Da̧de 3 - Biblia Pume

Nabucodonocho judi pumȩmi̧ da pio ju̧i̧ jëdano̧ tänȩrëremȩdejȩrȩ jibëa̧ mu̧i̧tjoi̧ ji̧ri̧

¹ Japamitë chjätä ëte ado cja̧rȩmo̧ doremȩrä, chiri ütë cjo̧ro̧mȩ judi, Nabucodonocho pio judi, oro maeara̧ jëdano̧tä yo̧rëremȩdejȩrȩ jibëa̧ mu̧i̧tjoi̧ ji̧ri̧ pumȩmi̧ da oa. Aja̧, boi̧dë oa, uë tjamo̧ cjiamȩ oa jëdano̧tä yo̧a̧dejȩrȩ. Ado pio ju̧i̧iä jëdano̧rëreji̧ri̧diro̧jo̧ȩ. Tjamo̧ davä. 27 metro uë oa, ado tjarari̧ metro ana̧ oa jëdano̧a̧diro̧jo̧ȩ. Aja̧, tjarari̧ metrorëremȩde ca̧ȩta̧ra̧ri ca̧tori pio judiri ado cja̧rȩmo̧ ca̧toräpȩmo̧. Ado Dura quȩmȩ pupuräpȩ ju̧ri̧ cji̧därëreji̧ri̧diro̧jo̧ȩ, Babironia quȩmȩ chirirä.

² Ja̧dëa ji̧ pumȩmi̧ da üdë jëdano̧däräa̧ oa goa̧rä, Nabucodonocho judi jibëa̧ mu̧i̧tjoi̧ pio ji̧ri̧iä ma̧ȩ chjadürëremȩdejȩrȩ tjamo̧ cjo̧ro̧ji̧ri̧ ütëbodärä oa. Ado pio ji̧ri̧ uëri ma̧ȩ chjadüa̧dejȩrȩ chiri nö̧tai̧ oa cjo̧ro̧ji̧ri̧ pio ji̧ri̧, jibëa̧ chja̧oerä cjo̧ro̧ji̧ri̧ pumȩ ütëbodärä oa. Jabechji̧ a̧dopera̧tä yo̧ chjadüa̧dejȩrȩ jënȩ pea cji̧däa̧ pumȩmi̧ darë cjiamȩ dëbëräpȩ. Tjamo̧ davä. Chiri ana̧ oa tjamo̧ cjo̧ro̧ji̧ri̧ pio ji̧ri̧, chiri boi̧chji̧ oa tjamo̧ cjo̧ro̧ji̧ri̧ pio ji̧ri̧, tjamo̧ chi̧dëeaji̧ri̧ pio ji̧ri̧, chërera̧ tjamo̧ jidaji̧ri̧ pio ji̧ri̧, pumȩ pio ji̧ri̧iä ütarë tärë ëte bape chjaoji̧ri̧ pio ji̧ri̧, ado eami̧rȩ ja̧beparea̧ ba chia oa chiaji̧ri̧ pio ji̧ri̧ a̧dopera̧tä yo̧ chjadürëremȩdejȩrȩ jënȩ cji̧däa̧ pumȩmi̧ da pio ju̧i̧ ba chia dapea̧ oa, pio ju̧i̧ china̧chjari̧ tutimi̧ dari̧ japapea̧ oa.

³ Ado judiro̧ ütëbodärärë go̧düdäräa̧rä, ado judiro̧ ütëborë pumȩmi̧ darë cjiamȩ ja̧ dëbëräpȩ cjiadäräa̧rä,

⁴ goae tarari̧ ëna̧diäa̧mȩ pio judi, chiri ütë cjo̧ro̧mȩ ja̧ mu̧i̧tjoi̧ pio judi, ja̧di ta̧rëri̧ ëna̧diärëremȩdejȩrȩ pumȩ ji̧ri̧, chiri ütë pio judi tänȩa̧ oa: —Chjadëri̧ ta̧rëchji̧coe —yo̧a̧dejȩrȩ—. Danȩrȩ, oëra̧ti̧ a̧rȩmȩ chiriri pio judiriji̧ri̧ oa, ado cja̧rȩmo̧ pumeji̧ri̧ oa, ado cja̧rȩmo̧ ni̧bärea̧ ma̧ȩ chiaji̧ri̧ oa, ado cja̧rȩmo̧ taru ëbaji̧ri̧ oa yo̧requededibe.

