Domano Ma̧ȩ 5 - Biblia Pume

Pio jȩa nö̧ta ori̧ bagari̧ ëba cjiarea̧mi̧ dari̧ jabechji̧parȩa̧diibe Ütë tjamo̧ judi Jechu pio ju̧i̧iä

¹ Pio ju̧i̧iä yaba̧, a̧ro̧rȩ Ano̧mȩ Jechu Quiricho pio ju̧i̧iäpȩmo̧ quëna̧ pio oaiä, jabechji̧parȩa̧ oa cjiarea̧rȩ Ütë tjamo̧ pio judi tänȩa̧ oa. Ado jabechji̧parȩa̧ oa cjia̧ oaiä ma̧ chjupi̧ cjiari̧ jo̧rȩtarea̧ darea̧rȩ Ütë tjamo̧ pio ju̧i̧di irä cjiarea̧mi̧ dari̧.

² Tjamo̧ davä. A̧ro̧rȩ Jechu pio ju̧i̧ quëna̧ oaiä, jabechji̧ Ütë tjamo̧ pio ju̧i̧iäpȩ ëba jämi̧ dari̧ japarëremȩdiibe. Aja̧, Ütërë cjäri̧ri̧ cjia da̧ chja̧oeräpȩ ano̧ mire cjo̧ro̧pea̧ oa, ëba jämi̧ dari̧ japarëremȩdiibe Ütë tjamo̧ pio ju̧i̧ nö̧ta ori̧ bagari̧ ëba cjiarea̧ dapea̧ oa. Ado pio ju̧i̧iä jabechji̧, ma̧ chiadëri̧ cjiaji̧ri̧rȩ cjo̧ro̧rea̧rȩ, jidatarea̧ chiaji̧ri̧pea̧ji̧ri̧rȩ. Tjamo̧ davä. Ütë tjamo̧ pio judimi̧ dape jäpea̧ pio ju̧i̧, jënȩ ibë ëba goapea̧ pio ju̧i̧ jidataji̧ri̧rȩ cjo̧ro̧rea̧rȩ, ma̧ chiadëri̧ cjiaji̧ri̧rȩ.

³ Jabo pio ju̧i̧iämo̧i̧ ma̧ chiadëri̧ cjiari̧ jo̧rȩtadërea̧rȩ jabo. Jabechji̧ a̧ro̧rȩ chjai̧dëri̧ chjätäa̧ pio ju̧i̧iäbo ma̧ chiadëri̧ cjiari̧ jo̧rȩtarea̧rȩ. Aja̧, tjamo̧ri̧ yo̧requededibe ca̧ oti̧. Pio ju̧i̧iäbo ma̧ chiadëri̧ cjiari̧ jo̧rȩtarea̧rȩ ibë chjadëri̧ a̧do tara. Jabechji̧ chjai̧dëri̧ chjätäa̧ üdë ma̧ chjua jo̧rȩtarea̧ yürü pio ju̧i̧iä chjadëri̧ a̧dodiibe.

⁴ Ado a̧ro̧rȩ ma̧ chjua jo̧rȩtaji̧ri̧rȩ cjo̧ro̧rä, jabechji̧ goae tjamo̧dejȩ Ütë tjamo̧ pio ju̧i̧iä. Ado pio ju̧i̧iä ma̧ chiadëri̧ cjiamȩrȩ dadiibe. 'Aja̧, jabechji̧ ma̧ chjua jo̧rȩtaji̧ri̧rȩ cjo̧ro̧diro̧da, chjai̧dë oa chjätäräbo ma̧ chjua jo̧rȩtaji̧ri̧rȩ cjo̧ro̧diro̧da, ütëchjape jädiro̧da' quëna̧ jo̧rȩtamȩrȩ dadiibe. Ado judi pio ibë chjiari ja̧di dari̧ jo̧rȩta̧ oaiä, jabechji̧ jidatarea̧ chiaji̧ri̧rȩ cjo̧ro̧rea̧rȩ.

