Da̧de 1 - Biblia Pume

Nabucodonocho judi Icharaita pio ji̧ri̧ boadäräa̧ pio ju̧i̧ chjiari ma̧ȩde pio yoa ma̧ȩ üdë

¹ Joaqui̧mi̧ quȩmȩ judi Juda quȩmȩ chiriräpȩ cjo̧ro̧ji̧ri̧ pio ji̧ri̧ ja̧ ütërä judirä, yo̧a̧ri̧ uiri ja̧ ütërä judirä, jabechji̧ acji go̧düdärärëremȩde Babironia quȩmȩ chiriräpȩ cjo̧ro̧ji̧ri̧ pio ji̧ri̧ ja̧ ütë judi jibëa̧ guadia buba pio ji̧ri̧ nö̧ta. Tjamo̧ davä. Nabucodonocho quȩmȩ pio judi jibëa̧ guadia pio ji̧ri̧ nö̧ta acji go̧düdärärëremȩde Jerucharȩräpȩ ju̧ri̧, Joaqui̧mi̧ pio judi cjo̧ro̧mȩ bë ma̧ri̧räpȩ ju̧ri̧. Ado tjoro tänȩa̧diro̧jo̧ȩ pio jiro bë ma̧ri̧ oa.

² Ado Jeova pio judi boadärärea̧ yürüa̧ oaiä, jabechji̧ boadärärea̧ darëremȩdejȩ chirirä cjo̧ro̧mȩ ütë pio ju̧i̧, Joaquimi̧ quȩmȩ pio ju̧i̧. Tjamo̧ davä. Juda quȩmȩ chiriräpȩ cjo̧ro̧mȩ ütë pio ju̧i̧, Jerucharȩräpȩ cjo̧ro̧ji̧ri̧ pio ji̧ri̧ ja̧ ütë pio ju̧i̧ boadärärea̧ yürürëremȩdejȩ, Joaquimi̧ ja̧ mu̧i̧tjoi̧ pio ji̧ri̧bo. Ado pio ju̧i̧ uëri Ütë tjamo̧ ja̧ bëräremȩ pio ju̧i̧bo mitërea̧ yürürëremȩdejȩ. Ado pio ju̧i̧iä ae jararea̧ ba chia tjamo̧ oa baë mitëa̧dejȩ o oa, jëdërea̧ ba chia tjamo̧bo. Ado pumȩ pio ji̧ri̧bo baë mitërëremȩdejȩrȩ. Ado ja̧dëa ji̧ judiro̧ ütëborë japamitë chjätä ëte, ado chjereno̧ baärëreji̧ri̧dirȩ jibëa̧ chiriräpȩ, Babironia quȩmȩ chiriräpȩ. Ado judiro̧ ju̧ri̧pȩ go̧düdäräa̧rä, jabechji̧ Nabucodonocho pio judi Ütë ja̧ bëräremȩ pio ju̧i̧ ano̧ mire boea̧ oa goarëremȩdejȩ jibëa̧ ütërë cjiamȩ bëräpȩ ju̧ri̧, ba chia tjamo̧ oa boearea̧ jo̧ tjoräpȩ ju̧ri̧. Tjamo̧ davä. Jibëa̧ ütë pio ju̧i̧ ano̧ mire ba chiaparȩpea̧ oa, pio ju̧ri̧pȩ boea̧ oa goarëremȩdejȩ. Aja̧, 'ibëa̧ ütë pio judi Judaräpȩ cjo̧ro̧reji̧ri̧ pio ji̧ri̧ ja̧ ütë ju̧i̧ u̧i̧ ba chiadida' quëna̧ jo̧rȩtamȩrȩ pio ju̧ri̧pȩ boea̧ oa goarëremȩdejȩ.

