Da̧de 2 - Biblia Pume

Nabucodonocho judi canȩjä mo̧a̧mȩrȩ ja̧di cjia ja̧dicjia mo̧a̧rëremȩde

¹ Ado cja̧rȩmo̧ gȩnȩrä, Nabucodonocho pio judi jabë yo̧a̧ri̧ ui nö̧ta ütëmȩrȩ cjo̧ro̧rërea̧rä, jabechji̧ canȩjä mo̧a̧rëremȩde, ja̧di cjia ja̧di cjia mo̧a̧mȩrȩ. Ado jënȩ darämi̧ cjia̧ pio ju̧i̧iä bücjüri̧ cjia tjamo̧pea̧de, mo̧a̧rea̧mi̧dëpe bagari̧.

² Ado cjitëno̧ ëte, chjaodëri̧ yo̧a̧dejȩrȩ jibëa̧ mu̧i̧tjoi̧ ji̧ri̧ ëna̧diätä, jauëchja cjiari̧ japarea̧ dabaji̧ri̧ pio ji̧ri̧ ëna̧diätä. Ado pio ju̧i̧iä ëna̧diäepea̧diro̧jȩrȩ. Tjamo̧ davä. To̧je go̧a̧ji̧ri̧ pio ji̧ri̧, to̧je tuti go̧a̧rea̧ chiaji̧ri̧ pio ji̧ri̧, yo̧to̧parea̧ chiaji̧ri̧ pio ji̧ri̧, yo̧mirea̧ dabaji̧ri̧ pio ji̧ri̧, ado büë oa ütararea̧ dabaji̧ri̧ pio ji̧ri̧ ëna̧diäepea̧diro̧jȩrȩ. Ado judiro̧ ütëborë ütë pio ju̧i̧iäpȩ go̧düdäräa̧rä, jabechji̧ chiri ütë cjo̧ro̧mȩ ja̧ dëbëräpȩ cjiadäräa̧dirȩ.

³ Ado ja̧dëa ji̧ ütë pio judi yo̧rëremȩdejȩrȩ: —Danȩrȩ, cüdë canȩjä canȩjä mo̧a̧ pio ju̧i̧iä, cüdë ja̧di cjia ja̧di cjia mo̧a̧ pio ju̧i̧iä, jabechji̧ bücjüri̧ cjia tjamo̧pea̧requede, 'tjana̧ na̧rȩcji̧vadi, tjana̧ yo̧cji̧vadi' quëna̧ jo̧rȩtamȩrȩ. Ado pio ju̧i̧iä ma̧ȩ chjadüa̧requededibe mȩnȩro̧ jana̧tä, mȩnȩro̧ pio coa chjadëri̧ goë ni̧bätä —yo̧a̧dejȩrȩ.

⁴ Ado pio ju̧i̧ ta̧rëa̧ oaiä, büë ütararea̧ dabaji̧ri̧ pio judiro̧ dëbë yo̧a̧diro̧jo̧ȩ ütë oa, Arameo ni̧bärea̧ ma̧ȩra̧ ni̧bäji̧ri̧rȩ. Ja̧di ta̧rëri̧ dëbë yo̧a̧diro̧jo̧ȩ: —Aja̧ ütë, bucho ana̧ cjo̧ro̧tänȩ —yo̧a̧diro̧jo̧ȩ—. Danȩ ibëa̧ ütë, chjadëri̧ yo̧ibe mȩnȩ pio yabo canȩjäa̧ pio ju̧i̧. Ado ja̧dëa ji̧ a̧ro̧rȩ pio ju̧i̧ chjadëri̧ ta̧rë ëte, jabechji̧ chjadëri̧ goë ni̧bäparea̧ro̧mȩ pio ju̧i̧ chjiari. Jabechji̧ yo̧ibe yabochja —yo̧a̧diro̧jo̧ȩ.

⁵ Jabo chiri ütë cjo̧ro̧mȩ pio judi dëbë yo̧mȩrȩ yo̧a̧dejȩrȩ büë ütararea̧ dabaji̧ri̧ pio ji̧ri̧iäpȩmo̧. —Jabo danȩrȩ, cüdë canȩjäa̧ pio ju̧i̧ yo̧dëparequededibe. Jabechji̧ mȩnȩro̧ jauëchja cjiari̧ japarea̧ daba tara, jabechji̧ pio mȩnȩro̧ dibëa̧ ma̧na̧ri̧ jo̧rȩtaji̧ri̧rȩ yo̧pea̧ chiarenȩro̧coe cüdë canȩjäa̧ pio ju̧i̧, pio coaiä ta̧rëdëji̧ri̧borë. Aja̧, ja̧di ta̧rëri̧ yo̧requededibe, ano̧ mire jo̧rȩtadëpamȩrȩ. Aja̧, cüdë canȩjäa̧ pio ju̧i̧ chjadëri̧ yo̧ ëte, peaja̧di chjadëri̧ goë ni̧bäpea̧ chiarenȩro̧coe. Jabechji̧ chjaocjiadëmȩrȩ yo̧requededibe. Ado danȩrȩ, mȩnȩro̧ pio coa chjadëri̧ a̧dodërä judi, cüdë canȩjä mo̧a̧ pio ju̧i̧ chjadëri̧ goë ni̧bädërä judi, jabechji̧ ja̧bo tänȩa̧ oa cjiapanȩrȩ. Jabechji̧ dibëa̧ icjararemȩ üdë yo̧a̧ri̧ pënȩpe bagari̧ quiquiri chia̧ oa cjiapade. Ado pio ju̧i̧ uëri dibëa̧ bëremȩ pio judi iëchäa̧ oa cjia mapade ji̧dëri̧.

⁶ Jabo mȩnȩro̧ coa chjadëri̧ yo̧rä judi, cüdë canȩjä mo̧a̧ pio ju̧i̧ chjadëri̧ dëbë yo̧rä judi, jabechji̧ a̧dë chjäte ba chia oa yürüparequededibe. Ado pio ju̧i̧ uëri ba chia tjamo̧räpȩ cha tänȩparequededibe peaja̧di, pumȩ judiro̧ dibë ba chia darea̧mi̧ dari̧. Jabechji̧ chjadëri̧ yo̧chji̧coe —yo̧mȩrȩ yo̧a̧dejȩrȩ.

⁷ Jabo judiro̧ chjadëri̧ yo̧tärea̧ ji̧, dëbë yo̧a̧diro̧jo̧ȩ, bücjüri̧ cjia tjamo̧ji̧ri̧rȩ: —Danȩ ütë, cjäri̧ri̧ cjia daibe. Jabechji̧ mȩnȩ ibë yabochja chjadëri̧ yo̧rä judi, mȩnȩ canȩjä mo̧a̧ pio ju̧i̧ yabochja yo̧rä judi, dëdë, chjaodëri̧ goë ni̧bäparea̧ro̧mȩ pio ju̧i̧ chjiari.

⁸ Jabo ütë pio judi dëbë yo̧a̧dejȩrȩ: —Jabo cjäri̧ manȩrȩ, mȩnȩro̧ pio coa chjaodëri̧ dëbë yo̧tärea̧ ji̧, cüdë yo̧a̧mi̧ goë ni̧bätärea̧ ji̧, cjäri̧ marenȩro̧coe, cuchu chiari̧ dëbë yo̧renȩro̧coe, jo̧ȩra̧pe chjadëri̧ dëbë yo̧tärea̧ ji̧.

