Ebereo Ma̧ȩ 10 - Biblia Pume

Pearä yürürërea̧ ma̧ȩ üdë nö̧tadë marëremȩde a̧ro̧rȩ chjai̧dëri̧ japea̧ pio ju̧i̧ duridëparȩpea̧ ji̧

¹ Moicherë go̧ȩparërea̧ ma̧ȩ üdë jabomo̧ chja̧oemi̧ dade. Aja̧, Quiricho judi pio ibëiäpȩmo̧ a̧dë chjäte chjadë oa yürübëmi̧ chja̧oemi̧ dade. Aja̧, na̧rȩdiibe Quiricho pio ju̧i̧ chjiari. Jabechji̧ Moicherë go̧ȩparërea̧ ma̧ȩ üdë jabechji̧parȩrea̧mi̧dëdiibe. Jabechji̧ pio jiro ma̧ȩrä cjo̧ro̧ji̧ri̧ pio judiro̧ uipamȩ nö̧ta ji̧dë ma goe gu̧rori̧ cäë yürüa̧räbo, jabechji̧parȩa̧ oa cjiadëa̧dirȩ. Jabechji̧ pio jiro ma̧ȩrä cjo̧ro̧a̧ üdë Ütë tjamo̧ pio ju̧i̧ ja̧ queri̧mi̧ daräpȩ jäpea̧ ji̧ a̧dodë madiibe.

² Jabo dëdë, pumȩ judiro̧ ji̧dë ma cäë yürüa̧ oaiä tjamo̧ri̧ duridëparȩrea̧ daea̧rä judi, chjaodëri̧ cjiadiäa̧täreji̧ri̧dirȩ. Chjaodëri̧ cäë yürü ano̧a̧täreji̧ri̧dirȩ ado chjereno̧ cäë yürürea̧ decjiari̧. Tjamo̧ davä. Judiro̧ tjamo̧ri̧ duridëparȩrea̧ daea̧rä judi, jabechji̧ cjatäcjie jo̧rȩtarea̧ daea̧täreji̧ri̧dirȩ jënȩro̧ chjai̧dëri̧ japea̧ pio ju̧i̧ chjiari. Jabechji̧ chji̧ goaera̧ jo̧rȩtarea̧ daea̧täreji̧ri̧dirȩ.

³ Jabo cjäri̧ madirȩ ca̧ pumȩ, tjamo̧ri̧ duridëparȩrea̧ dadëa̧dirȩ. Ado pio ju̧i̧iä jabechji̧, uipamȩ nö̧ta goe yürürëremȩde tjamo̧ goë tuti ja̧bepamȩ judi. Ado uipamȩ nö̧ta yürüa̧ oaiä, jabechji̧ ji̧dë ma jo̧rȩtariä cjo̧ro̧rëreji̧ri̧dirȩ pumȩ judiro̧ jënȩro̧ chjai̧dëri̧ japea̧ pio ju̧i̧ chjiari.

⁴ Jabechji̧ baca üi̧ ja̧ goe üdë chjai̧dë pio ju̧i̧ duridëparȩrea̧mi̧dëde. Chivo goe üdë peaja̧di chjai̧dë oa duridëparȩrea̧mi̧dëde.

⁵ Ado pio ju̧i̧iä Quiricho judi dai chirirä cjo̧rera̧rërea̧ ji̧, ja̧di ta̧rëri̧ yo̧mȩrȩ yo̧rëremȩdejȩ jibëa̧ Ama̧i̧ ju̧i̧: “Aja̧ Ama̧i̧, chivo oa, oveja oa, baca üi̧ oa ji̧dë ma mechjarä goe gu̧rori̧ cäë yürütä eadërenȩ. Ado pio ju̧i̧iä yürüa̧renȩque ca̧ icjara oa, cüdë ca̧ icjara pio ju̧i̧ yürüpea̧ oa” yo̧a̧dejȩ.

