Da̧de 4 - Biblia Pume

Nabucodonocho judi chjacjiamȩri̧ ni̧bärëremȩdejȩ Ütë tjamo̧ pio ju̧i̧ chjiari

¹ Ado cja̧rȩmo̧ uiremȩrä, chiri ütë cjo̧ro̧mȩ Nabucodonocho judi, jënȩ chjätärërea̧ pio ju̧i̧ chjiari go̧ȩpamȩrȩ ma̧ȩ chjadürëremȩdejȩrȩ jibëa̧ pumȩ ji̧ri̧, ja̧di ta̧rëri̧ yo̧mȩrȩ: —Aja̧, cüdë, Nabucodonocho pio judi ma̧ȩ chjadürequededibe ca̧ chja̧oerä cjo̧ro̧ji̧ri̧ ütëbodärä oa. Aja̧, ado cja̧rȩmo̧ taru ëbaji̧ri̧ pio ji̧ri̧, ado cja̧rȩmo̧ chiriräpȩ cjo̧ro̧ji̧ri̧ pio ji̧ri̧, ado cja̧rȩmo̧ ma̧ȩ oa ni̧bäji̧ri̧ pio ji̧ri̧ ma̧ȩ chjadürequededibe oëra̧ti̧ oa cjiaji̧ri̧ oa. Aja̧, jearea̧ chjadürequededibe mȩnȩro̧ chjadëri̧ cjo̧ro̧tä eamȩrȩ, mȩnȩro̧ jabëdiärea̧ decjiari̧ cjo̧ro̧tä eamȩrȩ.

² Ado mȩnȩro̧ dabadëchea oa, jabechji̧ ütëbodärä oa daba tänȩtämi̧ cjiarequededibe a̧dë chjäte Ütë pio ju̧i̧ chjiari, judi pio coa chjiari chjadëri̧ japea̧ pio ju̧i̧ chjiari, judi jibëa̧ jauëchara̧ pio coa japë yürüa̧ pio ju̧i̧ chjiari.

³ Danȩrȩ ca̧ pumȩ, Ütë tjamo̧ judi ana̧ri̧ na̧rȩmȩde davä jibëa̧ jauëchja oa, pumȩ judiro̧ cja̧rȩmȩ co dadërërea̧ pio ju̧i̧. Ado pio judi, jabechji̧ a̧dë chjäte chiri Ütëmȩrȩ cjo̧ro̧pade bucho ana̧. Jabechji̧ pumȩ judiro̧ goëje ja̧bo ga̧re baäräbo, jabechji̧ jënȩ tjamo̧ yo̧rea̧ üdë yuropadëpade —yo̧mȩrȩ ma̧ȩ chjadürëremȩdejȩrȩ jibëa̧ chjo̧aerä cjo̧ro̧ji̧ri̧ pumȩ chjö̧na̧i̧därä oa Nabucodonocho pio judi Ütë tjamo̧ pio ju̧i̧ chjiari.

Ado Nabucodonocho pio judi ado canȩjä mo̧a̧rëremȩde

⁴ Ado Nabucodonocho judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ jibëa̧ pumȩ ji̧ri̧ ütëbodärä oa: —Danȩrȩ ca̧ pumȩ, cüdë, Nabucodonocho pio judi, chjadëri̧ cjo̧ro̧rëremȩrequede ca̧ bëräpȩ, chiri ütë cjo̧ro̧mȩ ja̧ bëräpȩ. Jabechji̧ chji̧ goaera̧ jo̧rȩtamȩrȩ cjo̧ro̧rëremȩrequede, eami̧ chjai̧dë oa chjätädëmȩrȩ.

⁵ Jabo ja̧dëa ji̧, cjäri̧ marequede, uapai̧ da tjamo̧ri̧ canȩjä mo̧a̧mȩpea̧requede. Jabechji̧ oë ja̧bomȩrȩ darämi̧ cjiaremȩreconȩ cüdë ca̧ mo̧a̧rea̧räpȩ a̧rȩa̧ nö̧ta.

⁶ Ado pio ju̧i̧iä ëna̧diäa̧requede dabarea̧ chiaji̧ri̧ pio ji̧ri̧ ütëbo oa, Babironiaräpȩ cjo̧ro̧ji̧ri̧ oa. Jabechji̧ pio coaiäpȩ jana̧tä yo̧mȩrȩ ma̧ȩ chjadüa̧requedejȩrȩ cüdë canȩjä mo̧a̧ pio ju̧i̧ chjiari chjadëri̧ goë ni̧bäpea̧ oa.

⁷ Ja̧dëa ji̧ judiro̧ ütëborë go̧düna̧ra̧rä, to̧je go̧a̧ji̧ri̧ judiro̧, ado to̧je tuti go̧a̧rea̧ chiaji̧ri̧ judiro̧, ado yo̧to̧parea̧ dabaji̧ri̧ judiro̧, ado yo̧mirerea̧ dabaji̧ri̧ judiro̧, ado büë oa ütararea̧ dabaji̧ri̧ judiro̧ go̧düna̧ra̧rä, jabechji̧ yo̧a̧requedejȩrȩ cüdë canȩjäa̧ pio ju̧i̧. Jabo judiro̧ chjadëri̧ goë ni̧bätärea̧ ji̧, cjäri̧ madiro̧coe, goë ni̧be yürüdëa̧diro̧coe.

