Domano Ma̧ȩ 1 - Biblia Pume

Taruparea̧ Ma̧ȩ

¹ Danȩrȩ, Pablo pio judirequede cüdë. Jechu Quiricho pio ju̧i̧ ja̧ mu̧i̧tjoi̧requede. Ado Ütë tjamo̧ pio judi mitërëremȩdique. Aja̧, cüdë Jechurë chjadüa̧ oa ja̧bepapea̧ oa mitërëremȩdique. Ado china̧chjari̧ tutirëremȩdique jibëa̧ ma̧ȩ pio ju̧i̧ a̧ra̧ano̧pea̧ oa, ma̧ȩ chjadëi̧ pio ju̧i̧.

² Ado pio jiro ma̧ȩ pio ju̧i̧ chjiari jabërä ma̧ȩ yürürëremȩdejȩrȩ Ütërë ea jana̧ chjadüa̧ oa ni̧bäji̧ri̧ pio ji̧ri̧iäpȩmo̧ peadëri ja̧. 'Aja̧, ma̧ȩ chjadëi̧ pio ju̧i̧ yürüpaquëda, pumȩ ja̧ oa yürüpaquëda' quëna̧ jo̧rȩtamȩrȩ yo̧ë cji̧därëremȩdejȩrȩ, jënȩ yürüpea̧ ma̧ȩ pio ju̧i̧ chjiari. Aja̧, jabërä yo̧ë cji̧därëremȩdejȩrȩ judiro̧ chjadëri̧ go̧ȩpapea̧ oa.

³ Ado pio jiro ma̧ȩ chjadëi̧ üdë, jabechji̧ Ütë tjamo̧ pio ju̧i̧ ja̧ Joja pio ju̧i̧ chjiari ma̧ȩde. Ado judi pumȩ chjarerä pearä cjo̧ro̧rërea̧ ji̧, jabechji̧ Davi pio judiri ja̧mȩrȩ ara̧ oa cjiarëremȩde. Jabo dai oa ara̧ oa cjiamȩborë,

⁴ jabechji̧ Ütë tjamo̧ pio ju̧i̧ ja̧ Jade. Ado pumȩ judiro̧ pio ju̧i̧ chjiari coëma cjiari̧ jo̧rȩtapea̧ oa, Ütë tjamo̧ judi chjadëri̧ na̧rȩrëremȩde. 'Aja̧, Ütë tjamo̧ pio ju̧i̧ ja̧ Ja tjamo̧dida, a̧dë chjäte tatari̧ cjiamȩ pio judidida, teracabadëdida jabo pio judi tjamo̧dida' quëna̧rea̧mi̧ dari̧ bëdü tänȩrëremȩdejȩ Tjo tjamo̧ ja̧ jauëchja pio ju̧i̧iä. Tjamo̧ davä. Jechu Quiricho judi, ibëa̧ Ano̧mȩ pio judi, Ütë tjamo̧ ja̧ Ja pio judide.

⁵ Ado judi pio coa chjiari tuti japarërea̧ pio ju̧i̧iä, jabechji̧ Ütë tjamo̧ pio judi cjäri̧ri̧ cjiamȩrȩ mitërëremȩdique cüdë Jechurë chjadüa̧ oa cjiapea̧ oa. Pio judirimȩ maearë mitërëremȩdique cüdë chjadëri̧ japadëa̧ ba oa. Aja̧, judiodë pio judiro̧ chjadëri̧ ta̧rërea̧ dapea̧ oa, Quiricho pio ju̧i̧iäpȩmo̧ quëna̧rea̧ dapea̧ oa mitërëremȩdique pio ju̧i̧ ja̧ ma̧ȩrä cjo̧ro̧pea̧ oa.

⁶ Ado danȩrȩ, pio dibëbo mitërëremȩdidibe ca̧ oti̧. Ütë tjamo̧ pio judi mitëa̧didibe. Jechu Quiricho pio ju̧i̧ ja̧ mape bagapea̧ oa ëna̧diärëremȩdidibe.

