Domano Ma̧ȩ 9 - Biblia Pume

Ütë tjamo̧ judi, jënȩ jo̧rȩta̧mi̧ mitëdejȩrȩ pumȩ ji̧ri̧

^1-3 Ado cüdë yaba̧ yo̧pea̧ üdë, jabechji̧ coëma cjiari̧ cjiade. Jabechji̧ Quiricho pio judiri ja̧mȩrȩ tjamo̧ri̧ yo̧requededibe. Tjo tjamo̧ pio ju̧i̧ ja̧ chja̧oerä cjiamȩrȩ yo̧requedediibe ca̧ chji̧ üdë cjo̧dërë tüe baämi̧ tarari̧ jo̧rȩtarea̧ decjiari̧. Danȩrȩ, ca̧ pumȩ pio ji̧ri̧ chjiari a̧dë chjäte gitori̧ jo̧retarequede, judio pio ji̧ri̧ chjiari. Jabechji̧ gitori̧ jo̧rȩtarequedejȩrȩ judiro̧ Jechu pio ju̧i̧iäpȩmo̧ quëna̧dëri̧ cjia oaiä. Ado pio ji̧ri̧ ejaro cjiami̧ tarari̧ jo̧rȩtarequedejȩrȩ Abaraa̧ pio judiri ja̧ maea oa, pio coadi ja̧ maea oa. Aja̧, cjatäcjie jo̧rȩtarea̧ decjiari̧ ejaro cjiami̧ tarari̧ jo̧rȩtarequedejȩrȩ. Ado cüdë pio ji̧ri̧ chjiari eami̧ oa tuti japarea̧ daea̧rä judi, dëdë, chjaodëri̧ japatäremȩrequede. Danȩrȩ, Quiricho pio judiri ja̧mȩpea̧requede. Ado pio judiri ja̧dëpe bagarea̧mi̧dëde. Jabechji̧ pio ju̧i̧iä chjuari̧ tutia̧rä cjia tara, jabechji̧ pio judiri ja̧dëpe bagarea̧mi̧dëde. Jabo danȩrȩ, cüdë ca̧ pumȩ pio ji̧ri̧ chjiari ano̧ mire aeno̧a̧ oa cjiarea̧ daea̧rä judicjȩ, Ütë ja̧ ërecjia̧ üdë pio coaiäpȩmo̧ ano̧ mire cjatärea̧ daea̧rä judicjȩ, jabechji̧ chjadëtäremȩde coaiä. Tjamo̧ davä. 'Ma̧ȩ chjádë yürü jirodiibëda' quëna̧dëchji̧coe. Tjamo̧ri̧ yo̧requededibe. Cüdë ca̧ pumȩ pio ji̧ri̧ chjiari ano̧ mire tuti japarea̧ daea̧rä judi, ja̧di dari̧ japatäremȩrequede pio ji̧ri̧ chjiari.

⁴ Jabechji̧ icharaitadirȩ. Ado Ütë tjamo̧ judi mitëa̧ u̧ri̧ pio judiro̧dirȩ. Aja̧, pio ju̧i̧ ja̧dirȩ. Pio ju̧i̧ ja̧pe baga̧dirȩ. Ado pio ji̧ri̧iäpȩmo̧ jibëa̧ jauëchja oa ana̧ri̧ na̧rȩmȩrȩ na̧rȩ chjaorëremȩdejȩrȩ, jibëa̧ tatarea̧ pio ju̧i̧bo. Ado pio ji̧ri̧iäpȩmo̧ jibëa̧ ma̧ȩ oa yürürëremȩdejȩrȩ peaja̧di. Aja̧, judi yo̧ë cji̧därërea̧ ma̧ȩ pio ju̧i̧, Moicherë go̧ȩparërea̧ ma̧ȩ pio ju̧i̧ pio ji̧ri̧iäpȩmo̧ ma yürürëremȩdejȩrȩ. Ado pio jȩaiäpȩmo̧ goe gu̧rori̧ cäë yürüpea̧ oa, pio jȩaiäpȩmo̧ chjacjiamȩri̧ jo̧rȩtaji̧ri̧rȩ cjo̧ro̧pea̧ oa, jabechji̧ chjadëri̧ dabarea̧ yürürëremȩdejȩrȩ. Ba chia tjamo̧ oa yürürëremȩdejȩrȩ.