⁵ Danȩrȩ, mȩnȩro̧ ea cjiari̧ baämȩ oa ta̧rërä, goae tarari̧ pjurarea̧ oa ea cjiamȩ oa ta̧rërä, flauta quȩmȩ pjurarea̧ oa ea cjiamȩ oa ta̧rërä, jabechji̧ juchatura̧ cjiadäräpea̧ chiarenȩrȩ pumȩmi̧ damȩ pio ju̧i̧iäpȩmo̧, chiri ütë cji̧däa̧ pio ju̧i̧. Tjamo̧ davä. Mȩnȩro̧ carecareguarea̧ oa ta̧rërä, ado arpa quȩmȩ carecareguarea̧ oa ta̧rërä, cja̧rȩmo̧ carecareguarea̧ oa ta̧rërä, ado eami̧ ea cjiarea̧ oa ta̧rërä, jabechji̧ ju chatura̧ cjiadäräpea̧ chianȩrȩ pumȩmi̧ damȩ pio ju̧i̧iäpȩmo̧, 'ba chia tjamo̧dida' quëna̧ jo̧rȩtapea̧ oa.

⁶ Ado eami̧ pumȩ judi ju chatura̧ cjiadärädëri̧ cjiarä judi, pumȩmi̧ damȩ pio ju̧i̧iäpȩmo̧ ju chatura̧ cjiadärädëri̧ cjiarä judi, jabechji̧ guadia pio judiro̧ tänȩa̧ oaiä, aeno̧a̧ oa cjiadiäpade ma̧i̧ da cjüëtü gärimȩ joëräpȩ —yo̧mȩrȩ ëna̧diärëremȩdejȩrȩ goae tarari̧ ëna̧diäa̧mȩ pio judi.

Ma̧i̧ da cjüëtü gärimȩ joëräpȩ ju̧ri̧ aeno̧a̧ oa cjiarëreji̧ri̧dirȩ Da̧de ja̧ jadü judiro̧

⁷ Ja̧dëa ji̧ pumȩ bubarë ea cjiari̧ baämȩ oa ta̧rëa̧rä, oëra̧ti̧ a̧rȩmȩ chiriri pio judiri a̧dopera̧pea̧ji̧ri̧ pio judiro̧ ta̧rëa̧rä, jabechji̧ ju chatura̧ cjiadärärëreji̧ri̧dirȩ, pumȩmi̧ damȩ pio ju̧i̧iäpȩmo̧ ba chia jo̧rȩtaji̧ri̧rȩ.

⁸ Jabo o judiro̧, büë oa ütararea̧ chiaji̧ri̧ pio judiro̧ goëdepea̧diro̧jo̧ȩ chiri ütë cjo̧ro̧mȩ pio ju̧i̧, judio pio ji̧ri̧iäpȩmo̧ goëdëri̧ cjiaji̧ri̧rȩ aechide ni̧bäpea̧ oa.

⁹ Ado ütë pio ju̧i̧iäpȩ go̧düdäräji̧ri̧rȩ ja̧di ta̧rëri̧ yo̧a̧diro̧jo̧ȩ: —Danȩ ibëa̧ ütë, bucho ana̧ chjadëri̧ cjo̧ro̧tänȩ.

¹⁰ Jabo danȩ, pio mȩnȩ tänȩa̧ oaiä, goae tarari̧ ëna̧diäa̧mȩ pio judi yo̧a̧diibe a̧ro̧rȩ ütëbodärärë pumȩmi̧ damȩ pio ju̧i̧iäpȩmo̧ ju chatura̧ cjiadärätä, a̧ro̧rȩ ea cjiari̧ baämȩ pio ju̧i̧ ta̧rërä.

¹¹ Jabechji̧ pio mȩnȩ tänȩa̧ oaiä, peaja̧di yo̧a̧diibe ju chatura̧ cjiadärädëri̧ cjiaji̧ri̧ pio ji̧ri̧ chjiari, judiro̧ ma̧i̧ dari̧ tüe baämȩ joëräpȩ aeno̧pea̧ pio ju̧i̧ chjiari.

