Domano Ma̧ȩ 7 - Biblia Pume

Moicherë go̧ȩparërea̧ ma̧ȩrä cjo̧ro̧rërea̧ ji̧, jabechji̧ jare ano̧mi̧ dari̧ cjiade ja̧boa̧ oaiä

¹ Danȩrȩ ca̧ oti̧, chjadëri̧ dabanȩrȩ Moicherë go̧ȩparërea̧ ma̧ȩ pio ju̧i̧ chjiari. Eami̧ pumȩ üdë, pio jiro ma̧ȩrä cjo̧ro̧mȩ pio judi, jabechji̧ pio ju̧i̧ ja̧ chja̧oerä cjo̧ro̧de jënȩ ja̧boa̧rä yuro. Judi ja̧boa̧rämo̧ jare ano̧mi̧ dari̧ cjiade. Pio ju̧i̧ chjadëri̧ dabanȩrȩ mȩnȩro̧.

² Ado iei̧ jini̧, üi̧ ëbayi̧ pio jini̧, jabechji̧ jibëa̧ üi̧ pio ju̧i̧ yurë cji̧däa̧ oa cjiami̧ dari̧ cjianȩ Moicherë go̧ȩparërea̧ ma̧ȩ pio ju̧i̧iä. Aja̧, üi̧ judi ja̧boa̧rä yuro yurë cji̧däa̧ oa cjiami̧ dari̧ cjianȩ. Jabo judi ja̧borä judi, dëdë, jare ano̧mi̧ dari̧ cjianȩ, ado cja̧rȩmo̧ üi̧ oa ano̧ mire ëbarea̧mi̧ dari̧.

³ Jabo jibëa̧ üi̧ üdë jabë ja̧bodëa̧rä ano̧ mire ëbadëpea̧nȩ. Jabo jibëa̧ üi̧ judi jabë ja̧bodëa̧rä ano̧ mire ëbarä judi, chjai̧dëri̧ japanȩ. Ado pumȩ judiro̧ pio ji̧ chjiari yo̧ro, “Aja̧, a̧dë oëadëri̧ cjiayi̧nȩ” yo̧pa. Jabo jibëa̧ üi̧ judi a̧dë ja̧borä judi, jarea̧mi̧ dari̧ cjianȩ ado cja̧rȩmo̧ üi̧ oa ano̧ mire ëbarea̧mi̧ dari̧. Ma̧ȩ pio ju̧i̧iä cäpë cji̧däa̧mi̧ dari̧ cjiarërea̧ ji̧, jare ano̧mi̧ dari̧ cjianȩ.

⁴ Danȩrȩ ca̧ oti̧, peaja̧dirëremȩde pio ibëiä. A̧ro̧rȩ pearä judi Moicherë go̧ȩparërea̧ ma̧ȩrä cjo̧ro̧rëreji̧ri̧rea̧rȩ. Aja̧, pio jiro ma̧ȩ üdë chi̧dëea̧rä cjo̧ro̧rëreji̧ri̧rea̧rȩ, pio ju̧i̧ ja̧ chja̧oerä cjiaji̧ri̧rȩ. Jabechji̧ ibëa̧ üi̧mi̧ darëremȩde. Jabo danȩrȩ, pio ju̧i̧ ja̧ chja̧oerä cjo̧ro̧dë marea̧rȩ yaba̧. A̧dë ja̧boa̧rea̧ro̧jo̧ȩ. Jabechji̧ a̧ro̧rȩ Quiricho pio ju̧i̧ ja̧ icjararä cara̧ oa cjia̧ oaiä, jabechji̧ ja̧boa̧rea̧rȩ pio ju̧i̧ nö̧ta. Chia ja̧borëremȩdiibe. Ado chia bëdürëremȩdiibe peaja̧di a̧ro̧rȩ tjaoëpai̧ dari̧ cjo̧ro̧pea̧ oa. Jabechji̧ ibëa̧ üi̧mi̧ darëremȩ pio ju̧i̧ ëbami̧ dari̧ cjiarërea̧ ji̧, Quiricho pio ju̧i̧ ano̧ mire ëbami̧ dari̧ cjiarea̧rȩ. Aja̧, Jechu pio ju̧i̧iä bëdüa̧ oa cjiarea̧rȩ yaba̧, Ütë tjamo̧ pio ju̧i̧ ja̧ oa chjadëri̧ na̧rȩji̧ri̧rȩ cjo̧ro̧pea̧ oa, jurarea̧ ji̧ra̧ tjamo̧ oa chiarea̧mi̧ dari̧.

