Domano Ma̧ȩ 11 - Biblia Pume

Judio judiro̧ orëmo̧rȩ quëna̧dirȩ jabo ji̧ra̧ tjamo̧dëdirȩ

¹ Ja̧dirä judi, ¿yö̧ta jo̧rȩtapea̧de yaba̧? Ütë tjamo̧ judi jibëa̧ pumȩ pio ji̧ri̧ ¿jiadadejȩrȩ? Cjäri̧ made, ja̧di dari̧ jo̧rȩtarea̧mi̧dëde. Jiadadëdejȩrȩ. Danȩrȩ, pio cüdëborë icharaitarequede. Judiorequede. Abaraa̧ pio judiri ja̧mȩrequede cüdë. Jabechji̧ Icharai joja̧ pio judiri ja̧mȩrȩ Bejami̧ quȩmȩ pio judiri ja̧mȩrequede. Ado Ütë tjamo̧ judi jabechji̧ jiadadëa̧dique.

² Ado judi pearä mitërërea̧ pumȩ pio ji̧ri̧ peaja̧di jiadadëa̧dejȩrȩ. Danȩrȩ, yabo yürüa̧ pënȩrä go̧ȩpea̧ oa cjiamȩ ma̧ȩ oa ¿jo̧rȩtadënȩrȩ? Eria judi icharaita pio ji̧ri̧ chjiari Ütë tjamo̧ pio ju̧i̧iäpȩmo̧ yo̧rërea̧ ma̧ȩ pio ju̧i̧ ¿jo̧rȩtadënȩrȩ? Dëdë, jo̧rȩta jironȩrȩ.

³ Ja̧di ta̧rëri̧ yo̧rëremȩdejȩ: “Danȩ ca̧ Ano̧mȩ, jirodë mapea̧dirȩ. Pio mȩaiäpȩmo̧ quëna̧ji̧ri̧ icharaita judiro̧, cjäri̧ madirȩ, jiro decjiapea̧dirȩ. Pio cüdëmo̧rȩ cjiadiäa̧requede. Ütërë ea jana̧ chjadüa̧ oa ni̧bäji̧ri̧ judiro̧ ütëborë ja̧bo tänȩa̧ oa cjia maeadirȩ. Ado pio mȩaiäpȩmo̧ yürüpea̧ mechja chjö̧na̧i̧rȩ iëchäa̧ oa cjia maeade. Tjamo̧ davä. Pio cüdëmo̧requede mȩaiäpȩmo̧ quëna̧mȩ judi. Ado yaba̧ pio coabo ja̧bo tänȩtämi̧ cjiadiro̧coe.” Aja̧, ja̧di ta̧rëri̧ yo̧mȩrȩ yo̧rëremȩde Eria judi Ütë tjamo̧ pio ju̧i̧iäpȩmo̧. Aja̧, Ütërë ea jana̧ chjadüa̧ oa ni̧bärëremȩ pio judi ja̧di ta̧rëri̧ yo̧a̧dejȩ.

⁴ Jabo Ütë tjamo̧ judi Eria pio ju̧i̧ dëbë yo̧rërea̧ ji̧, ¿yö̧ta dari̧ yo̧mȩrȩ dëbë yo̧rëremȩdejȩ? Yö̧ta dari̧dë, ja̧di ta̧rëri̧ yo̧rëremȩdejȩ: “Jabo cjäri̧ marenȩ, pio mȩnȩmo̧dërenȩ. Danȩ, o ji̧ri̧ china̧chjari̧ tutia̧requedejȩrȩ ca̧ea̧ pio ji̧ri̧. 7 mi̧dirȩ. Ji̧ra̧ tjamo̧dirȩ. Teracaba ütë pio ju̧i̧, Baro quȩmȩ pio ju̧i̧ chjacjiamȩri̧ jo̧rȩtadë madiro̧jo̧ȩ, jabo pio coaiäpȩmo̧ ma chjacjiamȩri̧ jo̧rȩtadiro̧coe.” Aja̧, ja̧di ta̧rëri̧ yo̧mȩrȩ dëbë yo̧rëremȩdejȩ Eria ju̧i̧iäpȩmo̧ Ütë tjamo̧ judi.

⁵ Ado peaja̧di dari̧ cjiade yaba̧. Danȩrȩ, Icharaita judiro̧ orë dëdë, quëna̧dirȩ. Ütë tjamo̧ judi pio judirimȩ maearë cjäri̧ri̧ cjiamȩrȩ mitërërea̧ pio judiro̧dirȩ.

