Domano Ma̧ȩ 8 - Biblia Pume

Jechu pio judiri ja̧ji̧ri̧pea̧rea̧rȩ tjaoëpai̧ dari̧ cjo̧ro̧rea̧mi̧ dari̧

¹ Ja̧di tara yo̧requededibe. A̧ro̧rȩ Jechu Quiricho pio judiri ja̧ mapea̧ tara, jabechji̧ aeno̧rea̧ decjiaräpȩrea̧rȩ yaba̧. Bape chjaorea̧ decjiaräpȩrea̧rȩ. Eami̧ üdë pio ibë chjiari, “Aja̧, aeno̧pea̧ maeadirȩ” yo̧rea̧mi̧dëräpȩrea̧rȩ.

² Jabechji̧ Tjo tjamo̧ ja̧ jauëchja pio oaiä go̧dürea̧ daea̧rea̧rȩ goae tarari̧ ano̧ mire cjo̧ro̧pea̧ oa, Quiricho pio ju̧i̧ nö̧ta cja̧rȩmȩpe bagaji̧ri̧rȩ cjo̧ro̧pea̧ oa. Jabechji̧ a̧ro̧rȩ chjai̧dë ja̧ chja̧oerä cjo̧ro̧rërea̧ ji̧, ja̧bopea̧ chja̧oerä cjo̧ro̧rërea̧ ji̧, go̧düa̧ oa cjiarea̧rȩ yaba̧, Jechu pio judiri ja̧ji̧ri̧rȩ.

³ Jabo Moicherë go̧ȩparërea̧ ma̧ȩ pio ju̧i̧iä chjätärea̧ dadëa̧rea̧rȩ. Pio jiro ma̧ȩ ju̧i̧iä jabechji̧parȩa̧ oa cjiarea̧ dadëa̧rea̧rȩ. Jabechji̧ a̧ro̧rȩ pio jiro ma̧ȩ oa nö̧tadäräri̧ ta̧rëdiärea̧ dadëa̧ oaiä, a̧ro̧rȩ pumȩ ma oaiä, jabechji̧ pio ju̧i̧iä chjätärea̧ dadëa̧rea̧rȩ. Ado pio ju̧i̧iä Ütë tjamo̧ pio judi tuti yürü chjadürëremȩdejȩ jibëa̧ Ja pio ju̧i̧. Aja̧, pumȩpe jäpea̧ oa, pumȩ icjararä cjo̧ro̧pea̧ oa, chjai̧dëri̧ japaji̧ri̧ pumȩ pio ji̧ri̧ ja̧ icjara oa goami̧ dari̧ cjo̧ro̧pea̧ oa, tuti yürü chjadürëremȩdejȩ. Aja̧, chjadürëremȩdejȩ ja̧bopea̧ oa a̧ro̧rȩ chjai̧dë ja̧ chja̧oerä cjo̧ro̧chea oa.

⁴ Ado Ütë tjamo̧ judi ja̧di dari̧ japarërea̧ oaiä, chjai̧dë ja̧ chja̧oeri pio judiri go̧dürea̧ daea̧rea̧rȩ, Moicherë go̧ȩparërea̧ ma̧ȩ coëma pio ju̧i̧ nö̧tadäräri̧ ta̧rëdiäpea̧ oa. Jabechji̧ a̧ro̧rȩ ibëa̧ icjararä chjai̧dë pio ju̧i̧ ja̧ chja̧oerä cjo̧ro̧rërea̧ ji̧, tjaoëpai̧ dari̧ cjo̧ro̧ji̧ri̧pea̧rea̧rȩ yaba̧, Tjo tjamo̧ pio ju̧i̧ ja̧ chja̧oerä cjiaji̧ri̧rȩ.

⁵ Danȩrȩ, jibëa̧ chja̧oerä cjo̧ro̧ji̧ri̧ pio judiro̧ jibëa̧ icjararä chjai̧dë pio judiri cjitëmȩ pio ju̧i̧mo̧i̧ jo̧rȩtaji̧ri̧rȩ cjo̧ro̧dirȩ. Jabo Tjo tjamo̧ ja̧ chja̧oerä cjo̧ro̧ji̧ri̧ pio judiro̧, jabechji̧ Tjo tjamo̧ judi chi̧dëea̧ chja̧oerä cjo̧ro̧dirȩ. Yo̧a̧ri̧ cjo̧ro̧rea̧de ca̧ oti̧. Yo̧a̧ri̧ yo̧mi̧ dade.

