Domano Ma̧ȩ 13 - Biblia Pume

Chiri ütë cjo̧ro̧ji̧ri̧ pio ji̧ri̧ ja̧ chja̧oerä cjo̧ro̧pea̧de

¹ Chiri ütë cjo̧ro̧ji̧ri̧ pio ji̧ri̧ chjadëri̧ ta̧rë ta̧rë japa matäreji̧ri̧rea̧ro̧jȩrȩ. Jabechji̧ Ütë tjamo̧ pio judi tänȩa̧ oa chiri ütëdirȩ. Jibëa̧ ma̧na̧ri̧ japea̧ oaiä ütëpe bagadëa̧dirȩ jabo Ütë pio judi tänȩa̧ oa ütëpe bagarëreji̧ri̧dirȩ.

² Pio ju̧i̧iä eami̧ pumȩ üdë jiro chiri ütë cjo̧ro̧ji̧ri̧ ji̧ri̧ jiadarä judi, jabechji̧ Ütë tjamo̧ judi mitëa̧ pio ji̧ri̧ jiadade. Ado ji̧ri̧ ja̧ ma̧ȩ oa jiada̧ ba oa bape chjaopadiro̧jo̧ȩ. Pio ju̧i̧iä chjadëri ta̧rë ta̧rë japatäreji̧ri̧rea̧ro̧jȩrȩ.

³ Jabo a̧ro̧rȩ chjadëri̧ cjo̧ro̧rä judi, jabechji̧ uapadëji̧ri̧rȩ cjo̧ro̧parea̧rȩ. Jabo chjai̧dëri̧ japaji̧ri̧ judiro̧, dëdë uapaji̧ri̧rȩ cjo̧ro̧padirȩ. Chiri ütë pio ji̧ri̧ uapaji̧ri̧rȩ cjo̧ro̧padirȩ, guadia pio ji̧ri̧bo. Jabo chjadëri̧ cjo̧ro̧mȩ judi, jabechji̧ ma̧ chjöchjamȩrȩ cjo̧ro̧pade. Danȩrȩ, chiri ütë pio ji̧ri̧ ¿uapadëji̧ri̧rȩ cjo̧ro̧tämi̧ cjianȩrȩ? ¿Guadia pio ji̧ri̧ uapadëri̧ cjiaji̧ri̧rȩ cjo̧ro̧tämi̧ cjianȩrȩ? Mȩnȩro̧ ja̧di dari̧ cjo̧ro̧tämi̧ cjiarä judi, jabechji̧ chjadëri̧ cjo̧ro̧chji̧vä. Mȩnȩro̧ chjadëri̧ cjo̧ro̧rä judi, jabechji̧ uapadëji̧ri̧rȩ cjo̧ro̧panȩrȩ. Ado a̧ro̧rȩ chjadëri̧ cjo̧ro̧a̧ oaiä, chiri ütë cjo̧ro̧ji̧ri̧ pio judiro̧ ma̧ chiadëri̧ cjiapadirȩ.

⁴ Danȩrȩ, chiri ütë cjo̧ro̧ji̧ri̧ judiro̧ Ütë tjamo̧ ja̧ mu̧i̧tjoi̧mi̧ dadirȩ. Ibëa̧ pio ju̧i̧ ja̧bepadirȩ. A̧ro̧rȩ chjadëri̧ cjo̧ro̧pea̧ oa ja̧bepadirȩ. A̧ro̧rȩ chjadëri̧ jida̧ oa cjo̧ro̧pea̧ oa ja̧bepadirȩ. Jabo a̧ro̧rȩ chjai̧dëri̧ japarä judi, jabechji̧ uapatäreji̧ri̧rea̧rȩ. Teracabari̧ aradëdirȩ guadia judiro̧. Jabechji̧ pio ibë bape chjaopai̧ dadiro̧ibe davä, a̧ro̧rȩ chjai̧dëri̧ japarä judi. Uapai̧ dadirȩ. Tjamo̧ davä. Ütë pio ju̧i̧ ja̧ mu̧i̧tjoi̧mi̧ dari̧ ja̧bepadirȩ Ütë ja̧ ërecjia̧ üdë chjai̧dëri̧ japamȩ pio ju̧i̧iäpȩmo̧ acji cjatäpea̧ oa.

⁵ Pio ju̧i̧iä chjadëri̧ ta̧rë ta̧rë japa matäreji̧ri̧rea̧ro̧jȩrȩ. Jabo ibë bape chjaopea̧ pio ju̧i̧mo̧i̧ jo̧rȩtadëtäreji̧ri̧rea̧rȩ jabo. Danȩrȩ, chji̧ chiarea̧rȩ. Chjadë pio ju̧i̧ dabarea̧rȩ. Ado ibëa̧ chji̧ üdë pio ibëiäpȩmo̧ aeno̧mi̧ dari̧ japachea oa, jabechji̧ chirirä cjo̧ro̧mȩ ütë ja̧ ma̧ȩ oa chjadëri̧ ta̧rë ta̧rë japatäreji̧ri̧rea̧rȩ, a̧ro̧rȩ cjo̧dërë tüe baämi̧ dari̧ jo̧rȩtachea oa.