¹² Jabo danȩ ibëa̧ ütë, judio judiro̧ orë, a̧ro̧rȩ no̧mȩ tjamo̧ri ja̧ Juda quȩmȩ chiriri pio judiri baë ëba ma̧na̧rërea̧ pio judiro̧ orë, cjäri̧ madirȩ, mȩnȩ yo̧a̧mi̧ japadëa̧dirȩ. Jabechji̧ pumȩmi̧ damȩ pio ju̧i̧iäpȩmo̧ ju chatura̧ chjadëri̧ jo̧rȩtaji̧ri̧rȩ cjiadärätärea̧ ji̧, cjiadärädëa̧dirȩ. Danȩ ütë, mȩnȩ mitëa̧ pumȩ pio judiro̧dirȩ. Mȩnȩ pio yi Babironiaräpȩ tjamo̧ yo̧ji̧ri̧rȩ ja̧bepa tänȩa̧ pio judiro̧dirȩ. Chadaca quȩmȩde cja̧rȩmȩrȩ. Ado cja̧rȩmo̧ üdë Mechaca quȩmȩde. Ado cja̧rȩmo̧ üdë Abenego quȩmȩde. Pio judiro̧dirȩ mȩnȩ yo̧a̧mi̧ japadëji̧ri̧ judiro̧. Ta̧rë ja̧bodëdiro̧mȩ ibëa̧ ütë. Jabechji̧ mȩnȩ quëna̧mȩ ütë pio ji̧ri̧ ba chia jo̧rȩtatärea̧ ji̧, ba chia jo̧rȩtadë madiro̧jȩrȩ. Ado pio ju̧i̧ uëri judiro̧ orora̧ japea̧ pumȩmi̧ damȩ pio ju̧i̧iäpȩmo̧ ba chia jo̧rȩtatärea̧ ji̧, mȩnȩ jëdano̧ tänȩa̧ pumȩmi̧ damȩ pio ju̧i̧iäpȩmo̧ chacjiamȩri̧ jo̧rȩtatärea̧ ji̧, cjäri̧ madiro̧jo̧ȩ, japadë madirȩ —yo̧ji̧ri̧rȩ poë aechide yo̧a̧diro̧jȩrȩ judio pio ji̧ri̧iäpȩmo̧.

¹³ Pio ju̧i̧ ta̧rëa̧ oaiä, Nabucodonocho judi a̧dë chjäte ërecjiapea̧de, ma̧ cjüëtü jo̧rȩtamȩrȩ. Ado ji̧ri̧ pio jȩaiäpȩ ëba jana̧tä yo̧a̧dejȩrȩ jibëa̧ guadia ji̧ri̧. Tjamo̧ davä. Chadaca pio ju̧i̧, Mechaca pio ju̧i̧, ado Abenego pio ju̧i̧ ëba jana̧tä yo̧a̧dejȩrȩ. Ado ja̧dëa ji̧ guadia judiro̧ pio ji̧ri̧ ëba go̧düdäräa̧rä,

¹⁴ Nabucodonocho pio judi ërecjiamȩrȩ yo̧a̧dejȩrȩ: —Danȩrȩ, ¿tjamo̧ri̧ yo̧a̧diro̧coe pio dibë chjiari? ¿Mȩnȩro̧ tjarari̧rȩ tjamo̧ri̧ ba chia jo̧rȩtadëri̧ cjiarenȩro̧jȩrȩ cüdë quëna̧ ütë pio ji̧ri̧? ¿Mȩnȩro̧ tjamo̧ri̧ ju chatura̧ cjiadärädëri̧ cjiarenȩro̧jo̧ȩ cüdë cji̧däa̧ pumȩmi̧ da pio ju̧i̧, cüdë orora̧ japea̧ pio ju̧i̧?