⁶ Ado danȩrȩ, Tjo tjamo̧ judi chi̧dëea̧ chja̧oerä cjo̧ro̧ji̧ri̧ pio judiro̧, jabechji̧ bucho ana̧ cjo̧ro̧rea̧ chiadirȩ. Ütë tjamo̧ pio ju̧i̧ ja̧ queri̧räpȩ cjiami̧ dari̧ cjiadirȩ ori̧ bagari̧ ëba cjiarea̧mi̧ dari̧. Jabo o judiro̧, jibëa̧ chja̧oerä cjo̧ro̧ji̧ri̧ pio judiro̧, cjäri̧ madirȩ, bucho ana̧ ja̧bopea̧ maeadirȩ.

⁷ Danȩrȩ, jibëa̧ chja̧oerä cjo̧ro̧ji̧ri̧ judiro̧, jibëa̧ icjararä chjai̧dë pio judiri cjitëmȩ jo̧rȩtarea̧ maeara̧ jo̧rȩtaji̧ri̧ pio judiro̧, Ütë tjamo̧ pio ju̧i̧ dëbëpe chjaodiro̧jo̧ȩ. Ërecjiadiro̧jo̧ȩ. Jiadadiro̧jo̧ȩ. Jabechji̧ Ütë tjamo̧ ja̧ ma̧ȩ pio ju̧i̧ ta̧rëdiädai̧ dadiro̧jo̧ȩ.

⁸ Ado jibëa̧ chja̧oerä cjo̧ro̧ji̧ri̧ pio judiro̧, jabechji̧ goae tjamo̧dëdirȩ Ütë tjamo̧ pio ju̧i̧iä. Peaja̧di pio ju̧i̧iäpȩmo̧ chjadëri̧ japarea̧mi̧dëdiro̧jo̧ȩ.

⁹ Jabo cjäri̧ manȩrȩ ca̧ oti̧, dibëa̧ chja̧oerä cjo̧ro̧dënȩrȩ. Dibëa̧ icjararä chjai̧dë pio judiri cjitëmȩ jo̧rȩtarea̧ maeara̧ jo̧rȩtariä cjo̧ro̧dënȩrȩ. Danȩrȩ, Tjo tjamo̧ pio ju̧i̧ chiaji̧ri̧pea̧nȩrȩ. Ado pio ju̧i̧ ja̧ chja̧oerä cjo̧ro̧ji̧ri̧pea̧nȩrȩ. Danȩrȩ, Quiricho ja̧ Tjo pio ju̧i̧ chiadëji̧ri̧ judiro̧ Quiricho pio judiri ja̧dëdirȩ. Quiricho pio ju̧i̧ ja̧dëdirȩ.

¹⁰ Jabo ja̧didënȩrȩ mȩnȩro̧. Jabechji̧ Quiricho pio judi tjamo̧ri̧ bëparëremȩde dibëa̧ icjararä. Ado pio ju̧i̧iä yo̧requededibe. Ibëa̧ icjara üdë chjai̧dë pio oaiä ja̧borea̧ chiamȩborë, jabechji̧ ibëa̧ tjo üdë goae tarari cjo̧ro̧rea̧ chiade Tjo tjamo̧ pio ju̧i̧iä Ütë tjamo̧ judi pio ibë jabechji̧parȩa̧ tara.

¹¹ Danȩrȩ ca̧ oti̧, ibëa̧ icjara üdë ja̧borea̧ chiade. Jabo Jechu Quirichorë ja̧boa̧remȩ pio ju̧i̧ bëdü tänȩrëremȩ pio judi bëpea̧de ibëa̧ icjararä. Pio ju̧i̧iä yo̧requededibe. A̧ro̧rȩ ji̧dë duri oa ja̧boa̧rä, jabechji̧ ado bëdüpade ibëa̧ icjara üdë ado chjereno̧ cjo̧ro̧pea̧ oa. Tjo tjamo̧ ja̧ jauëchja üdë ibëa̧ icjararä cjiamȩpea̧ oaiä, jabechji̧ bëdüa̧ oa cjia maparea̧rȩ.