⁹ Ado pio ju̧i̧iä ado yo̧requededibe. Jabechji̧ mȩnȩro̧ coa chjadëri̧ yo̧dërä judi, cüdë canȩjä mo̧a̧ pio ju̧i̧ chjadëri̧ goë ni̧bädërä judi, jabechji̧ mȩnȩro̧ ütëborë cja̧rȩmȩ jo̧rȩtarea̧ maeara̧ bape chjaoa̧ oa cjiapanȩrȩ. Jabechji̧ jabërä goadi ni̧bäa̧ jironȩrȩ pio coaiäpȩmo̧ ma̧ȩ chjádë yürüpea̧ oa, pio coaiäpȩmo̧ ji̧dëdieno̧ ni̧bäpea̧ oa, ji̧dë ma iëno̧ iëno̧ ta̧rëpea̧ oa. Jabechji̧ cüdë pio dibëiä ji̧dë ma yo̧tä yo̧chea oa, jabechji̧ jabërä goadi yo̧a̧ jironȩrȩ cüdë ano̧ mire jo̧rȩtapea̧ oa. Jabo cjäri̧ marequede, ano̧ mire jo̧rȩtadëparequede. Jabechji̧ cüdë canȩjä mo̧a̧ pio ju̧i̧ chjadëri̧ yo̧chji̧coe, dibëa̧ ma̧na̧ri̧ jo̧rȩtaji̧ri̧rȩ. Jabechji̧ mȩnȩro̧ pio ju̧i̧ chjiari chjadëri̧ dabarea̧ chiarä judi, pio coaiä ta̧rëdë ëte cüdë canȩjä mo̧a̧ pio ju̧i̧ chjiari chjadëri̧ dabarea̧ chiarä judi, 'peaja̧di pio coaiäpȩmo̧ chjadëri̧ goë ni̧bärea̧ dapadiro̧coada' quëna̧ jo̧rȩtamȩrȩ yo̧requededibe —yo̧a̧dejȩrȩ.

¹⁰ Jabo büë oa ütararea̧ dabaji̧ri̧ pio judiro̧ dëbë yo̧a̧diro̧jo̧ȩ: —Cjäri̧ made ütë. Mȩnȩ yo̧a̧mi̧ japarea̧mi̧dëde —yo̧a̧diro̧jo̧ȩ—. Jabechji̧ eami̧ pumȩ üdë pio yoa chirirä cjo̧ro̧mȩ pio judi mȩnȩ yo̧a̧mi̧ japarea̧mi̧dëde. Jabechji̧ ja̧di dari̧ japapea̧ ji̧ dabadë marea̧rȩ a̧ro̧rȩ ütëborë. Ado o judiro̧ peaja̧di dabadë madiro̧jo̧ȩ. Jabechji̧ canȩjä mo̧a̧ pio ju̧i̧ chjadëri̧ ta̧rëa̧rämo̧ goë ni̧bärea̧mi̧ dade. Ta̧rëdë ëte goë ni̧bärea̧mi̧dëde —yo̧a̧diro̧jo̧ȩ—. Ado dane, eami̧ ütërë, eami̧ chiriräpȩ cjo̧ro̧mȩ ütërë jënȩ canȩjä mo̧a̧ ji̧, cjäri̧ madejȩrȩ, jȩa chi̧dëeaji̧ri̧ pio ji̧ri̧ ta̧rë tänȩdë ëte goë ni̧bä tänȩdë madejȩrȩ. Jabechji̧ jënȩ chiri ütë ba chia tjamo̧mȩborë, jënȩ guadia buba tjamo̧ oa goamȩborë, ado jënȩ chiri ji̧ra̧ oa boadäräa̧mȩborë, jabechji̧ jënȩ canȩjäa̧ pio ju̧i̧ ta̧rë tänȩdë ëte, goë ni̧bätä yo̧dë madejȩrȩ. Tjamo̧ davä ibëa̧ ütë, jauëchja cjiari̧ japarea̧ dabaji̧ri̧ pio ji̧ri̧, to̧je goarea̧ chiaji̧ri̧ pio ji̧ri̧, ado to̧je tuti go̧a̧rea̧ chiaji̧ri̧ pio ji̧ri̧, ado büë oa ütararea̧ dabaji̧ri̧ pio ji̧ri̧, cjäri̧ madejȩrȩ, chjadëri̧ ta̧rë tänȩdë ëte goë ni̧bä tänȩtadë madejȩrȩ.

¹¹ Ado pio ju̧i̧iä yo̧rea̧ro̧mȩ ibëa̧ ütë, mȩnȩ pio ibëiä cjo̧dëa̧ pio judi, jabechji̧ japarea̧mi̧dëde. Jabechji̧ japadai̧ darea̧rȩ jabo a̧dëräpȩ cjiaji̧ri̧ pio judiro̧mo̧rȩ yo̧pai̧ da jirodirȩ —yo̧a̧diro̧jo̧ȩ—. Tjamo̧ davä. Pio judiro̧mo̧rȩ yo̧pai̧ da jirodiro̧mȩ mȩnȩ canȩjä mo̧a̧ pio ju̧i̧ chjiari. Jabo cjäri̧ madiro̧ibe, ibëa̧ chjarerä cjo̧ro̧ ma ja̧didë —yo̧ji̧ri̧rȩ dëbë yo̧rëreji̧ri̧diro̧jo̧ȩ ütë pio ju̧i̧iäpȩmo̧ büë oa ütararea̧ dabaji̧ri̧ pio judiro̧.

¹² Ado chiri ütë cjo̧ro̧mȩ judi pio ju̧i̧ ta̧rëa̧ oaiä, a̧dë chjäte ërecjiapea̧de. Ado ma̧ cjüëtü tjamo̧mȩrȩ ütëbo oa ja̧bo tänȩtä yo̧ë cji̧därëremȩdejȩrȩ jibëa̧ mu̧i̧tjoi̧ ji̧ri̧. Tjamo̧ davä. Jauëchja cjiari̧ japarea̧ dabaji̧ri̧ ütëbodärä oa, Babironiaräpȩ dabarea̧ chiaji̧ri̧ ütëbodärä oa ja̧bo tänȩtä yo̧ë cji̧däa̧dejȩrȩ, jibëa̧ dëbëräpȩ cjiaji̧ri̧ pio ji̧ri̧, ado jibëa̧ dëbëräpȩ cjiadëji̧ri̧bo.

¹³ Ado ütë pio judi yo̧a̧ oaiä, jabechji̧ Da̧de pio ju̧i̧bo ja̧bo tänȩpea̧ oa na̧e tai̧rëreji̧ri̧dirȩ oari judiro̧, jibëa̧ jadü pio ji̧ri̧bo. Jabechji̧ judiro̧ ütë ja̧ dëbëräpȩ cjiadëräbo, jabechji̧ pio ji̧ri̧bo ja̧bo tänȩpea̧ oa yo̧ chjadürëremȩde ütë judi.