⁵ Tjamo̧ davä. Ma̧diä ma̧diä cjiarea̧ decjiari̧ jidatarea̧ chiaji̧ri̧rȩ cjo̧ro̧rea̧rȩ. Danȩrȩ, a̧ro̧rȩ jidatarea̧ decjiaji̧ri̧rȩ cjo̧ro̧chea oa yürürëremȩdiibe Ütë tjamo̧ judi jibëa̧ Tjo pio ju̧i̧. Ado Tjo tjamo̧ pio judi ji̧dë ma jo̧rȩta tänȩdiibe Ütërë ibë eapea̧ pio ju̧i̧ chjiari. Pio ju̧i̧iä jabechji̧, badëri̧ jidatarea̧ decjiari̧ jidataji̧ri̧rȩ cjo̧ro̧rea̧rȩ.

⁶ Jabechji̧ a̧ro̧rȩ ibëa̧ ma̧na̧ri̧ japea̧ oaiä chjätärea̧mi̧dërä chjadëri̧ a̧dorëremȩdiibe Quiricho judi. Ütara̧ doro pio ibë chjiari ano̧ mire ja̧borëremȩde chjai̧dëri̧ jape cjiaji̧ri̧ pio ji̧ri̧ chjiari.

⁷ Danȩrȩ, pumȩ judi ado cja̧rȩmo̧ pumȩ pio ju̧i̧ chjiari ano̧ mire ja̧bopea̧ oa ¿yürüdëtäremȩde jibëa̧ icjara oa? Pumȩ chjadë pio ju̧i̧ chjiari ¿yürüdëtäremȩde? Dabadë, ano̧ mire ja̧bopea̧ oa yürürea̧mi̧dëräbo yürüpai̧ da jirode. Pio jȩaiäpȩmo̧ eamȩ tjamo̧ pio ju̧i̧ chjiari, pio jȩaiäpȩmo̧ chjadëri̧ jape chjaoa̧mȩ pio ju̧i̧ chjiari, dëdë, yürüpai̧ da jirode. Jabo pumȩ chjai̧dë pio ju̧i̧ chjiari, cjäri̧ madejȩ, ano mire ja̧bopea̧ oa tjamo̧ri̧ yürüdëtäremȩde. 'Chja ja̧di ja̧botädida' quëna̧ jo̧rȩtamȩrȩ datäremȩdejȩ.

⁸ ¿Jabo tjana̧ japarëremȩde Ütë tjamo̧ judi? Tjana̧ japadëa̧, jabechji̧ a̧ro̧rȩ jabë chjai̧dëri̧ jape cjiarä jënȩ ea̧ pio ju̧i̧ ana̧ri̧ na̧rȩrëremȩdiibe Joja pio ju̧i̧ pio ibë chjiari tuti yürüa̧ oaiä. Tjamo̧ davä. Quiricho pio judi ano̧ mire ja̧bopea̧ oa jabërä tuti yürürëremȩdejȩ.

⁹ Ado pio ju̧i̧ ja̧ goe oaiä jabechji̧parȩa̧ oa cjiarea̧rȩ yaba̧. Ado jabechji̧parȩa̧ oa cjia̧ oaiä, jabechji̧ Ütë ja̧ ërecjiarea̧ decjiaräpȩrea̧rȩ. Bape chjaorea̧ decjiaräpȩrea̧rȩ. Ju̧i̧ ja̧ ërecjia̧ üdë ibë acji cjatärea̧mi̧dëräpȩrea̧rȩ.

