Domano Ma̧ȩ 6 - Biblia Pume

Jechu judi chia ja̧borëremȩdiibe a̧ro̧rȩ pea chjari̧ cjo̧ro̧rea̧mi̧ dari̧

¹ Ja̧dirä judi, Ütë tjamo̧ judi pio ibë ütararea̧mi̧dëri̧ ea tara ¿yö̧ta dari̧ cjo̧ro̧täreji̧ri̧rȩarȩ? Chjai̧dë oa jape cjiaji̧ri̧rȩ ¿cjo̧ro̧pea̧? Ütërë cjäri̧ri̧ cjia da̧ üdë pio ibëiäpȩmo̧ ji̧dë u̧i̧ ji̧ra̧pe bagapea̧ oa, ¿chjai̧dëri̧ jape cjiaji̧ri̧rȩ ¿cjo̧ro̧pea̧?

² Jaebo chjai̧ dadë. Ja̧di dari̧ cjo̧ro̧rea̧mi̧dëde. Danȩrȩ, chjai̧dërë yo̧a̧ chja̧oeri pio judiri go̧düa̧rea̧rȩ. Chjai̧dë pio ju̧i̧ a̧dë ja̧boa̧rea̧ro̧jo̧ȩ Jechu pio ju̧i̧ nö̧ta. Ado pio ju̧i̧iä iëno̧ë ta̧rërequededibe. A̧ro̧rȩ chjai̧dë pio ju̧i̧ tjamo̧ri̧ a̧dë ja̧boa̧rä judi, ¿tjana̧ ju̧i̧iä ado chjereno̧ chjai̧dë oa jape cjiaji̧ri̧rȩ cjo̧ro̧täreji̧ri̧rea̧rȩ?

³ Danȩrȩ, mȩnȩro̧ dabapea̧ pio ju̧i̧ go̧ȩpe chjadürequededibe. Uirä chudami̧ dari̧ go̧e cjaeä chudarëremȩdiibe Tjo tjamo̧ judi Jechu Quirichoro. Ado pio ju̧i̧iä Jechuro go̧e cjaeä chuda̧ oa cjiarea̧rȩ pio ju̧i̧ nö̧ta cja̧rȩmȩpe bagari̧. Jabechji̧ ibëa̧pea̧de. Ado pio ju̧i̧ia jabechji̧, ja̧borëreji̧ri̧rea̧rȩ pio ju̧i̧ nö̧ta. Aja̧, chia ja̧borëremȩdiibe.

⁴ Jabechji̧ ibëa̧ üdë ibë chia ja̧boa̧ oaiä, jabechji̧ na̧ra̧ oa cjiarëreji̧ri̧rea̧rȩ pio ju̧i̧ nö̧ta. ¿Jabo tjana̧ ju̧i̧iä ëba ja̧borëremȩdiibe? ¿Tjana̧ ju̧i̧iädë, jabechji̧ pio ibë chia bëdüpea̧ oa, a̧ro̧rȩ tjaoëpai̧ dari̧ cjo̧ro̧pea̧ oa ëba ja̧borëremȩdiibe. Tjamo̧ davä. Ibëa̧ Amai̧ judi Quiricho pio ju̧i̧ bëdü tänȩrërea̧mi̧, jibëa̧ jauëchja chjacjiamȩra̧ pio ju̧ri̧ra̧ bëdü tänȩrërea̧mi̧ bëdü tänȩrëremȩdiibe peaja̧di a̧ro̧rȩ pea chjari̧ cjo̧ro̧pea̧ oa, tjaoëpai̧ dari̧ cjo̧ro̧pea̧ oa.

⁵ Danȩrȩ ca̧ oti̧, tjamo̧ri̧ yo̧requededibe. Jechu pio ju̧i̧ nö̧ta cja̧rȩmȩpe bagari̧ cara̧ oa cjia̧ oaiä, jabechji̧ tjamo̧ri̧ chia ja̧borëremȩdiibe. Ado ibë tjamo̧ri̧ chia ja̧boa̧rä judi, peaja̧di tjamo̧ri̧ chia bëdürëremȩdiibe pio jȩa nö̧ta cja̧rȩmȩpe bagari̧ cjiaji̧ri̧ oa.

