Da̧de 11 - Biblia Pume

¹ Ado mu̧i̧tjoi̧ üdë ji̧dë u̧i̧ yo̧mȩ oa ta̧rëa̧reconȩ, ja̧di ta̧rëri̧ yo̧mȩ oa: Aja̧ Da̧de, a̧dërimȩ mu̧i̧tjoi̧requede. Ado pio cüdërequede Mi̧gë pio ju̧i̧ a̧domȩ judi, pio ju̧i̧ ju chiaparȩmȩ judi. Tjamo̧ davä. Dario quȩmȩ pio judi Media quȩmȩ chiriräpȩ cjo̧ro̧ji̧ri̧ pio ji̧ri̧ ja̧ ütëmȩpea̧ri ja̧, judi pea ütëpea̧ uiri ja̧ a̧do chjaorëremȩreconȩ Mi̧gë pio ju̧i̧, Icharai pio judiri ja̧ji̧ri̧ pio ji̧ri̧ chjadëri̧ jidapea̧ oa —yo̧mȩ oa ta̧rëa̧reconȩ mu̧i̧tjoi̧ oa.

A̧dërimȩ mu̧i̧tjoi̧ pio judi daba tänȩrëremȩdejȩ Da̧de ju̧i̧ Ejito quȩmȩ chirirä ütë cjo̧ro̧paji̧ri̧ pio ji̧ri̧ chjiari, Chiria quȩmȩ chirirä ütë cjo̧ro̧paji̧ri̧ pio ji̧ri̧ chjiaribo

² Ado a̧dërimȩ mu̧i̧tjoi̧ pio judi ja̧di ta̧rëri̧ yo̧mȩ oa ta̧rëa̧reconȩ: —Aja̧ Da̧de, pio yaba̧ chjadëri̧ daba tänȩparequedemȩ tjamo̧i̧ cjiari̧ baämȩ ma̧ȩ pio ju̧i̧ chjiari, duri oa ma̧na̧pea̧ pio ju̧i̧ chjiari. Danȩ, Chiro quȩmȩ pio judi ja̧boa̧rä, Pechia quȩmȩ chiri ütëmȩ pio judi ja̧boa̧rä, jabechji̧ tjarari̧rȩ ano̧ mire ütëji̧ri̧rȩ cjo̧ro̧padirȩ pio jiro chirirä. Cja̧rȩmȩrȩ cjatärä, ado cja̧rȩmo̧rȩ ano̧ mire ütëpade. Ja̧di maeari̧ ano̧ mire ütëji̧ri̧rȩ cjo̧ro̧padirȩ. Ado pio jiro ütëti̧ pio judiro̧ tjarari̧rȩ ütëdëji̧ri̧pea̧rä, ado cja̧rȩmo̧rȩ ano̧ mire ütëmȩrȩ cjo̧ro̧pade. Ado pio ju̧i̧ ja̧ yaboi̧ ütëreji̧ri̧ pio ji̧ri̧iä ji̧dë u̧i̧ ji̧ra̧ri̧ goamȩrȩ cjo̧ro̧pade. Ado ji̧dë u̧i̧ ji̧ra̧ri̧ goamȩrȩ cjo̧ro̧a̧ oaiä, jabechji̧ ju chia tjamo̧mȩmi̧ dari̧ cjo̧ro̧pade, chiri ji̧ra̧räpȩ cjo̧ro̧ji̧ri̧ pio judiro̧ pio ju̧i̧ ja̧ chja̧oerä cjo̧ro̧rea̧mi̧ dari̧. Ado ja̧dëa ji̧ pio ju̧i̧ ja̧ chja̧oërä cjo̧ro̧ji̧ri̧ pio ji̧ri̧ nö̧ta acji jäpade Grechia quȩmȩ chiriräpȩ cjo̧ro̧mȩ ütë pio ju̧i̧. Aja̧, pio ju̧ri̧pȩ acji jäpadiro̧jo̧ȩ pio jiro ütë oa boadäräpea̧ oa. Jabo cjäri̧ madiro̧jo̧ȩ, boadärärea̧ dadëpadiro̧jo̧ȩ.

³ Ado ja̧dëa ji̧ ji̧dë duri oa ado cja̧rȩmo̧ ütë üdë ano̧ mire ütëmȩrȩ cjo̧ro̧pade Grechia chiriräpȩ ju̧ri̧, a̧dë chjäte ju chiami̧ darë. Ado judi chiri ji̧ra̧ri̧ goamȩrȩ cjo̧ro̧a̧ oaiä, jabechji̧ chiriräpȩti̧ oa cjo̧ro̧ji̧ri̧ pio judiro̧ pio ju̧i̧ ja̧ chja̧oerä cjo̧ro̧padirȩ. Jabechji̧ jënȩ jo̧rȩtami̧ japarea̧ dapade dae järea̧mi̧ dari̧, eami̧rȩ dëbëpe chjaorea̧ decjiari̧.

⁴ Jabo judi ju chia tjamo̧mȩmi̧ dari̧ cjo̧ro̧mȩpea̧räbo, judi chiri ji̧ra̧ tjamo̧ oa boadäräa̧ oa goamȩpea̧räbo, cjäri̧ made, ja̧bopade. Ado pio ju̧i̧rea̧ ja̧ chiriremȩ pio judi boi̧dë tjamo̧rërea̧ ji̧, jabechji̧ jadüchiami̧ chiri pënȩpe bagari̧ tutia̧ oa cjiadiäpade. Ado pio judiri ja̧dëji̧ri̧ pio judiro̧ ano̧ mire chiri ütëji̧ri̧rȩ cjo̧ro̧padirȩ jadüchiami̧rȩ, jibëa̧ chirirämo̧ ütëji̧ri̧rȩ. Jabo jibëa̧ yaboi̧ ütëremȩ pio ju̧i̧ nö̧tadëpadiro̧jo̧ȩ. Tjamo̧ davä. Ji̧dë u̧i̧ ju chia tjamo̧mi̧ dari̧ cjo̧ro̧rëremȩ pio ju̧i̧ nö̧tadëpadiro̧jo̧ȩ.

⁵ Aja̧ Da̧de, ji̧dë duri oa ma̧na̧pea̧ japamitë pio ju̧i̧ chjiari yo̧requedemȩ. Danȩ, cja̧rȩmȩ üdë, chiri pënȩrä ütëmȩrȩ cjo̧ro̧mȩ pio judi, jabechji̧ chirina̧ dëbëräpȩmo̧ a̧rȩmȩ chiriräpȩ ju̧ri̧ ütëmȩrȩ cjo̧ro̧pade, Ejito quȩmȩ chiriräpȩ. Ado pio jiro ütë üdë, jabechji̧ ju chia tjamo̧mȩmi̧ dari̧ cjo̧ro̧pade. Jabo judi ju chia tjamo̧mȩmi̧ dari̧ ütëmȩrȩ cjo̧ro̧räbo, pio jȩaiä ji̧dë u̧i̧ ju chiami̧ dari̧ ano̧ mire cjo̧ro̧pade jibëa̧ guadia ütë pio judi. Ado pio judi jibëa̧ ütëremȩ pio ju̧i̧ boadäräpadejȩ. Ado pio ju̧i̧ boadärä ëte, ji̧dë u̧i̧ ana̧pe bagari̧ mitëa̧ oa goapadejȩ jibëa̧ chiri oa, chiri ana̧ tjamo̧ oa. Jibëa̧ ütëremȩ pio ju̧i̧ ja̧ chiri üdë ana̧rërea̧ ji̧, ji̧dë u̧i̧ ana̧ oa mitëa̧ oa goapade. Jabechji̧ ju chia tjamo̧mȩmi̧ dari̧ ütëmȩrȩ cjo̧ro̧pade, tjamo̧ yo̧rea̧ chiamȩmi̧ darë.