⁵ Ado danȩrȩ, no̧mȩ tjamo̧ri ja̧ cjo̧ro̧rëreji̧ri̧ taru pio judiri ja̧ maeadirȩ. Taru ba chia tjamo̧ji̧ri̧ pio judiri ja̧ji̧ri̧ maeadirȩ. No̧mȩ cjo̧ro̧rëreji̧ri̧ Ebereo pio judiri ja̧ maeadirȩ. Ado Go̧dü Tänȩmȩ judi peaja̧di pio judiri ja̧de. Pio ji̧ri̧ ja̧ pumȩde. Icharaitarë ara̧ oa pumȩpea̧de. Ado pio ju̧i̧iä yo̧requededibe. Danȩrȩ, a̧dë chjäte tjamo̧ yo̧mȩ Ütë pio judi bucho ana̧ chjacjiamȩ tjamo̧ri̧ jo̧rȩtapea̧ maeade. Pio ju̧i̧ ja̧ chja̧oerämo̧ ji̧dë ma cjo̧ro̧pea̧de. Ja̧ditäde.

⁶ Jabo danȩrȩ ca̧ oti̧, Ütë tjamo̧ judi Icharai pio judiri ja̧ji̧ri̧ pio ji̧ri̧iäpȩmo̧ ji̧ra̧ tjamo̧ oa yürüa̧räbo, ba chia tjamo̧ oa yürüa̧räbo, chjadëri̧ a̧doa̧räbo, jabechji̧ mö̧na̧mi̧ dari̧ cjiadirȩ orë. Jabechji̧ dairäpȩ tutia̧ oa cjiami̧ dari̧ cjiadirȩ. Ado pio ju̧i̧iä ¿yö̧ta dari̧ jo̧rȩtapea̧de? 'Aja, Ütë tjamo̧ judi ji̧ri̧iäpȩmo̧ yürüa̧ ma̧ȩ üdë ¿ba chia tjamo̧dëdida' quëna̧pea̧? Cjäri̧ made ca̧ oti̧, ja̧di dari̧ quëna̧rea̧mi̧dëde. Danȩrȩ, chjadëri̧ ta̧rëchji̧coe. Icharai pio judiri ja̧ji̧ri̧ judiro̧ orë Ütë tjamo̧ ja̧ pumȩdëdirȩ. Jabechji̧ judiro̧ Icharai pio judiri ja̧ji̧ri̧borë, Ütë tjamo̧ ja̧ pumȩdëdirȩ.

⁷ Jabechji̧ judiro̧ Abaraa̧ pio judiri ja̧räbo, cja̧rȩmȩ goe chiaräbo, cja̧rȩmȩ taru chiaräbo, jabechji̧ o judiro̧ Abaraa̧ pio judiri ja̧ tjamo̧dëdirȩ. Ütë tjamo̧ ja̧ pumȩ tjamo̧dëdirȩ. Danȩrȩ, Ütë tjamo̧ judi Abaraa̧ pio ju̧i̧iäpȩmo̧ pearä yo̧ë cji̧därërea̧ ji̧, ja̧di ta̧rëri̧ yo̧mȩrȩ yo̧rëremȩdejȩ: “Aja̧, na̧ ja Icha pio ju̧i̧iä no̧i̧dë tjamo̧padirȩ na̧ea̧ri ja̧paji̧ri̧ pio judiro̧” yo̧mȩrȩ yo̧rëremȩdejȩ.

