Domano Ma̧ȩ 16 - Biblia Pume

Cjäri̧ri̧ cjia jo̧rȩtamȩrȩ jearea̧ chjadürëremȩde Pablo judi quëna̧ji̧ri̧ pio ji̧ri̧iäpȩmo̧

¹ Danȩrȩ, ibëa̧ oyi̧ pio ji̧ chjiari, Pjebe quȩyi̧ pio ji̧ chjiari go̧ȩpatämi̧ cjiarequededibe. Tjamo̧ davä, ibëdi ja̧yi̧nȩ Quiricho pio ju̧i̧iä. Ado pio dibëiäpȩ go̧düdäräpea̧ querediänȩ. Chȩquerea quȩmȩräpȩ a̧doparea̧ ja̧ oa ja̧beparëreyi̧nȩ, quëna̧ji̧ri̧ pio ji̧ri̧ a̧doyi̧rȩ.

² Pio ju̧i̧iä yo̧requededibe. Pio dibëiä go̧düdäräpea̧ ji̧ querediäyi̧ oa cjäri̧ri̧ cjia dachji̧jȩ, Ano̧mȩ ja̧yi̧ oa. Peaja̧di maeari̧ japatäreji̧ri̧diro̧jo̧ȩ Ütë tjamo̧ ja̧ pumȩ judiro̧ eami̧ oa goë daera̧pea̧mȩ ju̧i̧. Ado chjadëri̧ a̧dochji̧jȩ. Danȩrȩ, o ji̧ri̧ ana̧ tjamo̧ri̧ a̧do chjaorëreyi̧nȩjȩrȩ, pio coabo.

³ Ado o ji̧ri̧iäpȩmo̧ peaja̧di jo̧rȩtarequedejȩrȩ. Cjäri̧ri̧ cjia jo̧rȩtamȩrȩ jearea̧ chjadüreconȩ Aquira pio ju̧i̧iäpȩmo̧, Pirichira pio ji̧iäpȩmo̧bo. Pio coa nö̧ta ja̧beparëreji̧ri̧dirȩ Jechu Quiricho ja̧ oa.

⁴ Ütë tjamo̧ pio ju̧i̧iäpȩmo̧ ma̧ chiadëri̧ cjiamȩrȩ jo̧rȩtarequede pio ji̧ri̧ chjiari. 'Aja̧, chjadëri̧ yürüa̧diji̧ri̧da, Ütë tjamo̧ pio judi chjadëri̧ yürüa̧diji̧ri̧da' quëna̧ jo̧rȩtareconȩ. Danȩrȩ, chjadëri̧ jidarëreji̧ri̧diro̧coe cüdë ja̧bochea oa. Uapai̧ da tjamo̧räbo, ja̧bopai̧ daräbo, jabechji̧ chjadëri̧ a̧dorëreji̧ri̧diro̧coe. Tjamo̧ davä, chjadëri a̧doa̧diro̧coe. Ado pio coamo̧dë jabo judiodërë a̧doparea̧ chjö̧na̧i̧ oa a̧dorëreji̧ri̧diro̧jȩrȩ peaja̧di.

⁵ Ado Aquira ja̧ bëräpȩ a̧doparea̧ pio ji̧ri̧bo jo̧rȩtarequedejȩrȩ. Pio jiro quëna̧ji̧ri̧ pio ji̧ri̧iäpȩmo̧bo cjäri̧ri̧ cjia jo̧rȩtamȩrȩ jearea̧ chjadürequedejȩrȩ. Ado Epeneto pio ju̧i̧bo cjäri̧ri̧ cjia jo̧rȩtarecuni̧quȩ. Pio ju̧i̧bo jearea̧ chjadüreconȩ. Achia quȩmȩ chiriräpȩ pearä quëna̧rëremȩ pio judide.

⁶ Ado jearea̧ chjadürequedejȩ Maria pio ji̧bo. Ana̧ tjamo̧ri̧ ja̧bepë yürürëreyi̧nȩ dibëa̧ oa. Cjäri̧ri̧ cjia jo̧rȩtarequedejȩ.

⁷ Ado peaja̧di jearea̧ chjadürequedejȩrȩ ca̧ oti̧ ji̧ri̧, A̧doronico pio ju̧i̧, Junia pio ju̧i̧bo. Peaja̧di judiodirȩ pio cüdëmi̧ dari̧. No̧mȩ judi pio coa nö̧ta chaäa̧ oa cjiarëreji̧ri̧dirȩ chaärea̧ bëräpȩ. Jechurë chjadüa̧dirȩ. Ado jibëa̧ ja̧beparea̧ pio ju̧i̧ chjadëri̧ ja̧beparëreji̧ri̧diro̧jo̧ȩ. Pio ju̧i̧ tjamo̧ri̧ dabarea̧rȩ ütëborë. Aja̧, ca̧ yaboi̧ quëna̧rëreji̧ri̧diro̧jo̧ȩ Quiricho ju̧i̧iäpȩmo̧. Ado pio ji̧ri̧bo cjari̧ri̧ cjia jo̧rȩtamȩrȩ jearea̧ chjadürequedejȩrȩ.