⁷ Ado pio dibëiäpȩmo̧ go̧ȩpe chjadürequededibe Ütërë ea̧ chja̧oerä cjiaji̧ri̧ oa, Domaräpȩji̧ri̧ oa. Aja̧, Ütërë mitëa̧ oa cjiaji̧ri̧ oa go̧ȩpe chjadürequededibe, Quiricho pio ju̧i̧iä tutia̧ oa cjiaji̧ri̧ pumȩ pio ji̧ri̧. Danȩrȩ ca̧ pumȩ, ibëa̧ Ama̧i̧ Ütë pio ju̧i̧iä goë cjo̧dërequede, Ano̧mȩ Jechu Quiricho pio ju̧i̧iäbo. Aja, pio dibë chjiari goë cjo̧dëreconȩ ma̧ chjupi̧ cjiari̧ jo̧rȩtarea̧ yürütä, jënȩ cjäri̧ri̧ cjia da̧ chja̧oerä goae tarari̧ cjo̧ro̧rea̧ yürütä. Ja̧di ta̧rëri yo̧mȩrȩ goë cjo̧dëreconȩ.

Pablo judi goë cjo̧dërëremȩde pumȩ pio ji̧ri̧ chjiari

⁸ Ado cüdë ado cja̧rȩmo̧ ma̧ȩra̧ tarupë go̧ȩpatärea̧ ji̧, jabechji̧ mȩnȩro̧ quëna̧ji̧ri̧pea̧ pio ju̧i̧ chjiari go̧ȩpatämi̧ cjiarequededibe yabochja. Danȩrȩ ca̧ oti̧, mȩnȩro̧ Jechu ju̧i̧iäpȩmo̧ quëna̧pea̧ pio ju̧i̧ chjiari ma̧ȩ üdë jachipadärärëremȩde oëra̧ti̧ oa. Tjamo̧ davä. Chiriräpȩti̧ oa cjo̧ro̧ji̧ri̧ judiro̧ goë goë ta̧rërea̧mi̧ dari̧ jachipadärärëremȩde. Ado pio ju̧i̧iä cüdë, 'Aja̧, ca̧ Ütë judi chjadë tjamo̧dida, chjadëri̧ japea̧diji̧ri̧da, Jechu Quiricho pio ju̧i̧iä ibë ütëbo oa chjadëri̧ japea̧diibëda' quëna̧ jo̧rȩtarea̧ra̧ pio ju̧ri̧ra̧ tarupë go̧ȩparequededibe ca̧ oti̧.

⁹ Aja̧ ca̧ oti̧, dabadique Ütë tjamo̧ judi cüdë pio dibë chjiari ji̧dë ma goë cjo̧dëpea̧ ji̧. Jabechji̧ doromo̧dë jabo gȩnȩräbo goë cjo̧dërequede, goë cjo̧dë ano̧rea̧ decjiari̧. Aja̧, chji̧ chjara chia jo̧rȩtarea̧ decjiari̧ ja̧beparequede Ütë tjamo̧ ja̧ oa ma̧ȩ chjadëi̧ pio ju̧i̧ a̧ra̧ano̧pea̧ oa, Joja pio ju̧i̧ chjiari ma̧ȩ oa a̧ra̧ano̧pea̧ oa.

¹⁰ Ado Ütë tjamo̧ judi coa järea̧ yürürä judi, pio dibëiäpȩ järea̧ yürürä judi, jabechji̧ goëdeparequededibe. Jabechji̧ pio ju̧i̧bo jo̧rȩtamȩrȩ goë cjo̧dëreconȩ.

¹¹ Tjamo̧ davä ca̧ oti̧, tjamo̧ri̧ datämi̧ cjiarequededibe. Ma̧ȩ goae tjamo̧ oa yürütämi̧ cjiarequededibe dibëa̧ tjo ja̧ oa, mȩnȩro̧ ji̧dë u̧i̧ to̧bari̧ cjiapea̧ oa.