¹⁰ Jabechji̧ a̧ro̧rȩ pearä judi Ütë tjamo̧ pio ju̧i̧ eadërërea̧ ji̧, pio ju̧i̧ dëbëpe chjaomi̧ dari̧ jape chjaorërea̧ ji̧, jabechji̧ jachidai̧parȩmi̧ dari̧ japarëremȩdiibe Jojarë ano̧ mire ja̧boa̧ pio ju̧i̧iä. Aja̧, pio ju̧i̧ ja̧ queri̧räpȩ cjiarea̧mi̧ dari̧ japarëremȩdiibe. Ado danȩrȩ ca̧ oti̧, judi ibë jabërä chjadëri̧ japea̧rä judi, a̧ro̧rȩ pio ju̧i̧iäpȩmo̧ jabë eadëji̧ri̧ oa chjadëri̧ japea̧rä judi, ¿ji̧dë u̧i̧ a̧dodëpadiibe yaba̧ jachidai̧parȩa̧ oa cjiami̧ dari̧ cjiapea̧ji̧ri̧ oa? Dëdë, ji̧dë u̧i̧ a̧dopadiibe. Aja̧, Jechurë bëdüa̧ oa cjo̧ro̧mȩ pio ju̧i̧iä ji̧dë u̧i̧ a̧dopadiibe a̧ro̧rȩ chjadëri̧ chjätärea̧ dapea̧ oa, Ütë ja̧ ërecjia̧ pio ju̧i̧ tarachea oa.

¹¹ Ado pio ju̧i̧iä ma̧ chiadëri̧ cjiari jo̧rȩtarea̧ darea̧rȩ a̧ro̧rȩ Ütë tjamo̧ pio ju̧i̧ ja̧ queri̧räpȩ cjiami̧ dari̧ cjiaji̧ri̧pea̧ tara. Jabechji̧ Ano̧mȩ Jechu Quiricho judi pio ibë chjiari tuti japea̧ oaiä, jabechji̧ Ütë tjamo̧ pio ju̧i̧ ja̧ queri̧räpȩ cjiami̧ dari̧ cjiarea̧rȩ yaba̧, a̧ro̧rȩ jachi tjamo̧räpȩ cjiami̧ dari̧ cjiarërea̧ ji̧.

Yo̧a̧ri̧ tarumi̧ dadirȩ

¹² Cja̧rȩmȩ pumȩ pio ju̧i̧iä taruparëremȩde chjai̧dëri̧ japea̧ üdë. Ada̧ pio ju̧i̧iä taruparëremȩde. Ado judi chjai̧dëri̧ japea̧ oaiä, taruparëremȩde jabo̧pea̧ üdë. Ado pio ju̧i̧iä Ada̧ri ja̧ji̧ri̧ judiro̧ ütëbodärärë goëde je ja̧bo ga̧re baä maearea̧rȩ. Tjamo̧ davä. Judiro̧ chjai̧dëri̧ japea̧ oaiä ja̧bo ga̧re baä maearea̧rȩ ütëbodärärë.

¹³ Ütë tjamo̧ judi Moiche ju̧i̧iäpȩmo̧ ma̧ȩ oa jabë yürüdëa̧räbo chjai̧dëri̧ japarëreji̧ri̧dirȩ. Jabo Moicherë go̧ȩparërea̧ ma̧ȩ decjia tara, jabechji̧ ütarë yo̧rea̧ decjiarëremȩde jabo. “Aja̧, Moicherë go̧ȩparërea̧ ma̧ȩ pio ju̧i̧ jiadarenȩ, ta̧rë japadëa̧renȩ” ütarë yo̧rea̧ decjiarëremȩde. Pio jiro ma̧ȩ üdë jabë decjia oaiä, jabechji̧ pumȩ judiro̧ chjai̧dëri̧ japea̧ pio ju̧i̧ go̧ȩpadërëremȩde Ütë tjamo̧ judi.