⁶ Ado ui ji̧ra̧ri̧ chjätä ëte, Ejito quȩmȩ chiriräpȩ cjo̧ro̧mȩ ütë pio judi ëba a̧dopapade Chiria quȩmȩ chiriräpȩ cjo̧ro̧mȩ ütë pio ju̧i̧ nö̧ta. Aja̧, judiro̧ ni̧bä chjaopea̧ oa, judiro̧ cja̧rȩmȩ chji̧ chiami̧ dari̧ jo̧rȩtapea̧ oa, jibëa̧ dëbëti̧ra̧ chia chjadëri̧ a̧dopea̧ oa ëba a̧dopapadejȩ. Ado ja̧di dari̧ ni̧bä chjaoa̧ duri oa, Ejitoräpȩ cjo̧ro̧mȩ ütë pio judi yürüpadejȩ jojabi pio ji̧ Chiriaräpȩ cjo̧ro̧mȩ ütë pio ju̧i̧. Aja̧, ëbapea̧ oa yürüpadejȩ judiro̧ ni̧bä chjaoa̧ ma̧ȩ üdë ji̧dë u̧i̧ ba chiaparȩpea̧ oa, pio jiro ma̧ȩ üdë jiada̧ oa cjiachea oa. Ado Chiriarimȩ ütë pio judi Ejitorimȩ ütë pio ju̧i̧ ja̧ jojabi pio ji̧ pea ëbarä, jabechji̧ chjadëri̧ ëba̧ oa cjo̧ro̧padirȩ. Jabo ja̧dëa ji̧ japamitë chjätä ëte, cjäri̧ madejȩrȩ, cja̧rȩmȩ üdë ja̧bo tänȩpadejȩ jibëa̧ iei̧ pio ji̧, Ejitoräpȩ cjo̧ro̧mȩ ütë pio ju̧i̧ ja̧ jojabi pio ji̧. Ado pio ju̧i̧ uëri ëbamȩbo ja̧bo tänȩpadejȩ, jojabo. Ado pio ji̧ a̧doreji̧ri̧ mu̧i̧tjoi̧ pio ji̧ri̧bo ja̧bo tänȩa̧ oa cjiapadirȩ. Ado pio ju̧i̧iä judiro̧ ni̧bä chjaoa̧ ma̧ȩ üdë badëri̧ cjiadiäpade.

⁷ Jabo ja̧dëa ji̧ Ejito chiririmȩ ütë pio ju̧i̧ ja̧ jojabi pio ji̧rea̧ ja̧ jadüremȩ pio judi Ejitoräpȩ ano̧ mire ütëmȩpea̧rä, jäjarea̧ pio judimi̧ dari̧ ano̧ mire ütëpea̧rä, jabechji̧ acji jäpade jibëa̧ guadia pio ji̧ri̧ nö̧ta Chiriaräpȩ cjo̧ro̧mȩ ütë pio ju̧i̧ boadäräpea̧ oa. Ado ju̧ri̧pȩ go̧düdäräa̧rä, goae tarari̧ boadärärea̧ dapadejȩrȩ Chiriaräpȩ cjo̧ro̧ji̧ri̧ guadia pio ji̧ri̧. Tjamo̧ davä. Guadiarë cjo̧ro̧mȩ bë ma̧ri̧räpȩ acji yu̧a̧rea̧mi̧dëräbo, uë tjamo̧ oa tutia̧ oa cjiamȩ bë ma̧ri̧räpȩ acji yu̧a̧rea̧mi̧dëräbo, jabechji̧ acji yu̧a̧rea̧ dapadirȩ ütëbodärä oa boadärärea̧mi̧ dari̧.

⁸ Ado judiro̧ boadärärea̧ daea̧ oaiä, jabechji̧ dami̧ti̧ ba chiati̧ oa baë mitëpadiro̧jo̧ȩ. Ado baë mitë ëte baë goa baäpadiro̧jo̧ȩ jibëa̧ chiriräpȩ, Ejitoräpȩ. Tjamo̧ davä. Jënȩro̧ jëdano̧a̧ ütë pio ji̧ri̧, orora̧ japea̧ pio ju̧i̧, paratara̧ japea̧ pio ju̧i̧ baë goa baäpadiro̧jo̧ȩ eami̧ti̧ ba chia oa, ji̧ra̧ tjamo̧ oa. Ado judiro̧ ja̧di dari̧ baë goa baä ëte, jabechji̧ ui ji̧ra̧ri̧ cjiadiäpade Ejitoräpȩ cjo̧ro̧mȩ ütë judi. Ado chjereno̧ acji jätärea̧ ji̧, acji jädëpade jabo jabechji̧ cjiadiäpade.

⁹ Jabo japamitë ana̧ tjamo̧ chjätä ëte, Chiriaräpȩ cjo̧ro̧mȩ ütë pio judi ano̧ mire acji jäpade jibëa̧ guadia pio ji̧ri̧ nö̧ta Ejitoräpȩ cjo̧ro̧ji̧ri̧ pio ji̧ri̧ ano̧ mire boadäräpea̧ oa. Jabo cjäri̧ made, chjaodëri̧ baäpade ado chjereno̧ jibëa̧ chiriräpȩmo̧.

¹⁰ Jabo ji̧dë duri oa japamitë chjätä ëte, Chiriaräpȩ cjo̧ro̧mȩ ütë pio ju̧i̧ ja̧ u̧ri̧ pio judiro̧ guadia ji̧ra̧ tjamo̧ oa ado̧pa tänȩpadiro̧jȩrȩ. Ado pio jiro guadia judiro̧ chirina̧ dëbëräpȩmo̧ jäji̧ri̧rȩ jäpadirȩ Ejito chiriräpȩmo̧. Ado ja̧dira̧ jäji̧ri̧rȩ chjätäpadirȩ Icharai quȩmȩ chiri oa, oëra̧ti̧ oa a̧rȩmȩ chiri oa go̧düdärärea̧mi̧ dari̧. Jabechji̧ bea ui üdë ma̧i̧ da cjücjürü tjamo̧pea̧rä chiri oëra̧ti̧ oa uipe jämi̧ dari̧ tai̧padirȩ Icharai quȩmȩ chiri nö̧tai̧ oa. Ado ja̧dëa ji̧ Ejitoräpȩ go̧düdäräji̧ri̧rȩ acji go̧düdäräpadirȩ ütërë jëdano̧a̧ bë ma̧ri̧räpȩ ju̧ri̧, uë tjamo̧ a̧rȩri̧ tutia̧ oa cjiamȩ bë ma̧ri̧räpȩ ju̧ri̧.

¹¹ Ado Chiriariji̧ri̧ pio judiro̧ ja̧di dari̧ acji go̧düdäräa̧ oaiä, jabechji̧ Ejitoräpȩ cjo̧ro̧mȩ ütë pio judi a̧dë chjäte ërecjiapade. Ado järi tjamo̧mȩrȩ jibëa̧ guadia buba oa chjaodëri̧ a̧dopa tänȩpadejȩrȩ. Ado pio ji̧ri̧ a̧dopa tänȩ ëte, jabechji̧ goae tarari̧ ba dëbëpe chjaopadejȩrȩ Chiriari pio judiri acji jana̧ji̧ri̧ pio ji̧ri̧. Ado boadärärea̧ dapadejȩrȩ.