¹⁵ Jabo danȩrȩ, cüdë dibë chjaodëri̧ bape chjaotärea̧ ji̧, mȩnȩro̧ ju chatura̧ cjiadärädëa̧ ba oa chjaodëri̧ bape chjaotärea̧ ji̧, jabechji̧ cjäri̧ri̧ cjiamȩrȩ darequededibe. Ado pio ju̧i̧iä ado japarea̧ yürüparequededibe mȩnȩro̧ chjadëri̧ japapea̧ oa. Jabo danȩrȩ, chjadëri̧ ta̧rëdiäpea̧de yaba̧ jiadarea̧ decjiari̧. Ado pio ju̧i̧iä yo̧requededibe. Mȩnȩro̧ ea cjiamȩ pio ju̧i̧ ado ta̧rërä, pjurarea̧ ji̧ra̧ oa ea cjiamȩ pio ju̧i̧ ado ta̧rërä, ado carecareguarea̧ ji̧ra̧ oa ado ta̧rërä, jabechji̧ chjadëri̧ ju chatura̧ cjiadärächji̧vä cüdë jëdano̧a̧ pumȩmi̧ damȩ pio ju̧i̧ chjacjiamȩri̧ jo̧rȩtapea̧ oa. Jabo mȩnȩro̧ jiadarä judi, mȩnȩro̧ ju chatura̧ cjiadärädëri̧ cjiarä judi, jabechji̧ pio cüdë tänȩa̧ oa chjaodëri̧ aeno̧a̧ oa cjiadiäpanȩrȩ ma̧i̧ dari̧ tüe baämȩ joëräpȩ ju̧ri̧. Ado pio cüdë dibë pio ju̧ri̧pȩ aeno̧rä judi, ¿chjiacjivadi ütëbea üdë pio dibë chjiari tuti japatäremȩ judi? Cjäri̧ made, jiro decjiade —yo̧mȩrȩ ni̧bärëremȩdejȩrȩ ütë judi Da̧de ja̧ jadü tjarari̧ oa.

¹⁶ Jabo judiro̧ dëbë yo̧a̧diro̧jo̧ȩ ütë oa: —Danȩ ibëa̧ ütë Nabucodonocho, a̧ro̧rȩ pio mȩa goaeri̧ dëbë yo̧rea̧mi̧dërea̧ro̧mȩ. "Jabechji̧ mȩnȩ jëdano̧a̧ pio ju̧i̧ chjacjiamȩri̧ jo̧rȩtaparea̧ro̧jo̧ȩ" dëbë yo̧rea̧ dadërea̧rȩ.

¹⁷ Ado a̧ro̧rȩ ma̧i̧ da tüe baämȩ joëräpȩ aeno̧a̧ oa cjiarä judi, jabechji̧ pio ibë chjiari tuti japapai̧ dade davä ibëa̧ Ütë judi, a̧ro̧rȩ ba chia jo̧rȩta̧ Ütë pio judi. Jabechji̧ tjamo̧ri̧ go̧dü tänȩpai̧ dadiibe davä na̧ chja̧oeri pio judiri.

¹⁸ Jaboti̧ri̧ eami̧ oa japadërä judi, ibëa̧ Ütë judi pio ibë chjiari eami̧ oa tuti japadërä judi, jabechji̧ ibë a̧dodëräbo quëna̧dëparea̧ro̧jȩrȩ mȩnȩ quëna̧ ütë pio ji̧ri̧. Ado peaja̧di chjacjiamȩri̧ jo̧rȩtadëparea̧ro̧jo̧ȩ mȩnȩ orora̧ cji̧däa̧ pumȩmi̧ damȩ pio ju̧i̧iäpȩmo̧ —dëbë yo̧a̧diro̧jo̧ȩ.

Ütë tjamo̧ judi tuti japarëremȩde Da̧de ja jadü pio ji̧ri̧ chjiari

¹⁹ Ado Nabucodonocho judi judiro̧ yo̧a̧ pio ju̧i̧ ta̧rëa̧ oaiä a̧dë chjäte ma̧ cjüëtüri̧ jo̧rȩtamȩpea̧de, dacho üdë da ga̧ri̧pe bagari̧. Ado ma̧ cjüëtü tjamo̧ri̧ jo̧rȩtamȩpea̧rä to̧bari̧ yo̧a̧dejȩrȩ guadia ji̧ri̧ ji̧dë u̧i̧ cjüëtüpe bagari̧ japatä ma̧i̧ dari̧ tüe baämȩ joë oa. Jabechji̧ cjüëtü tjamo̧rërea̧ ji̧, ji̧dë u̧i̧ cjüëtü oa japatä yo̧a̧dejȩrȩ. Cja̧rȩmȩ cjüëtümi̧ dari̧ cjiarërea̧ ji̧, jabechji̧ 7 cjüëtümi̧ dari̧ cjüëtüparȩtä yo̧a̧dejȩrȩ.

