Da̧de 9 - Biblia Pume

Da̧de judi Ütë tjamo̧ pio ju̧i̧iä goë cjo̧dërëremȩdejȩ jibëa̧ pumȩ pio ji̧ri̧ chjiari, icharaita pio ji̧ri̧ chjiari. Jabechji̧ judiro̧ jibëa̧ chiriräpȩ cjo̧ro̧rërea̧ ji̧, Babironiaräpȩ ano̧ mire cjo̧ro̧ji̧ri̧pea̧dirȩ ado cja̧rȩmo̧ ja̧ chja̧oerä cjo̧ro̧ji̧ri̧rȩ. Ado pio ju̧i̧iä Da̧de judi ana̧ri̧ jo̧rȩtamȩrȩ goë cjo̧dërëremȩdejȩ

¹ Dario quȩmȩ pio judi Babironia chiriräpȩ cjo̧ro̧ji̧ri̧ pio ji̧ri̧ ja̧ ütëmȩrȩ cjo̧ro̧rä judirä, pio yoa ma̧ȩ oa go̧ȩpareconȩ. Aja̧, Achuero quȩmȩ pio ju̧i̧ ja̧ joja pio judi ütërä judirä, Medo quȩmȩ pumȩ pio judiri ja̧mȩ pio judi cja̧rȩmȩ ui goamȩrȩ ütërä judirä, go̧ȩpareconȩ pio yoa ma̧ȩ oa pio cüdë, Da̧de pio judi.

² Aja̧, Dario pio judi pea ütëpea̧mȩrȩ cjo̧ro̧mȩpea̧rä, jabechji̧ go̧ȩ ni̧bäremȩrequede Jeremia judi go̧ȩparërea̧ ma̧ȩ pio ju̧i̧, Jeova judi pio ju̧i̧iäpȩmo̧ yürürërea̧ ma̧ȩ pio ju̧i̧. Ado pio jiro ma̧ȩ oa go̧ȩ ni̧bäa̧ duri oa, jabechji̧ na̧e chiape bagari̧ jo̧rȩtamȩpea̧requede Jerucharȩ bë ma̧ri̧ pio ju̧i̧ chjiari. 'Aja̧, Jeova pio judi tänȩa̧ oa Jerucharȩ bë ma̧ri̧ üdë iëchäa̧ oa cjiapea̧ chiadida, acji go̧düdäräa̧ji̧ri̧ pio judiro̧ tänȩa̧ oaiä iëchäa̧ oa cjiapea̧ chiadida, jabomo̧ 70 ui nö̧ta iëchäa̧ oa cjiadiäpadida' quëna̧ jo̧rȩtamȩpea̧requede ma̧ȩ pio ju̧i̧ go̧ȩ ni̧bäa̧ oaiä.

³ Ado pio ju̧i̧iä goë cjo̧dëmȩpea̧requede ca̧ Ano̧mȩ Ütë pio ju̧i̧iä, ana̧ri̧ goë cjo̧dëmȩrȩ. Jabechji̧ gito ana̧ri̧ jo̧rȩtamȩrȩ ana̧ri̧ goë cjo̧dëmȩpea̧reconȩ ca̧ pumȩ pio ji̧ri̧ chjiari, Icharai pio judiri ja̧ji̧ri̧ pio ji̧ri̧ chjiari, Jerucharȩ cjo̧ro̧ji̧ri̧ pio ji̧ri̧ chjiari. Ado jurarea̧ oaiä oëra̧diächea oa, jabechji̧ juradëa̧reconȩ. Ado töca chiamȩ chjibo oa ano̧ mire ina̧reconȩ ji̧dëri̧, cüdë ejaro cjiamȩrȩ cjo̧dëa̧ pio ju̧i̧ chjiari na̧rȩpea̧ oa. Ado pio ju̧i̧ uëri cjo̧dë taräpȩ ju̧ri̧ chamȩpea̧requede.