¹² Ado pio ji̧ri̧ chjadëri̧ boadärärea̧ daea̧ oaiä, 'Jaeboquëda, pumȩ ba chia tjamo̧quëda, tjamo̧ri̧ ju chiamȩmi̧ dari̧ cjiaquëda, jabechji̧ no̧i̧dë tjamo̧ oa ja̧bo tänȩa̧quiji̧ri̧da' quëna̧ jo̧rȩtapade, jibëa̧ chji̧rämo̧ jo̧rȩtatamȩrȩ. Jabo cjäri̧ made, pio judiri yurori eami̧ pumȩ ji̧ri̧ boadärärea̧ dadëpade.

¹³ Jabo ja̧dëa ji̧ ui ji̧ra̧dë chjätä ëte, Chiria chiriräpȩ cjo̧ro̧mȩ ütë pio judi ado chjereno̧ a̧dopa tänȩpadejȩrȩ jibëa̧ guadia ji̧ri̧. Pearä ji̧ra̧ tjamo̧ oa a̧dopa tänȩrërea̧ ji̧, ji̧dë u̧i̧ ji̧ra̧ tjamo̧ oa a̧dopa tänȩpadejȩrȩ, a̧dë chjäte ji̧ra̧ri̧ a̧dopa tänȩmȩrȩ. Ado ja̧dëa ji̧ ado chjereno̧ acji jäpade jibëa̧ guadia pio ji̧ri̧ nö̧ta Ejito chiriräpȩ. Aja̧, ji̧dë u̧i̧ acji järea̧ chiaji̧ri̧rȩ, ji̧dë u̧i̧ gu̧na̧rea̧ to araji̧ri̧rȩ, ji̧dë u̧i̧ ja̧bo tänȩrea̧ chiaji̧ri̧rȩ acji jäpadirȩ Ejitoräpȩ.

¹⁴ Ado pio jiro japamitërä, pumȩ judiro̧ noi̧dërë goëdëri̧ cjiapadiro̧jo̧ȩ Ejitoräpȩ cjo̧ro̧mȩ ütë pio ju̧i̧iäpȩmo̧. Ado pio ju̧i̧iä jiadapadiro̧jo̧ȩ. Ado ju̧i̧ uëri ana̧ri̧ dëbëpe chjaopadiro̧jo̧ȩ pio ju̧i̧ ütë cjatä tänȩpea̧ oa. Ado danȩ Da̧de, na̧ pumȩ judiro̧ orë peaja̧di dëbëpe chjaopadiro̧jo̧ȩ. Jabechji̧ cja̧rȩmȩ üdë canȩjä mo̧a̧ oaiä, chiri ütë cjo̧ro̧mȩ pio ju̧i̧ ütëdëpe bagamȩ oa darämi̧ cjiamȩrȩ mo̧a̧ oaiä, jabechji̧ ütë pio ju̧i̧ ütë cjatä tänȩpea̧ oa järi tjamo̧pe bagapadirȩ goe chiari japata goaraji̧ri̧ pio judiro̧, ütë pio ju̧i̧ ja̧ chja̧oeri pio judiri chjadëri̧ go̧dürea̧ dapea̧ oa. Jabo cjäri̧ madiro̧jo̧ȩ, ütë cjatä tänȩrea̧ dadëpadiro̧jo̧ȩ.

¹⁵ Ado ja̧dëa ji̧ ji̧dë duri oa, Chiriaräpȩ cjo̧ro̧mȩ ütë pio judi ado chjereno̧ acji jäpade jibëa̧ guadia pio ji̧ri̧ nö̧ta Ejito chiriräpȩmo̧. Ado ju̧ri̧pȩ go̧düdärä ëte, Ejitoräpȩ cjiamȩ bë ma̧ri̧räpȩ ju̧ri̧, uë tjamo̧ a̧rȩri̧ tutia̧ oa cjiamȩ bë ma̧ri̧räpȩ ju̧ri̧ acji go̧düdäräpadirȩ. Ado tjoro tänȩji̧ri̧rȩ tuti cjiapadiro̧jo̧ȩ bë ma̧ri̧ oa yuroti̧ oa, eami̧rȩ go̧dürea̧mi̧dëri̧, eami̧rȩ yu̧a̧rea̧mi̧dëri̧. Ado ja̧di dari̧ japa ëte, dabu ji̧ra̧ tjamo̧ oa ara ara cjarädiäpadiro̧jo̧ȩ buarea̧ no̧ oa jëdano̧pea̧ oa, uë areri no̧ oa jëdano̧pea̧ oa, tutia̧ tjoräpȩmo̧ yu̧a̧rea̧ dapea̧ oa. Ado no̧ pio ju̧i̧ chjadëri̧ jëdano̧a̧ oa goarä, guadia noi̧dë tjamo̧rȩ acji yu̧a̧padirȩ bë ma̧ri̧ tjoräpȩmo̧, judiro̧ dëbëparea̧mi̧dëri̧. Jabechji̧ Ejitoräpȩ cjo̧ro̧ji̧ri̧ guadia judiro̧ ju chia tjamo̧räbo, chjadëri̧ jëdano̧a̧ oa cjiaräbo, jabechji̧ eami̧ oa japarea̧ dadëpadirȩ. Acji yu̧a̧ji̧ri̧ pio judiro̧ buba oaiä dëbëparea̧ dadëpadirȩ.

¹⁶ Ado Chiria chiririmȩ ütë pio judi oëra̧ti̧ oa acji tai̧pade jënȩ jo̧rȩtami̧, eami̧ pumȩ judiro̧ dëbëparea̧mi̧dëri̧. Ado Icharai quȩmȩ chiri oa boadäräpadejȩ peaja̧di, chiri chjacjiamȩ tjamo̧ pio ju̧i̧. Ado jënȩ pio jiro chirirä tai̧a̧mi̧ nö̧ta, dami̧ti̧ oa iëchäriä tai̧pade, chiri chjadëdëpe järea̧mi̧ dari̧.

¹⁷ Ado ja̧dëa ji̧ japamitë chjätä ëte, Chiriaräpȩ cjo̧ro̧mȩ ütë pio judi u̧i̧parea̧ jo̧rȩtamȩrȩ ütarë jo̧rȩtapade Ejito chiri codë oa baë mitëpea̧ pio ju̧i̧ chjiari, jibëa̧pe bagapea̧ pio ju̧i̧ chjiari. Ado pio ju̧i̧iä jäpade jibëa̧ guadia ütëbo pio ji̧ri̧ nö̧ta, Ejitoräpȩ cjo̧ro̧mȩ ütë pio ju̧i̧ chjadëri̧ ni̧bämȩmi̧ dari̧ ni̧bäpea̧ oa, pio ju̧i̧ goaeri̧ jadü ni̧bä chjaopea̧ oa. Aja̧, judiro̧ jibëa̧ dëbëti̧ra̧ chia acji tai̧chea oa, judiro̧ jibëa̧ dëbëti̧ra̧ chia chjadëri̧ a̧dopea̧ oa, ni̧bä chjaopadejȩ, goaeri̧ ni̧bämȩrȩ. Ado pio ju̧i̧ uëri jibëa̧ jabi pio ji̧ yürë cji̧däpadejȩ. Tjamo̧ davä. Ejitoräpȩ cjo̧ro̧mȩ ütë pio judi u̧i̧pea̧ oa cjiapea̧ oa, 'Aja̧, eadicoada, jojabi pio ji̧ ëbapea̧ oa yürüa̧dicoada, tjamo̧ri̧ ni̧bä jirodicoada' quëna̧pea̧ oa, jabechji̧ yürüpadejȩ jojabi ji̧, 'cja̧rȩmȩ pumȩpea̧a̧ro̧da yaba̧' quëna̧ jo̧rȩta tänȩpea̧ oa. Jabo cjäri̧ madejȩ, jabomo̧ boadärärea̧ jo̧rȩtamȩrȩ yürüpadejȩ jojabi ji̧. 'Jaeboquëda, ca̧ jabi pio ji̧iä chiri oa boadärärea̧ daemȩquëda' quëna̧ jo̧rȩtamȩrȩ yürüpadejȩ, chiri boarea̧ pio ju̧i̧mo̧i̧ jo̧rȩtamȩrȩ. Jabo cjäri̧ madejȩ, judi ja̧di dari̧ jo̧rȩtaräbo, jojabi pio jini̧ a̧dodëpanȩjȩ jäja oa. Ado pio ju̧i̧iä dae järea̧ dadëpade. Ejito chiri oa boarea̧ dadëpade.