⁶ Jënȩ cjäri̧ri̧ cjia da̧ra̧ pio ju̧ri̧ra̧ mitërëremȩdejȩrȩ, judiro̧ chjadëri̧ japadëa̧ ba oa. Jabo Ütë tjamo̧ judi pumȩrȩ chjadëri̧ japea̧ ba oa mitëa̧rä judi, jabechji̧ cjäri̧ri̧ cjia darea̧ra̧ pio ju̧ri̧ra̧ mitëdëa̧täremȩdejȩrȩ. Jabo cjäri̧ made, cjäri̧ri̧ cjiamȩrȩ mitëmȩde Ütë tjamo̧ judi pumȩrȩ chjadëri̧ japadëa̧ ba oa.

⁷ Aja̧ ca̧ oti̧, ja̧di dari̧ cjiadirȩ Icharai pio judiri ja̧ji̧ri̧ judiro̧. Jabechji̧ judiro̧ no̧i̧dërë Ütë tjamo̧ pio ju̧i̧iä jabechji̧parȩa̧ oa cjiatämi̧ cjiaräbo, Ütërë pio jibëiäpȩmo̧ cjäri̧ri̧ cjia datä eaji̧ri̧rȩ na̧taji̧ri̧mi̧ dari̧ jape chjaoa̧räbo, jabechji̧ dadärädëji̧ri̧mi̧ dari̧ cjiadiärëreji̧ri̧dirȩ orë. Jabo o judiro̧, Ütë tjamo̧ judi mitëa̧ pio judiro̧, dëdë, dadärämi̧ dari̧ cjiadiärëreji̧ri̧dirȩ. Jabechji̧parȩa̧ oa cjiarëreji̧ri̧dirȩ. Jabo o judiro̧, cjäri̧ madirȩ, acji cjaeä ta̧rëdëri̧ cjiaji̧ri̧rȩ ji̧dë u̧i̧ chjuari̧ jiadaji̧ri̧pea̧dirȩ.

⁸ Ado pio ji̧ri̧ chjiari ja̧di ta̧rëri̧ go̧ȩpea̧ oa cjiarëremȩde ma̧ȩ üdë, dadärädëji̧ri̧mi̧ da pio ji̧ri̧ chjiari, judio pio ji̧ri̧ chjiari. Ta̧rëchji̧vä: "Ütë tjamo̧ pio judi tänȩa̧ oa järätä järätä jo̧rȩtaji̧ri̧pea̧dirȩ chjadëri̧ dabaparea̧mi̧dëri̧. Tjamo̧ davä. Da cotomi̧ dari̧, ta̧ra̧ cotomi̧ dari̧ cjiadiä tänȩrëremȩdejȩrȩ. Ado peaja̧di dari̧ cjiadirȩ pio yaba̧ domȩ oa no̧mȩ tjamo̧ri ja̧." Aja̧, ja̧di ta̧rëri̧ go̧ȩpea̧ oa cjiade Ütë tjamo̧ ja̧ ma̧ȩ üdë judio pio ji̧ri̧ chjiari.

⁹ Ado Davirea̧ pio judi peaja̧di ta̧rëri̧ go̧ȩparëremȩde. Ta̧rëchji̧vä: "Aja̧, judiro̧ airi̧ cjia airi̧ cjia a̧dopea̧ oaiä, judiro̧ goaeri̧ juraji̧ri̧rȩ a̧dopea̧ oaiä, jabechji̧ u̧i̧pea̧ oa cjiatädirȩ. Puë urëdi tjamo̧räpȩ choë cjatäa̧mi̧ dari̧ japatädejȩrȩ to gaipa tjamo̧ra̧ cjacjarë guami̧ dari̧. Jabechji̧ judiro̧ chjai̧dëri̧ japea̧ ba oa ana̧ri̧ taratädirȩ.

¹⁰ Aja̧, da cotomi̧ dari̧ cjiatädirȩ. Ado ji̧dë ma chjai̧dëri̧ chjätäa̧ oaiä ji̧dë ma chacha tjamo̧ oa tjätjäpë ara baäji̧ri̧mi̧ dari̧ cjo̧ro̧tädirȩ." Aja̧, ja̧di ta̧rëri̧ go̧ȩparëremȩde Davirea̧ judi icharaita pio ji̧ri̧ chjiari Ütë judi pio ju̧i̧iäpȩmo̧ ma̧ȩ yürürërea̧ ji̧. 'Aja̧, jabechji̧a̧ro̧da, a̧ro̧rȩ chjadëri̧ jape chjaoa̧ oaiä, jabechji̧parȩa̧ oa cjiaa̧ro̧da' quëna̧ji̧ri̧ pio ji̧ri̧ chjiari go̧ȩparëremȩde jabërä.