¹² Pio ju̧i̧iä yo̧requdedibe ca̧ oti̧. Tjo tjamo̧ pio judi chi̧dëea̧ chja̧oerämo̧ cjo̧ro̧pea̧ chiarea̧rȩ. Jabechji̧ ibëa̧ icjararä chjai̧dë pio ju̧i̧ ba cjiadiämi̧ dari̧ cjiadë marea̧ro̧jo̧ȩ. 'Aja̧, ca̧ icjararä chjai̧dërë yo̧a̧ chja̧oerä cjo̧ro̧pea̧ chiaquëda, pio ju̧i̧ ba cjiadiämi̧ dari̧ cjiacuni̧da' quëna̧ jo̧rȩtadë matäreji̧ri̧rea̧rȩ, jabo jabechji̧, 'Ütë tjamo̧ pio ju̧i̧iäpȩmo̧ ma ba cjiadiämi̧ dari̧ cjiaquëda, pio coaiäpȩmo̧ a̧dë chjäte chjadëri̧ japarërea̧ oaiä pio ju̧i̧iäpȩmo̧ ma ba cjiadiämi̧ dari̧ cjiaquëda' quëna̧ jo̧rȩtaji̧ri̧rȩ Tjo tjamo̧ judi chi̧dëea̧ chja̧oerämo̧ cjo̧ro̧täreji̧ri̧rea̧rȩ ca̧ oti̧.

¹³ Jabechji̧ mȩnȩro̧ dibëa̧ icjararä chjai̧dërë yo̧a̧ chja̧oerä cjo̧ro̧rä judi, tjamo̧ri̧ ja̧bopanȩrȩ. Jabo mȩnȩro̧ Tjo tjamo̧ pio ju̧i̧ ja̧ chja̧oerä cjo̧ro̧rä judi, judi yürüa̧ jauëchja oaiä chjai̧dë pio ju̧i̧ ja̧bo tänȩmi̧ dari̧ japarä judi, jabechji̧ tjamo̧ri̧ cjo̧ro̧panȩrȩ.

¹⁴ Jabechji̧ Tjo tjamo̧rȩ tara tänȩa̧mi̧ cjo̧ro̧ji̧ri̧ judiro̧, yabo ëba baämi̧ dari̧ japamȩ pio ju̧i̧ cho̧rë jämi̧ dari̧ cjo̧ro̧ji̧ri̧ pio judiro̧, jabechji̧ Ütë tjamo̧ ja̧ u̧ri̧ tjamo̧dirȩ.

¹⁵ Ado pio ju̧i̧iä Ütë tjamo̧ judi ibë Tjo tjamo̧ pio ju̧i̧ yürürërea̧ ji̧, jabechji̧ a̧ro̧rȩ ado chjereno̧ chjai̧dë ja̧ mu̧i̧tjoi̧pe bagapea̧ oa yürüdëa̧diibe. Ibë uapa tänȩpea̧ oa yürüdëa̧diibe jabo jabechji̧, Ütë tjamo̧ ja̧ u̧ri̧ maearë chjadëri̧ cjo̧ro̧pea̧ oa yürürëremȩdiibe. Tjamo̧ davä. Tjo tjamo̧ pio judi tänȩa̧ oa, Ütë tjamo̧ ja̧ u̧ri̧pea̧rea̧rȩ. Ado yaba̧ Tjo tjamo̧ pio ju̧i̧iä ni̧bärea̧ darea̧ro̧jo̧ȩ ibëa̧ Ama̧i̧ ju̧i̧. Tjamo̧ davä. Ütë tjamo̧ pio ju̧i̧ “Amai̧” yo̧rea̧ro̧jo̧ȩ yaba̧ a̧ro̧rȩ pio ju̧i̧ ja̧ u̧ri̧pea̧ tara.

¹⁶ Ado Tjo tjamo̧ judi chjadëri a̧dodiibe ibëa̧ tjoro a̧ro̧rȩ coëma cjiari̧ jo̧rȩtapea̧ oa Ama̧i̧ tjamo̧ pio ju̧i̧ chjiari. 'Aja̧, Ütë tjamo̧ pio ju̧i̧ ja̧ u̧ri̧a̧ro̧da, pio ju̧i̧ ja̧ u̧ri̧pea̧a̧ro̧da' quëna̧ jo̧rȩtarea̧ yürüdiibe.

