Da̧de 10 - Biblia Pume

Ja̧di dari̧ darämi̧ cjiarëremȩde Da̧de judi, Tigiri quȩmȩ bea yuroro darämi̧ cjiamȩrȩ

¹ Ado Chiro judi tjarari̧ ui goamȩrȩ ütërä judirä, judi Pechia quȩmȩ chiriräpȩ chiri ütëmȩrȩ cjo̧ro̧rä judirä, jabechji̧ Ütë tjamo̧ pio judi na̧rȩa̧ oa ado chjereno̧ darämi̧ cjiarëremȩde Da̧de judi, Betacha quȩra̧ quȩpea̧ pio judi. Ado judi darämi̧ cjia̧ üdë tjamo̧ri̧ baärëremȩde jabo cjäri̧ madejȩ, chjao tjamo̧rëremȩdejȩ pio ju̧i̧ chjiari tjamo̧ri̧ dabapea̧ ji̧. Jabo Ütë tjamo̧ judi dabarea̧ yürüa̧ oaiä, jabechji̧ na̧e chiapea̧de pio jiro ma̧ȩ pio ju̧i̧ chjiari jënȩ darämi̧ cjia̧ pio ju̧i̧iä. Ado pio ju̧i̧iä go̧ȩparëremȩde Da̧de judi jënȩ darämi̧ cjia̧ pio ju̧i̧ chjiari:

² Aja̧, pio jiro japamitërä, cüdë jabë darämi̧ cjiadërä, cüdë, Da̧de pio judi, tjarari̧ chemana goarëremȩrequede cüdë gito ana̧ri̧ jo̧rȩtamȩpea̧ri ja̧ Jerucharȩ bë ma̧ri̧ pio ju̧i̧ chjiari, ma̧i̧ da chjai̧dë oa chjätäa̧ pio ju̧i̧ chjiari. Jabechji̧ tjarari chemana goarëremȩrequede jurarea̧ oa juradëmȩrȩ, ejaro cjiamȩrȩ.

³ Ado pio ju̧i̧iä jurarea̧ goae tjamo̧ oa juratärea̧ ji̧, juradë marëremȩrequede jabo goaedë maea oa jura̧requede. Ado go̧a̧ oa peaja̧di juradëa̧requede. Ado bino ërü oa jararërea̧ ji̧, pio ju̧i̧bo jaradëmȩpea̧requede. Ado peaja̧di goaeri̧ pjȩa̧mȩ joarea̧ra̧ joarërea̧ ji̧, joadëmȩpea̧requede. Jabechji̧ ja̧di dari̧ cjo̧ro̧mȩpea̧requede tjarari chemana nö̧ta cüdë gito ana̧ri̧ jo̧rȩtamȩpea̧ oaiä.

⁴ Ja̧dëa ji̧ japamitë chjätä ëte ui üdë pea tarupea̧rä, yabo baämȩ gupënȩrä, jabechji̧ Tigiri quȩmȩ bea yuroro dae cjiaremȩrequede.

⁵ Ado uëräpȩmo̧ gatë damȩrȩ chjaodëri̧ daea̧reconȩ pumȩmi̧ da oa, chjibo bërebëreai̧ tjamo̧ oa ina̧mȩ oa, lino quȩmȩ chjibo cotora̧ japea̧ chjibo oa. Ado cada abürea̧mi̧ da oa yura̧ oa goamȩ oa daea̧recone jibëa̧ cadaräpȩ, oro chja maeara̧ japea̧ cada abürea̧mi̧ da oa.