Judiodë pio judiro̧ chjätärea̧ daea̧dirȩ

¹¹ Judio judiro̧ quëna̧dëa̧ oaiä, jabechji̧ cjatäa̧mi̧ dari̧ cjiadiärëreji̧ri̧dirȩ. ¿Jabo bucho ana̧ daburo cjiadiämi̧ dari̧ cjiadiäpadirȩ ji̧dë ma quëna̧dëji̧ri̧rȩ? Cjäri̧ madirȩ. Ado chjereno̧ cjitëno̧mi̧ dari̧ quëna̧padirȩ. Jabo judiro̧ Jechu pio ju̧i̧ quëna̧dëa̧ oaiä, jabechji̧ judiodë pio judiro̧ ano̧mirȩ chjätärea̧ daea̧dirȩ. Ado judiodë pio judiro̧ chjätärea̧ daea̧ oaiä, jabechji̧ ana̧ri̧ jo̧rȩtatä eadejȩrȩ Ütë tjamo̧ judi judio pio ji̧ri̧. 'Aja̧, pio ji̧ri̧ cho̧rë quëna̧täreji̧ri̧a̧ro̧ji̧ri̧da, jiadadëtäreji̧ri̧a̧ro̧da' quëna̧ jo̧rȩtatä ea tjamo̧mȩrȩ dadejȩrȩ.

¹² Jabo danȩrȩ, judiodë judiro̧ mö̧na̧mi̧ dari̧ cjiarërea̧ ji̧, ji̧ra̧ri̧ goaji̧ri̧mi̧ dari̧ ano̧ mire cjiadiäa̧dirȩ yaba̧. Tjamo̧ davä, judio judiro̧ Ütërë yürüa̧ chjätärea̧ pio ju̧i̧ jiada̧ oaiä, jabechji̧ ji̧ra̧ri̧ goaji̧ri̧mi̧ dari̧ ano̧ mire cjiadiädirȩ. Ado danȩrȩ, judio pio judiro̧ japamitë chjätä ëte ado chjereno̧ quëna̧ji̧ri̧pea̧rä judi, ¿yö̧ta dari̧ cjiadiäpadirȩ judiodë judiro̧? Yö̧ta dari̧dë, jabechji̧ ji̧dë u̧i̧ chjadë tjamo̧ri̧ cjiadiäpadirȩ.

¹³ Aja̧, judiodë pio ji̧ri̧iäpȩmo̧ ni̧bä chjaorequededibe yaba̧. Danȩrȩ, Ütë tjamo̧ judi pio coa mitëa̧ tara, cüdë Jechurë chjadüa̧ tara, jabechji̧ judiodë pio ji̧ri̧iäpȩmo̧ a̧ra̧ano̧mȩrȩ cjo̧ro̧requede. Tjamo̧ davä. 'Ca̧ ja̧beparea̧ üdë ba chiadida' quëna̧ jo̧rȩtamȩrȩ a̧ra̧ano̧requededibe.

¹⁴ Ado cüdë pio dibëiäpȩmo̧ a̧ra̧ano̧a̧ oaiä, judiodë pio ji̧ri̧iäpȩmo̧ a̧ra̧ano̧a̧ oaiä, jabechji̧ ana̧ tjamo̧ri̧ jo̧rȩtape bagapai̧ dadirȩ ca̧ pumȩ judiro̧, judio pio judiro̧. Jabechji̧ judiro̧ babui̧ra̧ ta̧rëa̧ oaiä, "Aja̧, judiodë noi̧dërë quëna̧ji̧ri̧pe baga̧dirȩ" yo̧a̧ oa ta̧rëa̧ oaiä, 'jabo cjäri̧ maa̧ro̧da, a̧dë cjiadiämi̧ dari̧ cjiadiäa̧a̧ro̧da, dairäpȩ tutia̧ oa cjiami̧ dari̧ cjiaa̧ro̧da, jabechji̧ pio a̧ro̧rȩborë quëna̧täreji̧ri̧ jiroa̧ro̧da' quëna̧ jo̧rȩtapai̧ dadirȩ orë, chjätärea̧mi̧ dari̧.

