Da̧de 8 - Biblia Pume

Dade judi darämi̧ cjiamȩrȩ darëremȩdejȩ oveja üi̧ oa, chivo üi̧bo

¹ Ado cüdë, Da̧de pio judi, ado chjereno̧ canȩjä mo̧a̧rëremȩrequede. Bechacha pio judi jabë ütërä judirä, judi tjarari̧ ui goamȩrȩ ütërä judirä, ado canȩjä mo̧a̧rëremȩrequede. Jabechji̧ cüdë pearä da̧rämi̧ cjiarërea̧ ji̧ ado chjereno̧ darämi̧ cjiaremȩrequede.

² Ado cüdë darämi̧ cjiamȩrȩ canȩjä mo̧a̧ ji̧, ja̧di dari̧ darämi̧ cjiamȩrȩ daea̧requede: Jabechji̧ cüdë darämi̧ cjia̧ ji̧, Chucha quȩmȩ bë ma̧ri̧räpȩ ju̧ri̧ cjiaremȩrequede, uë tjamo̧ra̧ tutia̧ oa cjiamȩ bë ana̧räpȩ ju̧ri̧, Era̧ quȩmȩ chirirä cjiamȩ bë ma̧ri̧räpȩ ju̧ri̧. Ado ju̧ri̧pȩ Urai quȩmȩ bea yuroro cjiaremȩrequede.

³ Ado bea yuroro cjiamȩ oa darämi̧ cjiaremȩreconȩ oveja üi̧ ana̧ oa, yo̧a̧ri̧ yatë chiamȩ oa. Jabo ca̧i̧ta̧ra̧ri yatë üdë ji̧dë u̧i̧ go̧a̧ti̧remȩde. Ji̧dë duri oa go̧düa̧räbo, jabechji̧ ji̧dë u̧i̧ go̧a̧ti̧remȩde.

⁴ Ado pio jiro oveja üi̧ ana̧ üdë goae tarari̧ acji baguramȩ oa darämi̧ cjia̧reconȩ tjübëra̧ chjaodëri̧ gatëgua chjaomȩ oa, jënȩ dëbëdiäa̧ pio ji̧ri̧ to̧bari̧ aechadäräa̧mȩ oa. Aja̧, uapai̧ da tjamo̧mȩ oa daea̧reconȩ. Jabechji̧ dorë biramȩräpȩmo̧, chirina̧räpȩmo̧, ado chirina̧ dëbëräpȩmo̧ gatëgua chjaomȩ oa daea̧reconȩ. Jabechji̧ eami̧rȩ chirirä cjo̧ro̧mȩ pio judi dëbëpe chjaorea̧mi̧dëri̧ acji bagura chjaoremȩde. Jabechji̧ jënȩ jo̧rȩtami̧ japaremȩde eami̧rȩ o ji̧ri̧ chjiari tuti japarea̧ decjiari̧. Ado a̧dë chjäte ju chiami̧ dari̧ cjiadiäa̧de, chiri ji̧ra̧ tjamo̧ oa boadärärea̧mi̧ dari̧, pumȩ no̧i̧dërë pio ju̧i̧ ja̧ chja̧oerä cjo̧ro̧rea̧mi̧ dari̧.

⁵ Ado cüdë pio jiro chirirä cjo̧ro̧mȩ pio ju̧i̧ jo̧rȩtamȩrȩ da̧ nö̧ta, jabechji̧ daea̧reconȩ ado cja̧rȩmo̧ oa, chivo üi̧ oa, dorë biramȩri pio judiri chjaodëri̧ acji jana̧mȩ oa. Jabechji̧ goae tarari̧ baguramȩ oa daea̧reconȩ, chiri uëmo̧i̧ baguramȩmi̧ da oa, jibea̧ ta üdë daburo cjaeädëmȩmi̧ da oa. Ado cja̧rȩmȩ yatë boi̧dë tjamo̧ oa chiamȩ oa daea̧reconȩ jibëa̧ dacho chjarerämȩ oa, a̧dë darea̧mi̧dë oa.

