Ebereo Ma̧ȩ 11 - Biblia Pume

Pio jiro pumȩ pio ji̧ri̧ cho̧rë quëna̧pea̧de

¹ A̧ro̧rȩ Ütë tjamo̧ pio ju̧i̧iäpȩmo̧ quëna̧rä judi, ja̧di dari̧ quëna̧parea̧rȩ. ‘Aja̧, tjamo̧ri̧ quëna̧quëda, jabechji̧ Ütë tjamo̧ pio judi yo̧a̧mi̧ japamȩdida, ado judi yo̧a̧ pio ju̧i̧ chjuari̧ quëna̧quëda, jabechji̧ irä dadëräbo quëna̧quëda, ado cüdë jidata̧ pio ju̧i̧ dadärärea̧ dapaquëda, jabë irä darea̧mi̧dëräbo jabechji̧ irä mitërea̧ dapaquëda, teracabari̧ jidatadëquëda’ quëna̧ jo̧rȩtaji̧ri̧rȩ cjo̧ro̧parea̧rȩ Ütë tjamo̧ pio ju̧i̧iäpȩmo̧ quëna̧ji̧ri̧ judiro̧.

² Ado peaja̧dimi̧ dari̧ cjo̧ro̧rëreji̧ri̧dirȩ no̧mȩrä judirä cjo̧ro̧rëreji̧ri̧ judiro̧. Jabechji̧ quëna̧ji̧ri̧rȩ cjo̧ro̧rëreji̧ri̧dirȩ. Ado judiro̧ quëna̧ji̧ri̧rȩ cjo̧ro̧a̧ oaiä, 'jabechji̧ chjadëri̧ cjo̧ro̧diro̧da, judiro̧ pio coaiäpȩmo̧ quëna̧ üdë goae tjamo̧dicoada’ quëna̧ jo̧rȩtamȩrȩ darëremȩdejȩrȩ Ütë tjamo̧ judi.

³ Danȩrȩ, a̧ro̧rȩ quëna̧ pio oaiä na̧e chiapea̧rea̧rȩ Ütë tjamo̧ judi pareapea̧ pio ju̧i̧ chjiari. Aja̧, judi dabu oa, a̧dë oa jibëa̧ ma̧ȩra̧ pio ju̧ri̧ra̧ pareaparërea̧ pio ju̧i̧ chjiari, dëdë, na̧e chiapea̧rea̧rȩ. Jabechji̧ ibëa̧ dachora̧ irä darea̧mi̧dë maeara̧ pio ju̧ri̧ra̧ pareapea̧ duri pio ju̧i̧ irä darea̧ro̧jo̧ȩ yaba̧.

⁴ Danȩrȩ, jo̧rȩtatäro̧jo̧ȩ Aberea̧ pio ju̧i̧. Jabechji̧ judi Ütë tjamo̧ ju̧i̧ quëna̧mȩrȩ ji̧dë u̧i̧ chjadëri̧ yürürëremȩde Cai̧rea̧ pio ju̧i̧iä. Ado judi quëna̧mȩrȩ yürüa̧ oaiä, jabechji̧parȩrëremȩdejȩ Ütë tjamo̧ judi. 'Aja̧, chjadëri̧ yürüa̧dicoada, judi yürüa̧ üdë jabechji̧ chjadëdida’ quëna̧ jo̧rȩtamȩrȩ jabechji̧parȩrëremȩdejȩ. Ado Aberea̧ judi peadëri ja̧ ja̧boa̧räbo, jabechji̧ chi̧dëeami̧ dari̧ a̧dodiibe, judi ibëa̧ yaboi̧ quëna̧mȩrȩ cjo̧ro̧rërea̧ oaiä.

⁵ Ado Eno̧rea̧ judi peaja̧di quëna̧mȩrȩ cjo̧ro̧rëremȩde. Ado quëna̧mȩ oa chjaodëri̧ mitërëremȩdejȩ Ütë tjamo̧ judi, judi ja̧bochea oa. Ado jibëa̧ pumȩ judiro̧ na̧tatea̧räbo, Eno̧ pio ju̧i̧ na̧tatea̧räbo, cjäri̧ madiro̧jo̧ȩ, dadärädëa̧diro̧jo̧ȩ. Ütë tjamo̧ judi mitëa̧ tara, dadärädëa̧diro̧jo̧ȩ. Ado danȩrȩ, jabërä go̧ȩpea̧ oa cjiarëremȩde Eno̧rea̧ pio ju̧i̧ chjiari. “Pio jȩa nö̧ta jadü cjiarea̧mi̧ damȩ oa mitërëremȩdejȩ" go̧ȩpea̧ oa cjiarëremȩde. Ado pio jëa̧ chjiari ja̧di ta̧rëri̧ yo̧rëreji̧ri̧dirȩ pumȩ judiro̧. "Jabechji̧ judi japea̧ üdë goae tjamo̧rëremȩdejȩ Ütë tjamo̧ pio ju̧i̧iä” yo̧rëreji̧ri̧dirȩ jabërä, Eno̧rea̧ judi jabë cjo̧ro̧rä. Aja̧ goae tjamo̧rëremȩdejȩ quëna̧mȩrȩ cjo̧ro̧a̧ tara.

⁶ Jabechji̧ Ütë tjamo̧ ju̧i̧ quëna̧dëa̧ üdë goae tjamo̧dëdejȩ Ütë tjamo̧ ju̧i̧iä. Jabo pio jȩaiäpȩmo̧ quëna̧mȩ pio ju̧i̧ ma̧ chiadëri̧ cjia tjamo̧mȩrȩ dadejȩ. Jabechji̧ eami̧ pumȩ üdë Ütë tjamo̧ pio ju̧i̧ ja̧ queri̧mi̧ daräpȩ cjiatämi̧ cjiamȩ pio judi, ‘Aja̧, Ütë tjamo̧ judi tjamo̧ri̧ cjiadida, ado jȩa na̧tami̧ dari̧ japamȩ pio ju̧i̧ ba ano̧padiji̧da, jabechji̧ ma̧diä cjia tänȩdëpadiji̧da’ quëna̧ jo̧rȩtapea̧ chiade.