¹⁴ Ado chiri ütë cjo̧ro̧mȩ pio ju̧i̧ jidaji̧ri̧ guadia ja̧ ütë pio judi Arioco quȩmȩrëremȩde. Ado judi chiri ütë pio ju̧i̧iä ta̧rëa̧ oaiä, jabechji̧ jauëchja cjiari̧ japarea̧ dabaji̧ri̧ pio ji̧ri̧ ütëbo oa ja̧bo tänȩpea̧ oa acji tai̧rëremȩde. Jabo ja̧dëa ji̧, judi Da̧de pio ju̧i̧iäpȩ acji go̧düdäräa̧rä, jabechji̧ urëdi tjamo̧ oa jo̧rȩtamȩrȩ ma̧ȩ goae tjamo̧ra̧ ni̧bärëremȩdejȩ Da̧de judi, chjadëri̧ ütarë jo̧rȩtamȩrȩ.

¹⁵ Ja̧di ta̧rëri̧ yo̧mȩrȩ iëno̧ë ta̧rëa̧dejȩ: —Jabo danȩ Arioco, ¿tjana̧ ju̧i̧iä chiri ütë cjo̧ro̧mȩ pio judi chjaodëri̧ ja̧bo tänȩrea̧ jo̧rȩtamȩpea̧de jauëchja cjiari̧ japarea̧ dabaji̧ri̧ pio ji̧ri̧? —iëno̧ë ta̧rëa̧dejȩ—. Judi ja̧di dari̧ jo̧rȩtadërërea̧ ji̧, pio ibë ba chia dami̧ dari̧ jo̧rȩtarërea̧ ji̧, ¿tjana̧ ju̧i̧iä chjaodëri̧ ano̧ mire jo̧rȩtamȩpea̧diibe? —iëno̧ë ta̧rëa̧dejȩ. Ado Arioco judi Da̧de pio ju̧i̧iä ta̧rë ëte, jabechji̧ chjö̧na̧i̧ oa ta̧rë tänȩa̧dejȩ. Aja̧, ütë judi canȩjäa̧ pio ju̧i̧ chjiari, ado jauëchja cjiari̧ japarea̧ dabaji̧ri̧ pio judiro̧ goë ni̧bärea̧ dadëa̧ pio ju̧i̧ chjiari, ado ütë üdë ërecjiape bagapea̧ pio ju̧i̧ chjiari ta̧rë tänȩa̧dejȩ.

¹⁶ Ado pio ju̧i̧iä Da̧de pio judi jäeno̧a̧dejȩ chiri ütë cjo̧ro̧mȩ pio ju̧i̧iäpȩ ni̧bäpea̧ oa. Ja̧di ta̧rëri̧ yo̧mȩrȩ yo̧rëremȩdejȩ: —Danȩ ütë, cjäri̧ri̧ cjia dacoe —yo̧a̧dejȩ—. Jabechji̧ jauëchja cjiari̧ japarea̧ dabaji̧ri̧ pio ji̧ri̧ jëreeamȩrȩ ja̧bo tänȩdëibe, jabo cjäri̧ri̧ cjia daibe. Jabechji̧ a̧ro̧rȩ chjadëri̧ dabarea̧ dapea̧ oa, mȩnȩ canȩjä canȩjä mo̧a̧ pio ju̧i̧ chjiari chjadëri̧ na̧e chiarea̧ dapea̧ oa, jabechji̧ jëreeadëvä pio ibë ja̧bo tänȩpea̧ oa, jabo japamitë cjo̧ro̧rea̧ yürüibe, aro̧rȩ pio mȩa chjadëri̧ a̧dopea̧ oa, mȩnȩ canȩjäa̧ pio ju̧i̧ chjiari chjadëri̧ goë ni̧bärea̧ dapea̧ oa. Jabechji̧ cjäri̧ri̧ cjia daibe ca̧ ütë —yo̧a̧dejȩ.

Da̧de judi Nabucodonocho pio ju̧i̧ nö̧ta ni̧bä ëte, cjo̧dërëremȩde jibëa̧ jadü pio ji̧ri̧ nö̧ta Ütë tjamo̧ pio ju̧i̧iä, pio jibëiäpȩmo̧ goë ni̧bärea̧ yürütä, pio jibë ja̧bo tänȩchea oa

¹⁷ Ja̧dëa ji̧ Da̧de judi baädäräa̧mȩrȩ chjö̧na̧i̧ oa ni̧bä chjaoa̧dejȩrȩ jibëa̧ jadü ji̧ri̧, jënȩ ta̧rëa̧ pio ju̧i̧, chiri ütëmȩ pio judi yo̧a̧ pio ju̧i̧. Tjamo̧ davä. Anania pio ju̧i̧, Michae pio ju̧i̧, ado Acharia pio ju̧i̧bo chjö̧na̧i̧ oa ta̧rë tänȩa̧dejȩrȩ.

¹⁸ Ado ja̧dëa ji̧ ja̧di ta̧rëri̧ yo̧a̧dejȩrȩ: —Danȩrȩ, a̧dëräpȩ cjiamȩ Ütë pio ju̧i̧iä goë cjo̧dëchji̧vä —yo̧a̧dejȩrȩ—. Jabechji̧ ibë cjäri̧ri̧ cjia dapea̧ oa goë cjo̧dëchji̧vä, judi ibë chjadëri̧ a̧dopea̧ oa, a̧ro̧rȩ dabarea̧mi̧dë pio ju̧i̧ chjiari chjadëri̧ dabarea̧ dapea̧ oa, a̧ro̧rȩ pio ju̧i̧ chjiari chjadëri̧ goë ni̧bärea̧ dapea̧ oa. Jabechji̧ pio ju̧i̧iä goë cjo̧dëchji̧vä a̧ro̧rȩ ja̧bo tänȩa̧ oa cjiachea oa, ado o judiro̧, jauëchja cjiari̧ japarea̧ dabaji̧ri̧ pio judiro̧borë ja̧bo tänȩa̧ oa cjiachea oa —yo̧a̧dejȩrȩ.

¹⁹ Ado ja̧dëa ji̧ pio jiro gȩnȩrä, a̧dëräpȩ cjiamȩ Ütë pio judi chjadëri̧ dabarea̧ yürürëremȩdejȩ Da̧de pio ju̧i̧. Jabechji̧ chiri ütë cjo̧ro̧mȩ pio judi canȩjäa̧ pio ju̧i̧ chjiari chjadëri̧ dabarea̧ yürüa̧dejȩ judi chjadëri̧ goë ni̧bärea̧mi̧ dari̧. Ado pio ju̧i̧iä Da̧de pio judi chjacjiamȩri̧ jo̧rȩtamȩrȩ ni̧bämȩpea̧de Ütë tjamo̧ pio ju̧i̧ chjiari.

²⁰ Ja̧di ta̧rëri̧ yo̧rëremȩde: —Bucho ana̧ chjacjiamȩri̧ ni̧bäpea̧de Ütë tjamo̧ judi. Jabechji̧ a̧dë chjäte dabarea̧ chiamȩ pio judimo̧de. A̧dë chjäte jauëchjamȩ pio judimo̧de. Ado cja̧rȩmo̧rȩ nö̧tarea̧mi̧dëri̧ cjiamȩde.