⁶ Aja̧, oveja üi̧ pio ju̧i̧iäpȩmo̧ acji jana̧mȩ oa daea̧reconȩ. Tjamo̧ davä. Cüdë bea yuroro cjiamȩ oveja oa daea̧ pio ju̧i̧iäpȩmo̧, yo̧a̧ri̧ yatë chiamȩ pio ju̧i̧iäpȩmo̧ acji jana̧mȩ oa daea̧reconȩ, chjuamȩ tjamo̧mȩrȩ acji jana̧mȩ oa, uapai̧ da tjamo̧mȩ oa.

⁷ Ado chivo üi̧ üdë ërecjia tjamo̧mȩrȩ goae tarari̧ acji bagureno̧a̧dejȩ oveja üi̧ pio ju̧i̧, jibëa̧ yatë yo̧a̧ri̧borë yarë cjatärea̧mi̧ dari̧ daburäpȩmo̧. Ado oveja üi̧ üdë ja̧di dari̧ boadäräa̧ oa cjia̧ oaiä, jabechji̧ eami̧ oa japarea̧ dadëa̧de. Eami̧ oa dëbëparea̧ dadëa̧de. Ado pio ju̧i̧iä chivo üi̧ üdë daburäpȩmo̧ guë cjatä tänȩ ëte, jabechji̧ boë cjaeä chjätäa̧dejȩ. Ado eami̧rȩ oveja üi̧ pio ju̧i̧ chjiari tuti japatärea̧ ji̧, japarea̧ dadëa̧diro̧jo̧ȩ. Pio ju̧i̧ chjiari tuti japarea̧ dadëa̧dirȩ.

⁸ Ado chivo üi̧ üdë oveja üi̧ pio ju̧i̧ boadäräa̧ duri oa, ji̧dë u̧i̧ ju chia tjamo̧pe bagami̧ dari̧ cjiadiäa̧de, eami̧rȩ boadärärea̧mi̧dëri̧. Jabo cjäri̧ made, judi ju chia tjamo̧mi̧ dari̧ cjiadiämȩpea̧rä, eami̧ üdë pio ju̧i̧ boadärärea̧mi̧dëpea̧rä, jabechji̧ jibëa̧ dacho chjarerämȩ yatë ana̧ pio judi yarëa̧ oa cjiaremȩde. Ado pio jiro yatërë cjiarërea̧ri pio judiri ano̧ mire cjitëreji̧ri̧dirȩ jadüchiami̧ yatë judiro̧, a̧dë darea̧mi̧dërë. Jabechji̧ cja̧rȩmȩ yatë üdë dorë cjitëmȩräpȩmo̧ cjiaremȩde. Ado cja̧rȩmo̧ yatë üdë dorë biramȩräpȩmo̧ cjiaremȩde. Ado cja̧rȩmo̧ üdë chirina̧räpȩmo̧ cjiaremȩde. Ado cjiadiäa̧mȩ üdë chirina̧ dëbëräpȩmo̧ cjiaremȩde. Aja̧, ja̧di maeari̧ cjiadiäa̧dirȩ yatë judiro̧.

⁹ Ado jadüchiami̧ yatërërea̧ ji̧, jabechji̧ cja̧rȩmȩ yatëri pio judiri chjarapë cjitëremȩde yatë boi̧chji̧ üdë, yatë a̧ chiape bagari̧. Ado pio jiro yatë boi̧chji̧remȩ üdë ana̧ tjamo̧pe bagaremȩde ji̧dë u̧i̧ ju chiape bagarea̧mi̧ dari̧. Chirina̧räpȩmo̧ cjiari̧, ado dorë cjitëmȩräpȩmo̧ cjiari̧, ado icharaitarë cjo̧ro̧mȩ chiri chjacjiamȩräpȩmo̧ cjiari̧ cjiaremȩde. Jabechji̧ oëra̧ti̧ oa a̧rȩmȩ chiri oa boamȩrȩ acji tai̧remȩde.

