Da̧de 7 - Biblia Pume

Jadüchiami̧ oa darämi̧ cjiarëremȩdejȩrȩ Da̧de judi, chirirä cjo̧ro̧ji̧ri̧mi̧ da oa, ma̧i̧ da tjamo̧ oa

¹ Da̧de judi canȩjä mo̧a̧mȩrȩ canȩjä mo̧a̧rëremȩde, dami̧ti̧ oa darämi̧ cjiamȩrȩ. Aja̧, Bechacha judi jabë ütëmȩrȩ cjo̧ro̧rä judirä, Bechacha judi Babironiaräpȩ cja̧rȩmȩ ui goamȩrȩ ütërä judirä, jabechji̧ canȩjä mo̧a̧rëremȩde jibëa̧ mo̧a̧rea̧räpȩ a̧rȩmȩrȩ. Ado ja̧dëa ji̧ jënȩ bëdüa̧rä, jabechji̧ jënȩ canȩjäa̧ pio ju̧i̧ go̧ȩparëremȩde ja̧di ta̧rëri̧ go̧ȩpamȩrȩ:

² Danȩ, cüdë, Da̧de pio judi, gȩnȩrä canȩjä mo̧a̧mȩrȩ darämi̧ cjia̧ ji̧, jabechji̧ mai̧ dari̧ purpuripe chjaomȩ oa darämi̧ cjiaremȩreconȩ, ui ana̧ üdë ana̧ri̧ jämire jämi̧re cjitëmȩmi̧ da oa. Jabechji̧ chjiari pjaepamȩ üdë dëbë pjaeparemȩde yabori pjaepamȩ pio ju̧i̧iäpȩmo̧. Ado chirina̧ri pjaepamȩ üdë pjaeparemȩde chirina̧ dëbë pjaepamȩ pio ju̧i̧. Jabechji̧ dëbë pjaepe chjaomȩ oa darämi̧ cjiaremȩreconȩ jibëa̧ dëbëti̧ra̧ chia pupuripe chjaomȩ oa, ui ana̧ üdë ma̧i̧ dari̧ gö̧ma̧ chiape bagari̧, jä mire jä mire cjitërea̧mi̧ dari̧.

³ Ado ja̧dëa ji̧ jadüchiami̧ oa, bori̧dë tjamo̧ oa darämi̧ cjiaremȩrequedejȩrȩ uiri pio judiri go̧düji̧ri̧ oa. Tjamo̧ davä. Chirirä cjo̧ro̧ji̧ri̧mi̧ da pio ji̧ri̧, uapai̧ da pio ji̧ri̧, icjara tjaoëti̧ chiaji̧ri̧ pio ji̧ri̧ darämi̧ cjiaremȩquedejȩrȩ. Jibëa̧ jadümi̧ dadë maea oa darämi̧ cjiaremȩrequedejȩrȩ tjaoëpai̧ da maea oa, cja̧rȩmȩmi̧ dadë maea oa.

⁴ Yabo go̧düa̧mȩ judi go̧düa̧ ji̧, pa̧rȩmȩ coëmi̧ da oa darämi̧ cjiaremȩreconȩ pjö̧dato chiamȩ oa, iu pua ja̧ pjö̧datomi̧ da oa chiamȩ oa. Ado cüdë pio jiro ma̧i̧ damȩ pio ju̧i̧iäpȩmo̧ dae cjia̧ nö̧ta, jibëa̧ pjö̧dato yo̧a̧ri̧rȩ chjaodëri̧ mu̧i̧cö̧i̧a̧ oa cjiaremȩde, icjarari ja̧dëpe bagari̧. Ado ja̧dëa ji̧ apëri ja̧ yae yo̧a̧ri̧ maeara̧ cjitë cjiamȩpea̧de daburo, tjübë üdë uëräpȩmo̧ cjiari̧, pumȩrȩ cjiami̧ dari̧. Ado cja̧rȩmȩrȩ yürüa̧ oaiä, pumȩ chji̧ chiamȩpea̧de judi pumȩmi̧ dari̧ jo̧rȩtapea̧ oa. Aja̧, pio ju̧i̧ darämi̧ cjiaremȩreconȩ.

⁵ Ji̧dë duri oa ado cja̧rȩmo̧ oa ano̧ mire darämi̧ cjiaremȩreconȩ. Peaja̧di uiri pio judiri go̧dümȩ oa daea̧reconȩ uapai̧ da oa. Oso quȩmȩ oa, chjuamȩ tjamo̧mi̧ da oa daea̧reconȩ. Ado uëdai̧ tjätjäpë cjiamȩ oa darämi̧ cjiaremȩreconȩ acji bagurapamȩ oa. Ado jibëa̧ yarä tjarari̧ pjatëtu ju oa juimȩ oa darämi cjiaremȩreconȩ. Ado pio ju̧i̧iäpȩmo̧ ni̧bämȩ oa ta̧rërämi̧ cjiaremȩreconȩ. "Aja̧, cjitëvä" yo̧a̧dejȩ. "Go̧a̧ ji̧ra̧ tjamo̧ oa juravä" yo̧mȩ ma̧ȩ oa ta̧rërämi̧ cjiaremȩreconȩ.