²¹ Jabechji̧ pio judi ütarë jo̧rȩta̧ chja̧oerämo̧ cjo̧ro̧dirȩ pumȩ judiro̧, a̧dë cjiadiärea̧ decjiari̧. Tjamo̧ davä. Chiriräpȩti̧ oa cjo̧ro̧ji̧ri̧ judiro̧ ütëborë pio judi ütarë jo̧rȩta̧ tüdüa̧ tjoro cjo̧ro̧mi̧ dari̧ cjo̧ro̧dirȩ. Ado pio ju̧i̧iä pumȩ judiro̧, 'Aja̧, Ütë tjamo̧ pio judi ütarë jo̧rȩta̧ pio judimo̧rȩ ma̧na̧diibëda, judi ütarë jo̧rȩtadëa̧ pio judi ma̧na̧dëdiibëda, jabechji̧ teracabari̧ chjätädë maa̧ro̧da, jabo pio judi ütara̧ chja̧oerämo̧ cjo̧ro̧a̧ro̧da' quëna̧ jo̧rȩtapea̧ chiadirȩ pumȩ judiro̧ ütëborë. Jabechji̧ judi ütarë jo̧rȩta̧ pio ju̧i̧mo̧i̧ chjätärea̧rȩ. Ado pio judimo̧rȩ tänȩa̧ oa ütëdëpe bagadirȩ chiri ütë cjo̧ro̧rëreji̧ri̧ pio judiro̧. Ado pio judimo̧rȩ tänȩa̧ oa, ano̧ mire ütëpe bagadirȩ ano̧ mire chiri ütë cjo̧ro̧paji̧ri̧ pio judiro̧. Jabechji̧ jibëa̧ ma̧na̧ri̧ japea̧ oaiä chiri ütëpe bagarea̧ dadë madirȩ, jabo Ütë tjamo̧ judi ütara̧rämo̧ chiri ütëpe bagarea̧ dadirȩ. Aja̧, pio judi tänȩa̧rämo̧ chiri ütëdëpe bagarea̧ dadirȩ. Ado pio judi tänȩa̧ oaiä urëdi tjamo̧ oa jo̧rȩtarea̧ dadirȩ pumȩ judiro̧. Ado dabapatämi̧ cjiaji̧ri̧ pio ji̧ri̧ dabarea̧ ji̧ra̧ tjamo̧ oa yürüdejȩrȩ peaja̧di.

²² Ado pio judimo̧de dabarea̧mi̧dë pio ju̧i̧ dabarea̧ yürümȩ judi. Tjamo̧ davä. Goadia̧ oa cjiami̧ dari̧ cjiarërea̧ pio ju̧i̧, bagönȩ maearä goadia̧ oa cjiami̧ dari̧ cjiarërea̧ pio ju̧i̧ dabarea̧ yürümȩde jënȩ tatarämȩ tara, jënȩ tata tjoromȩ tara —yo̧mȩrȩ yo̧rëremȩde Da̧de judi Ütë tjamo̧ pio ju̧i̧ chjiari, chjacjiamȩri̧ ni̧bämȩrȩ.

²³ Ado Da̧de judi Ütë tjamo̧ pio chjiari ni̧bäremȩrȩ ja̧di ta̧rëri̧ a̧de ni̧bä chjaorëremȩdejȩ jibëa̧ Ütë oa, Ütë tjamo̧ pio ju̧i̧: Jabechji̧ ma̧ chiadëri̧ cjiamȩrȩ chjacjiamȩri̧ ni̧bärequedemȩ ca̧ ütëti̧rea̧ pio ji̧ri̧ ja̧ Ütë oa. Jabechji̧ chjadëri̧ japea̧renȩque. Dabarea̧ yürüa̧renȩque urëdi tjamo̧ oa jo̧rȩtarea̧mi̧ dari̧. Ado pio ju̧i̧ uëri ju chiarea̧ yürüa̧renȩque peaja̧di. Jabechji̧ cüdë, ca̧ jadüborë pio mȩaiä goë cjo̧dëa̧ pio ju̧i̧ chjadëri̧ yürüa̧renȩibe. Jabechji̧ chiri ütëmȩ judi ibëiä cjo̧dëtea̧ pio ju̧i̧, jënȩ canȩjäa̧ pio ju̧i̧ chjadëri̧ daba tänȩa̧renȩibe. Jabechji̧ chjadëri̧ japea̧renȩibe Ütë. Aja̧, ja̧di ta̧rëri̧ yo̧mȩrȩ chjacjiamȩri̧ ni̧bärëremȩdejȩ Da̧de judi, Ütë tjamo̧ pio ju̧i̧iäpȩmo̧.

Da̧de pio judi chjadëri̧ goë ni̧bärëremȩde chiri ütëmȩ pio judi canȩjä mo̧a̧ pio ju̧i̧ chjiari

²⁴ Ado Da̧de judi Ütë tjamo̧ pio ju̧i̧ ni̧bä ëte, jabechji̧ goëdepea̧dejȩ Arioco pio ju̧i̧. Tjamo̧ davä. Chiri ütëmȩ judi yo̧a̧ pio ju̧i̧, Babironiaräpȩ dabarea̧ chiaji̧ri̧ pio ji̧ri̧ ütëbo oa ja̧bo tänȩtä yo̧tea̧rea̧ pio ju̧i̧ goëdepea̧dejȩ Da̧de judi. Ado yo̧a̧dejȩ: —Jabechji̧ ja̧bo tänȩdëchji̧jȩrȩ dabarea̧ chiaji̧ri̧ pio ji̧ri̧, jabo chjadëri̧ ëba jäcoe chiri ütëmȩ pio ju̧i̧iäpȩ, ado goë ni̧bäpareconȩ judi canȩjäa̧ pio ju̧i̧ chjiari —yo̧a̧dejȩ.

²⁵ Ado Arioco judi pio ju̧i̧ ta̧rëa̧ oaiä, chjaodëri̧ ëba jäa̧dejȩ Da̧de ju̧i̧ chiri ütë cjo̧ro̧mȩ pio ju̧i̧iäpȩ. Ado ja̧dëa ji̧ Arioco pio judi yo̧a̧dejȩ ütë oa: —Danȩ ca̧ ütë, a̧ro̧rȩ no̧mȩrä judirä baë goa ma̧na̧rërea̧ pumȩ pio ju̧i̧ cja̧rȩmȩ oa dadäräa̧reconȩ, Juda quȩmȩräpȩ cjo̧ro̧rëremȩ pio ju̧i̧. Jabechji̧ pio judi goë ni̧bäpai̧ da jirodimȩ mȩnȩ canȩjä mo̧a̧ pio ju̧i̧ chjiari —yo̧a̧dejȩ.

²⁶ Ado ütë pio judi pio ju̧i̧ ta̧rëa̧ oaiä, yo̧a̧dejȩ Da̧de pio ju̧i̧, judiro̧ Betacha quȩra̧ quȩpea̧ pio ju̧i̧: —¿Tjamo̧ri̧ yo̧nȩ? Cüdë canȩjä mo̧a̧ pio ju̧i̧ ¿tjamo̧ri̧ yo̧parenȩque? Cüdë canȩjä mo̧a̧ pio ju̧i̧ chjiari chjadëri̧ dabapea̧ oa, ¿tjamo̧ri̧ goë ni̧bäparenȩque? —iëno̧ë ta̧rëa̧dejȩ.