⁶ Ado pio ju̧i̧iä yo̧requededibe. Ibëa̧ pumȩrëremȩ üdë, Ada̧ri ja̧ pumȩrëremȩ pio judi toro cji̧däa̧ oa cjiarëremȩde Jechu pio ju̧i̧ nö̧ta ja̧bopea̧ oa. Tjamo̧ davä. Ja̧boa̧de. A̧ro̧rȩ chjai̧dë ja̧ chja̧oerä cjo̧ro̧chea oa, ibëa̧ chji̧ üdë chjai̧dë ja̧ chja̧oerä jo̧rȩtachea oa ja̧borëremȩde, a̧ro̧rȩ chjai̧dë ja̧ mu̧i̧tjoi̧dëji̧ri̧rȩ ano̧ mire cjo̧ro̧pea̧ oa.

⁷ Danȩrȩ, ja̧boa̧mȩ judi chjai̧dë oa japarea̧mi̧dëde. Na̧ra̧ oa cjiamȩ judi chjai̧dë oa japapea̧ ji̧ jo̧rȩtadëde. Peaja̧di dari̧ cjiade pio ibëiä yaba̧. Danȩrȩ, Jechu pio ju̧i̧iä ja̧borëreji̧ri̧rea̧rȩ. Ado pio ju̧i̧iä chjai̧dërë yo̧a̧ chja̧oeri pio judiri go̧düa̧ oa cjiarea̧rȩ jare chjadüa̧ cjiami̧ dari̧.

⁸ Ja̧di tara a̧ro̧rȩ Quiricho pio ju̧i̧ nö̧ta ja̧boa̧ oa cjia tara, jabechji̧ pio ju̧i̧ nö̧ta cjo̧ro̧rea̧ daparea̧rȩ peaja̧di. Pio ju̧i̧iä yo̧requededibe. A̧ro̧rȩ pearä cjo̧ro̧rërea̧mi̧ cjo̧ro̧rea̧mi̧dëde. Danȩrȩ, jare anoa̧ oa cjiami̧ dari̧ cjiarea̧rȩ. Chjai̧dëra̧ pio ju̧ri̧ra̧ tabüa̧ oa cjiami̧ dari̧ cjiarërea̧ ji̧, jare chjadüa̧ oa cjiami̧ dari̧ cjiarea̧rȩ Quiricho pio ju̧i̧ nö̧ta ja̧boa̧ oaiä. Ado yaba̧, Quiricho pio ju̧i̧ nö̧ta cjo̧ro̧a̧ oaiä, jabechji̧ ju chiarea̧ daea̧rea̧rȩ chjadë pio ju̧i̧ mitëji̧ri̧rȩ cjo̧ro̧pea̧ oa.

⁹ Quiricho judi ja̧bo ëte bëdürëremȩde bucho ana̧ ado chjereno̧ ja̧borea̧mi̧dëri̧. Pio ju̧i̧ dabarea̧rȩ. Tjamo̧ davä. Ja̧boa̧ chja̧oeri pio judiri go̧düa̧mȩrȩ bëdürëremȩde. Ja̧borea̧ üdë boadärädai̧ dadejȩ yaba̧. Jabechji̧, ja̧borea̧ ju̧i̧ u̧i̧ ju chiade. Pio ju̧i̧iä ado chjereno̧ ja̧bodëpade.

¹⁰ ¿Tjana̧ ju̧i̧iä ado chjereno̧ ja̧bodëpade? Tjana̧ ju̧i̧iädë, jabechji̧ chjai̧dë ja̧ chja̧oeri pio judiri go̧düa̧ oaiä, ado chjereno̧ ja̧bodëpade. Chjai̧dë pio ju̧i̧ a̧dë ja̧boa̧ oaiä ado chjereno̧ ja̧bodëpade. Danȩrȩ, Jechu judi pumȩ ütëbodärä ja̧ chjai̧dë pio ju̧i̧ tuti aramȩrȩ ja̧borërea̧ duri oa bëdürëremȩde ado chjereno̧ ja̧bodëpea̧ oa, ado chjereno̧ chjai̧dë oa tuti aradëpea̧ oa. Jabechji̧ pio jiro chja̧oeri pio judiri go̧düa̧de. Ado yaba̧ bëdüa̧ oa cjiamȩrȩ cjo̧ro̧de, Ütë tjamo̧ pio ju̧i̧ nö̧ta ori̧ bagari̧ ëba cjiarea̧ damȩrȩ.

