Domano Ma̧ȩ 3 - Biblia Pume

¹ Ado iëno̧ë ta̧rërequededibe. A̧ro̧rȩ judiorë ara̧ oa cjia̧ üdë ¿ba chiadëde? A̧ro̧rȩ Abaraa̧ pio judiri ja̧ üdë ¿chjadëdëde? ¿Yö̧ta jo̧rȩtapea̧? Ado budoa̧ üdë ¿ba chiade, jabo tjamo̧ri̧ ba chiadëde?

² Dëdë ca̧ pumȩ, ba chia tjamo̧de budoa̧ üdë. Ba chia tjamo̧de judiorë ara̧ oa cjo̧ro̧a̧ üdë. Ba chia tjamo̧de Abaraa̧ pio judiri ja̧mȩrȩ cjo̧ro̧a̧ üdë. 'Ba chiadë jirodida' quëna̧dëchji̧vä. Ba chia tjamo̧de. Danȩrȩ, ¿tjana̧ pumȩ ji̧ri̧ ea jana̧ chjadürëremȩdejȩ jibëa̧ ma̧ȩ oa Ütë tjamo̧ judi? Tjana̧ pumȩdë, judio pio ji̧ri̧iäpȩmo̧ yürürëremȩdiibe.

³ Jabo danȩrȩ ca̧ oti̧, judio judiro̧ orë Ütë tjamo̧ ja̧ ma̧ȩ oa ta̧rëdiädëa̧dirȩ. Ado judiro̧ ta̧rëdiädëa̧ oaiä, ¿yö̧ta jo̧rȩtapea̧de Ütë tjamo̧ pio ju̧i̧ chjiari? 'Aja̧, judio judiro̧ jibëa̧ ma̧ȩ oa ta̧rëdiädëa̧ oaiä, 'jabechji̧ cjiadiäpadida, judiro̧ ta̧rëdiädëa̧ ba oa cjiadiäpadida, judi yo̧a̧mi̧ yaba̧ japadëpadida, jabo cjiadiämi̧ dari̧ cjiadiäpadida, judi pearä yo̧rërea̧mi̧ japadëpa jirodida yaba̧' ¿quëna̧pea̧?

⁴ Jaebo chjai̧ dadë. Ja̧di dari̧ quëna̧rea̧mi̧dëde. Jabechji̧ judi yo̧a̧mi̧ japamȩde Ütë tjamo̧ judi. Ju̧i̧ ja̧ ma̧ȩ üdë coëma cjia maeade. Pumȩ judiro̧ ta̧rëdiädëa̧räbo japamȩde jënȩ yo̧a̧mi̧. Jabo ja̧didëdirȩ pumȩ judiro̧. Jabechji̧ pumȩ judiro̧ ütëbodärärë ma̧ȩ chjádë yürüji̧ri̧dirȩ. A̧de yo̧dirȩ. Ji̧dëdiä ni̧bädirȩ. Ma̧diä ma̧diä cjia tänȩdirȩ. Jabo ja̧di dari̧ japadëmȩ Ütë tjamo̧ judi. Jabechji̧ jënȩ yo̧a̧mi̧ japamȩde ano̧ mire jo̧rȩtarea̧ decjiari̧. Peaja̧di ta̧rëri̧ go̧ȩpea̧ oa cjiade ma̧ȩ üdë yabo yürüa̧ pënȩrä. Ta̧rëchji̧vä: "Aja̧ ca̧ Ütë, mȩnȩ ni̧bärä, jabechji̧ coëma cjiari̧ ni̧bämȩrenȩ. Ado coëma cjiari̧ ni̧bämȩdida' quëna̧ mapadiro̧mȩ peaja̧di pumȩ judiro̧. Ado mȩnȩ tjamo̧ iëno̧ iëno̧ ta̧rëji̧ri̧ pio ji̧ri̧ ja̧ dëbëräpȩ dëbë yo̧ro, peaja̧di 'coëma cjiari̧ ni̧bämȩdida' quëna̧ ta̧rëpadiro̧mȩ, mȩa eadëji̧ri̧ judiro̧ boadärärea̧mi̧dëri̧." Aja̧, ja̧di ta̧rëri̧ go̧ȩpea̧ oa cjiade ma̧ȩ üdë. Pio ju̧i̧iä yo̧requededibe ca̧ oti̧. Ütë tjamo̧ judi ibë ma̧diä cjia tänȩrea̧ decjiari̧ japa maeadiibe jënȩ yo̧a̧mi̧.

