Ebereo Ma̧ȩ 1 - Biblia Pume

Jechu judi ana̧ri̧ na̧rȩrëremȩdiibe Ütë tjamo̧ pio ju̧i̧ chjiari

¹ No̧mȩrä judirä Ütë tjamo̧ judi ji̧ra̧ co ni̧bärëremȩdejȩrȩ ibëa̧ ütëti̧rea̧ pio ji̧ri̧ Ütërë ea jana̧ chjadüa̧ oa ni̧bärëreji̧ri̧ pio ji̧ri̧iä. Cja̧rȩmȩ co maea oa ni̧bädëa̧dejȩrȩ jabo ado cja̧rȩmo̧ doro, cja̧rȩmo̧ gupënȩrä, ado cja̧rȩmo̧ uirä ni̧bärëremȩdejȩrȩ Ütërë ea jana̧ chjadüa̧ oa ni̧bärëreji̧ri̧ pio ji̧ri̧. Aja̧, pumȩ ji̧ra̧ tjamo̧ oa, oëra̧ti̧ oa cjo̧ro̧ji̧ri̧ oa, tjaoëpai̧ dari̧ yürümȩrȩ ma̧ȩ yürüchärëremȩdejȩrȩ ado cja̧rȩmo̧ jono̧ro, ado cja̧rȩmo̧ japamitërä, ui ji̧ra̧ tjamo̧ nö̧ta. Ado pio ji̧ri̧iä ta̧rërëreji̧ri̧dirȩ ibëa̧ ütëti̧rea̧ judiro̧.

² Jabo yaba̧ cjiadiäa̧ japamitërä, Joja pio ju̧i̧iä ano̧ mire ni̧bärëremȩdiibe Ütë tjamo̧ judi. Tjamo̧ davä, Ütërë ea jana̧ chjadüa̧ oa ni̧bärëreji̧ri̧ pio ji̧ri̧iä ni̧bärërea̧ ji̧, jibëa̧ Ja pio ju̧i̧iä ano̧ mire ni̧bädiibe yaba̧. Ado ¿chjiade Joja judi? Chjiadëde, danȩrȩ, Pareapamȩ pio judide. Jabechji̧ Joja pio ju̧i̧iä chjö̧na̧i̧däräti̧ oa pareaparëremȩde Ütë tjamo̧ judi. Tjamo̧ davä. Dabu oa, a̧dë oa, ui oa, chjö̧na̧i̧däräti̧ oa pareaparëremȩde Joja pio ju̧i̧iä. Ado ja̧dëa ji̧ chjö̧na̧i̧däräti̧ oa pareapadäräa̧mȩ pio ju̧i̧ yürüpea̧ ji̧ yo̧ë cji̧därëremȩdejȩ Ütë tjamo̧ judi. Ado ja̧di dari̧ japa ëte, jabechji̧ Joja pio ju̧i̧ Ano̧mȩ tjamo̧ tänȩrëremȩdejȩ. Aja̧, pio judide ca̧ oti̧. Joja üdë Pareapamȩ tjamo̧ pio judide. Joja üdë chjö̧na̧i̧däräti̧ oa tjamo̧ mitëmȩ pio judide. Ado Joja pio ju̧i̧iä ano̧ mire ni̧bädiibe yaba̧ Ütë tjamo̧ judi.