⁷ Ado Noerea̧ pio ju̧i̧ ano̧ mire jo̧rȩtatärȩ yaba̧. Danȩrȩ, Ütë tjamo̧ pio ju̧i̧ quëna̧mȩrȩ cji̧därëremȩdejȩ chara ana̧ oa, jibëa̧ pumȩ judiro̧ ui ana̧rä jemu̧i̧ ja̧bochea oa, judiro̧ chjadëri̧ chjätärea̧ dapea̧ oa. Jabechji̧ Ütë tjamo̧ judi jabërä uapai̧ ta̧rëri̧ yo̧ë cji̧däa̧ oaiä, a̧dë chjäte ma̧i̧ darë acji jana̧pea̧ pio ju̧i̧ chjiari yo̧a̧ oaiä, jabechji̧ quëna̧mȩrȩ cji̧därëremȩdejȩ chara ana̧ oa, ui ana̧ oa jabë dadëa̧räbo. Ado judi Ütë tjamo̧ pio ju̧i̧ quëna̧ jo̧rȩtamȩrȩ cjo̧ro̧a̧ oaiä, jabechji̧ chjadë maearä cjiami̧ dari̧ cjiarëremȩde quëna̧dëji̧ri̧ ja̧ chjai̧dë üdë, dai chirirä cjo̧ro̧ji̧ri̧ ja̧ chjai̧dë üdë. Jabo pio jȩaiäpȩmo̧ quëna̧mȩ pio ju̧i̧, jabechji̧parȩrëremȩdejȩ Ütë tjamo̧ judi Noerea̧ pio ju̧i̧.

⁸ Ado Abaraa̧rea̧ pio judiborë quëna̧mȩrȩ cjo̧ro̧rëremȩde. Danȩrȩ, Ütë tjamo̧ judi pio ju̧i̧ ëna̧diäa̧rä, ado cja̧rȩmo̧ chiriräpȩ cjo̧ro̧pea̧ oa baätä ëna̧diäa̧rä, jabechji̧ Ütë tjamo̧ pio ju̧i̧ quëna̧mȩrȩ chjaodëri̧ ta̧rëdiärëremȩdejȩ Ütërë yürüpea̧ chiri pio ju̧i̧ mitëpea̧ oa. Jabechji̧ Ütë tjamo̧ pio ju̧i̧ quëna̧mȩrȩ baärëremȩde, ‘pio jiro chiri üdë pio ju̧ri̧pȩdida’ quëna̧ dabadëmȩrȩ.

⁹ Ado Abaraa̧rea̧ judi Ütërë yo̧ë cji̧däa̧ chiriräpȩ go̧düdäräa̧rä, Ütë tjamo̧ pio ju̧i̧ quëna̧mȩrȩ cjo̧ro̧rëremȩde. Jabechji̧ chjätäti̧ cjiamȩmi̧ darë, jibëa̧ chirirä cjo̧ro̧dëmȩmi̧ darë cjo̧ro̧rëremȩde, i maeara̧ japea̧ oa cjiamȩ jo̧ro cjo̧ro̧mȩrȩ. Ado peaja̧dimi̧ dari̧ cjo̧ro̧rëremȩde Icharea̧ judi, Jacoborea̧ pio judiborë. Jabechji̧ Ütërë pio jibëiäpȩmo̧ yo̧ë cji̧däa̧ chiriräpȩ ju̧ri̧ peaja̧dimi̧ dari̧ cjo̧ro̧rëreji̧ri̧dirȩ, chjätäti̧ cjiaji̧ri̧mi̧ darë.

¹⁰ Jabo Abaraa̧rea̧ judi ja̧di dari̧ cjo̧ro̧mȩborë ji̧dë ma jidatarëremȩdejȩ ado cja̧rȩmo̧ bë ma̧ri̧ oa, a̧dëräpȩ cjiamȩ bë ma̧ri̧ oa. Jabechji̧ Ütë tjamo̧ pio judi jibëa̧ ma̧na̧ri̧ jo̧rȩtamȩrȩ cji̧däa̧ bë ma̧ri̧ pio ju̧i̧ jidatamȩrȩ cjo̧ro̧rëremȩde, goarijädëpamȩ bë ma̧ri̧ pio ju̧i̧.

¹¹ Ado Chara pio jini̧borë quëna̧yi̧rȩ cjo̧ro̧rëreyi̧nȩ. Jabechji̧ Ütë tjamo̧ pio ju̧i̧ quëna̧yi̧rȩ bomaipe bagarea̧ daea̧nȩ, jënȩ quëna̧ pio ju̧i̧iä. Jabechji̧ bomaipe bagarea̧mi̧dëräbo, ütai̧ tjamo̧pea̧räbo, bomaipe bagarea̧ daea̧nȩ. ‘Jabechji̧ Ütë tjamo̧ judi yo̧a̧mi̧ japamȩdida, teracabari̧ yo̧ë cji̧dädëmȩdida’ quëna̧ jo̧rȩtayi̧ oa boma̧i̧ cjiadiärea̧ yürürëremȩdejȩ Ütë tjamo̧ judi.