¹⁵ Danȩrȩ, Ütë tjamo̧ judi judio pio ji̧ri̧ putu jura̧ a̧dë chami̧ dari̧ jiadarërea̧ oaiä, jabechji̧ chiriräpȩti̧ oa cjo̧ro̧ji̧ri̧ judiodë pio judiro̧ Ütë tjamo̧ pio ju̧i̧ ja̧ queri̧mi̧ daräpȩ cjiarea̧ daea̧dirȩ pio ju̧i̧ nö̧ta ori̧ bagari̧ ëba cjiarea̧mi̧ dari̧. Jabo danȩrȩ, judio judiro̧ ado chjereno̧ quëna̧rä judi, Ütë tjamo̧ judi pio ji̧ri̧iäpȩmo̧ ado chjereno̧ chjätärea̧ yürürä judi, ¿yö̧ta dari̧ cjiadiäpadirȩ judiodë judiro̧. Yö̧ta dari̧dë, jabechji̧ a̧dë chjäte chjadëri̧ cjiadiäpadirȩ. Jabechji̧ judiro̧ ja̧boa̧ oa cjiami̧ dari̧ cjiarërea̧ ji̧ bëdüa̧ oa cjiami̧ dari̧ cjiapadirȩ.

Judiodë pio ji̧ri̧ ano̧ mire cji̧dämi̧ dari̧ japadejȩrȩ Orivo to oa

¹⁶ Danȩrȩ, ji̧dë duri oa judio judiro̧ no̧i̧dërë chjätärea̧ dapadirȩ. Ado pio ju̧i̧iä na̧rȩrea̧mi̧ da ma̧ȩ oa ni̧bätämi̧ cjiarequededibe chja̧pe pio ju̧i̧ chjiari. Danȩrȩ, chja̧pe pënȩi̧ oa Ütë tjamo̧ pio ju̧i̧ ja̧ oa mu̧i̧ quira̧ oa cjiarä judi, Ütë tjamo̧ pio ju̧i̧iäpȩmo̧ china̧chjari̧ yürüpea̧ oa mu̧i̧ quira̧ oa cjiarä judi, jabechji̧ chja̧pe codërë pio ju̧i̧ ja̧ maeade chjö̧na̧i̧rȩ. Ado peaja̧dide to oaiä. Danȩrȩ, to tacö̧ oa china̧chjari̧ boea̧ oa cjiarä judi, Ütë tjamo̧ pio ju̧i̧iäpȩmo̧ yürüpea̧ oa boea̧ oa cjiarä judi, jabechji̧ to codërë pio ju̧i̧ ja̧ maeade chjö̧na̧i̧rȩ. To tacö̧ üdë, taru üdë, a̧ üdë, chjia üdë, jabechji̧ pio ju̧i̧ ja̧ maeade tacö̧ oaiä. Pio ju̧i̧iä yo̧requededibe. Danȩrȩ, judio ja̧ taru pio judiro̧ china̧chjari̧ tutia̧ oa cjiarërea̧ oaiä, Ütë tjamo̧ pio judi tänȩa̧ oa china̧chjari̧ tutia̧ oa cjiarërea̧ oaiä, peaja̧di china̧chjari̧ tutia̧ oa cjiapadirȩ pio judiri ja̧ji̧ri̧ pio judiro̧borë.

¹⁷ Danȩrȩ, judio judiro̧ orivo quȩmȩ goa̧ to pio judiri a̧mi̧ dadirȩ. Jabo a̧mi̧ da orë tuti dea̧ oa cjiarëreji̧ri̧dirȩ. Ado pio ju̧i̧iä ado cja̧rȩmo̧ a̧mi̧ da oa ano̧ mire cji̧däa̧ oa cjiarëremȩde. Danȩrȩ, mȩnȩro̧, judiodë pio judiro̧ chiriräpȩ cjo̧ro̧mȩ orivo to pio judiri a̧mi̧ danȩrȩ. Teracaba orivo tori a̧mi̧ danȩrȩ. Jabo pio jiro tori a̧mi̧ da pio ju̧i̧ cji̧dämi̧ dari̧ japea̧dejȩ orivo goa̧ toro. Aja̧, ado cja̧rȩmo̧rȩ a̧mi̧ daremȩ üdë cjiarërea̧räpȩ ju̧ri̧, tuti dea̧ oa cjiamȩ ami̧ darë cjiarërea̧räpȩ ju̧ri̧ ano̧ mire cji̧dämi̧ dari̧ japea̧dejȩ cja̧rȩmȩpe bagami̧ dari̧, chjuari̧ ji̧cha̧pe bagami̧ dari̧. A̧ taruro cji̧dämi̧ dari̧ japea̧dejȩ. Ado pio ju̧ri̧pȩ cjiamȩrȩ goae tarari̧ buiu baämȩpea̧de tacö̧ pio judiri ma̧na̧mȩ tu pio oaiä. Jabechji̧ tacö̧ri pio judirimȩrȩ chjadëri̧ cjo̧ro̧rea̧ daea̧de. Ado danȩrȩ, ja̧di dari̧ cjiami̧ dari̧ cjianȩrȩ judiodë judiro̧. Pearä judi Ütë tjamo̧ ja̧dërëreji̧ri̧nȩrȩ jabo yaba̧, Ütë tjamo̧ pio ju̧i̧iä cjäri̧ri̧ cjia darea̧ daea̧nȩrȩ judio pio ji̧ri̧ nö̧ta. Tjamo̧ davä. Ütë tjamo̧ ja̧ji̧ri̧pea̧nȩrȩ.

