Domano Ma̧ȩ 4 - Biblia Pume

Abaraa̧ judi quëna̧rërea̧ oaiä jabechji̧parȩa̧ oa cjiarëremȩde, jënȩ chjadëri̧ japea̧ pio ju̧i̧iädë

¹ Ado Abaraa̧ judi, judio ja̧ tarurea̧ pio judi, ¿yö̧ta dari̧ cjo̧ro̧rëremȩde?

² Judi chjadëri̧ japea̧ pio ju̧i̧iä ¿jabechji̧parȩa̧ oa cjiadëa̧de? 'Jaeboquëda, cüdë chjadëri̧ japea̧ oaiä, jabechji̧parȩa̧ oa cjiaquëda, ado pio ju̧i̧iä Ütë tjamo̧ pio ju̧i̧iäpȩmo̧ goaeri̧ yo̧rea̧ dapaquëda' quëna̧ jo̧rȩtarëremȩde? Cjäri̧ made ca̧ oti̧, ja̧di dari̧ quëna̧rea̧mi̧dëde. Judi chjadëri̧ japea̧ pio ju̧i̧iä jabechji̧parȩa̧ oa cjiarea̧ daea̧ ma ja̧didë.

³ Jabechji̧ ta̧rëchji̧vä ma̧ȩ oa Abaraa̧ pio ju̧i̧ chjiari ma̧ȩ oa, yabo yürüa̧ pënȩrä cjiamȩ ma̧ȩ oa. Ja̧di ta̧rëri̧ yo̧diibe: "Aja̧, Ütë tjamo̧ judi yo̧rërea̧ ma̧ȩ pio ju̧i̧ quëna̧dejȩ Abaraa̧ judi. Ado jënȩ quëna̧ pio ju̧i̧iä jabechji̧parȩrëremȩdejȩ Ütë tjamo̧ judi." Aja̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë.

⁴ Danȩrȩ, ja̧bepamȩ judi chëre boade jënȩ ja̧bepea̧ ba oa. Jënȩ järätäa̧ ba oa boarea̧ dade badëri̧ mitërea̧ decjiari̧. Ado jibëa̧ chëre oa mitërä, 'Aja̧, badëri̧ yürüdicoada, cüdë ja̧bepea̧ ba oa yürüdëdicoada' quëna̧ jo̧rȩtadëmȩrȩ mitëdejȩ.

⁵ Jabo ja̧di dari̧ japarea̧mi̧dëde Ütë tjamo̧ pio ju̧i̧iä. Tjamo̧ davä. Pumȩ judi chjadëri̧ japea̧ ba oaiä jabechji̧parȩa̧ oa cjiarea̧mi̧dëde, jabo Jechu pio ju̧i̧ quëna̧ pio ju̧i̧iämo̧i̧ jabechji̧parȩrea̧mi̧ dade. Ado Ütë tjamo̧ judi quëna̧mȩ pio ju̧i̧ darä, 'Aja̧, jabechji̧dica̧da, cja̧rȩmȩ co chjai̧dëri̧ japadëmȩmi̧ dari̧ cjiadida' quëna̧ jo̧rȩtamȩrȩ dadejȩ, chjai̧dëri̧ japamȩ pio ju̧i̧.

⁶ Ado peaja̧di ta̧rëri̧ go̧ȩparëremȩde ibëa̧ tarurea̧ judi, Davi pio judi. Tjamo̧ davä. Quëna̧mȩ pio ju̧i̧ chjiari jabërä go̧ȩparëremȩde. Ta̧rëchji̧vä: 'Aja̧, jabechji̧parȩa̧ oa cjiaquëda, cüdë chjadëri̧ japadëa̧ ba oa jabechji̧parȩa̧ oa cjiaquëda, ado pio ju̧i̧iä ma̧ chiadëri̧ cjiaquëda' quëna̧mȩ pio ju̧i̧ chjiari go̧ȩparëremȩde jabërä. Ta̧rëchji̧vä judi a̧de go̧ȩpea̧ pio ju̧i̧:

⁷ "Aja̧, a̧dë chjäte ma̧ chiadëri̧ cjiadirȩ pumȩ judiro̧ jënȩro̧ chjai̧dëri̧ japea̧ üdë duridëparȩa̧ oa cjiarä, Ütë tjamo̧ judi jënȩro̧ chjai̧dëri̧ japea̧ pio ju̧i̧ jo̧rȩtadëpe baga̧rä.