¹⁰ Ado pio jiro yatë boi̧chji̧mi̧ da pio judi a̧dë chjäte ju chia tjamo̧mi̧ dari̧ cjiape baga̧ oaiä, jabechji̧ a̧dëräpȩ cjo̧ro̧mȩ pio ju̧i̧ ja̧ guadia pio ji̧ri̧bo dëbëpe chjaoremȩdejȩrȩ, büëmi̧ daji̧ri̧ pio ji̧ri̧. Ado ja̧dëa ji̧ o ji̧ri̧ daburäpȩmo̧ aeno̧a̧dejȩrȩ. Ado daburäpȩmo̧ cjatäa̧ji̧ri̧ pio ji̧ri̧ boë cjaeämȩrȩ ja̧bo tänȩmȩ oa darämi̧ cjiaremȩreconȩ.

¹¹ Ado pio jiro yatë boi̧chji̧mi̧ da judi pio jȩa chjiari ji̧dë u̧i̧ goaeri̧ jo̧rȩtaremȩde. 'Jabechji̧ ütëmȩmi̧ darë ju chia tjamo̧mȩmi̧ dari̧ cjiaquëda, o ji̧ri̧iä ji̧dë u̧i̧ ju chiamȩmi̧ dari̧ cjiaquëda, ado a̧dëri ja̧ mu̧i̧tjoi̧ pio ji̧ri̧ ja̧ Ano̧mȩ pio ju̧i̧iäbo ji̧dë u̧i̧ ju chiamȩmi̧ dari̧ cjiaquëda' quëna̧ jo̧rȩtamȩpea̧de, pio jȩa chjiari a̧dë chjäte goaeri̧ jo̧rȩtamȩrȩ. Ado ja̧di dari̧ jo̧rȩtamȩrȩ cjiadiä tänȩremȩdejȩrȩ goe gu̧rori̧ cäë yürüji̧ri̧ pio ji̧ri̧. Jabechji̧ judiro̧ Ütë tjamo̧ ja̧ bëräpȩ ju̧ri̧ doti̧mi̧ yürüriärërea̧ ji̧, peadai̧rä ji̧tärä jadü goe gu̧rori̧ cäë yürüriärërea̧ ji̧, cjäri̧ madejȩrȩ, japarea̧ yürüdëa̧dejȩrȩ. Ado pio ju̧i̧ uëri chjai̧dëparȩmi̧ dari̧ japea̧dejȩ Ütë tjamo̧ ja̧ bë pio ju̧i̧. Tjamo̧ davä. Chjai̧dëparȩmi̧ dari̧ japea̧dejȩ yürürea̧ mechja pio ju̧i̧. Aja̧, ma̧i̧ da chjai̧dë gȩrȩ chiape järea̧mi̧ dari̧, judio judiro̧ pio ju̧ri̧pȩ a̧doparea̧mi̧dëri̧ chjai̧dëparȩrea̧mi̧ dari̧ japea̧dejȩ.

¹² Ado ja̧dëa ji̧ Ütë tjamo̧ ja̧ pumȩ judiro̧ pio jiro yatëmi̧ damȩ pio ju̧i̧ ja̧ chja̧oerä cjo̧ro̧dëtärea̧ ji̧, Icharai pio judiri ja̧ji̧ri̧ pio judiro̧ pio ju̧i̧ jiadatärea̧ ji̧, cjäri̧ madiro̧jo̧ȩ, pio ju̧i̧ ja̧ chja̧oerä ano̧ mire cjo̧ro̧ji̧ri̧pea̧dirȩ. Ado judiro̧ Ütë tjamo̧ pio ju̧i̧iäpȩmo̧ ma jo̧rȩtaji̧ri̧rȩ cäë yürütärea̧ ji̧, ano̧ mire cäë yürüji̧ri̧pea̧diro̧jo̧ȩ yatëmi̧ damȩ pio ju̧i̧iäpȩmo̧. Yürürea̧mi̧dëräbo, cäë yürüji̧ri̧pea̧diro̧jo̧ȩ yürürea̧ mechjarä. Ado tjamo̧i̧ cjiari̧ baämȩ ma̧ȩ chiamȩ joë pio ju̧i̧ daburäpȩmo̧ aeno̧a̧dejȩ. Tjamo̧ davä. Tüdüa̧mi̧ darä cjo̧ro̧pea̧ ma̧ȩ pio ju̧i̧ daburäpȩmo̧ aeno̧a̧dejȩ, badë damȩrȩ. Aja̧, ja̧di dari̧ japarea̧ damȩrȩ japarëremȩde jënȩ jo̧rȩtami̧, eami̧rȩ dëbëpe chjaorea̧ decjiari̧.

