja̧ goe üdë cjäri̧ri̧ cjiamȩmi̧ dari̧ duridëparȩrea̧ yürüdiibe. Ado pio ju̧i̧iä yo̧requededibe ca̧ oti̧. Danȩrȩ, Jechu pio ju̧i̧ ja̧ goe üdë pjo̧dechäa̧ oa cjiami̧ daräpȩ ju̧ri̧ go̧düdäräa̧ oa cjiami̧ dari̧ cjiarea̧rȩ.

²⁵ Ja̧di tara quëna̧chji̧vä ca̧ oti̧, pio dibë ni̧bämȩ pio ju̧i̧ jiadachea oa, Ütë tjamo̧ pio ju̧i̧ jiadachea oa. Danȩrȩ, ibëa̧ ütëti̧rea̧ pio judiro̧ jiada̧ oaiä, Ütë tjamo̧ judi pio ji̧ri̧iäpȩmo̧ uapai̧ ta̧rëri̧ yo̧ë cji̧däa̧mȩ pio ju̧i̧ jiada̧ oaiä, bape chjaorëremȩdejȩrȩ. Ado danȩrȩ, judiro̧ jiada̧ oaiä bape chjaoa̧ oa cjiarä judi, judiro̧ chinai quȩmȩ ya̧mi̧ uëri pio judiri ni̧bämȩ Ütë pio ju̧i̧ jiada̧ oaiä bape chjaoa̧ oa cjiarä judi, ji̧dë u̧i̧ uapai̧ dari̧ bape chjaoa̧ oa cjiapai̧ darea̧rȩ, a̧ro̧rȩ a̧dëri ni̧bämȩ pio ju̧i̧ jiadarä judi.

²⁶ Jabechji̧ Ütë tjamo̧ judi ibëa̧ ütëti̧rea̧ pio ji̧ri̧ ni̧bärërea̧ ji̧, chiri üdë jö̧nö̧jö̧nö̧ai̧ maeari̧ cjiarëremȩde. Jabo danȩrȩ, jënȩ jabë japadëa̧ pio ju̧i̧ chjiari jabërä yo̧rëremȩde ado jö̧nö̧jö̧nö̧a maeari̧ japapea̧ pio ju̧i̧ chjiari. Ja̧di ta̧rëri̧ yo̧ë cji̧därëremȩde: “Cüdë dabu oa jö̧nö̧jö̧nö̧ai̧ maeari̧ japarërea̧ ji̧, ado chjereno̧ japapareconȩ. Jabo dabu maea oa japadëpareconȩ, jabo a̧dë pio ju̧i̧bo jö̧nö̧jö̧nö̧ari̧ japapareconȩ.” Aja̧ ca̧ oti̧, ja̧di ta̧rëri̧ yo̧rëremȩde Ütë tjamo̧ judi.

²⁷ Jabo judi ja̧di ta̧rëri̧ yo̧a̧ ji̧, “Aja̧, ado chjereno̧ japapareconȩ” yo̧a̧ ji̧, ¿tjana̧ yo̧rea̧de? Tjana̧ yo̧rea̧dë, jabechji̧ jënȩ pareapea̧ üdë chjö̧na̧i̧rȩ ado chjereno̧ ana̧ri̧ jö̧nö̧jö̧nö̧a maeari̧ japa ëte goarijäa̧ oa cjiapade yo̧rea̧de. Jabechji̧ jö̧nö̧jö̧nö̧a maeari̧ japarea̧mi̧ da pio judi goarijäpade, jabo jö̧nö̧jö̧nö̧a maeari̧ japarea̧mi̧ dadë pio judi goarijädëpade.

²⁸ Ja̧di ta̧ra, a̧ro̧rȩ Ütërë yo̧a̧ chja̧oerä cjo̧ro̧ji̧ri̧pea̧ tara, ado pio ju̧i̧ ja̧ bë üdë jö̧nö̧jö̧nö̧a maeari̧ japa ëte goarijädëpa tara, jabechji̧ chjacjiamȩri̧ jo̧rȩtatäro̧jo̧ȩ Ütë tjamo̧ ju̧i̧, 'chjadëri̧ japea̧diibëda' quëna̧ jo̧rȩtaji̧ri̧rȩ. Aja̧, uapami̧ dari̧ ba chia jo̧rȩtatäro̧jo̧ȩ pio ju̧i̧iä goaeri̧ pjea̧ cjitëmi̧ dari̧ jo̧rȩtarea̧ maeara̧.

²⁹ Jabechji̧ ibëa̧ Ütë judi uapai̧ da tjamo̧de. Ma̧i̧ da cjo̧dë gärimȩmi̧ dade. Ado judi jo̧rȩta̧mi̧ bape chjaomȩde, cjo̧dë tja mape bagarea̧mi̧ dari̧.