³ Jabechji̧ Joja pio judi na̧rȩdiibe davä Ütë tjamo̧ pio ju̧i̧ chjiari. Jabechji̧ Joja pio ju̧i̧ daea̧ üdë, Ütë tjamo̧ pio ju̧i̧iäpȩmo̧ darea̧de. Jabechji̧ dacho darea̧rä dami̧ dari̧ da tänȩdiibe Jechu judi Ütë tjamo̧ pio ju̧i̧. Jabechji̧ Ütë tjamo̧ pio judimi̧ darë a̧dë chjäte tatari̧ cjiamȩ pio ju̧i̧ na̧rȩdiibe, Ütë tjamo̧ ja̧ chjacjiamȩ tjamo̧rea̧ pio ju̧i̧. Aja̧, jibëa̧ chjadë pio ju̧i̧, jibëa̧ jauëchjarea̧ pio ju̧i̧, a̧dë chjäte tatari̧ cjiamȩ jauëchjarea̧ pio ju̧i̧ ana̧ri̧ na̧rȩdiibe Jechu judi, jabëdiärea̧ decjiari̧. Ado Ütë tjamo̧ pio ju̧i̧ chjiari na̧rȩmȩ pio judi, jabechji̧ jibëa̧ ma̧ȩ jauëchjara̧ pio ju̧ri̧ra̧ chjadëri̧ jidadejȩ jënȩ pareapea̧ chjö̧na̧i̧därä oa. Jabechji̧ ji̧dë ma chjadëri̧ cjiapea̧ oa, goarijächea oa, chjadëri̧ quirë baä quirë baä cjiapea̧ oa jidadejȩ. Ado pio judi, jabechji̧ chadärärëremȩde a̧dë chjäte ba chiaräpȩ ju̧ri̧. Tjamo̧ davä. Pumȩ judiro̧ chjai̧dëri̧ japea̧ pio ju̧i̧ joami̧ dari̧ duridëparȩa̧ pio ju̧i̧ japadärä ëte, jabechji̧ chadärärëremȩde a̧dë chjäte Ütë tjamo̧ pio ju̧i̧ ja̧ mu̧i̧ chjuaräpȩ ju̧ri̧.

Joja judi a̧dëräpȩ cjiaji̧ri̧ mu̧i̧tjoi̧ pio ji̧ri̧ u̧i̧ ba chiade

⁴ Ado ja̧di dari̧ japea̧ pio ju̧i̧iä, Joja judi ji̧dë u̧i̧ ba chiade a̧dëräpȩ cjiaji̧ri̧ mu̧i̧tjoi̧ pio ji̧ri̧iä. Ado ji̧dë u̧i̧ ba chia tara, jabechji̧ a̧dë chjäte ba chiara̧ pio ju̧ri̧ra̧ yo̧rëremȩdejȩ Ütë tjamo̧ judi. Aja̧, a̧dëräpȩ cjiaji̧ri̧ mu̧i̧tjoi̧ pio ji̧ri̧ u̧i̧ ba chia oa yo̧rëremȩdejȩ.

⁵ Jabechji̧ ja̧di ta̧rëri̧ cja̧rȩmȩ co yo̧dë marëremȩdejȩrȩ a̧dëräpȩ cjiaji̧ri̧ mu̧i̧tjoi̧ pio ji̧ri̧, jabo Joja pio ju̧i̧mo̧i̧ yo̧rëremȩdejȩ. Danȩrȩ, ta̧rëchji̧vä: “Aja̧, ca̧ Jarenȩ. Ado na̧ Ama̧i̧pea̧requede” yo̧a̧dejȩ. “Ado pio yaba̧ domȩ oa, ‘jabechji̧ ca̧ Jadida’ quëna̧ jo̧rȩtamȩrȩ yo̧requedemȩ." Aja̧, ja̧di ta̧rëri̧ yo̧mȩrȩ yo̧rëremȩde Ütë tjamo̧ judi Joja pio ju̧i̧ ji̧dë u̧i̧ ba chiara̧ pio ju̧ri̧ra̧. Ado peaja̧di pio yoa ma̧ȩ oa cja̧rȩmȩ co yo̧dëa̧de a̧dëräpȩ cjiaji̧ri̧ mu̧i̧tjoi̧ pio ji̧ri̧ chjiari, jabo Joja pio ju̧i̧ chjiari, dëdë, yo̧rëremȩde. Ta̧rëchji̧vä: “Aja̧, pio coaiäpȩmo̧ Ama̧i̧padique. Ado cüdë pio ju̧i̧iäpȩmo̧ Japareconȩ.” Aja̧, a̧dëräpȩ cjiaji̧ri̧ mu̧i̧tjoi̧ pio ji̧ri̧ chjiari ja̧di ta̧rëri̧ cja̧rȩmȩ co yo̧dërëremȩde Ütë tjamo̧ judi, jabo jibëa̧ Ja pio ju̧i̧ chjiari, dëdë, ja̧di ta̧rëri̧ yo̧rëremȩde ji̧dë u̧i̧ ba chiamȩ pio ju̧i̧ chjiari.