⁶ Ado pio ju̧i̧ ja̧ icjara üdë jabechji̧ tatari̧ cjiaremȩde topachio quȩmȩ ta̧dë ba chiami̧ dari̧. Ado jibëa̧ chamacho üdë, jabechji̧ bërepe chjaomȩmi̧ dari̧ tatari̧ cjiaremȩde, a̧dë chjäte tatari̧ cjiari̧. Ado jibëa̧ dacho üdë ma̧i̧ dari̧ cjo̧dë gäri baämȩmi̧ dari̧ cjiaremȩde, coëcoëari̧ tümi̧ dari̧. Ado jibëa̧ ichi ju üdë, jibëa̧ ta ju üdë tatari̧ cjiaremȩde peaja̧di. Aja̧, boro̧che üdë goae tarari̧ bubëgua̧ oaiä tatari̧ cjiami̧ dari̧ tatari̧ cjiaremȩde jibëa̧ i üdë. Ado judi ni̧bäa̧ ji̧, pumȩ bubarë ni̧bämi̧ dari̧ ni̧bäremȩde, to̧bari̧ ni̧bämȩrȩ.

⁷ Pio cüdëmo̧rȩ, Da̧de pio judi, darämi̧ cjiaremȩreconȩ pio jiro na̧rȩrea̧ oa. Coa nö̧ta ëba cjiaji̧ri̧ oari̧ pio judiro̧ dadëa̧diro̧jo̧ȩ. Jabo judiro̧ pio ju̧i̧ dadëräbo, jabechji̧ ma̧i̧ da uaparea̧ üdë chjaodëri̧ boadäräeno̧a̧dejȩrȩ jibëa̧ chji̧ oa. Ado pio ju̧i̧iä uapa tjamo̧pea̧ji̧ri̧rȩ a̧dë bagureno̧a̧diro̧coe goadipea̧ oa.

⁸ Pio ju̧i̧iä ca̧ea̧ma̧i̧ cjiadiäa̧requede pio ju̧ri̧pȩ cüdë na̧rȩrea̧ oa darämi̧ cjia̧ ji̧. Ado cüdë pumȩmi̧ damȩ pio ju̧i̧ darämi̧ cjia̧ ji̧, jabechji̧ goe decjiape jämi̧ dari̧ cjiadiäa̧requede davä, ca̧ chamacho üdë bërebëreai̧ mape bagari̧, ja̧bopamȩmi̧ dari̧. Ado chjaodëri̧ ju chiadëmȩpea̧requede, ju baebaeami̧ dape bagari̧.

⁹ Ado ja̧dëa ji̧ cüdë pumȩmi̧ damȩ pio judi ni̧bämȩ oa ta̧rëa̧ oaiä, jabechji̧ dabadëtä bagari̧ toboe china̧däräa̧requede ca̧ dacho oa daburäpȩmo̧, goae tarari̧ mo̧a̧mȩmi̧ dari̧.

¹⁰ Ado ja̧dëa ji̧ judi jibëa̧ ichira̧ coa ga̧re tara ëte, ima̧na̧gura cjiamȩ oa idë gatëa̧dique ju chatura̧ china̧ri̧. Aja̧, judi coa chjadëri̧ a̧doa̧ oaiä, jabechji̧ ju chatura̧ tjätjäpë china̧remȩrequede, jabë ima̧na̧gura cjiamȩrȩ.

¹¹ Ado tatari̧ cjiamȩ pio judi yo̧a̧dique: —Danȩ Da̧de, Ütë tjamo̧ judi ea tjamo̧mȩrȩ dadimȩ. Ado yaba̧ cjitëvä. Jabechji̧ cüdë mȩa ni̧bäpea̧ pio ju̧i̧ chjadëri̧ bapë ta̧rëpea̧ oa, jabechji̧ cjitëvä. Jabechji̧ chjadüa̧ oa jana̧requedemȩ. Ado pio ju̧i̧iä cjitëvä, ca̧ ma̧ȩ pio ju̧i̧ ta̧rëpea̧ oa —yo̧a̧dique. Ado judi pio jiro ma̧ȩ oa coa yo̧a̧ ji̧, jabechji̧ cjitëa̧requede, jabë i ma̧na̧gura cjiamȩrȩ.