¹¹ Ado peaja̧di dari̧ cjiarea̧rȩ ca̧ oti̧. Ado pio ju̧i̧iä ja̧di dari̧ jo̧rȩtatäreji̧ri̧rea̧rȩ pio ibë chjiari. 'Aja̧, Jechu pio ju̧i̧iä ja̧boa̧ oa cjiaquëda, ado pio ju̧i̧iä bëdüa̧ oa cjiaquëda, chjai̧dërë yo̧a̧ chja̧oerä cjo̧ro̧rërea̧ ji̧ go̧düa̧ oa cjiaquëda, ado yaba̧ Jechu Quiricho pio ju̧i̧iä Ütë tjamo̧ pio ju̧i̧ nö̧ta ori̧ bagari̧ ëba cjiarea̧ daquëda' quëna̧ jo̧rȩtaji̧ri̧rȩ cjo̧ro̧täreji̧ri̧rea̧rȩ.

¹² Ja̧di tara yo̧requededibe ca̧ oti̧. Dibëa̧ icjararä chjai̧dë pio ju̧i̧ tjamo̧ yo̧mȩmi̧ da oa boë järea̧ yürüdë matäreji̧ri̧nȩrȩ. Tjamo̧ davä. Dibëa̧ icjararä chjai̧dë üdë, ja̧borea̧ chiamȩ icjararä chjai̧dë üdë, pio judiri cjitëmȩ dae ja̧bo dae ja̧bo jo̧rȩtarea̧ üdë, jabechji̧ tjamo̧ yo̧mȩmi̧ darë cjiadë matäremȩde. Danȩrȩ, pio ju̧i̧ ja̧ chja̧oerä cjo̧ro̧ ma ja̧didë. Ado pio ju̧i̧iä jabechji̧, chjai̧dë pio ju̧i̧ aja̧pariä cjo̧ro̧dë matäreji̧ri̧nȩrȩ.

¹³ Tjamo̧ davä. Dibëa̧ icjara oa chjai̧dëri̧ japapea̧ oa yürüdëpea̧de. Danȩrȩ ca̧ oti̧, ibëa̧ icjara üdë ji̧ra̧ri̧ chiade. Judiri ja̧ üdë ji̧ra̧ tjamo̧de. Jabo ibëa̧ ya üdë, ibëa̧ ichi üdë, ibëa̧ chji̧ üdë, ibëa̧ dacho üdë, ibëa̧ tjopono̧ üdë, jabechji̧ chjai̧dë oa japapea̧ oa yürüdëpea̧de. Jabechji̧ chjadë maea oa japapea̧ ji̧ yürüpea̧de. Danȩrȩ, ja̧boa̧ oa cjiarëreji̧ri̧rȩ bëdüa̧ oa cjianȩrȩ yaba̧. Ado bëdüa̧ oa cjia tara, jabechji̧ yürütäreji̧ri̧nȩrȩ dibëa̧ icjara codë oa Ütë tjamo̧ pio ju̧i̧iäpȩmo̧ chjadë pio ju̧i̧mo̧ japapea̧ oa.

¹⁴ Jabechji̧ a̧ro̧rȩ chjai̧dërë yo̧a̧ chja̧oeri pio judiri go̧düa̧ oaiä, chjai̧dë ja̧ mu̧i̧tjoi̧dë mapea̧rea̧rȩ. Chjai̧dërë yo̧a̧ chja̧oerä cjo̧ro̧rërea̧ ji̧, Ütërë cjäri̧ri̧ cjia da̧ chja̧oerä ano̧ mire cjo̧ro̧ji̧ri̧pea̧rea̧rȩ. Danȩrȩ, a̧ro̧rȩ Moicherë go̧ȩparërea̧ ma̧ȩrä cjo̧ro̧rërea̧ ji̧, jabechji̧ a̧dorea̧ dadëa̧rea̧rȩ. Jabo yaba̧, Ütërë cjäri̧ri̧ cjia da̧ chja̧oerä ano̧ mire cjo̧ro̧ji̧ri̧pea̧ oaiä, dëdë, chjadëri̧ a̧dorea̧ daea̧rea̧rȩ. Chjadëri̧ ta̧rëdiäpea̧ oa a̧dorea̧ daea̧rea̧rȩ.