⁸ Jabechji̧ go̧ȩparea̧ decjiami̧ daräpȩdirȩ. Ba earea̧ decjiami̧ daräpȩdirȩ. Ado pio ju̧i̧iä a̧dë chjäte ma̧ chiadëri̧ cjiadirȩ Ano̧mȩ pio ju̧i̧iä." Aja̧, ja̧di ta̧rëri̧ go̧ȩparëremȩde Davirea̧ judi.

⁹ Ado pio jiro ma̧ȩ goae üdë, ¿chjia ja̧ ma̧ȩde? ¿Budoa̧ oa cjiaji̧ri̧ pio ji̧ri̧ ja̧ maeade? ¿Jabo jabë budoa̧ oa cjiadë pio ji̧ri̧ ja̧bode? ¿Chjia ja̧ ma̧ȩde? Chjia ja̧dëde, ütëbo ja̧de. Budoa̧ oa cjiadë pio ji̧ri̧ ja̧bode. Danȩrȩ, pio yabo go̧ȩpea̧requede davä Abaraa̧ pio ju̧i̧ chjiari. Ado ja̧di ta̧rëri̧ go̧ȩpea̧requede. Ta̧rëchji̧vä ado chjereno̧: "Aja̧, Ütë tjamo̧ judi yo̧rërea̧ ma̧ȩ pio ju̧i̧ quëna̧dejȩ Abaraa̧ judi. Ado jënȩ quëna̧ pio ju̧i̧iä jabechji̧parȩa̧dejȩ." Aja̧, pio ju̧i̧ go̧ȩpea̧requededibe pio yabo.

¹⁰ Jabo danȩrȩ ca̧ oti̧, ¿na̧parä jabechji̧parȩa̧dejȩ Abaraa̧ ju̧i̧ Ütë tjamo̧ judi? ¿Jabë budoa̧ oa cjiadërä, jabo budoa̧ oa cjiarä? ¿Naparä jabechji̧parȩa̧dejȩ? Naparädë, jabechji̧ jabë budoa̧ oa cjiadërä jabechji̧parȩa̧dejȩ. Tjamo̧ davä. Jabë budoa̧ oa cjiadëmȩ oa jabechji̧parȩa̧dejȩ.

¹¹ Jabechji̧ budoa̧ üdë jabomo̧ na̧rȩrea̧de. Jabechji̧ Abaraa̧ judi jabërä, budoa̧ oa cjiadërä quëna̧rërea̧ pio ju̧i̧ chjiari, judi jabërä jabechji̧parȩa̧ oa cjia̧ pio ju̧i̧ chjiari na̧rȩrëremȩde. Ado Ütë tjamo̧ judi quëna̧mȩ oa daea̧ oaiä, jabë budoa̧ oa cjiadëmȩrȩ quëna̧mȩ oa daea̧ oaiä, 'jabechji̧dida' quëna̧ jo̧rȩtamȩrȩ darëremȩdejȩ. Aja̧, pio ju̧i̧ chjiaribo na̧rȩrëremȩde budorea̧ üdë. Ado pio ju̧i̧iä Abaraa̧ judi quëna̧ji̧ri̧ ütëbo ja̧ ama̧i̧mi̧ dade. Tjamo̧ davä. Quëna̧ pio ju̧i̧iä jabechji̧parȩa̧ oa cjiaji̧ri̧ pio ji̧ri̧ ja̧ ama̧i̧mi̧ dade, judiro̧ budoa̧ oa cjiadëji̧ri̧borë.

¹² Ado danȩrȩ, budoa̧ oa cjiaji̧ri̧ pio ji̧ri̧ ja̧ ama̧i̧mi̧ dade peaja̧di judiro̧ Abaraa̧ pio ju̧i̧ cho̧rë quëna̧rä judi, judi jabë budoa̧ oa cjiadërä quëna̧mi̧ dari̧ quëna̧rä judi.