¹⁷ Ado pio ju̧i̧ ja̧ u̧ri̧pea̧ tara, jabechji̧ mitërea̧ daparea̧rȩ a̧dë chjäte ba chia pio ju̧i̧, Ütë tjamo̧ judi a̧dëräpȩ goë boea̧ pio ju̧i̧. Tjamo̧ davä. Pio ibëiäpȩmo̧ yürüpea̧ oa ji̧ra̧ tjamo̧ oa goë boea̧ oa goade. Jabo pio ju̧i̧iämo̧i̧ mitërea̧ dadëparea̧rȩ jabo Quiricho pio ju̧i̧iäbo mitërea̧ daparea̧rȩ. Jabechji̧ Quiricho judi mitëpea̧ pio ju̧i̧bo mitërea̧ daparea̧rȩ. Tjamo̧ davä. Quiricho pio ju̧i̧ nö̧ta mitëpaji̧ri̧rea̧rȩ. Jabo a̧ro̧rȩ pio yoa chirirä jabë cjo̧ro̧a̧ nö̧ta, jabechji̧ conȩda̧ oa cjiapea̧ chiarea̧rȩ. Aja̧, Jechu pio judi conȩda̧ oa cjiarërea̧mi̧ conȩda̧ oa cjiapea̧ chiarea̧rȩ a̧ro̧rȩ pio ju̧i̧ nö̧ta peaja̧di ba chiaparȩa̧ oa cjiami̧ dari̧ cjiapea̧ oa, pio ju̧i̧ nö̧ta a̧dë chjäte tatari̧ cjiari̧ cjiapea̧ oa.

Pio yoa chirirä conȩda̧ oa cjia ëte, ba chiati̧ oa mitërea̧ daparea̧rȩ a̧dëräpȩ

¹⁸ Tjamo̧ri̧ yo̧requededibe ca̧ oti̧. Pio yoa chirirä tjamo̧ri̧ conȩda̧ oa cjiaparea̧rȩ. Tjamo̧ri̧ chjätäparea̧rȩ chjai̧dë pio ju̧i̧. Jabo pio ju̧i̧ chjiari ana̧ tjamo̧ri̧ jo̧rȩtadëpea̧de jabo. Jabechji̧ ji̧dë duri oa Ütë tjamo̧ judi na̧rȩpa tara, judi pio ibëiä jibëa̧ chacjiamȩrea̧ pio ju̧i̧ ana̧ri̧ na̧rȩpa tara, jibëa̧ tatachjarea̧ pio ju̧i̧ ana̧ri̧ na̧rȩpa tara, jabechji̧ a̧ro̧rȩ chjai̧dëri̧ chjätäa̧ pio ju̧i̧ chjiari ana̧ tjamo̧ri̧ jo̧rȩtarea̧mi̧dëde. Jabomo̧ boi̧chji̧mi̧ dapade. Jabomo̧ piodai̧mi̧ dapade, jabo ibëiä na̧rȩpea̧ üdë, ana̧ tjamo̧mi̧ dapade.

¹⁹ Jabechji̧ Ütërë pareaparërea̧ chjö̧na̧i̧rȩ tobo tobo datämi̧ dari̧ cjiade Ütë tjamo̧ ja̧ u̧ri̧ pio ji̧ri̧ tjamo̧ri̧ datämi̧ cjiamȩmi̧ darë. 'Aja̧, Ütë tjamo̧ ja̧ u̧ri̧diro̧da, ado Ütë tjamo̧ judi pio ji̧ri̧iä ana̧ri̧ na̧rȩpadida, pio ju̧i̧ tjamo̧ri̧ dapea̧dida' quëna̧mi̧ dari̧ cjiade, jidatami̧ dari̧, garë dae cjiamȩmi̧ dari̧.

^20-21 Jabechji̧ pio jiro doro Ütë tjamo̧ judi pareaparërea̧ chjö̧na̧i̧rȩ jare ano̧a̧ oa cjiami̧ dari̧ cjiapade. Jabo jabëde jabo. Jabë tabüa̧ oa cjiami̧ dari̧ cjiade. Jabë ja̧borea̧ chiade. Jabë tapuchjape järea̧ chiade. Jabë ja̧bopea̧ chja̧oerä cjiade. Ada̧ judi chjai̧dëri̧ japarërea̧ oaiä, Ütë tjamo̧ pio judi tänȩa̧ oaiä, jabechji̧ ba chiadëmi̧ dari̧ cjiadiärëremȩde pearärërea̧mi̧dëri̧. Jabo ütara̧ doro peaja̧ mape bagari̧ cjiadiäpade. Tamo̧ davä. Ütë tjamo̧ ja̧ chjacjiamȩrea̧ pio judi chjadëri̧ na̧rȩa̧ oa cjiapade pio ju̧i̧ ja̧ u̧ri̧ pio ji̧ri̧iä, Ütërë pareaparërea̧ pio ju̧i̧iäbo. Pio jiro doro Ütërë pareapea̧ üdë chjö̧na̧i̧rȩ jare ano̧mi̧ dari̧ cjiapade Ütë tjamo̧ ja̧ u̧ri̧mi̧ dari̧.