⁶ Peaja̧di dari̧ jo̧rȩtatäreji̧ri̧rea̧rȩ chirirä cjo̧ro̧a̧ ba oa ba ano̧pea̧ ji̧ chiri ütë pio ji̧ri̧iäpȩmo̧. Jabechji̧ chjadëri̧ ba ano̧täreji̧ri̧rea̧rȩ ibëa̧ chji̧ üdë pio ibëiäpȩmo̧ aeno̧mi̧ dari̧ japachea oa. Danȩrȩ, chiri ütë cjo̧ro̧ji̧ri̧ judiro̧ Ütë tjamo̧ ja̧ mu̧i̧tjoi̧mi̧ dari̧ ja̧bepadirȩ. Peaja̧di ta̧rëri̧ yo̧a̧requededibe pio yabo. Ado a̧ro̧rȩ, chirirä cjo̧ro̧ji̧ri̧ judiro̧ ütëbodärärë chirirä cjo̧ro̧a̧ ba pio ju̧i̧ chjadëri̧ ba ano̧a̧ oaiä, jabechji̧ chjadëri̧ ja̧beparea̧ dadirȩ chëre boa̧ oaiä.

⁷ Pio ju̧i̧iä jabechji̧, judiro̧ cjo̧dëa̧mi̧ chjadëri̧ ba ano̧täreji̧ri̧rea̧ro̧jȩrȩ. Jabechji̧ judiro̧ yo̧a̧ chja̧oerä cjo̧ro̧rea̧rȩ. Pio ju̧i̧iä ba chia datäreji̧ri̧rea̧ro̧jȩrȩ. Chjadëde ja̧di dari̧ japea̧ üdë.

Ja̧di dari̧ ëba cjo̧ro̧täreji̧ri̧rea̧ro̧jȩrȩ ibëa̧ oti̧ ji̧ri̧

⁸ Danȩrȩ, dibëa̧ oti̧ pio ji̧ri̧iäpȩmo̧ ji̧dë ma ba cjiadiäji̧ri̧rȩ cjo̧ro̧dëtäreji̧ri̧nȩrȩ, jabo atarami̧ ba ano̧täreji̧ri̧rea̧ro̧jȩrȩ. Jabo dëdë, pio ji̧ri̧iäpȩmo̧ ji̧dë ma ba cjiadiämi̧ dari̧ cjo̧ro̧täreji̧ri̧rea̧rȩ jabo. Tjamo̧ davä. Ji̧dë ma eapea̧ ji̧ ba cjiadiämi̧ dari̧ cjiatäreji̧ri̧rea̧ro̧jȩrȩ. Ji̧dë ma dëbëti̧ra̧ chia eatäreji̧ri̧rea̧rȩ. Jabechji̧ ja̧di dari̧ cjo̧ro̧mȩ judi, Moicherë go̧ȩparërea̧ ma̧ȩ pio ju̧i̧ nö̧tadäräri̧ ta̧rëdiämi̧ dari̧ japamȩde.

⁹ Ado pio jiro ma̧ȩ pio ju̧i̧, tüdüa̧mi̧ darä cjo̧ro̧pea̧ ma̧ȩ pio ju̧i̧ peadëri ja̧ dabarea̧rȩ. “Aja̧, ado cja̧rȩmo̧ ja̧ iei̧ ji̧ baë ëba mo̧a̧dëchji̧vä. Ja̧bo tänȩdëchji̧vä pumȩ ji̧ri̧. Garüdëchji̧vä. Ado cja̧rȩmo̧ ja̧ oa dae ja̧bo dae ja̧bo dadëchji̧vä.” Aja̧, ja̧di ta̧rëri̧ go̧ȩpea̧ oa cjiade orë. Ado danȩrȩ, pio jiro ma̧ȩ üdë cja̧rȩmȩ jo̧rȩtarea̧ chia maeade. Earea̧ pio ju̧i̧ chjiari yo̧diibe. Ado peaja̧di ta̧rëri̧ yo̧diibe ado cja̧rȩmo̧ ma̧ȩ üdë. Ta̧rëchji̧vä: “Aja̧, a̧ro̧rȩ ibëa̧ i pio ju̧i̧ eami̧ eatäreji̧ri̧rea̧ro̧jȩrȩ ibëa̧ pumȩ ji̧ri̧.” Aja̧, ja̧di ta̧rëri̧ yo̧diibe. Ado peaja̧di dari̧ cjo̧ro̧täreji̧ri̧rea̧rȩ. Ado ja̧di dari̧ cjo̧ro̧a̧ oaiä, jabechji̧ Moicherë go̧ȩparërea̧ ma̧ȩ pio ju̧i̧ nö̧tadäräri̧ ta̧rëdiämi̧ dari̧ japarea̧rȩ.

¹⁰ Tjamo̧ davä, eami̧ pumȩ üdë jibëa̧ pumȩ ji̧ri̧ tjamo̧ri̧ earä judi, jabechji̧ eami̧ chjai̧dë oa japadëpadejȩrȩ. Ado ja̧di dari̧ cjo̧ro̧a̧ oaiä, jabechji̧ Moicherë go̧ȩparërea̧ ma̧ȩ pio ju̧i̧ nö̧tadäräri̧ ta̧rëdiämi̧ dari̧ japamȩde.