Ütë tjamo̧ judi Abaraa̧ pio ju̧i̧ yo̧ë cji̧därërea̧ pio ju̧i̧ chjiari ma̧ȩde pio yodë ma̧ȩ üdë

¹³ Ütë tjamo̧ judi Abaraa̧ pio ju̧i̧, pio judiri ja̧ji̧ri̧bo ma̧ȩ yürë cji̧därërea̧ ji̧, chiri nö̧tai̧ oa yürüpea̧ pio ju̧i̧ chjiari yo̧ë cji̧därërea̧ ji̧, jabechji̧ Abaraa̧ judi Moicherë go̧ȩparërea̧ ma̧ȩ oa nö̧tadäräri̧ ta̧rëdiäa̧ pio ju̧i̧iä yo̧dëa̧dejȩ jabo jabechji̧, judi Ütë pio ju̧i̧iäpȩmo̧ quëna̧mȩ oa yo̧rëremȩdejȩ, jabechji̧parȩa̧ oa cjiamȩ oa. Aja̧, Abaraa̧ judi Ütë tjamo̧ pio ju̧i̧iäpȩmo̧ quëna̧ pio ju̧i̧iämo̧i̧ yo̧ë cji̧därëremȩdejȩ, pio judiri ja̧paji̧ri̧ pio ji̧ri̧bo jo̧rȩtamȩrȩ.

¹⁴ Danȩrȩ, a̧ro̧rȩ Moicherë go̧ȩparërea̧ ma̧ȩ pio ju̧i̧ nö̧tadäräri̧ ta̧rëdiäa̧ pio ju̧i̧iä yürüdë madiibe Ütë tjamo̧ judi. Jabechji̧ quëna̧ji̧ri̧ oa yürüdiibe. Nö̧tadäräri̧ ta̧rëdiädëji̧ri̧ oa yürüdiibe. Jabechji̧ Ütë tjamo̧ judi, a̧ro̧rȩ Moicherë go̧ȩparërea̧ ma̧ȩ oa nö̧tadäräri̧ ta̧rëdiäa̧rämo̧ yürürä judi, badëri̧ cjiadiämi̧ dari̧ cjiatäremȩde a̧ro̧rȩ quëna̧ üdë. Ado Ütë tjamo̧ judi ibëiäpȩmo̧ yürüpea̧ pio ju̧i̧ chjiari yo̧ë cji̧däa̧ üdë, peaja̧di badëri̧ cjiadiämi̧ dari̧ cjiatäremȩde. Tjamo̧ davä. Moicherë go̧ȩparërea̧ ma̧ȩ chjö̧na̧i̧ oa nö̧tadäräri̧ ta̧rëdiäa̧rämo̧ mitërea̧ daea̧rä judi, jabechji̧ Ütërë pio ibëiäpȩmo̧ yo̧ë cji̧däa̧ pio ju̧i̧ mitërea̧ dadë matäreji̧ri̧rea̧rȩ.

¹⁵ Jabechji̧ Moicherë go̧ȩparërea̧ ma̧ȩ üdë a̧dodë madiibe. Ütërë yo̧ë cji̧däa̧ pio ju̧i̧ mitëpea̧ ji̧ a̧dodë madiibe jabo ji̧dëri̧ na̧rȩdiibe Ütë ja̧ ërecjia̧ pio ju̧i̧ chjiari. Jabechji̧ a̧ro̧rȩ pio jiro ma̧ȩ oa nö̧tadäräri̧ ta̧rëdiädëa̧ ba oa acji cjatäpai̧ dadiibe. Ado pio ju̧i̧iä pio jiro ma̧ȩ decjiarä judimo̧ oëra̧diädëtäreji̧ri̧rea̧ro̧jo̧ȩ.