Judio judiro̧ ado chjereno̧ cji̧dämi̧ dari̧ cjiapadirȩ judiro̧ quëna̧ji̧ri̧pea̧rä

¹⁸ Jabo mȩnȩro̧, judiodë pio judiro̧ oëra̧ jo̧rȩtadëtäreji̧ri̧nȩrȩ jabo. Tacö̧ri ja̧ a̧mi̧ dareji̧ri̧ pio ji̧ri̧, tuti dea̧ a̧mi̧ dareji̧ri̧ pio ji̧ri̧ badë dadëtäreji̧ri̧renȩro̧jȩrȩ judio pio ji̧ri̧. 'Jabechji̧ pio ji̧ri̧ u̧i̧ ba chiaa̧ro̧da' quëna̧rea̧mi̧dënȩrȩ. Danȩrȩ, jabomo̧ a̧mi̧ danȩrȩ. Dibëa̧ ma̧na̧ri̧ quirë baä cjiarea̧mi̧dënȩrȩ. Tacö̧ pio ju̧i̧iämo̧i̧ cjo̧ro̧rea̧ dami̧ dari̧ cjianȩrȩ. Tacö̧ üdë pio dibëiä cjo̧ro̧dëmȩde, jabo mȩnȩro̧ tacö̧ pio ju̧i̧iä cjo̧ro̧ji̧ri̧nȩrȩ. Pio ju̧i̧iä yo̧requededibe.

¹⁹ 'Jabechji̧ oëra̧ jo̧rȩtapai̧ dadiro̧da, oëra̧ yo̧pai̧ dadiro̧da' quëna̧ jo̧rȩtarequededibe, bücjüri̧ cjiamȩrȩ. “Aja̧, a̧mi̧ dareji̧ri̧ pio ji̧ri̧ yarëa̧ oa cjiarëreji̧ri̧dirȩ pio a̧ro̧rȩ ano̧ mire cji̧däa̧ oa cjiami̧ dari̧ cjiapea̧ oa” yo̧pai̧ danȩrȩ. Jabo cjäri̧ made ca̧ oti̧. Ja̧di dari̧ quëna̧rea̧mi̧dëde.

²⁰ Dëdë, tuti dea̧ oa cjiami̧ dari̧ cjiarëreji̧ri̧dirȩ judio judiro̧. Jabo teracabari̧ tuti dea̧ oa cjiami̧ dari̧ cjiadëa̧dirȩ jabo. Jabechji̧ judiro̧ quëna̧dëa̧ oaiä tuti dea̧ oa cjiami̧ dari̧ cjiarëreji̧ri̧dirȩ. Jabo ja̧didënȩrȩ mȩnȩro̧. Quëna̧ji̧ri̧pea̧nȩrȩ. Ado pio ju̧i̧iä cji̧däa̧ oa cjiami̧ dari̧ cjiaji̧ri̧pea̧nȩrȩ cja̧rȩmȩpe bagari̧. Jabo quëna̧chji̧vä. Oëra̧ jo̧rȩtadëchji̧vä. 'Jabechji̧ ba chia tjamo̧a̧ro̧da, judio ji̧ri̧ u̧i̧ ba chiaa̧ro̧da' quëna̧dëchji̧vä. Judio judiro̧ cjatäa̧mi̧ dari̧ cjiadiäpai̧ danȩrȩ peaja̧di mȩnȩro̧ na̧e chiadërä judi.