⁴ Ado Jeova pio ju̧i̧ ja̧ dëbëräpȩ cjiamȩmi̧ darë ni̧bäa̧reconȩ, a̧ro̧rȩ chjai̧dëri̧ japea̧ pio ju̧i̧ chjiari goadidëmȩrȩ. Aja̧, ja̧di ta̧rëri̧ yo̧mȩrȩ ni̧bäa̧reconȩ: Ca̧ Ano̧mȩ, a̧dë chjäte ba chiamȩti̧renȩ. Peaja̧di a̧dë chjäte ju chia tjamo̧mȩrenȩ. Ado mȩnȩ yo̧ë cji̧därërea̧mi̧ ji̧dë ma japamȩrenȩ, japadërea̧ decjiari̧. Mȩnȩ ma̧ȩ yürë cji̧däa̧mi̧ japamȩrenȩ, ma̧diä ma̧diä cjia tänȩrea̧ decjiari̧. Ado eami̧ pumȩ judiro̧ pio mȩa eaji̧ri̧rȩ cjo̧ro̧ro, mȩnȩ yürüa̧ ma̧ȩ oa ta̧rëdiäji̧ri̧rȩ cjo̧ro̧ro, jabechji̧ pio jiro pumȩ pio ji̧ri̧iäpȩmo̧ cjäri̧ri̧ cjiamȩrȩ earenȩjȩrȩ, eadëpe bagarea̧ decjiari̧.

⁵ Jabo cjäri̧ marea̧rȩ ca̧ Ano̧mȩ. A̧ro̧rȩ ji̧dë ma chjai̧dëri̧ jape chjaorea̧ro̧mȩ. A̧ro̧rȩ coëma cjiari̧ japatärea̧ ji̧, ana̧ri̧ oëra̧diäa̧rea̧rȩ. A̧ro̧rȩ japadëtärea̧ pio ju̧i̧ japea̧rea̧ro̧jo̧ȩ chjai̧dë pio ju̧i̧. Jabechji̧ mȩnȩ yo̧a̧ pio ju̧i̧ chjuari̧ jiadaji̧ri̧rȩ chjai̧dëri̧ japarea̧ro̧mȩ. A̧ro̧rȩ tüdüa̧mi̧ darä cjo̧ro̧pea̧ ma̧ȩrä cjo̧ro̧tärea̧ ji̧, mȩnȩ yürüa̧ ma̧ȩrä cjo̧ro̧tärea̧ ji̧, putu jura̧ a̧dë chami̧ dari̧ japaji̧ri̧pea̧rea̧ro̧jo̧ȩ, mȩnȩ yürüa̧ ma̧ȩ pio ju̧i̧ badë daji̧ri̧rȩ.

⁶ Jabechji̧ a̧ro̧rȩ na̧ ma̧ȩ oa ni̧bäji̧ri̧ mu̧i̧tjoi̧ pio ji̧ri̧ ta̧rë ja̧botärea̧ ji̧, Ütërë ea jana̧ chjadüa̧ oa ni̧bäji̧ri̧ pio ji̧ri̧ chjadëri̧ ta̧rë ja̧botärea̧ ji̧, cjäri̧ marea̧ro̧jȩrȩ, ta̧rë ja̧bodëa̧rea̧ro̧jȩrȩ. Jabechji̧ judiro̧ na̧ quȩrä ni̧bätarëreji̧ri̧diro̧jȩrȩ ibëa̧ ütëti̧rea̧ pio ji̧ri̧. Tjamo̧ davä. Chiri ütëti̧ cjo̧ro̧rëreji̧ri̧ pio ji̧ri̧, ado tjamo̧ yo̧rea̧ chiarëreji̧ri̧ pio ji̧ri̧, ado ibëa̧ tarurea̧ pio ji̧ri̧bo ni̧bätarëreji̧ri̧diro̧jȩrȩ, chirirä cjo̧ro̧rëreji̧ri̧ ütëbodärä oa. Jabo cjäri̧ madiro̧mȩ, ta̧rë ja̧bodëa̧diro̧mȩ. Ado peaja̧di dari̧ cjo̧ro̧ji̧ri̧pea̧rea̧rȩ, a̧ro̧rȩ ta̧ra̧ puë chiadëji̧ri̧mi̧ darë.

⁷ Aja̧ ca̧ Ano̧mȩ, ji̧dë ma coëma cjiari̧ japamȩrenȩ jabo ja̧didë marea̧rȩ a̧ro̧rȩ. Ado pio ju̧i̧iä a̧dë chjäte idëri̧ cjiaji̧ri̧pea̧rea̧rȩ pio mȩaiä. Tjamo̧ davä. A̧ro̧rȩ, icharaita pio judiro̧, Juda quȩmȩ chiriräpȩ cjo̧ro̧rëreji̧ri̧ pio judiro̧, Jerucharȩräpȩ ju̧ri̧ cjo̧ro̧rëreji̧ri̧ pio judiro̧, chiriräpȩti̧ oa chjuchjupechä cjo̧ro̧ji̧ri̧pea̧ pio judiro̧, mȩnȩ oëra̧ti̧ oa cjo̧ro̧ tänȩpea̧ oa chjadüa̧ oa cjiaji̧ri̧ pio judiro̧, jabechji̧ a̧dë chjäte idëri̧ cjiaji̧ri̧pea̧rea̧rȩ pio mȩaiä, a̧ro̧rȩ pio mȩa chji̧ cotomi̧ dari̧ jiada̧ oaiä, a̧ro̧rȩ pio mȩa putu jura̧ a̧dë chami̧ dari̧ japea̧ oaiä.