¹⁶ Pio ju̧i̧iä yo̧requededibe ca̧ oti̧. Ütë tjamo̧ ju̧i̧iäpȩmo̧ quëna̧ji̧ri̧ pio judiro̧dirȩ Ütërë yo̧ë cji̧däa̧ pio ju̧i̧ mitërea̧ dapaji̧ri̧ judiro̧. Pio ji̧ri̧iäpȩmo̧ cjäri̧ri̧ cjiamȩrȩ jabechji̧parȩpadejȩrȩ, pio judirimȩ maearë, judiro̧ chjadëri̧ japadëa̧ ba oa. Ado pio ju̧i̧iä Ütërë yo̧ë cji̧däa̧ üdë, jabechji̧ Abaraa̧ pio judiri ja̧ pumȩ ütëbo ja̧de. Pio ji̧ri̧iäpȩmo̧ tjamo̧ri̧ yürüpadejȩrȩ yürüdëpe bagarea̧ decjiari̧. Tjamo̧ davä. Moicherë go̧ȩparërea̧ ma̧ȩrä quëna̧ji̧ri̧ judio pio ji̧ri̧iäpȩmo̧, ado Abaraa̧ pio ju̧i̧ cho̧rë quëna̧ji̧ri̧ judiodë pio ji̧ri̧iäpȩmo̧bo yürüpadejȩrȩ. Jabechji̧ a̧ro̧rȩ quëna̧ji̧ri̧ pio judiro̧ ütëborë jadama̧i̧ taru oparea̧ro̧jo̧ȩ Abaraa̧ ju̧i̧.

¹⁷ Peaja̧di ta̧rëri̧ go̧ȩpea̧ oa cjiarëremȩde ma̧ȩ üdë, Ütë tjamo̧ judi Abaraa̧ pio ju̧i̧iäpȩmo̧ yo̧rërea̧ ma̧ȩ üdë. Ta̧rëchji̧vä: “Aja̧, pio cüdë tänȩa̧ oa jadama̧i̧ tarumi̧ dari̧ cjiaparenȩ pumȩ no̧i̧dë tjamo̧ ja̧ oa. Ado cja̧rȩmo̧ pumȩ ja̧ oa, ado cja̧rȩmo̧ ma̧ȩ ni̧bäji̧ri̧ ja̧ oa, ado cja̧rȩmo̧ chiriräpȩ cjo̧ro̧ji̧ri̧ ja̧ oa, tarumi̧ dari̧ cjiaparenȩ.” Aja̧, ja̧di ta̧rëri̧ yo̧ë cji̧dämȩrȩ yo̧rëremȩde Ütë tjamo̧ judi Abaraa̧ pio ju̧i̧iäpȩmo̧. Ado Abaraa̧ judi pio jiro ma̧ȩ oa ta̧rërërea̧ ji̧, jabechji̧ quëna̧rëremȩdejȩ. Jënȩ quëna̧rërea̧ Ütë pio ju̧i̧ ja̧ dachoromȩrȩ quëna̧rëremȩdejȩ. Jabechji̧ pio ju̧i̧iäpȩmo̧ chjuari̧ quëna̧rea̧mi̧ dade. Danȩrȩ, ja̧boa̧ji̧ri̧ pio ji̧ri̧ chjaodëri̧ bëdü tänȩmȩ pio judide. Pio judide jibëa̧ ma̧ȩ maeara̧ pareapamȩ judi. Jabechji̧ ichi mö̧na̧mȩrȩ eami̧ oa pareapapai̧ dade, chjaodëri̧ idëpea̧ oa cjiape bagari̧.

¹⁸ Ado pio ju̧i̧iä Abaraa̧ judi quëna̧rea̧mi̧dëräbo, jabechji̧ chjuari̧ quëna̧rëremȩdejȩ Ütë tjamo̧ ju̧i̧, jidatarea̧mi̧dëräbo. “Aja̧, na̧ea̧ri ja̧ji̧ri̧ pio judiro̧ büërë chami̧ dari̧ cjiapadirȩ ütararea̧mi̧dëri̧” yo̧rërea̧ ma̧ȩ pio ju̧i̧ chjuari̧ quëna̧rëremȩde. Ado japamitë chjätä ëte, dëdë, pio judiri ja̧ji̧ri̧ judiro̧ no̧i̧dë tjamo̧pe bagarëreji̧ri̧dirȩ. Ado cja̧rȩmo̧ ma̧ȩ ni̧bäji̧ri̧ judiro̧, ado cja̧rȩmo̧ chiriräpȩ cjo̧ro̧ji̧ri̧ judiro̧ no̧i̧dë tjamo̧pe bagarëreji̧ri̧dirȩ, Abaraa̧ pio judiri ja̧ maearë.