²¹ Jabechji̧ pearä cjiarëreji̧ri̧ a̧mi̧ da pio ji̧ri̧ tuti dea̧rä judi, peaja̧di tuti dea̧ oa cjiami̧ dari̧ japapai̧ dadidibe peaja̧di. Quëna̧chji̧vä!

²² Pio jiro ma̧ȩ üdë chjadëri̧ jo̧rȩta tänȩdiibe Ütë tjamo̧ pio ju̧i̧ chjiari. Danȩrȩ, a̧dë chjäte chjadëri̧ japamȩde, jabo peaja̧di uapai̧ dari̧ bape chjaomȩde. Ji̧dë ma chjai̧dëri̧ japaji̧ri̧ pio ji̧ri̧ uapai̧ dari̧ bape chjaodejȩrȩ. Jabo pio jȩaiäpȩmo̧ quëna̧ji̧ri̧ pio ji̧ri̧, jabechji̧ a̧dë chjäte chjadëri̧ japadejȩrȩ. Ado pio ju̧i̧iä yo̧requededibe. Eami̧ pumȩ üdë quëna̧dërä judi, jabechji̧ judiodë pio judiborë a̧ tuti dea̧ oa cjiami̧ dari̧ cjiapai̧ dade judio pio judiro̧mi̧ dari̧.

²³ Jabo judio judiro̧ ado chjereno̧ quëna̧rä judi, jabechji̧ ado chjereno̧ cji̧däa̧ oa cjiami̧ dari̧ japapai̧ dadejȩrȩ Ütë tjamo̧ judi a̧ taruro cjiarërea̧mi̧. Ja̧di dari̧ japapea̧ ji̧ chjaodëde Ütë tjamo̧ pio ju̧i̧iä.

²⁴ Ado mȩnȩro̧, judiodë pio judiro̧, jabechji̧ orivo goa̧ to pio judiri a̧mi̧ dadënȩrȩ. Cjäri̧ manȩrȩ, orivo goa̧ to pio judiri a̧mi̧ dadënȩrȩ jabo chirirä cjoromȩ orivo to pio judiri a̧mi̧ danȩrȩ. Teracaba tori a̧mi̧ danȩrȩ. Jabo teracaba orivo to pio judiri a̧mi̧ daräbo, jabechji̧ tuti de ëte ano̧ mire cji̧dämi̧ dari̧ japea̧didibe Ütë tjamo̧ judi. Tjamo̧ davä. Ado cja̧rȩmo̧ toro, orivo goa̧ to taruro, jida̧ oa cjiamȩ to taruro ano̧ mire cji̧dämi̧ dari̧ japea̧didibe. Ja̧di dari̧ japarea̧mi̧dëräbo jabechji̧ japea̧didibe chjadëri̧. Ado judio judiro̧, jabechji̧ orivo goa̧ to pio judiri a̧mi̧ darëreji̧ri̧dirȩ. Judiro̧ to taruro pearä cjiarërea̧ a̧mi̧ da pio ji̧ri̧ ado chjereno̧ cji̧dämi̧ dari̧ japapai̧ dadejȩrȩ Ütë tjamo̧ judi chjaodëri̧. Tjamo̧ davä. Ütë tjamo̧ judi teracaba tori a̧ pio ju̧i̧ ano̧ mire cji̧dämi̧ dari̧ japea̧rä judi, peaja̧di chjaodëri̧ cji̧dämi̧ dari̧ japapai̧ dadejȩrȩ judio pio ji̧ri̧, pearä cjiarëreji̧ri̧ a̧mi̧ da pio ji̧ri̧.

Ütërë ütarë jo̧rȩtarërea̧ üdë goadia̧ oa cjiami̧ dari̧ cjiarërea̧ ji̧, areiëa̧ oa cjiami̧ dari̧ cjiade yaba̧

²⁵ Danȩrȩ ca̧ jadü, judio pio ji̧ri̧ chjiari goadia̧ oa cjiami̧ dari̧ cjiarërea̧ ma̧ȩ pio ju̧i̧ chjadëri̧ dabatä earequededibe mȩnȩro̧ oëra̧ jo̧rȩtachea oa, 'Aja̧, o ji̧ri̧ u̧i̧ dabaji̧ri̧rȩ cjo̧ro̧a̧ro̧da' quëna̧chea oa. Danȩrȩ, judio judiro̧ orë bucho ana̧ jiadaji̧ri̧rȩ cjo̧ro̧dëpadirȩ jabo ado chjereno̧ quëna̧padirȩ. Ado chjereno̧ ta̧rë ja̧bopadirȩ. Danȩrȩ, Ütërë ütara̧ judiodë pio judiro̧ quëna̧ji̧ri̧pea̧rä, judi mitëa̧ judiodë pio judiro̧ ütëbodärärë quëna̧ji̧ri̧pea̧rä, jabechji̧ ado chjereno̧ quëna̧padirȩ judio judiro̧.