⁸ Ado japamitë chjätä ëte, Da̧de pio judiborë go̧düna̧ra̧de, cüdë ano̧ mire quȩpea̧ pio judi, cüdë quëna̧mȩ ütë pio ju̧i̧ ja̧ quȩra̧ quȩpea̧ pio judi. Aja̧, Betacha quȩra̧ quȩpea̧reconȩ Da̧de pio ju̧i̧, judi cüdë quëna̧ ütë pio ji̧ri̧ ja̧ dabarea̧ chiamȩ tara, cüdë quëna̧ ütë pio ji̧ri̧ ja̧ tjo chiamȩ tara. Aja̧, dabarea̧ chiamȩ tara, yo̧a̧reconȩ cüdë canȩjä mo̧a̧ pio ju̧i̧ chjiari, ja̧di ta̧rëri̧ yo̧mȩrȩ:

⁹ —Danȩ Betacha, jauëchja cjiari̧ japarea̧ dabaji̧ri̧ pio ji̧ri̧ ja̧ ütërenȩ. Tjamo̧ davä. Tjamo̧ ja̧bepamȩ pio judirenȩ, judiro̧dë. Aja̧, pio mȩa nö̧ta ja̧bepaji̧ri̧ pio ji̧ri̧ ja̧ tjamo̧ dabamȩrenȩ. Jabechji̧ dabarea̧mi̧dë pio ju̧i̧ chjiari ni̧bärea̧ damȩrenȩ. Aja̧ Betacha, pio mȩa chjiari dabarequede. 'Jabechji̧ a̧ro̧rȩ quëna̧ ütë pio ji̧ri̧iä dabarea̧ chiamȩdida, eami̧ oa dabarea̧mi̧dëräbo, jabechji̧ ütë pio ji̧ri̧iä tjamo̧ri̧ dabarea̧ chiamȩdida, goadia̧ oa cjiarëremȩ pio ju̧i̧ chjiaribo dabarea̧ chiapai̧ damȩdida' quëna̧ dabarequede pio mȩa chjiari. Ado pio ju̧i̧iä cüdë canȩjäa̧ pio ju̧i̧ chjiari ta̧rë ëte, jabechji̧ chjadëri̧ goë ni̧bäparenȩque.

¹⁰ Danȩ, cüdë ca̧ mo̧a̧rea̧räpȩ mo̧a̧ nö̧ta, ja̧di dari̧ canȩjä mo̧a̧remȩrequede. Jabechji̧ to boi̧dë tjamo̧ oa darämi̧ cjiamȩrȩ canȩjä mo̧a̧remȩrequede. Chiri tjori pio judiri cjitëmȩ oa darämi̧ cjiaremȩreconȩ.

¹¹ Ado pio jiro to üdë uë tjamo̧pe bagamȩ oa darämi̧ cjiaremȩreconȩ, chjua tjamo̧pe järi̧ cjitëmȩ oa. Jabechji̧ a̧dëräpȩ yuro cjitëmȩ oa darämi̧ cjiaremȩreconȩ, chiri nö̧ta oa cjo̧ro̧ji̧ri̧ judiro̧ darea̧mi̧ dari̧.

¹² Pjö̧da uchja oa chiamȩ oa, gägäari̧ cjitëmȩ oa darämi̧ cjiaremȩreconȩ, chjacjiamȩri̧ cjiamȩ oa. Jurarea̧ ji̧ra̧ tjamo̧ oa chiamȩ oa darämi̧ cjiaremȩreconȩ, chiriräpȩti̧ oa cjo̧ro̧ji̧ri̧ pio judiro̧ chjadëri̧ jurarea̧mi̧ dari̧ chiamȩ oa. Ado chirirä cjo̧ro̧ji̧ri̧ pio judiro̧ to chja̧oerä cjo̧ro̧ji̧ri̧ oa darämi̧ cjiaremȩrequedejȩrȩ peaja̧di. Ado pua judiro̧ a̧rä ju̧ri̧ chadärä chadärä cjiaji̧ri̧ oa darämi̧ cjiaremȩrequedejȩrȩ peaja̧di. Jabechji̧ chiri nö̧tai̧ oa cjo̧ro̧ji̧ri̧ judiro̧ ütëbodärärë quirë baä quirë baä cjiarea̧ dareji̧ri̧dirȩ pio jiro jurarea̧ to pio ju̧i̧iä —yo̧mȩrȩ yo̧rëremȩdejȩ Da̧de ju̧i̧ Nabucodonocho judi.

¹³ Ado chiri ütë cjo̧ro̧mȩ judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩ Da̧de ju̧i̧: —Ado cüdë ca̧ mo̧a̧rea̧räpȩ canȩjämȩrȩ a̧rȩa̧ nö̧ta, jabechji̧ darämi̧ cjiaremȩreconȩ a̧dëri jidamȩ mu̧i̧tjoi̧ pio ju̧i̧ a̧dëri pio judiri biramȩ oa.

¹⁴ Ado jibëa̧ jadü ji̧ri̧, a̧dëriji̧ri̧ mu̧i̧tjoi̧ pio ji̧ri̧ goae tarari̧ ëna̧diämȩ oa ta̧rërämi̧ cjiaremȩrecone, ja̧di ta̧rëri̧ yo̧mȩ oa: "To boi̧dë oa tuti dechji̧jo̧ȩ!" yo̧a̧dejȩrȩ. "Ado a̧ chjö̧na̧i̧ oa tuti depea̧de peaja̧di. Ado pjö̧da decjiape bagari̧ tuti gu̧na̧chji̧vä peaja̧di. Ado jurarea̧remȩ chjö̧na̧i̧ oa oëra̧ti̧ oa cjatäri̧ aeno̧chji̧jo̧ȩ. Ado to chja̧oerä a̧rȩreji̧ri̧ pio ji̧ri̧ jaepe ma̧ȩchji̧jȩrȩ chirirä cjo̧ro̧ji̧ri̧ pio ji̧ri̧. Ado pua ji̧ri̧, a̧räreji̧ri̧ pio ji̧ri̧ jaepe ma̧ȩchji̧jȩrȩ peaja̧di.