¹³ Ado ja̧dëa ji̧ cüdë darämi̧ cjiamȩrȩ da̧ nö̧ta, jabechji̧ yo̧a̧ri̧ a̧dëriji̧ri̧ mu̧i̧tjoi̧ judiro̧ ni̧bäji̧ri̧ oa ta̧rërämi̧ cjiaremȩrequedejȩrȩ. Ado cja̧rȩmȩ üdë ado cja̧rȩmo̧ oa iëno̧ë ta̧rëa̧mȩ oa ta̧rërämi̧ cjiaremȩreconȩ, ja̧di ta̧rëri̧ yo̧mȩ oa: —Jabo danȩ, napai̧rä yuro ma̧i̧ dari̧ japarea̧ dapade pio jiro yatë boi̧chji̧ üdë? Danȩ, pumȩ judiro̧ doti̧mi̧ cäë yürütärea̧ ji̧, ¿napai̧rä yuro japarea̧ yürüdëpadejȩrȩ? Yo̧coe. ¿Napai̧rä yuro chjai̧dëparȩmi̧ dari̧ japarea̧ dapadejȩ Ütë tjamo̧ ja̧ bë oa? Aja̧, ¿napai̧rä yuro ji̧dë ma̧ conȩdarea̧ dapadejȩrȩ Ütë tjamo̧ ja̧ pumȩ ji̧ri̧? —yo̧mȩrȩ iëno̧ë ta̧rëmȩ oa ta̧rërämi̧ cjiaremȩreconȩ a̧dëräpȩ mu̧itjoi̧ pio ju̧i̧ jibëa̧ jadü oa yo̧a̧ ji̧.

¹⁴ Ado ja̧dëa ji̧ dëbë yo̧mȩ oa ta̧rërämi̧ cjiaremȩreconȩ: —Napai̧rä yurodë, jabechji̧ 1.150 do nö̧ta ja̧di dari̧ japarea̧ dapade. Jabechji̧ pio jiro japamitë nö̧ta Ütë tjamo̧ pio ju̧i̧ ütara̧mi̧ cäë yürütärea̧ ji̧, yürürea̧ dadëpadiro̧jo̧ȩ. Jabechji̧ peadai̧rä cäë yürütärea̧ ji̧, ado ji̧täräbo yürütärea̧ ji̧, cjäri̧ madiro̧jo̧ȩ, mechjaräpȩ ju̧ri̧ yürürea̧ dadëpadiro̧jo̧ȩ. Jabo ja̧dëa ji̧ pio jiro japamitë chjätä ëte judiro̧ chjadëri̧ japea̧ oaiä, judiro̧ chjai̧dë gȩrȩ chiadëpe järea̧mi̧ dari̧ chjadëri̧ japea̧ oaiä, jabechji̧ ado chjereno̧ chjadëparȩa̧ oa cjiapade Ütë tjamo̧ ja̧ bë üdë —dëbë yo̧a̧mȩ oa ta̧rërämi̧ cjiaremȩreconȩ mu̧i̧tjoi̧ oa jibëa̧ jadü oa ni̧bämȩ oa.

¹⁵ Ado cüdë pio jiro na̧rȩrea̧ oa darämi̧ cjia̧ duri oa, ana̧ tjamo̧ri̧ jo̧rȩtamȩpea̧requede, '¿tjana̧ na̧rȩcjivadi' quëna̧ jo̧rȩtamȩrȩ. Ado ja̧dëa ji̧ cüdë ana̧ri̧ jo̧rȩta̧ nö̧ta, cja̧rȩmȩ üdë, pumȩmi̧ damȩ pio judi chjaodëri̧ cjiana̧ra̧dique ca̧ yaboi̧räpȩ, jachi chjaräpȩ.