⁸ Ado A̧piato judi ca̧ jadü tjamo̧diquȩ. Ano̧mȩ pio ju̧i̧iä coadi ja̧diquȩ. Pio ju̧i̧bo cjäri̧ri̧ cjia jo̧rȩtamȩrȩ jearea̧ chjadüreconȩ.

⁹ Ado ca̧ jadü oa, pio coa nö̧ta Quiricho ja̧ oa ja̧beparemȩ pio ju̧i̧ jo̧rȩtareconȩ peaja̧di. Ubano pio ju̧i̧iäpȩmo̧ jearea̧ chjadüreconȩ, cjäri̧ri̧ cjia jo̧rȩtamȩrȩ. Ado Etaqui pio ju̧i̧iäpȩmo̧bo jearea̧ chjadüreconȩ. Ea tjamo̧reconȩ ju̧i̧.

¹⁰ Ado jȩarea̧ chjadüreconȩ Apere pio ju̧i̧bo. Babui̧ra̧ chjai̧dëri̧ chjätäa̧räbo, chjuari̧ quëna̧dejȩ Quiricho ju̧i̧. Pio ju̧i̧bo cjäri̧ri̧ cjia jo̧rȩtareconȩ. Ado Aritoburo pio ju̧i̧bo cjari̧ri̧ cjia jo̧rȩtamȩrȩ jearea̧ chjadüreconȩ, jibëa̧ pumȩbo.

¹¹ Ado coadi ja̧mȩ pio ju̧i̧bo cjäri̧ri̧ cjia jo̧rȩtamȩrȩ jearea̧ chjadüreconȩ Erodio pio ju̧i̧iäpȩmo̧. Ado Nachichu pio ju̧i̧iäpȩmo̧bo jearea̧ chjadüreconȩ jibëa̧ pumȩbo. Peaja̧di quëna̧ madiro̧jo̧ȩ Ano̧mȩ ju̧i̧.

¹² Ado Tiripjena pio ji̧, Tiripjocha pio ji̧ jearea̧ chjadürequedejȩrȩ peaja̧di. Tjamo̧ davä. Cjäri̧ri̧ cjia jo̧rȩtarequede pio jiro ivibo. Danȩrȩ, ibëa̧ Ano̧mȩ ja̧ oa ja̧bepani̧rȩ. Ado Peride pio ji̧bo cjäri̧ri̧ cjia jo̧rȩtamȩrȩ jearea̧ chjadürequedejȩ. Ea tjamo̧rea̧ro̧jȩ. Peaja̧di ana̧ tjamo̧ri̧ ja̧beparëreyi̧nȩ ibëa̧ Ano̧mȩ ja̧ oa.

¹³ Ado Dupjo pio ju̧i̧iäpȩmo̧bo jearea̧ chjadüreconȩ. Danȩrȩ, ibëa̧ Ano̧mȩ pio judi mitëa̧ oa chjadëri ja̧beparëremȩde ütëborë dabari̧. Pio ju̧i̧ cjäri̧ri̧ cjia jo̧rȩtareconȩ. Ado ju̧i̧ arayi̧ pio ji̧bo cjäri̧ri̧ cjia jo̧rȩtarequedejȩ. Danȩrȩ, no̧mȩ tjamo̧ri ja̧ arayi̧mi̧ darë japarëreyi̧ni̧que chjadëri̧. Pio ji̧iäpȩmo̧bo jearea̧ chjadürequedejȩ. Chjadëri̧ japarëreyi̧ni̧que.

¹⁴ Ado Achiquito pio ju̧i̧, Pjego̧te pio ju̧i̧, Ereme pio ju̧i̧, Patoba pio ju̧i̧, Erema pio ju̧i̧ jo̧rȩtarequedejȩrȩ peaja̧di. Ado jibëa̧ jadü pio ji̧ri̧, quëna̧ji̧ri̧ pio ji̧ri̧ jo̧rȩtarequedejȩrȩ peaja̧di. Ütëbo oa jearea̧ chjadürequedejȩrȩ cjäri̧ri̧ cjia jo̧rȩtamȩrȩ.

¹⁵ Ado Pjirogo ju̧i̧, Juria ju̧i̧, Nereo ju̧i̧, ado ju̧i̧ ja̧ oyi̧ ji̧, ado Oripa ju̧i̧ jo̧rȩtarequedejȩrȩ peaja̧di. Ado pio ji̧ri̧ nö̧ta ëba cjo̧ro̧ji̧ri̧ pio ji̧ri̧, quëna̧ji̧ri̧ pio ji̧ri̧ peaja̧di jo̧rȩtarequedejȩrȩ, jearea̧ chjadümȩrȩ.