⁶ Ja̧dëa ji̧ ji̧dë duri oa, ado cja̧rȩmo̧ oa darämi̧ cjiaremȩreconȩ uiri pio judiri go̧dümȩ oa, go̧ȩ chiamȩ pa̧rȩmȩmi̧ da oa, uapai̧ da tjamo̧ oa. Jadüchiami̧ pjö̧dato chiamȩ oa darämi̧ cjia̧reconȩ, jibëa̧ putu juri pio judiri ja̧mȩ oa. Puarë chiami̧ dari̧ chiamȩ oa daea̧reconȩ pjö̧dato jadüchiami̧ oa. Ado peaja̧di jadüchiami̧ tjübë chiamȩ oa daea̧reconȩ peaja̧di. Ado cja̧rȩmȩrȩ yürüa̧ oa a̧dë chjäte tjamo̧ yo̧rea̧ chiamȩpea̧de, chiri ütëmȩrȩ cjo̧ro̧rea̧mi̧ dari̧.

⁷ Ado ja̧dëa ji̧ cüdë gȩnȩrä ji̧dë ma darämi̧ cjia̧ ji̧, ano̧ mire darämi̧ cjiaremȩreconȩ ji̧dë duri oa uiri pio judiri go̧dümȩ oa, ji̧dë u̧i̧ uapai̧ da oa, ji̧dë u̧i̧ chjuamȩ oa. Oë ja̧bo tjamo̧mȩrȩ daea̧reconȩ a̧dë chjäte ma̧i̧ da oa, a̧dë chjäte ju chiamȩ oa. Jo̧dë ana̧ tjamo̧ chiamȩ oa darämi̧ cjiaremȩreconȩ, ierora̧ japea̧ jo̧dë oa chiamȩ oa, jo̧dë chjua tjamo̧ oa chiamȩ oa. Ado pio jiro jo̧dëra̧ tutupe juimȩrȩ acji tai̧remȩde, jui jui guna̧mȩrȩ. Ado jënȩ jura̧ cjiadiäa̧mȩ pio ju̧i̧ boë cjaeä chjätäremȩde pjo̧no̧i̧ mape bagari̧. Ado cüdë pio ju̧i̧ daea̧ ji̧, jabechji̧ ana̧ri̧ jo̧rȩtamȩrȩ darämi̧ cjiaremȩreconȩ, tjaoëpai̧ da tjamo̧mȩ oa. Jabechji̧ cüdë pearä darërea̧mi̧dë oa darämi̧ cjiaremȩreconȩ, a̧dë chjäte tjaoëpai̧ damȩ oa. Jabechji̧ jibëa̧ tjübërä yatë ji̧ra̧ri̧ chiamȩ oa darämi̧ cjiaremȩreconȩ, ichi chjö̧na̧i̧ yatë oa chiamȩ oa.

⁸ Ado cüdë pio jiro yatë ji̧ra̧ oa daea̧ nö̧ta, jabechji̧ chjaodëri̧ cjitëmȩ oa darämi̧ cjiaremȩrequede ado cja̧rȩmo̧ yatë oa, yatë boi̧chji̧ oa. Aja̧, jibëa̧ jadü ja̧ chjarerä cjitëmȩ oa darämi̧ cjiaremȩreconȩ. Ado pio jiro yatë boi̧chji̧ üdë cjitëa̧rä, tjarari̧ yatëreji̧ri̧ pio ji̧ri̧ chjaodëri̧ cjatä tänȩmȩ oa darämi̧ cjiaremȩreconȩ, tacö̧ri pio judiri go̧dü tänȩmȩ oa. Aja̧, tjübëri pio judiri cjatäji̧ri̧ oa darämi̧ cjiaremȩrequedejȩrȩ. Ado cüdë pio jiro yatë boi̧chji̧ oa daea̧ ji̧, jabechji̧ yo̧a̧ri̧ dacho chiamȩ oa darämi̧ cjiaremȩreconȩ, pumȩ ja̧ dachomi̧ da oa. Peaja̧di ya chiamȩ oa darämi̧ cjiaremȩreconȩ. Ado jibëa̧ yara̧ pio ju̧ri̧ra̧ ji̧dë ma ni̧bämȩ oa darämi̧ cjiaremȩreconȩ peaja̧di, pio jȩa chjiari ji̧dë ma ni̧bämȩ oa. Jabechji̧ jibëa̧ chji̧rämo̧ jo̧rȩtatamȩrȩ ni̧bämȩ oa darämi̧ cjiaremȩreconȩ, 'a̧dë chjäte ba chiamȩ pio judimo̧quëda' quëna̧ jo̧rȩtamȩ oa.