¹² Ado cüdë jabë i managura cjiamȩrȩ cjia̧ oaiä, yo̧a̧dique pumȩmi̧ da judi: —Uapadëvä Da̧de. Jabechji̧ mȩnȩ pearä dabarea̧ yürütä cjo̧dëa̧ pio judiri yurori ta̧rë ja̧boa̧dimȩ Ütë tjamo̧ judi. Ado peaja̧di daba dadimȩ pumȩ ba chiadëmȩmi̧ dari̧ cjo̧ro̧mȩ oa. 'Jabechji̧ Ütë tjamo̧ pio ju̧i̧ tjamo̧ri̧ nö̧tadëcuni̧da, a̧dë chjäte ba chiamȩ pio ju̧i̧ tjamo̧ri̧ nö̧tarea̧mi̧dëcuni̧da' quëna̧ jo̧rȩtamȩ oa cjacjarë daba dadimȩ. Ado pio ju̧i̧iä Ütë tjamo̧ judi chjadüa̧dique cüdë mȩa chjadëri̧ daba tänȩpea̧ oa mȩnȩ darämi̧ cjia̧ pio ju̧i̧ chjiari.

¹³ Jabo danȩ, Ütë tjamo̧ judi mȩnȩ pearä cjo̧dëa̧ domȩ pio ju̧i̧iä ta̧rëa̧räbo, jabechji̧ chjaodëri̧ jana̧rea̧ dadëa̧requedemȩ Pechia quȩmȩ chiri oa tjamo̧ yo̧mȩ yaröca pio judi ana̧ri̧ tuti tja̧reparȩa̧ oaiä. Jabechji̧ 21 do nö̧ta pio mȩaiäpȩ jana̧rea̧ yürüdëa̧dique. Jabo ja̧dëa ji̧ Mi̧gë quȩmȩ mu̧i̧tjoi̧ pio judi chjadëri̧ a̧doera̧pea̧ oaiä, tjamo̧ yo̧mȩ mu̧i̧tjoi̧ pio judi tuti japera̧pea̧ oaiä, jabechji̧ a̧dë jana̧reconȩ jabë dëbëpe chjaomȩ oa, ju chiamȩti̧ yaröca pio ju̧i̧ jabë dëbëpe chjaomȩ oa.

¹⁴ Ado yaba̧ chjadëri̧ daba tänȩparequedemȩ na̧ pumȩ judiro̧ cjiadiäa̧ japamitërä chjätäpea̧ pio ju̧i̧ chjiari. Aja̧, Icharai pio judiri ja̧ji̧ri̧ pio judiro̧ ji̧dë duri oa ma̧na̧pamȩ japamitërä chjätäpea̧ pio ju̧i̧ chjiari chjadëri̧ ta̧rë tänȩparequedemȩ —yo̧a̧dique mu̧i̧tjoi̧ üdë.

¹⁵ Ado judi coa ni̧bäa̧ nö̧ta, jabechji̧ ëteräpȩmo̧ dae cjiaremȩrequede eami̧ oa dëbë yo̧dëmȩrȩ.

¹⁶ Jabo ja̧dëa ji̧ ado cja̧rȩmo̧rȩ chjaodëri̧ idëpea̧de, peaja̧di pumȩmi̧ darë. Ado pio jiromȩ üdë ga̧re tara̧dique ca̧ ya oa. Ado judi ja̧di dari̧ japea̧ oaiä, jabechji̧ ni̧bärea̧ dadërërea̧ ji̧, ni̧bärea̧ damȩpea̧requede ca̧ dëbëräpȩ cjiamȩ pio ju̧i̧. Ado yo̧mȩrȩ ja̧di ta̧rëri̧ yo̧a̧reconȩ: —Ano̧mȩ, cüdë ji̧ra̧ tjamo̧ oa darämi̧ cjia̧ pio ju̧i̧iä, jabechji̧ ana̧ tjamo̧ri̧ jo̧rȩtarequede, chji̧ goaedëra̧ jo̧rȩtamȩrȩ —yo̧a̧reconȩ—.

¹⁷ Jabechji̧ mu̧i̧tjoi̧ marequede ca̧ Ano̧mȩ. Ado pio ju̧i̧iä ¿yö̧ta dari̧ ni̧bätäremȩrequedemȩ? Jabechji̧ ju chiadëmȩrȩ cjiadiäa̧requede, jȩoadai̧ tarari̧ cjiamȩrȩ —yo̧a̧reconȩ.