^11-12 Aja̧ ca̧ pumȩ, cüdë dibë yo̧a̧mi̧ japachji̧vä ibëa̧ Ano̧mȩ judi ma̧na̧pea̧ ji̧ querediä tara. Jabechji̧ a̧ro̧rȩ pearä quëna̧rërea̧ ju̧i̧ u̧i̧ queri̧na̧ra̧diibe a̧ro̧rȩ chjätärea̧ dapea̧ üdë. Jabo jabërea̧rȩ. Jabë gȩnȩrä cjiami̧ dari̧ cjiarea̧rȩ jabo dopea̧ querediämi̧ dari̧ japadiibe jabo. A̧dëräpȩ go̧düdäräpea̧ üdë querediä tjamo̧diibe dopana̧ra̧mi̧ dari̧. Pio ju̧i̧iä mo̧a̧ mo̧a̧ cjo̧ro̧mi̧ dari̧ cjo̧ro̧dëtäreji̧ri̧rea̧rȩ jabo jabechji̧, bëdü jämi̧ dari̧ jo̧rȩtatäreji̧ri̧rea̧rȩ. Danȩrȩ, do üdë uë tjamo̧pea̧mi̧ dari̧ cjiadiibe. Pio ju̧i̧iä bëdüpea̧de. Järipea̧de. Jabechji̧ chjai̧dëri̧ japë ano̧täreji̧ri̧rea̧rȩ. Bagönȩrä ja̧ chjai̧dë pio ju̧i̧ cjüëami̧ dari̧ japa ëte mu̧i̧ cürëmi̧ dari̧ japatäreji̧ri̧rea̧ro̧jo̧ȩ chjibo ütama̧i̧ oa japami̧ dari̧. Ado coëma cjiari̧ cjo̧ro̧rea̧ chjibora̧ pio ju̧ri̧ra̧ ano̧ mire ina̧mi̧ dari̧ cjiatäreji̧ri̧rea̧rȩ. Tjamo̧ davä. Coëma cjiari̧ cjo̧ro̧rea̧ chjibora̧ pio ju̧ri̧ra̧, dëbëpe chjaorea̧ chjibora̧ pio ju̧ri̧ra̧ ano̧ mire ina̧mi̧ dari̧ cjiatäreji̧ri̧rea̧rȩ, tatami̧ darä cjo̧ro̧ji̧ri̧rȩ. Jabechji̧ quirë cjiami̧ dari̧ cjiatäreji̧ri̧rea̧rȩ chjai̧dë pio ju̧i̧ dëbëpe chjaopea̧ oa.

¹³ Tjamo̧ davä, coëma cjiari̧ cjo̧ro̧ matäreji̧ri̧rea̧rȩ tatarä cjo̧ro̧mi̧ dari̧. Doro tai̧ji̧ri̧mi̧ da maearë cjo̧ro̧täreji̧ri̧rea̧rȩ chjadëri̧ japaji̧ri̧rȩ. Jabechji̧ yu̧i̧pe bagapea̧ oa, chjai̧dëri̧ japapea̧ oa airi̧ cjia airi̧ cjia a̧dopadë matäreji̧ri̧rea̧rȩ. Aja̧, chji̧ cotomi̧ dape bagami̧ dari̧ jaradëtäreji̧ri̧rea̧rȩ ërü oa. Ado ibëa̧dë pio ji̧, china̧chja pio ji̧ baë ëba mo̧a̧dë matäreji̧ri̧rea̧rȩ. Ado idi̧ da oa peaja̧di japadëtäreji̧ri̧rea̧rȩ. Ado ibëa̧dë oa, ado cja̧rȩmo̧ ja̧ oa, jabechji̧ dae ja̧bo dae ja̧bo dadë matäreji̧ri̧rea̧rȩ. Ado peaja̧di goëdëri̧ cjiari̧ dëbëpe chjaodëtäreji̧ri̧rea̧rȩ. Jabechji̧ goadi ërecjiape bagari̧ quëbaji̧ri̧rȩ jo̧rȩtadëtäreji̧ri̧rea̧rȩ.

¹⁴ Tjamo̧ davä. Ja̧di dari̧ cjo̧ro̧dë matäreji̧ri̧rea̧rȩ. Ibëa̧ icjararä chjai̧dë pio ju̧i̧, ji̧dë ma chjai̧dëri̧ japatämi̧ cjiamȩ pio ju̧i̧, jabechji̧ boë jä tänȩdë matäreji̧ri̧rea̧ro̧jo̧ȩ. Aja̧padëtäreji̧ri̧rea̧ro̧jo̧ȩ jabo jabechji̧, ibëa̧ Ano̧mȩ Jechu Quirichora̧ pio ju̧ri̧ra̧ ji̧dë ma ina̧ oa cjiami̧ dari̧ cjo̧ro̧ matäreji̧ri̧rea̧rȩ.