¹² Ado pio dibëiä jurami̧ dari̧ ta̧rë chatämi̧ cjiarequede peaja̧di. Aja̧ ca̧ oti̧, ba dëbëti̧ra̧ chia to̧baparȩpea̧ pio ju̧i̧ jo̧rȩtamȩrȩ yo̧requededibe. Jabechji̧ a̧ro̧rȩ ibëa̧ dëbëti̧ra̧ chia bapë ta̧rëji̧ri̧rȩ ni̧bä chjaoa̧ oaiä, jurarea̧ goae tjamo̧ oa ba dëbë ëba jurami̧ dari̧ japea̧ oaiä, jabechji̧ ji̧dë u̧i̧ järiji̧ri̧rȩ cjo̧ro̧rea̧ daparea̧rȩ, a̧ro̧rȩ ji̧dë u̧i̧ chjuari̧ quëna̧rea̧mi̧ dari̧.

¹³ Danȩrȩ ca̧ oti̧, chjadëri̧ dabatä earequededibe. Peadëri ja̧ järitarequede davä pio dibëiäpȩ jäpea̧ ji̧. Jabo cjäri̧ marequede, järea̧ dadëa̧. Järea̧ yürüdëa̧dique. Ji̧dë ma tja̧reparȩa̧ oa cjiami̧ dari̧ cjiadiäa̧requede. Jabo dëdë, no̧mȩ tjamo̧ri ja̧ jo̧rȩtarequededibe judiodë pio ji̧ri̧. Jabechji̧ tjado ano̧mȩ judi pjäë oa mitëmi̧ dari̧ mitëtämi̧ cjiarequede peaja̧di pio dibëiä. Tjamo̧ davä. Cüdë ado cja̧rȩmo̧ pumȩ pio ji̧ri̧iä mitërea̧ darërea̧mi̧ mitërea̧ datämi̧ cjiarequede pio dibëiä peaja̧di, o judiro̧ peaja̧di quëna̧pea̧ oa.

¹⁴ Jabechji̧ pumȩ ütëbodärä oa ba cjiadiämi̧ dari̧ cjiarequedejȩrȩ ca̧ oti̧. Ado pio ju̧i̧iä ma̧ȩ chjadëi̧ pio ju̧i̧ to̧bari̧ ni̧bä chjaopea̧ chiarequedejȩrȩ. Jabechji̧ pumȩ ütëbodärä oa bacjiadiämi̧ dari̧ cjiarequedejȩrȩ, ji̧ra̧ri̧ dabapea̧ji̧ri̧ pio ji̧ri̧ ado ji̧ra̧ri̧ dabapadëa̧ pio ji̧ri̧bo, bë ma̧ri̧räpȩ cjo̧ro̧ji̧ri̧ pio ji̧ri̧, ado chiriräpȩ cjo̧ro̧ji̧ri̧ pio ji̧ri̧bo. Jabechji̧ pumȩ ütëbodärä oa ba cjiadiämi̧ dari̧ cjiarequede Ütë tjamo̧ ja̧ ma̧ȩ oa ni̧bä chjaopea̧ ji̧.

¹⁵ Ja̧di tara jabechji̧, järiri̧ cjiatarequede davä ma̧ȩ chjadëi̧ pio ju̧i̧ to̧bari̧ ni̧bä chjaopea̧ ji̧. Ado pio dibëbo ni̧bä chjaopea̧ ji̧ järi tjamo̧requede, Doma bë ma̧ri̧räpȩ cjo̧ro̧ji̧ri̧ pio ji̧ri̧bo.

Ma̧ȩ chjadëi̧ pio ju̧i̧iä jabechji̧parȩa̧ oa cjiapai̧de quëna̧mȩ judi

¹⁶ Danȩrȩ ca̧ pumȩ, ma̧ȩ chjadëi̧ pio ju̧i̧ chjiari idëri̧ cjiadërequede. Jabechji̧ pio jiro ma̧ȩ pio ju̧i̧iä chjätärea̧ yürüdejȩ Ütë tjamo̧ judi quëna̧mȩ pio ju̧i̧. Ado pio jiro ma̧ȩ üdë pumȩ ütëbodärä ja̧de. Jabo dëdë, judio pio judiro̧ o ji̧ri̧ ja̧ yaboi̧ ta̧rërëreji̧ri̧diro̧jo̧ȩ jabo jabechji̧, ütëbodärä ja̧de. Ado pio ju̧i̧iä jabechji̧, oëadëmȩmi̧ darë idëri̧ cjiadëreconȩ.