⁶ “Jabechji̧ pumȩ judiro̧ mechjarä cäë yürüa̧ üdë, judiro̧ chjai̧dëri̧ japea̧ oaiä yürüa̧ üdë, jabechji̧ goaedë madimȩ.”

⁷ Aja̧, ja̧di ta̧rëri̧ yo̧mȩrȩ yo̧rëremȩdejȩ jibëa̧ Ama̧i̧ ju̧i̧ Quiricho judi. Ado ja̧di ta̧rëri̧ ni̧bä ëte, ja̧di ta̧rëri̧ a̧de yo̧rëremȩdejȩ: “Aja̧ ca̧ Ütë, pio yoa chiriräpȩ birë ma̧na̧requede na̧ ma̧ȩrä cjo̧ro̧pea̧ oa, mȩnȩ ea̧ pio ju̧i̧ japapea̧ oa. Jabechji̧ mȩnȩ pio coa chjiari go̧ȩpa tänȩa̧ ma̧ȩ pio ju̧i̧ japadäräpea̧ ji̧ birë ma̧na̧requede.” Aja̧, ja̧di ta̧rëri̧ yo̧mȩrȩ yo̧rëremȩdejȩ jibëa̧ Ama̧i̧ ju̧i̧ Jechu judi, dai chirirä ma̧na̧rërea̧ ji̧.

⁸ Ado danȩrȩ, cüdë pea go̧ȩpea̧ pio ju̧i̧ jo̧rȩtatäro̧jo̧ȩ ado chjereno̧, Quiricho judi jibëa̧ Ama̧i̧ pio ju̧i̧iäpȩmo̧ yo̧rërea̧ pio ju̧i̧. Danȩrȩ, ja̧di ta̧rëri̧ yo̧rëremȩdejȩ: “Pumȩ judiro̧ pio mȩaiäpȩmo̧ yürüa̧ pio ju̧i̧ yürütä eadërenȩjȩrȩ. Dami̧ti̧ yürürea̧ oa yürütä eadërenȩjȩrȩ. Chirirä cjo̧ro̧ji̧ri̧ pio ji̧ri̧ mechjarä cäë yürütä, codë oa cäë yürütä, eadërenȩjȩrȩ. Jabechji̧ goaedë madimȩ.” Aja̧ ca̧ pumȩ, ja̧di ta̧rëri̧ yo̧mȩrȩ yo̧rëremȩde Jechu judi jibëa̧ Ama̧i̧ pio ju̧i̧iäpȩmo̧. Jabechji̧ pumȩ judiro̧ Moicherë go̧ȩparërea̧ ma̧ȩrä cäë yürüa̧räbo, jabechji̧ goaedërëremȩde Ütë tjamo̧ pio ju̧i̧iä.

⁹ Ado ja̧dëa ji̧ pio yoa ma̧ȩbo a̧de yo̧mȩrȩ yo̧rëremȩdejȩ Jäja pio ju̧i̧iäpȩmo̧: “Aja̧ ca̧ Ütë, pio yoa chiriräpȩ birë ma̧na̧requede na̧ ma̧ȩrä cjo̧ro̧pea̧ oa, mȩnȩ ea̧ pio ju̧i̧ japadäräpea̧ oa.” Aja̧ ca̧ oti̧, ja̧di ta̧rëri̧ yo̧mȩrȩ ado yo̧rëremȩdejȩ Jechu judi jibëa̧ Ama̧i̧ pio ju̧i̧iäpȩmo̧. Ado pio ju̧i̧iä chjadëri̧ dabarea̧rȩ. Danȩrȩ, jibëa̧ icjara oa ano̧ mire yürüa̧ oaiä, cjiadiä tänȩrëremȩdejȩ pearä yürürërea̧ ma̧ȩ pio ju̧i̧. Tjamo̧ davä. Pearä yürürërea̧ ma̧ȩrä ji̧dë ma goe gu̧rori̧ yürürea̧ pio ju̧i̧ cjiadiä tänȩrëremȩdejȩ, jibëa̧ icjara pio ju̧i̧ ano̧ mire yürüa̧ oaiä. Jabechji̧ pearä yürürërea̧ ma̧ȩ pio ju̧i̧ cjiadiä tänȩrëremȩdejȩ ma̧ȩ peaja̧ oa ano̧ mire yürüpea̧ oa. Ja̧di dari̧ japarëremȩde Jechu judi Ütë tjamo̧ pio judi ütarë jo̧rȩtarërea̧mi̧.