⁸ Tjamo̧ davä ca̧ Ano̧mȩ, ibëa̧ chiri ütëti̧ cjo̧ro̧rëreji̧ri̧ pio judiro̧, ibë tjamo̧ ëba cjo̧ro̧rëreji̧ri̧ pio judiro̧, ado ibëa̧ tarurea̧ pio judiro̧, jabechji̧ pio mȩaiäpȩmo̧ ji̧dë ma chjai̧dëri̧ japa marëreji̧ri̧diro̧mȩ.

⁹ Jabo mȩnȩ, ibëa̧ Ano̧mȩ Ütë pio judi, cjäri̧ri̧ cjiamȩrȩ damȩrenȩjȩrȩ pumȩ ji̧ri̧. Duridëparȩmi̧ dari̧ japamȩrenȩjȩrȩ peaja̧di judiro̧ pio mȩaiäpȩmo̧ jiadaräbo.

¹⁰ Jabechji̧ a̧ro̧rȩ ütëborë ji̧dë ma ta̧rëdiädë marea̧ro̧mȩ Jeova, ibëa̧ Ütë. Jabechji̧ mȩnȩ pio ibëiäpȩmo̧ na̧ mu̧i̧tjoi̧ pio ji̧ri̧iä ma̧ȩ oa chjadëri̧ yürürërea̧ ji̧, Ütërë ea jana̧ chjadüa̧ oa ni̧bäji̧ri̧ pio ji̧ri̧iä tüdüa̧mi̧ darä cjo̧ro̧pea̧ ma̧ȩ pio ju̧i̧ chjadëri̧ yürürërea̧ ji̧, cjäri̧ marea̧ro̧mȩ, ji̧dë ma jiade ta̧rërea̧ro̧mȩ.

¹¹ A̧ro̧rȩ, Icharai pio judiri ja̧ji̧ri̧ pio judiro̧ ütëborë jiada̧rea̧ro̧jo̧ȩ mȩnȩ ibë yürüa̧ ma̧ȩ pio ju̧i̧, tüdüa̧mi̧ darä cjo̧ro̧pea̧ ma̧ȩ pio ju̧i̧. Jabechji̧ putu jura̧ a̧dë chami̧ dari̧ oëra̧diäa̧rea̧rȩ, mȩnȩ ibë yo̧a̧ pio ju̧i̧ ta̧rëdiädëri̧ cjiaji̧ri̧rȩ. Ado pio ju̧i̧iä mȩnȩ Moiche pio ju̧i̧iäpȩmo̧ jabërä go̧ȩpa tänȩrërea̧ ma̧ȩ üdë, jabechji̧ tjamo̧i̧ cjiari̧ cjiadiämȩpea̧de pio ibëiä. Dëdë, jabërä uapai̧ ta̧rëri̧ yo̧ë cji̧därëremȩrenȩibe na̧ mu̧i̧tjoi̧rea̧ Moiche pio ju̧i̧iä. Aja̧, ja̧di ta̧rëri̧ yo̧a̧renȩibe Moiche ja̧ ya pio ju̧i̧iä jabërä: "Aja̧, mȩnȩro ca̧ ma̧ȩrä cjo̧ro̧dërä judi, jabechji̧ bape chjaoa̧ oa cjiapanȩrȩ" yo̧mȩ ma̧ȩra̧ pio ju̧ri̧ra̧ jabërä chi̧dëearëremȩrenȩibe ca̧ Ütë. Ado pio ju̧i̧iä bape chjaoa̧renȩibe yaba̧ mȩnȩ no̧mȩ tjamo̧ri ja̧ go̧ȩpa tänȩrërea̧mi̧.