⁸ Jabo ¿tjana̧ yo̧rëremȩde? Tjana̧ yo̧dë, jabechji̧ Abaraa̧ pio judiri ja̧ji̧ri̧ judiro̧ ütëborë Ütë tjamo̧ ja̧ pumȩ tjamo̧dëdirȩ. 'Jabechji̧ Icharaitarë nö̧ria̧ oaiä Ütë tjamo̧ ja̧ pumȩquëda' quëna̧rea̧mi̧dëde. Icharai pio judiri ja̧yi̧ pio jini̧ ara̧ oaiä, 'chja jabechji̧ Ütë tjamo̧ ja̧ pumȩ jiroquëda' quëna̧rea̧mi̧dëde. Jabechji̧ Abaraa̧ pio judiri ja̧ji̧ri̧borë Ütë tjamo̧ ja̧ u̧ri̧dë maearë cjiapai̧ dadirȩ. Jabo Abaraa̧ pio judiri ja̧ tjamo̧ji̧ri̧ pio judiro̧, jabechji̧ Ütërë yo̧ë cji̧därërea̧ oaiä nö̧ria̧ oa cjiami̧ dari̧ cjiaji̧ri̧ pio judiro̧dirȩ.

⁹ Ado peaja̧dirëremȩde Icha judi. Ütërë yo̧ë cji̧däa̧ pio ju̧i̧iä nö̧ria̧ oa cjiarëremȩde. Danȩrȩ, ja̧di ta̧rëri̧ yo̧mȩrȩ yo̧ë cji̧därëremȩdejȩ Abaraa̧ pio ju̧i̧iäpȩmo̧. “Ütara̧ doro ado jana̧parequede. Ado pio cüdë tänȩa̧ oa arapanȩ Chara jini̧. Üi̧ boi̧ arapanȩ.” Aja̧, ja̧di ta̧rëri̧ yo̧mȩrȩ yo̧ë cji̧därëremȩde Ütë tjamo̧ judi.

¹⁰ Ado Rebeca ja̧ bori̧ pio ji̧ri̧ chjiaribo a̧de yo̧tämi̧ cjiarequededibe. Danȩrȩ, ibëa̧ taru üdë, Icha pio judi bo mai tänȩa̧ oa, jabechji̧ chjara ararëreyi̧nȩ Rebeca jini̧ yo̧a̧ri ja oa.

^11-13 Ado pio jiro chjara judiro̧ jabë ara̧ oa cjiadëa̧rä, Ütë tjamo̧ judi yo̧mȩrȩ yo̧ë cji̧därëremȩdejȩ Rebeca pio ji̧iäpȩmo̧ pio ji̧ri̧ chjiari. Ja̧di ta̧rëri̧ yo̧mȩrȩ yo̧rëremȩdejȩ jabë aradëa̧rä: “Damȩ, na̧ ja durimȩ pio judi yabomȩ pio ju̧i̧ ja̧ chja̧oerä cjo̧ro̧tärea̧ ji̧, jabechji̧ durimȩ pio ju̧i̧ ja̧ chja̧oerä cjo̧ro̧padi yabomȩ pio judi. Pio ju̧i̧ ja̧ mu̧i̧tjoi̧mȩrȩ cjo̧ro̧padi.” Aja̧, ja̧di ta̧rëri̧ yo̧mȩrȩ yo̧rëremȩdejȩ. Ado ju̧i̧ uëri a̧de yo̧mȩrȩ ja̧di ta̧rëri̧ yo̧a̧dejȩ. “Aja̧, Jacobo pio ju̧i̧ mitëa̧cuni̧ jabo Echau pio ju̧i̧ mitëdëa̧cuni̧.” Aja̧, pio jiro ma̧ȩ oa a̧de yo̧rëremȩde Ütë tjamo̧ judi Rebeca ja̧ u̧ri̧ pio ji̧ri̧ chjiari, jabë ara̧ oa cjiadëa̧rä. Ado Ütë tjamo̧ judi, jabechji̧ jibëa̧ ma̧na̧ri̧ jo̧rȩtamȩrȩ mitërëremȩdejȩ Jacobo ju̧i̧, durimȩ pio ju̧i̧. Tjamo̧ davä. Jabë aradëa̧rä, joëräji̧ri̧ judiro̧ jabë eami̧ oa japadëa̧rä, jabë chjai̧dë oa japadëa̧rä, jabë chjadëri̧ japadëa̧rä, jabechji̧ ma̧ȩ yürürëremȩde pio ji̧ri̧ chjiari. Judiro̧ chjadëri̧ japea̧ ba oa, judiro̧ chjai̧dëri̧ japea̧ ba oa mitëdëa̧de, jabo jabechji̧ jibëa̧ ma̧na̧ri̧ jo̧rȩtamȩrȩ mitërëremȩde Ütë tjamo̧ judi Jacobo pio ju̧i̧. Ado jibëa̧ ma̧na̧ri̧ jo̧rȩtamȩrȩ mitëdërëremȩdejȩ Echau pio ju̧i̧.

