Da̧de 5 - Biblia Pume

Ütë tjamo̧ judi go̧ȩparëremȩde jo̧tjo tuti a̧rȩmȩ pjatërä

¹ Ui ji̧ra̧ tjamo̧ chjätä ëte Nabucodonocho judi ja̧boa̧ duri oa, pio ju̧i̧rea̧ ja̧ joja pio judi, Bechacha quȩmȩ pio judi ano̧ mire chiri ütë cjo̧ro̧mȩpea̧de Babironiaräpȩ. Ado ja̧dëa ji̧ ado cja̧rȩmo̧ doremȩrä, pio judi a̧dopa tänȩrëremȩdejȩrȩ pio jȩa chi̧dëeaji̧ri̧ pio ji̧ri̧, pio jȩa nö̧ta ëba ja̧bepaji̧ri̧ pio ji̧ri̧. Aja̧, pio ji̧ri̧ nö̧ta airi̧ cjia airi̧ cjia ëba jurapea̧ oa, a̧dopa tänȩa̧dejȩrȩ. Ji̧ra̧ tjamo̧ oa a̧dopa tänȩa̧dejȩrȩ, mil pumȩ ji̧ra̧ oa, buba oa. Ado bino quȩmȩ ërü gito ji̧ra̧ oa ëba jararëremȩdejȩrȩ.

^2-3 Ado Bechacha judi a̧dë chjäte ji̧ra̧ oa jara̧ oaiä, ma̧ chiadëri̧ cjiamȩrȩ yo̧a̧dejȩrȩ jibëa̧ mu̧i̧tjoi̧ ji̧ri̧ ado cja̧rȩmo̧ ae jararea̧ oa goa jana̧tä boearea̧ jo̧ tjori pio judiri. Jabechji̧ jibëa̧ yaboi̧ ütëremȩ pio judi, jäjäarea̧ judi, Nabucodonocho pio judi no̧mȩ tjamo̧ri ja̧ Jerucharȩ bë ma̧ri̧ri pio judiri baë goa ma̧na̧rërea̧ ae jararea̧ pio ju̧i̧, Ütë tjamo̧ ja̧ bëri pio judiri baë goa ma̧na̧ pio ju̧i̧ goa jana̧tä yo̧a̧dejȩrȩ. Aja̧, goa jana̧tä yo̧a̧dejȩrȩ jibëa̧ mu̧i̧tjoi̧ ji̧ri̧ orora̧ ado paratara̧ japea̧ aejararea̧ pio ju̧i̧. Jabechji̧ pio jiro aejararea̧ra̧ ano̧ mire ëba jaratämi̧ cjiarëremȩdejȩrȩ jȩa chi̧dëeaji̧ri̧ pio ji̧ri̧ nö̧ta, jibëa̧ ivi pio ji̧ri̧ nö̧ta, ado jënȩ a̧de ëba̧ ivi pio ji̧ri̧ nö̧ta peaja̧di. Aja̧, ëba jaratämi̧ cjiarëremȩdejȩrȩ judiro̧ Icharaita ja̧ Ütë pio ju̧i̧ badë jo̧rȩtapea̧ oa, 'ibëa̧ ütë judi Juda pio judiri ja̧ji̧ri̧ ja̧ ütë pio ju̧i̧ u̧i̧ ba chiadida' quëna̧ jo̧rȩtaji̧ri̧rȩ jarapea̧ oa. Ado ja̧dëa ji̧ mu̧i̧tjoi̧ judiro̧ pio jiro ae jararea̧ oa goa jana̧rä, jabechji̧ ano̧ mire jaraji̧ri̧pea̧dirȩ pio jiro aejararea̧ra̧, Ütë tjamo̧ ja̧ bëräpȩrëremȩ ae jararea̧ra̧. Tjamo̧ davä. Chiri ütë cjo̧ro̧mȩ pio judi, ado jȩa chi̧dëeaji̧ri̧ pio judiro̧, ado ütë ja̧ ivi pio jini̧ro̧, ado judi a̧de ëba̧ ivi pio jini̧ro̧borë pio jiro ae jararea̧ra̧ jaraji̧ri̧pea̧dirȩ.