¹² Ado pio ju̧i̧iä yo̧requededibe ca̧ oti̧. Taruparea̧mi̧dërä taruparëreji̧ri̧dirȩ Abaraa̧rea̧ pio judiri ja̧ji̧ri̧ judiro̧. Jabechji̧ Abaraa̧rea̧ pio judi a̧dë chjäte ütama̧i̧rëremȩde. Bo nö̧rirea̧mi̧dëri̧ cjo̧ro̧rëremȩde peadë. Jabo ja̧di dari̧ cjiaräbo, jabechji̧ Abaraa̧rea̧ pio ju̧i̧iä taruparëreji̧ri̧dirȩ, cja̧rȩmȩ üi̧ pio ju̧i̧iä. Ado yaba̧ jabechji̧ a̧dëräpȩ cjiamȩ büëmi̧ dari̧ ji̧ra̧ tjamo̧pea̧dirȩ Abaraa̧rea̧ pio judiri ja̧ji̧ri̧ judiro̧, ui ana̧ yuroro china̧mȩ dabu nȩgȩ chomi̧ dari̧. Jabechji̧ ütararea̧mi̧dëri̧ cjiaji̧ri̧pea̧dirȩ yaba̧.

¹³ Pio jiro pumȩ judiro̧ ütëborë quëna̧rëreji̧ri̧diro̧jo̧ȩ Ütë tjamo̧ ju̧i̧, judiro̧ ja̧boa̧rä yuro. Pio yoa chiri oa cjo̧ro̧a̧ nö̧ta, Ütërë jibë yo̧ë cji̧däa̧ chjö̧na̧i̧ oa mitërea̧ dadëa̧räbo, jabechji̧ jachiri pio judiri daji̧ri̧mi̧ dari̧ jo̧rȩtarëreji̧ri̧dirȩ Ütë tjamo̧ judi pio jibëiäpȩmo̧ ji̧dë duri oa yürüpea̧ pio ju̧i̧ chjiari. Jabechji̧ jënȩro̧ quëna̧ra̧ pio ju̧ri̧ra̧ mitëa̧ oa goaji̧ri̧mi̧ dari̧ quëna̧ji̧ri̧rȩ cjo̧ro̧rëreji̧ri̧dirȩ. Ado pio ju̧i̧iä judiro̧, 'A̧ja̧, jabomo̧ chjätäti̧ cjiamȩmi̧ dari̧ cjo̧ro̧quëda, pio yoa chiri üdë ca̧ chiri tjamo̧dëdida, jabechji̧ baärea̧ chiaquëda, ado cja̧rȩmo̧ chiriräpȩ tjamo̧ri̧ cjo̧ro̧paquëda’ quëna̧ jo̧rȩtaji̧ri̧rȩ cjo̧ro̧rëreji̧ri̧dirȩ.

¹⁴ Ado judiro̧ ja̧di ta̧rëri̧ yo̧a̧ oaiä, jabechji̧ pio ji̧ri̧ chjiari tjamo̧ri̧ dabarea̧rȩ. Jabechji̧ judiro̧ jo̧rȩta̧ ji̧, ‘Aja̧, ca̧ chiri tjamo̧ üdë ado cja̧rȩmo̧ chiridida, ado cüdë tjamo̧ri̧ bëpapea̧räpȩ baätämi̧ cjiaquëda’ quëna̧ jo̧rȩtaji̧ri̧rȩ cjo̧ro̧rëreji̧ri̧dirȩ.

¹⁵ Judiro̧ pearä cjo̧ro̧rërea̧ chiri pio ju̧i̧ jo̧rȩtadëa̧dirȩ. Jabechji̧ pio ju̧i̧ tjamo̧ri̧ jo̧rȩta̧rä judi, ado chjereno̧ baäa̧täreji̧ri̧dirȩ.

¹⁶ Jabo cjäri̧ madirȩ ca̧ oti̧, dai chirirämȩ chiri pio ju̧i̧ jo̧rȩtadë marëreji̧ri̧dirȩ, jabo ado cja̧rȩmo̧ chiri oa, ji̧dë u̧i̧ chjadë oa jo̧rȩtarëreji̧ri̧diro̧jo̧ȩ, a̧dëräpȩ a̧rȩmȩ chiri oa. Ado pio ju̧i̧iä Ütë tjamo̧ judi ma̧ chiadëri̧ cjiamȩrȩ darëremȩdejȩrȩ idëri̧ cjiarea̧ taradëmȩrȩ. ‘Aja̧, chjuari̧ quëna̧diro̧coada, Ütë tjamo̧ judi ibëa̧ Ütëdida tjamo̧ri̧ quëna̧ji̧ri̧rȩ yo̧diro̧da, jabo ya maeara̧ quëna̧dëdiro̧coada’ quëna̧ jo̧rȩtamȩrȩ ma̧ chiadëri̧ cjiamȩrȩ darëremȩdejȩrȩ. Ado pio ju̧i̧iä a̧dëräpȩ ju̧ri̧ jëdane yürüa̧ oa goadejȩ bë ma̧ri̧ oa pio jiro pumȩ ja̧ oa.

^17-18 Ado Ütë tjamo̧ judi Abaraa̧rea̧ pio ju̧i̧ ütara̧rä, jibëa̧ ja oa cäë yürütä eamȩrȩ ütara̧rä, jabechji̧ Ütë tjamo̧ pio ju̧i̧ chjuari̧ quëna̧mȩrȩ jëdano̧rëremȩde joja pio ju̧i̧ tjamo̧ri̧ ja̧bo tänȩpea̧ ji̧. Tjamo̧ davä. Ütë tjamo̧ judi jabërä Icha pio ju̧i̧ chjiari yo̧ë cji̧däa̧räbo, “Aja̧, na̧ea̧ri ja̧ji̧ri̧ judiro̧ na̧ ja pio ju̧i̧iä ji̧ra̧ tjamo̧pe bagapadirȩ” yo̧mȩrȩ yo̧ë cji̧däa̧räbo, jabechji̧ jëdano̧rëremȩde Abaraa̧ judi joja pio ju̧i̧ tjamo̧ri̧ ja̧bo tänȩpea̧ ji̧. Jabechji̧ pio ju̧i̧mo̧i̧ ëbamȩborë nȩmȩpadëa̧dejȩ.