¹⁰ Ado pio judi ütarë jo̧rȩtarërea̧mi̧ china̧chjari̧ tutia̧ oa cjiadiäa̧rea̧rȩ Jechu judi goe gu̧rori̧ yürüa̧ oaiä. Tjamo̧ davä. Jechu Quiricho judi Ütë tjamo̧ pio ju̧i̧iäpȩmo̧ jibëa̧ icjara oa ano̧ mire ja̧bopea̧ oa goe gu̧rori̧ yürüa̧ oaiä, jabechji̧ china̧chjari̧ tutia̧ oa cjiadiäa̧rea̧rȩ yaba̧. Jabechji̧ cja̧rȩmȩ co ma ja̧bopea̧ oa yürürëremȩdejȩ jibëa̧ icjara oa, ado judiri yürüdëpea̧de. Ado pio ju̧i̧iä jabechji̧ china̧chjari̧ tutia̧ oa cjiadiäa̧rea̧rȩ.

¹¹ Pearä yürürërea̧ ma̧ȩrä goë tuti ja̧bepaji̧ri̧ pio judiro̧ ütëbodärärë doti̧mi̧ goe gu̧rori̧ cäë yürürëreji̧ri̧dirȩ mechjaräpȩ, pumȩ judiro̧ chjai̧dëri̧ japea̧ pio ju̧i̧ duridëparȩrea̧mi̧dë maea oa.

¹² Jabo Quiricho judi, pio ibë chjiari tjamo̧ goë tuti ja̧bepamȩ pio judi cja̧rȩmȩ co maea oa yürürëremȩde jibëa̧ icjara oa ja̧bopea̧ oa. Ado judi ja̧boa̧ üdë bucho ana̧ a̧dorea̧ chia tara, chadärärëremȩde Ütë tjamo̧ ja̧ mu̧i̧ chjua cotoräpȩ ju̧ri̧, ado judiri ja̧bodëpea̧ oa.

¹³ Ado pio ju̧ri̧pȩ jidatamȩrȩ chade yaba̧. Aja̧, pio jȩa ji̧dë ma dëbëpe chjaoji̧ri̧ pio ji̧ri̧ boadäräpea̧ ji̧ jidatamȩrȩ chade.

¹⁴ Jabechji̧ jibëa̧ icjara oa cja̧rȩmȩ co goe gu̧rori̧ yürüa̧ oaiä, jabechji̧ bucho ana̧ jabechji̧parȩa̧dejȩrȩ pumȩ ji̧ri̧, china̧chjari̧ tutia̧ oa cjiaji̧ri̧ pumȩ pio ji̧ri̧.

¹⁵ Ado Tjo tjamo̧ judi yo̧diibe Ano̧mȩ judi yo̧a̧ duri pio ju̧i̧, a̧ro̧rȩ pio jiro ma̧ȩ üdë ‘tjamo̧i̧ cjiari̧ cjiadida’ quëna̧pea̧ oa. Ta̧rëchji̧vä:

¹⁶ “Japamitë chjätä ëte ado cja̧rȩmo̧ doro, jabechji̧ ado cja̧rȩmo̧ ma̧ȩ oa ano̧ mire yürüparequedejȩrȩ, ma̧ȩ peaja̧ oa. Ado jiro ma̧ȩ üdë jibëa̧ chji̧rä chjadëri̧ charea̧mi̧ dari̧ cha tänȩpareconȩ, judiro̧ chjadëri̧ bapë ta̧rërea̧mi̧ dari̧. Jabechji̧ jibëa̧ chji̧rä go̧ȩpami̧ dari̧ yürüparequedejȩrȩ pio jiro ma̧ȩ peaja̧ oa, judiro̧ a̧dë jo̧rȩtarea̧mi̧dëri̧, judiro̧ pio coa chjadëri̧ ta̧rëdiäpea̧ oa.”