²⁷ Ado Da̧de judi dëbë yo̧a̧dejȩ: —Danȩ ca̧ ütë, cüdë ja̧di dari̧ japarea̧mi̧dërequede —yo̧a̧dejȩ—. Ado cüdëmo̧rȩdë, jabo jabechji̧ eami̧ pumȩ judiro̧, eami̧ dabarea̧ chiaji̧ri̧ pio judiro̧, peaja̧di japarea̧mi̧dëdirȩ. Ado jauëchja cjiari̧ japarea̧ dabaji̧ri̧ pio judiro̧, o ji̧ri̧ chjiari to̧je tuti go̧a̧rea̧ dabaji̧ri̧ pio judiro̧ peaja̧di ja̧di dari̧ japarea̧mi̧dëdirȩ. Ado büë oa ütararea̧ dabaji̧ri̧ pio judiro̧ peaja̧di japarea̧mi̧dëdirȩ. Jabechji̧ mȩnȩ yo̧a̧ pio ju̧i̧ chjiari eami̧rȩ japarea̧mi̧dë madirȩ. Jabechji̧ goadia̧ oa cjiami̧ dari̧ cjiade pio ibëiä.

²⁸ Jabo danȩ ca̧ ütë, a̧dëräpȩ ju̧ri̧ cjiade Ütë tjamo̧ pio judi —yo̧a̧dejȩ—. Ado chjö̧na̧i̧därä oa dabamȩde. Jabechji̧ dabarea̧mi̧dë pio ju̧i̧ daba tänȩmȩde. Goadia̧ oa cjiarërea̧ ma̧ȩ pio ju̧i̧ chjadë maearä cjiami̧ dari̧ japa tänȩmȩde. Ado pio judi jabërä chjadëri̧ daba tänȩa̧dimȩ ca̧ ütë. Tjamo̧ davä. Ji̧dë duri oa japamitë chjätä ëte ma̧na̧pea̧ pio ju̧i̧ chjiari jabërä daba tänȩa̧dimȩ, pio mȩa canȩjä mo̧a̧ tänȩa̧ pio ju̧i̧iä. Ado pio ju̧i̧iä goë ni̧bäparequedemȩ mȩnȩ na̧ mo̧a̧rea̧räpȩ mo̧a̧ nö̧ta canȩjä mo̧a̧ pio ju̧i̧ chjiari, mȩnȩ darämi̧ cjia̧ pio ju̧i̧ chjiari.

²⁹ Aja̧ ca̧ ütë, mȩnȩ na̧ mo̧a̧rea̧räpȩ mo̧a̧ nö̧ta, jabechji̧ japamitë chjätä ëte ma̧na̧pea̧ pio ju̧i̧ chjiari canȩjä mo̧a̧remȩrenȩ. Jabechji̧ goadia̧ oa cjiarërea̧ pio ju̧i̧ chjadëri̧ daba tänȩa̧dimȩ Ütë tjamo̧ judi, dabarea̧mi̧dërërea̧ pio ju̧i̧.

³⁰ Jabo cüdë o ji̧ri̧iä ji̧dë u̧i̧ dabarea̧ chiadërequede ca̧ ütë. Jabechji̧ goadia̧ oa cjiarërea̧ pio ju̧i̧ chjiari ca̧ea̧ ma̧na̧ri̧ dabapea̧ oaiä japarea̧ dadërequede, jabo Ütë tjamo̧ pio judimo̧rȩ dabade. Ado pio mȩnȩ dabatä ea tara, jabechji̧ dabarea̧ yürüa̧dique mȩnȩ canȩjä mo̧a̧ pio ju̧i̧ chjiari —yo̧mȩrȩ yo̧rëremȩdejȩ Babironiaräpȩ cjo̧ro̧mȩ ütë pio ju̧i̧, Nabucodonocho pio ju̧i̧.

³¹ Ado ja̧dëa ji̧ Da̧de judi, chiri ütë cjo̧ro̧mȩ pio judi canȩjä mo̧a̧ pio ju̧i̧ chjadëri̧ ni̧bärëremȩdejȩ, ja̧di ta̧rëri̧ yo̧mȩrȩ: —Danȩ ca̧ ütë, mȩnȩ darämi̧ cjia̧ ji̧, boi̧dë tjamo̧ oa ja̧di cjia ja̧di cjia mo̧a̧remȩrenȩ na̧ dëbëräpȩ cjiamȩ oa, pumȩmi̧ da oa, tatari̧ cjiamȩ oa —yo̧a̧dejȩ—. Uapai̧ da oa darämi̧ cjiaremȩrenȩjo̧ȩ chjuamȩ tjamo̧mi̧ da oa.

³² Ado pumȩ tjübëmi̧ da üdë oro maeara̧ japea̧ oa cjiaremȩde. Ado maito üdë parata maeara̧ japea̧ oa cjiaremȩde, ichi jubo. Ado acä üdë boro̧che maeara̧ japea̧ oa cjiaremȩde, yai tarubo. Aja̧, ja̧di da cjia oa darämi̧ cjia tänȩa̧dime Ütë tjamo̧ judi.

³³ Ado danȩ, tato̧to̧ üdë iero maeara̧ japea̧ oa cjiaremȩde, chjiparari chjua tjamo̧ra̧. Ado ta üdë yo̧a̧ri̧ra̧ jëdano̧a̧ oa cjiaremȩde. Jabechji̧ ierora̧ japea̧ oa cjiaremȩde, dabu bërebëreara̧ a̧de. Jabechji̧ dabu bërebëreara̧ a̧de mirea̧ oa cjiaremȩde iero üdë.

³⁴ Ado ca̧ ütë, mȩnȩ pumȩmi̧ da pio ju̧i̧ darämi̧ cjia̧ nö̧ta, ta̧dë boi̧dë üdë cjarea̧ oa cjiaremȩde ya̧mi̧ uë tjamo̧ri pio judiri. Eami̧ pumȩrȩ tänȩdëa̧ oa cjarea̧ oa cjiaremȩde. Ado ja̧dëa ji̧ ya̧mi̧ uë tjamo̧ri pio judiri goae tarari̧ acji cjatäa̧dejȩ pumȩmi̧ damȩ ja̧ taräpȩmo̧, chjichji mape bagari̧. Tjamo̧ davä. Ierora̧, ado dabura̧ japea̧ oa cjiaremȩ ta üdë pjo̧no̧i̧ mape bagari̧ acji cjatäa̧dejȩ.

³⁵ Ja̧dëa ji̧ pumȩmi̧ da üdë codërë chjaodëri̧ chjichjipe gu̧romi̧ dari̧ cjatäa̧de daburäpȩmo̧, pjo̧no̧i̧ mape bagari̧. Iero üdë, dabu bërebërea üdë, boro̧che üdë, parata üdë, ado oro üdë jabomo̧ pjo̧no̧i̧ mape bagari̧ cjiadiäa̧de, tirigo emi̧ dari̧. Ado pjaepa üdë aeno̧a̧dejȩ eremȩ pio ju̧i̧ jiro decjiape bagari̧. Jabo ta̧dë boi̧dë üdë, pumȩmi̧ da oa acji cjatäa̧mȩ pio judi, jabechji̧ ya̧mi̧ boi̧dë tjamo̧pe bagaremȩde chiri nö̧tadärä oa boami̧ dari̧ —yo̧a̧dejȩ Ütë oa Da̧de judi.