¹⁴ Ado Ütë tjamo̧ judi ja̧di dari̧ japea̧ oaiä, ¿yö̧ta dari̧ jo̧rȩtapea̧? 'Jabo cjäri̧ madida, oëra̧ japea̧dida, coëma cjiari̧ japadëa̧ jirodida ¿quëna̧pea̧? Cjäri̧ made, ja̧di dari̧ quëna̧rea̧mi̧dëde.

¹⁵ Danȩrȩ, Ütë tjamo̧ judi Moiche pio ju̧i̧iäpȩmo̧ ni̧bärërea̧ ji̧, pio ju̧i̧ jo̧rȩtarequede. Ja̧di ta̧rëri̧ yo̧a̧dejȩ: “Pio cüdë jo̧rȩta̧mi̧ mitërequede pumȩ ju̧i̧ cjäri̧ri̧ cjia dapea̧ oa, chjadëri̧ a̧dopea̧ oa. Ca̧ea̧ ma̧na̧ri̧ jo̧rȩtamȩrȩ mitërequede.” Aja̧, ja̧di ta̧rëri̧ yo̧mȩrȩ yo̧rëremȩde Moiche pio ju̧i̧iäpȩmo̧.

¹⁶ Ado pio ju̧i̧iä yo̧requededibe ca̧ oti̧. Danȩrȩ, pumȩ pio judi ma ja̧didë. Judi chjadëri̧ japea̧ pio ju̧i̧iädë. Judi chjai̧dëri̧ japea̧ pio ju̧i̧iädë. Jabo jabechji̧, Ütë tjamo̧ pio judide. Tjamo̧ mitëmȩ pio judide. Jibëa̧ ma̧na̧ri̧ jo̧rȩtamȩrȩ mitëde cjäri̧ri̧ cjia dapea̧ oa.

¹⁷ Peaja̧di ta̧rëri̧ yo̧diibe ma̧ȩ üdë, Ütë tjamo̧ judi pjarao̧ pio ju̧i̧iäpȩmo̧ yo̧rërea̧ ma̧ȩ pio judi. Ta̧rëchji̧vä: “Jabo danȩ pjarao̧, cüdë mȩa chjaodëri̧ ja̧bo tänȩtärea̧ ji̧, jabechji̧ jabë cjo̧ro̧rea̧ yürürequedemȩ ca̧ jauëchja pio ju̧i̧ ana̧ri̧ na̧rȩ chjaopea̧ oa. Ado mȩa ana̧ri̧ na̧rȩa̧ pio oaiä, 'Aja̧, pio judimo̧dida, a̧dë chjäte ju chiamȩ pio judidida' quëna̧ daba mapadiro̧coe chiri nö̧tai̧ oa cjo̧ro̧ji̧ri̧ pumȩ judiro̧.” Aja̧, ja̧di ta̧rëri̧ yo̧mȩrȩ yo̧rëremȩdejȩ Ütë tjamo̧ judi Ejitoräpȩ cjo̧ro̧mȩ ütë pio ju̧i̧iäpȩmo̧.