¹⁶ Danȩrȩ ca̧ oti̧, dibëa̧ dëbëti̧ra̧ chia cjäri̧ri̧ cjia jeachji̧vä ea tjamo̧ji̧ri̧rȩ. Aja̧ ca̧ oti̧, Quiricho ja̧ a̧doparea̧ chjö̧na̧i̧rȩ jearea̧ chjadüdiro̧dibe pio dibëiäpȩmo̧.

Cjiadiärea̧ Ma̧ȩ

¹⁷ Ca̧ oti̧, yo̧tarequededibe mȩnȩro̧ nae chiatä. O judiro̧ tuti coami̧ dari̧ ni̧bädirȩ. Pumȩ ji̧ri̧ chjadëri a̧dotärea̧ ji̧, chjarapë jo̧rȩta tänȩdiro̧jȩrȩ tjarari̧ bubape bagari̧. Cja̧rȩmȩ no̧ro ji̧mo̧ tai̧mi̧ dari̧ cjo̧ro̧tärea̧ ji̧, goëdëri̧ cjiape bagari̧ chjarapë jämi̧ dari̧ cjo̧ro̧ tänȩdiro̧jȩrȩ. Quëna̧ji̧ri̧ judiro̧ dabapea̧ ma̧ȩ pio ju̧i̧ jiada tänȩdiro̧jȩrȩ. Oëra̧diä tänȩdiro̧jȩrȩ. Ado pio ju̧i̧iä yo̧requededibe. Jabechji̧ ëba cjiadëchji̧jȩrȩ. A̧dë jachi chja cjiachji̧jȩrȩ.

¹⁸ Jabechji̧ ja̧di dari̧ japaji̧ri̧ judiro̧ ibëa̧ Ano̧mȩ pio ju̧i̧ ja̧ oa ja̧bepadë madirȩ. Quiricho pio ju̧i̧ ja̧ oa ja̧bepadë madirȩ jabo jabechji̧, jibëa̧ icjararä chjai̧dë pio judiri cjitëmȩ pio ju̧i̧mo̧i̧ jo̧rȩtaji̧ri̧rȩ ja̧bepadirȩ, teracabati̧ oa. Goaeri̧ gari̧pe gari̧pe ni̧bädirȩ u̧i̧pe u̧i̧pe ni̧bätämi̧ cjiaji̧ri̧rȩ. Ado nae chiadërë quëna̧ji̧ri̧ pio judiro̧ chjaodëri̧ u̧i̧pea̧ oa cjiapai̧ dadirȩ davä pio ji̧ri̧iä. Jabechji̧ tjamo̧rämi̧ cjiadiro̧jȩrȩ. Pio ju̧i̧iä na̧ȩ chiatä eamȩrȩ yo̧tarequededibe ca̧ pumȩ.

¹⁹ Jabo pio dibë chjiari pumȩ ütëborë peadëri ja̧ ta̧rë marëreji̧ri̧dirȩ davä, mȩnȩro̧ ibëa̧ Ano̧mȩ pio ju̧i̧ ta̧rëdiäa̧ ju̧i̧ chjiari. Ado pio ju̧i̧iä ma̧ chiadëri̧ cjia tjamo̧mȩrȩ jo̧rȩtarequededibe. Jabo danȩrȩ, pio ju̧i̧ uëri peaja̧di urëdi tjamo̧ oa ütarariä jo̧rȩtamȩrȩ dopatä earequededibe, chjadë pio ju̧i̧mo̧i̧ mitëriä dopapea̧ oa, chjai̧dë pio ju̧i̧ mitëchea oa.

²⁰ Japamitë ana̧ tjamo̧dë chjätä ëte Ütë tjamo̧ judi, ma̧ chjupi̧ cjiari̧ jo̧rȩtarea̧ yürümȩ pio judi, boë cjaeämi̧ dari̧ japapadejȩ Ichiae ja̧ tjübëmi̧ da oa pjatëpe bagami̧ dari̧. Jabechji̧ pio ju̧i̧ ja̧ tjübëmi̧ da üdë dibëa̧ tara̧ boë cjaeämi̧ dari̧ cjiapade Ütë tjamo̧ pio judi tänȩa̧ oaiä. Ado Ano̧mȩ Jechu judi, Quiricho pio judi dibëiäpȩmo̧ ji̧dë ma cjäri̧ri̧ cjia datädidibe pio judirimȩ maearë, mȩnȩro̧ chjadëri̧ japadëa̧ ba oa.