³⁶ Ado Da̧de judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩ ütë oa, Nabucodonocho pio ju̧i̧: —Aja̧ ca̧ ütë, pio ju̧i̧ canȩjä mo̧a̧remȩrenȩ mȩnȩ canȩjä mo̧a̧ ji̧. Ado pio yaba̧ goë ni̧bäparequedemȩ mȩnȩ canȩjä mo̧a̧ pio ju̧i̧ chjiari —yo̧a̧dejȩ—.

³⁷ Danȩ ca̧ ütë, pio mȩnȩ chiriräpȩti̧ oa tjamo̧ cjo̧ro̧mȩ ütë pio judirenȩ. Ado chiriräpȩti̧ oa cjo̧ro̧ji̧ri̧ ütëti̧ pio judiro̧ ütëborë na̧ chja̧oerämo̧ cjo̧ro̧dirȩ mȩnȩ a̧dë chjäte ütëmȩ tara. Jabechji̧ a̧dëräpȩ cjiamȩ Ütë pio judi jabërä ütarë jo̧rȩtarërea̧mi̧ yürürëremȩdimȩ tjamo̧ yo̧rea̧ pio ju̧i̧, mȩnȩ chiriräpȩti̧ oa tjamo̧ yo̧mȩrȩ cjo̧ro̧pea̧ oa, mȩnȩ ütëti̧ pio ji̧ri̧iä ji̧dë u̧i̧ ütëdäräpea̧ oa. Jabechji̧ Ütë tjamo̧ pio judide mȩa boadärärea̧ yürürëremȩ judi. Ado pumȩ judiro̧ pio mȩaiäpȩmo̧ ma ba chia jo̧rȩta tänȩrëremȩ pio judide peaja̧di.

³⁸ Aja̧, chiriräpȩti̧ oa cjo̧ro̧ji̧ri̧ judiro̧ na̧ chja̧oerämo̧ cjo̧ro̧pea̧ oa, chiri tjamo̧ cjo̧ro̧rea̧ yürürëremȩdimȩ Ütë tjamo̧ judi. Jabechji̧ pua pio judiro̧borë na̧ chja̧oerä cjo̧ro̧mi̧ dari̧ cjo̧ro̧ maeadirȩ, chirirä cjo̧ro̧ji̧ri̧ pio judiro̧borë. Ado pio ju̧i̧iä tjübëmi̧ darenȩ. Tjamo̧ davä. Mȩnȩ darämi̧ cjia pumȩmi̧ da pio ju̧i̧ ja̧ tjübëmi̧ darenȩ. Aja̧, orora̧ japea̧ oa cjiamȩ tjübëmi̧ darenȩ mȩnȩ ji̧dë u̧i̧ ba chiamȩ tara.

³⁹ Danȩ ca̧ ütë, mȩnȩ pumȩmi̧ da pio ju̧i̧ darämi̧ cjia̧ ji̧, jabechji̧ maito oa daea̧renȩ, paratara̧ japea̧ oa cjiamȩ oa. Ado ichi ju oa peaja̧di daea̧renȩ, parata maeara̧ japea̧ oa cjiamȩ oa. Ado paratara̧ japea̧ üdë jabechji̧ na̧rȩde ado cja̧rȩmo̧ chiri ütëpamȩ pio ju̧i̧ chjiari, na̧ea̧ duri oa ano̧ mire ütëpamȩ pio ju̧i̧ chjiari. Ado parata üdë oro pio ju̧i̧ nö̧tadëmi̧ dari̧ nö̧tadëpadimȩ na̧ duri oa ano̧ mire ütëpamȩ judi. Jabechji̧ chiriräpȩti̧ oa cjo̧ro̧paji̧ri̧ pio judiro̧ pio ju̧i̧ ja̧ chja̧oerä cjo̧ro̧räbo, judiro̧ ütëborë na̧ chja̧oerä cjo̧ro̧mi̧ dari̧ pio ju̧i̧ ja̧ chja̧oerä ano̧ mire cjo̧ro̧räbo, cjäri̧ madimȩ ca̧ ütë, nö̧tadëpadimȩ. Mȩnȩ ba chiami̧ ba chiadëpade. Ado danȩ ca̧ ütë, mȩnȩ pumȩmi̧ da pio ju̧i̧ darämi̧ cjia̧ ji̧, peaja̧di daea̧renȩ acä pio ju̧i̧, boro̧chera̧ japea̧ oa cjiamȩ oa. Ado yai taru pio ju̧i̧ peaja̧di daea̧renȩ, boro̧che maeara̧ japea̧ oa cjiamȩ oa. Ado danȩ ca̧ ütë, peaja̧di na̧rȩde ado cja̧rȩmo̧ ütëpamȩ pio ju̧i̧ chjiari, ji̧dë duri oa ano̧ mire ütëpamȩ pio ju̧i̧ chjiari. Ado danȩ, chiriräpȩti̧ oa cjo̧ro̧paji̧ri̧ pio judiro̧ pio ju̧i̧ ja̧ chja̧oerä cjo̧ro̧padirȩ peaja̧di. Jabo danȩ, boro̧che üdë parata pio ju̧i̧ nö̧tadëmi̧ dari̧ nö̧tadëpadejȩ jibëa̧ yaboi̧ ütërëremȩ pio ju̧i̧. Ado japamitë chjätä ëte na̧ duri oa ütëpamȩ pio judi ütëdëpe baga̧rä, chiriräpȩti̧ oa cjo̧ro̧ji̧ri̧ judiro̧ pio ju̧i̧ ja̧ chja̧oerä cjo̧ro̧dëji̧ri̧pea̧rä, jabechji̧ ado cja̧rȩmo̧rȩ ano̧ mire ütëmȩrȩ cjo̧ro̧pade, chiriräpȩti̧ oa cjo̧ro̧paji̧ri̧ pio judiro̧ pio ju̧i̧ ja̧ chja̧oerä ano̧ mire cjo̧ro̧rea̧mi̧ dari̧. Ado pio jiro ütë üdë, jabechji̧ boro̧che maeara̧ japea̧ oa cjiami̧ dari̧ cjiapade, acä pio judimi̧ dari̧. Ado pio jiro ütë pio judi chiri nö̧tai̧ oa ütëmȩrȩ cjo̧ro̧räbo, chiri nö̧tai̧ oa cjo̧ro̧paji̧ri̧ pio judiro̧ pio ju̧i̧ ja̧ chja̧oerä cjo̧ro̧räbo, jabechji̧ nö̧tadëpadejȩ pio ju̧i̧ ja̧ yaboi̧ ütërëremȩ pio ju̧i̧. Ado pio ju̧i̧iä ca̧ ütë, jibëa̧ yaboi̧ ütërëremȩ pio judi ba chiami̧ ba chiadëpade. Jabechji̧ nö̧tadëpadejȩ. Jënȩ tjamo̧ yo̧rea̧ üdë nö̧tadëpadejȩ ju̧i̧ ja̧ yaboi̧ ütërëremȩ pio ju̧i̧. Ado pio ju̧i̧iä pio jiro ütë pio ju̧i̧ chjiari na̧rȩrea̧ üdë jabomo̧ boro̧che maeade. Jabechji̧ boro̧che üdë nö̧tadëdejȩ parata oa. Parata üdë ji̧dë u̧i̧ ba chiade.