¹⁸ Ado pio ju̧i̧iä yo̧requededibe. Danȩrȩ, Ütë tjamo̧ pio judide. Jibëa̧ ma̧na̧ri̧ jo̧rȩtamȩrȩ japamȩde jënȩ ütarë jo̧rȩta̧mi̧. Pio judi ütarë jo̧rȩta̧mi̧ mitëdejȩ pumȩ oa cjäri̧ri̧ cjia dapea̧ oa, chjadëri̧ a̧dopea̧ oa. Ado peaja̧di jënȩ ütarë jo̧rȩta̧mi̧ mitëdejȩ pumȩ oa chjuari̧ jiadapea̧ oa, pjarao̧ pio judimi̧ dari̧ cjiapea̧ oa.

O ji̧ri̧iäpȩmo̧ bape chjaodejȩrȩ Ütë tjamo̧ judi, jabo o ji̧ri̧iäpȩmo̧ cjäri̧ri̧ cjiamȩrȩ dadejȩrȩ

¹⁹ Danȩrȩ, Ütë tjamo̧ judi mitëdejȩrȩ pumȩ ji̧ri̧ jënȩ jo̧rȩta̧mi̧. Ado pio ju̧i̧iä pumȩ judiro̧ orë yo̧pai̧ dadirȩ. "Jabo cjäri̧ marea̧rȩ, a̧ro̧rȩ eami̧ oa japarä, jabechji̧ a̧ro̧rȩ ibëa̧ ma̧na̧ri̧ jo̧rȩtaji̧ri̧rȩ japarea̧ dadë marea̧rȩ, jabo Ütërë jabërä ütarë jo̧rȩtarërea̧ pio ju̧i̧mo̧i̧ japarea̧ darea̧rȩ. Ado pio ju̧i̧iä Ütë tjamo̧ judi bape chjaodëtäremȩdiibe. Jabechji̧ a̧ro̧rȩ Ütërë jabërä ütarë jo̧rȩtarërea̧ duri maea oa japarea̧ darä judi, ibë japa tänȩa̧ pio ju̧i̧mo̧i̧ japarea̧ darä judi, jabechji̧ bape chjaodëtäremȩdiibe" yo̧pai̧ dadirȩ orë.

²⁰ Jabo cjäri̧ madirȩ, ja̧di ta̧rëri̧ yo̧rea̧mi̧dëde. Danȩrȩ, jabomo̧ pumȩrea̧rȩ a̧ro̧rȩ. Ütë tjamo̧ pio ju̧i̧ nö̧tadë marea̧ro̧jo̧ȩ. Ado pio ju̧i̧iäpȩmo̧ ma̧ȩ goaedëra̧ dëbë yo̧rea̧mi̧dëde. Danȩrȩ, dabu yocodë üdë ni̧bärea̧ chiarä judi, pio jȩa jëdano̧mȩ pio ju̧i̧iäpȩmo̧ ni̧bärea̧ chiarä judi, ma̧ȩ goaedëra̧ dëbë yo̧dë matäremȩdejȩ. “¿Jabo tjana̧ ju̧i̧iä ja̧di dari̧ cjiamȩ oa jëdano̧a̧renȩque?” yo̧mȩrȩ yo̧dëtäremȩdejȩ. “Jabo cjäri̧ marenȩque, oëra̧ jëdano̧a̧renȩque” yo̧rea̧mi̧dëde.