¹⁶ Ado ta̧rërämi̧ cjiamȩrȩ ta̧rëa̧requede ado cja̧rȩmo̧ pumȩrȩ ni̧bämȩ oa, Urai quȩmȩ bea oëta̧ra̧ri pio judiri ëna̧diäa̧mȩ oa. Ja̧di ta̧rëri̧ ni̧bämȩ oa ta̧rëa̧reconȩ ma̧ȩ oa, pio coa chjiari ni̧bämȩ oa: —Gabriel, chjadëri̧ yo̧jo̧ȩ jënȩ ja̧di cjia̧ pio ju̧i̧ chjiari judi chjadëri̧ dabapea̧ oa —yo̧mȩ oa ta̧rërämi̧ cjiaremȩreconȩ.

¹⁷ Ado pio ju̧i̧iä Gabriel pio judi jachidai̧ jana̧dique cüdë cjiamȩräpȩmo̧. Jabo cjäri̧ marequede, a̧dë chjäte uapamȩrȩ toboe china̧däräa̧requede daburäpȩmo̧, ëteräpȩmo̧ damȩrȩ. Jabo yo̧a̧dique: —Danȩ pumȩ, chjadëri̧ dabapea̧ chiarenȩ mȩnȩ ja̧di cjia̧ pio ju̧i̧ chjiari. Jabechji̧ mȩnȩ darämi̧ cjia̧ üdë ji̧dë duri oa ma̧na̧pamȩ japamitë pio chjiari na̧rȩrea̧de —yo̧a̧dique.

¹⁸ Jabo judi coa ni̧bä chjaoa̧ nö̧ta, dabadëtä bagamȩrȩ china̧däräa̧requede ado, ëteräpȩmo̧ damȩrȩ. Jabo pio coa ga̧re taramȩrȩ a̧doa̧dique cjitëpea̧ ji̧.

¹⁹ Ado ja̧dëa ji̧ yo̧a̧dique: —Danȩ, jana̧requede pio mȩa chjadëri̧ daba tänȩpea̧ oa. Aja̧, ji̧dë duri oa ma̧na̧pea̧ japamitë pio ju̧i̧ chjiari, ji̧dë duri oa ma̧na̧pea̧ ërecjiarea̧ pio ju̧i̧ chjiari daba tänȩpea̧ oa jana̧requede. Jabechji̧ mȩnȩ darämi̧ cjia̧ üdë, cjiadiäa̧ japamitë pio ju̧i̧ chjiari na̧rȩrea̧de.

²⁰ Danȩ, chjadëri̧ daba tänȩparequedemȩ yaba̧. Mȩnȩ daea̧ üdë, yo̧a̧ri̧ yatë chiamȩ oveja üi̧ üdë, jabechji̧ na̧rȩde yo̧a̧ri̧ chiri ütë pio ji̧ri̧ chjiari. Tjamo̧ davä. Cja̧rȩmȩ yatë üdë na̧rȩde Media quȩmȩ chirirä cjo̧ro̧mȩ ütë pio ju̧i̧ chjiari. Ado cja̧rȩmo̧ yatë üdë Pechia quȩmȩ chirirä cjo̧ro̧mȩ ütë pio ju̧i̧ chjiari na̧rȩde.

²¹ Ado chivo üi̧ üdë na̧rȩde Grechia quȩmȩ chiri pio ju̧i̧ chjiari. Ado yatë ana̧ üdë, dacho chjarerä yatëremȩ üdë, jabechji̧ na̧rȩde Grechia ja̧ ütë pio ju̧i̧ chjiari, pearä ütërëremȩ pio ju̧i̧ chjiari.

