Da̧de 6 - Biblia Pume

Da̧de judi aeno̧a̧ oa cjiarëremȩde pa̧rȩmȩrȩ cjoromȩ puëräpȩ

¹ Dario quȩmȩ judi, Media quȩmȩ chiririmȩ pio judi Babironia quȩmȩ chiri ana̧ tjamo̧ oa boadäräa̧rä, ja̧di dari̧ jo̧rȩtamȩrȩ jo̧rȩtamȩpea̧de: 'Aja̧, Babironia chiri üdë boi̧dë tjamo̧dida, ado pio ju̧i̧iä tutitäremȩcuni̧da, 120 chiri boi̧chji̧pe bagari̧ tutitäremȩcuni̧da, ado chiri boi̧chji̧ nö̧tarë jibëa̧ ütë chiatäremȩdida, ado pio jiro ütë judiro̧ ca̧ chja̧oerämo̧ ja̧bepatäreji̧ri̧diro̧da, ca̧ chja̧oerämo̧ tjamo̧ yo̧ji̧ri̧rȩ ja̧bepatäreji̧ri̧diro̧da' quëna̧ jo̧rȩtamȩrȩ mitërëremȩdejȩrȩ 120 oari pio ji̧ri̧, tjamo̧ yo̧paji̧ri̧ pio ji̧ri̧. Tjamo̧ davä. Pio ji̧ri̧ mitërëremȩdejȩrȩ tjamo̧ yo̧ji̧ri̧rȩ cjo̧ro̧pea̧ oa, jënȩro̧ cjo̧ro̧mȩ chirirä chjadëri̧ ja̧bepapea̧ oa.

² Ado pio ji̧ri̧ uëri tjarari̧ oari̧ pio ji̧ri̧ a̧de mitërëremȩdejȩrȩ tjamo̧ yo̧ji̧ri̧ pio ji̧ri̧ chjadëri̧ chi̧dëeapea̧ oa, tjamo̧ yo̧ji̧ri̧ pio judiro̧ chjadëri̧ ja̧bepapea̧ oa. Tjamo̧ davä. Tjamo̧ yo̧ji̧ri̧ pio ji̧ri̧ chjadëri̧ ütarë dapea̧ oa, pio judiro̧ oëra̧ ja̧bepachea oa, chiri ütë cjo̧ro̧mȩ pio judi badëri̧ cjiadiämi̧ dari̧ cjiadiächea oa, jabechji̧ pio jiro oari tjarari̧ oa mitëa̧dejȩrȩ chiri boi̧chji̧räpȩ tjamo̧ yo̧ji̧ri̧ pio judiro̧ coëma cjiari̧ ja̧bepapea̧ oa. Ado Dario quȩmȩ ütë pio judi pio jiro oari tjarari̧ oa mitëa̧ ji̧, jabechji̧ Da̧de pio judiborë mitëa̧ oa cjiarëremȩde yo̧a̧ri̧ oari pio ji̧ri̧ nö̧ta. Aja̧ ji̧mo̧ ja̧bepapea̧ oa, tjamo̧ chi̧dëeaji̧ri̧rȩ ja̧bepapea̧ oa, mitëa̧ oa cjiarëreji̧ri̧dirȩ tjarari̧rȩ.

³ Ado Da̧de judi chjadëri̧ ja̧bepë yürüa̧ oaiä, ma̧ chiadëri̧ cjiamȩpea̧de chiri ütë cjo̧ro̧mȩ judi pio ju̧i̧ chjiari. Ado pio ju̧i̧iä judi, 'Aja̧, Da̧de judi o ji̧ri̧iä ji̧dë u̧i̧ chjadëri̧ ja̧bepamȩdida, jabechji̧ dami̧ti̧ oa chjadëri̧ ja̧beparea̧ chiadida, chja jabechji̧ chiri codë oa tjamo̧ jidamȩ tänȩtäremȩcuni̧da' quëna̧ jo̧rȩtamȩpea̧de.