Chjadërë yo̧a̧ chja̧oerä ano̧ mire cjo̧ro̧ji̧ri̧pea̧rea̧rȩ yaba̧

¹⁵ Ja̧dirä judi, ¿yö̧ta jo̧rȩtapea̧de? A̧ro̧rȩ Moicherë go̧ȩparërea̧ ma̧ȩrä cjo̧ro̧dë tara ¿dami̧ti̧ chjai̧dë oa japariä cjo̧ro̧pea̧? A̧ro̧rȩ Ütërë cjäri̧ri̧ cjia da̧ chja̧oerä cjo̧ro̧ tara ¿ji̧dë ma chjai̧dë oa japariä cjo̧ro̧pea̧? A̧dëi̧ cjäri̧ chja! Ja̧di dari̧ jo̧rȩtarea̧mi̧dëde.

¹⁶ Ji̧dë ma chjai̧dë oa japariä cjo̧ro̧rä judi, chjai̧dë ja̧ mu̧i̧tjoi̧rea̧rȩ. Danȩrȩ ca̧ oti̧, eami̧ pumȩ üdë nivë ja̧ oa ji̧dë ma ja̧bepe yürürä judi, pio ju̧i̧ ja̧ mu̧i̧tjoi̧de. Pio ju̧i̧ ja̧ chja̧oeräde. Pio ju̧i̧ dabanȩrȩ. Ado peaja̧dide chjai̧dë oa japapea̧ pio ju̧i̧ chjiari. Eami̧ pumȩ üdë chjai̧dë pio ju̧i̧ ji̧dë ma jape chjaorä judi, jabechji̧ chjai̧dë pio ju̧i̧ ja̧ mu̧i̧tjoi̧mȩrȩ cjo̧ro̧de, chjai̧dë ja̧ chja̧oerämȩrȩ. Ja̧bopea̧ maearë cjo̧ro̧de. Jabo eami̧ pumȩ üdë Ütë tjamo̧ pio ju̧i̧ ja̧ chja̧oerä cjo̧ro̧rä judi, pio ju̧i̧ ja̧ ma̧ȩrä cjo̧ro̧rä judi jabechji̧parȩa̧ oa cjiapade.

¹⁷ Pearä judi chjai̧dë ja̧ mu̧i̧tjoi̧ji̧ri̧rȩ cjo̧ro̧rëreji̧ri̧nȩrȩ mȩnȩro̧. Jabo ja̧dëa ji̧ cüdë a̧ra̧ano̧a̧ pio ju̧i̧ ta̧rë ja̧boa̧ oaiä, jabechji̧ ya maeara̧ quëna̧rea̧ decjiari̧ quëna̧ji̧ri̧pea̧nȩrȩ järi tjamo̧ji̧ri̧rȩ. Ado pio ju̧i̧iä jabechji̧ ma̧ chiadëri̧ cjiamȩrȩ jo̧rȩtareconȩ Ütë tjamo̧ ju̧i̧iäpȩmo̧.

¹⁸ Jabo dëdë, chjai̧dë ja̧ mu̧i̧tjoi̧rëreji̧ri̧nȩrȩ pearä judi. Ado mȩnȩro̧ chjai̧dë ja̧ mu̧i̧tjoi̧ji̧ri̧rȩ cjo̧ro̧rërea̧ ji̧, chjai̧dërë yo̧a̧ chja̧oerä cjo̧ro̧rërea̧ ji̧, jabechji̧ jare chjadüa̧ oa cjiami̧ dari̧ cjiarëreji̧ri̧nȩrȩ. Ado yaba̧ jabechji̧, chjadë pio ju̧i̧ ja̧ mu̧i̧tjoi̧ji̧ri̧rȩ cjo̧ro̧nȩrȩ. Chjai̧dë ja̧ chja̧oerä cjo̧ro̧rërea̧ ji̧, chjadë pio ju̧i̧ ja̧ chja̧oerä ano̧ mire cjo̧ro̧ji̧ri̧pea̧nȩrȩ.