⁵ Jabo a̧ro̧rȩ jabë quëna̧dëa̧rä, jabechji̧ ibëa̧ icjararä chjai̧dërë yo̧a̧ chja̧oerämo̧ cjo̧ro̧rëreji̧ri̧rea̧rȩ. Chjai̧dëri̧ japatämi̧ cjiamȩ jo̧rȩtarea̧ maeara̧ jo̧rȩtarëreji̧ri̧rea̧rȩ ji̧dë ma chjai̧dëri jo̧rȩtaji̧ri̧rȩ. Ado Moicherë go̧ȩparërea̧ ma̧ȩ pio ju̧i̧ ta̧rëa̧ oaiä, 'Aja̧, tüdüa̧mi̧ darä cjo̧ro̧tämi̧ cjiaquëda' quëna̧pe bagadëa̧rea̧rȩ, jabo jabechji̧ ji̧dë u̧i̧ chjai̧dë oa japatämi̧ cjiaji̧ri̧pea̧rea̧rȩ. Ado a̧ro̧rȩ chjai̧dëri̧ japea̧ üdë, jabechji̧ ja̧bopea̧ made.

⁶ Jabo yaba̧ Moicherë go̧ȩparërea̧ ma̧ȩrä cjo̧ro̧dëpea̧rea̧rȩ. Pio jiro ma̧ȩra̧ tabüa̧ oa cjiami̧ dari̧ cjiarërea̧ ji̧, jabechji̧ jare ano̧mi̧ dari̧ japarëremȩdiibe Ütë tjamo judi. Ado chaärea̧ bëmi̧ daräpȩ cjo̧ro̧ tänȩmi̧ dari̧ japarëremȩ pio ju̧i̧ a̧dë ja̧boa̧rea̧ro̧jo̧ȩ Jechu pio ju̧i̧iä. Ado tjaoëpai̧ dari̧ cjo̧ro̧rea̧rȩ yaba̧. Tjamo̧ davä. Moicherë go̧ȩparërea̧ ma̧ȩrä cjo̧ro̧rërea̧ ji̧, järea̧ no̧ pea chjarä ano̧ mire tai̧mi̧ dari̧ cjo̧ro̧ji̧ri̧pea̧rea̧rȩ, Tjo tjamo̧ pio judi chi̧dëea̧ chja̧oerä cjiaji̧ri̧rȩ.

'Moicherë go̧ȩparërea̧ ma̧ȩ üdë ba chia tjamo̧dë jirodida' quëna̧rea̧mi̧dëde

⁷ Ja̧dirä judi, ¿yö̧ta dari̧ jo̧rȩtatäreji̧ri̧rea̧rȩ Moicherë go̧ȩparërea̧ ma̧ȩ pio ju̧i̧ chjiari? “Chjai̧dëde” ¿yo̧pea̧? “Ba chia tjamo̧dëde” ¿yo̧pea̧? Cjäri̧ made ca̧ oti̧, ja̧di dari̧ jo̧rȩtarea̧mi̧dëde. Danȩrȩ, Moicherë go̧ȩparërea̧ ma̧ȩ pio judi chjadëri̧ a̧dorëremȩdique. Pio jiro ma̧ȩ oaiä na̧e chiapea̧requede pio coa chjiari. Tjamo̧ davä. Cüdë pearä judi dae ja̧bo damȩrȩ cjo̧ro̧rërea̧ ji̧, 'Jabechji̧ chjai̧dëri̧ japea̧quëda, ca̧ea̧dë pio ju̧i̧ dae ja̧bo daea̧ üdë chjai̧dëdida' quëna̧dërëremȩrequede. Jabo pio jiro ma̧ȩ oaiä, “dae ja̧bo dadëchji̧vä” yo̧mȩ ma̧ȩ pio ju̧i̧ ta̧rëa̧ oaiä, 'jabechji̧ chjai̧dëri̧ japamȩrȩ dopaquëda' quëna̧ jo̧rȩtamȩpea̧requede.