⁴ Jabo cjäri̧ madiro̧jo̧ȩ, Da̧de ja̧ jadü pio judiro̧, pio jȩa nö̧ta ëba ja̧bepaji̧ri̧ pio judiro̧ yo̧a̧ri̧borë goë ta̧rëa̧ oaiä, "Aja̧, chiri ütë cjo̧ro̧mȩ judi Da̧de pio ju̧i̧ mitëpadejȩ chiri codë oa tjamo̧ jidamȩrȩ cjo̧ro̧ tänȩpea̧ oa" yo̧a̧ oa ta̧rëa̧ oaiä, jabechji̧ quëbaji̧ri̧rȩ jo̧rȩtaji̧ri̧pea̧diro̧jo̧ȩ Da̧de pio ju̧i̧. Ado peaja̧di dari̧ jo̧rȩtaji̧ri̧pea̧diro̧jo̧ȩ chiri boi̧chji̧ nö̧ta oa tjamo̧ yo̧ji̧ri̧ pio judiro̧. Ado pio ju̧i̧iä järi tjamo̧pea̧dirȩ Da̧de pio ju̧i̧iäpȩmo̧ aechide yo̧pea̧ ji̧ chiri ütë cjo̧ro̧mȩ ja̧ dëbëräpȩ. Jabo cjäri̧ madiro̧jo̧ȩ, judiro̧ ana̧ri̧ jo̧rȩtaräbo, aechiderea̧ dadëa̧diro̧jo̧ȩ. Jabechji̧ Dade judi chumi̧dëri̧ cjiadëmȩrȩ ja̧bepea̧ oaiä, chiri ütërë yo̧a̧mi̧ nö̧tadäräri̧ ta̧rëdiämȩrȩ ja̧bepë yürüa̧ oaiä, jabechji̧ aechide yo̧rea̧ dadëa̧diro̧jo̧ȩ judi oëra̧ japadëmȩrȩ ja̧bepea̧ oaiä.

⁵ Ado pio ju̧i̧iä yo̧a̧dirȩ jibëa̧ dëbëti̧ra̧ chia: —Jabo cjäri̧ marea̧ro̧jo̧ȩ. Da̧de judi chiri ütë ja̧ oa a̧dë chjäte chjadëri̧ ja̧bepë yürüa̧ oaiä, jabechji̧ chiri ütë cjo̧ro̧mȩ pio ju̧i̧iäpȩmo̧ aechide yo̧rea̧ dadëparea̧rȩ pio ju̧i̧ chjiari. Ado pio ju̧i̧iä ano̧ mire jo̧rȩtapea̧ chia jirorea̧rȩ. Danȩrȩ, Da̧de judi chjuari̧ quëna̧dejȩ jënȩ quëna̧ Ütë pio ju̧i̧iäpȩmo̧. Ado jibëa̧ Ütë pio ju̧i̧iäpȩmo̧ chjai̧dëri̧ japadëri̧ cjiamȩrȩ ji̧dë ma cjo̧ro̧de tüdüa̧mi̧ darä cjo̧ro̧pea̧ ma̧ȩrä, jënȩ quëna̧ Ütë pio ju̧i̧ ja̧ ma̧ȩrä. Ado pio ju̧i̧iä, judi jibëa̧ Ütë ja̧ ma̧ȩrämo̧ ji̧dë ma cjo̧ro̧tämi̧ cjia oaiä, jabechji̧ jiadapai̧ da jirodejȩ chiri ütë cjo̧ro̧mȩ ja̧ ma̧ȩ pio ju̧i̧ jibëa̧ Ütë ja̧ ma̧ȩrämo̧ cjo̧ro̧pea̧ oa. Ado judi jiadarä, jabechji̧ chjaodëri̧ aechide yo̧rea̧ datäreji̧ri̧rea̧ro̧jo̧ȩ ütë oa pio ju̧i̧ chjiari —yo̧a̧dirȩ jibëa̧ dëbëti̧ra̧ chia.

⁶ Ado pio ju̧i̧iä tjamo̧ chi̧dëeaji̧ri̧ pio judiro̧ yo̧a̧ri̧rȩ, ado 120 chiri boi̧chji̧ oa tjamo̧ yo̧ji̧ri̧ pio judiro̧borë cja̧rȩmȩ jo̧rȩtarea̧ chiaji̧ri̧rȩ goëdepea̧diro̧jo̧ȩ chiri ütë cjo̧ro̧mȩ pio ju̧i̧, Dario quȩmȩ pio ju̧i̧. Ado Da̧de pio ju̧i̧iäpȩmo̧ aechide yo̧rea̧ jo̧rȩtaji̧ri̧rȩ yo̧a̧diro̧jo̧ȩ chiri ütë cjo̧ro̧mȩ ju̧i̧: —Ibëa̧ ütë, bucho ana̧ ütëmȩrȩ cjo̧ro̧tänȩ —yo̧a̧diro̧jo̧ȩ—.