Ütë tjamo̧ judi pumȩ ji̧ri̧ bape chjaopea̧ do üdë ma̧na̧diibe

⁹ Ado cüdë jabë mo̧a̧ nö̧ta, jabechji̧ arë cji̧däa̧ oa cjiaji̧ri̧ oa darämi̧ cjiaremȩrequede charea̧ ji̧ra̧ tjamo̧ oa, chiri ütërë charea̧ ba chia tjamo̧mi̧ da oa. Ado ja̧dëa ji̧ darämi̧ cjiaremȩreconȩ Pearä judiräri ja̧mȩ Ütë pio ju̧i̧. Cja̧rȩmȩ charea̧rä chamȩ oa darämi̧ cjiaremȩreconȩ, charea̧ ba chia tjamo̧ro chamȩ oa. Aja̧, pumȩ ji̧ri̧ ütarë ta̧rë ëte bape chjaopea̧ oa chamȩ oa darämi̧ cjiaremȩreconȩ. Chjibo bërebëreai̧ tjamo̧ oa ina̧mȩ oa darämi̧ cjiaremȩreconȩ. Ado jibëa̧ cö̧ a̧dë chjäte bërebëreai̧ tjamo̧ oa darämi̧ cjiaremȩreconȩ peaja̧di, oveja cö̧mi̧ da oa, chjadëri̧ joa̧ oa cjiamȩ oveja cö̧mi̧ da oa. Ado Pearä judiräri ja̧mȩ Ütë pio ju̧i̧ ja̧ charea̧ oa daea̧ ji̧, jabechji̧ ma̧i̧ da cjo̧dë chiamȩ oa darämi̧ cjia̧reconȩ, a̧dë chjäte tatari̧ tümȩ oa. Ado jibëa̧ charea̧ ja̧ tabo daea̧reconȩ, ta chjadë maea oa. Jabechji̧ jo̧ȩra̧ baämȩ bagurarea̧ tami̧ da oa darämi̧ cjiareconȩ, cäricäria oa. Aja̧, cjo̧dë chiamȩ ta oa, ma̧i̧ dari̧ gäri baämȩ cjo̧dë chiamȩ ta oa darämi̧ cjiaremȩreconȩ.

¹⁰ Ado Pearä judiräri ja̧mȩ Ütë pio judiri go̧dümȩ oa darämi̧ cjiaremȩreconȩ peaja̧di cjo̧dë ji̧ra̧ oa, go̧düdiä go̧düdiä cjiamȩ oa. Jabechji̧ bearämȩ uimi̧ darë goae tarari̧ ca̧mȩ oa darämi̧ cjiaremȩreconȩ. Ado Pearä judiräri ja̧mȩ pio ju̧i̧ ja̧ mu̧i̧tjoi̧ pio ji̧ri̧ darämi̧ cjiaremȩrequedejȩrȩ peaja̧di a̧dë chjäte no̧i̧dë tjamo̧ oa, ütararea̧mi̧dëri̧ cjiaji̧ri̧ oa. Aja̧, charea̧ ba chia tjamo̧ro chamȩ pio ju̧i̧ ja̧ dëbëräpȩ ja̧bepe cjiaji̧ri̧ oa daea̧requedejȩrȩ, pio ju̧i̧ ja̧ oa ja̧bepë yürüji̧ri̧ oa. Aja̧, ütararea̧mi̧dëji̧ri̧ oa darämi̧ cjia̧requedejȩrȩ. Ado ja̧dëa ji̧ areia̧ oa cjiaremȩde go̧ȩ i chiamȩ joë üdë, pumȩ judiro̧ japea̧ pio ju̧i̧ chjiari go̧ȩpea̧ oa cjiamȩ joë üdë. Ado charea̧ ba chia tjamo̧ro chamȩ pio judi taruparemȩde pumȩ ji̧ri̧ ütarë yo̧pea̧ ji̧ judiro̧ chjadëri̧ japea̧ pio ju̧i̧ chjiari, judiro̧ chjai̧dëri̧ japea̧ pio ju̧i̧ chjiari. Aja̧, pumȩ judiro̧ japea̧ pio ju̧i̧ chjiari ütarë yo̧pea̧ ji̧, pio ji̧ri̧iäpȩmo̧ bape chjaorea̧ ma̧ȩ oa yürüpea̧ ji̧ taruparemȩde.