¹² Aja̧ ca̧ Ano̧mȩ, mȩnȩ yo̧ë cji̧därërea̧mi̧ japarëremȩrenȩibe. Tjamo̧ davä. Mȩnȩ ibë uapai̧ ta̧rëri̧ yo̧ë cji̧däa̧mi̧, mȩnȩ ibëa̧ chiri ütë cjo̧ro̧ji̧ri̧ pio ji̧ri̧iäpȩmo̧ yo̧ë cji̧däa̧mi̧ japarëremȩrenȩibe. Jabo jabërä yo̧ë cji̧därëremȩrenȩibe Jerucharȩräpȩ cjo̧ro̧ji̧ri̧ pio ji̧ri̧. "Aja̧, mȩnȩro̧ ca̧ ma̧ȩrä cjo̧ro̧dërä judi, jabechji̧ eami̧räpȩ cjo̧ro̧ji̧ri̧ pio ji̧ri̧iä ji̧dë u̧i̧ chjai̧dë oa chjätä tänȩparequededibe, a̧dë chjäte chjai̧dë oa chjätä tänȩmȩrȩ." Aja̧ Ano̧mȩ, ja̧di ta̧rëri̧ yo̧rëremȩrenȩibe jabërä. Ado pio ju̧i̧iä, dëdë, ma̧i̧ dari̧ japarëremȩrenȩibe mȩnȩ o ji̧ri̧iäpȩmo̧ cja̧rȩmȩ co ja̧di dari̧ bape chjaodërërea̧ ji̧.

¹³ Jabechji̧ Moicherë go̧ȩparërea̧mi̧ acji cjatärëremȩdiibe davä pio jiro chjai̧dë üdë, pio mȩnȩ go̧ȩpa tänȩrërea̧mi̧. Jabo pio ibëiäpȩmo̧ acji cjatäa̧räbo, cjäri̧ marea̧rȩ, chjai̧dë oa japë ano̧dërea̧rȩ. A̧ro̧rȩ Jeova quȩmȩ Ütë pio ju̧i̧iäpȩmo̧ na̧taji̧ri̧mi̧ dari̧ japatärea̧ ji̧, mȩnȩ ibë cjäri̧ri̧ cjia dapea̧ oa ano̧ mire jo̧rȩtatärea̧ ji̧, a̧ro̧rȩ tjamo̧i̧ cjiari̧ baämȩ ma̧ȩrä ano̧ mire cjo̧ro̧tärea̧ ji̧, japadë marea̧rȩ.

¹⁴ Ja̧di tara Jeova Ütë, mȩnȩ jabërä ütarë jo̧rȩtarërea̧ pio ju̧i̧ acji cjatä tänȩrëremȩrenȩibe. Ado mȩnȩ ibë ja̧di dari̧ japea̧ oaiä, cjäri̧ marenȩ, oëra̧ japadëa̧renȩ, jabo chjadëri̧ japarëremȩrenȩ coëma cjiari̧ japamȩrȩ. Jabechji̧ pio judi tjamo̧renȩ pio ibëiäpȩmo̧ coëma cjiari̧ japamȩ judi, a̧ro̧rȩ na̧ ma̧ȩ oa ta̧rëdiädëji̧ri̧ oa.

¹⁵ Danȩ ibëa̧ Ano̧mȩ Ütë, mȩnȩ na̧ pumȩ pio ji̧ri̧ Ejito quȩmȩ chiriri pio judiri go̧dü tänȩrërea̧ oaiä, mȩnȩ na̧ jauëchjara̧ ana̧ri̧ na̧rȩrea̧mi̧ dari̧ go̧dü tänȩa̧ oaiä, jabechji̧ pumȩ no̧i̧dërë dabaji̧ri̧pea̧dirȩ davä pio mȩa chjiari. Jabechji̧ pio ji̧ri̧ go̧dü tänȩa̧ pio judiri yurori dabaji̧ri̧pea̧dirȩ mȩnȩ jauëchja cjiari̧ japea̧ pio ju̧i̧iä, mȩnȩ a̧dë chjäte ana̧ri̧ na̧rȩa̧ pio ju̧i̧ chjiari. Aja̧ ca̧ Ütë, chjadëri̧ a̧do chjaorenȩjȩrȩ na̧ pumȩ ji̧ri̧. Jabo mȩnȩ chjadëri̧ a̧do chjaoräbo ji̧dë ma chjai̧dëri̧ jape chjaorea̧ro̧mȩ. Ado pio ju̧i̧iä cjo̧dërequedemȩ yaba̧ mȩnȩ pio ibëiäpȩmo̧ cjäri̧ri̧ cjia datä.