²⁶ Ado judirä Icharai pio judiri ja̧ji̧ri̧ judiro̧ ütëbodärärë chjätärea̧ dapadirȩ. Tjamo̧ davä. Ütë tjamo̧ pio judi yürüa̧ oa chjätärea̧ dapadirȩ. Ado pio ju̧i̧ chjiari ma̧ȩ üdë jabërä go̧ȩpea̧ oa cjiarëremȩde yabo yürüa̧ pënȩrä. Ta̧rëchji̧vä Ütë tjamo̧ judi judio pio ji̧ri̧ chjiari jabërä yo̧rërea̧ ji̧: "Aja̧, judio ji̧ri̧ chjätä tänȩmȩ pio judi, jabechji̧ Jerucharȩ quȩmȩ bë ma̧ri̧ri pio judiri go̧düpade. Ado Jacobo pio judiri ja̧ji̧ri̧ judiro̧ chjai̧dëri̧ japea̧ chjö̧na̧i̧ oa duridëparȩpadejȩ, pio jiro decjiape bagari̧.

²⁷ Ado cüdë ja̧di dari̧ japea̧ oaiä, jabechji̧ tjamo̧i̧ cjiari̧ cjiadiäpade cüdë pio ji̧ri̧iäpȩmo̧ jabërä yo̧ë cji̧därërea̧ ma̧ȩ üdë." Aja̧, ja̧di ta̧rëri̧ go̧ȩpea̧ oa cjiade Ütë tjamo̧ judi yo̧rërea̧ ma̧ȩ üdë judio pio ji̧ri̧ chjiari.

²⁸ Jabo jabëdirȩ. Judio judiro̧ jabëdirȩ. Jabë ma̧ȩ chjadëi̧ pio ju̧i̧ quëna̧dëdirȩ. Ado pio ju̧i̧iä Ütë pio ju̧i̧iäpȩmo̧ dëbëpe chjaodiro̧jo̧ȩ. Eadëdiro̧jo̧ȩ. Pio ju̧i̧iäpȩmo̧ acji tai̧rea̧ chiaji̧ri̧mi̧ dari̧ cjo̧ro̧dirȩ. Ado judiro̧ ja̧di dari̧ cjo̧ro̧a̧ oaiä, jabechji̧, chjadëdidibe judiodë pio ji̧ri̧iäpȩmo̧. Tjamo̧ davä. Judio judiro̧ jiada̧ oaiä, jabechji̧ quëna̧rea̧ daea̧nȩrȩ. Danȩrȩ, judio judiro̧ jiada̧räbo, jabechji̧ Ütërë pearä mitërërea̧ pumȩ pio judiro̧dirȩ. Judiro̧ quëna̧dëräbo cjäri̧ri̧ cjiamȩrȩ jo̧rȩtadejȩrȩ. Jibëa̧ taru pio ji̧ri̧iäpȩmo̧ yo̧ë cji̧därërea̧ oaiä, jabechji̧ ea tjamo̧mȩrȩ dadejȩrȩ eadëpe bagarea̧ decjiari̧.

²⁹ Jabechji̧ Ütërë mitërërea̧ pumȩ pio ji̧ri̧ chjiari ano̧ mire jo̧rȩtadëmȩde. Jënȩ mitëa̧mi̧ mitëmȩde, mitë ano̧mi̧ dari̧ japarea̧ decjiari̧. Tjamo̧ davä. Ütërë mitëa̧ oa cjiaji̧ri̧ pumȩ judiro̧ ado chjereno̧ mitë ano̧rea̧mi̧dëri̧ cjiadirȩ. Ado judi mitëa̧ pumȩ pio ji̧ri̧iäpȩmo̧ yürüa̧ üdë, jabechji̧ ado chjereno̧ mitëdëmȩde. Jabechji̧ yürüa̧mi̧ yürümȩde ano̧ mire jo̧rȩtarea̧ decjiari̧.