⁵ Jabo Ütë tjamo̧ judi bape chjaoa̧ oaiä, o judiro̧ teracabari̧ yo̧pai̧ dadirȩ. 'Jabo cjäri̧ madiibëda, coëma cjiari̧ japadëmȩdida, bape chjaodëtäremȩdiibëda, jabechji̧ a̧ro̧rȩ chjai̧dëri̧ japea̧ üdë a̧domi̧ dari̧ japadiji̧da, pio a̧ro̧rȩ chjai̧dëri̧ japea̧ oaiä pio ju̧i̧ ja̧ tatachjarea̧ üdë boë marä cjiami̧ dari̧ cjiadida, pio a̧ro̧rȩ chjai̧dëri̧ japea̧ oaiä pio ju̧i̧ ja̧ coëma cjiari̧ ütararea̧ pio ju̧i̧ ji̧dë ma jo̧rȩtadiro̧ju̧i̧da, ado pio ju̧i̧iä jënȩ ërecjia̧ üdë pio ibëiäpȩmo̧ acji cjatädëtäremȩdiibëda' quëna̧ jo̧rȩtaji̧ri̧rȩ yo̧pai̧ dadirȩ pumȩ judiro̧ orë. Jabo cjäri̧ madirȩ ca̧ oti̧. Oëra̧ yo̧dirȩ. Dai chirirä ja̧ jo̧rȩtarea̧ maeara̧ jo̧rȩtadirȩ.

⁶ Ado pio ju̧i̧iä jabechji̧, teracaba maeade. Danȩrȩ, “Ütë tjamo̧ judi coëma cjiari̧ japadëmȩde” yo̧rea̧mi̧dëde. “Ütë tjamo̧ judi ibë bape chjaoa̧ oaiä coëma cjiari̧ japadëde” yo̧rea̧mi̧dëde. Jabechji̧ coëma cjiari̧ ütaramȩrȩ bape chjaomȩde oëra̧ japarea̧mi̧dëri̧. Jabo dëdë, judi chjadëri̧ ütarë bape chjaorea̧ dabadërä judicjȩ, tjamo̧i̧ cjiari̧ mö̧redami̧ dari̧ ütararea̧ dadërä judicjȩ, tjamo̧ri̧ bape chjaodëtäremȩdejȩrȩ pio jȩaiäpȩmo̧ chjai̧dëri̧ japaji̧ri̧ pio ji̧ri̧iäpȩmo̧.

⁷ Jabo o judiro̧ peaja̧di teracabari̧ yo̧pai̧ dadirȩ. 'Aja̧, a̧ro̧rȩ ma̧ȩ chjádë yürü chjaoa̧ oaiä, jabechji̧ Ütërë tjamo̧i̧ cjiari̧ jo̧rȩta̧ üdë ana̧ri̧ na̧rȩa̧ oa cjiami̧ dari̧ cjiadida, ado pio ju̧i̧iä pumȩ no̧i̧dërë chjacjiamȩri̧ jo̧rȩtadiro̧ju̧i̧da, ado pio ju̧i̧iä a̧ro̧rȩ ma̧ȩ chjádë oa yürüa̧ ba oa bape chjaodëtäremȩdiibëda, jabechji̧ a̧ro̧rȩ chjai̧dëri̧ japea̧ üdë chjadëri̧ a̧domi̧ dari̧ japadiji̧da' quëna̧ jo̧rȩtaji̧ri̧rȩ yo̧pai̧ dadirȩ o judiro̧.

⁸ Ado ji̧dë u̧i̧ yo̧ji̧ri̧rȩ ja̧di ta̧rëri̧ a̧de yo̧dirȩ: “Aja̧, jaeibe. Chjai̧dëri̧ japatärȩ” yo̧dirȩ. “Jabechji̧ Ütë tjamo̧ ja̧ chjadërea̧ pio judi pio ibëiäpȩmo̧ ma̧na̧pea̧ oa, jabechji̧ chjai̧dë pio ju̧i̧ japatäreji̧ri̧rea̧rȩ” yo̧dirȩ. “Peaja̧di dari̧ japatä yo̧diibe Pablo pio judi” yo̧ji̧ri̧rȩ aechide yo̧diro̧coe. Jabo cjäri̧ madirȩ ca̧ oti̧, teracabari̧ yo̧dirȩ. Ado judiro̧ ja̧di ta̧rëri̧ yo̧a̧ ba oa aeno̧pea̧ maearë cjiadirȩ judiro̧.