²² Jabechji̧ Ütërë pareapea̧ pio ju̧i̧ chjiari dabarea̧rȩ peadëri ja̧. Jabechji̧ iei̧ jini̧ arapayi̧rȩ querediä tjamo̧ro japarëmi̧ cjiari̧ tode tode cjiami̧ tarari̧ cjiade chiri üdë gitoi̧ dari̧ cjiami̧ da oaiä. Aja̧, iei̧ jini̧ boi̧chji̧ ju̧i̧ jidatami̧ dari̧ jidatade chiri chjuamȩdëpe bagapea̧ ji̧.

²³ Ado Ütërë pareapea̧ pio judimo̧rȩdë, jabo pio a̧ro̧rȩborë tode tode cjiami̧ tarari̧ jidatarea̧rȩ ibëa̧ chji̧ra̧. Jabechji̧ a̧ro̧rȩ Tjo tjamo̧ pio ju̧i̧ chiaji̧ri̧pea̧räbo, Ütë judi ibë yabo yürë cji̧däa̧ pio ju̧i̧ chiaji̧ri̧pea̧räbo, jabechji̧ Ütë judi a̧de yürüpea̧ pio ju̧i̧ jidataji̧ri̧rȩ cjo̧ro̧rea̧rȩ pjärämȩ cjiadiäa̧mȩ pio ju̧i̧ dapea̧ oa, a̧dë chjätë ba chiamȩ pio ju̧i̧ mitërea̧ dapea̧ oa. Jabo danȩrȩ ca̧ oti̧, jabërea̧rȩ. Ada̧ri ja̧ icjararä cjo̧ro̧rea̧rȩ. Chjai̧dë chiamȩ icjararä cjo̧ro̧rea̧rȩ. Ado pio ju̧i̧iä ibëa̧ icjara peaja̧ pio ju̧i̧ tjamo̧ri̧ jidataji̧ri̧rȩ cjo̧ro̧rea̧rȩ jare ano̧mi̧ dari̧ cjo̧ro̧pea̧ oa. Ado pio jiro japamitërä, jabechji̧ Ütë tjamo̧ pio judi mitëdäräa̧ oa cjiami̧ dari̧ cjo̧ro̧parea̧rȩ pio ju̧i̧ ja̧ u̧ri̧ maearë.

²⁴ Aja̧, pio ju̧i̧ jidataji̧ri̧rȩ cjo̧ro̧rea̧rȩ a̧ro̧rȩ pea quëna̧ji̧ri̧pea̧ domȩri ja̧. Jabo jabëde. Jabë baädëa̧rea̧rȩ. Jabë icjara peaja̧ oa mitëdëa̧rea̧rȩ. Pio ju̧i̧iä jidataji̧ri̧rȩ cjo̧ro̧rea̧rȩ. Jabo tjamo̧ davä. A̧ro̧rȩ jabërä a̧dëräpȩ go̧düdäräa̧rä judi, icjara peaja̧ oa mitëa̧ oa goarä judi, cjäri marea̧rȩ, jidatadëtäreji̧ri̧rea̧ro̧jo̧ȩ. Jabo jabë tara, jabë irä dadë tara, jabechji̧ ma̧ chjua jo̧rȩtaji̧ri̧rȩ jidatarea̧rȩ.

²⁵ Tjamo̧ davä. Jabë tara, jabë mitëa̧ oa goadë tara, jabë ibëa̧ dachora̧ irä dadë tara, jabechji̧ ma̧ chjua jo̧rȩtaji̧ri̧rȩ jidatarea̧rȩ jëreeadëji̧ri̧rȩ.

²⁶ Ado a̧ro̧rȩ pio yoa chirirä jabë cjo̧ro̧a̧ nö̧ta, jabechji̧ chjadëri̧ a̧dodiibe Tjo tjamo̧ judi. Danȩrȩ, ju chiadërea̧rȩ. Ado ibëa̧ Amai̧ pio ju̧i̧ ni̧bäpea̧ ji̧ tjamo̧ri̧ dabadërea̧rȩ. Pio ju̧i̧iä chadëri̧ cjo̧dëpea̧ ji̧ dabadërea̧rȩ. Jabo ibëa̧ icjararä bëpera̧pea̧mȩ pio judi chjadëri̧ goë tuti ni̧bädejȩ pio ibë chjiari. Urëdi tjamo̧ oa jo̧rȩtamȩrȩ goë cjo̧dëdejȩ tode tode cjiami̧ dari̧. Pumȩrȩ ni̧bädërea̧ ma̧ȩra̧ pio ju̧ri̧ra̧ ni̧bädejȩ pio ibë jo̧rȩtamȩrȩ.

