Domano Ma̧ȩ 2 - Biblia Pume

Ütë tjamo̧ judi coëma cjiari̧ ütaramȩrȩ bape chjaode

¹ Ado pio jiro pumȩ pio ji̧ri̧ chjiari, mai̧ dari̧ jape chjaorëreji̧ri̧ pio ji̧ri̧ chjiari, ¿yö̧ta dari̧ jo̧rȩtanȩrȩ? 'Aja̧, pio jiro pumȩ judiro̧ chjai̧dë tjamo̧diro̧da, bape chjaopea̧ maeadiro̧da' ¿quëna̧ jo̧rȩtanȩrȩ? 'Aja̧, pio jiro pumȩ judiro̧ chjai̧dë tjamo̧diro̧da jabo ja̧didëquëda, pumȩ chjadëquëda, bape chjaodëpea̧quëda' ¿quëna̧ jo̧rȩtanȩrȩ? ¿Ja̧di dari̧ quëna̧ jo̧rȩtadënȩrȩ mȩnȩro̧? Jabo cjäri̧ manȩrȩ, ja̧di dari̧ jo̧rȩtarea̧mi̧dëde. Jabechji̧ pio mȩnȩro̧ peaja̧di chjai̧dëri̧ japanȩrȩ. Pio judiro̧ japami̧ japanȩrȩ peaja̧di. Ado mȩnȩro̧ yo̧ro, "Aja̧, Ütë tjamo̧ judi pio jiro pumȩ pio ji̧ri̧ tjamo̧ri̧ bape chjaotäremȩdejȩrȩ” yo̧ro, jabechji̧ pio dibë chjiari yo̧mi̧ dari̧ yo̧nȩrȩ. Tjamo̧ davä. Mȩnȩro̧ o pio ji̧ri̧ chjiari yo̧ro, “Aja̧, bape chjaopea̧ maeadirȩ” yo̧ro, jabechji̧ Ütë tjamo̧ judi pio dibë bape chjaopea̧ pio ju̧i̧ chjiari yo̧nȩrȩ.

² Jabechji̧ oëra̧ bape chjaodëmȩde Ütë tjamo̧ judi jabo coëma cjiari̧ ütarë jo̧rȩtamȩrȩ bape chjaomȩde. Ado pio ju̧i̧iä chjai̧dëri̧ japaji̧ri̧ pio ji̧ri̧ chjadëri̧ bape chjaodejȩrȩ. Pio ju̧i̧ tjamo̧ri̧ dabarea̧rȩ.

³ Jabo danȩrȩ ca̧ pumȩ, oëra̧ jo̧rȩtanȩrȩ. 'Aja̧, pio ji̧ri̧mo̧i̧ bape chjaopea̧ chiadiji̧ri̧da, jabo pio coamo̧ bape chjaodëtäremȩdicoada' quëna̧rea̧mi̧dëde. Danȩrȩ, 'pumȩ chjadëquëda' quëna̧ji̧ri̧borë pumȩ chjai̧dënȩrȩ. Jabechji̧ chjai̧dëri̧ japaji̧ri̧ pio ji̧ri̧ cho̧rë japanȩrȩ. Pio ju̧i̧iä pio dibëbo bape chjaopadidibe Ütë tjamo̧ judi, a̧dë chiquirea̧ dëcjiari̧.

⁴ Jabo jidatadidibe jabo mȩnȩro̧ ano̧ mire jo̧rȩtapea̧ oa. Judi jabërä chjaodëri̧ bape chjaotärea̧ ji̧, jidatadidibe. Cjäri̧ri̧ cjiamȩrȩ jidatadidibe ma̧ chjua damȩrȩ. Jabo cjäri̧ manȩrȩ, badë jo̧rȩtarenȩro̧jo̧ȩ. Jënȩ cjäri̧ri̧ cjia da̧ pio ju̧i̧, jënȩ ma̧ chjua da̧ pio ju̧i̧ badë jo̧rȩta maeanȩrȩ. Ütë tjamo̧ pio ju̧i̧ uapai̧ tarari̧ jo̧rȩtatärea̧ ji̧, ja̧di dari̧ jo̧rȩtadë manȩrȩ.