¹⁷ Aja̧, ja̧di ta̧rëri̧ yo̧mȩrȩ yo̧rëremȩde Tjo tjamo̧ judi. Ado ja̧di ta̧rëri̧ yo̧ ëte, ado cja̧rȩmo̧ ma̧ȩ oa ade yo̧rëremȩde. Ta̧rëchji̧vä pio yoa ma̧ȩbo: “Ado judiro̧ chjai̧dëri̧ japea̧ pio ju̧i̧, jabechji̧ a̧dë jo̧rȩtapareconȩ. Tjamo̧ davä. Judiro̧ tüdüa̧mi̧ darä cjo̧ro̧pea̧ ma̧ȩ oa jiada̧ pio ju̧i̧, jabechji̧ jo̧rȩtadëpareconȩ jabo a̧dë jo̧rȩtapareconȩ ji̧dëri̧, ado judiri jo̧rȩtarea̧mi̧dëri̧.” Aja̧, ja̧di ta̧rëri̧ yo̧mȩrȩ ma̧ȩ yürürëremȩde Tjo tjamo̧ judi.

¹⁸ Ado pio ju̧i̧iä yo̧requededibe ca̧ pumȩ. Danȩrȩ, yürürea̧mi̧dëpea̧de yaba̧. Jabechji̧ pumȩ judiro̧ chjai̧dëri̧ japea̧ üdë duridëparȩa̧ oa cjia tara, jabechji̧ Ütë tjamo̧ pio ju̧i̧iäpȩmo̧ ado chjereno̧ goe gu̧rori̧ cäë yürürea̧mi̧pea̧de.

Quiricho pio ju̧i̧iä uapadëji̧ri̧rȩ jädiämi̧ dari̧ cjo̧ro̧täreji̧ri̧rea̧rȩ Ütë tjamo̧ pio ju̧i̧iäpȩ

¹⁹ Ja̧di tara ca̧ oti̧, Jechu ja̧ goe üdë pio ibë chjiari gu̧roa̧ oa cjia̧ oaiä, uapadëji̧ri̧rȩ yu̧a̧därämi̧ dari̧ japapai̧ darea̧rȩ yaba̧ Ütërë cjiamȩräpȩ ju̧ri̧, a̧dë chjäte china̧chja jo̧ tjomi̧ daräpȩ ju̧ri̧.

²⁰ Jabechji̧ no̧ peaja̧ oa areië yürümi̧ dari̧ japarëremȩdiibe Jechu judi, a̧ro̧rȩ Ütërë cjiamȩräpȩ yu̧a̧därärea̧mi̧ dari̧, a̧dë chjäte china̧chja jo̧ tjomi̧ daräpȩ yu̧a̧därärea̧mi̧ dari̧. Jabechji̧ judi ja̧boa̧ oaiä mu̧i̧ quira̧ oa cjiarëremȩde tuti märärea̧ üdë, a̧ro̧rȩ no̧ peaja̧ oaiä tutia̧ tjomi̧ daräpȩ chjadëri̧ yu̧a̧därärea̧mi̧ dari̧.

²¹ Ado pio judide ibë chjiari tjamo̧ goë tuti ja̧bepamȩ judi. Pio judide Ütë tjamo̧ ja̧ bëmi̧ da oa chjadëri̧ jidamȩ judi.