¹⁷ Jabechji̧ ma̧ȩ chjadëi̧ pio ju̧i̧iä jabechji̧parȩrea̧ yürüpai̧ dadejȩ davä, quëna̧mȩ ju̧i̧ Ütë tjamo̧ judi. Tjamo̧ davä, eami̧ pumȩ üdë quëna̧ pio ju̧i̧iämo̧i̧ jabechji̧parȩa̧ oa cjiade, ado judirirea̧ decjiade. Ado pio ju̧i̧ chjiari chjadëri̧ na̧rȩdiibe ma̧ȩ chjadëi̧ üdë. Peaja̧di ta̧rëri̧ go̧ȩparëremȩde no̧mȩ go̧ȩparëremȩ judi, Ütërë ea jana̧ chjadüa̧ oa ni̧bämȩ pio judi. Danȩrȩ, ja̧di ta̧rëri̧ go̧ȩparëremȩde: "Aja̧, quëna̧ pio ju̧i̧iä jabechji̧parȩa̧ oa cjiamȩ pumȩ judi, jabechji̧ quëna̧mȩrȩ cjo̧ro̧pade" go̧ȩparëremȩde.

Ütë tjamo̧ judi ërecjiamȩrȩ dadejȩrȩ quëna̧dëji̧ri̧ pio ji̧ri̧, judiodë pio ji̧ri̧

¹⁸ Danȩrȩ, Ütë tjamo̧ judi, a̧dëräpȩ cjiamȩ pio judi ma̧ cjüëtüri̧ jo̧rȩtamȩrȩ na̧rȩ chjaodejȩrȩ chjai̧dëri̧ jape cjiaji̧ri̧ pio ji̧ri̧iäpȩmo̧. Jabechji̧ jënȩ ërecjia̧ pio ju̧i̧iä na̧rȩ chjaodejȩrȩ pumȩ pio ji̧ri̧ bape chjaopea̧ pio ju̧i̧ chjiari. Jabechji̧ judiro̧ dami̧ti̧ oa chjai̧dë oa jape chjaoa̧ oaiä, judiro̧ chjuari̧ jiada̧ pio oaiä, tutia̧ oa cjiami̧ dari̧ cjiade tjamo̧i̧ cjiamȩ ma̧ȩ üdë. Jabechji̧ pumȩ no̧i̧dërë ta̧rëtärea̧ ji̧, tja̧reparȩa̧ oa cjiami̧ dari̧ cjiade ma̧ȩ üdë pio jiro pumȩ pio ji̧ri̧iä.

¹⁹ Ado pio jiro pumȩ judiro̧, dëdë, Ütë tjamo̧ pio ju̧i̧ chjiari dabadirȩ. Jabechji̧ pio jȩa chjiari dabarea̧ yürüdejȩrȩ. Jibëa̧ chji̧rä chari̧ dabarea̧ yürüdejȩrȩ. Dabarea̧mi̧ dari̧ na̧rȩ chjaodejȩrȩ chjadëri̧. Jabo cjäri̧ madiro̧jo̧ȩ, chjuari̧ jiadadiro̧jo̧ȩ. Ja̧di tara bape chjaodejȩrȩ Ütë tjamo̧ judi.

²⁰ Danȩrȩ ca̧ oti̧, Ütë tjamo̧ ju̧i̧iäpȩmo̧ irä darea̧mi̧dëräbo, jabechji̧ chjadë maeade jënȩ pareapea̧ pio judi. Judi dabu oa pearä judirä pareapea̧ pio judiri yurori daba dae chjao marëreji̧ri̧diro̧jo̧ȩ. 'Aja̧, dabu oa pareapea̧diji̧da, a̧dë oa pareapea̧diji̧da, jauëchjamȩti̧ pio judidida, bucho ana̧mȩ pio judidida, Ütë tjamo̧ pio judidida' quëna̧ dabarea̧mi̧ dari̧ na̧rȩ chjaorëremȩdejȩrȩ. Ado pio ju̧i̧iä pumȩ judiro̧, 'Cjäri̧ maquëda, dabarea̧ dadëquëda, Ütë tjamo̧ pio ju̧i̧ chjiari tjamo̧ri̧ dabaparea̧ dadëquëda' quëna̧rea̧mi̧dëri̧ cjiarëreji̧ri̧dirȩ. Jabechji̧ dabarëreji̧ri̧dirȩ.