⁷ Danȩ ütë, a̧ro̧rȩ ütëborë cja̧rȩmȩ chji̧ chiami̧ dari̧ jo̧rȩtaji̧ri̧rȩ ni̧bä chjaoera̧pea̧rea̧ro̧mȩ —yo̧a̧diro̧jo̧ȩ—. Tjamo̧ chi̧dëeaji̧ri̧ pio judiro̧, ado 120 chiri boi̧chji̧ oa tjamo̧ yo̧ji̧ri̧ pio judiro̧ cja̧rȩmȩ chji̧ chiami̧ dari̧ jo̧rȩtaji̧ri̧rȩ jana̧rea̧ro̧mȩ. Danȩ ibëa̧ ütë Dario, ba chia tjamo̧renȩ. Pio ibë chjiari tuti japamȩ ütë pio judirenȩ. Ado pio ju̧i̧iä na̧ chja̧oerä cjo̧ro̧ji̧ri̧ pio judiro̧ ütëbodärärë pio mȩaiämo̧ ja̧ȩ cjiami̧ dari̧ cjo̧ro̧täreji̧ri̧rea̧rȩ. Pio mȩaiämo̧i̧ cjo̧dëtäreji̧ri̧rea̧rȩ. Aja̧ ibëa̧ ütë, 30 do nö̧ta pio mȩaiämo̧ cjo̧dëtäreji̧ri̧rea̧rȩ chiriräpȩti̧ oa cjo̧ro̧ji̧ri̧ pumȩ judiro̧ ütëborë. Jabechji̧ pio jiro japamitë nö̧ta ado cja̧rȩmo̧ ütë pio ju̧i̧iä cjo̧dëdë matäreji̧ri̧rea̧rȩ, jabo pio mȩaiämo̧i̧ cjo̧dëtäreji̧ri̧rea̧rȩ na̧ chja̧oerä cjo̧ro̧ji̧ri̧ pumȩ judiro̧ ütëborë. Jabechji̧ pio mȩaiäpȩmo̧ ma ni̧bätäreji̧ri̧rea̧ro̧mȩ, ibëa̧ ütëmi̧ damȩ oa. Ado pio ju̧i̧iä ja̧di ta̧rëri̧ baämȩ ma̧ȩ oa go̧ȩpatäremȩrenȩ ibëa̧ ütë: "Aja̧, 30 do nö̧ta, pio coaiämo̧i̧ cjo̧dëpea̧de, chiri ütë cjo̧ro̧mȩ pio ju̧i̧iämo̧i̧. Ado cja̧rȩmo̧ ütë pio ju̧i̧iä, ado cja̧rȩmo̧ jauëchjamȩ pio ju̧i̧iä cjo̧dëdëpea̧de jabo pio coaiämo̧i̧ cjo̧dëpea̧de 30 do nö̧ta. Ado eami̧ pumȩ üdë ado cja̧rȩmo̧ pio ju̧i̧iä cjo̧dërä judi, ado cja̧rȩmo̧ pio ju̧i̧iäpȩmo̧ ni̧bärä judi, jabechji̧ aeno̧a̧ oa cjiapade pa̧rȩmȩrȩ cjo̧ro̧mȩ puëräpȩ" yo̧mȩ ma̧ȩ pio ju̧i̧ go̧ȩpatäremȩrenȩ, ibëa̧ ütë Dario, na̧ pumȩ judiro̧ ütëborë tüdüa̧mi̧ darä cjo̧ro̧pea̧ oa.

⁸ Ado yaba̧ ibëa̧ ütë, pio jiro ma̧ȩ üdë chjuari̧ cjiami̧ dari̧ cjiapea̧ oa, jiadarea̧mi̧dëri̧ go̧ȩpea̧ oa cjiapea̧ oa, jabechji̧ na̧ quȩbo cjiari̧ go̧ȩpatäremȩrenȩjo̧ȩ. Jabechji̧ na̧ quȩbo go̧ȩpea̧ oa cjia̧ oaiä, jabechji̧ ba chia tjamo̧parȩa̧ oa cjiade ma̧ȩ üdë, eami̧rȩ ano̧ mire go̧ȩparea̧mi̧dëri̧, eami̧rȩ duridëparȩrea̧mi̧dëri̧. Jabechji̧ ja̧di dari̧ japa maearea̧rȩ medo quȩji̧ri̧ pumȩ pio judiro̧, perso quȩji̧ri̧ pumȩ pio judiro̧borë. Ado pio ju̧i̧iä na̧ quȩbo cjiari̧ go̧ȩpajo̧ȩ chiriräpȩti̧ oa cjo̧ro̧ji̧ri̧ pio judiro̧ chjadëri̧ dabapea̧ oa, 'aja̧, chiri ütë cjo̧ro̧mȩ pio judi go̧ȩpea̧ duri maeadida, jiadarea̧mi̧dëdida' quëna̧ jo̧rȩtapea̧ oa —yo̧ji̧ri̧rȩ yo̧a̧diro̧jo̧ȩ ütë oa, Da̧de pio ju̧i̧ aechide yo̧tämi̧ cjiaji̧ri̧ pio judiro̧.