²² Ado pio ju̧i̧iä Ütë tjamo̧ pio ju̧i̧iäpȩmo̧ jädärämi̧ dari̧ japatärȩ, chjuari̧ quëna̧ji̧ri̧rȩ. Jabechji̧ chjaocjiarea̧ decjiari̧, pënȩ maeara̧ jo̧rȩtarea̧ decjiari̧ pio ju̧i̧iäpȩmo̧ jädärämi̧ dari̧ japatärȩ. Jabechji̧ a̧ro̧rȩ chjai̧dëri̧ japea̧ üdë duridëparȩa̧ oa cjiade. Ado ibëa̧ chji̧ üdë Quiricho ja̧ goe oaiä pjo̧dechäa̧ oa cjiami̧ dari̧ cjiade. Ado pjo̧dechäa̧ oa cjiami̧ dari̧ cjia̧ oaiä, jabechji̧ chji̧ chjadëra̧ jo̧rȩtarea̧ darea̧rȩ. Ado ibëa̧ icjara üdë uira̧ joa̧ oa cjiami̧ dari̧ cjiade. Ado pio ju̧i̧iä jabechji̧, jädärämi̧ dari̧ japatärȩ Ütë tjamo̧ pio ju̧i̧iäpȩ.

²³ Jabechji̧ a̧ro̧rȩ jidata̧ pio ju̧i̧ chjuari̧ mitëmi̧ dari̧ quëna̧täro̧jo̧ȩ, ano̧ mire jo̧rȩtadëpe bagarea̧ decjiari̧, quëna̧dëpe bagarea̧ decjiari̧. Jabechji̧ Ütë tjamo̧ judi ibë yo̧ë cji̧däa̧mȩ pio judi ma̧diä cjia tänȩdëmȩde, jabo jënȩ yo̧a̧mi̧ japamȩde. Ado pio ju̧i̧iä chjuari̧ quëna̧täreji̧ri̧rea̧ro̧jo̧ȩ, jae jaeami̧ dari̧ cjiarea̧ decjiari̧.

²⁴ Ado danȩrȩ ca̧ oti̧, ji̧dë ma urëdi oa jo̧rȩtatäreji̧ri̧rea̧rȩ ibëa̧ oti̧ pio ji̧ri̧iäpȩmo̧ chjadëri̧ japapea̧ pio ju̧i̧ chjiari. ‘Aja̧, ja̧di dari̧ a̧dotäremȩqui̧ji̧ri̧da, ja̧di dari̧ japamȩrȩ järiparȩtäremȩquiji̧ri̧da’ quëna̧ jo̧rȩtaji̧ri̧rȩ järi tjamo̧täreji̧ri̧rea̧rȩ ibëa̧ dëbëti̧ra̧ chia ji̧dë ma eapea̧ oa, ibëa̧ dëbëti̧ra̧ chia ji̧dë ma chjadëri̧ japapea̧ oa.

²⁵ Ado danȩrȩ, Ütë tjamo̧ ja̧ pumȩ pio ji̧ri̧ nö̧ta a̧dopapea̧ ji̧ ano̧dëtäreji̧ri̧rea̧ro̧jȩrȩ, jabo järi tjamo̧täreji̧ri̧rea̧rȩ pio ji̧ri̧ nö̧ta chjadëri̧ ëba a̧dopapea̧ ji̧. Ado a̧dopadëji̧ri̧pea̧ pio judiro̧, jabechji̧ ado chjereno̧ a̧dopatäreji̧ri̧dirȩ o pio ji̧ri̧ nö̧ta. Ado danȩrȩ, ado yo̧requededibe. Jabechji̧ ibëa̧ dëbëti̧ra̧ chia chjadëri̧ ju chiaparȩtäreji̧ri̧rea̧rȩ. Jabechji̧ ibëa̧ Ano̧mȩ Jechu judi jana̧pea̧ ji̧ querediä tara, jabechji̧ ji̧dë u̧i̧ järitäreji̧ri̧rea̧rȩ o ji̧ri̧ chjadëri̧ a̧dopea̧ ji̧.