²¹ Jabo dabaji̧ri̧borë ba chia jo̧rȩtadërëreji̧ri̧diro̧jo̧ȩ. 'Jabechji̧ Ütë tjamo̧ judi pareapamȩ pio judidida, chjadëri̧ japadiibëda, chjadëri̧ yürüdiibëda' quëna̧ dabaji̧ri̧borë, jabechji̧ quëna̧ jo̧rȩtadërëreji̧ri̧diro̧jo̧ȩ. Ado pio ju̧i̧iä oëra̧ti̧ oa jo̧rȩtaji̧ri̧pe bagarëreji̧ri̧dirȩ. Badë maea oa jo̧rȩtaji̧ri̧pe järëreji̧ri̧dirȩ teracaba pio ju̧i̧. Jabechji̧ tjamo̧i̧ cjiari̧ baämȩ ma̧ȩ pio ju̧i̧ jo̧rȩtadëri̧ cjia oaiä bagönȩ maearä jo̧rȩtami̧ dari̧ jo̧rȩtaji̧ri̧pe bagarëreji̧ri̧dirȩ.

²² Jabo cjäri̧ madirȩ ca̧ oti̧, da cotomi̧ dari̧ cjiaji̧ri̧borë, 'Aja̧, dabaa̧ro̧da, bodëa̧ro̧da jabo jabechji̧ chjadëri̧ dabaa̧ro̧da' quëna̧ jo̧rȩtaji̧ri̧rȩ yo̧rëreji̧ri̧dirȩ. “Aja̧, chjö̧na̧i̧ti̧ oa chjadëri̧ dabarea̧rȩ” yo̧rëreji̧ri̧dirȩ. Jabo cjäri̧ madirȩ, dabadëpe jä marëreji̧ri̧dirȩ. Bo mape bagarëreji̧ri̧dirȩ.

²³ Ado bo mapea̧ji̧ri̧rȩ teracaba maea oa quëna̧ji̧ri̧pe bagarëreji̧ri̧diro̧jo̧ȩ. Bucho ana̧ cjiamȩ Ütë pio ju̧i̧iäpȩmo̧ ma chjacjiamȩri̧ jo̧rȩtatärea̧ ji̧, ba chia jo̧rȩtaji̧ri̧pe järëreji̧ri̧diro̧jo̧ȩ teracabamȩ pio ju̧i̧. Aja̧, jënȩro̧ chjuroa̧ pio ju̧i̧ ba chia jo̧rȩtaji̧ri̧pea̧diro̧jo̧ȩ coë jäji̧ri̧mi̧ da oa, puami̧ da oa, bacami̧ da oa, bucho ana̧dëmȩ pumȩmi̧da oa.

²⁴ Ado judiro̧ ja̧di dari̧ japea̧ pio ju̧i̧iä ¿tjana̧ japarëremȩde Ütë tjamo̧ judi? Tjana̧ japadëa̧, jabechji̧ judiro̧ ja̧di dari̧ japea̧ pio ju̧i̧iä cjiadiämi̧ dari̧ cjiarëremȩde. Tjamo̧ davä. Pumȩ judiro̧ teracabamȩ pio ju̧i̧iäpȩmo̧ ma jo̧rȩtaji̧ri̧pea̧ oaiä, a̧dë baämi̧ dari̧ cjiarëremȩde, pumȩ pio ji̧ri̧ ana̧ri̧ jo̧rȩta tänȩtea̧ ji̧. Ado cjiadiämi̧ dari̧ cjiamȩrȩ, jabechji̧ dami̧ti̧ chjai̧dë oa japarea̧ yürürëremȩdejȩrȩ. Ado jibëa̧ chji̧ra̧ a̧dë chjäte chjai̧dëri̧ jo̧rȩta̧ pio ju̧i̧ japarea̧ yürürëremȩdejȩrȩ chjö̧na̧i̧ oa. Ado jibëa̧ dëbëti̧ra̧ chia idi̧ dati̧ pio ju̧i̧ japarea̧ yürürëremȩdejȩrȩ peaja̧di china̧chja pio ju̧i̧. Aja̧, jibëa̧ icjara oa ma̧i̧ da chjai̧dë pio ju̧i̧ japarea̧ yürürëremȩdejȩrȩ.