²⁰ Ja̧dëa ji̧ jibëa̧ guadia pio ji̧ri̧, o ji̧ri̧iä ji̧dë u̧i̧ ju chiaji̧ri̧ guadia pio ji̧ri̧ chjuari̧ yuratä yo̧a̧dejȩrȩ ütë judi. Ado ja̧dëa ji̧ yura̧ oa cjiaji̧ri̧ oa ma̧i̧ dari̧ tüe baämȩ joëräpȩmo̧ aeno̧tä yo̧a̧dejȩrȩ.

²¹ Ado pio ju̧i̧iä pio jiro guadia judiro̧ chjuari̧ yura̧diro̧jȩrȩ jibëa̧ ichi oa, jibëa̧ tabo. Ado ja̧dëa ji̧ idë go̧io ëte, ma̧i̧ dari̧ tüe baämȩ joëräpȩ aeno̧a̧diro̧jo̧ȩ. Jibëa̧ ina̧rea̧ chiaji̧ri̧ oa, dairibo ina̧rea̧ chiaji̧ri̧ oa, ado tjübërä puria̧ oa cjiaji̧ri̧ oa aeno̧a̧diro̧jȩrȩ.

²² Jabo chiri ütë cjo̧ro̧mȩ pio judi tüe baämȩ joë oa a̧dë chjäte cjüëtüri̧ jëdano̧tä yo̧a̧rea̧ oaiä, jabechji̧ yura̧ oa cjiareji̧ri̧ pio ji̧ri̧ cjo̧dë tjoräpȩmo̧ aeno̧reji̧ri̧ guadia pio judiro̧ ja̧boa̧dirȩ. Jabechji̧ a̧dë chjäte cjüëtüri̧ tüea̧ oaiä, a̧dë chjäte gäriri̧ tüea̧ oaiä, jabechji̧ tüe ja̧bo tänȩa̧ oa cjiareji̧ri̧dirȩ chjaodëri̧.

²³ Ado aeno̧a̧ oa cjiaji̧ri̧ pio judiro̧, jabechji̧ a̧rȩdäräa̧dirȩ ma̧i̧ da tüe baämȩ joëräpȩ, ma̧i̧ dari̧ gäri cjitëmȩräpȩ. Tjamo̧ davä. Chadaca judi, Mechaca judi, ado Abenego judi yura̧ oa cjiaji̧ri̧rȩ a̧rȩdärärëreji̧ri̧dirȩ cjo̧dëräpȩ.

²⁴ Ja̧dëa ji̧ Nabucodonocho judi dae charemȩrȩ chjaodëri̧ cjitëno̧rëremȩde, a̧dë chjäte ana̧ri̧ jo̧rȩtamȩrȩ dacho bëremi̧ cjiamȩrȩ. Ado chjaodëri̧ iëno̧ë ta̧rëno̧a̧dejȩrȩ jȩa chi̧dëeaji̧ri̧ pio ji̧ri̧: —Jabo danȩrȩ, chjadëri̧ yo̧chji̧coe —yo̧a̧dejȩrȩ—. ¿Tjarari̧ oari maearë yura̧ oa cjiaji̧ri̧ oa ma̧i̧ dari̧ tüe baämȩ joëräpȩ aeno̧a̧ oa cjiadiädëa̧dirȩ? —iëno̧ë ta̧rëno̧a̧dejȩrȩ. Ado judiro̧: —Dë ibëa̧ ütë, tjarari̧ maearë aeno̧a̧ oa cjiadiäa̧dirȩ.

²⁵ Jabo Nabucodonocho judi cjoai̧tä dae cjiamȩrȩ dëbë yo̧a̧dejȩrȩ: —Jabo danȩrȩ, jadüchiami̧ oari ji̧ri̧ darequedejȩrȩ. Jabechji̧ tüea̧ oa cjiadëji̧ri̧ oa darequedejȩrȩ, tai̧ cjiaji̧ri̧ oa. Ado cja̧rȩmȩ üdë, cüdë dadëa̧ pio judi jabechji̧ a̧dërimȩ mu̧i̧tjoi̧mi̧ dade.