¹¹ Ado cüdë charea̧ ba chia tjamo̧ro chamȩ pio ju̧i̧ darämi̧ cjia̧ nö̧ta, jabë ni̧bämȩ oa ta̧rërämi̧ cjiaremȩreconȩ yatë boi̧chji̧ pio ju̧i̧, pio jȩa chjiari ji̧dë ma goaeri̧ ni̧bämȩ pio ju̧i̧. Aja̧, pio ju̧i̧ ta̧rërämi̧ cjiaremȩreconȩ uiri pio judiri cjiadiäa̧mi̧ go̧düa̧mȩ pio judiri ja̧ yatë boi̧chji̧ pio ju̧i̧. Ado ja̧dëa ji̧ cüdë ji̧dë u̧i̧ da̧ nö̧ta, jabechji̧ ja̧bo tänȩa̧ oa cjiamȩ oa darämi̧ cjiaremȩreconȩ yatë boi̧chji̧ chiamȩ pio ju̧i̧, chirirä cjo̧ro̧mȩmi̧ da pio ju̧i̧. Jabechji̧ jibëa̧ icjararemȩ pio judi cjo̧dërë tüea̧ oa cjiamȩ oa darämi̧ cjiaremȩreconȩ.

¹² Ado pio yoabo darämi̧ cjiaremȩrequede. Danȩrȩ, cja̧rȩmȩ üdë ju chiadëparȩa̧dejȩrȩ uiri pio judiri pearä go̧dürëreji̧ri̧ pio ji̧ri̧, chirirä cjo̧ro̧ji̧ri̧mi̧ dari̧ cjiaji̧ri̧ pio ji̧ri̧. Jabechji̧ judiro̧ tjarari̧rȩ ju chiaji̧ri̧rȩ cjo̧ro̧rërea̧ ji̧, judiro̧ tjarari̧rȩ tjamo̧ yo̧rea̧ chiaji̧ri̧rȩ cjo̧ro̧rërea̧ ji̧, cjäri̧ madirȩ, ju chiadëji̧ri̧pea̧dirȩ, cja̧rȩmȩ pio judi tänȩa̧ oaiä. Jabo tjamo̧ yo̧rea̧ chiadëji̧ri̧pea̧räbo, ju chiadëparȩa̧ oa cjiaräbo, jabechji̧ chjaodëri̧ ja̧bo tänȩdëa̧dejȩrȩ, jabo japamitë boi̧chji̧ oa cjo̧ro̧rea̧ yürüa̧dejȩrȩ. Aja̧, cjiadiäa̧mi̧ go̧düa̧mȩ pio ju̧i̧ chjaodëri̧ ja̧bo tänȩrërea̧mi̧ japadëdejȩrȩ pearä go̧dürëreji̧ri̧ pio ji̧ri̧.

¹³ Ado cüdë gȩnȩrä ji̧dë u̧i̧ darämi̧ cjia nö̧ta, jabechji̧ a̧dëri pio judiri birë ma̧na̧mȩ oa darämi̧ cjiaremȩreconȩ cja̧rȩmȩ oa, go̧a̧ra̧ ë chjarerä ma̧na̧mȩ oa. Pumȩrȩ Ara̧ Tjamo̧mi̧ da oa daea̧reconȩ. Ado Pearä judiräri ja̧mȩ Ütë pio ju̧i̧iäpȩ ëba jäa̧diro̧jo̧ȩ pio ju̧i̧ ja̧ dëbëräpȩ.

¹⁴ Ado ja̧dëa ji̧ charea̧ ba chia tjamo̧ro chamȩ pio judi tjamo̧ yo̧rea̧ yürüa̧dejȩ pio ju̧i̧ ja̧ dëbëräpȩmȩ oa, judi a̧dë chjäte chiri Ütëmȩrȩ cjo̧ro̧pea̧ oa. Ado a̧dë chjäte tatari̧ cjiamȩ jauëchjarea̧ oa yürüa̧dejȩ peaja̧di. Aja̧, pio judi tjamo̧ yo̧mȩrȩ cjo̧ro̧pea̧ oa, chiriräpȩti̧ oa cjo̧ro̧ji̧ri̧ pio judiro̧ pio ju̧i̧ ja̧ chja̧oerämo̧ cjo̧ro̧pea̧ oa, yürüa̧dejȩ tjamo̧ yo̧rea̧ oa, pumȩ judiro̧ ütëbodärärë pio ju̧i̧iäpȩmo̧ ma ba chia dapea̧ oa. Aja̧, ado cja̧rȩmo̧ chiriräpȩ cjo̧ro̧ji̧ri̧ pio judiro̧, ado cja̧rȩmo̧ tarurea̧ chiaji̧ri̧ pio judiro̧, ado cja̧rȩmo̧ ma̧ȩ oa ni̧bäji̧ri̧ pio judiro̧ pio ju̧i̧ chjadëri̧ ta̧rëdiäpea̧ oa tjamo̧ yo̧rea̧ yürüa̧dejȩ. Ado ja̧dëa ji̧ judi a̧dë chjäte chiri Ütëmȩrȩ cjo̧ro̧ro, jabechji̧ bucho ana̧ tjamo̧ yo̧mȩrȩ cjo̧ro̧pade yuroparea̧ decjiari̧. Jabechji̧ ado cja̧rȩmo̧rȩ boadärärea̧mi̧dëri̧ tjamo̧ yo̧mȩrȩ cjo̧ro̧pade, ado cja̧rȩmo̧rȩ goarijä tänȩrea̧mi̧dëri̧.