Pumȩ ütëbodärärë chjai̧dëri̧ japea̧ maeadirȩ cja̧rȩmȩrȩ cjiadiärea̧ decjiari̧

⁹ Aja̧ ca̧ pumȩ, judiorea̧rȩ a̧ro̧rȩ. Jabo danȩrȩ, iëno̧ë ta̧rërequededibe. ¿A̧ro̧rȩ judio judiro̧ judiodë pio ji̧ri̧ u̧i̧ chjadërea̧rȩ a̧ro̧rȩ? ¿A̧ro̧rȩ judio judiro̧ judiodë ji̧ri̧ u̧i̧ chjadëri̧ cjo̧ro̧rea̧rȩ? Cjäri̧ marea̧rȩ, judiodë pio ji̧ri̧ u̧i̧ chjadëri̧ cjo̧ro̧dë marea̧rȩ. Jabechji̧ pumȩ ütëbodärärë chjai̧dë ja̧ chja̧oerä cjo̧ro̧ marea̧rȩ. Pio ju̧i̧ chjadëri̧ yo̧a̧requededibe peadë.

¹⁰ Peaja̧di ta̧rëri̧ go̧ȩpea̧ oa cjiade ma̧ȩ üdë, yabo yürüa̧ pënȩrä. Ta̧rëchji̧vä: "Jabechji̧ cja̧rȩmȩ pumȩrȩ coëma cjiari̧ cjo̧ro̧dë made. Jabechji̧dë madirȩ.

¹¹ Pumȩ cja̧rȩmȩrȩ tjamo̧ri̧ dabadëde Ütë tjamo̧ pio ju̧i̧ chjiari. Ado pio ju̧i̧ na̧tami̧ dari̧ japadë madiro̧jo̧ȩ.

¹² Jabechji̧ judiro̧ ütëbodärärë putu jura̧ a̧dë chami̧ dari̧ japea̧ maeadiro̧jo̧ȩ. Oëra̧diäa̧ maeadirȩ. Cja̧rȩmȩrȩ chjadë oa japadë made.

¹³ Ji̧ri̧ ja̧ tjopono̧ üdë ji̧dë ma ma̧ȩ chjádë yürüde, u̧i̧parea̧ ma̧ȩ pio ju̧i̧. Jibëa̧ yari pio judiri ji̧dë ma cjitëde ma̧i̧ da pjȩa̧mi̧ darë, pjatë puëmi̧ dari. Mai̧ dari̧ ni̧bädirȩ. Ji̧ri̧ ja̧ ma̧ȩ üdë po ërë japarëmi̧ cjiari̧ japadejȩrȩ pumȩ ji̧ri̧. A̧dodë madejȩrȩ.

¹⁴ Ëcarami̧ dari̧ ya̧dirȩ maȩ goaedëti̧ra̧.

¹⁵ Ado chjaodëri̧ conȩdadiro̧jȩrȩ o ji̧ri̧. Ja̧bo tänȩdiro̧jȩrȩ ji̧dëri̧.

¹⁶ Judiro eami̧räpȩ järä chjai̧dë tjamo̧ri̧ chjätä tänȩdiro̧jȩrȩ pumȩ ji̧ri̧. Conȩda̧ oa cjo̧ro̧ tänȩdiro̧jȩrȩ.

¹⁷ Ado jibëa̧ pumȩ pio ji̧ri̧ nö̧ta, jabechji̧ chjadëri̧ ëba cjo̧ro̧rea̧ dabadëdirȩ. Ori̧ bagari̧ ni̧bärea̧ dabadëdirȩ.

¹⁸ Ado Ütë tjamo̧ pio ju̧i̧ uapaji̧i̧rȩ cjo̧ro̧tärea̧ ji̧, cjäri̧ madirȩ, 'pio ju̧i̧ uapamȩrȩ cjo̧ro̧täremȩquëda' quëna̧ jo̧rȩtadë madirȩ." Aja̧, ja̧di ta̧rëri̧ go̧ȩpea̧ oa cjiade Ütë tjamo̧ ja̧ ma̧ȩ üdë pumȩ pio ji̧ri̧ chjiari.