⁴ Ado ërü oa jaraji̧ri̧rȩ a̧dopea̧ oaiä, ërü oaiä boa̧ oa cjiaji̧ri̧rȩ jara̧ oaiä, jabechji̧ chjacjiamȩri̧ ni̧bärëreji̧ri̧diro̧jȩrȩ jibëa̧ ütë pio ji̧ri̧, pumȩrȩ jëdano̧a̧ ütë pio ji̧ri̧iäpȩmo̧. Aja̧, chacjiamȩri̧ ni̧bäa̧diro̧jȩrȩ china̧chjari̧ tutia̧ oa cjiaremȩ aejararea̧ra̧. Tjamo̧ davä. Ütë tjamo̧ pio ju̧i̧iäpȩmo̧ ma chjacjiamȩri̧ jo̧rȩtapea̧ oa china̧chjari̧ tutia̧ oa cjiarërea̧ aejararea̧ra̧ pio ju̧ri̧ra̧ jaraji̧ri̧rȩ chjacjiamȩri̧ ni̧bäa̧diro̧jȩrȩ jibëa̧ ütë pio ji̧ri̧. Orora̧ jëdano̧a̧ ütë pio ji̧ri̧iäpȩmo̧, paratara̧ jëdano̧a̧ ütë pio ji̧ri̧iäpȩmo̧, boro̧chera̧ jëdano̧a̧ ütë pio ji̧ri̧iäpȩmo̧, ierora̧ jëdano̧a̧ ütë pio ji̧ri̧iäpȩmo̧, ado tora̧ jëdano̧a̧ ütë pio ji̧ri̧iäpȩmo̧ chjacjiamȩri̧ jo̧rȩtaji̧ri̧rȩ ni̧bäa̧diro̧jȩrȩ, Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtapea̧ aejararea̧ra̧.

⁵ Jabo judiro̧ eami̧ oa dadërërea̧ ji̧, chjaodëri̧ daea̧diro̧jo̧ȩ pumȩ ja̧ ichi oa, jibëa̧ ma̧na̧ri̧ baramȩ oa, tataparea̧ chiamȩ to queri̧räpȩ ju̧ri̧. Pumȩ icjarari ja̧dëmȩ ichi oa daea̧diro̧jo̧ȩ jo̧tjo tuti a̧rȩmȩ pjatërä go̧ȩpamȩ oa, chiri ütë cjo̧ro̧mȩ ja̧ bëräpȩ ju̧ri̧. Tjamo̧ davä. Jo̧tjo tuti a̧rȩmȩ pjatërä go̧ȩpamȩ oa, bërëbërëa̧ra̧ joa oa cjiamȩ tuti a̧rȩmȩ pjatërä go̧ȩpamȩ oa daea̧diro̧jo̧ȩ. Ado chiri ütë pio judiborë irä daea̧dejȩ ichi oa baramȩ oa, jibëa̧ ma̧na̧ri̧ go̧ȩpamȩ oa.

⁶ Ado uapea̧ üdë chjaodëri̧ boadäräeno̧a̧dejȩ jibëa̧ chji̧ oa, jibëa̧ chamacho üdë bërebëreai̧ mape bagari̧, goe decjiape bagami̧ dari̧. Ado pio ju̧i̧iä jibëa̧ ju chatu üdë, jibëa̧ yai ju oa i ma̧na̧gura cjiamȩpea̧de. Ado ju baibaiape baga̧ oaiä, ju chiadëpe baga̧ oaiä, jabechji̧ cjiarea̧mi̧dëpe baga̧de.

⁷ Ado ja̧dëa ji̧ ütë judi to̧bari̧ ëna̧diäa̧dejȩrȩ jauëchja cjiari̧ japarea̧ dabaji̧ri̧ pio ji̧ri̧. Tjamo̧ davä. Chjai̧dë üdë ma̧na̧na̧ra̧rä to̧je tuti go̧a̧rea̧ chiaji̧ri̧ pio ji̧ri̧, büë oa ütararea̧ dabaji̧ri̧ pio ji̧ri̧, ado yo̧to̧ dabarea̧ chiaji̧ri̧ pio ji̧ri̧, yo̧mirerea̧ dabaji̧ri̧ pio ji̧ri̧ jana̧tä yo̧ chjadüeno̧a̧dejȩrȩ. Ado Babironiaräpȩ dabarea̧ chiaji̧ri̧ pio judiro̧ go̧düdäräa̧rä, ja̧di ta̧rëri̧ yo̧a̧dejȩrȩ: —Danȩrȩ, eami̧ pumȩ üdë pio jiro go̧ȩpea̧ ma̧ȩ oa chjadëri̧ go̧ȩ ni̧bärea̧ dabarä judi, ichi üdë jo̧tjo tuti a̧rȩmȩ pjatërä go̧ȩpea̧ ma̧ȩ oa chjadëri̧ goë ni̧bärea̧ chiarä judi, pio coa chjadëri̧ daba tänȩpea̧ goë ni̧bärea̧ chiarä judi, jabechji̧ ba chia tjamo̧parȩpareconȩ —yo̧a̧dejȩrȩ—. Jabechji̧ ina̧rea̧ coëcoëa ba chiara̧ ina̧ tänȩpareconȩ pio cüdëmi̧ dari̧. Ado orora̧ japea̧ chatu chiamȩ i̧a̧rea̧ ba chiara̧ i̧a̧ tänȩpareconȩ peaja̧di. Ado pio ju̧i̧ uëri chiri ütë cjo̧ro̧ tänȩpareconȩ. Jabo pio coa nö̧tadëpadique, ado ca̧ jadü pio ju̧i̧bo nö̧tadëpadejȩ, jabo dëdë chiri ütë cjo̧ro̧ tänȩpareconȩ, ja̧beparea̧ ba chia oa yürümȩrȩ —yo̧mȩrȩ yo̧a̧dejȩrȩ dabarea̧ chiaji̧ri̧ pio ji̧ri̧.