¹⁵ Jabo to oa tuti deräbo, jabechji̧ to taruremȩ pio ju̧i̧ go̧dü tänȩdëchji̧jo̧ȩ, jabo jabechji̧ ano̧chji̧jo̧ȩ tacö̧ chiamȩ oa" yo̧a̧dejȩrȩ. "Ado ca̧i̧ra̧ chjuari̧ yurachji̧jo̧ȩ. Aja̧, chjiparari chiamȩ ca̧i̧ra̧, iero ado boro̧che chiamȩ ca̧i̧ ana̧ra̧ chjuari̧ yurachji̧jo̧ȩ, pjatëra̧. Chja jabechji̧ pio ju̧ri̧ chiri tjoräpȩ ju̧ri̧ ano̧chji̧jo̧ȩ to taruremȩ pio ju̧i̧" yo̧a̧dejȩrȩ. Ado a̧dëri jidamȩ mu̧i̧tjoi̧ pio judi to taru pio ju̧i̧ chjiari ji̧dë u̧i̧ yo̧mȩrȩ ja̧di ta̧rëri̧ a̧de ni̧bärëremȩde pumȩmi̧ damȩ pio ju̧i̧ chjiari: "Ado chirirä cjo̧ro̧ji̧ri̧ pio ji̧ri̧ ja̧ chjarerä, chjuaji̧ri̧ pio ji̧ri̧ ja̧ chjarerä cjo̧ro̧täde chiriräpȩ ju̧ri̧" yo̧a̧dejȩrȩ. "Ado pea buiua̧mȩ cärä chjarerä cjiatäde. Jabechji̧ a̧dëri biramȩ jurucjü oaiä uchjape bagade.

¹⁶ Jabechji̧ judi jibëa̧ chji̧ra̧ chjadëri̧ ütarë jo̧rȩtarërea̧ ji̧, pumȩ chji̧ra̧ chjadëri̧ ütarë jo̧rȩtarërea̧ ji̧, jabechji̧ chirirä cjo̧ro̧ji̧ri̧ ja̧ chji̧mi̧ dara̧ pio ju̧ri̧ra̧ ano̧ mire jo̧rȩtatäde. Jabechji̧ 7 ui nö̧ta ja̧di dari̧ jo̧rȩtariä cjo̧ro̧täde pumȩ ja̧ chji̧dëra̧, jabo chirirä cjo̧ro̧ji̧ri̧ ja̧ chji̧mi̧ dara̧.

¹⁷ Aja̧, ja̧di dari̧ cjo̧ro̧täde a̧dëri jidaji̧ri̧ mu̧i̧tjoi̧ pio judiro̧ jabërä ütarë jo̧rȩtarërea̧mi̧. Ja̧di dari̧ cjo̧ro̧täde dai chirirä cjo̧ro̧ji̧ri̧ pio judiro̧ ütëborë a̧dë chjäte Ütëmȩ pio ju̧i̧ chjiari dabadëchea oa. 'Jabechji̧ a̧dë chjäte Ütë judi pio judimo̧dida, ado chiri ütë cjo̧ro̧ji̧ri̧ pio judiro̧ ütëborë pio ju̧i̧ ja̧ chja̧oerämo̧ cjo̧ro̧diro̧da, pio judi ütarë jo̧rȩtami̧ ütëpe baga tänȩmȩdida, ado pio judi ütarë jo̧rȩtami̧ ütë cjatä tänȩmȩdida, jabechji̧ jënȩ jo̧rȩta̧mi̧ japamȩdida, tjamo̧ mitëmȩ pio judimo̧dida, ado tjaoërä pumȩ ba chia tjamo̧dëmi̧ dari̧ cjo̧ro̧ji̧ri̧ pio ji̧ri̧bo ütë tänȩdiji̧ri̧da' quëna̧ dabadëchea oa, jabechji̧ pumȩ ja̧ chji̧dëra̧ cjo̧ro̧täde to boi̧dëmi̧ damȩ judi, pumȩ judiro̧ Ütë tjamo̧ pio ju̧i̧ chjiari dabadëchea oa" yo̧mȩrȩ yo̧rëremȩdejȩrȩ jibëa̧ jadü ji̧ri̧ a̧dëri jidamȩ mu̧i̧tjoi̧ pio judi.

¹⁸ Ado Nabucodonocho judi Da̧de pio ju̧i̧iäpȩmo̧ ja̧di ta̧rëri̧ yo̧remȩrȩ ja̧di dari̧ a̧de ni̧bä chjaorëremȩdejȩ: Aja̧ Betacha, pio ju̧i̧ canȩjäa̧requede. Tjamo̧ davä. Cüdë, Nabucodonocho pio judi canȩjäa̧ pio judide. Ado yaba̧ chjadëri̧ goë nibe yürücoe. O judiro̧ goë ni̧bärea̧mi̧dëdirȩ. Jabechji̧ cüdë chiri ütërë cjo̧ro̧mȩ chirirä cjo̧ro̧ji̧ri̧ pio judiro̧ a̧dorea̧ chiadë madirȩ. Jabo mȩnȩ, dëdë, goë ni̧bärea̧ chiamȩrenȩ. Jabechji̧ ütë pio ji̧ri̧iä dabarea̧ chiamȩ tara, cüdë quëna̧ ütë pio ji̧ri̧ ja̧ tjo chiamȩ tara, jabechji̧ a̧dorea̧ chiamȩrenȩ —yo̧mȩrȩ ni̧bä chjaorëremȩdejȩ chiri ütë cjo̧ro̧mȩ judi Da̧de pio ju̧i̧iäpȩmo̧.