²⁵ ¿Jabo tjana̧ ju̧i̧iä ja̧di dari̧ japarea̧ yürürëremȩdejȩrȩ Ütë tjamo̧ judi? Tjana̧ ju̧i̧iädë, jabechji̧ judiro̧ tjamo̧i̧ cjiari̧ baämȩ ma̧ȩ pio ju̧i̧ jiadarërea̧ ju̧i̧iä, judiro̧ ma̧ȩ chjádë pio ju̧i̧ ano̧ mire quëna̧ji̧ri̧pea̧ pio ju̧i̧iä, jabechji̧ ja̧di dari̧ japarea̧ yürürëremȩdejȩrȩ. Tjamo̧ davä. Judiro̧ pareapamȩ tjamo̧ pio ju̧i̧ chjacjiamȩri̧ jo̧rȩtatärea̧ ji̧, jabechji̧ jënȩ pareapea̧ pio ju̧i̧ ano̧ mire chjacjiamȩri̧ jo̧rȩtaji̧ri̧pe bagarëreji̧ri̧diro̧jo̧ȩ ütëdë maea oa. Ado pio ju̧i̧iä jabechji̧, dami̧ti̧ chjai̧dë oa japarea̧ yürürëremȩdejȩrȩ. Jabo cjäri̧ made ca̧ oti̧, ado cja̧rȩmo̧ oa jo̧rȩtarea̧mi̧dëde. Ado cja̧rȩmo̧ pio ju̧i̧iäpȩmo̧ ano̧ mire chjacjiamȩri̧ jo̧rȩtarea̧mi̧dëde. Jabechji̧ Ütë tjamo̧ pio judimo̧de. Ado cja̧rȩmo̧ ütë decjiade. Ütë tjamo̧ pio ju̧i̧iäpȩmo̧ ma chjacjiamȩri̧ jo̧rȩtapea̧de bucho ana̧. Ja̧ditäde.

²⁶ Jabo Ütë tjamo̧ pio ju̧i̧iäpȩmo̧ ma chjacjiamȩri̧ jo̧rȩtadëa̧ oaiä, jabechji̧ a̧dë baämi̧ dari̧ cjiarëremȩde. Ado pio ju̧i̧iä idi̧ da tjamo̧ pio ju̧i̧ japarea̧ yürürëremȩdejȩrȩ. China̧chjarea̧ pio ju̧i̧ japarea̧ yürürëremȩdejȩrȩ. Ado pio ju̧i̧iä ivi jini̧ro̧ jibëa̧ üi̧ pio ju̧i̧mo̧i̧ dae ja̧bo datärea̧ ji̧, jibëa̧ io pio ji̧ri̧ goaraji̧ri̧pe bagarëreji̧ri̧ni̧rȩ, idi̧ dari̧ ëba mo̧a̧ji̧ri̧rȩ.

²⁷ Peaja̧di dari̧ japarëreji̧ri̧dirȩ oari judiro̧. Jibëa̧ iei̧ pio ji̧mo̧ dae ja̧bo datärea̧ ji̧, jibëa̧ iei̧ pio ji̧mo̧ gari̧patärea̧ ji̧, jibëa̧ io pio ji̧ri̧ ano̧ mire dae ja̧bo daji̧ri̧pe bagarëreji̧ri̧dirȩ. Tjamo̧ davä. Jibëa̧ io pio ji̧ri̧mo̧ goaraji̧ri̧pea̧dirȩ, idi̧ da tjamo̧ri̧ jape cjiaji̧ri̧rȩ. Ado pio jiro jo̧rȩtarea̧ üdë ji̧dë ma boadiä boadiä cjiami̧ dari̧ cjitërëremȩde jibëa̧ chji̧rä, idi̧ dari̧ japarea̧ pio ju̧i̧mo̧i̧ jo̧rȩtaji̧ri̧rȩ. Ado pio ju̧i̧iä jabechji̧, jibëa̧ icjara üdë gito ana̧ri̧ taramȩpe bagarëremȩde judiro̧ chjai̧dëri̧ japea̧ ba oa.