²⁷ Ado Ütë tjamo̧ judi pumȩ chji̧räpȩmo̧ cjacjarë damȩ tara, jabechji̧ dabade Tjo tjamo̧ judi goë cjo̧dëa̧ pio ju̧i̧ chjiari. 'Aja̧, ja̧di dari̧ jo̧rȩtadida, ja̧di ta̧rëri̧ goë tuti cjo̧dëdicoada, tutia̧ oa cjiaji̧ri̧ pumȩ pio ji̧ri̧ chjiari goë cjo̧dëdicoada, ma̧ȩdëra̧ jabo tode cjiami̧ ta̧rëri̧ goë cjo̧dëdicoada, cüdë jo̧rȩta̧mi̧ cjo̧dëdicoada' quëna̧ jo̧rȩtamȩrȩ ta̧rëdejȩ Tjo tjamo̧ ju̧i̧ Ütë tjamo̧ judi.

²⁸ Pio ju̧i̧iä yo̧requededibe ca̧ oti̧. A̧ro̧rȩ eami̧ chjai̧dë oa chjätärä judi, jabechji̧ chjadëri̧ a̧dodiibe. Danȩrȩ, Ütë tjamo̧ pio ju̧i̧iäpȩmo̧ eaji̧ri̧ pio judiro̧rea̧rȩ. Ütërë ëna̧diäa̧ oa cjiaji̧ri̧ pio judiro̧rea̧rȩ. Judi jo̧rȩta̧mi̧ cjo̧ro̧pea̧ oa mitëa̧ pio judiro̧rea̧rȩ. Pio ju̧i̧ ja̧ chja̧oerä cjo̧ro̧rea̧rȩ. Aja̧, judi ütara̧ chja̧oerämo̧ cjo̧ro̧rea̧rȩ. Ado pio ju̧i̧iä a̧ro̧rȩ eami̧ chjai̧dë oa chjätärä, jabechji̧ ibë chjadëri̧ a̧dorea̧mi̧ dari̧ jëdano̧dejȩ chjadëri̧.

^29-30 Jabechji̧, a̧ro̧rȩ Jechu pio judimi̧ dape bagapea̧ oa ana̧ri̧ jo̧rȩtarëremȩde Ütë tjamo̧ judi pearäri ja̧. Danȩrȩ ca̧ oti̧, pearä judirä Ütë tjamo̧ judi mitërëremȩdejȩrȩ pumȩ ji̧ri̧. Ado judi mitërërea̧ pio ji̧ri̧ china̧chjari̧ tutirëremȩdejȩrȩ jibëa̧ Ja pio judimi̧ dape bagapea̧ oa. Ado judi china̧chjari̧ tutirërea̧ pio ji̧ri̧ ëna̧diärëremȩdejȩrȩ pio jȩaiäpȩmo̧ quëna̧pea̧ oa. Ado ëna̧diäa̧ oa cjiarërea̧ pio ji̧ri̧ jabechji̧parȩrëremȩdejȩrȩ coëma cjia tjamo̧pe bagarea̧mi̧ dari̧. Ado jabechji̧parȩa̧ oa cjiaji̧ri̧ pio ji̧ri̧ a̧dë chjäte tatari̧ cjiaparȩrëremȩdejȩrȩ Jechu pio judimi̧ dari̧ cjiapea̧ oa. Danȩrȩ, Jechu judi yabo ara̧ oa cjiamȩmi̧ dari̧ cjiapea̧ oa, yabomȩ tjamo̧mi̧ dari̧ cjiapea̧ oa, jibëa̧ oti̧ buba tjamo̧ oa ëbapea̧ oa, china̧chjari̧ tutirëremȩdejȩrȩ pio jiro pumȩ ji̧ri̧, a̧ro̧rȩ Jechu pio ju̧i̧ ja̧ ayi̧ma̧i̧ maearë cjo̧ro̧pea̧ oa, Jojadi pio judimi̧ dari̧ cjoro̧pea̧ oa.

Ütë tjamo̧ judi ea̧ chja̧oerä tutia̧ oa cjiarea̧rȩ go̧dürea̧mi̧dëri̧

³¹ Ado pio jiro ma̧ȩ goae oa ta̧rëa̧ oaiä, Ütë tjamo̧ judi pio ibë chjiari tuti japea̧ pio oaiä, ¿chjiarë dëbëpe chjaotäremȩdiibe? ¿Chjiarë acji tai̧mi̧ dari̧ jana̧täremȩdiibe? Cjäri̧ madiibe ca̧ oti̧, eami̧rȩ pio ibëiäpȩmo̧ japarea̧mi̧dëde. Ütë tjamo̧ pio ju̧i̧iä i̧äpë cjiarea̧rȩ. Pio ju̧i̧ ja̧ i̧ärä cjiarea̧rȩ.