³⁰ Ado pio mȩnȩro̧ peaja̧di chjuari̧ jiadarëreji̧ri̧nȩro̧jo̧ȩ Ütë tjamo̧ ju̧i̧. Jabo ja̧dëa ji̧ judio pio judiro̧ Ütë tjamo̧ pio ju̧i̧iäpȩmo̧ jiadarërea̧ ji̧, jabechji̧ pio dibëiäpȩmo̧ ano̧ mire cjäri̧ri̧ cjia dadidibe.

³¹ Aja̧, judio pio judiro̧dirȩ yaba̧ jiadaji̧ri̧ judiro̧, jabo pio dibëiäpȩmo̧ ano̧ mire cjäri̧ri̧ cjia dadidibe Ütë tjamo̧ judi. Aja̧, pio dibëiäpȩmo̧ ano̧ mire cjäri̧ri̧ cjia dadidibe judi judio pio ji̧ri̧iäpȩmo̧ ado chjereno̧ cjäri̧ri̧ cjia dapea̧ oa.

³² Jabechji̧ Ütë tjamo̧ judi pumȩ ütëbodärä oa ütarë daea̧ ji̧, judio pio ji̧ri̧, judiodë pio ji̧ri̧ ütärë daea̧ ji̧, 'Jabechji̧ ta̧rëdiädë madiro̧da, aeno̧pea̧ maearë cjiadiro̧da' quëna̧ jo̧rȩtamȩrȩ ütarë darëremȩdejȩrȩ judi pumȩ ütëbodärä oa cjäri̧ri̧ cjia dapea̧ oa.

A̧dë chjäte chjacjiamȩri̧ jo̧rȩtapea̧de Ütë tjamo̧ judi

³³ Jabechji̧ a̧dë chjäte ana̧ri̧ cjiade Ütërë cjäri̧ri̧ cjia da̧ üdë. Ütararea̧mi̧dëri̧ cjiade. Ado ju̧i̧ ja̧ jo̧rȩtarea̧ üdë, a̧dë chjäte urëdi oa cjiade, ado cja̧rȩmo̧rȩ cho̧rë jo̧rȩtarea̧mi̧dëri̧. Jabechji̧ a̧ro̧rȩ pumȩ pio judiro̧, 'Aja̧, pio ju̧i̧iä ja̧di dari̧ japea̧dida, pio ju̧i̧ jo̧rȩtamȩrȩ japea̧dida' quëna̧ jo̧rȩtarea̧mi̧dëri̧ japamȩde. Jabechji̧ Ütë tjamo̧ pio ju̧i̧ ütararea̧mi̧dërea̧ro̧jo̧ȩ. Judi japea̧ pio ju̧i̧, judi jo̧rȩta̧ pio ju̧i̧ ütararea̧mi̧dërea̧ro̧jo̧ȩ.

³⁴ Danȩrȩ, ¿chjiade Ano̧mȩ tjamo̧ ja̧ chji̧räpȩmo̧ cjacjarë damȩ judi? Cjäri̧ made, jiro decjiade. Ado ¿chjiade Ütë tjamo̧ pio ju̧i̧iäpȩmo̧ a̧ra̧ano̧mȩ judi? ¿Chjiade pio ju̧i̧iäpȩmo̧ chi̧dëeamȩ judi? Cjäri̧ made, ado cja̧rȩmo̧rȩ chi̧dëea̧ oa jo̧rȩtadëmȩde.

³⁵ Ado ¿chjiade Ütë tjamo̧ ju̧i̧iäpȩmo̧ cjäri̧ri̧ cjiamȩrȩ yürümȩ judi? ¿Chjiaiäpȩmo̧ ba cjiade judi? Cjäri̧ made, eami̧ oa ba cjiadë made. Jabechji̧ pumȩ judiro̧ pio ju̧i̧iäpȩmo̧ yürürea̧ goadë madirȩ.

³⁶ Danȩrȩ, Ütë tjamo̧ pio ju̧i̧iämo̧i̧ taruparëremȩde chjö̧na̧i̧rȩ. Jibëa̧ ma̧na̧ri̧ idëpea̧ oa cjiadë maeade. Ado peaja̧di Ütë pio ju̧i̧iämo̧i̧ quirë baä quirë baä cjiarea̧ dade chjö̧na̧i̧därärë. Pio judi jida̧ oa cjia maeade. Pio ju̧i̧ ja̧ maeade. Ado pio ju̧i̧iä jabechji̧, pio ju̧i̧iäpȩmo̧ ma a̧dë chjäte chjacjiamȩri̧ jo̧rȩtapea̧ maeade bucho ana̧. Ja̧ditäde.