⁵ Chjuari̧ jiadarenȩro̧jo̧ȩ dibëa̧ chji̧ra̧. Ano̧ mire jo̧rȩtadëri̧ cjiaji̧ri̧rȩ ji̧dë ma chjai̧dëri̧ jape cjianȩrȩ, ta̧ra̧ puë chiadëti̧rȩ. Ado pio ju̧i̧iä jabechji̧, Ütë ja̧ ërecjia̧ üdë ji̧dë u̧i̧ ji̧ra̧ tjamo̧pe bagari̧ boea̧ oa cjiami̧ dari̧ cjiade pio dibëiäpȩmo̧ acji cjatäpea̧ oa. Tjamo̧dë yo̧dërequededibe jabo tjamo̧ri̧ yo̧requededibe. Danȩrȩ, ütara̧ doro Ütë tjamo̧ judi jënȩ coëma cjiari̧ ütararea̧ra̧ pio ju̧ri̧ra̧ bape chjaopadidibe, jibëa̧ ërecjia̧ pio ju̧i̧ uapai̧ dari̧ na̧rȩmȩrȩ.

⁶ Pumȩ judiro̧ japea̧ ba oa ütaramȩrȩ yürüpadejȩrȩ pumȩ nö̧tadäräti̧ oa a̧dë chiquirea̧ decjiari̧. O judiro̧ chjai̧dëri japea̧ ba oa bape chjaopadejȩrȩ. Ado o judiro̧ chjadëri japea̧ ba oa, ba ano̧padejȩrȩ.

⁷ Bucho ana̧ cjo̧ro̧rea̧ yürüpadejȩrȩ. Tjamo̧ davä. Ma̧ chjua jo̧rȩtaji̧ri̧rȩ coëma cjiari̧ cjo̧ro̧ji̧ri̧ pio ji̧ri̧, Ütë tjamo̧ ja̧ ma̧ȩrä cjo̧ro̧ji̧ri̧ pio ji̧ri̧, jabechji̧ bucho ana̧ cjo̧ro̧rea̧ yürüpadejȩrȩ. Aja̧, bucho ana̧ cjo̧ro̧rea̧ na̧taji̧ri̧mi̧ dari̧ cjo̧ro̧ji̧ri̧ pio ji̧ri̧, a̧dë chjäte tatari̧ cjiamȩräpȩ cjo̧ro̧pea̧ ji̧ järiji̧ri̧ pio ji̧ri̧, Ütërë pio jibëiäpȩmo̧ ba chiaparȩpea̧ oa eataji̧ri̧rȩ cjo̧ro̧ji̧ri̧ pio ji̧ri̧, jabechji̧ bucho ana̧ cjo̧ro̧rea̧ yürüpadejȩrȩ.

⁸ Jabo o ji̧ri̧ uapai̧ da tjamo̧ri̧ bape chjaopadejȩrȩ. Tjamo̧ davä. Jibëa̧ chji̧rämo̧ jo̧rȩtataji̧ri̧rȩ cjo̧ro̧ji̧ri̧ pio ji̧ri̧, 'ba chia tjamo̧a̧ro̧da' quëna̧ jo̧rȩtaji̧ri̧rȩ cjo̧ro̧ji̧ri̧ pio ji̧ri̧, coëma cjiari̧ baämȩ ma̧ȩrä cjo̧ro̧dëri̧ cjiaji̧ri̧ pio ji̧ri̧ jabo ji̧dë ma chjai̧dëri̧ japatämi̧ cjiaji̧ri̧ pio ji̧ri̧, jabechji̧ Ütë ja̧ ërecjia̧ üdë pio ji̧ri̧iäpȩmo̧ acji cjatäpadejȩrȩ chacha tjamo̧mi̧ dari̧.

⁹ A̧dë chjäte gitoi̧ dari̧ tarapadirȩ, ma̧i̧ da chjai̧dë pio ju̧i̧ chjätäji̧ri̧rȩ. Tjamo̧ davä, goae tjamo̧dëti̧ oa chjätäpadirȩ chjai̧dëri̧ japaji̧ri̧ judiro̧. Judio judiro̧, ado judiodë pio judiro̧borë.