¹⁹ Danȩrȩ, Moicherë go̧ȩparërea̧ ma̧ȩ üdë chjadë maeade ca̧ pumȩ. Pio ibë chjiari coëma cjiari̧ yo̧de. Ado pio ju̧i̧ ja̧ ma̧ȩrä, Ütërë yürürërea̧ ma̧ȩrä cjia marea̧rȩ. Jabo cjäri̧ marea̧rȩ, pio ju̧i̧ nö̧tadäräri̧ japadë marea̧ro̧jo̧ȩ. Pumȩ ütëbodärärë nö̧tadäräri̧ japadë marea̧ro̧jo̧ȩ. A̧rorȩ cja̧rȩmȩrȩ chjadëri̧ cjo̧ro̧dë marea̧rȩ. Ado pio ju̧i̧iä ¿yö̧ta dari̧ jo̧rȩtapea̧? 'Jaeboquëda, pumȩ chjadëquëda, chjai̧dëri̧ japadëmȩrȩ dopaquëda, nö̧tadäräri̧ ta̧rëdiäa̧quëda' quëna̧ jo̧rȩtapea̧de? Cjäri̧ marea̧rȩ ca̧ oti̧, ja̧di dari̧ jo̧rȩtarea̧mi̧dëde. Jabechji̧ ya chjua ma cjiadiäji̧ri̧rȩ cjiaparea̧rȩ Ütë tjamo̧ ja̧ dëbëräpȩ. Jabechji̧ judi ibë iëno̧ iëno̧ ta̧rërä, “Aja̧, pumȩ chjadërequede” dëbë yo̧rea̧mi̧dëri̧ cjiadiäparea̧rȩ.

²⁰ Tjamo̧ davä ca̧ oti̧, a̧ro̧rȩ Moicherë go̧ȩparërea̧ ma̧ȩ pio ju̧i̧ ta̧rë ta̧rë japea̧ pio ju̧i̧iä jabechji̧parȩa̧ oa cjiapa ma ja̧didë. Pio jiro ma̧ȩ üdë chjätä tänȩrea̧ chiadëde. Jabo danȩrȩ, pio ibë chjiari coëma cjiari̧ quëna̧ tänȩdiibe jabo. Jabechji̧ a̧ro̧rȩ pio jiro ma̧ȩ oa ta̧rëa̧ oaiä, 'Jabo cjäri̧ maquëda, chjai̧dëri̧ japamȩrȩ dopaquëda, nö̧tadäräri̧ ta̧rëdiädë maquëda, aeno̧rea̧ pio ju̧i̧mo̧i̧ nö̧tamȩrȩ dopaquëda' quëna̧ jo̧rȩta tänȩdiibe.

Pio jȩa nö̧ta ori̧ bagari̧ ëba cjiarea̧mi̧ dari̧ jabechji̧parȩdejȩrȩ pumȩ ji̧ri̧ Ütë tjamo̧ judi

²¹ Ado Ütë tjamo̧ judi, ¿yö̧ta dari̧ jabechji̧parȩpai̧ dadejȩrȩ pumȩ ji̧ri̧? ¿Yö̧ta dari̧ jabechji̧parȩpai̧ dadejȩrȩ pio jȩa nö̧ta ori̧ bagari̧ ëba cjiarea̧mi̧ dari̧? Yö̧ta dari̧dë, jabechji̧ pio ju̧i̧ chjadëri̧ daba tänȩa̧diibe yaba̧ Ütë tjamo̧ judi. Jabo oëra̧ jo̧rȩtadëchji̧vä jabo. 'Aja̧, Moicherë go̧ȩparërea̧ ma̧ȩ pio ju̧i̧iä jabechji̧parȩpai̧ da jirodiibëda' quëna̧ jo̧rȩtadëchji̧vä. Pio jiro ma̧ȩ pio ju̧i̧iä jabechji̧parȩrea̧mi̧dëde. Jabo dëdë, jabechji̧parȩpea̧ pio ju̧i̧ chjiari go̧ȩparëremȩde Moiche judi. Ado Ütërë ea jana̧ chjadüa̧ oa ni̧bäji̧ri̧ pio judiro̧borë go̧ȩparëreji̧ri̧dirȩ pio ju̧i̧ chjiari.