Da̧de judi goë ni̧bärëremȩdejȩ Nabucodonocho ju̧i̧, jënȩ canȩjäa̧ pio ju̧i̧ chjiari

¹⁹ Ado Da̧de judi, peaja̧di Betacha quȩmȩ pio judi ja̧di ta̧rëri̧ yo̧a̧ oa ta̧rëa̧ oaiä, uapamȩpea̧de, ana̧ri̧ jo̧rȩtamȩrȩ. Jabechji̧ ütërë canȩjäa̧ pio ju̧i̧ ta̧rëa̧ oaiä, uaparea̧ üdë chjaodëri̧ boadärärëremȩdejȩ jibëa̧ chji̧ oa. Ado pio ju̧i̧iä japamitë charëremȩde, janö̧padë chamȩrȩ, goë ni̧bärea̧ dadëmȩrȩ. Jabechji̧ chiri ütë cjo̧ro̧mȩ pio judi ma̧i̧ da chjai̧dë oa chjätäpea̧ pio ju̧i̧ chjiari na̧rȩrëremȩde jënȩ canȩjäa̧ pio judi. Ado pio ju̧i̧iä uapa tjamo̧pea̧de. Jabo chiri ütë cjo̧ro̧mȩ pio judi yo̧a̧dejȩ: —Danȩ Betacha, cüdë canȩjäa̧ üdë na̧rȩa̧ pio ju̧i̧ chjiari uapadëvä. Jabechji̧ ütëbo yo̧coe —yo̧a̧dejȩ. Ado pio ju̧i̧iä Betacha judi dëbë yo̧mȩrȩ yo̧a̧dejȩ: —Danȩ ca̧ ano̧mȩ, mȩnȩ canȩjäa̧ na̧rȩrea̧ uapai̧ da üdë pio mȩaiäpȩmo̧ acji cjatädëtäremȩde, jabo pio mȩa eadëji̧ri̧ pio ji̧ri̧iäpȩmo̧ ma acji cjatätäremȩdejȩrȩ, pio mȩa acji jana̧pai̧ daji̧ri̧ pio ji̧ri̧iäpȩmo̧ ma.

²⁰ Jabo danȩ, mȩnȩ goë ni̧bätä ea tara, jabechi̧ goë ni̧bäparequedemȩ. Danȩ ca̧ ütë, mȩnȩ canȩjä mo̧a̧ ji̧, darämi̧ cjiaremȩrenȩ to oa, to chjua oa. Jabechji̧ uë tjamo̧pe bagari̧ cjitëmȩ oa darämi̧ cjiaremȩrenȩjo̧ȩ a̧dëräpȩ yuro cjitëmȩ oa, chiriräpȩti̧ oa cjo̧ro̧ji̧ri̧ pio judiro̧ darea̧mi̧ damȩ oa.

²¹ Aja̧ ca̧ ütë, pjö̧da gägäari̧ cjiamȩ oa, jurarea̧ ji̧ra̧ tjamo̧ oa chiamȩ oa darämi̧ cjiaremȩrenȩjo̧ȩ, pumȩ judiro̧ ütëborë chjadëri̧ jurarea̧mi̧ dari̧ chiamȩ oa. Jabechji̧ chirirä cjo̧ro̧ji̧ri̧ pio judiro̧ to chja̧oerä chjadëri̧ cjo̧ro̧ji̧ri̧ oa, ado puarë to ja̧ chjiarä chjadëri̧ cjo̧ro̧rea̧ chiaji̧ri̧ oa darämi̧ cjiaremȩrenȩ.

²² Ado danȩ ca̧ ütë, Nabucodonocho, ja̧di ta̧rëri̧ yo̧requedemȩ. Tomi̧ damȩ pio judi tjamo̧renȩ. To üdë pio mȩa chjiari na̧rȩde. Danȩ ca̧ ütë, to üdë uë tjamo̧pe baga̧mi̧ dari̧ cjiamȩrenȩ. Jabechji̧ to üdë a̧dëräpȩ yuro cjitëmi̧ dari̧ cjiamȩpea̧renȩ chiri nö̧tai̧ oa cjo̧ro̧ji̧ri̧ judiro̧ pio mȩa chjiari dabaji̧ri̧pea̧ tara. Ado pio jiro to üdë chjuari̧ cjiami̧ dari̧ cjiamȩrȩnȩ peaja̧di mȩnȩ a̧dë chjäte ju chiamȩ tjamo̧mi̧ dari̧ cjiamȩpea̧ tara. Jabechji̧ chiriräpȩti̧ oa cjo̧ro̧ji̧ri̧ pio judiro̧ mȩnȩ boa̧ duri maeadirȩ. Ado pio ju̧i̧iä ibëa̧ ütëpea̧renȩ. Pio ju̧i̧iä pumȩ judiro̧ ütëbodärärë na̧ chja̧oerämo̧ cjo̧ro̧ji̧ri̧pea̧dirȩ. Jabechji̧ pio jiro tomi̧ darenȩ mȩnȩ.