¹⁶ Danȩ Anomȩ, Jerucharȩ bë ma̧ri̧ üdë jabechji̧ na̧ bë ma̧ri̧de. Ado na̧ bë üdë pio ju̧ri̧pȩ cji̧däa̧ oa cjiarëremȩde mȩnȩ mitëa̧ ya̧mi̧räpȩ ju̧ri̧. Jabo yaba̧ ibëa̧ chiri yuroro cjo̧ro̧ji̧ri̧ pumȩ pio judiro̧ badë dadiro̧jo̧ȩ. Tjamo̧ davä. Jerucharȩ bë pio ju̧i̧ badë dadiro̧jo̧ȩ, pio ibëbo. Jabechji̧ a̧ro̧rȩ chjai̧dëri̧ japea̧ oaiä, ibëa̧ ütëti̧rea̧ pio judiro̧ ma̧i̧ dari̧ japea̧ oaiä, badë da maeadiro̧ibe. Jabo mȩnȩ cjäri̧ri̧ cjia damȩ tara, jabechji̧ Jerucharȩ bë ma̧ri̧ oa cjatäcjie jo̧rȩtamȩrȩ datä eamȩrȩ cjo̧dërequedemȩ, mȩnȩ ji̧dë ma ërecjiamȩrȩ dadëtä.

¹⁷ Danȩ ibëa̧ Ano̧mȩ Ütë, cjäri̧ri̧ cjia ta̧rëcoe na̧ mu̧i̧tjoi̧ oa. Jabechji̧ oëra̧ti̧ oa cjo̧ro̧ji̧ri̧ pumȩ pio judiro̧ pio mȩa chjiari tjamo̧ri̧ dabapea̧ oa, 'Aja̧, Ütë tjamo̧ judi a̧dë chjäte jauëchjamȩdida' quëna̧ dabapea̧ oa, jabechji̧ cjäri̧ri̧ cjiamȩrȩ dajo̧ȩ na̧ bë oa, Babironia pio judiriji̧ri̧ pio judiro̧ iëchärërea̧ bë pio ju̧i̧.

¹⁸ Jabechji̧ ca̧ Ütë, cjäri̧ri̧ cjiamȩrȩ ta̧rë chami̧ dari̧ ta̧rë ja̧bocoe, uëdai̧ ta̧rë china̧mȩmi̧ dari̧. Na̧ dacho oa areiami̧ dari̧ japa ëte cjäri̧ri̧ cjia daibe gitoi̧ dari̧ cjo̧ro̧ji̧ri̧ oa. Ado na̧ bë ma̧ri̧remȩ pio ju̧i̧bo chjadëri̧ dajo̧ȩ iëchäa̧ oa cjiaremȩ bë ma̧ri̧ oa, pumȩ judiro̧ pio mȩaiäpȩmo̧ chjacjiamȩri̧ ni̧bärërea̧ bë ma̧ri̧ oa, a̧doparërea̧ bë ma̧ri̧ oa. Jabechji̧ a̧ro̧rȩ pumȩ chjadë tara cjo̧dëdërequedemȩ ca̧ Ütë. A̧ro̧rȩ chai̧dëri̧ japadëa̧ tara cjo̧dëdërequedemȩ, jabo jabechji̧ mȩnȩ cjäri̧ri̧ cjiamȩ tara cjo̧dërequedemȩ ca̧ Ütë, mȩnȩ pumȩ pio ji̧ri̧ cjäri̧ri̧ cjia damȩ tara.