²⁶ Ja̧dëa ji̧ Nabucodonocho pio judi jäeno̧a̧de joë ya queri̧räpȩ. Ado ja̧di ta̧rëri̧ ëna̧diämȩrȩ ëna̧diäa̧dejȩrȩ: —Danȩrȩ, a̧dë chjäte Ütë pio ju̧i̧ ja̧ oa ja̧bepaji̧ri̧ oa yo̧requededibe —yo̧a̧dejȩrȩ—. Aja̧, Chadaca, Mechaca, ado Abenego go̧düchji̧vä cjo̧dëri pio judiri. Jabechji̧ jauëräpȩmo̧ ma̧na̧chji̧vä —ëna̧diäa̧dejȩrȩ. Ado pio ju̧i̧iä Chadaca judi, Mechaca judi, ado Abenego judi ma̧i̧ dari̧ tüe baämȩ joëri pio judiri go̧düa̧dirȩ.

²⁷ Ado judiro̧ go̧düa̧ji̧ri̧ oa, tjoro tänȩrëreji̧ri̧diro̧jȩrȩ tjamo̧ yo̧ji̧ri̧ judiro̧. Tjamo̧ davä. Ütë ja̧ oa ja̧bepaji̧ri̧ pio judiro̧, ado chi̧dëeaji̧ri̧ pio judiro̧borë goë po̧ra̧ cjiaji̧ri̧rȩ tjoro tänȩa̧diro̧jȩrȩ chjadëri̧ dapea̧ oa, irä dapea̧ oa. Jabechji̧ cjo̧dërä aenoa̧ oa cjiaräbo, tüea̧ oa cjiadëa̧dirȩ. Jabomo̧ tocoi̧mi̧ oa tüdë madejȩrȩ. Jibëa̧ icjara üdë, jibëa̧ cö̧ üdë, jabechji̧ chjadëri̧ cjiadiäa̧de judiro̧ jabë cjo̧dërä aeno̧dëa̧mi̧ dari̧. Ado jibëa̧ chjibo üdë tüea̧ oa cjiatärea̧ ji̧, jabechji̧ chjadë marëremȩde. Jabechji̧ chjä oa pji̧dädëmi̧ dari̧ cjiadiä marëreji̧ri̧dirȩ.

²⁸ Ja̧dëa ji̧ Nabucodonocho judi irä daea̧ oaiä, jabechji̧ to̧bari̧ yo̧rëremȩde, ja̧di ta̧rëri̧ yo̧mȩrȩ: —Chacjiamȩri̧ jo̧rȩtamȩrȩ ni̧bärequede pio jiro oari ja̧ Ütë oa —yo̧a̧de—. Tjamo̧ davä. Chadaca judi, ado Mechaca judi, ado Abenego judi chjacjiamȩri̧ jo̧rȩta̧ Ütë pio ju̧i̧iäpȩmo̧ chjacjiamȩri̧ ni̧bäreconȩ. Jabechji̧ tuti japarea̧ chiamȩmi̧ darë tuti chjadüa̧dejȩ davä jibëa̧ mu̧i̧tjoi̧ pio ju̧i̧ pio jiro oari pio ji̧ri̧ chjadëri̧ chjätärea̧ yürüpea̧ oa, pio jȩaiä chjuari̧ quëna̧ji̧ri̧ pio ji̧ri̧iäpȩmo̧ chjadëri̧ a̧dopea̧ oa. Tjamo̧ davä. Pio jȩaiäpȩmo̧ chjacjiamȩri̧ jo̧rȩtariä cjo̧ro̧ji̧ri̧ pio ji̧ri̧ chjadëri̧ go̧dürea̧ dapea̧ oa tuti chjadüa̧dejȩ a̧dërimȩ mu̧i̧tjoi̧ pio ju̧i̧. Jabechji̧ cüdë yo̧a̧ pio ju̧i̧ ta̧rë ja̧botärea̧ ji̧, cjäri̧ madirȩ, jibëa̧ Ütë pio ju̧i̧ chjuari̧ quëna̧ji̧ri̧rȩ, chjuari̧ jiade ta̧rëa̧diro̧coe jibëa̧ Ütë pio ju̧i̧iäpȩmo̧ ma chjacjiamȩri̧ jo̧rȩtapea̧ oa. Jabechji̧ ado cja̧rȩmo̧ ütë oa tjamo̧ri̧ quëna̧dëri̧ cjiaji̧ri̧rȩ, jibëa̧ Ütë pio ju̧i̧iäpȩmo̧ ma tjamo̧ri̧ quëna̧tämi̧ cjiaji̧ri̧rȩ, jibëa̧ icjara oa ja̧bopea̧ oa yürüa̧diro̧jo̧ȩ chjaodëri̧.