¹⁰ Jabo ja̧di dari̧ chjätädëpadirȩ coëma cjiari̧ cjo̧ro̧ji̧ri̧ judiro̧. Jabechji̧ pio jȩa nö̧ta ëba cjiarea̧ yürüpadejȩrȩ Ütë tjamo̧ judi. Chjadë tjamo̧ oa yürüpadejȩrȩ. Ma̧ chjupi̧ cjiari̧ jo̧rȩtarea̧ yürüpadejȩrȩ. Aja̧, ja̧di dari̧ cjo̧ro̧rea̧ yürüpadejȩrȩ judio pio ji̧ri̧, judiodë pio ji̧ri̧bo.

¹¹ Jabechji̧ cja̧rȩmȩ ütararea̧ maeara̧ ütaramȩrȩ ütarapadejȩrȩ pumȩ ütëbodärä oa Ütë tjamo̧ judi. 'Pio jiro pumȩ maea oa eaquëda' quëna̧rea̧ decjiari̧ cja̧rȩmȩ ba chia maeara̧ damȩrȩ ütarapadejȩrȩ.

Moicherë go̧ȩparërea̧ ma̧ȩ pio ju̧i̧ dabadëdiro̧jo̧ȩ o judiro̧

¹² Judiodë judiro̧ Moicherë go̧ȩparërea̧ ma̧ȩ oa goadë madirȩ. Ado jiro ma̧ȩ oa goadëji̧ri̧rȩ chjai̧dëri̧ japariä cjo̧ro̧dirȩ. Ado pio ju̧i̧iä Ütë tjamo̧ judi bape chjaodejȩrȩ. Jabo Moicherë go̧ȩparërea̧ ma̧ȩ duri pio ju̧i̧ jiada̧ ba oa bape chjaodëdejȩrȩ jabo. Jabechji̧ judiro̧ jibëa̧ chji̧ra̧ chjai̧dëri̧ jo̧rȩta̧ ba oa bape chjaodejȩrȩ. Judiro̧ chjai̧dëri̧ japea̧ ba oa bape chjaodejȩrȩ. Jabo ja̧didëdirȩ judio judiro̧. Moicherë go̧ȩparërea̧ ma̧ȩ pio ju̧i̧ dabadirȩ. Pio ju̧i̧ irä goadiro̧jo̧ȩ. Jabo irä goaji̧ri̧borë chjai̧dëri̧ japadirȩ. Ado judiro̧ chjai̧dëri̧ japea̧ ba oa bape chjaodejȩrȩ Ütë tjamo̧ judi. Tjamo̧ davä. Moicherë go̧ȩparërea̧ ma̧ȩ pio ju̧i̧ jiada̧ ba oa bape chjaodejȩrȩ.

¹³ Jabechji̧ Moicherë go̧ȩparërea̧ ma̧ȩ pio ju̧i̧ irä goa̧ üdë jabechji̧ nö̧tadëde. Ado pio jiro ma̧ȩ oa ta̧rëa̧ üdë peaja̧di nö̧tadëde. Tjamo̧ davä. Jabomo̧ goarä judi, jabomo̧ ta̧rërä judi, cjäri̧ made, tjamo̧ri̧ nö̧tadëde. Jabechji̧ pio jiro ma̧ȩ üdë ta̧rëdiäpea̧de. Nö̧tadäräri̧ ta̧rëdiäpea̧de oëra̧diärea̧ decjiari̧. Jabechji̧ nö̧tadäräri̧ ta̧rëdiämȩ pio judimo̧rȩ jabechji̧parȩa̧ oa cjiapade Ütë tjamo̧ pio ju̧i̧iä.

¹⁴ Jabo judiodë judiro̧ pio jiro ma̧ȩ oa goadëdirȩ. Jabechji̧ Moicherë go̧ȩparërea̧ ma̧ȩ pio ju̧i̧ dabadëdirȩ. Jabo danȩrȩ, judiro̧ jibëa̧ chji̧ra̧ jo̧rȩta̧ ji̧, 'Aja̧, chjadëri̧ japatäremȩquëda, chjai̧dëri̧ japadëtäremȩquëda' quëna̧ jo̧rȩta̧ ji̧, jabechji̧ Moicherë go̧ȩparërea̧ ma̧ȩ pio ju̧i̧ irä goami̧ dari̧ cjo̧ro̧dirȩ. Tjamo̧ davä. Judiro̧ ja̧di dari̧ jo̧rȩta̧ ji̧, jabechji̧ Moicherë go̧ȩparërea̧ ma̧ȩ üdë jibëa̧ chji̧rä chami̧ dari̧ chade. Ado ja̧di dari̧ quëna̧ jo̧rȩta̧ üdë, jabechji̧ jibë a̧domȩ ma̧ȩmi̧ dade judiro̧ chjadëri̧ cjo̧ro̧pea̧ oa, Moicherë go̧ȩparërea̧ ma̧ȩrä cjo̧ro̧pea̧ oa.