¹⁹ Jabechji̧ ca̧ Ano̧mȩ, ta̧rë ja̧bocoe. Ado a̧ro̧rȩ chjai̧dëri̧ japea̧ pio ju̧i̧ duridëparȩmi̧ dari̧ a̧dë jo̧rȩtajo̧ȩ. Aja̧ ca̧ Ano̧mȩ, a̧dë jo̧rȩtamȩmi̧ dari̧ ta̧rëdëcoe, jabo tjamo̧ri̧ ta̧rë ja̧botämi̧ cjiamȩrȩ ta̧rë ja̧bocoe mȩnȩ chjadëri̧ japapea̧ oa pio ibë chjiari. Jabechji̧ ca̧ Ütë, cjiadiä cjiadiä cjiari̧ japadëvä, jabo pumȩ judiro̧ pio mȩaiäpȩmo̧ ado chjereno̧ ba chia jo̧rȩtapea̧ oa jo̧ȩra̧pe japavä. Danȩ, Jerucharȩ bë ma̧ri̧ üdë na̧ bë ma̧ri̧de. Ado a̧ro̧rȩ na̧ pumȩrea̧rȩ. Ado pio ju̧i̧iä jo̧ȩra̧pe japavä ibëa̧ yuroräpȩ cjo̧ro̧ji̧ri̧ pumȩ pio judiro̧ ütëborë pio mȩaiäpȩmo̧ ado chjereno̧ ba chia jo̧rȩtapea̧ oa, judiro̧ pio mȩa chjiari chjai̧dëri̧ jo̧rȩtachea oa —yo̧mȩrȩ goë cjo̧dërëremȩrequede Ütë tjamo̧ pio ju̧i̧iä.

Gabriel judi ma̧ȩ yürürëremȩdejȩ Da̧de ju̧i̧

²⁰ Ado cüdë ca̧ Ütë pio ju̧i̧ ji̧dë u̧i̧ ni̧bämȩrȩ ni̧bärëremȩreconȩ Jeova pio ju̧i̧ cüdë chjai̧dëri̧ japea̧ pio ju̧i̧ chjiari, ado ca̧ pumȩ judiro̧ chjai̧dëri̧ japea̧ pio ju̧i̧ chjiaribo. Aja̧, goadidëmȩrȩ ni̧bäa̧reconȩ Icharai pio judiri ja̧ji̧ri̧ pio ji̧ri̧ chjiaribo. Jabechji̧ cjäri̧ri̧ cjiamȩrȩ a̧dotä eamȩrȩ ni̧bäa̧reconȩ jibëa̧ bëremȩ pio ju̧i̧ chjiari, jënȩ mitëa̧ ya̧mi̧räpȩ cjiaremȩ bë pio ju̧i̧ chjiari.

²¹ Ado cüdë pio ju̧i̧iäpȩmo̧ jabë ni̧bäa̧rä, Gabriel pio judi, cüdë darämi̧ cjia̧ pio judi chjaodëri̧ jana̧dique. Aja̧, do üdë chjiaräpȩmo̧diäa̧rä, goe gu̧rori̧ cäë yürürea̧ oa yürüpea̧ japamitërä, chjaodëri̧ jana̧dique.

²² Ado pio coa chjadëri̧ daba tänȩpea̧ oa, ja̧di ta̧rëri̧ yo̧a̧dique: —Danȩ Da̧de, jana̧requede pio mȩa chjadëri̧ daba tänȩpea̧ oa mȩnȩ darämi̧ cjia̧ pio ju̧i̧ chjiari.

²³ Mȩnȩ Ütë tjamo̧ pio ju̧i̧iäpȩmo̧ pea tarupë ni̧bämȩpea̧rä, Ütë tjamo̧ judi pumȩ pio ji̧ri̧iäpȩmo̧ cjäri̧ri̧ cjia datä eamȩrȩ pea ni̧bämȩpea̧rä, jabechji̧ chjaodëri̧ dëbë yo̧a̧ oa cjiarëremȩde ma̧ȩ üdë. Ado pio jiro ma̧ȩ oa yürera̧pea̧requedemȩ. Jabechji̧ ea tjamo̧dimȩ Ütë tjamo̧ judi. Ado yaba̧ chjadëri̧ ta̧rëvä mȩnȩ dabarea̧ dapea̧ oa mȩnȩ darämi̧ cjia̧ pio ju̧i̧ chjiari —yo̧a̧dique Gabriel judi—.