⁸ Jabo cjäri̧ marequede. Ca̧ icjararä chjai̧dë üdë goae tarari̧ dëbëpe chjaorëremȩdejȩ Moicherë go̧ȩparërea̧ ma̧ȩ pio ju̧i̧. Ea tjamo̧dëa̧dejȩ. Jabechji̧ “dae ja̧bo dadëchji̧vä” yo̧mȩ ma̧ȩ pio ju̧i̧ ta̧rëa̧ oaiä, ji̧dë u̧i̧ järipea̧de dae ja̧bo dae ja̧bo dapea̧ ji̧. Tjamo davä. Ca̧ icjararä chjai̧dë üdë mo̧a̧mi̧ dari̧ cjiarërea̧ ji̧, bëdüa̧mi̧ dari̧ cjiadiärëremȩde davä “dae ja̧bo dadëchji̧vä” yo̧mȩ ma̧ȩ pio ju̧i̧ ta̧rëa̧ oaiä. Ado pio ju̧i̧iä dami̧ti̧ oa dae ja̧bo dae ja̧bo dae chjaomȩpea̧requede. Pio ju̧i̧iä yo̧requededibe. Moicherë go̧ȩparërea̧ ma̧ȩ pio ju̧i̧iä bëdümi̧ dari̧ cjiarëremȩde ibëa̧ icjararä chjai̧dë üdë, chjai̧dë pio ju̧i̧ a̧dë chjäte japapea̧ oa.

⁹ Danȩrȩ, cüdë pearä judi Moicherë go̧ȩparërea̧ ma̧ȩ pio ju̧i̧ jabë dabadëa̧rä, jabechji̧ 'pumȩ chjadëquëda, chjadëri̧ dopaquëda' quëna̧ jo̧rȩtamȩrȩ cjo̧ro̧rëremȩrequede. Jabo ja̧dëa ji̧ cüdë ma̧ȩ oa ta̧rëa̧ oaiä, cjäri̧ marequede, tjaoëpai̧ dari̧ jo̧rȩtamȩpea̧requede. 'Jabo cjäri̧ maquëda, pumȩ chjai̧dëquëda, chjai̧dë oa jape chjaomȩrȩ dopaquëda, ja̧bopea̧ maearë dopaquëda' quëna̧ jo̧rȩtamȩpea̧requede.

¹⁰ Cüdë ma̧ȩ oa pearä ta̧rërërea̧ ji̧, 'Aja̧, pio jiro ma̧ȩ oa ta̧rëdiäa̧ oaiä bucho ana̧ cjo̧ro̧rea̧ yürüpadicoada' quëna̧mȩpea̧requede. Jabo cjäri̧ madique. 'Ja̧borea̧ pio ju̧i̧mo̧i̧ nö̧tamȩrȩ dopaquëda' quëna̧ jo̧rȩta tänȩa̧dique nö̧tadäräri̧ japarea̧ dadëa̧ oaiä.

¹¹ Danȩrȩ, ca̧ icjararä chjai̧dë üdë u̧i̧pea̧dique. Moicherë go̧ȩparërea̧ ma̧ȩ pio ju̧i̧ ta̧rëdiäa̧ oaiä, 'Aja̧, bucho ana̧ cjo̧ro̧rea̧ dapaquëda' quëna̧ jo̧rȩta tänȩa̧dique. Jabo cjäri̧ madique. Bucho ana̧ cjo̧ro̧rea̧ yürüdëa̧dique jabo 'ja̧bopea̧ pio ju̧i̧mo̧i̧ nö̧taquëda' quëna̧ jo̧rȩta tänȩa̧dique ji̧dëri̧.

¹² Pio ju̧i̧iä jabechji̧, Moicherë go̧ȩparërea̧ ma̧ȩ üdë chjadëde. Ütë tjamo̧ pio ju̧i̧ ja̧de. Coëma cjiari̧ cjiade.