⁶ Ado Ütë tjamo̧ judi Joja yabomȩ pio ju̧i̧ daburäpȩmo̧ ado chjadüro, jabechji̧ pio ju̧i̧iäpȩmo̧ chjacjiamȩri̧ jo̧rȩtatä eamȩrȩ jabërä yo̧rëremȩdejȩrȩ jibëa̧ mu̧i̧tjoi̧ ji̧ri̧, ja̧di ta̧rëri̧ yo̧mȩrȩ: “Aja̧, mȩnȩro̧, a̧dëräpȩ cjiaji̧ri̧ mu̧i̧tjoi̧ pio judiro̧ ütëbodärärë chjacjiamȩri̧ jo̧rȩtatänȩrȩ ca̧ Ja pio ju̧i̧.” Aja̧, Joja oa ado chjadüro, ja̧di dari̧ japatä eamȩrȩ jabërä yo̧rëremȩdejȩrȩ jibëa̧ mu̧i̧tjoi̧ ji̧ri̧ Ütë tjamo̧ judi.

⁷ Ado pio yoa ma̧ȩbo a̧de yo̧rëremȩde a̧dëräpȩ cjiaji̧ri̧ pio ji̧ri̧ chjiari. Ta̧rëchji̧vä ado: “Aja̧, ca̧ mu̧i̧tjoi̧ pio ji̧ri̧, a̧dëräpȩ cjiaji̧ri̧ mu̧i̧tjoi̧ pio ji̧ri̧, jabechji̧ chjadürequedejȩrȩ pjaepami̧ daji̧ri̧ oa, cjo̧dë gärimȩmi̧ daji̧ri̧ oa.” Aja̧, ja̧di ta̧rëri̧ yo̧rëremȩde Ütë tjamo̧ judi a̧dëräpȩ cjiaji̧ri̧ mu̧i̧tjoi̧ pio ji̧ri̧ chjiari.

⁸ Jabo Joja pio ju̧i̧iäpȩmo̧ yo̧a̧ ji̧, ja̧di ta̧rëri̧ yo̧rëremȩdejȩ: “Mȩnȩ Ütë tjamo̧ pio judirenȩ. Ado bucho ana̧ chiri Ütëmȩrȩ cjo̧ro̧parenȩ, yuroparea̧ decjiari̧. Ado pumȩ ütëbo oa, jabechji̧ tjamo̧ yo̧mȩrȩ coëma cjiari̧ japaparenȩjȩrȩ na̧ chja̧oerä cjo̧ro̧ji̧ri̧ pio ji̧ri̧.

⁹ Jabechji̧ mȩnȩ dai chiriräpȩ cjo̧ro̧rërea̧ ji̧, goae tjamo̧remȩdimȩ coëma cjiari̧ cjo̧ro̧rea̧ üdë, jabo goëdëri̧ cjiamȩrȩ daea̧renȩ chjai̧dë oa, na̧ ma̧ȩ oa jiadarea̧ oa. Pio ju̧i̧iä china̧chjari̧ tutimi̧ dari̧ cjiapea̧ oa mitëa̧requedemȩ mȩnȩ chiri Ütëmȩrȩ cjo̧ro̧pea̧ oa” yo̧a̧dejȩ. “Jabechji̧ na̧ Ütëmȩrȩ mitëa̧requedemȩ mȩnȩ o ji̧ri̧iä ji̧dë u̧i̧ ma̧ chiadëri̧ cjiari̧ jo̧rȩtapea̧ oa, mȩnȩ a̧dëräpȩ cjiaji̧ri̧ mu̧i̧tjoi̧ pio ji̧ri̧iä ji̧dë u̧i̧ ba chiaparȩpea̧ oa.” Aja̧, ja̧di ta̧rëri̧ yo̧mȩrȩ yo̧rëremȩde Ütë tjamo̧ judi Pumȩrȩ ara̧ tjamo̧ pio ju̧i̧iäpȩmo̧.