²⁴ Danȩ Da̧de, Ütë tjamo̧ judi chjätä tänȩpadejȩrȩ na̧ pumȩ ji̧ri̧. Tjamo̧ davä. Mȩnȩ ea̧ bë ma̧ri̧räpȩ cjo̧ro̧ji̧ri̧ pumȩ pio ji̧ri̧, Jerucharȩ bë ma̧ri̧räpȩ cjo̧ro̧ji̧ri̧ pumȩ pio ji̧ri̧ chjätä tänȩpadejȩrȩ. Jabo pio ji̧ri̧ chjätä tänȩbea yaboi̧, jabechji̧ japamitë chjätäpade. Aja̧, 490 ui chjätäpade yabocha judi ji̧ri̧ chjätä tänȩbea yaboi̧. Jabo pio jiro japamitë üdë chjätäa̧rä, jabechji̧ jare ano̧mi̧ dari̧ chjätä tänȩpadejȩrȩ. Ado judiro̧ ji̧dë ma chjai̧dëri̧ japarërea̧ ji̧, jabechji̧ a̧dopadejȩrȩ judiro̧ chjai̧dë pio ju̧i̧ japë ano̧pea̧ oa. Ado judiro̧ chjai̧dëri̧ japea̧ chjö̧na̧i̧ oa duridëparȩmi̧ dari̧ japapadejȩ peaja̧di. Ado ja̧dëa ji̧ pio jiro japamitërä, Ütë tjamo̧ pio judi chiri Ütëmȩrȩ cjo̧ro̧pade. Tjamo̧ davä. Tjamo̧ yo̧mȩrȩ cjo̧ro̧pade. Ado pio ju̧i̧ ja̧ chja̧oerä bucho ana̧ cjo̧ro̧padirȩ pumȩ judiro̧ ji̧dë ma coëma cjiari̧ japamȩ ja̧ chja̧oerä, ji̧dë ma chjadëri̧ japamȩ ja̧ chja̧oerä. Ado pio jiro doro tjamo̧i̧padäräa̧ oa cjiadiäpade Jeremia judi go̧ȩparërea̧ ma̧ȩ üdë, Ütërë pio ju̧i̧iäpȩmo̧ ea jana̧ chjadüa̧ ma̧ȩ pio judi. Ado mȩnȩ darämi̧ cjia̧ pio judiborë tjamo̧i̧padäräa̧ oa cjiadiäpade. Jabechji̧ pio jiro doro Ütë tjamo̧ ja̧ bë üdë chjadëdëparȩa̧ oa cjiarërea̧ ji̧, jabechji̧ chjadëparȩa̧ oa cjiadiäpade, Ütë tjamo̧ ja̧ oa chjadëri̧ tutia̧ oa cjiarea̧mi̧ dari̧.

²⁵ Danȩrȩ Da̧de, japamitë chjätä ëte, Ütërë mitëa̧ pio judi ma̧na̧padidibe. Aja̧, Ütërë mitëa̧ Tjamo̧ Yo̧mȩ pio judi ma̧na̧padidibe, jabo judi ma̧na̧bea yaboi̧ ja̧di dari̧ cjo̧ro̧padirȩ na̧ pumȩ judiro̧. Ado pio ju̧i̧iä chjadëri̧ ta̧rëvä ma̧ȩ oa mȩnȩ chjadëri̧ bapë ta̧rëpea̧ oa. Danȩ, Pechia quȩmȩ chiriräpȩ cjo̧ro̧mȩ ütë pio judi jibëa̧ chiriri pio judiri chjadüpadejȩrȩ icharaita pio ji̧ri̧ jibëa̧ chiriräpȩ ado chjereno̧ baäpea̧ oa. Aja̧, chjadüpadejȩrȩ judiro̧ Jerucharȩ bë ma̧ri̧ pio ju̧i̧ chjadëri̧ jëdano̧pea̧ oa, pio jiro bë ma̧ri̧remȩ üdë ado chjereno̧ chjadëri̧ cji̧däa̧ oa cjiapea̧ oa, bë ma̧ri̧räremȩ no̧ pio ju̧i̧bo chjadëri̧ jëdano̧a̧ cjiapea̧ oa. Ado pio jiro chiri ütë judi icharaita pio ji̧ri̧ jibëa̧ chiriräpȩ baätä yo̧a̧ pio judiri yurori 49 ui chjätäpade judiro̧ bë ma̧ri̧ oa chjadëri̧ jëdano̧däräa̧ oa goarä yuro, judiro̧ bë ma̧ri̧ yuroti̧ oa cjiamȩ tutirea̧ üdë jëdano̧däräa̧ oa goarä yuro, bë ma̧ri̧ üdë chjadëri̧ jida̧ oa cjiarä yuro. Ado ja̧dëa ji̧ pio jiro bë ma̧ri̧rä cjo̧ro̧padirȩ 434 ui nö̧ta. Jabo cjäri̧ madirȩ, pio ju̧ri̧pȩ cjo̧ro̧a̧ nö̧ta ma̧i̧ da chjai̧dë oa chjätäpadirȩ. Ado pio judirä Ütërë mitëa̧ Tjamo̧ Yo̧mȩ pio judi ma̧na̧pade.