¹⁹ Ado pio ju̧i̧iä Abaraa̧ judi, ‘Aja̧ jauëchja tjamo̧dida, cjo̧ro̧rea̧ yürümȩ pio judidida, ado cüdë ca̧ ja oa ja̧bo tänȩa̧räbo, jabechji̧ ado chjereno̧ bëdü tänȩpai̧ dadiji̧da, ado judi ado chjereno̧ bëdüa̧ oa cjiarä, dëdë, pio judiri ja̧paji̧ri̧ pio judiro̧ ji̧ra̧ tjamo̧padiro̧da,’ quëna̧mȩrȩ jo̧rȩtarëremȩde. Ado danȩrȩ, peaja̧dimi̧ dari̧ bëdü tänȩa̧ oa cjiami̧ dari̧ cjiadiärëremȩde Icha judi, jënȩ ja̧botärea̧ ji̧. Jabechji̧ tjamo̧ri̧ cäë yürüparemȩrȩ ado chjereno̧ ëbarea̧ daea̧dejȩ jibëa̧ ja oa, bëdüa̧ oa cjiamȩmi̧ da oa.

²⁰ Ado yaba̧ ano̧ mire jo̧rȩtatäro̧jo̧ȩ Icharea̧ pio ju̧i̧. Danȩrȩ, Ütërë yo̧ë cji̧däa̧ pio ju̧i̧ quëna̧mȩrȩ cjo̧ro̧rëremȩde. Ado ja̧di dari̧ quëna̧mȩrȩ cjo̧ro̧a̧ oaiä, chjadëri̧ cjo̧ro̧pea̧ ma̧ȩ oa yürürëremȩdejȩrȩ jibëa̧ u̧ri̧ ji̧ri̧, Jacoborea̧ pio ju̧i̧, Echaurea̧ pio ju̧i̧bo. Jabechji̧ Ütë tjamo̧ judi pio ji̧ri̧iäpȩmo̧ chjadëri̧ japabëmi̧ ma̧ȩ yürürëremȩdejȩrȩ jabërä.

²¹ Ado Jacoborea̧ judi peaja̧di quëna̧mȩrȩ cjo̧ro̧rëremȩde. Jabechji̧ judi ütama̧i̧ tjamo̧pea̧rä, judi ja̧bopea̧ querediäa̧rä, jabechji̧ Ütë tjamo̧ pio ju̧i̧ quëna̧mȩrȩ chjadëri̧ cjo̧ro̧pea̧ ma̧ȩ oa yürürëremȩdejȩrȩ jibëa̧ u̧ri̧ nö̧tai̧ oa. Jabechji̧ jibëa̧ tjätjäpë cjiarea̧ to oaiä ja̧ȩ cjiamȩrȩ chjadëri̧ cjo̧ro̧pea̧ ma̧ȩ oa yürürëremȩdejȩrȩ jibëa̧ jadama̧i̧ pio ji̧ri̧bo. Tjamo̧ davä. Joche pio ju̧i̧rea̧ ja̧ u̧ri̧ pio ji̧ri̧ chjadëri̧ cjo̧ro̧pea̧ ma̧ȩ oa jabërä yürürëremȩdejȩrȩ, Ütë tjamo̧ pio ju̧i̧ chjacjiamȩri̧ jo̧rȩtamȩrȩ.

²² Ado yaba̧ ano̧ mi̧re jo̧rȩtatäro̧jo̧ȩ Jocherea̧ pio ju̧i̧. Danȩrȩ, Jocherea̧ pio judi Ütë tjamo̧ ju̧i̧ quëna̧mȩrȩ cjo̧ro̧rëremȩde peaja̧di. Ado pio ju̧i̧iä, ‘Aja̧, Ejito chiriri pio judiri chjadëri̧ go̧dü tänȩpadiibëda, japamitë chjätä ëte, icharaita pio ji̧ri̧ chjadëri̧ go̧dü tänȩpadiibëda’ quëna̧ jo̧rȩtamȩrȩ cjo̧ro̧rëremȩde. Ado pio ju̧i̧iä ni̧bärëremȩdejȩrȩ jibëa̧ pumȩ pio ji̧ri̧ nö̧ta, jibëa̧ juremȩ pio ju̧i̧ chjiari. Tjamo̧ davä. Joche judi ja̧bopea̧ querediäa̧rä, jibëa̧ ju oa na̧ra̧pea̧ pio ju̧i̧ chjiari jabërä ni̧bä chjaorëremȩdejȩrȩ. Ja̧di ta̧rëri̧ yo̧mȩrȩ yo̧rëremȩdejȩrȩ: “Aja̧ ca̧ oti̧, mȩnȩro̧ pio yudiri, Ejito chiriri pio judiri go̧dürä, jabechji̧ goa baächji̧vä ca̧ juremȩ oa, mȩnȩro̧ go̧düpea̧ chiriräpȩ ju̧ri̧ chjadëri̧ na̧ra̧pea̧ oa.” Aja̧, ja̧di ta̧rëri̧ yo̧mȩrȩ yo̧rëremȩdejȩrȩ jabërä. Jabechji̧ judi jo̧rȩta̧ ji̧, ‘Aja̧, Ütë tjamo̧ judi Icharai pio judiri ja̧ji̧ri̧ pio ji̧ri̧ tjamo̧ri̧ go̧dürea̧ yürüpadiji̧ri̧da, Ejito chiriri pio judiri tjamo̧ri̧ go̧dürea̧ yürüpadiji̧ri̧da’ quëna̧ jo̧rȩtamȩrȩ ma̧ȩ yürürëremȩde jibëa̧ ju pio ju̧i̧ chjiari, jabë ja̧bodëa̧rä.