²⁶ Jabo danȩrȩ ca̧ oti̧, duriräpȩmo̧diämi̧ dari̧ jiadadëtärȩ Ütë tjamo̧ ja̧ ma̧ȩ oa. Jabechji̧ a̧ro̧rȩ jiade chjaorä judi, a̧ro̧rȩ tjamo̧i̧ cjiari̧ baämȩ ma̧ȩ oa chjadëri̧ dabapa ëte jiade chjaorä judi, a̧ro̧rȩ tjamo̧i̧ cjiari̧ baämȩ ma̧ȩ oa dabapa ëte ji̧dë ma chjai̧dë oa japatämi̧ cjiaji̧ri̧rȩ jiade chjaorä judi, jabechji̧ a̧ro̧rȩ chjai̧dëri̧ japea̧ pio ju̧i̧ chjiari ba ano̧pea̧ oa ado cja̧rȩmo̧ yürürea̧ decjiade. Aja, ano̧ mire yürürea̧ decjiade. Jabechji̧ ado cja̧rȩmo̧ yürürea̧ oa dadëparea̧rȩ. Ado cja̧rȩmo̧ goe decjiade. Pio judiri yürürea̧mi̧dëde.

²⁷ Ado pio ju̧i̧iä ji̧dë ma jiade chjaomȩ pio judi, jabechji̧ uapai̧ da tjamo̧ri̧ cjo̧ro̧de. Jabechji̧ chjaodëri̧ acji jana̧pai̧ dadejȩ davä Ütë ja̧ ütararea̧ üdë. Ütë tjamo̧ ju̧i̧ chjuari̧ dëbëpe chjaoji̧ri̧ pio ji̧ri̧ acji jana̧pamȩ cjo̧dë pio judi acji jana̧padejȩ, ma̧i̧ dari̧ gärimȩ cjo̧dë uapai̧ darë.

²⁸ Danȩrȩ ca̧ oti̧, chjadëri̧ jo̧rȩtatäreji̧ri̧rea̧rȩ Moicherë go̧ȩparërea̧ ma̧ȩrä cjo̧ro̧rëreji̧ri̧ pio ji̧ri̧. Danȩrȩ, uapai̧ dari̧ cjo̧ro̧rëreji̧ri̧dirȩ. Jabechji̧ oëra̧diäa̧mȩ pio ju̧i̧ chjaodëri̧ ja̧bo tänȩrëreji̧ri̧diro̧jo̧ȩ. Tjamo̧ davä. Oëra̧diäa̧mȩ pio ju̧i̧ irä daea̧ji̧ri̧ judiro̧, chjai̧dëri̧ japamȩ oa irä daea̧ji̧ri̧ pio judiro̧ ütëti̧ pio ji̧ri̧iäpȩmo̧ ta̧rëpea̧ oaiä, jabechji̧ chjaodëri̧ a̧dopëno̧rëreji̧ri̧dirȩ pumȩ judiro̧ oëra̧diäa̧mȩ pio ju̧i̧ ja̧bo tänȩpea̧ oa. Jabechji̧ yo̧a̧ri̧rȩ jabo tjarari̧rȩ irä daea̧ oaiä, ütëti̧ pio ji̧ri̧iäpȩmo̧ ta̧rëpea̧ oaiä chjaodëri̧ ja̧bo tänȩrëreji̧ri̧diro̧jo̧ȩ, cjäri̧ri̧ cjia dadëji̧ri̧rȩ.