⁸ Jabo dabarea̧ chiaji̧ri̧ pio judiro̧ ütëborë go̧düdäräa̧räbo, cjäri̧ madirȩ, jaboti̧ri̧ cja̧rȩmȩrȩ jo̧tjo tuti a̧rȩmȩ pjatërä go̧ȩpea̧ ma̧ȩ oa go̧ȩ ni̧bärea̧ dadëa̧diro̧jo̧ȩ. Ichi maearë go̧ȩpea̧ ma̧ȩ pio ju̧i̧ goë ni̧bärea̧ dadëa̧diro̧jo̧ȩ. Jabechji̧ go̧ȩpea̧ ma̧ȩ üdë, 'Aja̧, pio ju̧i̧ yo̧diibëda' quëna̧ dabatärea̧ ji̧, dabarea̧ dadë marëreji̧ri̧dirȩ.

⁹ Ado pio ju̧i̧iä chiri ütë cjo̧ro̧mȩ pio judi ji̧dë u̧i̧ uapamȩpea̧de, chamacho üdë ji̧dë u̧i̧ bërebëreai̧ mape bagari̧. Ado pio jȩa nö̧ta ëba ja̧bepaji̧ri̧ pumȩ judiro̧, chi̧dëeaji̧ri̧ pio judiro̧ peaja̧di ana̧ri̧ jo̧rȩtaji̧ri̧pea̧dirȩ, chji̧ goae tjamo̧dëra̧ jo̧rȩtaji̧ri̧pe bagari̧.

¹⁰ Jabo ütë pio ju̧i̧ arayi̧ pio jini̧ ichi maearë go̧ȩpea̧ ma̧ȩ pio ju̧i̧ chjiari ta̧rëa̧rä, chjaodëri̧ jäeno̧a̧nȩ a̧doparea̧ jo̧ tjoräpȩ. Ado yo̧a̧nȩjȩ joja oa, Bechacha pio ju̧i̧iäpȩmo̧: —Bucho ana̧ cjo̧ro̧tänȩ ca̧ ütë —yo̧a̧nȩjȩ—. Danȩ, mȩnȩ pea daea̧ pio ju̧i̧iä uapadëtäremȩrenȩ —yo̧a̧nȩjȩ—. Chamacho bërebëreai̧ mape bagari̧ jo̧rȩtadëtäremȩrenȩ.

¹¹ Jabechji̧ cja̧rȩmȩ üdë cjo̧ro̧de na̧ chja̧oerä. Ado judi dabarea̧ chiamȩde, jabechji̧ a̧ro̧rȩ quëna̧ ütë pio ji̧ri̧ ja̧ dabarea̧ chiamȩde. Aja̧, a̧ro̧rȩ quëna̧ ütë pio ji̧ri̧ ja̧ tjo pio ju̧i̧ chiamȩde. Ado danȩ, na̧ ama̧i̧rea̧ Nabucodonocho pio judi ütëmȩrȩ cjo̧ro̧rërea̧ ji̧, jabechji̧ a̧dë chjäte dabarea̧ chiamȩ oa daea̧ marëreji̧ri̧diro̧jo̧ȩ, urëdi tjamo̧ oa jo̧rȩtarea̧ chiamȩ oa. Ado pio ju̧i̧iä na̧ ama̧i̧rea̧ pio judi tjamo̧ ja̧bepamȩ tänȩrëremȩdejȩ. Dabarea̧ chiaji̧ri̧ judiro̧ ütëborë pio ju̧i̧ ja̧ chja̧oerä ja̧beparea̧mi̧ dari̧ tänȩrëremȩdejȩ. Tjamo̧ davä. To̧jȩ goaji̧ri̧ judiro̧, to̧je tuti goaji̧ri̧ judiro̧, ado büë oa ütararea̧ chiaji̧ri̧ judiro̧, ado yo̧to̧parea̧ dabaji̧ri̧ pio judiro̧, ado yo̧mirerea̧ dabaji̧ri̧ judiro̧, jabechji̧ pio ju̧i̧ ja̧ chja̧oerämo̧ ja̧beparëreji̧ri̧dirȩ.