²³ Ado Moicherea̧ pio ju̧i̧bo jo̧rȩtapea̧de. Danȩrȩ, pio ju̧i̧rea̧ ja̧ nö̧riji̧ri̧ judiro̧ Ütë tjamo̧ pio ju̧i̧ quëna̧ji̧ri̧rȩ goadirëreji̧ri̧diro̧jo̧ȩ jibëa̧ ja oa, Moiche boi̧ pio ju̧i̧. Jabechji̧ pjarao̧ judi yo̧a̧ pio ju̧i̧ ta̧rëji̧ri̧borë uapadëji̧ri̧rȩ jiadarëreji̧ri̧diro̧jo̧ȩ. Ado jiadaji̧ri̧rȩ goadirëreji̧ri̧diro̧jo̧ȩ. Jabechji̧ pio jibëiä chjacjiamȩ tjamo̧ tara, goadia̧diro̧jo̧ȩ joja oa.

²⁴ Ado Moiche judi üi̧padäräa̧rä, pjarao̧ pio ju̧i̧ ja̧ jojiami̧ dari̧ cjo̧ro̧tärea̧ ji̧, pjarao̧ ja̧ jojabi pio jini̧ ara̧mi̧ dari̧ cjo̧ro̧tärea̧ ji̧, pio judiro̧ quëna̧mi̧ dari̧ quëna̧tärea̧ ji̧, jabechji̧ ja̧di dari̧ cjo̧ro̧dëri̧ cjiarëremȩde, jabo jabechji̧ Ütë tjamo̧ pio ju̧i̧ quëna̧mȩrȩ jiadarëremȩdejȩrȩ, pio ji̧ri̧ ja̧ pumȩmi̧ dari̧ cjo̧ro̧dëri̧ cjiamȩrȩ.

²⁵ Jabechji̧ Ejitoräpȩ cjo̧ro̧ji̧ri̧ pio judiro̧mi̧ dari̧ cjo̧ro̧tärea̧ ji̧, pio judiro̧mi̧ dari̧ dami̧ti̧ chjai̧dë oa jape chjaomȩrȩ goaeri̧ cjo̧ro̧tärea̧ ji̧, jabechji̧ putu jura̧ a̧dë chami̧ dari̧ jiadarëremȩdejȩ Moiche judi, Ütë tjamo̧ ja̧ pumȩ pio ji̧ri̧ nö̧ta conȩda̧ oa cjo̧ro̧pea̧ pio ju̧i̧ mitëmȩrȩ. Jabechji̧ dabarëremȩde davä chjai̧dë oa japapea̧ pio ju̧i̧ chjiari. ‘A̧ja̧, ja̧di dari̧ cjo̧ro̧pea̧ üdë goaepai̧ dadicoada, jabo chjaodëri̧ ma̧diä tänȩmi̧ dari̧ japamȩdida, ji̧dë ma ma̧ chiadëri̧ cjia tänȩdëmȩdida, jabo chjaodëri̧ goarijäpamȩ pio judida’ quëna̧ jo̧rȩtamȩrȩ mitërëremȩde Ütë tjamo̧ pio ju̧i̧ ja̧ pumȩ pio ji̧ri̧ nö̧ta conȩda̧ oa cjo̧ro̧pea̧ ji̧.

²⁶ Jabechji̧ Ütërë mitëa̧ Chjätä Tänȩmȩ judi ma̧na̧pea̧ ji̧ jidatamȩrȩ cjo̧ro̧rëremȩde, pio ju̧i̧ quëna̧mȩrȩ. Ado o judiro̧, jënȩ quëna̧mȩ oa ya̧ea̧räbo, jabechji̧rëremȩdejȩ pio ju̧i̧iä. ‘Jabechji̧ Chjätä Tänȩmȩ pio ju̧i̧ quëna̧ üdë, Ejitoräpȩ cjiamȩ ba chia chjö̧na̧i̧ oa mitëpea̧ pio ju̧i̧ u̧i̧ ba chiadida’ quëna̧ jo̧rȩtamȩrȩ cjo̧ro̧rëremȩde, Ütërë pio jȩaiäpȩmo̧ a̧dëräpȩ yürüpea̧ pio ju̧i̧ jo̧rȩtamȩrȩ.

²⁷ Ado Ütë tjamo̧ pio ju̧i̧ quëna̧mȩrȩ a̧dë baärëremȩde Ejito chiri oa, pjarao̧ ja̧ ërecjiarea̧ pio ju̧i̧ uapadëmȩrȩ. Jabechji̧ darea̧mi̧dëmȩ Ütë pio ju̧i̧ dami̧ dari̧ ma̧ chjua jo̧rȩtamȩrȩ cjo̧ro̧rëremȩde, goaedë oa chjätäräa̧bo järidëpe bagadëmȩrȩ.