²⁹ Ado ja̧di tara ma̧ȩ pea chja oa yürümȩrȩ yo̧requededibe mȩnȩro̧ pio jiro ma̧ȩrä cjo̧ro̧pea̧ oa, mȩnȩro̧ pio yoa ma̧ȩ oa jiadachea oa, mȩnȩro̧ tüdüa̧mi̧ darä cjo̧ro̧pea̧ oa. Danȩrȩ, pio jiro oari ja̧ Ütë judi pio ji̧ri̧ chjiari ja̧di dari̧ tuti japea̧ tara, jabechji̧ pio cüdë, chiri ütë cjo̧ro̧mȩ pio judi ma̧ȩ ba chia oa chjadürequede ca̧ chja̧oerä cjo̧ro̧ji̧ri̧ ütëbo oa, eami̧ chirirä cjo̧ro̧ji̧ri̧ pumȩ ütëbodärä oa. Jabechji̧ eami̧ pumȩ üdë pio jiro oari ja̧ Ütë pio ju̧i̧ chjiari chjai̧dëri̧ ni̧bärä judi, tuti budoa̧ oa cjiadiäpade jibëa̧ icjara üdë, jadüchiami̧ pënȩpe bagarea̧mi̧ dari̧. Ado jibëa̧ bë üdë iëchädäräa̧ oa cjiapade ji̧dëri̧. Jabechji̧ ta̧dëremȩ üdë cja̧rȩmȩrämo̧ china̧ri̧ aeno̧a̧ oa cjiapade. Ado pio ju̧i̧iä yo̧requededibe. Eami̧ pumȩ üdë, eami̧ chirirä cjo̧ro̧mȩ pumȩ üdë, eami̧ ma̧ȩ oa ni̧bämȩ pumȩ üdë pio ji̧ri̧ ja̧ Ütë pio ju̧i̧ chjiari chjai̧dëri̧ ni̧bärä judi, ja̧di dari̧ bape chjaoa̧ oa cjiapadirȩ. Jabechji̧ pio jiro oari ja̧ Ütë judi ana̧ri̧ tuti japarea̧ chiamȩ tara, judi pio ji̧ri̧ chjadëri̧ chjätärea̧ yürüa̧ tara, jabechji̧ pio ju̧i̧ chjiari chjai̧dëri̧ ni̧bärea̧mi̧dëde. Jabechji̧ pio jiro Ütë judi jibëa̧ pumȩ ji̧ri̧ chjätä tänȩa̧mi̧ chjätä tänȩrea̧ chiadë madirȩ ütë judiro̧ orë. Ado pio ju̧i̧iä pio ju̧i̧ chjiari chjai̧dëri̧ ni̧bärea̧mi̧dëde —yo̧mȩrȩ ma̧ȩ ba chia oa yürürëremȩde chiri ütë cjo̧ro̧mȩ judi jibëa̧ chja̧oerä cjo̧ro̧ji̧ri̧ pio judiro̧ ütëborë pio jiro ma̧ȩ pea chjarä cjo̧ro̧pea̧ oa, judiro̧ tüdüa̧mi̧ darä cjo̧ro̧pea̧ oa.

³⁰ Ado ja̧dëa ji̧ chiri ütë cjo̧ro̧mȩ judi ji̧dë u̧i̧ ba chia ja̧beparea̧ oa ano̧ mire ja̧bepa tänȩrëremȩdejȩrȩ pio jiro oari ji̧ri̧. Tjamo̧ davä. Chadaca judi, Mechaca judi, ado Abenego judi tjamo̧ yo̧ji̧ri̧rȩ cjo̧ro̧rërea̧ ji̧, ji̧dë u̧i̧ ba chia oa ano̧ mire ja̧bepaji̧ri̧pea̧dirȩ Babironia quȩmȩ chiriräpȩ ju̧ri̧.