⁹ Ado chiri ütë cjo̧ro̧mȩ pio judi pio ji̧ri̧iä ta̧rëa̧ oaiä, 'jabechji̧ ja̧di dari̧ japapea̧ üdë chjadëdida' quëna̧ jo̧rȩta̧ oaiä, jabechji̧ Dario pio judi go̧ȩpe cji̧därëremȩdejȩ ma̧ȩ oa, jibëa̧ quȩbo cjiari̧. 'Aja̧, pio jiro ma̧ȩ üdë ta̧rëdiäpea̧dida, jiadarea̧mi̧dëdida' quëna̧pea̧ oa, quȩbo cjiari̧ go̧ȩpe cji̧därëremȩdejȩ ütëbodärärë ta̧rëdiäpea̧ oa.

¹⁰ Jabo Da̧de judi pio jiro ma̧ȩ pio ju̧i̧ chjiari ta̧rëa̧räbo, chiri ütë cjo̧ro̧mȩ pio ju̧i̧ ja̧ quȩbo cjiari̧ go̧ȩpea̧ pio ju̧i̧ chjiari ta̧rëa̧räbo, jabechji̧ baärëremȩde jibëa̧ bëräpȩ. Ado go̧düdärä ëte, areië cji̧däa̧dejȩ darea̧ joë ya oa jo̧ tjo uëräpȩ ju̧ri̧, jënȩ mo̧a̧mȩ jo̧ tjoräpȩ ju̧ri̧. Aja̧, Jerucharȩräpȩmo̧ cjiamȩ darea̧ joë ya oa areia̧dejȩ. Ja̧dëa ji̧ jënȩ tjarari̧ co do nö̧ta ji̧dë ma japariärërea̧mi̧ ju chatura̧ cjiadärärëremȩde darea̧ joë ya dëbëräpȩ ju̧ri̧ Ütë tjamo̧ pio ju̧i̧ ni̧bäpea̧ oa, pio ju̧i̧ chjacjiamȩri̧ ni̧bäpea̧ oa.

¹¹ Ja̧dëa ji̧ Da̧de pio ju̧i̧iäpȩmo̧ aechide yo̧tämi̧ cjiaji̧ri̧ pio judiro̧ jabërä ni̧bä chjaoa̧ oaiä, jabechji̧ go̧düdäräa̧dirȩ jibëa̧ bëräpȩ. 'Jabechji̧ jibëa̧ Ütë oa tjarari̧ co do nö̧ta ni̧bädiji̧da' quëna̧ dabaji̧ri̧rȩ go̧düdäräa̧dirȩ. Ado dëdë, Ütë tjamo̧ pio ju̧i̧iäpȩmo̧ ni̧bämȩ oa irä daea̧diro̧jo̧ȩ, jibëa̧ Ütë oa chacjiamȩri̧ ni̧bämȩ oa.