⁴⁰ Ado boro̧chemi̧ da cjiamȩ ütë pio judi ütëdëpe baga̧rä, jabechji̧ ado cja̧rȩmo̧ ütë pio judi ano̧ mire ütëmȩrȩ cjo̧ro̧pade, chiriräpȩti̧ oa cjo̧ro̧paji̧ri̧ pio judiro̧ pio ju̧i̧ ja̧ chja̧oerä ano̧ mire cjo̧ro̧rea̧mi̧ dari̧. Jabechji̧ tjarari̧rȩ chiri ütëji̧ri̧rȩ ano̧ mire cjo̧ro̧rërea̧ ji̧, ado cja̧rȩmo̧rȩ ano̧ mire ütëmȩrȩ cjo̧ro̧pade. Ado pio jiro ütë pio ju̧i̧ chjiari na̧rȩrea̧ üdë iero quȩmȩ chjiparari pio judide. Ado danȩ, iero quȩmȩ chiaparari üdë chjua tjamo̧de. Ado chjua tjamo̧ tara, eami̧ti̧ chjiparari oa chjaodëri̧ chjichji japapai̧ dadejȩ. Ado peaja̧dimi̧ dari̧ japapade pio jiro ütëpamȩ judi. Jabechji̧ oëra̧ti̧ oa tai̧mȩrȩ acji tai̧pade jibëa̧ guadia pio ji̧ri̧ nö̧ta chiri ütërëreji̧ri̧ pio ji̧ri̧ goae tarari̧ boadäräpea̧ oa, judiro̧ boa̧ chiri chjö̧na̧i̧ oa ano̧ mire boapea̧ oa. Jabechji̧ jibëa̧ yaboi̧ ütërëreji̧ri̧ pio judiro̧ japarërea̧ chjö̧na̧i̧ oa goarijä tänȩpadejȩ, iero chjua tjamo̧rȩ chjichji japami̧ dari̧.

⁴¹ Ado danȩ ca̧ ütë, mȩnȩ pumȩmi̧ da pio ju̧i̧ ja̧ ta oa darämi̧ cjia̧ ji̧, mȩnȩ ta chjiabo daea̧ ji̧, jabechji̧ mirea̧mȩ oa daea̧renȩjo̧ȩ. Aja̧, iero üdë dabu bërebëreara̧ mirea̧ oa cjiamȩ oa daea̧renȩjo̧ȩ. Jabo danȩ ca̧ ütë, iero üdë dabu bërebëreara̧ ji̧cha̧ri̧ mirerea̧mi̧dëde. Chjuari̧ mirerea̧mi̧dëde. Ado peaja̧dimi̧ dari̧ cjo̧ro̧padirȩ ieromi̧ da cjiamȩ ütë pio ju̧i̧ ja̧ chja̧oeräji̧ri̧ judiro̧. Jabechji̧ judiro̧ orë ieromi̧ dari̧ cjo̧ro̧räbo, ju chiaji̧ri̧mi̧ dari̧ cjo̧ro̧räbo, jabechji̧ cja̧rȩmȩ chji̧ chiami̧ dari̧ cjo̧ro̧rea̧ dadëpadirȩ, jabo ji̧dë ma chjarapë jo̧rȩtaji̧ri̧rȩ cjo̧ro̧padirȩ, jadüchiami̧ bubape bagarea̧mi̧ dari̧.

⁴² Aja̧ ca̧ ütë, mȩnȩ pumȩmi̧ damȩ pio ju̧i̧ ja̧ ta oa daea̧ ji̧, jabechji̧ mirea̧ oa cjiamȩ oa daea̧renȩjo̧ȩ. Ierora̧ mirea̧ oa cjiamȩ oa daea̧renȩjo̧ȩ dabu bërebëreara̧. Ado peaja̧dimi̧ dari̧ cjo̧ro̧padirȩ pio jiro ütëti̧ judiro̧. Jabechji̧ judiro̧ orë jabëtari̧mi̧ ju chiami̧ dari̧ cjo̧ro̧räbo, jabechji̧ ju chiadëji̧ri̧mi̧ dari̧ cjiadiäpadirȩ peaja̧di dabu bërebërea pio judimi̧ dari̧.

⁴³ Ado pio jiro chiri ütëti̧ judiro̧ cja̧rȩmȩ jo̧rȩtarea̧ chiapea̧ oa, jabechji̧ jibëa̧ u̧ri̧ pio ji̧ri̧ ba dëbë yürüpadiro̧jȩrȩ ëbapea̧ oa, judiro̧ cja̧rȩmȩ pumȩpe bagami̧ dari̧ cjiapea̧ oa. Aja̧, ja̧di dari̧ japapadirȩ judiro̧ ji̧mo̧ ëba acji tai̧pea̧ oa, jibë eadëji̧ri̧ pio ji̧ri̧ ji̧mo̧ boadärärea̧ dapea̧ oa. Jabo cjäri̧ madirȩ, judiro̧ ja̧di dari̧ japaji̧ri̧borë cja̧rȩmȩ chji̧ chiami̧ dari̧ jadücjiarea̧ dadëpadirȩ. Jabechji̧ iero üdë dabu bërebëreara̧ ji̧cha̧ri̧ mirerea̧mi̧dëri̧ cjiami̧ dari̧ cjiapadirȩ peaja̧di, cja̧rȩmȩ jo̧rȩtarea̧ chiarea̧ decjiari̧.

⁴⁴ Jabo danȩ ca̧ ütë, a̧dëräpȩ cjiamȩ Ütë pio judi ado cja̧rȩmo̧ oa ano̧ mire ütë tänȩpadejȩ, bucho ana̧ chiri ütëmȩrȩ cjo̧ro̧pamȩ pio ju̧i̧. Tjamo̧ davä. Pio jiro ütëti̧ pio judiro̧ jibëa̧ chirirä tjamo̧ yo̧ji̧ri̧rȩ cjo̧ro̧a̧ nö̧ta, pio judiro̧ chiri ütëji̧ri̧rȩ cjo̧ro̧a̧ nö̧ta, jabechji̧ a̧dëräpȩ cjiamȩ Ütë pio judi ano̧ mire ütë tänȩpadejȩ ado cja̧rȩmo̧ ütë oa, ado cja̧rȩmo̧ chiri ütë cjo̧ro̧pamȩ pio ju̧i̧. Ado chiriräpȩti̧ oa cjo̧ro̧ji̧ri̧ pio judiro̧ ütëborë pio ju̧i̧ ja̧ chja̧oerämo̧ ano̧ mire cjo̧ro̧padirȩ bucho ana̧. Jabechji̧ goarijärea̧ decjiari̧ ji̧dë ma chiri ütëmȩrȩ cjo̧ro̧pade, ado cja̧rȩmo̧ ütë üdë pio ju̧i̧ boadärärea̧mi̧dëri̧. Tjamo̧ davä. Pio ju̧i̧ boadärärea̧ dadëpadiro̧jo̧ȩ jabo pio judi chiriräpȩti̧ oa cjo̧ro̧ji̧ri̧ ütë pio ji̧ri̧ boadäräpadejȩrȩ, pio ji̧ri̧ ja̧ tjamo̧ yo̧rea̧ üdë yuroparea̧mi̧ dari̧.