¹⁵ Ado judiro̧ chjadëri̧ japea̧ oaiä, jabechji̧ na̧rȩdirȩ. Tjamo̧ davä. Judiro̧ chjadëri̧ japea̧ pio ju̧i̧iä, 'jabechji̧ Moicherë go̧ȩparërea̧ üdë jibëa̧ chji̧rä chami̧ dari̧ cjiadida, pio ju̧i̧iä chjadëri̧ japadiro̧da' quëna̧rea̧mi̧ dari̧ na̧rȩdirȩ. Ado pio jiro ma̧ȩ üdë jibëa̧ chji̧rä chami̧ dari̧ cjia̧ oaiä, jabechji̧ jibëa̧ chji̧ üdë cjo̧dërë tüe baämi̧ dari̧ jo̧rȩta tänȩdejȩrȩ judiro̧ chjai̧dëri̧ japarä. Tjamo̧ davä. Judiro̧ chjai̧dëri̧ japea̧ ji̧, jibëa̧ chji̧ üdë aechide yo̧mi̧ tarari̧ jo̧rȩta tänȩdejȩrȩ. Jabo judiro̧ chjadëri̧ japea̧ ji̧, jabechji̧ chjadëri̧ jo̧rȩtarea̧ dadirȩ chji̧ goaera̧, cjo̧dërë tüe baämi̧ dari̧ jo̧rȩtarea̧ decjiari̧.

¹⁶ Ado danȩrȩ ca̧ pumȩ, cjiadiärea̧ japamitërä ütara̧ doro, Ütë tjamo̧ judi Jechu Quiricho pio ju̧i̧iä pumȩ ütëbodärä oa ütarapadejȩrȩ, jënȩro̧ japea̧ pio ju̧i̧. Jabechji̧ mö̧reda̧mi̧ dari̧ ütarapadejȩ pumȩ judiro̧ japea̧ pio ju̧i̧, judiro̧ jibëa̧ chji̧rä jo̧rȩta̧ pio ju̧i̧. Goadirea̧ dadëji̧ri̧ oa ütarapadejȩrȩ judiro̧ japea̧ chjö̧na̧i̧ oa. Pio jiro a̧ra̧ano̧rea̧bo a̧ra̧ano̧mȩrȩ cjo̧ro̧requede, ma̧ȩ chjadëi̧ pio ju̧i̧ a̧ra̧ano̧mȩrȩ.

Judio judiro̧ chjai̧dëri̧ japea̧ üdë, bape chjaopea̧ maeade

¹⁷ Ado mȩnȩro̧ judio judiro̧, ¿yö̧ta dari̧ jo̧rȩtanȩrȩ? Yö̧ta dari̧dë, 'Jabechji̧ ba chiaa̧ro̧da, a̧ro̧rȩ judio tara ba chiaa̧ro̧da' quëna̧ jo̧rȩtaji̧ri̧rȩ cjo̧ro̧nȩrȩ. 'Aja̧, a̧ro̧rȩ Moicherë go̧ȩparërea̧ ma̧ȩ pio ju̧i̧ chjadëri̧ dabaa̧ro̧da, ado pio jiro ma̧ȩ oa daba̧ oaiä, jabechji̧ Ütë tjamo̧ judi chjätärea̧ yürüpea̧ chiadiibëda, pio ju̧i̧ ja̧ maeaa̧ro̧da' quëna̧ jo̧rȩtaji̧ri̧rȩ goaeri̧ yo̧nȩrȩ davä, pio dibë chjiari.