²⁸ Tjamo̧ davä ca̧ oti̧, Ütë tjamo̧ pio ju̧i̧ chjiari coëma cjiari̧ jo̧rȩtadëri̧ cjia tara, jabechji̧ chji̧ decjiami̧ dari̧ jo̧rȩtarea̧ yürürëremȩdejȩrȩ chjai̧dë maea oa japapea̧ oa.

²⁹ Ado pio jiro pumȩ judiro̧, cjäri̧ madirȩ, dami̧ti̧ chjai̧dë oa jape chjaoji̧ri̧pe bagarëreji̧ri̧dirȩ, cja̧rȩmȩ chjai̧dë maea oa japarea̧ decjiari̧. Aja̧, coëma cjiari̧ japadërea̧ pio ju̧i̧, a̧dë chjäte chjai̧dë pio ju̧i̧ jape chjaoji̧ri̧pea̧dirȩ, chjai̧dë pio ju̧i̧ goaraji̧ri̧rȩ. Ado pio ju̧i̧iä ji̧dë ma dae ja̧bo dae ja̧bo dae chjaoji̧ri̧pe bagarëreji̧ri̧dirȩ jibëa̧dë pio ju̧i̧. Ado jibëa̧ dëbëti̧ra̧ chia ji̧dë ma chjai̧dëri̧ jape cjiaji̧ri̧pea̧dirȩ. Quëbaji̧ri̧rȩ jo̧rȩte chjaoji̧ri̧pea̧dirȩ. Ado pumȩ ji̧ri̧ chjadëri̧ ëba cjo̧ro̧tärea̧ ji̧, ja̧bo tänȩ chjaoji̧ri̧pea̧diro̧jȩrȩ. Ado cja̧rȩmȩ chji̧ chiami̧ dari̧ jo̧rȩtatärea̧ ji̧, cjäri madirȩ, chjarapë baämi̧ dari̧ jo̧rȩtaji̧ri̧pea̧dirȩ. Aja̧, ja̧di dari̧ cjo̧ro̧ji̧ri̧pe bagarëreji̧ri̧dirȩ. Judiro̧ yo̧a̧mi̧ japatärea̧ ji̧, japadëa̧dirȩ, jabo u̧i̧pe u̧i̧pe yo̧ chjaoji̧ri̧pea̧dirȩ pumȩ pio ji̧ri̧iäpȩmo̧ chjai̧dëri̧ japapea̧ oa. Jabechji̧ jibëa̧ chji̧ üdë tjuri cjiami̧ dari̧ cjiamȩpea̧de chjai̧dë maea oa jo̧rȩta̧ oaiä. Jibëa̧ dëbëti̧ra̧ chia ba chia datärea̧ ji̧, ba chia dadëji̧ri̧pea̧dirȩ. Ado orë pumȩ pio ju̧i̧iäpȩmo̧ badë dapea̧ oa, jabechji̧ teracaba ma̧ȩ oa goadi goadi yo̧ji̧ri̧pea̧dirȩ. Aja̧, ma̧ȩ chjádë yürüji̧ri̧pea̧dirȩ o ji̧ri̧ chjiari. Ja̧di dari̧ japaji̧ri̧pe bagarëreji̧ri̧dirȩ.