¹² Ado pio ju̧i̧ irä daea̧ ëte, chjaodëri̧ jäeno̧a̧dirȩ chiri ütë cjo̧ro̧mȩ pio ju̧i̧iäpȩ Da̧de pio ju̧i̧ chjiari ma̧ȩ yürüpea̧ oa. Ado ütë pio ju̧i̧iäpȩ go̧düdäräa̧ji̧ri̧rȩ ja̧di ta̧rëri̧ yo̧a̧diro̧jo̧ȩ: —Danȩ ütë, ¿ma̧ȩ ba chia oa na̧ quȩbo cjiari̧ go̧ȩpea̧ oa cjiadëde? Pumȩ judiro̧ ütëbodärärë 30 do nö̧ta pio mȩaiäpȩmo̧ ma ni̧bäpea̧ pio ju̧i̧ chjiari, ado cja̧rȩmo̧ ütë oa ni̧bädëpea̧ pio ju̧i̧ chjiari ¿go̧ȩpea̧ oa cjiadëde? Ado eami̧ pumȩ judi pio jiro ma̧ȩ oa ta̧rëdiädërä judi, pa̧rȩmȩrȩ cjo̧ro̧mȩ puëräpȩ aeno̧pea̧ maeade yo̧mȩ ma̧ȩ pio ju̧i̧ ¿go̧ȩpe cji̧dädëa̧nȩ? —iëno̧ë ta̧rëa̧diro̧jo̧ȩ. Ado chiri ütë cjo̧ro̧mȩ pio judi dëbë yo̧a̧dejȩrȩ: —Dë, ca̧ quȩbo cjiari̧ go̧ȩpe cji̧däa̧ oa cjiade duridëparȩrea̧mi̧dëri̧, ano̧ mire go̧ȩparea̧mi̧dëri̧ —dëbë yo̧a̧dejȩrȩ—. Jabechji̧ ja̧di maeari̧ japarea̧rȩ medo quȩji̧ri̧ pumȩ pio judiro̧, ado perso quȩji̧ri̧ pumȩ pio judiro̧borë. Aja̧, ano̧ mire go̧ȩparea̧mi̧dëri̧ go̧ȩpe cji̧därea̧rȩ —dëbë yo̧a̧dejȩrȩ chiri ütëmȩ judi.

¹³ Ja̧dëa ji̧ judiro̧ ütë pio ju̧i̧ a̧de ni̧bä chjaoji̧ri̧rȩ ja̧di ta̧rëri̧ yo̧a̧diro̧jo̧ȩ: —Danȩ ütë, pio jiromȩ üdë, Da̧de quȩmȩ pio judi, Juda quȩmȩ chiriri pio judiri no̧mȩ tjamo̧ri ja̧ baë goa ma̧na̧rërea̧ pio judi a̧dë jo̧rȩtadimȩ —yo̧a̧diro̧jo̧ȩ—. Jabechji̧ mȩnȩ go̧ȩpe cji̧däa̧ ma̧ȩ pio ju̧i̧ jiadadejȩ. Jabechji̧ pio mȩaiäpȩmo̧ ma̧ ni̧bätärea̧ ji̧, jibëa̧ Ütë pio ju̧i̧iäpȩmo̧ ni̧bädëtärea̧ ji̧, cjäri̧ made, jënȩ japariärërea̧mi̧ ni̧bädejȩ tjarari̧ co do nö̧ta —yo̧a̧diro̧jo̧ȩ.

¹⁴ Ado chiri ütë cjo̧ro̧mȩ judi pio ju̧i̧ ta̧rëa̧ oaiä gito ana̧ri̧ jo̧rȩtamȩpea̧de. Ado do yoa ana̧ri̧ jo̧rȩte cjiatarëremȩde Da̧de pio ju̧i̧ chjadëri̧ a̧dopea̧ oa, pio ju̧i̧ chjadëri̧ chjätärea̧ yürüpea̧ oa, judi ma̧ȩ oa jiada̧ oaiä bape chjaoa̧ oa cjiachea oa. Jabechji̧ do üdë bira̧rä yuro ana̧ri̧ jo̧rȩtarëremȩde pio ju̧i̧ chjiari tuti japarea̧ dapea̧ oa. Jabo cjäri̧ made, eami̧ oa japarea̧ dadëa̧de ma̧ȩ üdë go̧ȩpea̧ oa cjia tara, judi ma̧ȩ oaiä yura̧ oa cjiami̧ dari̧ cjiaremȩ tara.

¹⁵ Ado ja̧dëa ji̧ gȩnȩpea̧rä, ado goëdepea̧diro̧jo̧ȩ ütë oa, Da̧de pio ju̧i̧ eadëji̧ri̧ pio judiro̧. Ado yo̧a̧diro̧jo̧ȩ: —Ibëa̧ ütë, chjadëri̧ dabarenȩ quȩbo cjiari̧ go̧ȩpea̧ oa cjiamȩ ma̧ȩ pio ju̧i̧ chjiari —yo̧a̧diro̧jo̧ȩ—. Jabechji̧ ano̧ mire go̧ȩparea̧mi̧dëde. Jabechji̧ medo quȩji̧ri̧ pumȩ pio judiro̧, ado perso quȩji̧ri̧ pumȩ pio judiro̧borë go̧ȩpe cji̧däa̧ oa goarä, quȩbo cjiari̧ go̧ȩpea̧ oa cjiarä, jabechji̧ ano̧ mire go̧ȩparea̧mi̧dëde, ado jiadarea̧mi̧dëde peaja̧di. Ado pio ju̧i̧iä Da̧de pio ju̧i̧ pa̧rȩmȩrȩ cjo̧ro̧mȩ puëräpȩ aeno̧pea̧de —yo̧ji̧ri̧rȩ yo̧a̧diro̧jo̧ȩ chiri ütëmȩ ju̧i̧.