²⁶ Jabo pio jiro 434 ui üdë chjätä ëte Ütërë mitëa̧ Tjamo̧ Yo̧mȩ pio judi ma̧na̧rä, cjäri̧ madiro̧jo̧ȩ, jiada̧ oa cjiapade. Ado ja̧dëa ji̧ Ütërë chjadüpea̧ pio ju̧i̧ ja̧bo tänȩpadiro̧jo̧ȩ. Cja̧rȩmȩ co chjai̧dëri̧ japadëmȩ pio ju̧i̧ ja̧bo tänȩpadiro̧jo̧ȩ. Ado ja̧dëa ji̧ judi ja̧boa̧ duri oa japamitë chjätä ëte, ado cja̧rȩmo̧ chiriräpȩ cjo̧ro̧mȩ ütë chjadëdë pio judi chjadüpadejȩrȩ jibëa̧ guadia buba oa. Ado Jerucharȩ bë ma̧ri̧ pio ju̧i̧ baë iëchäpadiro̧jo̧ȩ, Ütë tjamo̧ ja̧ bë pio ju̧i̧bo. Jabechji̧ bea üdë acji choami̧ dari̧, ui üdë cjücjüro tjamo̧pea̧rä ma̧i̧ da japami̧ dari̧ goarijäpadiro̧jo̧ȩ. Tjamo̧ davä. Pio jiro japamitë chjätä ëte, pio jiro 434 ui chjätä ëte, jabechji̧ Ütë tjamo̧ judi pearä judi ütarë jo̧rȩtarërea̧mi̧ acji go̧düdäräpadirȩ Jerucharȩ bë ma̧ri̧ üdë bë ma̧ri̧mi̧dëpe bagarea̧mi̧ dari̧.

²⁷ Ja̧dëa ji̧ japamitë ana̧ tjamo̧ chjätä ëte ji̧dë duri oarä, ado cja̧rȩmo̧ ütërë ano̧ mire ütëpade chjadëdërë. Aja̧, pio judi Jerucharȩräpȩ ju̧ri̧ ano̧ mire ütëpea̧rä, jabechji̧ ma̧ȩ yürë cji̧därea̧ ma̧ȩ yürüpadejȩrȩ pumȩ no̧i̧dë tjamo̧ pio ji̧ri̧. "Aja̧, 7 ui nö̧ta ja̧di dari̧ japaji̧ri̧rȩ chjadëri̧ japaparea̧ro̧dibe" yo̧mȩmi̧ dari̧ yo̧ë cji̧därea̧ ma̧ȩ yürüpadejȩrȩ. Ado dëdë, pearä judi pumȩ judiro̧ Ütë tjamo̧ ju̧i̧iäpȩmo̧ chjadëri̧ japarea̧ yürüpadejȩrȩ. Goe gu̧rori̧ cäë yürürea̧ tänȩpadejȩrȩ. Jabo ütara̧ japamitë üdë jabë chjätädëa̧rä, jabomo̧ japamitë tjomo̧mi̧ chjätäa̧rä, cjäri̧ madejȩrȩ, jënȩ ma̧ȩ yürë cji̧däa̧mi̧ japarea̧ yürüdëpadejȩrȩ. Jabechji̧ Ütë tjamo̧ ju̧i̧iäpȩmo̧ cäë yürürea̧ yürüdëpadejȩrȩ. Ado pio jiro japamitërä, pio jiro üi̧ üdë mai̧ da chjai̧dë oa japarërea̧ ji̧, ji̧dë u̧i̧ mai̧ da tjamo̧ oa a̧de japapade. Jabechji̧ Ütë tjamo̧ pio ju̧i̧iä a̧dë chjäte goaedëti̧ pio ju̧i̧ cji̧däpadejȩ cäë yürürea̧ mechja yuroro. Ado pio ju̧i̧ cji̧dä ëte, jabechji̧ pio ju̧ri̧pȩ japamitë nö̧ta cjiadiä tänȩpadejȩ. Aja̧ pio ju̧ri̧pȩ cjiadiä tänȩpadejȩ Ütë tjamo̧ pio judi bape chjaoa̧rä yuro, pio ju̧i̧ bape chjaoa̧rä yuro, judi bape chjaopea̧ do oa jabërä ütara̧rä yuro" yo̧mȩrȩ ni̧bä chjaorëremȩdique Gabriel judi, Ütë tjamo̧ judi chjadüa̧ mu̧i̧tjoi̧ pio judi.