²¹ Timoteo judi, pio coa nö̧ta ja̧bepamȩ pio judiborë cjäri̧ri̧ cjia jo̧rȩtamȩrȩ jearea̧ chjadüdidibe. Ado coadi ja̧ji̧ri̧ pio judiro̧ peaja̧di jearea̧ chjadüdiro̧dibe. Duchio judi, Jacho̧ judi, ado Chochipato judi jo̧rȩtadiro̧dibe.

²² Ado cüdë Techio quȩmȩrequede cüdë. Pablo pio judi coa tänȩa̧ oa ca̧ ichira̧ go̧ȩpareconȩ pio yoa ma̧ȩ oa, judi coa yo̧a̧ duri pio ju̧i̧. Peaja̧di dibë cjäri̧ri̧ cjia jo̧rȩtamȩrȩ jearea̧ chjadürequededibe a̧ro̧rȩ cja̧rȩmȩ pumȩpea̧ tara Ano̧mȩ pio ju̧i̧iä. Aja̧, pio yoamo̧i̧ ma̧ȩ oa yo̧requededibe. Ado yaba̧ Pablo pio judi ano̧ mire ni̧bädidibe ado.

^23-24 Aja̧, Gayo pio judiborë cjäri̧ri̧ cjia jo̧rȩtamȩrȩ jearea̧ chjadüdidibe. Pio ju̧i̧ ja̧ bëräpȩ cjo̧ro̧requede. Ado a̧doparea̧ üdë peaja̧di pio yi a̧dopade. Ado Erato judi, pio yoa bë ma̧ri̧räpȩ tjamo̧ chëre ütaramȩ pio judiborë jearea̧ chjadüdidibe. Ado ibëa̧ omȩ üdë, Coato judi peaja̧di jearea̧ chjadüdidibe.

²⁵ Ütë tjamo̧ pio ju̧i̧iäpȩmo̧ chjacjiamȩ tjamo̧ri̧ jo̧rȩtatäreji̧ri̧rea̧ro̧jo̧ȩ. Danȩrȩ, pio judi tjamo̧de dibë a̧domȩ judi, dibë ju chiarea̧ yürümȩ judi. Cüdë dibë ni̧bäa̧ ma̧ȩ chjadëi̧ pio ju̧i̧ chjuari̧ quëna̧ tänȩmȩ pio judide. Jechu Quiricho pio ju̧i̧ chjiari ma̧ȩ pio ju̧i̧ to̧ba cjiami̧ dari̧ quëna̧ tänȩmȩ pio judide. Jabo pearä judi pio jiro ma̧ȩ chjadëi̧ üdë dabarea̧mi̧dërëremȩde. Pumȩrȩ dabarea̧mi̧dë marëremȩde. Ütë tjamo̧ pio judimo̧rȩ dabarëremȩdejȩ. Jabechji̧ goadia̧ oa cjiami̧ dari̧ cjiarëremȩde.

²⁶ Jabo yaba̧ bucho ana̧mȩ Ütë pio judi yo̧a̧ oaiä, goadia̧ oa cjiarërea̧ ma̧ȩ üdë bo ë maearäpȩ ano̧ mire cjiami̧ dari̧ cjiade. Tjamo̧ davä. Dabarea̧mi̧dërërea̧ ji̧, dabarea̧mi̧ dari̧ cjiade yaba̧ Ütërë ea jana̧ chjadüa̧ oa ni̧bäji̧ri̧ judiro̧ ütëborë go̧ȩparërea̧ oaiä. Aja̧, go̧ȩpatä yo̧rëremȩdejȩrȩ Ütë tjamo̧ judi, pumȩ judiro̧ ütëborë, chiriräpȩti̧ oa cjo̧ro̧ji̧ri̧ pumȩ judiro̧ ütëborë pio jȩaiäpȩmo̧ quëna̧tä, pio ju̧i̧ ja̧ ma̧ȩrä cjo̧ro̧tä.

²⁷ Ado pio ju̧i̧iä goë cjo̧dërequede Ütë tjamo̧ pio ju̧i̧iä chiriräpȩti̧ oa cjo̧ro̧ji̧ri̧ pumȩ pio ji̧ri̧ chjiari. Judiro̧ ütëborë Jechu Quiricho pio ju̧i̧iä Ütë tjamo̧ pio ju̧i̧iäpȩmo̧ bucho ana̧ chjacjiamȩri̧ jo̧rȩtatä eamȩrȩ goë cjo̧dërequede. Aja̧, Ütë tjamo̧ pio ju̧i̧iä, a̧dë chjäte dabamȩ pio ju̧i̧iä, a̧dë chjäte urëdi oa jo̧rȩtamȩ pio ju̧i̧iä goë cjo̧dërequede. Ja̧ditäde.