²⁹ Ado danȩrȩ, ji̧dë u̧i̧ uapai̧ dari̧ ütara̧ oa cjiapadirȩ Ja tjamo̧ pio ju̧i̧ putu jura̧ a̧dë chami̧ dari̧ jo̧rȩtaji̧ri̧ pio judiro̧, pio ju̧i̧ badë jo̧rȩtaji̧ri̧ pio judiro̧. Tjamo̧ davä. ‘Jechu ja̧ goe üdë badëdida, ibë a̧dorea̧mi̧dë goedida’ quëna̧ jo̧rȩtaji̧ri̧ pio judiro̧, ji̧dë u̧i̧ uapai̧ dari̧ ütara̧ oa cjiapadirȩ. Jabechji̧ Jechu ja̧ goe pio oaiä ba chiaparȩa̧ oa cjiadiärëremȩde ma̧ȩ peaja̧ üdë. Ado pio jiro goe üdë pumȩ pio ji̧ri̧ china̧chjari̧ tutia̧ oa cjia tänȩmȩ goe pio judide. Jabo judiro̧ pio ju̧i̧ ba chia jo̧rȩtatärea̧ ji̧, cjäri̧ madiro̧jo̧ȩ, badë jo̧rȩtadiro̧jo̧ȩ. Pio jibë china̧chjari̧ tutia̧ oa cjia tänȩmȩ goe pio ju̧i̧ badë jo̧rȩtadiro̧jo̧ȩ. Ado judiro̧ ja̧di dari̧ japea̧ oaiä, jabechji̧ pio jibë cjäri̧ri̧ cjiamȩrȩ a̧domȩ pio ju̧i̧ a̧dë chjäte ërecjia tänȩa̧diro̧jo̧ȩ Tjo tjamo̧ pio ju̧i̧. Ado pio ju̧i̧iä, dëdë, Moicherë go̧ȩparërea̧ ma̧ȩ oa jiada̧ ba oa bape chjaoa̧ oa cjiarëreji̧ri̧ pio ji̧ri̧ u̧i̧ uapai̧ dari̧ ütara̧ oa cjiapadirȩ a̧dë chjäte uapai̧ dari̧.

³⁰ Jabechji̧ ja̧di ta̧rëri̧ go̧ȩpea̧ oa cjiade Ütë tjamo̧ ja̧ ma̧ȩ üdë: “Aja̧, bape chjaomȩ pio judirequede cüdë. Ado pumȩ judiro̧ japea̧ pio ju̧i̧ ütaraparequede.” Aja̧ ca̧ oti̧, ja̧di ta̧rëri̧ go̧ȩpea̧ oa cjiade. Ado pio yoa ma̧ȩbo go̧ȩpea̧ oa cjiade: “Ano̧mȩ judi ütarapadejȩrȩ jibëa̧ pumȩ pio ji̧ri̧. Judiro̧ japea̧ pio ju̧i̧, judiro̧ jo̧rȩta̧ pio ju̧i̧ ütarapadejȩrȩ.” Aja̧, ja̧di ta̧rëri̧ yo̧rëremȩde Ütë tjamo̧ judi. Ado pio ju̧i̧iä yo̧requededibe.

³¹ Ja̧bodëmȩ Ütë pio ju̧i̧ ja̧ ütararea̧ üdë pio ibëiäpȩmo̧ acji cjatärä judi, a̧dë chjäte uapai̧ da tjamo̧padiibe. Jabechji̧ Ütë tjamo̧ judi ibë bape chjaorea̧ra̧ pio ju̧ri̧ra̧ ütararä judi, dëdë, a̧dë chjäte uapai̧ da tjamo̧padiibe. Bape chjaomȩrȩ ütarapea̧ üdë uapai̧ dade.

Ütë tjamo̧ pio ju̧i̧ chjuari̧ quëna̧ji̧ri̧rȩ ta̧rëdiätäro̧jo̧ȩ, ma̧ chjua cjo̧ro̧ji̧ri̧rȩ

³² Danȩrȩ, mȩnȩro̧ Quiricho pio ju̧i̧ pearä tatami̧ darä jo̧rȩtarërea̧ pio ju̧i̧ chjadëri̧ jo̧rȩtachji̧vä ca̧ oti̧. Jabechji̧ chjai̧dë tjamo̧ oa chjätärëreji̧ri̧nȩrȩ, gitoi̧ dari̧ conȩda̧ oa cjiaji̧ri̧rȩ.

³³ Ado tjaoërä ya̧e chjaorëreji̧ri̧diro̧dibe pumȩ no̧i̧dërë irä ta̧rërea̧mi̧ dari̧. Ado tjaoërä goae tarari̧ bide cjaeärëreji̧ri̧diro̧dibe peaja̧di, pumȩ judiro̧ irä darea̧mi̧ dari̧. Jabo chjai̧dë oa chjätäa̧räbo, chjadëri̧ a̧dorëreji̧ri̧renȩro̧jȩrȩ o ji̧ri̧, peaja̧di gitoi̧ dari̧ taraji̧ri̧ oa.