¹⁹ Tjamo̧ davä, quëna̧rea̧mi̧dëräbo quëna̧rëremȩde. Danȩrȩ, Abaraa̧ judi 100 ui goamȩpe jäa̧rä cjo̧ro̧rëremȩde järäjäräapea̧mȩrȩ. Ado Chara jini̧ peaja̧di ütai̧ tjamo̧rëreyi̧nȩ. Jabo Abaraa̧ judi, 'Jabo cjäri̧ maa̧ro̧da, japarea̧ decjiadida, bo nö̧rirea̧mi̧dëa̧roda, a̧dë chjätë ütama̧i̧pea̧quëda, ja̧bopea̧ querediä jiroquëda, ado ca̧ iei̧ jini̧ peaja̧di ütai̧pea̧ni̧da, ararea̧mi̧dëpea̧ni̧da, jabechji̧ ibëa̧ bo pio ju̧i̧ nö̧ritärea̧ ji̧, nö̧rirea̧ dadëpa jiroa̧ro̧da' quëna̧dërëremȩde. Jabechji̧ ju baebaeami̧ dari̧ quëna̧dërëremȩde.

²⁰ 'Jabechji̧ Ütërë yo̧ë cji̧däa̧mi̧ yürüdëpa jirodicoada, judi yo̧a̧mi̧ yürüdëpadicoada, ca̧ ja pio ju̧i̧ nö̧rirea̧ yürüdëpadicoada' quëna̧dëa̧de. Jabo jabechji̧, Ütë tjamo̧ pio ju̧i̧iäpȩmo̧ chjacjiamȩri̧ jo̧rȩta̧ oaiä, ji̧dë u̧i̧ chjuari̧ quëna̧pe bagarëremȩde, quëna̧dëpe bagarea̧ decjiari̧.

²¹ 'Aja̧, Ütë tjamo̧ judi ju chiadida, judi yo̧ë cji̧däa̧mi̧ yürüpadicoada' quëna̧ jo̧rȩtamȩrȩ cjo̧ro̧rëremȩde, chjua tjamo̧ri̧ quëna̧mȩrȩ.

²² Ado pio ju̧i̧iä Abaraa̧ judi Ütë tjamo̧ pio ju̧i̧iäpȩmo̧ quëna̧ oaiä, jabechji̧parȩrëremȩdejȩ, cja̧rȩmo̧ co chjai̧dë oa japadëmȩmi̧ dari̧.

²³ Ado pio jiro ma̧ȩ üdë go̧ȩpea̧ oa cjiarërea̧ ji̧, “Aja̧, jabechji̧parȩa̧dejȩ cja̧rȩmȩ co chjai̧dë oa japadëmȩmi̧ dari̧” yo̧mȩ ma̧ȩ üdë go̧ȩpea̧ oa cjiarërea̧ ji̧, jabechji̧ Abaraa̧ pio ju̧i̧mo̧ jo̧rȩtamȩrȩ yürüdërëremȩde Ütë tjamo̧ judi. Pio ju̧i̧ chjiarimo̧ ma̧ȩdërëremȩde.

²⁴ Jabo pio ibë chjiaribo go̧ȩpea̧ oa cjiarëremȩde, jabechji̧parȩa̧ oa cjiapaji̧ri̧ pio ji̧ri̧ chjiari. Tjamo̧ davä. A̧ro̧rȩ Ütë tjamo̧ pio ju̧i̧iäpȩmo̧ quëna̧rä judi, ibëa̧ Ano̧mȩ Jechu pio ju̧i̧ bëdü tänȩrëremȩ pio ju̧i̧iäpȩmo̧ quëna̧rä judi, peaja̧di jabechji̧parȩa̧ oa cjiarea̧rȩ, Abaraa̧ pio judimi̧ dari̧.

²⁵ Jabechji̧ a̧ro̧rȩ chjai̧dëri̧ japea̧ oaiä Ütë tjamo̧ judi tuti yürürëremȩdejȩ jibëa̧ Ja oa pio ibë chjiari ano̧ mire ja̧bopea̧ oa. Ado Ütë tjamo̧ judi pio ibë jabechji̧parȩrea̧ dapea̧ oa bëdü tänȩrëremȩdejȩ ja̧boa̧remȩ pio ju̧i̧.