¹⁶ Ja̧dëa ji̧ japamitë chjätä ëte, chiri ütë cjo̧ro̧mȩ judi Da̧de pio ju̧i̧ ja̧bo tänȩdëri̧ cjiamȩborë, yo̧ chjadüa̧dejȩrȩ jibëa̧ guadia ji̧ri̧ Da̧de pio ju̧i̧ mitëtä pa̧rȩmȩrȩ cjo̧ro̧mȩ puëräpȩ aeno̧a̧ oa cjiapea̧ oa. Jabo jabë aeno̧a̧ oa cjiadëa̧rä, chiri ütë cjo̧ro̧mȩ pio judi yo̧a̧dejȩ Da̧de ju̧i̧: —Danȩ Da̧de, na̧ Ütë pio judi, mȩnȩ ji̧dë ma chjadëri̧ ja̧bepë yürüa̧ Ütë pio judi chjadëri̧ go̧dürea̧ yürütädimȩ —yo̧a̧dejȩ.

¹⁷ Ja̧dëa ji̧ guadia judiro̧ Da̧de pio ju̧i̧ pa̧rȩmȩrȩ cjo̧ro̧mȩ puëräpȩ idë cürëa̧diro̧jo̧ȩ. Ado pueräpȩ aeno̧a̧ oa cjiarä, chjuari̧ tuti cara̧diro̧jo̧ȩ joë ya oa ta̧dë ana̧ra̧. Ado ja̧dëa ji̧ ütë pio judi jibëa̧ ichi chaärea̧ra̧ acji cjaeäa̧dejȩ. Tjamo̧ davä. Jibëa̧ ichi chaärea̧ra̧, jibëa̧ go̧ȩ chiamȩ ichi chaärea̧ra̧ acji cjaeäa̧dejȩ. Ado judimo̧rȩdë jabo pio jȩa chi̧dëeaji̧ri̧ pio judiro̧borë acji cjaeäa̧diro̧jo̧ȩ jibëa̧ ichi chaärea̧ra̧. Jabechji̧ Da̧de pio judi chjadëri̧ bape chjaoa̧ oa cjiapea̧ oa, ado Dario quȩmȩ ütë pio ju̧i̧ ja̧ ma̧ȩ üdë jiada̧ oa cjiachea oa, ado eami̧ pumȩ üdë Da̧de pio ju̧i̧ go̧dü tänȩrea̧ jo̧rȩtachea oa, jabechji̧ acji cjaeäa̧diro̧jo̧ȩ.

¹⁸ Ado ja̧dëa ji̧ ütë judi ado chjereno̧ baärëremȩde jënȩ cjo̧ro̧mȩräpȩ, chiri ütëmȩrȩ cjo̧ro̧rea̧ bëräpȩ. Jabo cjäri̧ made jabo, judi gȩnȩrä juratärea̧ ji̧, juradërëremȩde jabo jiada̧dejȩ jurarea̧ oa. Ado judi ji̧dë ma japariärërea̧mi̧ japatärea̧ ji̧, pio jȩa goaeri̧ da tänȩji̧ri̧ pio ji̧ri̧ japa tänȩtärea̧ ji̧, cjäri̧ madejȩrȩ, japarea̧ yürüdëa̧dejȩrȩ, jabo gȩnȩ yoa ana̧ri̧ jo̧rȩtamȩrȩ jo̧rȩtarëremȩdejȩ Da̧de pio ju̧i̧, mo̧a̧rea̧ dadëmȩrȩ.

¹⁹ Ja̧dëa ji̧ dopea̧rä, peadai̧ tjamo̧ro, ütë pio judi chjaodëri̧ jäeno̧a̧de pa̧rȩmȩrȩ cjo̧ro̧mȩ puëräpȩ.