¹⁸ Ado ja̧dëa ji̧ ji̧dë duri oa, Chiriarimȩ ütë pio judi ano̧ mire acji jäpadejȩrȩ ui ana̧ yuroro cjo̧ro̧ji̧ri̧ pumȩ pio ji̧ri̧. Ado bë ma̧ri̧ ji̧ra̧ tjamo̧ oa boadärärea̧ dapade, pio ji̧ri̧ ja̧ chiri ütëmȩrȩ ano̧ mire cjo̧ro̧pea̧ oa. Jabo cjäri̧ madejȩ, ado cja̧rȩmo̧ guadia ütë pio judi, ado cja̧rȩmo̧ chiririmȩ pio judi goae tarari̧ dëbëpe chjaopadejȩ judi eami̧ oa dëbëparea̧ decjiari̧. Ado pio ju̧i̧iä Chiriaräpȩ cjo̧ro̧mȩ ütë judi pio jȩa chjiari ji̧dë ma goaeri̧ jo̧rȩtarërea̧ ji̧, ji̧dë ma 'ba chia tjamo̧mȩquëda, boadärämȩ ütë pio judiquëda' quëna̧ jo̧rȩtarërea̧ ji̧, jabechji̧ idëri̧ cjia tjamo̧mȩ oa cuchupë baä tänȩpadejȩ jibëa̧ chiriräpȩmo̧, boadärärea̧ dadëmȩ oa.

¹⁹ Ado baämȩrȩ jo̧rȩtariä baäpade, cjatäcjie jo̧rȩtamȩrȩ. 'Aja̧, baäquëda, ca̧ bëräpȩ baäquëda, cüdë boadärärea̧ dadëräbo jabechji̧ baärea̧ chiaquëda, cüdë jëdano̧rërea̧räpȩ ju̧ri̧ chjadëri̧ cjo̧ro̧rea̧ daemȩquëda, cüdë tutia̧ tjoro jëdano̧a̧ bëräpȩ ju̧ri̧ chjadëri̧ cjo̧ro̧rea̧ daemȩquëda' quëna̧ jo̧rȩtariä baäpade. Jabo cjäri̧ made, chjadëri̧ cjo̧ro̧rea̧ dadëpade. Jabechji̧ jibëa̧ bëräpȩ baädäräa̧mȩ oa boadäräpadiro̧jo̧ȩ. Ado ja̧di dari̧ japea̧ duri oa, ja̧bo tänȩpadiro̧jo̧ȩ.

²⁰ Ado Chiriaräpȩ cjo̧ro̧mȩ ütërëremȩ pio judi ütëdëpe baga̧rä, ado cja̧rȩmo̧rȩ ano̧ mire ütëpade. Ado jibëa̧ chiri oa chjacjiamȩ tjamo̧ri̧ jëdano̧tämi̧ cjiamȩrȩ chjadüpadejȩ jibëa̧ mu̧i̧tjoi̧ oa Jerucharȩräpȩ ju̧ri̧. Aja̧, jënȩ boa̧ chiriräpȩ ju̧ri̧ chjadüpadejȩ chëre mitëpea̧ oa, pumȩ judiro̧ chirirä cjo̧ro̧a̧ ba oa ba ano̧ tänȩpea̧ oa. Jabo cjäri̧ made, pio jiro chiri ütë cjo̧ro̧mȩ pio judi japamitë boi̧chji̧ chjätä ëte ja̧bopade. Jabo acji jana̧ji̧ri̧ pio ji̧ri̧iä ja̧bodëpade. Ado pio jȩaiäpȩmo̧ ërecjiamȩ pio ju̧i̧iäbo ja̧bodëpade. Jabo jabechji̧ pumȩ judiro̧ daba quëna̧dërä ja̧bopade.

²¹ Ado ja̧dëa ji̧ Chiriaräpȩ ju̧ri̧ ado cja̧rȩmo̧rȩ ano̧ mire ütëmȩrȩ cjo̧ro̧pade. Chiri ütë cjo̧ro̧mȩ pio judiri ja̧dëmȩrȩ ano̧ mire ütëmȩrȩ cjo̧ro̧pade, pumȩ chjadëdë tjamo̧mȩrȩ. Jabechji̧ chiri ütëpe bagarea̧mi̧dëmȩrȩ ano̧ mire ütëmȩrȩ cjo̧ro̧pade. Jabechji̧ judi chjadëri̧ ütëpe bagatärea̧ ji̧, ütëborë chjadëri̧ ütarë darea̧mi̧ dari̧ ütëpe bagatärea̧ ji̧, cjäri̧ made, pumȩ ji̧ri̧ u̧i̧pe u̧i̧pe ni̧bäa̧ oaiä goadi ütëpe bagarea̧ dapade, pumȩ judiro̧ daba quëna̧dërä.

²² Ado pio jiro ütë pio judi acji tai̧mȩrȩ järä, jabechji̧ pio jȩa dëbëpe chjaoji̧ri̧ pio ji̧ri̧ goae tarari̧ boadäräpadejȩrȩ, guadia buba tjamo̧ oa goarijä tänȩrea̧mi̧ dari̧. Jabechji̧ bea ui üdë ma̧i̧ da cjücjürü tjamo̧pea̧rä eami̧ oa aeno̧mi̧ dari̧ acji tai̧pade, no̧i̧dë tjamo̧ oa ja̧bo tänȩmȩrȩ. Ado pio ju̧i̧ uëri japadëtärea̧ ji̧, jabechji̧ o ji̧ri̧ chjiari tjamo̧ goë tuti ja̧bepamȩ pio ju̧i̧bo ja̧bo tänȩpadejȩ, cjäri̧ri̧ cjia dadëmȩrȩ.

²³ Ado pio jiro ütë pio judi u̧i̧pamȩrȩ ma̧ȩ chjadüpadejȩrȩ chiri ütëti̧ cjo̧ro̧ji̧ri̧ pio ji̧ri̧. Tjamo̧ davä. Oëra̧ti̧ oa a̧rȩmȩ chiriräpȩ cjo̧ro̧ji̧ri̧ ütëti̧ pio ji̧ri̧ ma̧ȩ chjadüpadejȩrȩ judiro̧ cja̧rȩmȩ jo̧rȩtarea̧ chiaji̧ri̧rȩ cjo̧ro̧pea̧ oa, jibëa̧ dëbëti̧ra̧ chia a̧doji̧ri̧rȩ cjo̧ro̧pea̧ oa, judiro̧ jibëa̧ dëbëti̧ra̧ chia acji tai̧chea oa. Aja̧, ja̧di dari̧ japamȩrȩ cjo̧ro̧pade, pumȩ ji̧ri̧ goaeri̧ ni̧bämȩrȩ, pio ji̧ri̧ u̧i̧pe u̧i̧pe ni̧bämȩrȩ. Jabechji̧ jibëa̧ pumȩ judiro̧ ji̧ra̧dëräbo, pio ju̧i̧ eaji̧ri̧ pio judiro̧ ji̧ra̧dëräbo ju chia tjamo̧mȩmi̧ dari̧ cjo̧ro̧pade.