²³ Ado mȩnȩ, ca̧ ütë, canȩjä mo̧a̧ ji̧, peaja̧di darämi̧ cjia cjiaremȩrenȩ a̧dëri jidamȩ mu̧i̧tjoi̧ pio ju̧i̧ a̧dëri̧ pio judiri biramȩ oa. Ado pio jiro mu̧i̧tjoi̧ judi ni̧bämȩ oa ta̧rërämi̧ cjiaremȩrenȩ ja̧di ta̧rëri̧ ma̧ȩ yürümȩ oa: "To boi̧dë oa tuti dechji̧jo̧ȩ" yo̧mȩ oa ta̧rërämi̧ cjiaremȩrenȩ. "Jabechji̧ chjö̧na̧i̧ oa tutupe gu̧na̧chji̧jo̧ȩ cjiadiärea̧mi̧dëri̧. Jabo to taruremȩ pio ju̧i̧ jabechji̧ go̧dü tänȩdëchji̧jo̧ȩ, jabo jabechji̧ ano̧chji̧jo̧ȩ tacö̧ chiamȩ oa" yo̧mȩ oa ta̧rërämi̧ cjiaremȩrenȩ. "Ado chjuari̧ yurachji̧jo̧ȩ chjiparari cai̧ pjatëra̧, iero ado boro̧che chiamȩ ca̧i̧ra̧. Chja jabechji̧ pio ju̧ri̧ chiri tjoräpȩ ju̧ri̧ ano̧chji̧jo̧ȩ pea buiua̧mȩ cärä chjarerä. Jabechji̧ ju̧ri̧pȩ ano̧chji̧jo̧ȩ 7 ui nö̧ta cjo̧ro̧pea̧ oa, a̧dëri̧ biramȩ jurucjü oaiä uchjape bagapea̧ oa, chirirä cjo̧ro̧ji̧ri̧ pio ji̧ri̧ nö̧ta cjo̧ro̧pea̧ oa, chjuaji̧ri̧ pio ji̧ri̧ nö̧ta cjo̧ro̧pea̧ oa" yo̧mȩ oa ta̧rërämi̧ cjiaremȩrenȩ ca̧ ütë.

²⁴ Aja̧ ca̧ ütë, chjö̧na̧i̧ oa chjadëri̧ goë ni̧bäparequedemȩ yaba̧. Danȩ, a̧dë chjäte jauëchjamȩ Ütë pio judi ütarë yo̧a̧mi̧ cjiadiäparenȩ.

²⁵ Ado pio ju̧i̧iä dairäpȩ tutia̧ oa cjo̧ro̧parenȩ pumȩ pio ji̧ri̧ nö̧ta ori̧ bagari̧ ëba cjiarea̧mi̧dëri̧. Jabechji̧ dairäpȩmo̧ jaepe ma̧ȩpadiro̧mȩ na̧ pumȩ judiro̧ mȩnȩ chiriräpȩ tutia̧ oa cjo̧ro̧pea̧ oa chirirä cjo̧ro̧ji̧ri̧ pio ji̧ri̧ nö̧ta. Tjamo̧ davä ca̧ ütë. Chjuaji̧ri̧ pio ji̧ri̧ nö̧ta, ado pumȩ judiro̧ goa̧ pio ji̧ri̧ nö̧ta ëba cjo̧ro̧pea̧ oa, tutia̧ oa cjo̧ro̧parenȩ. Jabechji̧ pio judiro̧mi̧ dari̧ juraparenȩ cärä pio ju̧i̧. Baca pio judiro̧mi̧ dari̧ juraparenȩ. Ado jurucjü üdë a̧dëri pio judiri doti̧mi̧ gu̧roa̧ oaiä, jabechji̧ uchjape jäparenȩ. Jabechji̧ 7 ui nö̧ta dairäpȩ ju̧ri̧ cjo̧ro̧parenȩ mȩnȩ chjadëri̧ dabapea̧rä yuro Ütë tjamo̧ pio ju̧i̧ chjiari. Tjamo̧ davä. Mȩnȩ chjadëri̧ dabapea̧rä yuro, 'Aja̧, a̧dë chjäte Ütë pio judi tjamo̧dida, pio judi tjamo̧ yo̧mȩdida, ado chiri ütë cjo̧ro̧ji̧ri̧ pio judiro̧ pio ju̧i̧ ja̧ chja̧oerämo̧ cjo̧ro̧diro̧da, jabechji̧ pio ji̧ri̧ ja̧ Ütëdida, ado pio judi ütarë jo̧rȩta̧mi̧ ütë tänȩmȩdida, ütëdëpe baga tänȩmȩ pio judidida' quëna̧ jo̧rȩtamȩpea̧rä yuro ja̧di dari̧ cjo̧ro̧parenȩ chiriräpȩ ju̧ri̧.

²⁶ Jabo to taruremȩ üdë, tacö̧borë, jabechji̧ daburo cjiadiäpade. ¿Ado tjana̧ na̧rȩrea̧de ca̧ ütë? Tjana̧ na̧rȩrea̧dë, jabechji̧ to taruremȩ üdë tacö̧ chiamȩ tara, ado chjereno buiupai̧ dade. Ado peaja̧dimi̧ dari̧ cjiadiäparenȩ ca̧ üte. Mȩnȩ ado chjereno̧ chiri ütë cjo̧ro̧pai̧ darenȩ. Jabechji̧ mȩnȩ dabapea̧rä, 'Aja̧, Ütë tjamo̧ pio judimo̧dida, a̧dë chjäte Ütë pio judidida, ado pio judi yürüa̧ oaiämo̧i̧ ado chjereno̧ tjamo̧ yo̧rea̧ daemȩqueda' quëna̧ dabapea̧rä, dëdë, ado chjereno̧ chiri ütëmȩrȩ cjo̧ro̧ tänȩpai̧ dadime Ütë tjamo̧ judi. Aja̧ ca̧ ütë, pio ju̧i̧ na̧rȩrea̧de mȩnȩ canȩjäa̧ pio judi —yo̧mȩrȩ yo̧rëremȩdejȩ Da̧de judi, jënȩ goë ni̧be yürüa̧ ji̧.