¹⁸ Tjamo̧ davä. Judionȩrȩ. Ado dabanȩrȩ mȩnȩro̧. 'Jabechji̧ Ütë tjamo̧ judi ja̧di dari̧ japatä eadiibëda' quëna̧ dabanȩrȩ. Ado mȩnȩro̧ Moicherë go̧ȩparërea̧ ma̧ȩ pio ju̧i̧ go̧ȩ ni̧bä chjaoa̧ oaiä, dëdë, chjadë pio ju̧i̧ mitëpea̧ ji̧ peaja̧di dabaji̧ri̧nȩrȩ.

¹⁹ Ado mȩnȩro̧ dabaji̧ri̧rȩ cjo̧ro̧a̧ oaiä, 'Jaeboa̧ro̧da, dabaji̧ri̧ pio judiro̧ tjamo̧a̧ro̧da, tjamo̧ri̧ a̧dorea̧ chiaji̧ri̧ pio judiro̧a̧ro̧da, dabadëji̧ri̧ pio ji̧ri̧ chjadëri̧ a̧dorea̧ chiaa̧ro̧da' quëna̧ jo̧rȩtaji̧ri̧rȩ cjo̧ro̧nȩrȩ. 'Aja̧, da cotomi̧ dari̧ cjiaji̧ri̧ pio ji̧ri̧ chjadëri̧ a̧dopea̧ chiaa̧ro̧ji̧ri̧da, bagönȩmi̧ darä cjo̧ro̧ji̧ri̧ pio ji̧ri̧ chjadëri̧ a̧dopea̧ chiaa̧ro̧da, cjo̧dë tata joëra̧ pio ju̧ri̧ra̧ arë dami̧ dari̧ a̧dopea̧ chiaa̧ro̧ji̧ri̧, jabechji̧ yaboi̧ ëba baämi̧ dari̧ japapea̧ chiaa̧ro̧ji̧ri̧da' quëna̧ jo̧rȩtaji̧ri̧nȩrȩ.

²⁰ 'Aja̧, uëmo̧ uëmo̧ jo̧retaji̧ri̧ pio ji̧ri̧ chi̧dëeapai̧ daa̧ro̧ji̧ri̧da, jabë dabapadëa̧ pio ji̧ri̧ a̧dopai̧ daa̧ro̧ji̧ri̧da, bori̧mi̧ da pio ji̧ri̧ dabapa tänȩpai̧ daa̧ro̧ji̧ri̧da' quëna̧ jo̧rȩtaji̧ri̧rȩ cjo̧ro̧nȩrȩ. Jabechji̧ mȩnȩro̧ Moicherë go̧ȩparërea̧ ma̧ȩ pio ju̧i̧ irä goa̧ oaiä, pio ju̧i̧ peadëri ja̧ dabapea̧ oaiä, 'Jabechji̧ pio a̧ro̧rȩmo̧rȩ dabarea̧ chiaa̧ro̧da, chjö̧na̧i̧ oa dabaa̧ro̧da, tjamo̧i̧ cjiari̧ baämȩ ma̧ȩ chjö̧na̧i̧ oa dabaji̧ri̧ pio judiro̧a̧ro̧da' quëna̧ jo̧rȩtaji̧ri̧rȩ cjo̧ro̧nȩrȩ.

²¹ Dëdë, dabarea̧ chianȩrȩ. Ado o ji̧ri̧iäpȩmo̧ a̧ra̧ano̧rea̧ chianȩrȩ peaja̧di. Jabo cjäri̧ manȩrȩ jabo, ade cjiami̧ dari̧ cjianȩrȩ. Poëdiä cjiami̧ dari̧ cjianȩrȩ. Dëdë, o ji̧ri̧iäpȩmo̧ a̧ra̧ano̧nȩrȩ jabo pio mȩnȩro̧ a̧ra̧ano̧dëa̧ oa cjiami̧ dari̧ cjianȩrȩ. Danȩrȩ, “Garüdëchji̧vä” yo̧ji̧ri̧rȩ a̧ra̧ano̧nȩrȩ, jabo cjäri̧ manȩrȩ, garüji̧ri̧rȩ cjo̧ro̧nȩrȩ.