¹⁸ Ado cüdë pumȩmi̧ damȩ pio ju̧i̧ ja̧di ta̧rëri̧ yo̧a̧ oaiä, jabechji̧ pio judi ado chjereno̧ ga̧re tara̧dique. Ado judi ja̧di dari̧ japea̧ oaiä, jabechji̧ ado chjereno̧ ju chiami̧ dari̧ cjiadiäa̧requede, ju chiadë marërea̧ ji̧.

¹⁹ Ado ja̧dëa ji̧ ja̧di ta̧rëri̧ yo̧a̧dique: —Danȩ, Ütë tjamo̧ pio judi tjamo̧ri̧ eadimȩ Da̧de. Ado pio ju̧i̧iä uapadëvä, jabo järi̧ri̧ cjiavä to̧bari̧ cjiami̧ dari̧. Jabechji̧ bücjüri̧ cjiadëvä jabo ma̧ chjupi̧ cjiari̧ jo̧rȩtavä —yo̧a̧dique. Ado judi coa ja̧di ta̧rëri̧ ni̧bäa̧ oaiä, jabechji̧ ju chiamȩmi̧ darë cjiadiäa̧requede. Ado pio ju̧i̧iä yo̧a̧reconȩ: —Jabechji̧ yo̧coe yaba̧ ano̧mȩ —yo̧a̧reconȩ—. Jabechji̧ mȩnȩ coa chjadëri̧ a̧doa̧ oaiä, mȩnȩ ju chia tjamo̧dëmȩ oa chjadëri̧ ju chiaparȩa̧ oaiä, jabechji̧ yo̧coe yaba̧ —yo̧a̧reconȩ.

^20-21 Ja̧dëa ji̧ a̧dërimȩ üdë yo̧a̧dique: —Danȩ, ¿mȩnȩ pio coa chjiari tjamo̧ri̧ dabadënȩ? 'Aja̧, pio ju̧i̧iä goë daera̧pea̧dicoada' quëna̧ dabadënȩ pio coa chjiari? Danȩ, daba tänȩra̧pea̧requedemȩ mȩnȩ chjadëri̧ dabapea̧ oa joërä go̧ȩpea̧ ma̧ȩ pio ju̧i̧, tjamo̧i̧ cjiari̧ baämȩ ma̧ȩ oa chiamȩ joërä go̧ȩpea̧ ma̧ȩ pio ju̧i̧. Ado cüdë pio mȩa chjadëri̧ daba tänȩa̧ duri oa, jabechji̧ ado chjereno̧ jo̧ȩra̧pe carupë baäpea̧ chiarequede Pechia quȩmȩ chiri oa tjamo̧ yo̧mȩ yaröca pio ju̧i̧ dëbëpe chjaopea̧ oa, pio ju̧i̧ nö̧ta japatäami̧ dari̧ japapea̧ oa. Jabo cjäri̧ marequede, cüdë pio ju̧i̧ boadäräa̧ oa goarä, ado cja̧rȩmo̧ yaröca üdë ajijana̧padique Grechia quȩmȩ chiriri pio judiri. Aja̧, pio jiro tjamo̧ yo̧mȩ yaröca pio judi peaja̧di acji jana̧padique japatäami̧ dari̧ japapea̧ oa, pio coa ano̧ mire dëbëpe chjaopea̧ oa. Jabo Icharai quȩmȩ chiri oa tjamo̧ jidamȩ pio judi chjadëri̧ a̧dodique, Mi̧gë quȩmȩ pio judi. Aja̧, cüdë pio jiro yaröca pio ji̧ri̧ dëbëpe chjaoro ado cja̧rȩmo̧rȩ a̧dodëdique, jabo pio judimo̧de coa a̧domȩ judi —yo̧mȩrȩ yo̧a̧dique mu̧i̧tjoi̧ üdë.