¹² Pio jiro üi̧ üdë Da̧de quȩmȩde, jabo na̧ ama̧i̧rea̧ pio judi Betacha quȩra̧ ano̧ mire quȩparëremȩdejȩ. Aja̧, pio judide. A̧dë chjäte dabarea̧ chiamȩde. O ji̧ri̧iä ji̧dë u̧i̧ dabarea̧ chiade. Jabomo̧ uëmo̧ uëmo̧ jo̧rȩtami̧ dari̧ jo̧rȩtadëmȩde, jabo urëdi tjamo̧ oa jo̧rȩtamȩde eami̧ oa tjamo̧ri̧ dabapea̧ oa. Ado pio ju̧i̧iä pumȩ judiro̧ canȩjäa̧ pio ju̧i̧ chjiari dabamȩde. Judiro̧ canȩjäa̧ pio ju̧i̧ chjiari goë ni̧bämȩde. Jabechji̧ dami̧ti̧ oa dabapai̧ dade davä dabarea̧mi̧dëmȩ pio ju̧i̧ chjiaribo. Goadia̧ oa cjiami̧ dari̧ cjiamȩ ma̧ȩ pio ju̧i̧ chjiaribo dabarea̧ chiamȩde. Ado pio ju̧i̧iä jabechji̧ na̧ mu̧i̧tjoi̧ pio ju̧i̧iä yo̧ chjadütäremȩrenȩjo̧ȩ Da̧de pio ju̧i̧, judi mȩa chjadëri̧ daba tänȩpea̧ oa ichi üdë jo̧tjo tuti a̧rȩmȩ pjatërä go̧ȩparërea̧ ma̧ȩ pio ju̧i̧ chjiari —yo̧yi̧rȩ yo̧rëreyi̧nȩjȩ jojini̧ jini̧ chiri ütë cjo̧ro̧mȩ pio ju̧i̧iäpȩmo̧, Bechacha quȩmȩ pio ju̧i̧iäpȩmo̧.

Da̧de judi daba tänȩrëremȩdejȩ Bechacha oa ichirë go̧ȩpea̧ ma̧ȩ pio ju̧i̧ chjiari

¹³ Ado Bechacha judi arayi̧ pio ji̧iä ta̧rëa̧ oaiä, chjadüa̧dejȩrȩ jibëa̧ mu̧i̧tjoi̧ ji̧ri̧ Da̧de pio ju̧i̧ ëba jana̧pea̧ oa. Ado ja̧dëa ji̧ judiro̧ Da̧de pio ju̧i̧ nö̧ta ütë ja̧ dëbëräpȩ go̧düdäräa̧rä, ja̧di ta̧rëri̧ yo̧mȩrȩ iëno̧ë ta̧rëa̧dejȩ: —Danȩ, ¿Da̧de quȩmȩ pio judidënȩ? Ca̧ ama̧i̧rea̧ Nabucodonocho pio judi Juda quȩmȩ chiriri pio judiri ëba ma̧na̧rërea̧ pumȩ ¿pio judidënȩ? 'Aja̧, pio judi jirodida' quëna̧ jo̧rȩtamȩrȩ darequedemȩ.

¹⁴ Ado danȩ, pio mȩa chjiari ta̧rëa̧requede. "Aja̧, a̧ro̧rȩ quëna̧ ütë pio ji̧ri̧ ja̧ tjo chiamȩde" yo̧a̧ oa ta̧rëa̧requede pio mȩa chjiari. "Pio judi a̧dë chjäte dabarea̧ chiamȩde. Urëdi tjamo̧ oa jo̧rȩtarea̧ chiamȩde chjadëri̧ ütarë jo̧rȩtapea̧ oa" yo̧a̧ oa ta̧rërequede pio mȩa chjiari.