Nabucodonocho judi mitërëremȩdejȩ Da̧de ju̧i̧, jibëa̧ jadü pio ji̧ri̧bo

³ Ja̧dëa ji̧ Nabucodonocho pio judi ma̧ȩ yürürëremȩdejȩ jibëa̧ bëräpȩ tjamo̧ ja̧bepamȩ pio ju̧i̧, Apena̧ quȩmȩ pio ju̧i̧. Jabechji̧ jibëa̧ oa tjamo̧ ja̧bepamȩ tara, jibëa̧ mu̧i̧tjoi̧ chjö̧na̧i̧ oa tjamo̧ jidamȩ tara, jabechji̧ jënȩ pea ëba ma̧na̧ pumȩ pio ji̧ri̧, o ji̧ri̧ china̧chjari̧ tutitä yo̧a̧dejȩ jibëa̧ bëräpȩ ja̧bepapea̧ oa. Tjamo̧ davä. Juda quȩmȩ chiriri pio judiri pea ëba ma̧na̧ pumȩ pio ji̧ri̧, judaräpȩ tjamo̧ cjo̧ro̧reji̧ri̧ pio ji̧ri̧ ja̧ u̧ri̧ pio ji̧ri̧, chiri ütëremȩ pio judiri ja̧ u̧ri̧ pio ji̧ri̧ china̧chjari̧ tutitä yo̧a̧dejȩ, oari pëi̧ chja maea oa, oari chjacjiaji̧ri̧ maea oa.

⁴ Ado pio ju̧i̧iä ja̧di ta̧rëri̧ yo̧rëremȩdejȩ Apena̧ pio ju̧i̧: —Danȩ, pea üi̧padäräa̧ji̧ri̧ oari maea oa, chjacjiaji̧ri̧ maea oa mitëtä earequedemȩ —yo̧a̧dejȩ—. Ju chia tjamo̧ maea oa, co chjami̧ dari̧ cjiaji̧ri̧ maea oa mitëtä earequedemȩ, ju chiadëji̧ri̧ pio ji̧ri̧ mitërea̧ decjiari̧. Aja̧, urëdi tjamo̧ oa jo̧rȩtarea̧ chiaji̧ri̧ pio ji̧ri̧, dabaparea̧ bëräpȩ chjadëri̧ dabaparea̧ chiaji̧ri̧ pio ji̧ri̧, eami̧ oa chjaodëri̧ dabapapai̧ da pio ji̧ri̧ mitëtä earequedemȩ, chjadëri̧ ütararea̧ chji̧ chiaji̧ri̧ pio ji̧ri̧. Jabechji̧ ca̧ bëräpȩ chjadëri̧ ja̧bepë yürüpai̧ dami̧ da pio ji̧ri̧ mitëpea̧de. Ado ja̧dëa ji̧ pio jiro oari ji̧ri̧ chjadëri̧ mitëa̧ oa goarä, jabechji̧ chjadëri̧ dabapa tänȩjȩrȩ. Judiro̧ ibëa̧ ma̧ȩ oa chjadëri̧ ni̧bäpea̧ oa, Babironiaräpȩ cjo̧ro̧ji̧ri̧ pio judiro̧ ni̧bämi̧ dari̧ ni̧bäpea̧ oa, ado go̧ȩpea̧ ma̧ȩ oa peaja̧di chjadëri̧ go̧ȩ ni̧bäpea̧ oa dabapa tänȩjȩrȩ. Jabechji̧ judiro̧ jibëa̧ ma̧ȩ maea oa ni̧bärërea̧ ji̧, jabechji̧ Babironia ni̧bärea̧ ma̧ȩbo ni̧bäji̧ri̧pe bagatä earequedejȩrȩ. Ado ja̧dëa ji̧ ibëa̧ ma̧ȩ oa chjadëri̧ dabapea̧rä, ibëa̧ ma̧ȩ oa chjadëri̧ ni̧bäji̧ri̧pea̧rä, jabechji̧ chjadëri̧ a̧de dabapa tänȩjȩrȩ ibëa̧ pumȩ pio judiro̧ go̧ȩparërea̧ ma̧ȩ pio ju̧i̧ chjiari. Tjamo̧ davä. Ibëa̧ ütëti̧rea̧ pio judiro̧ cjo̧ro̧rërea̧ pio ju̧i̧ chjiari ma̧ȩ oa, a̧ro̧rȩ ibëa̧ chiriräpȩ cjo̧ro̧pea̧ pio ju̧i̧ chjiari ma̧ȩ oa chjadëri̧ dabapa tänȩjȩrȩ, judiro̧ pio ibë chjiari chjadëri̧ dabaparea̧ dapea̧ oa —yo̧mȩrȩ yo̧rëremȩdejȩ Babironiaräpȩ cjo̧ro̧mȩ ütë pio judi tjamo̧ ja̧bepamȩ pio ju̧i̧iäpȩmo̧.