²⁰ Ado ju̧ri̧pȩ go̧düdäräa̧rä, gito ana̧ri̧ jo̧rȩtamȩrȩ ëna̧diäa̧de bücjüri̧ cjia tjamo̧mȩrȩ. —Da̧de, tjamo̧ri̧ cjo̧ro̧mȩ Ütë pio ju̧i̧ ja̧ mu̧i̧tjoi̧ oa ëna̧diärequedemȩ —yo̧a̧dejȩ—. Danȩ, ¿na̧ Ütë judi pio mȩa chjiari tuti japadëa̧dimȩ? Pa̧rȩmȩrȩ mȩa jurachea oa chjätärea̧ yürüdëa̧dimȩ? Mȩnȩ ji̧dë ma chjadëri̧ ja̧bepë yürüa̧ Ütë pio judi, mȩnȩ ji̧dë ma ta̧rëdiäa̧ Ütë pio judi chjätärea̧ yürüdëa̧dimȩ? —iëno̧ë ta̧rëmȩrȩ ëna̧diäa̧dejȩ.

²¹ Ado Da̧de judi dëbë yo̧a̧dejȩ: —Ca̧ ütë, bucho ana̧ ütëmȩrȩ cjo̧ro̧tärenȩ —yo̧a̧dejȩ—.

²² Danȩ, Ütë tjamo̧ pio judi tuti chjadüa̧dejȩ jibëa̧ mu̧i̧tjoi̧ oa parȩmȩ ja̧ ya oa chjuari̧ tuti carapea̧ oa, judiro̧ pio coa eami̧ oa japachea oa. Jabechji̧ Ütë tjamo̧ judi tjamo̧ri̧ dabade pio coa chjiari. Jabechji̧ eami̧ chjai̧dë oa japadëa̧reconȩ. Ado pio mȩaiäpȩmo̧ peaja̧di eami̧ chjai̧dë oa japadëa̧requedemȩ ca̧ ütë —dëbë yo̧a̧dejȩ.

²³ Ado ütë judi Da̧de ja̧ ma̧ȩ oa ta̧rëa̧ oaiä ma̧ chiadëri̧ cjia tjamo̧pea̧de. Ado chjaodëri̧ yo̧a̧dejȩrȩ jibëa̧ mu̧i̧tjoi̧ ji̧ri̧ Da̧de pio ju̧i̧ mu̧i̧ go̧dü tänȩtä puëri pio judiri, ta̧dë cjara urëdi tjamo̧ri pio judiri. Ado parȩmȩ judiro̧ pio ju̧i̧ chjaodëri̧ juratärea̧ ji̧, jabechji̧ eami̧ oa japadëa̧diro̧jo̧ȩ. Jabechji̧ chjadëri̧ chjätärëremȩde Da̧de judi, parȩmȩ judiro̧ ivëra̧ jabëtari̧mi̧ coaria̧ oa cjiarea̧ decjiari̧.

²⁴ Ado ja̧dëa ji̧ ütë judi järipea̧mȩrȩ yo̧a̧dejȩrȩ jibëa̧ guadia ji̧ri̧ ano̧ mire mitëtä Da̧de pio ju̧i̧iäpȩmo̧ quëbaji̧ri̧rȩ aechide yo̧reji̧ri̧ pio ji̧ri̧. Ado pio ji̧ri̧ mitë ëte, aeno̧a̧diro̧jȩrȩ pa̧rȩmȩrȩ cjo̧ro̧mȩ puëräpȩ. Jabo pio ji̧ri̧mo̧i̧ aeno̧dëa̧diro̧jȩrȩ jabo jibëa̧ ivi pio ji̧ri̧bo, jibëa̧ bori̧bo. Ütëbo oa idë cürëa̧diro̧jȩrȩ uapai̧ da tjamo̧räpȩ. Ado judiro̧ ta̧dë cjara ëteräpȩ jabë cjatädärädëa̧rä, pa̧rȩmȩ judiro̧ ma̧i̧ da chjuaji̧ri̧rȩ mu̧i̧ mu̧i̧ quira̧diro̧jȩrȩ ji̧ri̧ ja̧ icjara oa pënȩ mape bagarea̧mi̧ dari̧, icjara codëdëpe bagarea̧mi̧ dari̧.