²⁴ Ado ja̧dëa ji̧ pumȩ judiro̧ daba quëna̧dërä, chjaodëri̧ acji go̧düdäräpadejȩrȩ. Tjamo̧ davä. Judiro̧ jurarea̧ jira̧räpȩ chjadëri̧ cjo̧ro̧ro, judiro̧ jabëdiädëji̧ri̧rȩ cjo̧ro̧ro, judiro̧ na̧e chiadëji̧ri̧rȩ jo̧rȩtarä, 'Aja̧, chjadëri̧ cjo̧ro̧a̧ro̧da, chiri ütë cjo̧ro̧mȩ pio judi acji jana̧dëpa jirodiibëda' quëna̧ jo̧rȩtaji̧ri̧rȩ cjo̧ro̧ro, jabechji̧ chjaodëri̧ acji go̧düdäräpadejȩrȩ pio ji̧ri̧ boadäräpea̧ oa. Tjamo̧ davä. Jibëa̧ yaboi̧ ütërëreji̧ri̧ pio judiro̧ ja̧di dari̧ cja̧rȩmȩ co japadëa̧räbo, ja̧di dari̧ boadärärea̧ dapadejȩrȩ. Ado pio jiro pumȩ pio ji̧ri̧ boadäräa̧ duri oa, jabechji̧ pio ji̧ri̧iä baë mitëpade a̧dë chjäte ji̧ra̧ oa. Ado jënȩ baë mitëa̧ pio ju̧i̧ chjarapë yürüpadejȩrȩ pio jȩa nö̧ta ëba tai̧ji̧ri̧ pio ji̧ri̧, jibëa̧ jadü pio ji̧ri̧. Aja̧, dami̧ti̧ ba chia oa chjarapë yürüpadejȩrȩ. Ado ja̧dëa ji̧ jibëa̧ jadü pio ji̧ri̧ nö̧ta ni̧bä chjao ëte, bë ma̧ri̧rä cjo̧ro̧ji̧ri̧ pio ji̧ri̧ acji tai̧pea̧ pio ju̧i̧ chjiari ütaraji̧ri̧rȩ ni̧bä chjao ëte, jabechji̧ acji tai̧padejȩrȩ pio ji̧ri̧ nö̧ta. Ado uë tjamo̧ a̧rȩri̧ tutia̧ oa cjiamȩ bë ma̧ri̧rä cjo̧ro̧ji̧ri̧ pio ji̧ri̧ boadärärea̧ dapadejȩrȩ. Jabo judi ja̧di dari̧ ji̧dë ma acji tai̧rea̧ datärea̧ ji̧, cjäri̧ made, japamitë boi̧chji̧ ma japarea̧ dapade.

²⁵ Jabo ja̧dëa ji̧ ji̧dë duri oa, Chiriaräpȩ cjo̧ro̧mȩ ütë pio judi ado chjereno̧ järipe bagarä, Ejito chiriräpȩ cjo̧ro̧ji̧ri̧ pio ji̧ri̧ ado chjereno̧ boadärärea̧ jo̧rȩtamȩpea̧rä, jabechji̧ guadia ji̧ra̧ tjamo̧ oa a̧dopa tänȩpadejȩrȩ Ejitoräpȩ cjo̧ro̧ji̧ri̧ pio ji̧ri̧ acji jäpea̧ oa. Jabo Ejitoräpȩ cjo̧ro̧mȩ ütë pio judi, "Aja̧, acji jana̧diro̧ibe" yo̧a̧ oa goë ta̧rëa̧ oaiä, peaja̧di a̧dopa tänȩpadejȩrȩ jibëa̧ guadia pio ji̧ri̧. Aja̧, jabërä a̧dopa tänȩpadejȩrȩ a̧dë chjäte ji̧ra̧ oa. Jabo cjäri̧ made, Ejito chiririmȩ ütë judi jibëa̧ guadia ji̧ra̧ tjamo̧ pio ji̧ri̧ nö̧ta goae tarari̧ dëbëpe chjaoräbo, jabechji̧ dae järea̧ dadëpade. Jabechji̧ jibëa̧ mu̧i̧tjoi̧ pio judiro̧ orë pio ju̧i̧ u̧i̧pea̧ oaiä, judiro̧ pio ju̧i̧ eadëji̧ri̧ pio ji̧ri̧ a̧doa̧ oaiä, jabechji̧ dae järea̧ dadëpade.

²⁶ Jabechji̧ pio ju̧i̧ nö̧ta ëba jura chaji̧ri̧ pio judiro̧ tänȩa̧ oaiä boadäräa̧ oa cjiapade ütë judi. Ado jibëa̧ guadia pio judiro̧ ji̧ra̧ tjamo̧räbo, peaja̧di aeno̧a̧ oa cjiadiäpadirȩ, bea uirë cjücjürü tjamo̧pea̧rä acji choami̧ dari̧. Tjamo̧ davä. No̧i̧dërë ja̧bo tänȩa̧ oa cjiapadirȩ.

²⁷ Ado ja̧dëa ji̧ ji̧dë duri oa pio jiro chiri ütëti̧ judiro̧ yo̧a̧ri̧rȩ no̧mȩ tjamo̧ri ja̧ ji̧dë ma dëbëpe chjaorërea̧ ji̧, jabechji̧ a̧dopapadirȩ. Chiria chiririmȩ ütë judi, ado Ejito chiririmȩ ütë pio judiborë ji̧dë ma dëbëpe chjaorërea̧ ji̧, jabechji̧ a̧dopapadirȩ ji̧mo̧ ni̧bä chjao chapea̧ oa mechjaräpȩ, judiro̧ jibëa̧ dëbëti̧ra̧ chia acji tai̧chea oa, judiro̧ ji̧dë ma dëbëpe chjaochea oa. Jabo judiro̧ yo̧a̧ri̧borë coëma cjiari̧ ni̧bätärea̧ ji̧, ma̧ȩ chjádë yürüdëji̧ri̧rȩ ni̧bätärea̧ ji̧, cjäri̧ madirȩ, jabomo̧ goaeri̧ ni̧bäpadirȩ yo̧a̧ri̧borë, jibëa̧ jadü pio ju̧i̧ chjai̧dëri̧ japa tänȩtämi̧ cjiaji̧ri̧rȩ. Jabo judiro̧ jibëa̧ jadüremȩ pio ju̧i̧ ana̧ri̧ u̧i̧parea̧ jo̧rȩtataräbo, judiro̧ jibëa̧ jadüremȩ pio ju̧i̧ boadärärea̧ järitaräbo, jabechji̧ judiro̧ jo̧rȩta̧ üdë badëri̧ cjiadiäpade. Jabechji̧ judiro̧ jo̧rȩta̧ üdë ji̧mo̧ baädëde Ütë tjamo̧ judi jo̧rȩta̧ pio ju̧i̧ nö̧ta. Ado ji̧mo̧ baädë ma tara, jabechji̧ badëri̧ cjiadiäpade.