²⁷ Ado Da̧de judi ji̧dë u̧i̧ yo̧mȩrȩ ja̧di ta̧rëri̧ chi̧dëearëremȩdejȩ ütë oa: —Jabo danȩ ca̧ ütë, mȩnȩ canȩjäa̧ üdë pio mȩa chjiari uapai̧ dari̧ na̧rȩ tara, jabechji̧ cjäri̧ri̧ cjia ta̧rëcoe. Cüdë mȩa chi̧dëearea̧mi̧dëräbo chi̧dëeatämi̧ cjiarequedemȩ. Jabechji̧ chjai̧dë oa japë ano̧vä. Coëma cjiari̧ japamȩrȩ cjo̧ro̧vä. Jabechji̧ mȩnȩ chjai̧dëri̧ japamȩrȩ cjo̧ro̧rërea̧ ji̧, jabechji̧ ano̧ mire jo̧rȩtavä ca̧ ütë. Mȩnȩ chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧ cjäri̧ri̧ cjia dadërërea̧ ji̧, jabechji̧ cjäri̧ri̧ cjia dajȩrȩ. A̧dojȩrȩ. Ado mȩnȩ ja̧di dari̧ ano̧ mire jo̧rȩtamȩrȩ japarä judi, jabechji̧ Ütë tjamo̧ pio judi cjäri̧ri̧ cjia dapai̧ dadimȩ mȩnȩ ji̧dë ma chjadëri̧ cjo̧ro̧pea̧ oa, mȩnȩ pio ju̧i̧iä bape chjaoa̧ oa cjiachea oa. Jabechji̧ ano̧ mire jo̧rȩtavä ca̧ ütë, mȩnȩ uapai̧ dari̧ canȩjäa̧ üdë pio mȩaiäpȩmo̧ acji cjatächea oa, mȩnȩ ji̧dë ma chjadëri̧ cjo̧ro̧rea̧ dapea̧ oa —yo̧mȩrȩ chi̧dëeatarëremȩdejȩ Nabucodonocho pio ju̧i̧ Da̧de judi.

Ado Nabucodonocho judi pumȩ ja̧ chji̧dëra̧ jo̧rȩtamȩrȩ ano̧ mire cjo̧ro̧rëremȩde chirirä, Da̧de judi jabërä goë ni̧bäa̧mi̧

²⁸ Jabo chiri ütë cjo̧ro̧mȩ pio judi ta̧rë ja̧botärea̧ ji̧, Da̧de judi chi̧dëea̧ pio ju̧i̧ ta̧rë ja̧botärea̧ ji̧, cjäri̧ made, ta̧rë ja̧bodëa̧de. Ado pio ju̧i̧iä chjai̧dë oa chjätärëremȩde Nabucodonocho judi, Da̧de pio judi goë ni̧bäa̧mi̧.

²⁹ Aja̧, ütë judi to ana̧ pio ju̧i̧ chjiari canȩjäa̧ri ja̧ 12 gupënȩ goa̧rä, jabechji̧ chiri ütë cjo̧ro̧mȩ ja̧ bëräpȩ ju̧ri̧ tai̧rëremȩde bë a̧ro̧a̧rä, pjatërä, uë tjamo̧ro.

³⁰ Ado pjatë uë tjamo̧ri pio judiri ütarë darëremȩdejȩ jënȩ cjo̧ro̧mȩ bë ma̧ri̧räpȩ. Ado ma̧ chiadëri̧ cjiamȩrȩ ni̧bämȩpea̧de, ja̧di ta̧rëri̧ yo̧mȩrȩ: 'Aja̧, Babironia bë ma̧ri̧ üdë bë boi̧dë tjamo̧dida, chjacjiamȩ tjamo̧dida, jabechji̧ pio cüdë ca̧ea̧ ma̧na̧ri̧ japea̧ oaiä chjadëri̧ cji̧däa̧ oa cjiadida, jabechji̧ cüdë ju chia tjamo̧mi̧ dari̧ cjiamȩ tara ja̧di dari̧ japarea̧ daea̧quëda, ca̧ chjacjiamȩrea̧ üdë ana̧ri̧ na̧rȩa̧ oa cjiapea̧ oa cji̧däa̧ oa cjiadida' quëna̧ jo̧rȩtamȩrȩ ni̧bämȩpea̧de jënȩ jibëa̧ bë a̧ro̧a̧rä ütarë daea̧ nö̧ta. Judi Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtatärea̧ ji̧, 'A̧ja̧, Ütë tjamo̧ pio judi chjadëri̧ a̧doa̧dicoada, pio yoa bë ma̧ri̧ oa cji̧däpea̧ ji̧ chjadëri̧ a̧doa̧dicoada' quëna̧ jo̧rȩtamȩrȩ ütarë datärea̧ ji̧, cjäri̧ made, pio jȩa chjiarimo̧ jo̧rȩtamȩrȩ darëremȩdejȩ, jibëa̧ chji̧rämo̧ jo̧rȩtatamȩrȩ.