¹⁵ Ado danȩ Da̧de, dabarea̧ chiaji̧ri̧ pio judiro̧ orë, to̧je tuti goarea̧ chiaji̧ri̧ pio judiro̧, dëdë, jana̧dirȩ pio jiro ma̧ȩ pio ju̧i̧ chjadëri̧ go̧ȩ ni̧bäpea̧ oa jabo cjäri̧ madiro̧jo̧ȩ, jo̧tjo tuti a̧rȩmȩ pjatërä go̧ȩpea̧ ma̧ȩ pio ju̧i̧ chjadëri̧ go̧ȩ ni̧bärea̧ dadëa̧diro̧jo̧ȩ. Ado goë ni̧bärea̧ dadëa̧diro̧coe ji̧dëri̧.

¹⁶ Jabo pumȩ pio ji̧ri̧iä ta̧rëa̧requede pio mȩa chjiari. "A̧ja̧, pumȩ judiro̧ canȩjäa̧ pio ju̧i̧ chjiari goë ni̧bärea̧ chiade" yo̧a̧ oa ta̧rëa̧requede. "Tjamo̧ri̧ dabarea̧mi̧dëmȩ pio ju̧i̧bo dabarea̧ chiade" yo̧a̧ oa ta̧rëa̧requede. Ado pio ju̧i̧iä yo̧requedemȩ. Danȩ, mȩnȩ pio jiro ma̧ȩ oa chjadëri̧ go̧ȩ ni̧bärea̧ darä judi, ado go̧ȩpea̧ ma̧ȩ pio ju̧i̧ chjadëri̧ goë ni̧bärea̧ darä judi, pio coa chjadëri̧ daba tänȩrea̧mi̧ dari̧ goë ni̧bärea̧ darä judi, jabechji̧ ba chiaparȩmi̧ dari̧ japaparequedemȩ. Jabechji̧ ina̧rea̧ coëcoëa ba chiara̧ ina̧ tänȩparequedemȩ, mȩnȩ pio cüdëmi̧ dari̧ ina̧ oa cjiapea̧ oa. Ado orora̧ japea̧ i̧a̧rea̧ ba chiara̧ i̧a̧ tänȩjarequedemȩ peaja̧di, chatu chiamȩ i̧a̧rea̧ra̧. Ado pio ju̧i̧ uëri chiri ütë cjo̧ro̧ tänȩparequedemȩ peaja̧di. Jabo pio coa nö̧tadëparenȩque ado ca̧ jadü pio ju̧i̧bo nö̧tadëparenȩ, jabo dëdë, chiri ütë cjo̧ro̧ tänȩparequedemȩ, ja̧beparea̧ ba chia oa yürümȩrȩ —yo̧mȩrȩ yo̧rëremȩdejȩ Da̧de ju̧i̧.

¹⁷ Jabo Da̧de judi dëbë yo̧a̧dejȩ chiri ütëmȩ pio ju̧i̧: —Danȩ ca̧ ütë, mȩnȩ coa yürütärea̧ pio ju̧i̧ jabechji̧ boeajo̧ȩ. Ado boeadëri̧ cjiarä judi, jabechji̧ ado cja̧rȩmo̧ pumȩ pio ju̧i̧iäpȩmo̧ ano̧ mire yürüjo̧ȩ, pio coaiäpȩmo̧ yürütärea̧mi̧. Jabechji̧ eadëreconȩ. Jabo danȩ, cüdë mitëdëräbo, jabechji̧ chjadëri̧ daba tänȩparequedemȩ.

¹⁸ Danȩ ca̧ ütë, a̧dë chjäte Ütë pio judi ütë tänȩrëremȩdejȩ na̧ ama̧i̧rea̧ Nabucodonocho pio ju̧i̧. Jabechji̧ pio judi tänȩa̧ oaiä ju chiamȩ tjamo̧mȩmi̧ dari̧ ütëmȩrȩ cjo̧ro̧rëremȩde, chiriräpȩti̧ oa cjo̧ro̧ji̧ri̧ judiro̧ pio ju̧i̧iäpȩmo̧ ba chia jo̧rȩtarea̧mi̧ dari̧, pio ju̧i̧iäpȩmo̧ chjacjiamȩri̧ ni̧bärea̧mi̧ dari̧.