Da̧de judi darämi̧ cjia̧ üdë chjadëri̧ goë ni̧bäa̧ oa cjiaremȩde

¹⁵ Ado Da̧de judi ji̧dë u̧i̧ ji̧ra̧ri̧ a̧de go̧ȩpamȩrȩ ja̧di ta̧rëri̧ go̧ȩparëremȩde: Aja̧, cüdë ji̧ra̧ tjamo̧ oa darämi̧ cjiamȩrȩ daea̧ oaiä, jabechji̧ ana̧ri̧ jo̧rȩtamȩrȩ cjiadiärëremȩrequede, uapa tjamo̧mȩrȩ.

¹⁶ Ado pio ju̧i̧iä ji̧dë ma darämi̧ cjiamȩrȩ jäa̧requede mu̧i̧tjoi̧ pio ju̧i̧iäpȩ, charea̧ ba chia queri̧räpȩ cjiamȩ mu̧i̧tjoi̧ pio ju̧i̧iäpȩ. Jabechji̧ pio coa chjadëri̧ yo̧tä eamȩrȩ yo̧a̧reconȩ, cüdë tjamo̧ri̧ dabapea̧ oa cüdë darämi̧ cjia̧ pio ju̧i̧ chjiari. Ado cüdë pio ju̧i̧iä cjo̧dëa̧ oaiä, jabechji̧ ja̧di ta̧rëri̧ dëbë yo̧a̧dique:

¹⁷ —Danȩ, mȩnȩ daea̧ üdë, jadüchiami̧ chirirä cjo̧ro̧ji̧ri̧mi̧ dari̧ cjiaji̧ri̧ pio judiro̧, jabechji̧ jadüchiami̧ ütë pio ji̧ri̧ chjiari na̧rȩrea̧de, ji̧dë duri oa cjo̧ro̧paji̧ri̧ pio ji̧ri̧ chjiari na̧rȩrea̧de. Aja̧, jadüchiami̧ chiri bori̧dë pio ji̧ri̧ chjiari, a̧dë chjäte ju chiami̧ dari̧ cjo̧ro̧paji̧ri̧ ütë pio ji̧ri̧ chjiari na̧rȩrea̧de. Aja̧, jibëa̧ chiri ana̧ tjamo̧ro tjamo̧ yo̧ji̧ri̧rȩ cjo̧ro̧padirȩ.

¹⁸ Jabo ja̧dëa ji̧ cjiadiäa̧ japamitërä pio jiro chiri ütë cjo̧ro̧ji̧ri̧ pio judiro̧ yuropea̧rä, jabechji̧ a̧dë chjäte Ütë pio judi jibëa̧ pumȩ pio ji̧ri̧ tjamo̧ yo̧rea̧ yürüpadejȩrȩ, pio judiro̧ ano̧ mire ütëji̧ri̧rȩ cjo̧ro̧pea̧ oa, chiriräpȩti̧ oa cjo̧ro̧ji̧ri̧ pio judiro̧ pio ji̧ri̧ ja̧ chja̧oerämo̧ ano̧ mire cjo̧ro̧pea̧ oa, judiro̧ yuroparea̧ decjiari̧ chiri ütëji̧ri̧rȩ cjo̧ro̧pea̧ oa, bucho ana̧ —yo̧mȩrȩ ni̧bä chjaoa̧dique charea̧ ba chia queri̧räpȩ cjiamȩ mu̧i̧tjoi̧ pio judi.