²⁵ Ja̧dëa ji̧ chiri ütë cjo̧ro̧mȩ judi, Dario pio judi pio yoa ma̧ȩ oa go̧ȩpe chjadürëremȩdejȩrȩ jibëa̧ chja̧oerä cjo̧ro̧ji̧ri̧ pumȩ pio ji̧ri̧. Ja̧di ta̧rëri̧ go̧ȩpea̧ oa cjiamȩ ma̧ȩ oa go̧ȩpe chjadürëremȩdejȩrȩ go̧ȩ irä: —Aja̧ ca̧ pumȩ, jearea̧ chjadürequededibe ütëbodärä oa, chiriräpȩti̧ oa cjo̧ro̧ji̧ri̧ pio ji̧ri̧. Aja̧, ado cja̧rȩmo̧ ma̧ȩ oa ni̧bäji̧ri̧ oa, ado cja̧rȩmo̧ chiriräpȩ cjo̧ro̧ji̧ri̧ oa, ado cja̧rȩmo̧ taru ëbaji̧ri̧ oa jȩarea̧ chjadürequededibe. Jabechji̧ chjadëri̧ cjo̧ro̧tä eamȩrȩ jearea̧ chjadürequededibe mȩnȩro̧ chjai̧dë oa chjätädëji̧ri̧rȩ cjo̧ro̧tä, mȩnȩro̧ jabëdiärea̧ decjiari̧ goaji̧ri̧rȩ cjo̧ro̧tä.

²⁶ Danȩrȩ ca̧ pumȩ, ca̧ chja̧oerä cjo̧ro̧ji̧ri̧ judiro̧ ütëbodärä oa i ma̧na̧ga järi̧ uapaji̧ri̧rȩ ba chia jo̧rȩtatä earequededibe Da̧de pio ju̧i̧ ja̧ Ütë oa, pio ju̧i̧iäpȩmo̧ chjacjiamȩri̧ ni̧bäji̧ri̧rȩ. Jabechji̧ pio judi tjamo̧de tjamo̧ri̧ cjo̧ro̧mȩ Ütë judi. Pio judi tjamo̧de bucho ana̧ cjo̧ro̧mȩ Ütë judi, yuroparea̧ decjiamȩrȩ. Ado jënȩ a̧dë chjäte Ütërë yo̧a̧ chja̧oerä cjo̧ro̧rea̧ üdë goarijädëpade. Jabechji̧ ado cja̧rȩmo̧rȩ boadärärea̧mi̧dëri̧ cjiapade bucho ana̧ chiri Ütëmȩrȩ.

²⁷ Aja̧, pio judi tjamo̧de jibëa̧ pumȩ pio ji̧ri̧ chjiari tuti japamȩ judi judiro̧ ma̧i̧ da chjai̧dë oa chjätächea oa. Aja̧, chjadëri̧ chjätärea̧ yürüdejȩrȩ. Jabechji̧ jauëchja cjiari̧ na̧rȩmȩrȩ japamȩde a̧dëräpȩ ju̧ri̧, pio yoa chiribo. Ado danȩrȩ ca̧ pumȩ, mȩnȩro̧ dabadëchea oa yo̧requededibe. Pio judi chjadëri̧ go̧dü tänȩa̧dejȩ Da̧de pio ju̧i̧. Jabechji̧ pa̧rȩmȩ judiro̧ pio ju̧i̧ chjaodëri̧ ja̧bo tänȩtärea̧ ji̧, cjäri̧ madiro̧jo̧ȩ, eami̧ oa japarea̧ dadëa̧diro̧jo̧ȩ Ütë tjamo̧ pio judi chjadëri̧ chjätärea̧ yürüa̧ tara. Ado pio ju̧i̧iä i ma̧na̧ga järi̧ uapaji̧ri̧rȩ ba chia jo̧rȩtatä earequededibe pio ju̧i̧iäpȩmo̧ —yo̧mȩrȩ go̧ȩpe chjadürëremȩde Dario judi chiriräpȩti̧ oa cjo̧ro̧ji̧ri̧ pumȩ pio ji̧ri̧iäpȩmo̧, jibëa̧ chja̧oerä cjo̧ro̧ji̧ri̧ pumȩ pio ji̧ri̧iäpȩmo̧.

²⁸ Ado Da̧de judi ji̧dë u̧i̧ ba chia oa ja̧bepamȩrȩ chjadëri̧ cjo̧ro̧rëremȩde Dario pio judi chiri ütëmȩrȩ cjo̧ro̧a̧ nö̧ta. Ado Chiro quȩmȩ pio judiborë chiri ütëmȩrȩ cjo̧ro̧a̧ nö̧ta, Pechia quȩmȩ chiriräpȩ ju̧ri̧ chiri ütëmȩrȩ cjo̧ro̧a̧ nö̧ta, peaja̧di chjadëri̧ cjo̧ro̧rëremȩde Da̧de judi.