³¹ Ado Nabucodonocho judi jabë ja̧di ta̧rëri̧ ni̧bäa̧rä, chjaodëri̧ ta̧rërëremȩdejȩ ni̧bämȩ ju̧i̧, a̧dëri pio judiri ëna̧diäa̧mȩ pio ju̧i̧. Ja̧di ta̧rëri̧ ëna̧diäa̧mȩ oa ta̧rëa̧dejȩ: —Danȩ chiri ütë Nabucodonocho, chjadëri̧ ta̧rëcoe. Jabechji̧ pio mȩa chjiari ma̧ȩ oa yürürequedemȩ. Danȩ, mȩnȩ Babironia quȩmȩ chiri ütëmȩrȩ cjo̧ro̧rërea̧ ji̧, cjäri̧ marenȩ, ütëdëpea̧renȩ yaba̧. Jabechji̧ ütë cjatä tänȩa̧ oa cjiarenȩ.

³² Ado mȩnȩ na̧ pumȩ ja̧ chjarerä chjadëri̧ cjo̧ro̧rërea̧ ji̧, cjäri̧ madiro̧mȩ, jaepe ma̧ȩpadiro̧mȩ mȩnȩ chiri tjoräpȩ ju̧ri̧ ano̧ mire cjo̧ro̧pea̧ oa, chirirä cjo̧ro̧ji̧ri̧ pio ji̧ri̧ nö̧ta ano̧ mire cjo̧ro̧pea̧ oa, chjuaji̧ri̧ pio ji̧ri̧ nö̧ta cjo̧ro̧pea̧ oa. Ado baca pio judi cärä oa jurami̧ dari̧ juramȩrȩ cjo̧ro̧parenȩ peaja̧di. Jabechji̧ 7 ui nö̧ta ja̧di dari̧ cjo̧ro̧mȩrȩ cjiadiäparenȩ mȩnȩ chjadëri̧ dabapea̧rä yuro. Tjamo̧ davä. 'Ütë tjamo̧ pio judimo̧rȩ a̧dë chjäte Ütëdida, chiri ütë cjo̧ro̧ji̧ri̧ pio ju̧i̧ ja̧ chja̧oerämo̧ cjo̧ro̧diro̧da, ado pio judi ütarë jo̧rȩta̧mi̧ mitëdiji̧ri̧da, judi jo̧rȩta̧mi̧ ütë cjatä tänȩdiji̧ri̧da' quëna̧ dabapea̧rä yuro, jabechji̧ ja̧di dari̧ cjo̧ro̧mȩrȩ cjo̧ro̧parenȩ chiriräpȩ ju̧ri̧.

³³ Ado a̧dëri ni̧bämȩ pio judi ni̧bädäräa̧rä japamitë boi̧chji̧ chjätä ëte, jabechji̧ judi yo̧a̧mi̧ tjamo̧i̧padäräa̧ oa cjiadiärëremȩde. Tjamo̧ davä. Pio ju̧i̧ bape chjaopea̧ üdë, Ütë tjamo̧ judi jabërä ütarë jo̧rȩtarërea̧ üdë chjaodëri̧ tjamo̧i̧padäräa̧ oa cjiadiäa̧de. Ado pio ju̧i̧iä jibëa̧ pumȩ pio judiro̧ jaepe ma̧ȩa̧diro̧jo̧ȩ. Aja̧, baä tänȩa̧diro̧jo̧ȩ chiriräpȩ ano̧ mire cjo̧ro̧pea̧ oa. Ado pio ju̧ri̧pȩ cjo̧ro̧mȩpea̧de chirirä cjo̧ro̧ji̧ri̧ ja̧ chji̧ra̧ jo̧rȩtamȩmi̧ dari̧, pumȩ pio ji̧ri̧ nö̧ta ëba cjo̧ro̧rea̧mi̧dëri̧. Ado bacami̧ dari̧ cärä maea oa juramȩpea̧de. Ado jurucjü üdë uëri pio judiri cjatärëremȩdejȩ, judi uchjape bagari̧. Ado jibëa̧ cö̧ üdë go̧a̧ti̧ tjamo̧pe bagarëremȩde iu pua chemi̧ dari̧. Ado jibëa̧ ivë üdë peaja̧di ma̧i̧ da go̧a̧ti̧ tjamo̧pe bagarëremȩde iu pua ivëmi̧ dari̧. Aja̧, ja̧di dari̧ cjo̧ro̧rëremȩde, pumȩmi̧ dadëpea̧mȩrȩ.

Japamitë chjätä ëte Nabucodonocho judi tjamo̧ri̧ na̧e chiape järëremȩde Ütë tjamo̧ pio ju̧i̧ chjiari

³⁴ Ado Nabucodonocho judi ji̧dë u̧i̧ ni̧bämȩrȩ ja̧di ta̧rëri̧ a̧de ni̧bä chjaorëremȩdejȩrȩ jibëa̧ pumȩ ütëbodärä oa: —Ado danȩrȩ ca̧ pumȩ, 7 ui üdë chjätä ëte, cüdë, Nabucodonocho pio judi, jabë chiri tjoräpe cjo̧ro̧rä judirä, jabechji̧ uëräpȩmo̧ gatë damȩrȩ gatë daea̧requede. 'Aja̧, Ütë tjamo̧ pio judimo̧dida, tjamo̧ yo̧mȩ pio judidida' quëna̧ dabamȩpea̧mȩrȩ a̧dëräpȩmo̧ gatë daea̧requede. Ado ja̧dëa ji̧ chjadëri̧ jo̧rȩtamȩpea̧requede ado chjereno̧, cüdë jo̧rȩtarërea̧mi̧. Ado a̧dë chjäte Ütë pio ju̧i̧ chjacjiamȩri̧ jo̧rȩtamȩrȩ ni̧bämȩpea̧requede davä pio ju̧i̧ chjiari. Ba chiaparȩmi̧ dari̧ ni̧bäa̧requede bucho ana̧ cjo̧ro̧mȩ Ütë pio ju̧i̧ chjiari. Aja̧, ja̧di ta̧rëri̧ yo̧mȩrȩ yo̧a̧requede: "A̧dë chjäte Ütë judi bucho ana̧ tjamo̧ yo̧mȩrȩ cjiade. Jabechji̧ judi yo̧a̧ chja̧oerä cjo̧ro̧rea̧ üdë yuroparea̧mi̧dëde, jabo bucho ana̧ Ütëmȩrȩ cjiade goarijärea̧mi̧dëri̧.