¹⁹ Ado mu̧i̧tjoi̧ judi pio coaiäpȩmo̧ ja̧di ta̧rëri̧ dëbë yo̧a̧ oaiä, jabechji̧ ja̧di ta̧rëri̧ yo̧mȩrȩ a̧de iëno̧ë ta̧rëa̧reconȩ, jabë mo̧a̧mȩrȩ: —Danȩ, tjamo̧ri̧ dabatämi̧ cjiarequede uiri pio judiri cjiadiäa̧mi̧ go̧düremȩ pio ju̧i̧ chjiari, a̧dë chjäte tjaoëmȩ pio ju̧i̧ chjiari. Jabechji̧ o ji̧ri̧iä ji̧dë u̧i̧ uapai̧ daremȩde. O ji̧ri̧iä ji̧dë u̧i̧ chjuamȩremȩde. Ado pio ju̧i̧iä oë ja̧bo tjamo̧mȩrȩ daea̧reconȩ. Danȩ, ierora̧ japea̧ jo̧dëra̧ tutupe juimȩrȩ acji tai̧remȩde, jui jui gu̧na̧mȩrȩ, boro̧chera̧ japea̧ ivëra̧ ja̧bo tänȩmȩrȩ. Ado jënȩ ja̧bo tänȩa̧ pio ji̧ri̧ pënȩ boi̧chji̧ mape bagari̧ tuti juiriä tai̧remȩde, uapai̧ da tjamo̧rȩ. Ado jënȩ jura̧ cjiadiäa̧mȩ pio ju̧i̧ boë cjaeä chjätäremȩde, pjo̧no̧i̧ mape bagari̧. Aja̧, pio ju̧i̧ chjiari tjamo̧ri̧ dabatämi̧ cjiarequede.

²⁰ Ado danȩ, peaja̧di dabatämi̧ cjiarequede ichi chjö̧na̧i̧ yatë pio ji̧ri̧ chjiari, cjiadiäa̧mi̧ go̧düa̧mȩ pio ju̧i̧ ja̧ tjübërä chiamȩ yatë pio ji̧ri̧ chjiari. Ado yatë boi̧chji̧ pio ju̧i̧ chjiaribo tjamo̧ri̧ dabatämi̧ cjiarequede, jibëa̧ jadü ja̧ chjarerä cjiaremȩ yatë pio ju̧i̧ chjiari, jidë duri oa cjitëa̧ pio ju̧i̧ chjiari. Aja̧, pio judi cjitëa̧rä, jabechji̧ daea̧reconȩ ado cja̧rȩmo̧ yatë oa boadäräa̧mȩ oa, tjarari̧ oa boadäräa̧mȩ oa. Jabechji̧ o ji̧ri̧iä ji̧dë u̧i̧ ba chiamȩmi̧ da oa daea̧reconȩ. Aja̧, pumȩ ja̧ dachomi̧ da oa chiamȩ oa, ado jibëa̧ yara̧ pio jȩa chjiari a̧dë chjäte goaeri̧ ni̧bämȩ oa darämi̧ cjiaremȩreconȩ, jibëa̧ chji̧rämo̧ jo̧rȩtatamȩ oa, 'ba chia tjamo̧mȩquëda' quëna̧mȩ oa.

²¹ Ado mu̧i̧tjoi̧ pio judi coa jabë dëbë yo̧dëa̧rä, ji̧dë u̧i̧ darämi̧ cjiamȩrȩ daremȩreconȩ pio jiro yatë boi̧chji̧ pio ju̧i̧, ma̧i̧ dari̧ japamȩ pio ju̧i̧. Jabechji̧ Ütërë mitëa̧ pumȩ pio ji̧ri̧ acji jä chjaomȩ oa darämi̧ cjiaremȩreconȩ, pio ji̧ri̧ boadärärea̧ damȩ oa.

²² Aja̧, japamitë boi̧chji̧ nö̧ta Ütërë mitëa̧ pumȩ pio ji̧ri̧ boadärärea̧ darämi̧ cjiaremȩrequedejȩrȩ. Jabo ja̧dëa ji̧ Pearä judiräri ja̧mȩ pio judi tuti japea̧rä, jabechji̧ chjadëri̧ a̧doa̧dejȩrȩ jibëa̧ pumȩ pio ji̧ri̧, pio ji̧ri̧ cjäri̧ri̧ cjiamȩrȩ. Aja̧, pio ji̧ri̧ chjadëri̧ a̧doa̧dejȩrȩ, jabo chirirä cjo̧ro̧mȩmi̧ da pio ju̧i̧, cjäri̧ madejȩ, a̧dodëa̧dejȩ jabo ana̧ri̧ bape chjaoa̧dejȩ. Ado ja̧dëa ji̧ ütara̧ japamitërä, darämi̧ cjiaremȩrequedejȩrȩ Ütërë mitëa̧ pumȩ pio ji̧ri̧, chiri ütëji̧ri̧rȩ ano̧ mire cjo̧ro̧ji̧ri̧pea̧ji̧ri̧ oa, Ütërë yürüa̧ oa ja̧di dari̧ cjo̧ro̧ji̧ri̧pea̧ji̧ri̧ oa. Aja̧, ja̧di dari̧ darämi̧ cjiaremȩrequede. Ado yaba̧ chjadëri̧ goë yo̧coe cüdë tjamo̧ri̧ dabapea̧ oa —yo̧mȩrȩ iëno̧ë ta̧rërämi̧ cjia̧reconȩ charea̧ ba chia queri̧räpȩ cjiamȩ mu̧i̧tjoi̧ pio ju̧i̧iä.