²¹ Jabechji̧ dabu yocodë oa jëdano̧mȩ judi, jabechji̧ jënȩ jo̧rȩta̧mi̧ jëdano̧dejȩ. Dabu coëcoëa oa mitë ëte, chopamȩrȩ jëdano̧dejȩ, jënȩ jo̧rȩta̧mi̧. Cja̧rȩmȩ daburemȩra̧ pio ju̧ri̧ra̧ jëdano̧de yo̧a̧ri̧ oa. Cja̧rȩmȩ oa jëdano̧dejȩ ui boeapea̧ oa. Ado chjacjiamȩri̧ jëdano̧dejȩ ba chia dapea̧ oa. Jabo ado cja̧rȩmo̧ oa ba chia dapea̧ oa jëdano̧dëdejȩ. Chjacjiamȩri̧ jëdano̧dëdejȩ. Jabechji̧ chjacjiamȩdëri̧ jëdano̧dejȩ aeno̧pea̧ maearë chapea̧ oa. Aja̧, ja̧di dari̧ japamȩrȩ jëdano̧de jëdano̧mȩ üdë. Dabu yocodë oa japamȩ tara, jabechji̧ jënȩ ütarë jo̧rȩta̧mi̧ jëdano̧de chjadë maea oa.

²² Ado peaja̧dimi̧ dari̧ japade Ütë tjamo̧ judi. O ji̧ri̧ jëdano̧ro, jabechji̧ ba chia dadëpea̧ oa jëdano̧dejȩrȩ dabu yocodëmi̧ da pio ji̧ri̧. Tjamo̧ davä. Jënȩ ërecjia̧ pio ju̧i̧ ana̧ri̧ na̧rȩpea̧ oa, jibëa̧ jauëchja pio ju̧i̧ ana̧ri̧ na̧rȩpea̧ oa jëdano̧dejȩrȩ. Jabo aeno̧pea̧ maearë cjia̧räbo, jabechji̧ jo̧ȩra̧pe bape chjaodëdejȩrȩ jabo ma̧ chjua jo̧rȩtamȩrȩ dadejȩrȩ, japamitë ana̧ tjamo̧ri̧ jidatamȩrȩ.

²³ ¿Jabo tjana̧ ju̧i̧iä chjaodëri̧ bape chjaodëdejȩrȩ Ütë tjamo̧ judi? Tjana̧ ju̧i̧iädë, jabechji̧ pumȩ judiro̧ ütëbodärärë pio jȩa chjiari chjadëri̧ dabatä ea tara, jo̧ȩra̧pe bape chjaodëdejȩrȩ. 'Aja̧, Ütë tjamo̧ judi a̧dë chjäte chjadëdida, jënȩ jabërä cjäri̧ri̧ cjiadarërea̧ pumȩ pio ji̧ri̧iäpȩmo̧ chjadëdiji̧ri̧da, jabechji̧ jënȩ jabërä mitërërea̧ pumȩ pio judiro̧ ütararea̧mi̧dëri̧ ba chiaparȩa̧ oa cjiami̧ dari̧ cjiapadiro̧da, jënȩ jabërä jëdano̧rërea̧ pumȩ pio judiro̧ ütararea̧mi̧dëri̧ tatari̧ cjiari̧ cjiapadiro̧da' quëna̧ dabapea̧ oa, jabechji̧ ma chjua jo̧rȩtamȩrȩ dadejȩrȩ, jo̧ȩra̧pȩ bape chjaodëmȩrȩ.

²⁴ Ado danȩrȩ, Ütë tjamo̧ judi jabërä jëdano̧rërea̧ pumȩ pio judiro̧rea̧rȩ. Pio ibë ëndiärëremȩdiibe davä. Judio pio ji̧ri̧mo̧i̧dë jabo judiodë pio ji̧ri̧bo mitërëremȩdidibe.

²⁵ Ado peaja̧di ta̧rëri̧ yo̧rëremȩde Ütë tjamo̧ judi Ochea pio ju̧i̧iä. Ta̧rëchji̧vä: "Aja̧, ca̧ pumȩdërëreji̧ri̧ pio judiro̧ ca̧ pumȩpea̧dirȩ. Pio ju̧i̧iä, 'Aja̧, ca̧ pumȩdirȩ' yo̧parequede pio ji̧ri̧ chjiari. Ado cüdë eadërërea̧ pumȩ pio ji̧ri̧ ea tjamo̧parequedejȩrȩ.