¹⁴ Jabo pio jiro ma̧ȩ decjiaräbo, jabechji̧ chjai̧dëri̧ japa marëreji̧ri̧dirȩ pumȩ judiro̧. Tjamo̧ davä. Ada̧ judi cjo̧ro̧rërea̧ duri oa cjo̧ro̧ji̧ri̧ pio judiro̧, jabechji̧ chjai̧dëri̧ japa marëreji̧ri̧dirȩ Moicherë ma̧ȩ oa jabë go̧ȩpadëa̧räbo. Jabechji̧ ja̧bopea̧ chja̧oerä cjo̧ro̧ marëreji̧ri̧dirȩ. Jabo dëdë, Ada̧ judi Ütë tjamo̧ pio ju̧i̧iä irä ta̧rërëremȩde jurarea̧ china̧chja pio ju̧i̧ chjiari. Irä ta̧rë ëte jiadarëremȩde. Jabo ju̧i̧ ja̧ duri oa cjo̧ro̧rëreji̧ri̧ judiro̧ ja̧di dari̧ ta̧rë ëte jiadadërëreji̧ri̧dirȩ. Jabo jabechji̧, irä ta̧rëdëji̧ri̧borë chjai̧dëri̧ japarëreji̧ri̧dirȩ. Danȩrȩ, Ada̧ judi cjo̧ro̧rëremȩde ado cja̧rȩmo̧rȩ ma̧na̧bëmi̧, pio judimi̧ darë ma̧na̧bëmi̧.

¹⁵ Jabo tjaoëpai̧ dari̧ cjiadirȩ jabo. Ma̧na̧pamȩ judi Ada̧ pio judimi̧ dadëde. Danȩrȩ, pearämȩ üi̧ üdë chjai̧dëri̧ japea̧ oaiä, chjai̧dëri̧ cjiadiä marëreji̧ri̧rea̧rȩ. Ja̧bopea̧ maearë cjiadiärëreji̧ri̧rea̧rȩ. Jabo ji̧dë duri oamȩ üi̧ pio ju̧i̧iä chjadëpea̧de jabo. Tjamo̧ davä. Ji̧dë duri oamȩ üi̧ pio ju̧i̧iä chjadëri cjiadiäa̧rea̧rȩ. Pio ju̧i̧iä Ütërë cjäri̧ri̧ cjia da̧ pio ju̧i̧ daea̧rea̧rȩ pumȩ no̧i̧dërë. Tjamo̧ davä. Ütë tjamo̧ judi cjäri̧ri̧ cjia da̧ pio ju̧i̧ daea̧rea̧rȩ. Ja̧di tara yo̧requededibe ca̧ oti̧. Ütë tjamo̧ judi Jechu Quiricho pio ju̧i̧iä yürüa̧ üdë, jënȩ cjäri̧ri̧ cjia da̧ üdë, jabechji̧ Ada̧ judi chjai̧dëri̧ japarërea̧ ju̧i̧ u̧i̧ ana̧de. Ju̧i̧ u̧i̧ ji̧ra̧de.

¹⁶ Danȩrȩ, Ada̧ judi chjai̧dëri̧ japea̧ üdë chjadëdë tjamo̧de. Judi chjai̧dëri̧ japea̧ üdë ja̧bopea̧ maeade. Aeno̧pea̧ maeade. Jabo Ütë tjamo̧ judi yürüa̧ üdë chjadë tjamo̧de. Ütë tjamo̧ judi cjäri̧ri̧ cjia da̧ üdë chjadë tjamo̧de. Danȩrȩ, cja̧rȩmȩrȩ chjai̧dëri̧ japea̧ oaiä aeno̧pea̧ maearë cjiadiärëreji̧ri̧rea̧rȩ. Jabo Ütërë yürü chjadüa̧ pio ju̧i̧iä jabechji̧parȩa̧ oa cjiadiärëreji̧ri̧rea̧rȩ cja̧rȩmȩ co chjai̧dëri̧ japadëji̧ri̧mi̧ dari̧. Jabechji̧ a̧ro̧rȩ co ji̧ra̧ tjamo̧ri̧ chjai̧dëri̧ jape chjaoa̧räbo, jabechji̧ pio judirimȩ marë yürüa̧diibe badëri̧ yürümȩrȩ.