²³ Ja̧dëa ji̧ a̧dëräpȩ cjiamȩ mu̧i̧tjoi̧ pio judi ja̧di ta̧rëri̧ dëbë yo̧a̧dique: —Danȩ, pio jiro jadüchiami̧ chirirä cjo̧ro̧ji̧ri̧mi̧ dari̧ cjiaji̧ri̧ pio judiro̧ jadüchiami̧ ja̧ chja̧oerä cjo̧ro̧rea̧ pio ju̧i̧ chjiari na̧rȩrea̧de. Jadüchiami̧ ütëti̧ pio ji̧ri̧ ja̧ chja̧oerä cjo̧ro̧rea̧ pio ju̧i̧ chjiari na̧rȩrea̧de. Aja̧, jadüchiami̧dirȩ pumȩ ja̧ chiri oa ano̧ mire boapaji̧ri̧ judiro̧, pumȩ no̧i̧dë tjamo̧ oa jibëa̧ chja̧oerä cjo̧ro̧ tänȩpaji̧ri̧ judiro̧, chiri ji̧ra̧ tjamo̧ oa boapaji̧ri̧ judiro̧. Ado danȩ Da̧de, japamitë chjätä ëte, pumȩ judiro̧ tjarari̧ chirirä cjo̧ro̧ji̧ri̧mi̧ da pio ji̧ri̧ ja̧ chja̧oerä cjo̧ro̧rërea̧ ji̧, jabechji̧ cjiadiäa̧mȩ chirirä cjo̧ro̧mȩmi̧ da pio ju̧i̧ ja̧ chja̧oerä ano̧ mire cjo̧ro̧padirȩ. Ado pio judi a̧dë chjäte tjaoëpade, yaboreji̧ri̧ pio judiro̧mi̧ dadëri̧. Jabechji̧ chiriräpȩti̧ oa cjo̧ro̧ji̧ri̧ pio ji̧ri̧ boadäräpadejȩrȩ. Ado judi ja̧bo tänȩa̧ pio ji̧ri̧ boë cjaeä chjätäpadejȩrȩ —yo̧mȩrȩ yo̧a̧dique mu̧i̧tjoi̧ üdë.

²⁴ Ado ja̧dëa ji̧ a̧de ni̧bä chjaoa̧dique ichi chjö̧na̧i̧ yatë pio ju̧i̧ chjiari: —Ado danȩ, cjiadiäa̧mȩ chirirä cjo̧ro̧mi̧ dari̧ cjiamȩ pio judi, jabechji̧ yatë oa chiapade ichi chjö̧na̧i̧ oa. Ado pio jiro yatë üdë, jabechji̧ ichi chjö̧na̧i̧ ütë pio ji̧ri̧ chjiari na̧rȩrea̧de. Aja̧, cja̧rȩmȩ chiri ütëmȩ pio judi cjo̧ro̧rërea̧ ji̧, jabechji̧ ichi chjö̧na̧i̧rȩ cjitëpadirȩ chiri ütëji̧ri̧rȩ ano̧ mire cjo̧ro̧pea̧ oa. Ado ja̧dëa ji̧ judiro̧ chiri ütëji̧ri̧rȩ cjo̧ro̧ji̧ri̧pea̧rä, ado cja̧rȩmo̧ ütërë peaja̧di cjitëpade, tjaoëpai̧ darë. Ado tjarari̧ ütëreji̧ri̧ pio ji̧ri̧ boadäräpadejȩrȩ.