²² Tjamo̧ davä. Chjadëri̧ na̧rȩdiibe yaba̧ jabechji̧parȩpea̧ pio ju̧i̧ chjiari. Danȩrȩ, Jechu pio ju̧i̧iä jabechji̧parȩrea̧ yürüdiibe. Jechu Quiricho pio ju̧i̧ quëna̧mȩ pio judi jabechji̧parȩa̧ oa cjiade. Jabechji̧ quëna̧mȩ pio ju̧i̧ jabechji̧parȩdejȩ Ütë tjamo̧ judi. Eami̧ pumȩrȩ, Jechu pio ju̧i̧ quëna̧mȩ pio ju̧i̧ jabechji̧parȩ madejȩ, 'pio ju̧i̧mo̧i̧ jabechji̧parȩdëpacuni̧da' quëna̧rea̧ decjiari̧. Jabechji̧parȩdejȩ jabechji̧dërërea̧ ji̧.

²³ Jabo a̧ro̧rȩ ibëa̧ ma̧na̧ri̧ japaji̧ri̧rȩ Ütë tjamo̧ ja̧ chjadërea̧ pio ju̧i̧, pio ju̧i̧ ja̧ tatachjarea̧ pio ju̧i̧, jabechji̧ nö̧tadë marea̧rȩ. Jabechji̧ a̧ro̧rȩ ütëborë chjai̧dëri̧ jape cjia marea̧rȩ a̧dë cjiadiärea̧ decjiari̧. Jabechji̧dë marea̧rȩ.

²⁴ Jabo Ütë tjamo̧ judi, jënȩ cjäri̧ri̧ cjia da̧ pio ju̧i̧ badëri̧ yürürëremȩdiibe, a̧ro̧rȩ chjadëri̧ japadëa̧ ba oa. Pio judirimȩ marë jabechji̧parȩrëremȩdiibe Jechu Quiricho pio ju̧i̧iä. Pio ju̧i̧iä jare chjadüa̧ oa cjiami̧ dari̧ cjiarea̧rȩ chjai̧dë ja̧ mu̧i̧tjoi̧ maearë cjo̧ro̧rërea̧ ji̧.

²⁵ Tjamo̧ davä. Joja pio ju̧i̧ tuti yürürea̧ jo̧rȩtamȩrȩ tuti yürürëremȩdejȩ goe gu̧rori̧ ja̧bopea̧ oa, Ütë ja̧ ërecjiarea̧ üdë pio ibëiäpȩmo̧ acji cjatächea oa, judi cjatäcjie jo̧rȩtarea̧ dapea̧ oa. Ado pio ju̧i̧ ja̧ goe oaiä, jabechji̧ quëna̧mȩ pio ju̧i̧ cjäri̧ri̧ cjiamȩrȩ duridëparȩdejȩ. Ado danȩrȩ, Ütë tjamo̧ judi chjai̧dëri̧ japamȩ pio ju̧i̧ duridëparȩa̧ oaiä, jabechji̧ chjadëri̧ na̧rȩdiibe pio jȩa chjiari. 'Aja̧, Ütë tjamo̧ judi a̧dë chjäte coëma cjiari̧ cjiamȩdida, a̧dë chjäte tatachjadida, pumȩ judiro̧ pearä judi chjai̧dëri̧ japarërea̧ pio ju̧i̧ a̧dë dami̧ dari̧ japarea̧mi̧dëdida, jabo ba eamȩrȩ bape chjaomȩdida, ado pumȩ pio ji̧ri̧ bape chjaotärea̧ ji̧, Joja pio ju̧i̧ ano̧ mire bape chjaoa̧diji̧da, pumȩ judiro̧ chjai̧dëri̧ japea̧ ba oa ba eadärärea̧ daea̧dida' quëna̧rea̧mi̧ dari̧ na̧rȩdiibe Ütë tjamo̧ judi chjai̧dëri̧ japamȩ pio ju̧i̧ duridëparȩa̧ pio ju̧i̧iä. Jabo pearä judi, jabechji̧ ma̧ chjua damȩrȩ darëremȩdejȩrȩ pumȩ ji̧ri̧. Judiro̧ chjai̧dëri̧ japarërea̧ pio ju̧i̧ uëmo̧ a̧dë dami̧ dari̧ darëremȩdejȩ, jo̧ȩra̧pe bape chjaodëmȩrȩ.