²² “Aja̧, ado cja̧rȩmo̧ ja̧ iei̧ pio ji̧ baë ëba mo̧a̧dëchji̧vä” yo̧ji̧ri̧rȩ a̧ra̧ano̧nȩrȩ peaja̧di. Jabo cjäri̧ manȩrȩ, ja̧di ta̧rëri̧ a̧ra̧ano̧ji̧ri̧borë, baë ëba mo̧a̧nȩrȩ ivi china̧chja pio ji̧ri̧. Ado o judiro̧ teracaba ütë oa chjacjiamȩri̧ jo̧rȩtarä, pumȩrȩ jëdano̧a̧ ütë pio ju̧i̧ chjacjiamȩri̧ jo̧rȩtarä, goëdëri̧ cjia tjamo̧pe baganȩrȩ. Jabo cjäri̧ manȩrȩ, pio jiro ütë teracaba pio ji̧ri̧ garünȩrȩ. Pio jiro ütërë cjiamȩ bëräpȩ goadi yu̧a̧ ëte, garünȩrȩ gatë tänȩpea̧ oa, chëre boapea̧ oa. Jaboti̧ri̧ jape cjianȩrȩ, yo̧a̧ri̧ chji̧ chiami̧ dari̧ cjo̧ro̧ji̧ri̧rȩ.

²³ Dëdë, irä goanȩrȩ mȩnȩro̧ Moicherë go̧ȩparërea̧ ma̧ȩ pio ju̧i̧. Ado pio ju̧i̧ irä goa tara, jabechji̧ goaeri yo̧ chjaonȩrȩ, 'ba chia tjamo̧a̧ro̧da' quëna̧ jo̧rȩtaji̧ri̧rȩ. Jabo danȩrȩ, ¿tjana̧ ju̧i̧iä ta̧rëdiädërenȩro̧jo̧ȩ? ¿Tjana̧ ju̧i̧iä badëparȩmi̧ dari̧ japarenȩro̧jo̧ȩ pio ju̧i̧ ja̧ ma̧ȩ oa jiada̧ oaiä. Jabechji̧ mȩnȩro̧ jiade ta̧rëa̧ oaiä, pumȩ no̧i̧dërë badë jo̧rȩtadiro̧jo̧ȩ Ütë tjamo̧ pio ju̧i̧iäpȩmo̧.

²⁴ Peaja̧di ta̧rëri̧ go̧ȩpea̧ oa cjiade yabo yürüa̧ pënȩrä ma̧ȩ üdë. Ta̧rëchji̧vä: "Judiodë judiro̧ Ütë tjamo̧ pio ju̧i̧iäpȩmo̧ badë jo̧rȩtadiro̧jo̧ȩ judio pio ji̧ri̧iä. Jabechji̧ mȩnȩro̧ chjai̧dëri̧ japaji̧ri̧rȩ cjo̧ro̧a̧ oaiä, mȩnȩro̧ yo̧a̧mi̧ japadëji̧ri̧rȩ cjo̧ro̧a̧ oaiä, jabechji̧ badë jo̧rȩtadiro̧jo̧ȩ." Aja̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë.

²⁵ Jabo mȩnȩro̧ pio ju̧i̧ ta̧rëa̧ oaiä, 'Jabo cjäri̧ madiibëda, Pablo judi tjamo̧ri̧ yo̧dë jirodibëda' quëna̧ jo̧rȩtapai̧ da jironȩrȩ. Ado mȩnȩro̧ jo̧rȩtarä, 'Chja jabechji̧ Ütë pio ju̧i̧ ja̧ pumȩ tjamo̧a̧ro̧da, budoa̧ oa cjia̧ oaiä, pio ju̧i̧ ja̧ pumȩ tjamo̧a̧ro̧da' quëna̧ jo̧rȩtapai̧ da jironȩrȩ. Jabo danȩrȩ ca̧ pumȩ, Moicherë go̧ȩparërea̧ ma̧ȩ pio ju̧i̧ ta̧rëdiärä judi, dëdë, ba chiade budoa̧ üdë. Jabo ta̧rëdiädërä judi, ba chiadëde. Mȩnȩro̧ Moicherë go̧ȩparërea̧ ma̧ȩ pio ju̧i̧ ta̧rëdiädërä judi, jabechji̧ budoa̧ oa cjiadëji̧ri̧mi̧ dari̧ cjianȩrȩ. Dabadëji̧ri̧ pio judiro̧mi̧ dari̧ cjianȩrȩ budoa̧ oa cjiaräbo.