³² Ado pio ibë chjiari Joja pio ju̧i̧ tuti yürürëremȩdejȩ ji̧dëri̧. Judi jo̧rȩtarërea̧ ji̧, 'Cjäri̧ macuni̧da, chjadüdëpacuni̧da, pumȩ ja̧ oa ano̧ mire ja̧bopea̧ oa chjadüdëpacuni̧da' quëna̧ jo̧rȩtadëa̧de jabo jabechji̧, tuti yürü chjadürëremȩdejȩ nȩmȩparea̧ decjiari̧. A̧dë chjäte ba chiamȩ pio ju̧i̧ yürürëremȩdejȩ. Ado a̧dë chjäte ba chiamȩ pio ju̧i̧ tuti yürüa̧rä judi, o oa peaja̧di cjäri̧ri̧ cjiamȩrȩ ¿a̧de yürüdëpadiibe? Dëdë, o oa peaja̧di a̧de yürüpadiibe jabëdiärea̧ decjiari̧.

³³ Ado danȩrȩ, Ütë tjamo̧ judi ibë chjiari tuti japamȩ tara, ¿chjiarë aechide yo̧täremȩdiibe pio ibëiäpȩmo̧? Danȩrȩ, Ütë tjamo̧ pio judi mitëa̧ oa cjiarea̧rȩ. Pio judi jabechji̧parȩa̧ oa cjiarea̧rȩ co chjami̧ dari̧. Ado pio ju̧i̧iä jabechji̧, eami̧ üdë pio ibëiäpȩmo̧ aechide yo̧rea̧mi̧dëde.

³⁴ Ado pio ju̧i̧iä iëno̧ë ta̧rërequededibe ca̧ oti̧. ¿Chjiarë aeno̧täremȩdiibe? ¿Chjiarë bape chjaotäremȩdiibe? Jabo cjäri̧ madiibe, eami̧ üdë ja̧di dari̧ japarea̧mi̧dëde. Danȩrȩ, Jechu Quiricho judi pio ibë chjiari ano̧ mire ja̧borëremȩde peadë. A̧ro̧rȩ aeno̧pea̧ chja̧oeri pio judiri go̧dürea̧mi̧ dari̧, bape chjaopea̧ chja̧oeri pio judiri go̧dürea̧mi̧ dari̧ ja̧boa̧de. Ado ja̧boa̧remȩrȩ bëdüa̧de. Ado bëdüa̧ oa cjiamȩrȩ baärëremȩde a̧dëräpȩ ba chia tjamo̧räpȩ chapea̧ oa. Ado danȩrȩ, Ütërë cjiamȩ cotoräpȩ ju̧ri̧ chamȩrȩ chade pio ibë chjiari goë cjo̧dëmȩrȩ. Aja̧, Quiricho pio judide. Pio ibë chjiari tuti japamȩ pio judide. Ado pio ju̧i̧iä ado cja̧rȩmo̧rȩ pio ibëiäpȩmo̧ aeno̧rea̧mi̧dëde.

³⁵ Danȩrȩ ca̧ pumȩ, Quiricho pio judi ea̧ chja̧oerä chjuari̧ tutia̧ oa cjiarea̧rȩ. Jabo pio jiro chja̧oeri pio judiri ¿go̧dürea̧mi̧dëde? ¿Tjana̧rȩ go̧dü tänȩpai̧ dadiibe judi ea̧ chja̧oeri pio judiri? A̧ro̧rȩ mai̧ da chjai̧dëri̧ chjätäa̧ üdë, a̧ro̧rȩ goae tjamo̧dëri̧ chjätäa̧ üdë, ¿go̧dü tänȩdëpadiibe? Ado a̧ro̧rȩ ejaro cjia̧ üdë, a̧ro̧rȩ odai̧ tarari̧ jo̧rȩta̧ üdë Jechu judi ibë ea̧ chja̧oeri pio judiri ¿go̧dü tänȩdëtäremȩdiibe? Ado ta̧mȩcho̧ ja̧boa̧ pio ju̧i̧ chjiari ¿yö̧ta dari̧ jo̧rȩtapea̧? ¿Go̧dü tänȩpai̧ dadiibe? A̧ro̧rȩ chjö̧na̧i̧ti̧ cjäri̧ ja̧boa̧ üdë ¿go̧dü tänȩdëtäremȩdiibe? Ado a̧ro̧rȩ uapai̧ da tjamo̧ri̧ chjätärä judi, judi ibë ea̧ chja̧oeri pio judiri ¿go̧dü tänȩdëtäremȩdiibe? Ado ibë goe chiari̧ japea̧ üdë, ibë ja̧bo tänȩa̧ pio judi ¿go̧dü tänȩdëtäremȩdiibe ca̧ oti̧? Cjäri̧ madiibe, ibë go̧dü tänȩrea̧mi̧dëdiibe.