²⁸ Ado danȩrȩ, uëmo̧ a̧dë chjätärea̧ do üdë pea tarupea̧rä, jabechji̧ Moiche judi Ütë tjamo̧ pio ju̧i̧ quëna̧mȩrȩ chjadëri̧ a̧dorëremȩdejȩrȩ jibëa̧ pumȩ ji̧ri̧, judiro̧ ütara̧mi̧ japapea̧ oa. Ado pio ju̧i̧iä tjamo̧ cjo̧ro̧ji̧ri̧ judiro̧ oveja üi̧ oa ja̧bo tänȩ ëte, jabechji̧ ütarami̧ pjo̧dechärëreji̧ri̧diro̧jo̧ȩ goe oa yu̧a̧rea̧ joë ya uëmo̧, joë ya yuro oa peaja̧di. Ado ja̧di dari̧ japea̧ oaiä, ja̧bo tänȩmȩ mu̧i̧tjoi̧ üdë joja yabomȩ pio ju̧i̧ ja̧bo tänȩtärea̧ ji̧, ja̧bo tänȩdë marëremȩdejȩrȩ pio judiri ja̧ji̧ri̧ ja̧ u̧ri̧ pio ji̧ri̧. Jabechji̧ Moiche judi Ütë tjamo̧ ju̧i̧ quëna̧mȩrȩ a̧doa̧ oaiä, chjadëri̧ chjätärea̧ darëreji̧ri̧dirȩ yaboji̧ri̧ pio judiro̧.

²⁹ Ado danȩrȩ, Icharai pio judiri ja̧ji̧ri̧ judiro̧ Ütë tjamo̧ pio ju̧i̧ quëna̧ji̧ri̧rȩ chjätärëreji̧ri̧diro̧jo̧ȩ ui coëcoëa oa, dabu gaü maearä. Aja̧, ja̧di dari̧ chjätärëreji̧ri̧diro̧jo̧ȩ, quëna̧ji̧ri̧rȩ. Jabo Ejitoriji̧ri̧ pio judiro̧ pio ji̧ri̧ cho̧rë jätea̧ ji̧, cjäri̧ madirȩ, jemu̧i̧ ja̧bo marëreji̧ri̧dirȩ.

³⁰ Ado danȩrȩ, Icharai pio judiri ja̧ji̧ri̧ judiro̧ Jerico quȩmȩ bë ma̧ri̧ oa boapea̧ ji̧ acji jäa̧rä, jabechji̧ eami̧ oa japarea̧ dadëa̧dirȩ. Jabechji̧ uë tjamo̧ cjiamȩ tutirea̧ tjoro tutia̧ oa cjiarëremȩde bë ma̧ri̧ üdë. Ado ma̧i̧ da ta̧dëra̧ pio ju̧ri̧ra̧ japea̧ oa cjiarëremȩde tutirea̧ üdë ji̧dëri̧. Jabo Icharai pio judiri ja̧ji̧ri̧ judiro̧ ji̧mo̧ cjiaji̧ri̧rȩ, cja̧rȩmȩ bubarë, cuchupë tai̧ chjaorëreji̧ri̧dirȩ bë ma̧ri̧ tutirea̧ dairäpȩ 7 co, 7 do nö̧ta. Tjamo̧ davä. Doti̧mi̧ paero tai̧rëreji̧ri̧dirȩ 7 do nö̧ta. Ado judiro̧ tutirea̧ dairäpȩ cuchupë jädiä ëte, jabechji̧ ma̧i̧ da tutirea̧ üdë acji gu̧rorëremȩde daburäpȩmo̧, pjatë mape bagari̧. Jabechji̧ judiro̧ Ütë tjamo̧ pio ju̧i̧ quëna̧ oaiä, acji gu̧rorëremȩde gu̧rorea̧mi̧dërëremȩrȩ.

³¹ Ado ja̧dëa ji̧ Icharai pio judiri ja̧ji̧ri̧ judiro̧ Jerico bë ma̧ri̧rä acji yu̧a̧rërea̧ ji̧, jabechji̧ pio ju̧ri̧pȩ cjo̧ro̧ji̧ri̧ pumȩ ütëbodärä oa ja̧bo tänȩ marëreji̧ri̧diro̧jȩrȩ. Aja̧, ja̧bo tänȩ marëreji̧ri̧diro̧jȩrȩ, jabo Dajaba quȩyi̧ iei̧ pio ji̧ eami̧ oa japadëa̧diro̧jȩ. Aja̧, pio jiro iei̧ ji̧, pio ju̧ri̧pȩ cjo̧ro̧yi̧ iei̧ pio ji̧ eami̧ oa japadëa̧diro̧jȩ, jabo ji̧dëri̧ chjadëri̧ chjätärea̧ yürürëreji̧ri̧diro̧jȩ. Jabechji̧ pio jini̧ üi̧ goarayi̧rȩ cjo̧ro̧a̧räbo, chëre yürüa̧ ba oa ëba mo̧a̧ chjaoa̧räbo, jabechji̧ ja̧bo tänȩdëa̧diro̧jȩ. Jabechji̧ jini̧ jabërä icharaita oari pio ji̧ri̧ chjadëri̧ a̧doa̧ oaiä, eami̧ oa japadëa̧diro̧jȩ. Jabechji̧ oari judiro̧ tai̧a̧ ji̧, chiri oa goadi ütarariä dae tai̧ji̧ri̧ pio judiro̧ tai̧a̧ ji̧, jabechji̧ chjadëri̧ a̧dorëreyi̧nȩjȩrȩ. Aja̧, Ütë tjamo̧ pio ju̧i̧ quëna̧yi̧rȩ a̧dorëreyi̧nȩjȩrȩ. Ado pio ju̧i̧iä eami̧ oa japadëa̧diro̧jȩ.