¹⁹ Jabechji̧ Ütë tjamo̧ judi yürüa̧ oa, a̧dë chjäte ju chia tjamo̧mȩmi̧ dari̧ cjo̧ro̧rëremȩde chiriräpȩti̧ oa cjo̧ro̧ji̧ri̧ judiro̧ uaparea̧mi̧ dari̧. Ado pumȩ judiro̧ ütëbodärärë, ado cja̧rȩmo̧ pumȩ judiro̧, ado cja̧rȩmo̧ ma̧ȩ oa ni̧bäji̧ri̧ judiro̧, ado cja̧rȩmo̧ chiriräpȩ cjo̧ro̧ji̧ri̧ judiro̧, jabechji̧ uape uape jo̧rȩta marëreji̧ri̧diro̧jo̧ȩ. Jabechji̧ jënȩ jo̧rȩta̧mi̧ japarëremȩde. Jënȩ ja̧bo tänȩtämi̧ cjia̧ pio ji̧ri̧ ja̧bo tänȩrëremȩdejȩrȩ. Ado jënȩ cjo̧ro̧ tänȩtämi̧ cjia̧ pio ji̧ri̧ cjo̧ro̧rea̧ yürürëremȩdejȩrȩ. Ado jënȩ ba chiaparȩtämi̧ cjiaji̧ri̧ pio ji̧ri̧ ba chiaparȩrëremȩdejȩrȩ. Ado jënȩ idëri̧ cjia tänȩtämi̧ cjia̧ pio ji̧ri̧ idëri̧ cjia tänȩrëremȩdejȩrȩ.

²⁰ Jabo cjäri̧ made, na̧ ama̧i̧rea̧ judi jibëa̧ chji̧rämo̧ jo̧rȩtatamȩpea̧rä, 'Aja̧, pio cüdëmo̧rȩ ba chiaquëda, chja ja̧di pio cüdë jo̧rȩta̧mi̧ japapai̧ daquëda' quëna̧ jo̧rȩtamȩpea̧rä, jabechji̧ Ütë tjamo̧ pio judi ütë cjatä tänȩrëremȩdejȩ. Ado ütëborë pio ju̧i̧iäpȩmo̧ ba chia jo̧rȩtarërea̧ ji̧, pio ju̧i̧iäpȩmo̧ chjacjiamȩri̧ ni̧bärërea̧ ji̧, cjäri̧ madiro̧jo̧ȩ, ba chia dadëji̧ri̧pea̧diro̧jo̧ȩ, Ütë tjamo̧ pio judi tänȩa̧ oaiä.

²¹ Ado judi pumȩ ja̧ chjarerä cjo̧ro̧rërea̧ ji̧, jabechji̧ jaepe ma̧ȩa̧diro̧jo̧ȩ, judi dairäpȩ a̧dë tutia̧ oa ano̧ mire cjiadiärea̧mi̧ dari̧. Jabechji̧ judi pumȩ chji̧ra̧ jo̧rȩtamȩrȩ cjo̧ro̧rërea̧ ji̧, chirirä cjo̧ro̧mȩ ja̧ chji̧mi̧ dara̧ ano̧ mire jo̧rȩtamȩpea̧de. Jabechji̧ buro chjuaji̧ri̧ pio ji̧ri̧ ja̧ chjarerä cjo̧ro̧mȩpea̧de. Ado bacarë juramȩmi̧ dari̧ cärä oa juramȩpea̧de. Ado doti̧mi̧, peadai̧rä, uchjamȩrȩ cjiadiärëremȩde jurucjü üdë cjatäa̧ oaiä. Jabechji̧ ja̧di dari̧ cjiadiäa̧de judi chjere jo̧rȩtamȩpea̧rä yuro, judi a̧dë chjäte Ütë pio ju̧i̧ chjiari tjamo̧ri̧ dabamȩpea̧rä yuro. 'Aja̧, a̧dë chjäte Ütë pio judi tjamo̧dida, pio judi tjamo̧ yo̧mȩdida, ado cja̧rȩmo̧rȩ nö̧tadë madiji̧da, ado chiri ütë cjo̧ro̧ji̧ri̧ pio judiro̧ pio ju̧i̧ ja̧ chja̧oerämo̧ cjo̧ro̧diro̧da, ado pio judi ütarë jo̧rȩta̧mi̧ mitëdiji̧ri̧da, pio judi ütarë jo̧rȩta̧mi̧ ütë cjatä tänȩmȩdiji̧ri̧da, jabechji̧ a̧dë chjäte Ütë pio judimo̧dida' quëna̧ dabapea̧rä yuro cjiadiärëremȩde chiriräpȩ ju̧ri̧, chirirä cjo̧ro̧mȩmi̧ dari̧.