²² Jabechji̧ pio jiro yatë ana̧remȩ üdë yarëa̧ oa cjiarä, jabechji̧ jadüchiami̧ yatë üdë ano̧ mire cjitëpadirȩ judi cjiarërea̧ tjübëri pio judiri. Ado danȩ Da̧de, na̧rȩrea̧ chiade. Jabechji̧ chiri ütë cjo̧ro̧mȩ pio judi ja̧boa̧rä, chiriräpȩti̧ oa cjo̧ro̧ji̧ri̧ pio judiro̧ pio ju̧i̧ ja̧ chja̧oerämo̧ cjo̧ro̧rërea̧rä, jabechji̧ chiri oa tutipadiro̧jo̧ȩ jadüchiami̧ pënȩpe bagarea̧mi̧ dari̧. Ado jadüchiami̧rȩ ano̧ mire ütëji̧ri̧rȩ cjo̧ro̧padirȩ. Ado chiriräpȩti̧ oa cjo̧ro̧ji̧ri̧ pio judiro̧ ütërëremȩ pio ju̧i̧ ja̧ chja̧oerä cjo̧ro̧rërea̧ ji̧, jabechji̧ pio ji̧ri̧ ja̧ chja̧oerä ano̧ mire cjo̧ro̧padirȩ. Jabo cjäri̧ madiro̧jo̧ȩ, jibëa̧ yaboi̧rä ütërëremȩ pio ju̧i̧, yatë ana̧mi̧ daremȩ ütë pio ju̧i̧ nö̧tadëpadiro̧jo̧ȩ.

²³ Jabo pio jiro chiri ütëji̧ri̧ pio judiro̧ ütëdëpe bagapea̧ querediärä, jibëa̧ pumȩ pio judiro̧ a̧dë chjäte chjai̧dëri̧ cjo̧ro̧ji̧ri̧pea̧rä, judiro̧ tjamo̧ri̧ bape chjaorea̧mi̧ dapea̧rä, jabechji̧ ado cja̧rȩmo̧rȩ ano̧ mire ütëmȩrȩ cjo̧ro̧pade, u̧i̧pe u̧i̧pe ni̧bämȩrȩ. Jabechji̧ uapai̧ dari̧ ërecjiapai̧ darë, oëadëmȩ tjamo̧mȩmi̧ darë ano̧ mire ütëmȩrȩ cjo̧ro̧pade, 'ju chia tjamo̧mȩmi̧ dari̧ cjiaquëda' quëna̧ jo̧rȩtamȩrȩ.

²⁴ Ado judi ju chia tjamo̧mȩmi̧ dari̧ cjo̧ro̧räbo, cjäri̧ made, jibëa̧ra̧ cjo̧ro̧dëpade jabo ado cja̧rȩmo̧rȩ yürüa̧ ju chiarea̧ra̧ cjo̧ro̧pade. Ado ma̧i̧ dari̧ japamȩrȩ acji tai̧ chjaopade. Jabechji̧ dami̧ti̧rȩ chjadërërea̧ ji̧, chjadëri̧ cji̧däa̧ oa cjiarërea̧ ji̧, jabechji̧ chjadëdëparȩpadejȩ eami̧ti̧ oa iëchärea̧mi̧ dari̧, chjö̧na̧i̧ti̧ oa goarijä tänȩrea̧mi̧ dari̧. Aja̧, jënȩ jo̧rȩtami̧ japariä tai̧pade davä, ji̧dë ma dae järea̧mi̧ dari̧, ji̧dë u̧i̧ ju chia tjamo̧pe bagarea̧mi̧ dari̧. Ado pio ju̧i̧iä tjamo̧ yo̧ji̧ri̧ pio ji̧ri̧ ja̧bo tänȩpadejȩrȩ. Ado Ütë tjamo̧ ja̧ pumȩ pio ji̧ri̧bo ja̧bo tänȩrea̧ dapadejȩrȩ, Icharai pio judiri ja̧ji̧ri̧ pio ji̧ri̧.