³⁰ Ado o ji̧ri̧iäpȩmo̧ aene ni̧bädëtärea̧ ji̧, cjäri̧ madiro̧jȩrȩ, aeno̧ chjaoji̧ri̧rȩ cjo̧ro̧ji̧ri̧pea̧dirȩ ma̧ȩ goaedëti̧ra̧. Aja̧, ya̧e chjaoji̧ri̧pea̧dirȩ. Ma̧ȩ goaedë oa ni̧bäji̧ri̧pea̧dirȩ. Ado Ütë tjamo̧ pio ju̧i̧iäpȩmo̧ ea tjamo̧tärea̧ ji̧, cjäri̧ madiro̧jo̧ȩ, eadëji̧ri̧pea̧diro̧jo̧ȩ. Ado Ütë tjamo̧ ja̧ chji̧ra̧ jo̧rȩtami̧ dari̧ jo̧rȩtatärea̧ ji̧, jibëa̧ chji̧rämo̧ quëna̧ji̧ri̧pea̧dirȩ. 'Aja̧, o judiro̧ badë madiro̧da, pio cüdëmo̧rȩ ba chiaquëda' quëna̧ji̧ri̧pea̧dirȩ. Ado pio jibëiäpȩmo̧ ma ba chia dapea̧ oa goaeri̧ yo̧ chjaoji̧ri̧pea̧dirȩ. Aja̧ ca̧ oti̧, ja̧di dari̧ cjo̧ro̧ji̧ri̧pe bagarëreji̧ri̧dirȩdirȩ. Ado judiro̧ cja̧rȩmȩ co jabë japadëa̧ chjai̧dë pio ju̧i̧bo järi tjamo̧ji̧ri̧pea̧dirȩ japapea̧ ji̧. A̧dë chjäte chjai̧dë oa japaji̧ri̧pea̧dirȩ dami̧ti̧ oa. Jabechji̧ chjai̧dë goara tjamo̧ji̧ri̧pea̧dirȩ. Ado jibë nö̧riji̧ri̧ pio ji̧ri̧ chjadëri̧ ta̧rëdiätärea̧ ji̧, ta̧rë ta̧rë japadëji̧ri̧pea̧diro̧jȩrȩ.

³¹ Tjamo̧ davä ca̧ oti̧, chjai̧dë tjamo̧pe bagarëreji̧ri̧dirȩ. Chji̧ cotomi̧ dari̧ jo̧rȩtaji̧ri̧pe järëreji̧ri̧dirȩ. Ma̧ȩ chjadë ma yürüji̧ri̧pea̧dirȩ. Ado judiro̧ yo̧a̧mi̧ japadëji̧ri̧pea̧dirȩ. Ji̧dëdiä ni̧bäji̧ri̧pea̧dirȩ. Ma̧ȩ chjádë yürüdëcji̧ quëna̧ japaji̧ri̧rȩ u̧i̧paji̧ri̧pea̧diro̧jȩrȩ o ji̧ri̧. Ado jibëa̧ pumȩ pio ji̧ri̧ cjäri̧ri̧ cjia datärea̧ ji̧, cjäri̧ madiro̧jȩrȩ, cjäri̧ri̧ cjia dadëji̧ri̧pea̧diro̧jȩrȩ. Jabechji̧ daeeaji̧ri̧pea̧diro̧jȩrȩ. Chjai̧dëri̧ japaji̧ri̧pea̧diro̧jȩrȩ.

³² Ado pio jiro pumȩ judiro̧, dëdë, dabarëreji̧ri̧dirȩ Ütë tjamo̧ ja̧ ma̧ȩ pio ju̧i̧. Ado Ütë tjamo̧ ja̧ ma̧ȩ oa jiada̧ üdë, 'Aja̧, ja̧bopea̧ maeadida' quëna̧ dabarëreji̧ri̧dirȩ peaja̧di. Jabo dabaji̧ri̧borë jiade chjaoji̧ri̧pe bagarëreji̧ri̧dirȩ. Jaboti̧rea̧ jape cjiaji̧ri̧pe järëreji̧ri̧dirȩ, chjai̧dë oa japë ano̧rea̧ decjiari̧. Ado judiro̧ chjai̧dëri̧ japaji̧ri̧ pio ji̧ri̧ darä, "Aja̧, ji̧dë ma japachji̧vä chjai̧dë pio ju̧i̧" yo̧ chjaoji̧ri̧pea̧diro̧jȩrȩ ji̧dëri̧. Tjamo̧ davä. Ma̧i̧ dari̧ japaji̧ri̧pe bagarëreji̧ri̧dirȩ, Ütë tjamo̧ ja̧ ma̧ȩ oa chjuari̧ jiadaji̧ri̧rȩ.