⁵ Jabo ütë judi cjiadiädëmȩrȩ ja̧di ta̧rëri̧ a̧de yo̧rëremȩdejȩ tjamo̧ ja̧bepamȩ pio ju̧i̧, jënȩ mitëpea̧ oari pio ji̧ri̧ chjiari: —Ado danȩ, teracaba jurarea̧ maea oa yürüdëtäremȩrenȩjȩrȩ, jabo pio cüdë jurami̧ dari̧ juratä earequedejȩrȩ. Jabechji̧ jurarea̧ chuma̧ji̧ri̧ pio judiro̧ pio coaiäpȩmo̧ yürüa̧mi̧ yürütädiro̧jȩrȩ peaja̧di. Ado cüdë bino quȩmȩ ërü oa jarami̧ jaratädirȩ peaja̧di, a̧dë jararea̧ decjiari̧. Jabechji̧ chjadëri̧ juratä earequedejȩrȩ. Ado danȩ, jabomo̧ japamitë boi̧chji̧ nö̧ta dabapatä eadërequedejȩrȩ, jabo jabechji̧ tjarari̧ ui nö̧ta chjadëri̧ dabapatä earequedejȩrȩ. Ado ja̧dëa ji̧ pio jiro japamitë chjätä ëte, jabechji̧ ca̧ea̧ pio ju̧i̧ ja̧bepë yürüpadiro̧coe, ca̧ mu̧i̧tjoi̧ mape bagari̧ —yo̧mȩrȩ yo̧rëremȩdejȩ ütë üdë Apena̧ quȩmȩ pio ju̧i̧iäpȩmo̧.

⁶ Ado Apena̧ judi pio jiro oari pio ji̧ri̧ mitërërea̧ ji̧, ji̧ra̧ tjamo̧ oa mitërëremȩde. Ado Da̧de quȩmȩ pio judiborë mitëa̧ oa cjiarëremȩde. Ado Anania quȩmȩ judi, Michae quȩmȩ judi, ado Acharia quȩmȩ judi peaja̧di mitëa̧ oa cjiarëreji̧ri̧dirȩ o ji̧ri̧ nö̧ta. Ado pio jiro Icharaita judiro̧ ütëborë jabechji̧ Juda quȩmȩ pio judiri ja̧ marëreji̧ri̧dirȩ. Pio judiri ja̧ bubarëreji̧ri̧dirȩ.

⁷ Ado Apena̧ judi pio jiro oari pio ji̧ri̧ mitëa̧ oaiä, ano̧ mire quȩparëremȩdejȩrȩ jënȩro̧ pea ma̧na̧mȩ chirirä cjo̧ro̧ji̧ri̧ ja̧ quȩra̧ pio ju̧ri̧ra̧. Ado Da̧de judi jibëa̧ quȩ chiamȩrȩ cjo̧ro̧rërea̧ ji̧, Betacha quȩra̧ ano̧ mire quȩpea̧dejȩ. Ado Anania judi jibëa̧ quȩ chiamȩrȩ cjo̧ro̧rërea̧ ji̧, Chadaca quȩra̧ ano̧ mire quȩpea̧dejȩ. Ado Michae judi jibëa̧ quȩ chiamȩrȩ cjo̧ro̧rërea̧ ji̧, Mechaca quȩra̧ ano̧ mire quȩpea̧dejȩ. Ado Acharia judi jibëa̧ quȩ chiamȩrȩ cjo̧ro̧rërea̧ ji̧, Abenego quȩra̧ ano̧ mire quȩpea̧dejȩ. Ado pio ju̧i̧iä ado cja̧rȩmo̧ quȩra̧ quȩpea̧ oa cjia marëreji̧ri̧dirȩ Juda quȩmȩ chiririji̧ri̧ judiro̧.