²⁵ Ado pio jiro oëadëmȩ pio judi pumȩ no̧i̧dë oa u̧i̧pe u̧i̧pe ni̧bä oaiä, jabechji̧ dae järea̧mi̧ dari̧ cjo̧ro̧rea̧ dapade, ji̧dë u̧i̧ ju chiape bagarea̧mi̧ dari̧. Ado pio ju̧i̧iä, 'Aja̧, ütëbo pio ji̧ri̧iä ji̧dë u̧i̧ ju chiamȩmi̧ dari̧ cjiaquëda' quëna̧ jo̧rȩtapade. Ado ja̧di dari̧ jo̧rȩtamȩrȩ pumȩ no̧i̧dë oa ja̧bo tänȩpadejȩrȩ. Tjamo̧ davä. Judiro̧ daba quëna̧dërä, chjaodëri̧ ja̧bo tänȩpadejȩrȩ. Jabechji̧ judiro̧ u̧i̧pea̧ oa cjiarä, 'Aja̧ pio jiro ütë üdë jabechji̧ chjadë jirodida, pio ibë eami̧ oa japadëtäremȩdiibëda' quëna̧ji̧ri̧ oa chjaodëri̧ ja̧bo tänȩpadejȩrȩ. Ado ja̧dëa ji̧ japarea̧mi̧dëräbo, jabechji̧ a̧dë chjäte ba chiamȩ Ütë pio ju̧i̧bo boadärätapadejȩ. Jabo cjäri̧ madejȩ, Ütë tjamo̧ pio judi ja̧bo tänȩpadejȩ, pumȩ pio ji̧ri̧iä japadëmȩrȩ" yo̧mȩ oa ta̧rërämi̧ cjiaremȩreconȩ Gabriel pio ju̧i̧, pio coa ni̧bäa̧mȩ oa.

²⁶ Ado ji̧dë u̧i̧ yo̧mȩ oa ja̧di ta̧rëri̧ a̧de yo̧mȩ pio ju̧i̧ ta̧rërämi̧ cjiaremȩreconȩ judi coa cjiadiäa̧mȩ ma̧ȩ pio ju̧i̧ yo̧mȩ oa: Danȩ Da̧de, mȩnȩ darämi̧ cjia̧ üdë, do üdë ji̧tärä cäë yürüdëpea̧ pio ju̧i̧ chjiari darämi̧ cjia̧ üdë, ado do üdë peadai̧rä cäë yürüdëpea̧ pio ju̧i̧ chjiari darämi̧ cjia̧ üdë, jabechji̧ tjamo̧i̧ cjiari̧ na̧rȩdimȩ. Jabo tjamo̧i̧ cjiari̧ cjiaräbo, jabechji̧ pio ju̧i̧ chjiari cjapiri̧ cjiatä earequedemȩ Da̧de. Jabë pjärämȩde. Pio jiro japamitë üdë ma̧na̧pea̧ üdë jabë pjärämȩde. Japamitë ana̧ tjamo̧ chjätäa̧rämo̧ tjamo̧i̧padäräa̧ oa cjiadiäpade mȩnȩ darämi̧ cjia̧ üdë" yo̧mȩ oa ta̧rërämi̧ cjiaremȩreconȩ Gabriel pio ju̧i̧, a̧dërimȩ mu̧i̧tjoi̧ pio ju̧i̧.

²⁷ Ja̧dëa ji̧ cüdë chjö̧na̧i̧ oa da ëte, cüdë chjö̧na̧i̧ oa ta̧rë ëte, jabechji̧ boadäräa̧ oa cjiamȩmi̧ dari̧ cjiadiäa̧requede, ju chia tjamo̧dëmȩrȩ. Ado pio ju̧i̧iä do ji̧ra̧dë nö̧ta gito ja̧bomȩrȩ a̧rȩrëremȩrequede. Jabo ja̧dëa ji̧ cüdë cjatäcjiarea̧ daea̧rä, jabechji̧ ado chjereno̧ jäa̧requede chiri ütë cjo̧ro̧mȩ pio ju̧i̧ ja̧ oa ja̧bepë yürüpea̧ oa. Jabo cüdë ja̧bepaepea̧räbo, jabechji̧ ana̧ri̧ jo̧rȩtamȩrȩ jo̧rȩtaremȩrequede cüdë darämi̧ cjia̧ pio ju̧i̧ chjiari. 'Jabechji̧ pio ju̧i̧ yo̧dicoada, pio ju̧i̧ chjiari tjamo̧ri̧ na̧rȩ jirodicoada' quëna̧rea̧ dadëa̧ oaiä, ana̧ri̧ jo̧rȩtaremȩrequede.