²² Ado mȩnȩ Bechacha, pio ju̧i̧ chjiari dabamȩborë, na̧ ama̧i̧rea̧ pio judi chjätärërea̧ pio ju̧i̧ chjiari dabamȩborë, cjäri marenȩ, peaja̧di na̧ chji̧rämo̧ jo̧rȩtatamȩrȩ cjo̧ro̧mȩrenȩ. Jabechji̧ mȩnȩ ba chiadëmȩmi̧ dari̧ cjo̧ro̧tärea̧ ji̧, 'Ütë tjamo̧ pio judimo̧rȩ ba chia tjamo̧dida' quëna̧ jo̧rȩtatärea̧ ji̧, cjäri̧ marenȩ, 'pio cüdëmo̧rȩ ba chiaquëda' quëna̧ jo̧rȩtamȩrȩ cjo̧ro̧mȩrenȩ.

²³ Jabechji̧ mȩnȩ Ütë tjamo̧ ja̧ dëbëräpȩ daito oa daburäpȩ yuro cjiari̧ tjätjäpë china̧därämȩmi̧ dari̧ cjo̧ro̧tärea̧ ji̧, cjäri̧ marenȩjo̧ȩ, 'a̧dëräpȩ cjiamȩ Ütë pio ju̧i̧ u̧i̧ ba chiamȩquëda' quëna̧ jo̧rȩtamȩrȩ cjo̧ro̧mȩrenȩ. Ado pio ju̧i̧iä yo̧ chjadüa̧renȩ na̧ mu̧i̧tjoi̧ pio ji̧ri̧ aejararea̧ oa goa jana̧tä, a̧dë chjäte Ütë pio ju̧i̧ ja̧ oa china̧chjari̧ tutia̧ oa cjiaremȩ aejararea̧ pio ju̧i̧. Tjamo̧ davä. Ütë tjamo̧ ja̧ bëräremȩ pio ju̧i̧ goa jana̧tä yo̧ chjadüa̧renȩ mȩnȩ na̧ pumȩ pio ji̧ri̧ nö̧ta airi̧ cjia airi̧ cjia ëba jarapea̧ oa, 'pio a̧ro̧rȩ Ütë tjamo̧ pio ju̧i̧iä ji̧dë u̧i̧ ba chiaa̧ro̧da' quëna̧ jo̧rȩtaji̧ri̧rȩ jarapea̧ oa. Tjamo̧ davä. Mȩa chi̧dëeaji̧ri̧ pio ji̧ri̧ nö̧ta ëba jarapea̧ oa, na̧ ivi pio ji̧ri̧ nö̧ta ëba jarapea̧ oa, ado mȩnȩ a̧de ëba̧ ivi pio ji̧ri̧ nö̧ta ëba jarapea̧ oa, goa jana̧tä yo̧ chjadüa̧renȩ. Ado mȩnȩro̧ Ütë tjamo̧ pio ju̧i̧iäpȩmo̧ chjacjiamȩri̧ ni̧bäji̧ri̧rȩ jaratärea̧ ji̧, cjäri̧ manȩrȩ, teracaba ütë pio ji̧ri̧iäpȩmo̧, pumȩrȩ jëdano̧a̧ ütë pio ji̧ri̧iäpȩmo̧ chjacjiamȩri̧ ni̧bäji̧ri̧rȩ jara̧nȩrȩ. Aja̧, darea̧ chiadë maea oa, ta̧rërea̧ chiadë maea oa, ado jo̧rȩtarea̧ chiadë maea oa chjacjiamȩri̧ ni̧bäa̧nȩrȩ a̧dëräpȩ cjiamȩ Ano̧mȩ pio ju̧i̧iäpȩmo̧ ma chjacjiamȩri̧ ni̧bätärea̧ ji̧. Tjamo̧ davä. Pio mȩa jȩoarea̧ yürümȩ pio ju̧i̧ chjacjiamȩri̧ ni̧bätärea̧ ji̧, mȩnȩ chjätäpea̧ chjö̧na̧i̧ oa tjamo̧ri̧ ütaramȩ pio ju̧i̧ chjacjiamȩri̧ jo̧rȩtatärea̧ ji̧, cjäri̧ marenȩjo̧ȩ, pio ju̧i̧ ba chia jo̧rȩtadërenȩ.