³⁶ Ado peaja̧di ta̧rëri̧ go̧ȩpea̧ oa cjiade Ütërë yabo yürüa̧ pënȩ ma̧ȩ üdë. Ta̧rëchji̧vä: "Aja̧, a̧ro̧rȩ pio mȩaiäpȩmo̧ quëna̧ji̧ri̧pea̧ dori ja̧ ji̧dë ma ja̧bo tänȩpai̧ ta̧rëri̧ yo̧ë cji̧dädiro̧ibe uapai̧ dari̧. Pio judiri yurori ji̧dë ma conȩdadiro̧ibe pumȩ judiro̧. Jënȩro̧ jo̧rȩta̧mi̧ goaedëti̧ri̧ japadiro̧ibe ado cja̧rȩmo̧ pumȩrȩ tuti japarea̧ decjiari̧. Jabechji̧ ja̧bopamȩ oveja oa japarëmi̧ cjiari̧ japadiro̧ibe." Aja̧ ca̧ oti̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë.

³⁷ Jabo cjäri̧ marea̧rȩ, a̧ro̧rȩ dami̧ti̧ chjai̧dë oa chjätäräbo, jabechji̧ chjadëri̧ tutia̧ oa cjiarea̧rȩ davä, Jechurë ea̧ chja̧oerä. Ado pio ju̧i̧iä jabechji̧, a̧ro̧rȩ eami̧ti̧ chjai̧dë oa chjätäa̧räbo, jabechji̧ boadäräji̧ri̧mi̧ dari̧ cjia marea̧rȩ Jechu pio ju̧i̧iä.

^38-39 Ado pio ju̧i̧iä tjamo̧ri̧ dabamȩrȩ yo̧requededibe ca̧ oti̧. 'Jabechji̧ eami̧ üdë Ütë tjamo̧ judi ea̧ chjaoeri pio judiri go̧dü tänȩpai̧ da jirodicoada' quëna̧rea̧mi̧dëde. Jabechji̧ judi ea̧ chja̧oerä chjuari tutia̧ oa cjiarea̧rȩ go̧dürea̧mi̧dëri̧. Pio ju̧i̧iä yo̧requededibe. Ja̧boa̧ üdë, uapai̧ da tjamo̧ri̧ cjo̧ro̧a̧ üdë, jabechji̧ Ütë tjamo̧ judi ea̧ chja̧oeri pio judiri go̧dü tänȩrea̧mi̧dëdiibe. Ado a̧dëriji̧ri̧ mu̧i̧tjoi̧ judiro̧, yaröca judiro̧, eami̧ti̧ jauëchjaji̧ri̧ judiro̧ peaja̧di go̧dü tänȩrea̧mi̧dë madiro̧ibe. Ado a̧ro̧rȩ pio yoa chirirä eami̧ oa chjätäa̧ üdë, u̧i̧pea̧ oa cjia̧ üdë, oëra̧diäa̧ üdë, ado a̧ro̧rȩ ji̧dë duri oa eami̧ oa chjätäpea̧ üdë, jabechji̧ Ütë tjamo̧ judi ea̧ chja̧oeri pio judiri go̧dü tänȩrea̧ chiadë maeade. Ado uë tjamo̧räpȩ jauëchjaji̧ri̧ judiro̧, ado pio yoa chirirä jauëchjaji̧ri̧ judiro̧, ado eami̧ti̧ jauëchjarë, Ütërë pareapea̧bearȩ, jabechji̧ ibë go̧dü tänȩrea̧mi̧dë madiro̧ibe. Tjamo̧ davä. Ütërë ea̧ chja̧oerä tutia̧ oa cjia tara, a̧ro̧rȩ Jechu Quiricho pio judiri ja̧ji̧ri̧pea̧ tara, jabechji̧ ibë go̧dü tänȩrea̧mi̧dë madiro̧ibe.