²⁶ Ado cüdë ji̧ri̧ pearä yo̧rërea̧räpȩ ju̧ri̧ ado chjereno̧ yo̧requedejȩrȩ. Aja̧, cüdë pearä yo̧rërea̧ ji̧, 'Jabo cjäri̧ manȩrȩ, mȩnȩro̧ ca̧ pumȩdënȩrȩ' yo̧rërea̧ ji̧, jabechji̧ 'Cjo̧ro̧rea̧ yürümȩ Ütë pio ju̧i̧ ja̧ u̧ri̧pea̧nȩrȩ' yo̧mȩrȩ ano̧ mire yo̧parequedejȩrȩ." Aja̧, ja̧di ta̧rëri̧ yo̧rëremȩde Ütë tjamo̧ judi judiodë pio ji̧ri̧ chjiari.

²⁷ Ado a̧ro̧rȩ judio pio ji̧ri̧ chjiari ji̧dë u̧i̧ chjadëri̧ dabapea̧ oa, jabechji̧ ja̧di ta̧rëri̧ go̧ȩparëremȩde Ichaia judi pio yoa ma̧ȩ oa. Ta̧rëchji̧vä: "Aja̧, Icharai pio judiri ja̧ji̧ri̧ pio judiro̧ ji̧ra̧ tjamo̧dirȩ. Ui ana̧ yuroro dabu nȩgȩ chorë china̧mi̧ dari̧ cjiadirȩ. Jabo judiro̧ no̧i̧dërë cjiaräbo, jabechji̧ o judiro̧mo̧rȩ ji̧ra̧dërë chjätärea̧ dapadirȩ.

²⁸ Jabechji̧ Jeova judi chjaodëri̧ bape chjaopadejȩrȩ chiriräpȩti̧ oa cjo̧ro̧ji̧ri̧ pio ji̧ri̧, judiro̧ daba quëna̧dërä." Aja̧, ja̧di ta̧rëri̧ yo̧mȩrȩ go̧ȩparëremȩde Ichaia judi judio pio ji̧ri̧ chjiari.

²⁹ Ado peaja̧di ta̧rëri̧ go̧ȩparëremȩde Ichaia judi ado cja̧rȩmo̧ ma̧ȩ oa go̧ȩparërea̧ ji̧. Ta̧rëchji̧vä: "Jabo cjäri̧ madiibe, a̧dë chjäte ju chiamȩ Ano̧mȩ judi china̧chjari̧ tutidëa̧rä judi, ibëa̧ri ja̧ pio ji̧ri̧ o oa china̧chjari̧ tutidëa̧rä judi, jabechji̧ cjiadiärea̧ decjiari̧ yuropea̧täreji̧ri̧rea̧rȩ judi bape chjaorërea̧ oaiä. Tjamo̧ davä. Chodomaräpȩ cjo̧ro̧ji̧ri̧ pio judiro̧ goarijäa̧mi̧ dari̧ goarijäa̧täreji̧ri̧rea̧rȩ goëje ji̧ra̧pe bagarea̧mi̧dëri̧. Tjamo̧ davä, Gomoraräpȩ cjo̧ro̧ji̧ri̧ pio judiro̧mi̧ dari̧ cjiadiäa̧täreji̧ri̧rea̧rȩ, cja̧rȩmȩrȩ a̧dë chiquirea̧ decjiari̧." Aja̧, ja̧di ta̧rëri̧ go̧ȩparëremȩde Ichaia judi icharaita pio ji̧ri̧ chjiari, Ütërë china̧chjari̧ tutia̧ pio ji̧ri̧ chjiari.

Judio judiro̧ jiada̧diro̧jo̧ȩ ma̧ȩ chjadëi̧ oa.