¹⁷ Cja̧rȩmȩ üi̧ üdë chjai̧dëri̧ japarërea̧ pio ju̧i̧iä ja̧bopea̧ chja̧oerämo̧ cjiadiärëreji̧ri̧rea̧rȩ pumȩ ütëbodärärë. Jabo ji̧dë duri oamȩ üi̧ pio ju̧i̧iä bucho ana̧ cjo̧ro̧rea̧ daea̧rea̧rȩ. Tjamo̧ davä. Jechu Quiricho pio ju̧i̧iä, jabechji̧ ja̧bopea̧ chja̧oeri pio judiri go̧dürea̧ daea̧rea̧rȩ. Ütërë cjäri̧ri̧ cjia da̧ pio ju̧i̧iä, jabechji̧parȩa̧ oa cjiarea̧ daea̧rea̧rȩ Jechu pio ju̧i̧iä. Pio ju̧i̧iä bucho ana̧ cjo̧ro̧rea̧ daea̧rea̧rȩ. Pio ju̧i̧iä yo̧requededibe ca̧ oti̧. Ada̧ judi japarërea̧ pio ju̧i̧ u̧i̧ ji̧ra̧de Jechu judi japea̧ üdë. Ju̧i̧ u̧i̧ ana̧de.

¹⁸ Cja̧rȩmȩ üi̧ judi chjai̧dëri̧ japarërea̧ oaiä, aeno̧pea̧ maearë cjiadiärëreji̧ri̧rea̧rȩ pumȩ judiro̧ ütëborë. Jabo cja̧rȩmȩ üi̧ judi tuti ba ano̧a̧ oaiä jabechji̧parȩa̧ oa cjiarea̧ daea̧rea̧rȩ ütëborë, bucho ana̧ cjo̧ro̧rea̧mi̧ dari̧.

¹⁹ Cja̧rȩmȩ üi̧ üdë ta̧rëdiädërërea̧ oaiä chjai̧dëri̧ japaji̧ri̧ maearë cjiadiärëreji̧ri̧rea̧rȩ ütëbodärärë. Jabo ado cja̧rȩmo̧ üi̧ üdë ta̧rëdiäa̧ oaiä jabechji̧parȩa̧ oa cjiarea̧ daea̧rea̧rȩ pumȩ no̧i̧dë tjamo̧rȩ.

²⁰ Moicherë go̧ȩparërea̧ ma̧ȩ üdë yürüa̧ oa cjiarëremȩde pume judiro̧ chjai̧dëri̧ japea̧ üdë ji̧ra̧ tjamo̧pe bagapea̧ oa, chjadë maearä cjiami̧ dari̧ cjiapea̧ oa. Jabo pumȩ judiro̧ chjai̧dëri̧ japea̧ üdë ji̧ra̧ tjamo̧pe baga̧ oaiä ji̧dë u̧i̧ ji̧ra̧pe bagarëremȩde davä Ütërë cjäri̧ri̧ cjia da̧ üdë. Jabechji̧ Ütërë cjäri̧ri̧ cjia da̧ pio judi a̧dë chjäte boa̧dejȩ pumȩrȩ chjai̧dëri̧ japea̧ chjö̧na̧i̧ oa.

²¹ Pio ju̧i̧iä yo̧requededibe. Pearä judi a̧ro̧rȩ chjai̧dëri̧ japea̧ oaiä, jabechji̧ ja̧bopea̧ chja̧oerämo̧ cjo̧ro̧rëreji̧ri̧rea̧rȩ. Jabo ja̧didëde yaba̧. Ütërë cjäri̧ri̧ cjia da̧ chja̧oerä ano̧ mire cjo̧ro̧rea̧rȩ. Pio judi ano̧ mire boami̧ dari̧ japea̧diibe. Ado pio ju̧i̧iä jabechji̧parȩa̧ oa cjiarea̧rȩ bucho ana̧ cjo̧ro̧rea̧mi̧ dari̧. Tjamo̧ davä. Ja̧bopea̧ chja̧oerä cjo̧ro̧rërea̧ ji̧, Ütërë cjäri̧ri̧ cjia da̧ chja̧oerä ano̧ mire cjo̧ro̧rea̧rȩ yaba̧, ibëa̧ Ano̧mȩ Jechu Quiricho pio ju̧i̧iä.