³² Danȩrȩ ca̧ oti̧, ji̧ra̧ tjamo̧rëreji̧ri̧dirȩ ibëa̧ ütëti̧rea̧ judiro̧, Ütë tjamo̧ pio ju̧i̧ quëna̧ji̧ri̧rȩ cjo̧ro̧rëreji̧ri̧ pio judiro̧. Ji̧ra̧ tjamo̧dirȩ. Ado pio ju̧i̧iä ütëbo ja̧ pio ji̧ri̧ chjiari ni̧bä chjaorea̧mi̧dëde. Jabechji̧ chjao tjamo̧täremȩde ütëbo pio ji̧ri̧ chjiari ana̧ri̧ ni̧bä chjaopea̧ üdë. Jabo danȩrȩ, pio yodëro̧je peaja̧di Ütë tjamo̧ pio ju̧i̧ quëna̧ji̧ri̧rȩ cjo̧ro̧rëreji̧ri̧dirȩ. Gedeo̧ quȩmȩrea̧ judi, Bacara quȩmȩrea̧ judi, Chacho̧ quȩmȩrea̧ judi, Jete quȩmȩrea̧ judi, Davi quȩmȩrea̧ judi, Chamue quȩmȩrea̧ judi, ado Ütërë ea jana̧ chjadüa̧ oa ni̧bäji̧ri̧ pio judiro̧. Aja̧, ji̧ra̧ tjamo̧rëreji̧ri̧dirȩ.

³³ Ado judiro̧ Ütë tjamo̧ ju̧i̧ quëna̧ji̧ri̧rȩ dami̧ti̧ oa japarea̧ darëreji̧ri̧dirȩ. Danȩrȩ, o judiro̧ Ütë tjamo̧ pio ju̧i̧ quëna̧ji̧ri̧rȩ boadärärea̧ darëreji̧ri̧diro̧jȩrȩ ado cja̧rȩmo̧ chiriräpȩ cjo̧ro̧ji̧ri̧ pio ji̧ri̧. Ado pio jiro chiri oa boa̧rä, tjamo̧ yo̧ji̧ri̧rȩ coëma cjiari̧ cjo̧ro̧ tänȩrëreji̧ri̧diro̧jȩrȩ pio ju̧ri̧pȩ cjo̧ro̧ji̧ri̧ pio ji̧ri̧iäpȩmo̧. Aja̧, ja̧di dari̧ japarëreji̧ri̧dirȩ Ütë tjamo̧ pio ju̧i̧ quëna̧ji̧ri̧rȩ. Ado o judiro̧ uapai̧ da tjamo̧räpȩ tutia̧ oa cjia̧rä, pa̧rȩmȩ chjuaji̧ri̧ pio ji̧ri̧ nö̧ta tutia̧ oa cjia̧rä, jabechji̧ Ütë tjamo̧ pio ju̧i̧ quëna̧ oaiä chjaji̧ri̧mi̧ dari̧ ëba cjo̧ro̧rëreji̧ri̧diro̧jo̧ȩ, pio ju̧i̧ chjaodëri̧ ju̧i̧ ja̧bo tänȩtärea̧ ji̧.

³⁴ Ado o judiro̧ goae tarari̧ gärimȩ cjo̧dëräpȩ aeno̧a̧ oa cjia̧rä, jabechji̧ tüe ja̧bo tänȩa̧ oa cjiadërëreji̧ri̧dirȩ Ütë tjamo̧ ju̧i̧ quëna̧ oaiä. Ado o judiro̧ dëbëribo jo̧dë chiamȩ tjapënȩ jujuai̧ oaiä guë ja̧boa̧tärea̧ ji̧, cjäri̧ madirȩ, ja̧bodëa̧dirȩ Ütë tjamo̧ pio ju̧i̧ quëna̧ oaiä. Ado o judiro̧, ju chiadëri̧ cjiaji̧ri̧ pio judiro̧ Ütë tjamo̧ pio ju̧i̧ quëna̧ oaiä, ju chiarea̧ darëreji̧ri̧dirȩ. Ado o judiro̧ Ütë tjamo̧ pio ju̧i̧ quëna̧ oaiä ju chiarea̧ darëreji̧ri̧dirȩ o ji̧ri̧iäpȩmo̧ goae tarari̧ acji jädäräpea̧ oa. Aja̧, Ütë tjamo̧ pio ju̧i̧ quëna̧ oaiä, chjadëri̧ baä tänȩrea̧ darëreji̧ri̧diro̧jȩrȩ tjaoëri pio judiri acji jana̧rëreji̧ri̧ pumȩ pio ji̧ri̧.

³⁵ Ado ivi jini̧ro̧ orë Ütë tjamo̧ pio ju̧i̧ quëna̧ oaiä, jibëa̧ pumȩ judiro̧ ja̧borërea̧ ji̧, jabechji̧ ado chjereno̧ bëdürea̧ darëreji̧ri̧dirȩ. Aja̧, ja̧di dari̧ cjo̧ro̧rëreji̧ri̧dirȩ ibëa̧ ütëti̧rea̧ judiro̧, Ütë tjamo̧ pio ju̧i̧ quëna̧ji̧ri̧rȩ. Jabo o judiro̧, cjäri̧ madirȩ, ma̧i̧ dari̧ conȩda̧ oa cjiarëreji̧ri̧dirȩ. A a ma cjiari̧ conȩda̧ oa cjiarëreji̧ri̧dirȩ jënȩro̧ ja̧boa̧rä yuro. Jabechji̧ judiro̧ Ütë tjamo̧ pio ju̧i̧iäpȩmo̧ quëna̧ ano̧dëri̧ cjia̧ oaiä, judiro̧ Ütë tjamo̧ ja̧ ma̧ȩ oa putu jura̧ a̧dë chami̧ dari̧ jo̧rȩtadëri̧ cjia̧ oaiä, jabechji̧ ana̧ri̧ conȩda̧ oa cjiarëreji̧ri̧dirȩ. Jabo dëdë, Ütë tjamo̧ ja̧ ma̧ȩ oa quëna̧dëji̧ri̧pe baga̧rä judi, chjaodëri̧ baä tänȩa̧ oa cjia̧täreji̧ri̧dirȩ. Jare chjadüa̧ oa cjia̧täreji̧ri̧dirȩ. Jabo cjäri̧ madirȩ ca̧ oti̧, judiro̧ jidataji̧ri̧rȩ cjo̧ro̧a̧ oaiä, 'Aja̧, japamitë chjätä ëte a̧dëräpȩ ju̧ri̧ bëdürea̧ dapaquëda, ado ju̧ri̧pȩ ji̧dë u̧i̧ chjadëri̧ cjo̧ro̧rea̧ dapaquëda' quëna̧ jo̧rȩtaji̧ri̧rȩ jidata̧ oaiä, jabechji̧ quëna̧dëpe bagadëa̧dirȩ, jabo ji̧dë ma chjuari̧ quëna̧rëreji̧ri̧dirȩ judiro̧ ja̧bo tänȩa̧ oa cjia̧rä yuro.