²⁸ Ado ja̧dëa ji̧ Chiria chiririmȩ ütë pio judi Ejitoräpȩ cjo̧ro̧mȩ ütë pio ju̧i̧ nö̧ta ni̧bä chjaoa̧ duri oa, jabechji̧ ado chjereno̧ carupë baäpade jibëa̧ chiriräpȩmo̧, Ejitoräpȩ cjo̧ro̧ji̧ri̧ pio ji̧ri̧iä a̧dë chjäte ji̧ra̧ tjamo̧ oa baë mitë ëte. Ado judi cuchupë baärä, Icharai quȩmȩ chiri tjamo̧i̧ chjätämȩrȩ baäpade. Ado pio jiro chiri oa chjätärä, Ütërë yürë cji̧däa̧ ma̧ȩrä cjo̧ro̧tämi̧ cjiaji̧ri̧ pio ji̧ri̧ chjai̧dëri̧ japapadejȩrȩ. 'Jabechji̧ pio ji̧ri̧ tjamo̧ri̧ chjai̧dëri̧ japatämi̧ cjiaquëda' quëna̧ jo̧rȩtamȩrȩ ana̧ri̧ dëbëpe chjaopadejȩrȩ. Ado pio jiro pumȩ pio ji̧ri̧ ma̧i̧ dari̧ japea̧ duri oa, jabechji̧ jibëa̧ chiriräpȩ baäpade.

²⁹ Ja̧dëa ji̧ Ütë tjamo̧ pio judi ütara̧ doro, Chiria chiririmȩ ütë pio judi ado chjereno̧ acji jäpadejȩrȩ Ejitoräpȩ cjo̧ro̧ji̧ri̧ pio ji̧ri̧. Jabo cjäri̧ made, jënȩ no̧mȩ tjamo̧ri ja̧ boadärärërea̧mi̧ boadärärea̧ dadëpade.

³⁰ Jabechji̧ Quiti quȩmȩ chiriri pio judiriji̧ri̧ judiro̧ acji go̧düdäräpadirȩ jibëa̧ uimo̧mȩ chara ana̧ra̧ Ejitoräpȩ cjo̧ro̧ji̧ri̧ pio ji̧ri̧ a̧dopea̧ oa. Ado Chiria chiririmȩ ütë judi pio ji̧ri̧ da oaiä, cjäri̧ madejȩ, chjaodëri̧ uapapade. Ado pio ju̧i̧iä ado chjereno̧ baäpade jibëa̧ chiriräpȩmo̧. Ado Chiria chirimȩ ütë pio judi baärä, jabechji̧ Icharai quȩmȩ chiri tjamo̧i̧ chjätämȩrȩ baäpade ado chjereno̧. Jabo cjäri̧ madejȩrȩ, ma̧i̧ dari̧ jape chjaopadejȩrȩ. Jënȩ goae tarari̧ boadäräa̧ oa cjia oaiä, jënȩ uapamȩrȩ baäeno̧a̧ oaiä, jabechji̧ a̧dë chjäte ërecjiamȩrȩ jape chjaopadejȩrȩ Ütërë yürë cji̧däa̧ ma̧ȩrä cjo̧ro̧tämi̧ cjiaji̧ri̧ pio ji̧ri̧, pio jȩaiäpȩmo̧ chjai̧dëri̧ japadëji̧ri̧ pio ji̧ri̧. Tjamo̧ davä. Ana̧ri̧ conȩdapadejȩrȩ. Jabo ja̧di dari̧ japadëpadejȩrȩ Ütë tjamo̧ ja̧ ma̧ȩrä cjo̧ro̧dëri̧ cjiaji̧ri̧ pio ji̧ri̧. Aja̧, conȩdadëpadejȩrȩ, jabo ba chia damȩrȩ a̧dopadejȩrȩ ji̧dëri̧.

³¹ Ado jibëa̧ guadia pio judiro̧ ma̧i̧ dari̧ japaji̧ri̧rȩ chjadëdëparȩpadiro̧jo̧ȩ Ütë tjamo̧ ja̧ bë pio ju̧i̧. Ado pio ju̧i̧ uëri goe gu̧rori̧ yürürea̧mi̧dëri̧ cjiadiä tänȩpadiro̧jȩrȩ, o ji̧ri̧ chjiari goë tuti ja̧bepaji̧ri̧ pio ji̧ri̧. Ado peaja̧di a̧dë chjäte china̧chja pio ju̧i̧ are cji̧däpadiro̧jo̧ȩ Ütë tjamo̧ ja̧ bërä ju̧ri̧, yürürea̧ mechjaräpȩ ju̧ri̧. Jabechji̧ a̧dë chjäte cjari̧da oa, Ütë tjamo̧ pio ju̧i̧iä a̧dë chjäte goaedëti̧ oa are cji̧däpadiro̧jo̧ȩ.

³² Ado Chiria chiririmȩ ütë judi Icharairäpȩ cjo̧ro̧a̧ nö̧ta, gari̧pe gari̧pe ni̧bämȩrȩ u̧i̧pe ni̧bäpadejȩrȩ pumȩ judiro̧ pio jȩaiäpȩmo̧ ba chia dapea̧ oa. Ado Ütërë yürë cji̧däa̧ ma̧ȩrä cjo̧ro̧dëri̧ cjiaji̧ri̧ pio judiro̧, dëdë, ta̧rë ja̧bopadiro̧jo̧ȩ. Ado jibëa̧ mu̧i̧tjoi̧pe bagapadirȩ chjaodëri̧. Jabo o judiro̧, Ütë tjamo̧ ju̧i̧ eaji̧ri̧ pio judiro̧, ju̧i̧ ja̧ ma̧ȩrä cjo̧ro̧tämi̧ cjiaji̧ri̧ pio judiro̧, cjäri̧ madirȩ, Chiria chiririmȩ ütë ja̧ mu̧i̧tjoi̧pe bagadëpadirȩ jabo chjuari̧ jiadapadiro̧jo̧ȩ.

³³ Ado pio jiro japamitërä icharaita pio judiro̧ orë, urëdi tjamo̧ oa jo̧rȩtarea̧ chiaji̧ri̧ pio judiro̧, jabechji̧ chjadëri̧ a̧ra̧ano̧padiro̧jȩrȩ o ji̧ri̧, judiro̧ chjadëri̧ dabaparea̧mi̧ dari̧. Jabo cjäri̧ madejȩrȩ, Chiria chiririmȩ ütë pio judi ja̧bo tänȩpadejȩrȩ. Jabechji̧ a̧ra̧ano̧a̧ ba oa ja̧bo tänȩpadejȩrȩ no̧i̧dë oa. Ado o ji̧ri̧ guë ja̧bo tänȩpadejȩrȩ dëbëribo jo̧dë chiamȩ tjapërȩ jujuai̧ra̧ pio ju̧ri̧ra̧. Ado o ji̧ri̧ cjo̧dërä tüe ja̧bo tänȩpadejȩrȩ. Ado o ji̧ri̧ chaärea̧ bëräpȩ chaäpadejȩrȩ. Ado o ji̧ri̧ ja̧ oa baë mitëpadejȩ ji̧ri̧ ja̧ goëremȩ pio ju̧i̧. Aja̧, ma̧i̧ dari̧ japapadejȩrȩ Chiria chiririmȩ ütë judi.

³⁴ Ado Ütë tjamo̧ pio ju̧i̧ ja̧ pumȩ pio judiro̧ conȩda̧ oa cjiarä, Chiria chiririmȩ ütë pio judi ma̧i̧ dari̧ japarä, jabechji̧ a̧dotämi̧ cjiaji̧ri̧ judiro̧ ji̧ra̧dërë a̧dopadiro̧jȩrȩ jabëtari̧mi̧ oa. Jabo o judiro̧, tjamo̧ri̧ a̧dotämi̧ cjiadëji̧ri̧ pio judiro̧ jabomo̧ a̧docji̧ quëna̧ japapadirȩ. Pio ju̧i̧iä ana̧ri̧ a̧doa̧ oa cjiadëpadirȩ Ütë tjamo̧ ja̧ pumȩ judiro̧.