²⁶ Jabo ütara̧ doro, pumȩ ütëbodärä ja̧ chjai̧dë üdë Jechu pio ju̧i̧iäpȩmo̧ ma cjiadiärëremȩde. Pio jiro doro ba eamȩ pio judi bape chjaodärärea̧ daea̧de Jechu pio ju̧i̧iä. Tjamo̧ davä. Pumȩ judiro̧ chjai̧dëri̧ japea̧ ba oa bape chjaodärärea̧ daea̧de. Ado ja̧di dari̧ japea̧ oaiä, 'Aja̧, Ütë tjamo̧ judi a̧dë chjäte tatachjadida, chjai̧dë oa miredëmȩdida, chjai̧dë oa ea tjamo̧dëdida, chjai̧dë pio ju̧i̧ tjamo̧ri̧ bape chjaodäräa̧diji̧da' quëna̧rea̧mi̧ dari̧ japarëremȩdejȩ jibëa̧ Ja pio ju̧i̧. Ado pio ju̧i̧iä yo̧requededibe. Jechu pio ju̧i̧iäpȩmo̧ quëna̧mȩ pio ju̧i̧, jabechji̧ coëma cjiari̧ cjiarea̧mi̧ dari̧ jabechji̧parȩdejȩ.

²⁷ Ado ja̧dirä judi, ¿yö̧ta jo̧rȩtapea̧ a̧ro̧rȩ? 'Aja̧, cüdë pumȩ chjadë tara, jabechji̧parȩa̧ oa cjiaquëda' ¿quëna̧pea̧? 'A̧ro̧rȩ chjadëri̧ jape chjaoa̧ pio ju̧i̧iä jabechji̧parȩa̧ oa cjiaa̧ro̧da' quëna̧ji̧ri̧rȩ ¿goaeri̧ yo̧pea̧? Cjäri̧ marea̧rȩ, a̧ro̧rȩ japea̧ pio ju̧i̧ chjiari goaeri̧ yo̧rea̧mi̧dëde. Jabechji̧ a̧ro̧rȩ japea̧ pio ju̧i̧iä chjätärea̧ daea̧ ma ja̧didë, jabo quëna̧rämo̧ jabechji̧parȩa̧ oa cjiarea̧ daea̧rea̧rȩ.

²⁸ Tjamo̧ davä. Quëna̧ pio ju̧i̧iä Moicherë go̧ȩparërea̧ ma̧ȩ oa nö̧tadäräri̧ japadëmȩ pio judi jabechji̧parȩa̧ oa cjiade. Jabechji̧ Moicherë go̧ȩparërea̧ ma̧ȩ pio ju̧i̧ ta̧rë ta̧rë jape chjaoa̧ oaiä jabechji̧parȩa̧ oa cjiarea̧mi̧dëde.

²⁹ Jabo o judiro̧ oëra̧ yo̧pai̧ dadirȩ jabo. “Aja̧, Ütë tjamo̧ judi judio pio ji̧ri̧ ja̧ ütë maeade. Judiodë pio ji̧ri̧ ja̧ ütëdëde” yo̧pai̧ dadirȩ. Jabo cjäri̧ madirȩ ca̧ oti̧, oëra̧ yo̧dirȩ. Ütë tjamo̧ judi pumȩ ütëbodärä ja̧de judiodë pio ji̧ri̧ ja̧bo.

³⁰ Danȩrȩ ca̧ oti̧, Ütë tjamo̧ judi cja̧rȩmȩde, jabo pumȩ ütëbodärä ja̧de. Ado pio judi jo̧rȩta̧mi̧ jabechji̧parȩdejȩ davä judio pio ji̧ri̧, judiodë pio ji̧ri̧bo. Tjamo̧ davä. Judio pio ju̧i̧, quëna̧mȩ pio ju̧i̧ jabechji̧parȩdejȩ. Ado judiodë pio ju̧i̧, quëna̧mȩ pio ju̧i̧, peaja̧di jabechji̧parȩdejȩ.

³¹ Ado a̧ro̧rȩ quëna̧ pio ju̧i̧iä jabechji̧parȩa̧ oa cjia tara, ¿yö̧ta jo̧rȩtapea̧? Moicherë go̧ȩparërea̧ ma̧ȩ pio ju̧i̧ ¿badë jo̧rȩtapea̧de yaba̧? Cjäri̧ made, badë jo̧rȩtadëpea̧de. Aene jo̧rȩtadëpea̧de. Jabechji̧ chjadëde. Ado pio ju̧i̧iä ba chia jo̧rȩtarea̧ro̧jo̧ȩ.