²⁶ Danȩrȩ, judiodë pio judiro̧ ta̧rëdiärä judi, budoa̧ oa cjiadëji̧ri̧ pio judiro̧ Moicherë go̧ȩparërea̧ ma̧ȩ pio ju̧i̧ ta̧rëdiärä judi, jabechji̧ budoa̧ oa cjiami̧ dari̧ cjiadirȩ budoa̧ oa cjiadëräbo. Ado Ütë tjamo̧ judi pio ji̧ri̧ darä, 'Aja̧, jabechji̧diro̧da, ca̧ pumȩdiro̧da' quëna̧ jo̧rȩtamȩrȩ dapadejȩrȩ.

²⁷ Jabechji̧ judiodë pio judiro̧ Moicherë go̧ȩparërea̧ ma̧ȩrä cjo̧ro̧rä judi, irä goadëji̧ri̧borë ta̧rëdiärä judi, budoa̧ oa cjiadëji̧ri̧borë ta̧rëdiärä judi, jabechji̧ ana̧ri̧ na̧rȩa̧ oa cjiami̧ dari̧ cjiapade judio judiro̧ chjai̧dëri̧ jiada̧ üdë. Ado Ütë tjamo̧ judi judio pio ji̧ri̧ bape chjaoro, "Jabechji̧ chjadëri̧ bape chjaodejȩrȩ" yo̧padirȩ davä judiodë pio judiro̧.

^28-29 Pio ju̧i̧iä iëno̧ë ta̧rërequededibe yaba̧. ¿Yö̧ta dari̧ jo̧rȩtapea̧de yaba̧? ¿Chjia tjamo̧de judio judi? ¿Chjia tjamo̧de tjamo̧ri̧ budoa̧ oa cjiamȩ judi? Danȩrȩ, eami̧ pumȩ üdë budoa̧ oa cjia̧ oaiä, 'jabechji̧ judio tjamo̧ pio judi jirodida' quëna̧rea̧mi̧dëde. Danȩrȩ, dairi pio judiri ütarë darea̧mi̧dëde. Ado yaba̧ ado iëno̧ë ta̧rërequededibe ado. ¿Chjia tjamo̧de tjamo̧ri̧ budoa̧ oa cjiamȩ judi? ¿Dai oa budoa̧ oa cjiamȩ pio judidëde? Cjäri̧ made ca̧ oti̧, pio judi tjamo̧dëde. Jabo danȩrȩ, ta̧rëchji̧coe. Tjamo̧ri̧ budoa̧ oa cjiamȩ judi budoa̧ oa cjiami̧ dari̧ cjiade Tjo tjamo̧ pio ju̧i̧iä. Tjamo̧ davä. Jibëa̧ chji̧ üdë budoa̧ oa cjiami̧ dari̧ cjiade Tjo tjamo̧ pio ju̧i̧iä, pio jibëiäpȩmo̧ jo̧rȩtarea̧ peaja̧ oa yürüa̧ pio ju̧i̧iä. Jabechji̧ Moicherë go̧ȩparërea̧ ma̧ȩ üdë ja̧di dari̧ japarea̧mi̧dëde. Ibëa̧ chji̧ oa ano̧ mire jo̧rȩta tänȩrea̧ chiadëde, jabo danȩrȩ, ja̧di dari̧ ja̧bepade Tjo tjamo̧ judi. Pio ju̧i̧iä yo̧requededibe ca̧ oti̧. Judio tjamo̧ judi dairi pio judiri ütarë darea̧mi̧dëde jabo tjori pio judirimo̧ ütarë dapea̧de. Aja̧ ca̧ pumȩ, pio judiro̧ tjamo̧dirȩ judio judiro̧. Ado pio yoa chirirä cjo̧ro̧ji̧ri̧ judiro̧ ba chia dadë madiro̧jȩrȩ. Tjamo̧ davä, ba chia dadë madiro̧jȩrȩ jabo Ütë tjamo̧ pio judi, dëdë, ba chia da tjamo̧dejȩrȩ.