³⁵ Ado urëdi tjamo̧ oa jo̧rȩtarea̧ chiaji̧ri̧ pio judiro̧ orë ja̧bo tänȩa̧ oa cjiapadirȩ. Ado o judiro̧, conȩda̧ oa cjiapadirȩ. Jabo danȩ Da̧de, judiro̧ goae tjamo̧dë oa chjätäa̧ oaiä, chjadëri̧ jëdano̧a̧ oa cjiami̧ dari̧ cjiadiäpadirȩ. Tjamo̧ davä. Chjadëri̧ joa̧ oa cjiaji̧ri̧mi̧ dari̧ cjiadiäpadirȩ chjai̧dë chiadë maeari̧. Aja̧, ja̧di dari̧ jëdano̧a̧ oa cjiadiäpadirȩ Ütërë ütarë jo̧rȩta̧rä yuro. Jabechji̧ jabë pjärämȩde Ütërë ütara̧ japamitë üdë —yo̧mȩrȩ ni̧bä chjaorëremȩdejȩ Da̧de ju̧i̧ a̧dërimȩ mu̧i̧tjoi̧ üdë.

'Aja̧, Ütë tjamo̧ pio judimi̧ dari̧ ütëmȩquëda' quëna̧ jo̧rȩtatapade Chiria chiririmȩ ütë pio judi

³⁶ Ado ja̧dëa ji̧ a̧dërimȩ mu̧i̧tjoi̧ judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩ Da̧de pio ju̧i̧: —Ado pio jiro japamitërä Chiria chiririmȩ ütë pio judi eami̧ti̧ oa japarea̧ dapade, jënȩ jo̧rȩta̧mi̧. Ado pio ju̧i̧iä jabechji̧, pio jȩa chjiari a̧dë chjäte goaeri̧ jorȩte chjaopade. 'Aja̧, a̧dë chjätä ba chiamȩquëda, eami̧ ütëbea pio ju̧i̧iä ji̧dë u̧i̧ ütëquëda, eami̧ ütëbea üdë nö̧tadë madicoada' quëna̧ jo̧rȩtamȩrȩ cjo̧ro̧pade, jibëa̧ maea oa jo̧rȩtamȩrȩ. Ado Ütë tjamo̧ pio ju̧i̧ chjiaribo chjai̧dëri̧ ni̧bäpade, eami̧ ütë pio ju̧i̧ u̧i̧ Ütë pio ju̧i̧ chjiaribo. "Aja̧, jauëchjadëde. Ba chiadëde" yo̧mȩrȩ ni̧bäpade Ütë tjamo̧ pio ju̧i̧ chjiari. Ado judi ma̧i̧ da tjamo̧ oa japaräbo, jënȩ jo̧rȩta̧mi̧ japarea̧ daräbo, jabechji̧ Ütërë ütara̧rä yuromo̧ japarea̧ dapade. Tjamo̧ davä. Ütë ja̧ ërecjia̧ üdë acji cjatäa̧rä yuromo̧ japarea̧ dapade.

³⁷ Ado Chiria chiririmȩ ütë pio judi jibëa̧ ütëti̧rea̧ judiro̧ quëna̧rërea̧ ütë pio ji̧ri̧iäpȩmo̧ ba chia jo̧rȩtatärea̧ ji̧, cjäri̧ madejȩrȩ, ba chia jo̧rȩtadëpadejȩrȩ. Ado ivi jini̧ro̧ chjacjiamȩri̧ jo̧rȩta̧ ütë pio ju̧i̧bo ba chia jo̧rȩtadëpadejȩ. Jabechji̧ eami̧ ütë oa ba chia dadëpadejȩrȩ pio jȩaiäpȩmo̧ ma ba chia jo̧rȩtamȩ tara. Tjamo̧ davä. 'Pumȩ judiro̧ quëna̧ ütë pio ji̧ri̧iä ji̧dë u̧i̧ ba chiamȩquëda, eami̧ ütëbea üdë nö̧tadë madicoada' quëna̧ jo̧rȩtamȩrȩ yo̧pade, a̧dë chjäte goaeri̧ ni̧bämȩrȩ.

³⁸ Jabo judi pio jȩa chjiari ma̧i̧ dari̧ jo̧rȩtaräbo, 'Aja̧, cüdë eami̧ ütë pio ju̧i̧iä ji̧dë u̧i̧ ba chiamȩquëda' quëna̧räbo, jabechji̧ cja̧rȩmȩ ütë pio ju̧i̧mo̧i̧ ba chia jo̧rȩtamȩrȩ cjo̧ro̧pade. Tjamo̧ davä. Acji tai̧rea̧ chiamȩ ütë pio ju̧i̧iäpȩmo̧ ma quëna̧mȩrȩ cjo̧ro̧pade. Aja̧, jibëa̧ ütëti̧rea̧ judiro̧ quëna̧dërërea̧ ütë pio ju̧i̧ quëna̧mȩrȩ cjo̧ro̧pade. Ado pio ju̧i̧iäpȩmo̧ ba chia jo̧rȩtamȩrȩ dami̧ti̧ ba chia oa yürüpadejȩ. Aja̧, orora̧ japea̧ pio ju̧i̧, paratara̧ japea̧ pio ju̧i̧, ado dami̧ti̧ ta̧dë ba chia pio ju̧i̧ yürüpadejȩ jënȩ quëna̧ ütë pio ju̧i̧.

³⁹ Ado judi ado cja̧rȩmo̧räpȩ cjo̧ro̧ji̧ri̧ pio ji̧ri̧ acji tai̧rea̧ jo̧rȩtarä, uë tjamo̧ a̧rȩri̧ tutia̧rä cjo̧ro̧ji̧ri̧ pumȩ pio ji̧ri̧ boadärärea̧ jo̧rȩtarä, tutirea̧ tjoro cjiamȩ bë ma̧ri̧rä cjo̧ro̧ji̧ri̧ pio ji̧ri̧ boadärärea̧ jo̧rȩtarä, jabechji̧ jibëa̧ ütë tjaoë pio ju̧i̧iä goë cjo̧dëpadejȩ. Tjamo̧ davä. Ado cja̧rȩmo̧ chiriräpȩ cjo̧ro̧ji̧ri̧ judiro̧ quëna̧ ütë pio ju̧i̧iä, jibëa̧ ütëti̧rea̧ judiro̧ quëna̧dërea̧ ütë pio ju̧i̧iä goë cjo̧dëpade, acji tai̧rea̧ chiamȩ ütë pio ju̧i̧iä. Ado ja̧dëa ji̧ judi pumȩ pio ji̧ri̧ boadäräa̧ oa goarä, acji tai̧a̧ duri oa pumȩ pio ji̧ri̧ boadäräa̧ oa goarä, jabechji̧ pio jȩaiäpȩmo̧ ba chia jo̧rȩtaji̧ri̧ pio ji̧ri̧ ba dëbë ba chiaparȩpadejȩrȩ. Jabechji̧ tjamo̧ yo̧ji̧ri̧pe bagari̧ ba chiaparȩpadejȩrȩ. Ado jënȩ baë mitëa̧ chiri pio ju̧i̧ ütara̧mi̧ tuti ëte, jabechji̧ chjarapë yürüpadejȩrȩ peaja̧di judiro̧ pio ju̧i̧ nö̧ta acji tai̧a̧ ba oa. Aja̧, ja̧di dari̧ japamȩrȩ japapade Chiria chiririmȩ ütë pio judi.