³⁰ ¿Yö̧ta dari̧ jo̧rȩtapea̧de ado ja̧di? Yö̧ta dari̧ jo̧rȩtapea̧dë, jabechji̧ judiodë pio judiro̧ Ütë tjamo̧ ja̧ ma̧ȩrä cjo̧ro̧pea̧ ji̧ järidërërea̧räbo, judiro̧ jabechji̧parȩa̧ oa cjiapea̧ ji̧ järidëa̧räbo, jabechji̧ japamitë chjätä ëte jabechji̧parȩa̧ oa cjiaji̧ri̧pe bagarëreji̧ri̧dirȩ. Aja̧, jënȩro̧ quëna̧ji̧ri̧pea̧ oaiä, jabechji̧parȩa̧ oa cjiaji̧ri̧pea̧dirȩ.

³¹ Jabo ja̧didërëreji̧ri̧dirȩ judio judiro̧. Dëdë, Ütë tjamo̧ pio ju̧i̧iä jabechji̧parȩa̧ oa cjiatämi̧ cjiarëreji̧ri̧dirȩ. Jabo cjäri̧ madirȩ, oëra̧ jo̧rȩtarëreji̧ri̧dirȩ. 'Aja̧, cüdë Moicherë go̧ȩparërea̧ ma̧ȩ pio ju̧i̧ nö̧tadäräri̧ ta̧rëdiäa̧ oaiä, jabechji̧parȩa̧ oa cjiapai̧ daquëda' quëna̧ jo̧rȩtarëreji̧ri̧dirȩ. Pio ju̧i̧iä nȩmo̧diämi̧ dari̧ cjiadiärëreji̧ri̧dirȩ.

³² Jabo ¿tjana̧ ju̧i̧iä nȩmo̧diämi̧ dari̧ cjiadiäa̧dirȩ? Tjana̧ ju̧i̧iädë, jabechji̧ judiro̧ oëra̧ quëna̧ pio oaiä nȩmo̧diämi̧ dari̧ cjiadiäa̧dirȩ. 'Jaeboquëda, cüdë chjadëri̧ japea̧ pio ju̧i̧iä Ütë tjamo̧ ja̧ queri̧räpȩ cjiami̧ dari̧ cjiarea̧ dapaquëda' quëna̧ jo̧rȩtarëreji̧ri̧dirȩ. Judiro̧ quëna̧tärea̧ ji̧ quëna̧dëa̧dirȩ. Pio ju̧i̧iä poëdiämi̧ dari̧ cjiadiärëreji̧ri̧dirȩ. Ado pio ju̧i̧iä yo̧requededibe. Pumȩrȩ ta̧dërä gatë gua ëte cjiadiämi̧ dari̧ cjiadiärëreji̧ri̧dirȩ judiro̧.

³³ Peaja̧di ta̧rëri̧ go̧ȩpea̧ oa cjiade Ütë tjamo̧ ja̧ ma̧ȩ üdë. Ta̧rëchji̧vä: "Danȩrȩ, Jerucharȩräpȩ ju̧ri̧ gatëchämi̧ dari̧ japea̧reconȩ ta̧dëmi̧ da pio ju̧i̧. Jabo pio jiro ta̧dëmi̧ da pio ju̧i̧iä cjatädärämi̧ dari̧ cjiadirȩ pumȩ judiro̧. Pio ju̧i̧ gatë gua ëte, china̧därämi̧ dari̧ cjiapadirȩ. Pio ju̧i̧iä ta anȩno̧mi̧ dari̧ japapadirȩ. Jabo danȩrȩ, pio jiro ta̧dëmi̧ da pio ju̧i̧iäpȩmo̧ quëna̧mȩ judi nȩmo̧diärea̧ decjiari̧ cjiadiäpade, ma̧diä cjiarea̧ decjiari̧." Aja̧, ja̧di ta̧rëri̧ go̧ȩpea̧ oa cjiade Ütë tjamo̧ ja̧ ma̧ȩ üdë.