¹³ Jabo ¿yö̧ta dari̧ jo̧rȩtapea̧de pio jiro ma̧ȩ pio ju̧i̧ chjiari? Coa ja̧boa̧mi̧ dari̧ cjiadiä tänȩrëremȩ ma̧ȩ ¿pio judidida quëna̧pea̧? Cjäri̧ made ca̧ oti̧, ja̧di dari̧ quëna̧rea̧mi̧dëde. Coa ja̧boa̧mi̧ dari̧ cjiadiä tänȩa̧ ma ja̧didë, jabo ca̧ icjararä chjai̧dë pio judide. Ado Moicherë go̧ȩparërea̧ ma̧ȩ pio ju̧i̧iä chjadëri̧ na̧rȩa̧ oa cjiami̧ dari̧ cjiarëremȩde ca̧ icjararä chjai̧dë pio judi, 'a̧dë chjäte chjadëdëdida' quëna̧rea̧mi̧ dari̧. Aja̧, ma̧ȩ chjadë pio ju̧i̧iä ana̧ri̧ na̧rȩa̧ oa cjiami̧ dari̧ cjiarëremȩde ji̧dë ma chjai̧dëri̧ japea̧ oaiä, ma̧ȩ oa nö̧tadäräri̧ ta̧rëdiädëa̧ oaiä. Ado pio judi tjamo̧de davä, coa ja̧bo tänȩmȩ judi, Moicherë go̧ȩparërea̧ ma̧ȩ pio judidë. Ado pio ju̧i̧iä yo̧requededibe ca̧ oti̧. Moicherë go̧ȩparërea̧ ma̧ȩ üdë chjadëde, jabo ibëa̧ icjararä chjai̧dë üdë ma̧i̧ da chjai̧dëde.

Ibëa̧ icjararä chjai̧dë üdë goae tarari̧ dëbëpe chjaodiibe

¹⁴ Chjadëri̧ dabarea̧rȩ Moicherë go̧ȩparërea̧ ma̧ȩ pio ju̧i̧ chjiari. Ütë tjamo̧ pio judi yürüa̧ ma̧ȩde. Pio judiri ja̧de. Jabo cjäri̧ marequede. Jabomo̧ pumȩrequede. Ado icjararämȩ tara ju baebaeami̧ dari̧ cjo̧ro̧requede, chjai̧dë pio ju̧i̧ ja̧ mu̧i̧tjoi̧mi̧ dari̧.

¹⁵ Ado pio ju̧i̧iä aja̧pe chjaorequede davä chjai̧dë pio ju̧i̧. Jabo goaedëdique jabo. Chjai̧dë pio ju̧i̧ japapea̧ ji̧ goae tjamo̧dëdique. Jabo yo̧a̧ri̧ chji̧ chiami̧ dari̧ jo̧rȩtarequede jabo. Cüdë japatärea̧ pio ju̧i̧ japadëreconȩ, jabo cüdë japadëtärea̧ pio ju̧i̧ ji̧dë ma japareconȩ ji̧dëri̧.

¹⁶ Ütë tjamo̧ judi yürüa̧ ma̧ȩ üdë chjadëde. Ba chiade. Ado pio jiro ma̧ȩ pio ju̧i̧ ta̧rëdiätämi̧ cjiareconȩ. Jabo cjäri̧ marequede. Ji̧dë ma jiadareconȩ jabo.

¹⁷ Jabo chjai̧dëri̧ jape cjiamȩ pio judi tjamo̧dërequede jabo. Pio judidërequede. Ado cja̧rȩmo̧de. Ca̧ icjararä chjai̧dë pio judide. Pio cüdëdë.

¹⁸ Ado ca̧ icjararä chjai̧dë pio ju̧i̧ chjiari chjadëri̧ dabarequede. Danȩrȩ, a̧dë chjäte chjai̧dëde. Chjadëri̧ japarea̧ chiadë maeade. Ado pio ju̧i̧iä yo̧requededibe. Cüdë ca̧ chja̧oerä cjo̧ro̧ro, jabechji̧ chjadëri̧ japatämi̧ cjiamȩborë chjai̧dë pio ju̧i̧mo̧i̧ japamȩrȩ cjo̧ro̧requede.