³⁶ Ado quëna̧ji̧ri̧ o ji̧ri̧ ma̧i̧ dari̧ ya̧rëreji̧ri̧diro̧jȩrȩ jibë eadëji̧ri̧ judiro̧. Co ji̧ra̧ri̧ bide cjaeärëreji̧ri̧diro̧jȩrȩ, a̧dë chjäte gitori̧. O ji̧ri̧ peaja̧di chaä tänȩa̧diro̧jȩrȩ, chatu chiamȩ chjipararira̧ yura̧ oa cjiaji̧ri̧rȩ.

³⁷ Ado o ji̧ri̧ ta̧dëra̧ pio ju̧ri̧ra̧ ae chjaorëreji̧ri̧diro̧jȩrȩ, judiro̧ ja̧boa̧rä yuro. Ado o ji̧ri̧ tuti chjoarea̧ra̧ pio ju̧ri̧ra̧ yo̧a̧ri̧ cotope bagari̧ tuti chjoarëreji̧ri̧diro̧jȩrȩ. Ado o ji̧ri̧ dëbëribo jo̧dë chiamȩ tjapënȩ jujuara̧ pio ju̧ri̧ra̧ guë ja̧bo tänȩrëreji̧ri̧diro̧jȩrȩ. Ado o ji̧ri̧ jibëa̧ bëräpȩ cjo̧ro̧rea̧mi̧dëri̧ jaepe ma̧ȩrëreji̧ri̧diro̧jȩrȩ. Ado pio ju̧i̧iä chjö̧na̧i̧ti̧ oa cjäri̧ ja̧boji̧ri̧rȩ chjätäti̧ cjiarëreji̧ri̧dirȩ, oveja i maeara̧ ina̧ oa cjiaji̧ri̧rȩ, chivo i maeara̧ ina̧ oa cjiaji̧ri̧rȩ. Dami̧ti̧ chjai̧dë oa chjätäji̧ri̧rȩ cjo̧ro̧rëreji̧ri̧dirȩ, conȩda̧ oa cjiaji̧ri̧rȩ.

³⁸ Aja̧, oëra̧ti̧ oa chjätäti̧ cjiaji̧ri̧rȩ tai̧rëreji̧ri̧dirȩ ya̧mi̧räpȩ ju̧ri̧, pumȩ decjiaräpȩ ju̧ri̧, chiri tjo maearäpȩ ju̧ri̧. Ado jibëa̧ bëräpȩ chjadëri̧ cjo̧ro̧tärea̧ ji̧, cjäri̧ madirȩ, ta̧dë cjararäpȩ ju̧ri̧ cjo̧ro̧rëreji̧ri̧dirȩ, ya̧mi̧ jätä urëdiräpȩ ju̧ri̧. Jabo judiro̧ ja̧di dari̧ cjo̧ro̧a̧räbo, a̧dë chjäte ba chia jo̧rȩtamȩrȩ darëremȩdejȩrȩ Ütë tjamo̧ judi. ‘Aja̧, ba chia tjamo̧diro̧da, dai chirirä cjo̧ro̧ji̧ri̧ pio ji̧ri̧ u̧i̧ ba chiadiro̧da, dai chirirä cjo̧ro̧ji̧ri̧ pio ji̧ri̧ nö̧ta ëba cjiarea̧mi̧dëdiro̧da’ quëna̧ jo̧rȩtamȩrȩ darëremȩdejȩrȩ, pio ji̧ri̧ ea tjamo̧mȩrȩ.

³⁹ Aja̧ ca̧ oti̧, pio jiro pumȩ judiro̧ ütëbodärärë Ütë tjamo̧ pio ju̧i̧ chjuari̧ quëna̧ji̧ri̧rȩ cjo̧ro̧a̧ oaiä, goae tjamo̧rëreji̧ri̧dirȩ Ütë tjamo̧ pio ju̧i̧iä. Jabo judiro̧ ja̧di dari̧ quëna̧ji̧ri̧ maearë cjo̧ro̧a̧räbo, jabechji̧ Ütërë yo̧ë cji̧däa̧ pio ju̧i̧ irä dadärädë marëreji̧ri̧diro̧jo̧ȩ.

⁴⁰ Jabechji̧ jënȩ pio ji̧ri̧iäpȩmo̧ yo̧ë cji̧däa̧ pio ju̧i̧ chjaodëri̧ yürütärea̧ ji̧, ado cja̧rȩmo̧ jo̧rȩtarea̧ ji̧dë u̧i̧ chjadë oa jo̧rȩtarëremȩde Ütë tjamo̧ judi, pio a̧ro̧rȩborë mitërea̧ dapea̧ oa pio ji̧ri̧ nö̧ta. Jabechji̧ pio jiro pumȩ pio ji̧ri̧ nö̧ta ji̧mo̧ mitërea̧ datä earëremȩdiibe, jënȩ yo̧ë cji̧däa̧ pio ju̧i̧ chjadëri̧ yürüpea̧ oa ibë ütëbodärä oa, cja̧rȩmȩ buba maea oa.