⁴⁵ Aja̧ ca̧ ütë, ado cja̧rȩmo̧ chiri ütë cjo̧ro̧mȩ judi ma̧na̧pea̧ pio ju̧i̧ chjiari na̧rȩrea̧de ta̧dë üdë, ya̧mi̧ uë tjamo̧ri pio judiri cjarea̧ oa cjiaremȩ ta̧dë üdë. Aja̧, pumȩrȩ japadëa̧ oa aechadäräa̧dejȩ davä pumȩmi̧ da codë oa pjo̧no̧i̧ mape bagari̧. Aja̧, ta üdë, ierora̧, ado dabu bërebëreara̧ ja̧pea̧ ta üdë, jabechji̧ aechadäräa̧ oa cjiaremȩde pio jiro ta̧dë oaiä. Ado boro̧chera̧ japea̧ to̧to̧chia üdë peaja̧diremȩde. Ado maito üdë, paratara̧ japea̧ maito üdë, ado paratara̧ japea̧ ichiju üdë, peaja̧di pio jiro ta̧dë oaiä aechadäräa̧ oa cjiaremȩde. Ado tjübë üdë, orora̧ japea̧ tjübë üdë peaja̧diremȩde. Jabechji̧ pumȩmi̧ da codërë chjichjipe bagurami̧ dari̧ aechadäräa̧ oa cjiaremȩde pio jiro ta̧dë boi̧dë oaiä, pjo̧no̧i̧ mape bagari̧. Danȩ ca̧ ütë, mȩnȩ dabadëchea oa chjadëri̧ daba tänȩa̧dimȩ Ütë tjamo̧ judi. Tjamo̧ davä. Mȩnȩ ji̧dë duri oa ma̧na̧pamȩ pio ju̧i̧ chjiari dabadëchea oa, mȩnȩ ji̧dë duri oa ano̧ mire ütëpaji̧ri̧ pio ji̧ri̧ chjiari dabadëchea oa, jabechji̧ ba chia tjamo̧mȩ Ütë pio judi dabarea̧ yürüa̧dimȩ, pio mȩa darämi̧ cjia tänȩa̧ pio ju̧i̧iä. Jabechji̧ tjamo̧i̧ cjiari̧ baäde mȩnȩ darämi̧ cjia̧ üdë. Ado cüdë mȩa goë ni̧bäa̧ ma̧ȩ üdë tjamo̧i̧padäräa̧ oa cjiapade, 'tjamo̧dëpamȩ jirodida' quëna̧rea̧mi̧dëri̧.

Nabucodonocho judi chiri tjamo̧ cjo̧ro̧mȩ tänȩrëremȩdejȩ Da̧de ju̧i̧

⁴⁶ Ado Nabucodonocho judi pio ju̧i̧ ta̧rëa̧ oaiä, juchatura̧ tjätjäpë china̧därärëremȩde jibëa̧ daito oa daburäpȩ yuro Da̧de ja̧ yaboi̧, pio ju̧i̧iäpȩmo̧ ba chia jo̧rȩtamȩrȩ. Ado ja̧dëa ji̧ chjaodëri̧ yo̧eno̧a̧dejȩrȩ jibëa̧ mu̧i̧tjoi̧ ji̧ri̧ goaeri̧ pjȩa̧mȩ cäarea̧ oa cäë yürütä Da̧de ja̧ oa, ado tjadorimȩ cho oa cäë yürütä peaja̧di pio ju̧i̧ ja̧ oa. Jabechji̧ pio ju̧i̧ ba chiaparȩmi̧ dari̧ japapea̧ oa japatä yo̧a̧dejȩrȩ.

⁴⁷ Ja̧dëa ji̧ chiri ütë cjo̧ro̧mȩ pio judi yo̧a̧dejȩ Da̧de ju̧i̧: —Danȩ, na̧ Ütë pio judi goadia̧ oa cjiarërea̧ pio ju̧i̧ chjiari dabarea̧ yürüa̧dimȩ, mȩnȩ chjadëri̧ goë ni̧bäpea̧ oa. Ado pio ju̧i̧iä jabechji̧ tjamo̧ri̧ dabarequede yaba̧ na̧ Ütë pio ju̧i̧ chjiari. Jabechji̧ a̧dë chjäte Ütëde, ado cja̧rȩmo̧rȩ nö̧tarea̧mi̧dëri̧. Jabechji̧ eami̧ chirirä cjo̧ro̧mȩ ütë üdë, eami̧ pumȩ judiro̧ quëna̧ ütë üdë nö̧tadë madiro̧jo̧ȩ davä na̧ Ütë oa. Jabechji̧ mȩnȩ dabadërërea̧ ji̧, cüdë canȩjäa̧ pio ju̧i̧ dabadërërea̧ ji̧, jabechji̧ dabarea̧ yürüa̧dimȩ —yo̧a̧dejȩ.

⁴⁸ Ado ja̧dëa ji̧ chiri ütë cjo̧ro̧mȩ judi ji̧ra̧ tjamo̧ oa yürürëremȩdejȩ Da̧de ju̧i̧, ba chia tjamo̧ oa. Ado pio ju̧i̧ uëri chiri tjamo̧ cjo̧ro̧mȩ tänȩrëremȩdejȩ Babironia quȩmȩ chiri chjö̧na̧i̧ oa chjadëri̧ jidapea̧ oa, Babironiaräpȩ cjo̧ro̧ji̧ri̧ judiro̧ pio ju̧i̧ ja̧ chja̧oerä ano̧ mire cjo̧ro̧pea̧ oa. Ado peaja̧di tjamo̧ chi̧dëearea̧ oa yürürëremȩdejȩ. Ado pio ju̧i̧iä dabarea̧ chiaji̧ri̧ judiro̧ ütëborë pio ju̧i̧ ja̧ ma̧ȩrä ja̧bepaji̧ri̧pea̧dirȩ.

⁴⁹ Ado Da̧de judi jibëa̧ jadü pio ji̧ri̧ chjiari chiri ütë cjo̧ro̧mȩ pio ju̧i̧iä goë tuti ni̧bäa̧ oaiä, peaja̧di tjamo̧ yo̧ji̧ri̧pea̧dirȩ Babironia quȩmȩ chiriräpȩ, Da̧de pio ju̧i̧ nö̧ta ëba ja̧bepapea̧ oa. Tjamo̧ davä. Chadaca judi, ado Mechaca judi, ado Abenego judi peaja̧di ja̧beparea̧ ba chia maeara̧ ja̧bepaji̧ri̧pea̧dirȩ Da̧de pio ju̧i̧ nö̧ta. Ado Da̧de ja̧ jadü pio judiro̧ jabechji̧ baäa̧dirȩ jibëa̧ oa ja̧bepapea̧ oa, jabo Da̧de judi chiri ütërë cjo̧ro̧mȩ bëräpȩ cjiadiäa̧de. Nabucodonocho pio ju̧i̧ ja̧ bëräpȩ cjiadiäa̧de.