⁴⁰ Ja̧dëa ji̧ cjiadiäa̧ japamitërä, Ejito chiririmȩ ütë pio judi ado chjereno̧ acji tai̧padejȩ jibëa̧ guadia pio ji̧ri̧ nö̧ta Chiriaräpȩ cjo̧ro̧mȩ ütë pio ju̧i̧iäpȩmo̧. Jabo cjäri̧ madejȩ, Chiria chiririmȩ ütë pio judi uapai̧ da tjamo̧ri̧ ba dëbëpe chjaopadejȩ jibëa̧ guadia buba pio ji̧ri̧ nö̧ta. Tjamo̧ davä. Jibëa̧ yae charara̧ tai̧ji̧ri̧ pio judiro̧, ado yaerä buë chaji̧ri̧ pio judiro̧ peaja̧di acji jäpadiro̧jo̧ȩ. Ado pio ju̧i̧ uëri uirä pjurëmȩ chara ji̧ra̧ tjamo̧ra̧ dëbëpe chjaopadiro̧jo̧ȩ peaja̧di, uapai̧ dari̧ dëbëpe chjaorea̧ chiamȩ charara̧. Ado Chiriarimȩ ütë judi boadäräpadejȩ Ejito chiririmȩ ütë pio ju̧i̧. Jabo pio ju̧i̧ ja̧ chiri maea oa yu̧a̧tärea̧ ji̧, cjäri̧ made, oëra̧ti̧ oa acji tai̧mȩrȩ jäpade, chiri ji̧ra̧ tjamo̧räpȩ go̧düdärärea̧mi̧ dari̧. Jabechji̧ bea ui üdë cjücjürü tjamo̧pea̧rä oëra̧ti̧ oa boadärämi̧ dari̧ acji tai̧ chjaopade, chiri ji̧ra̧ tjamo̧ oa boadärärea̧mi̧ dari̧.

⁴¹ Ado Icharai quȩmȩ chiriräpȩ ju̧ri̧ acji go̧düdäräpade peaja̧di, chiri chjacjiamȩräpȩ ju̧ri̧. Jabechji̧ oëra̧ti̧ oa tai̧mȩrȩ chiri ji̧ra̧ tjamo̧räpȩ acji tai̧pade, pumȩ no̧i̧dë tjamo̧ oa ja̧bo tänȩrea̧mi̧ dari̧. Jabo Edo̧ quȩmȩ chiriräpȩ cjo̧ro̧ji̧ri̧ pio judiro̧ ja̧bo tänȩa̧ oa cjiatärea̧ ji̧, cjäri̧ madirȩ, ja̧bo tänȩa̧ oa cjiadëpadirȩ jabo jabechji̧ cjo̧ro̧padirȩ, Moabo quȩmȩräpȩ cjo̧ro̧ji̧ri̧ pio judiro̧borë, Amono quȩmȩ chiriräpȩ cjo̧ro̧ji̧ri̧ pio judiro̧borë. Aja̧, Amono chirirä cjo̧ro̧ji̧ri̧ pio judiro̧, chiri chjadë tjamo̧ro cjo̧ro̧ji̧ri̧ pio judiro̧, peaja̧di ja̧bo tänȩa̧ oa cjiadëpadirȩ, jabo jabechji̧ cjo̧ro̧rea̧ dapadirȩ.

⁴² Jabechji̧ chiri ji̧ra̧ tjamo̧ oa boamȩrȩ acji tai̧ chjaopade oëra̧ti̧ oa Chiria chiririmȩ ütë judi. Ado Ejitoräpȩ cjo̧ro̧ji̧ri̧ pio judiro̧borë boadäräa̧ oa cjiapadirȩ, goadi bagurarea̧ decjiari̧.

⁴³ Ado Chiria chiririmȩ ütë pio judi Ejitoräpȩ cjo̧ro̧ji̧ri̧ pio ji̧ri̧ boadäräa̧ oaiä, jabechji̧ jibëa̧remȩ pio ju̧i̧ chjö̧na̧i̧ oa baë mitëpadejȩ. Aja̧, jibëa̧ mape bagarea̧mi̧ dari̧, jibëa̧ chja̧oerämo̧ cjiadiärea̧mi̧ dari̧ chjö̧na̧i̧ oa baë mitëpadejȩ. Oro oa, parata oa, ado dami̧ti̧ ba chia oa baë mitëpadejȩ. Ado danȩ, pio yoa ma̧ȩbo a̧de yo̧requedemȩ Da̧de. Libia quȩmȩ chiriräpȩ cjo̧ro̧ji̧ri̧ pio judiro̧, ado Etiopia quȩmȩ chiriräpȩ cjo̧ro̧ji̧ri̧ pio judiro̧ pio ju̧i̧ ja̧ chja̧oerä cjo̧ro̧dërërea̧ ji̧, jabechji̧ jibëa̧ chiri ütëpe baga tänȩpadiro̧jo̧ȩ, pio ju̧i̧ ja̧ chja̧oerä ano̧ mire cjo̧ro̧tämi̧ cjiaji̧ri̧rȩ.

⁴⁴ Jabo cjäri̧ made, Chiria chiririmȩ ütë pio judi bücjüri̧ cjia tjamo̧mȩrȩ jo̧rȩtapade. Jabechji̧ dorë cjitëmȩri pio judiri ma̧na̧mȩ ma̧ȩ pio ju̧i̧ ta̧rëa̧ oaiä, ado chirina̧ri pio judiri ma̧na̧mȩ ma̧ȩbo ta̧rëa̧ oaiä, jabechji̧ bücjüri̧ cjia tjamo̧mȩrȩ jo̧rȩtapade, uapa tjamo̧mȩrȩ. Ado pio ju̧i̧iä go̧düpade jibëa̧ chiriräpȩmo̧ ado chjereno̧ cuchupë baäpea̧ oa. Aja̧, ma̧ȩ pio ju̧i̧ ta̧rëa̧ oaiä, jabechji̧ a̧dë chjäte ërecjia tjamo̧pe bagamȩrȩ go̧düpade pio jȩa dëbëpe chjaoji̧ri̧ pio ji̧ri̧ ütëbo oa goarijä tänȩpea̧ oa, no̧i̧dë tjamo̧ oa ja̧bo tänȩpea̧ oa.

⁴⁵ Ado Chiria chiririmȩ ütë pio judi acji tai̧mȩrȩ cjiadiäpade ui ana̧ yuroro Jerucharȩ dëbëräpȩ ju̧ri̧, Ütërë mitëa̧ ya̧mi̧ dëbëräpȩ ju̧ri̧. Aja̧, pio ju̧ri̧pȩ cji̧däpadejȩ jibëa̧ bë oa, chiri ütë cjo̧ro̧mȩ ja̧ bë oa, ira̧ japea̧ bë oa. Jabo cjäri̧ made, Ütë tjamo̧ pio judi ütara̧ doro ja̧bo tänȩpadejȩ. Jabechji̧ judi ui ana̧ yuroräpȩ ju̧ri̧ cjo̧ro̧a̧ nö̧ta, jabechji̧ jënȩ cjo̧ro̧pea̧ japamitë üdë chjaodëri̧ goarijäpade, eami̧rȩ pio ju̧i̧ chjiari tuti japarea̧ decjiari̧ —yo̧mȩ oa ta̧rëa̧reconȩ a̧dërimȩ mu̧i̧tjoi̧ pio ju̧i̧, pio coaiäpȩmo̧ ana̧ri̧ ni̧bä chjaoa̧ ji̧.