²⁵ Ado ja̧dëa ji̧ pio jiro ütë üdë, cjäri̧ madejȩ chjai̧dëri̧ ni̧bäpade a̧dë chjäte Ütë tjamo̧ pio ju̧i̧ chjiari. Ado pio ju̧i̧ uëri ana̧ri̧ conȩdapadejȩrȩ Ütërë mitëa̧ pumȩ pio ji̧ri̧. Ado peaja̧di järi tjamo̧pade Ütë tjamo̧ ja̧ ma̧ȩ pio ju̧i̧ ano̧ mire go̧ȩpapea̧ oa, Ütë ja̧ ma̧ȩdëpe bagami̧ dari̧ cjiapea̧ oa. Tjamo̧ davä. Ütërë Moiche pio ju̧i̧iäpȩmo̧ yürürërea̧ ma̧ȩ pio ju̧i̧ ano̧ mire go̧ȩpapea̧ ji̧, tjaoëpai̧ dape bagari̧ ano̧ mire go̧ȩpapea̧ ji̧ järi tjamo̧pade. Ado pio ju̧i̧ uëri Ütërë mitëa̧ pumȩ pio judiro̧ ütara̧ doro a̧dopachea oa, jabechji̧ järi tjamo̧pade pio jiro do pio ju̧i̧ chjiari ano̧ mire go̧ȩpapea̧ ji̧. Tjamo̧ davä. Judiro̧ Ütë tjamo̧ pio ju̧i̧ ütara̧ doro jo̧rȩtaji̧ri̧rȩ a̧dopachea oa, judiro̧ ütara̧ doro jo̧rȩtaji̧ri̧rȩ a̧dopachea oa, jabechji̧ järi tjamo̧pade davä, judiro̧ ütaradëa̧ doro ano̧ mire a̧dopapea̧ oa. Ado danȩ, Ütë tjamo̧ pio judi jabechji̧ japarea̧ yürüpadejȩ. Tjamo̧ davä. Japarea̧ yürüpadejȩ. Ado pio ju̧i̧iä tjarari̧ ui tjomo̧ra̧ a̧de Ütë tjamo̧ ja̧ pumȩ pio judiro̧ pio ju̧i̧ ja̧ chja̧oerä ano̧ mire cjo̧ro̧padirȩ.

²⁶ Jabo ütara̧ doro, Pearä judiräri ja̧mȩ Ütë pio judi ütarë dapadejȩ jënȩ chjai̧dëri̧ japea̧ pio ju̧i̧. Ado bape chjaorea̧ ma̧ȩ oa yürümȩrȩ ütë cjatä tänȩpadejȩ judi ju chiarea̧ chiadëpe bagarea̧mi̧ dari̧, judi tjamo̧ yo̧mȩrȩ cjo̧ro̧rea̧mi̧dëri̧.

²⁷ Ado ja̧dëa ji̧ a̧dë chjäte Ütë pio judi ano̧ mire ütë tänȩpadejȩrȩ jënȩ mitëa̧ pumȩ pio ji̧ri̧. Jabechji̧ chiri ütërëreji̧ri̧ pio judiro̧mo̧rȩ tjamo̧ yo̧rea̧ chiaji̧ri̧rȩ cjo̧ro̧rërea̧ ji̧, jabechji̧ tjamo̧ yo̧rea̧ ano̧ mire yürüpadejȩrȩ jënȩ mitëa̧ pumȩ pio ji̧ri̧. Aja̧, pio ji̧ri̧iäpȩmo̧ ano̧ mire yürüpadejȩrȩ pio judiro̧ chiri ütëji̧ri̧rȩ ano̧ mire cjo̧ro̧pea̧ oa, chiriräpȩti̧ oa cjo̧ro̧ji̧ri̧ judiro̧ pio ji̧ri̧ ja̧ chja̧oerä ano̧ mire cjo̧ro̧pea̧ oa. Jabechji̧ a̧dë chjäte Ütërë yo̧a̧ chja̧oerä cjo̧ro̧rea̧ üdë, bucho ana̧mȩde. Yuropadëmȩde. Ado chiriräpȩti̧ oa cjo̧ro̧ji̧ri̧ ütëti̧ pio judiro̧ pio ju̧i̧ ja̧ ma̧ȩrämo̧ cjo̧ro̧padirȩ, pio ju̧i̧ ja̧ oa jabepë yürüji̧ri̧rȩ —yo̧mȩrȩ ni̧bä chjaoremȩdique mu̧i̧tjoi̧ üdë cüdë ji̧ra̧ oa darämi̧ cjia̧ ji̧.

²⁸ Aja̧, pio ju̧i̧ darämi̧ cjiaremȩrequede. Jabo cjäri̧ marequede, cüdë ma̧i̧ da oa daea̧ oaiä, cüdë ji̧ra̧ oa daea̧ oaiä, jabechji̧ ana̧ tjamo̧ri̧ jo̧rȩtamȩpea̧requede, uapa tjamo̧mȩrȩ. Jabechji̧ ca̧ea̧ dacho üdë bëremi̧ cjiami̧ dari̧ cjiadiäa̧de uaparea̧ üdë coa ana̧ri̧ boadäräa̧ oaiä. Ado cüdë o ji̧ri̧iäpȩmo̧ ni̧bä chjaotärea̧ ji̧, cüdë daea̧ pio ju̧i̧ chjiari ni̧bä chjaotärea̧ ji̧, cjäri̧ marequedejȩrȩ, eami̧ oa yo̧dëa̧requede jabo cjapi maeari̧ cjiadiäa̧requede, ca̧ chji̧ maeara̧ jo̧rȩtamȩrȩ.