¹⁹ Jabechji̧ cüdë chjadëri̧ japatämi̧ cjia̧ pio ju̧i̧ japadëreconȩ, jabo cüdë japadëri̧ cjia̧ pio ju̧i̧ jape cjiareconȩ chjai̧dë pio ju̧i̧.

²⁰ Pio ju̧i̧iä yo̧requededibe ado. Cüdë chjai̧dë oa japadëri̧ cjia̧ pio ju̧i̧ japarä judi, pio judi tjamo̧dërequede. Tjamo̧ davä. Pio judi tjamo̧dërequede jabo ca̧ icjararä chjai̧dë pio judide. Ca̧ icararä chjai̧dëri̧ japatämi̧ cjiamȩ pio judide.

²¹ Ado pio ju̧i̧iä na̧e chia tjamo̧pea̧requede pio coa chjiari. Jabechji̧ cüdë chjadëri japatämi̧ cjiamȩborë ji̧dë ma chjai̧dë pio ju̧i̧ japareconȩ.

²² Jabo ca̧ tjoro, dëdë, a̧dë chjäte ma̧ chiadëri̧ cjiari̧ jo̧rȩtareconȩ Ütë tjamo̧ ja̧ ma̧ȩ oa, pio judiri ma̧na̧mȩ ma̧ȩ oa.

²³ Jabo ca̧ icjararä chjai̧dë üdë, cjäri̧ madique, ma̧i̧ dari̧ dëbëpe chjaomi̧ dari̧ japadique ca̧ tjo oa, Ütë tjamo̧ ja̧ ma̧ȩ oa tjamo̧ri̧ eamȩ oa. Aja̧, ju chia tjamo̧mi̧ darë acji tai̧mi̧ dari̧ japadique boadärätämi̧ cjiamȩrȩ. Mai̧ dari̧ japatadique cüdë chaäa̧ oa cjiami̧ dari̧ cjo̧ro̧pea̧ oa pio ju̧i̧ ja̧ chja̧oerä.

²⁴ Jabo cjäri̧ marequede. A̧dë chjäte goae tjamo̧dëri̧ cjo̧ro̧requede pio yoa icjararä, ja̧borea̧ chiamȩ icjararä, chjai̧dë chiamȩ icjararä. Jabo pio ju̧i̧ ja̧ chja̧oerä cjo̧ro̧chea oa, ¿chjiaiä go̧dürea̧ datäremȩrequede cüdë?

²⁵ Chjiaiädë, danȩrȩ, Jechu Quiricho pio ju̧i̧iä go̧dürea̧ dapai̧ darequede. Ano̧mȩ pio ju̧i̧iä go̧dürea̧ dapai̧ darequede. Aja̧ ca̧ oti̧, pio ju̧i̧iä go̧dürea̧ daea̧requede. Tjamo̧ davä. Pio ju̧i̧iä go̧dürea̧ daea̧requede ca̧ icjararä chjai̧dë pio ju̧i̧ ja̧ chja̧oerä cjo̧ro̧chea oa. Ado pio ju̧i̧iä 'Aja̧, Ütë tjamo̧ judi a̧dë chjäte chjadëri̧ japea̧dicoada' quëna̧ jo̧rȩtareconȩ. Ado pio ju̧i̧iä ja̧di dari̧ cjo̧ro̧requede yaba̧. Chjarapë jo̧rȩtarea̧ chiamȩrȩ doparequede. Ca̧ chji̧ peaja̧ra̧ jo̧rȩtarä judi, jabechji̧ Ütë tjamo̧ pio ju̧i̧ ja̧ ma̧ȩ oa ta̧rëdiämȩrȩ cjo̧ro̧requede. Jabo ca̧ icjararä chjai̧dë pio ju̧i̧ ja̧ chja̧oerä cjo̧ro̧rä judi, cjäri̧ marequede, chjai̧dë pio ju̧i̧ japamȩrȩ cjo̧ro̧requede.