³⁴ Ado chaärea̧ bëräpȩ tutia̧ oa cjiaji̧ri̧ pio ji̧ri̧bo cjäri̧ri̧ cjia darëreji̧ri̧renȩro̧jȩrȩ. Ado o judiro̧ dibëa̧ oa chjö̧na̧i̧ oa baë mitëa̧räbo, jabechji̧ ma̧ chiadëri̧ cjiari̧ jo̧rȩtarëreji̧ri̧nȩrȩ, ‘a̧dëräpȩ ju̧ri̧ ji̧dë u̧i̧ ba chiati̧ oa goaquëda, goarijärea̧mi̧dëri̧ a̧dë chjäte ba chia oa goaquëda’ quëna̧ jo̧rȩtaji̧ri̧rȩ.

³⁵ Ado pio ju̧i̧iä ca̧ oti̧, mȩnȩro̧ eami̧ti̧ chjai̧dë oa chjätäräbo, jabechji̧ Ütë tjamo̧ pio ju̧i̧iäpȩmo̧ chjuari̧ quëna̧ pio ju̧i̧ aeno̧mi̧ dari̧ japadëchji̧vä. Chjuari̧ quëna̧pea̧ ji̧ ano̧dë machji̧vä. Jabechji̧ ana̧ri̧ ba ano̧padidibe Ütë tjamo̧ judi, mȩnȩro̧ ji̧dë ma järirä judi. Jabechji̧ ji̧dë ma chjuari̧ quëna̧chji̧jo̧ȩ.

³⁶ Jëreeadëji̧ri̧rȩ ji̧dë ma ma̧ chjua cjo̧ro̧chji̧vä, Ütë tjamo̧ ja̧ ma̧ȩrä chjadëri̧ cjo̧ro̧pea̧ oa, Ütërë ea̧ pio ju̧i̧ nö̧tadäräri̧ japaji̧ri̧rȩ cjo̧ro̧pea̧ oa. Ado mȩnȩro̧ ja̧di dari̧ cjo̧ro̧a̧ oaiä, jabechji̧ Ütërë yo̧ë cji̧däa̧ pio ju̧i̧ chjadëri̧ mitërea̧ dapanȩrȩ.

³⁷ Jabechji̧ ja̧di ta̧rëri̧ go̧ȩpea̧ oa cjiarëremȩde Ütë tjamo̧ ja̧ ma̧ȩ üdë: “Jabomo̧ japamitë boi̧chji̧ chjätä ëte, mȩnȩro̧ jidata̧ pio judi ma̧na̧pade, ji̧dë ma cjiadiädëmȩrȩ.

³⁸ Jabo jabechji̧parȩa̧ oa cjiamȩ pio judi, jabechji̧ duriräpȩmo̧diämi̧ dari̧ japadëpade, jabo jabechji̧ ji̧dë ma chjuari̧ quëna̧mȩrȩ cjo̧ro̧pade judi ma̧na̧rä yuro. Jabo judi duriräpȩmo̧diämi̧ dari̧ japarä judi, goae tjamo̧dëpade coaiä.” Aja̧ ca̧ pumȩ, ja̧di ta̧rëri̧ go̧ȩpea̧ oa cjiade Ütërë yo̧rërea̧ ma̧ȩ üdë.

³⁹ Jabo cjäri̧ marea̧rȩ ca̧ oti̧, a̧ro̧rȩ duriräpȩmo̧diämi̧ dari̧ japaji̧ri̧ pio judiro̧dë marea̧rȩ. Pio a̧ro̧rȩ duriräpȩmo̧diämi̧ dari̧ japea̧ oaiä, bape chjaoa̧ oa cjiapaji̧ri̧ pio judiro̧dë marea̧rȩ, jabo jabechji̧ ji̧dë ma chjuari̧ quëna̧paji̧ri̧ pio judiro̧rea̧rȩ. Ado pio ju̧i̧iä chjadëri̧ chjätärea̧ daparea̧rȩ.