¹⁹ Danȩrȩ ca̧ oti̧, na̧rȩrea̧ ma̧ȩ oa go̧ȩpe chjadürequededibe mu̧i̧tjoi̧ pio ju̧i̧ chjiari ma̧ȩ oa. A̧ro̧rȩ pumȩ tara chjaodëri̧ a̧dë jo̧rȩtapai̧ darea̧rȩ ibëa̧ chji̧rä chjadëri̧ chadëpe bagarea̧mi̧dëri̧. Pio ju̧i̧iä jabechji̧, mu̧i̧tjoi̧ pio ju̧i̧ chjiari na̧rȩrea̧ ma̧ȩra̧ a̧ra̧ano̧requededibe mȩnȩro̧ chjadëri̧ dabapapea̧ oa. Aja̧ ca̧ oti̧, cüdë dibë pea yo̧a̧mi̧ yo̧requededibe ado. Pearä judi chjai̧dë ja̧ mu̧i̧tjoi̧ji̧ri̧rȩ ji̧dë ma yürürëreji̧ri̧nȩrȩ dibëa̧ icjara oa chjai̧dë pio ju̧i̧ japapea̧ oa. Tjamo̧ davä. Dami̧ti̧ chjai̧dë oa japapea̧ oa yürürëreji̧ri̧nȩrȩ a̧dë chjäte chjai̧dë oa jape cjiaji̧ri̧rȩ. Jabo yaba̧ ano̧ mire yürüpea̧ chianȩrȩ dibëa̧ icjara codë oa chjadë pio ju̧i̧ japapea̧ oa. Tjamo̧ davä. Chjadë ja̧ mu̧i̧tjoi̧pea̧ tara, chjadë maea oa ano̧ mire yürütäreji̧ri̧nȩrȩ Ütë tjamo̧ pio ju̧i̧ ja̧ oa china̧chjari̧ cjo̧ro̧pea̧ oa.

²⁰ Mȩnȩro̧ pearä judi chjai̧dë ja̧ mu̧i̧tjoi̧ji̧ri̧rȩ cjo̧ro̧rërea̧ ji̧, jabechji̧ chjadë ja̧ mu̧i̧tjoi̧dë marëreji̧ri̧nȩrȩ. Chjai̧dërë yo̧a̧ chja̧oerä cjo̧ro̧rërea̧ ji̧, chjadërë yo̧a̧ chja̧oerä cjo̧ro̧dë marëreji̧ri̧nȩrȩ.

²¹ Jabo mȩnȩro̧ pearä japarërea̧ pio ju̧i̧ chjiari jo̧rȩtarä, jabechji̧ idëri̧ cjianȩrȩ. Ado mȩnȩro̧ japarërea̧ pio ju̧i̧iä ja̧bopea̧ maearë cjiarëreji̧ri̧nȩrȩ bucho ana̧.

²² Jabo danȩrȩ ca̧ oti̧, jare chjadüa̧ oa cjiami̧ dari̧ cjianȩrȩ yaba̧. Chjai̧dërë yo̧a̧ chja̧oeri pio judiri go̧düa̧ oa cjianȩrȩ jare chjadüa̧ cjiami̧ dari̧. Tjamo̧ davä. Chjai̧dërë yo̧a̧ chja̧oerä cjo̧ro̧rërea̧ ji̧, Ütë tjamo̧ pio ju̧i̧ ja̧ mu̧i̧tjoi̧pea̧nȩrȩ. Ado pio ju̧i̧iä Ütë tjamo̧ pio ju̧i̧ ja̧ mape bagari̧ cjianȩrȩ, china̧chjari̧ tutia̧ oa cjiaji̧ri̧rȩ. Ado ju̧i̧ uëri bucho ana̧ cjo̧ro̧rea̧ dapanȩrȩ peaja̧di. Ado pio ju̧i̧iä yo̧requededibe ca̧ oti̧.

²³ Danȩrȩ, Ütë tjamo̧ pio ju̧i̧iäpȩmo̧ chjai̧dëri̧ japea̧ üdë ja̧bopea̧ maeade. Aeno̧pea̧ maeade. Jabechji̧ chjai̧dë ja̧ oa ja̧bepamȩmi̧ dari̧ cjo̧ro̧mȩ pio judi ja̧borea̧ pio ju̧i̧mo̧i̧ boade, aeno̧rea̧ pio ju̧i̧bo. Jabo Ütë tjamo̧ judi ibë cjäri̧ri̧ cjia daea̧ oaiä aeno̧a̧ oa cjiadëparea̧rȩ, jabo ji̧dëri̧ bucho ana̧ cjo̧ro̧rea̧ daparea̧rȩ ibëa̧ Ano̧mȩ Jechu Quiricho pio judiri ja̧ji̧ri̧pea̧ oaiä.