³⁵ Jabechji̧ chiriräpȩti̧ oa cjo̧ro̧ji̧ri̧ pumȩ pio judiro̧ nö̧tadë marea̧ro̧jo̧ȩ. Jabechji̧ ba chiadëji̧ri̧mi̧ dari̧ cjia maearea̧rȩ pio ju̧i̧iä. Ado judi jo̧rȩta̧mi̧ japamȩde a̧dëräpȩ ju̧ri̧, daburäpȩbo. Tjamo̧ davä. A̧dëräpȩ ju̧ri̧, mu̧i̧tjoi̧ judiro̧ cjo̧ro̧mȩräpȩ ju̧ri̧, jabechji̧ jënȩ jo̧rȩta̧mi̧ japamȩde, judiro̧ dëbëpe chjaorea̧ decjiari̧. Ado pio yoa chirirä, pumȩ judiro̧ cjo̧ro̧mȩ chirirä peaja̧di jënȩ jo̧rȩtami̧ japamȩde, a̧ro̧rȩ dëbëpe chjaorea̧ decjiari̧. Jabechji̧ eami̧rȩ dëbëparea̧ decjiari̧ japamȩde davä. Eami̧rȩ chi̧dëearea̧mi̧dëri̧ japamȩde. Aja̧, ¿tjana̧ ju̧i̧iä ja̧di dari̧ japea̧renȩ? yo̧rea̧mi̧dëri̧ japamȩde" yo̧mȩrȩ yo̧rëremȩrequede Ütë tjamo̧ pio ju̧i̧ chjiari, cüdë ado chjereno̧ chjadëri̧ jo̧rȩtamȩpea̧rä.

³⁶ Aja̧, pio jiro domȩ ju̧i̧iä, cüdë, Nubocodonocho pio judi, ado chjereno̧ chjadëri̧ jo̧rȩtamȩpea̧rä, cüdë pumȩ chji̧ra̧ ado chjereno̧ jo̧rȩtamȩpea̧rä, peaja̧di chiri ütëmȩrȩ ano̧ mire cjo̧ro̧mȩpea̧requede. Jabechji̧ coa chi̧dëearëreji̧ri̧ pio judiro̧ coa jiadatärea̧ ji̧, ca̧ea̧ pio ju̧i̧ ja̧bepë yürüdëri̧ cjiatärea̧ ji̧, jabechji̧ pio coadi ja̧bepatämi̧ cjiaji̧ri̧pea̧dirȩ ado chjereno̧. Ado judiro̧ coa ba chia darërea̧ ji̧, ji̧dë u̧i̧ ba chia daji̧ri̧pea̧diro̧coe cüdë ado chjereno̧ chiri ütëmȩrȩ cjo̧ro̧mȩpea̧rä. Jabechji̧ pumȩ judiro̧ ütëborë coa ba chia darërea̧ ji̧, ji̧dë u̧i̧ ba chia daji̧ri̧pea̧diro̧coe cüdë pumȩ ja̧ chji̧ra̧ ado chjereno̧ jo̧rȩtamȩpea̧rä. Cüdë pearä judi ju chia tjamo̧mi̧ dari̧ chiri ütëmȩrȩ cjo̧ro̧rërea̧ ji̧, ji̧dë u̧i̧ ju chiamȩmi̧ dari̧ ütëmȩrȩ cjo̧ro̧mȩpea̧requede.

³⁷ Ado pio ju̧i̧iä cüdë, Nabucodonocho pio judi, jabechji̧ chjacjiamȩri̧ ni̧bäreconȩ Ütë tjamo̧ pio ju̧i̧, a̧dëräpȩ cjiamȩ Tjamo̧ Yo̧mȩ pio ju̧i̧, chiri Ütë cjo̧ro̧mȩ pio ju̧i̧. Jabechji̧ ba chiaparȩmi̧ dari̧ ni̧bäreconȩ. Jabechji̧ judi japea̧ üdë chjadë maeade. Judi japea̧ üdë coëma cjia maeade, oëra̧ japarea̧ decjiari̧. Ado eami̧ oa jibëa̧ chji̧rämo̧ jo̧rȩtatamȩ pio ju̧i̧, jabechji̧ chjaodëri̧ ba chiadëparȩmi̧ dari̧ japapai̧ dadejȩ davä, pio coa japea̧rea̧mi̧. Tjamo̧ davä. 'Ba chiadëquëda, jabomo̧ pumȩquëda, ju chiadëquëda, jabo pio judimo̧rȩ ba chia tjamo̧dida' quëna̧pe bagarea̧mi̧ dari̧ japapai̧ dade davä eami̧ pumȩ oa, jibëa̧ maea oa jo̧rȩtatamȩ ju̧i̧ —yo̧mȩrȩ yo̧rëremȩde Nabucodonocho judi jibëa̧ chja̧oerä cjo̧ro̧ji̧ri̧ pumȩ pio ji̧ri̧iäpȩmo̧ ma̧ȩ oa go̧ȩpe chjadürërea̧ ji̧, jënȩ chjätäa̧ pio ju̧i̧ chjiari ma̧ȩ oa go̧ȩpe chjadürërea̧ ji̧.