²⁴ Ado pio ju̧i̧iä Ütë tjamo̧ pio judi chjadüa̧dejȩ ichi maea oa, pumȩ icjarari ja̧dëmȩ oa. Tjamo̧ davä. Ichi pio ju̧i̧ chjadüa̧dejȩ pio yoa ma̧ȩ oa go̧ȩpapea̧ oa.

²⁵ Danȩ, pio yoa ma̧ȩ üdë go̧ȩpea̧ oa cjiaremȩde. MENE, MENE, TEKEL, ado PARSIN.

²⁶ Ado pio jiro go̧ȩpea̧ ma̧ȩ üdë ¿tjana̧ yo̧cjivadi' quëna̧chea oa, chjadëri̧ yo̧parequedemȩ yaba̧. Danȩ, MENE go̧ȩpea̧ ma̧ȩ üdë, jabechji̧ 'ütara̧ oa cjia' yo̧rea̧ ma̧ȩde. Jabechji̧ Ütë tjamo̧ judi ütara̧dejȩ davä mȩnȩ chiri ütëmȩrȩ cjo̧ro̧pea̧ pio ju̧i̧. Tjamo̧ davä. Ütara̧dejȩ ado chjaodëri̧ yuropa tänȩpadejȩ. Jabechji̧ chjaodëri̧ ütë cjatä tänȩpadimȩ.

²⁷ Ado TEKEL go̧ȩpea̧ ma̧ȩ üdë, 'mö̧reda̧ oa cjia' yo̧rea̧ ma̧ȩde. Jabechji̧ Ütë tjamo̧ judi mö̧redarea̧mi̧ darä ütarë mö̧redami̧ dari̧ japea̧dimȩ, ado pjärämȩ cjiarenȩ. Jabechji̧ nö̧tadërenȩ mȩnȩ chiri ütëmȩrȩ cjo̧ro̧pea̧ ji̧.

²⁸ Ado PARSIN go̧ȩpea̧ ma̧ȩ üdë, 'tutia̧ oa cjia' yo̧rea̧ ma̧ȩde. Jabechji̧ na̧ chja̧oerä a̧rȩmȩ chiri pio ju̧i̧ chjiari yo̧rea̧ ma̧ȩde. Jabechji̧ mȩnȩ goa̧ chiriremȩ pio judi yo̧a̧ri̧ pënȩpe bagari̧ tutia̧ oa cjiadiäpade yaba̧. Jabechji̧ Media quȩmȩ chiririmȩ pio judi ano̧ mire chiri ütëmȩrȩ cjo̧ro̧pade cja̧rȩmȩ pënȩ oa. Ado cjiadiäa̧mȩ chiri pënȩ oa mitëpadejȩ Pechia quȩmȩ chiririmȩ judi. Jabechji̧ pio jiro ütë judi ano̧ mire chiri ütëmȩrȩ cjo̧ro̧pade pio jiro chiri pënȩ pio ju̧i̧ —yo̧mȩrȩ goë ni̧bärëremȩdejȩ chiri ütëmȩ ja̧ oa Da̧de judi.

²⁹ Ja̧dëa ji̧ Bechacha judi yo̧a̧ oaiä, chjaodëri̧ ina̧ tänȩa̧diro̧jo̧ȩ Da̧de ju̧i̧ ina̧rea̧ coëcoëara̧, ba chiara̧. Ado orora̧ japea̧ i̧a̧rea̧ ba chiara̧ i̧a̧ tänȩa̧diro̧jo̧ȩ. Ado chiri ütë cjo̧ro̧ tänȩa̧diro̧jo̧ȩ. Jabechji̧ yo̧a̧ri̧mo̧i̧rëreji̧ri̧dirȩ Da̧de pio ju̧i̧iä ji̧dë u̧i̧ ütëji̧ri̧ judiro̧.

³⁰ Ado pio jiro doro gȩnȩpea̧rä, Bechacha judi, Babironiaräpȩ cjo̧ro̧ji̧ri̧ pio ji̧ri̧ ja̧ ütë pio judi ja̧bo tänȩa̧ oa cjiarëremȩde.

³¹ Ado Dario quȩmȩ pio judi, Media quȩmȩ chiririmȩ pio judi ano̧ mire chiri ütë cjo̧ro̧mȩpea̧de. Tjamo̧ davä. Babironia quȩmȩ chiriräpȩ cjo̧ro̧ji̧ri̧ pio ji̧ri̧ ja̧ ütëmȩrȩ cjo̧ro̧mȩpea̧de, judi 62 ui goamȩrȩ.