¹⁰ Ado pio yoa ma̧ȩbo a̧de yo̧rëremȩdejȩ: “Danȩ, pio mȩaiä chjö̧na̧i̧rȩ taruparëremȩde, mȩnȩ pearä judirä chjö̧na̧i̧ oa pareaparërea̧ ji̧. Jabechji̧ Ano̧mȩ pio judimȩrȩ dabu oa pareaparëremȩrenȩ, a̧dëbo.

¹¹ Jabo mȩnȩ pareapea̧ üdë goarijäpade. Mȩnȩ goarijädëparenȩ jabo mȩnȩ pareapea̧ üdë, dëdë, goarijäpade. Jabechji̧ chjibo üdë ütama̧i̧pe bagami̧ dari̧ chjadëdëpe bagapade mȩnȩ pareapea̧ pio judi.

¹² Jabechji̧ pumȩ üdë chjibo ina̧rea̧ chjadëdë oa mu̧i̧ cürëmi̧ dari̧ aeno̧parenȩ mȩnȩ pareapea̧ chjö̧na̧i̧ oa. Ado pumȩ üdë jibëa̧ chjibo peaja̧ra̧ pio ju̧ri̧ra̧ ano̧ mire ina̧mi̧ dari̧ ano̧ mire pareapaparenȩ chjö̧na̧i̧ oa, peaja̧ mape bagari̧. Dëdë, mȩnȩ pareapea̧ üdë tjaoëpe jäpade, jabo mȩnȩ, cjäri̧ marenȩ, tjaoëdiä tjaoëdiäpe bagadëmȩrenȩ. Jabechji̧ bucho ana̧mȩrenȩ.” Aja̧, ja̧di ta̧rëri̧ yo̧mȩrȩ yo̧rëremȩdejȩ Joja oa Ütë tjamo̧ judi.

¹³ Ado pio yoa ma̧ȩbo a̧de yo̧rëremȩdejȩ. A̧dëräpȩ cjiaji̧ri̧ mu̧i̧tjoi̧ pio ji̧ri̧ ja̧di ta̧rëri̧ cja̧rȩmȩ co yo̧dëa̧dejȩrȩ, jabo Joja pio ju̧i̧mo̧ maea oa yo̧rëremȩdejȩ. Ta̧rëchji̧vä: “Pio yi charea̧ ba chia tjamo̧räpȩ chavä, ca̧ mu̧i̧ chjua cotoräpȩ ju̧ri̧” yo̧a̧dejȩ. “Ado mȩnȩ pio yi cha nö̧ta, jabechji̧ pio mȩa eadëji̧ri̧ pio ji̧ri̧ boadäräparequedejȩrȩ. Tjamo̧ davä. Pio mȩa dëbëpe chjaoji̧ri̧ pio ji̧ri̧ boadäräparequedejȩrȩ, na̧ tara̧ boë cjaeämi̧ dari̧.” Aja̧, ja̧di ta̧rëri̧ cja̧rȩmȩ co yo̧dërëremȩdejȩrȩ a̧dëräpȩ cjiaji̧ri̧ mu̧i̧tjoi̧ pio ji̧ri̧, jabo Joja pio ju̧i̧mo̧i̧äpȩmo̧ yo̧rëremȩdejȩ.

¹⁴ Ado ja̧dirä judi, ¿yö̧ta dari̧ jo̧rȩtatäreji̧ri̧rea̧rȩ a̧dëräpȩ cjiaji̧ri̧ mu̧i̧tjoi̧ pio ji̧ri̧ chjiari? Yö̧ta dari̧dë, jabechji̧ mu̧i̧tjoi̧ maeadirȩ. Tjo maeadirȩ. Ado Ütë tjamo̧ pio judi chjadüa̧ oa ja̧bepadirȩ chjätärea̧ dapaji̧ri̧ pio ji̧ri̧ chjadëri̧ jidapea̧ oa, pio ji̧ri̧ chjadëri̧ a̧dopea̧ oa.