Ütë tjamo̧ ja̧ ma̧ȩ oa jiadachea oa, Da̧de judi juradëri̧ cjiarëremȩde ütë ja̧ jurarea̧ oa

⁸ Jabo Da̧de judi tüdüa̧mi̧ darä cjo̧ro̧pea̧ ma̧ȩ oa jiadadëri̧ cjia tara, chjai̧dë gȩrȩ chiamȩmi̧ dari̧ cjiadëri̧ cjia tara, ja̧di dari̧ jo̧rȩtamȩpea̧de. 'Aja̧, chiri ütë cjo̧ro̧mȩ pio judi jurami̧ dari̧ juradëtäremȩquëda, judi bino quȩmȩ ërü oa jarami̧ jaradëtäremȩquëda' quëna̧ jo̧rȩtamȩpea̧de. Ja̧di tara yo̧a̧dejȩ tjamo̧ ja̧bepamȩ pio ju̧i̧, pio jȩa jura tänȩchea oa. Aja̧, chiri ütë üdë jurami̧ dari̧ jura tänȩchea oa, judi jarami̧ dari̧ jara tänȩchea oa yo̧a̧dejȩ, china̧chja pio ju̧i̧ jurachea oa, tüdüa̧mi̧ darä cjo̧ro̧pea̧ ma̧ȩ oa jiadachea oa.

⁹ Ado tjamo̧ ja̧bepamȩ judi Da̧de pio ju̧i̧ chjaodëri̧ jiade ta̧rëtärea̧ ji̧, cjäri̧ madejȩ, ta̧rë ja̧boa̧dejȩ. Jabechji̧ Ütë tjamo̧ pio judi tänȩa̧ oaiä, cjäri̧ri̧ cjiamȩrȩ darëremȩdejȩ, pio ju̧i̧ ba chia damȩrȩ.

¹⁰ Jabo cjäri̧ri̧ cjia daea̧räbo, cjäri̧ri̧ cjia ta̧rëa̧räbo, dëbë yo̧a̧dejȩ: —Danȩ, cüdë mȩa chjadëri̧ a̧dotärea̧ ji̧, cjäri̧ mareconȩ, uapa tjamo̧reconȩ ca̧ ano̧mȩ pio ju̧i̧, chiri ütë cjo̧ro̧mȩ pio ju̧i̧. Danȩ, Nabucodonocho pio judide jibëa̧ jurarea̧ oa juratä yo̧a̧mȩ judi. Pio judide jibëa̧ bino quȩmȩ ërü oa jaratä yo̧a̧mȩ judi. Ado mȩnȩ ado cja̧rȩmo̧ jurarea̧ oa ano̧ mire jura̧ oaiä o ji̧ri̧ a̧dë bëreta̧ cjiarä judi, o ji̧ri̧ a̧dë conȩga mapea̧rä judi, cjäri̧ madique, chjaodëri̧ gürü coto tänȩpai̧ dadique. Ado pio ju̧i̧iä jabechji̧, cüdë mȩa chjadëri̧ a̧dotärea̧ ji̧, cjäri̧ marequedemȩ, eami̧ oa japarea̧ dadërequede —dëbë yo̧a̧dejȩ.

¹¹ Jabo tjamo̧ ja̧bepamȩ judi Da̧de pio ju̧i̧ chjiari eami̧ oa japarea̧ dadëa̧ oaiä, jabechji̧ ado cja̧rȩmo̧ pio ju̧i̧ ano̧ mire yo̧tarëremȩdejȩ, Apena̧ pio judi jabërä mitërërea̧ mu̧i̧tjoi̧ pio ju̧i̧. Jabechji̧ pio judi mitëa̧ oa cjiarëremȩde pumȩ pio ji̧ri̧ jidapea̧ oa, Da̧de ju̧i̧, Anania ju̧i̧, Michae ju̧i̧, ado Acharia ju̧i̧ jidapea̧ oa. Aja̧, pio ju̧i̧ ano̧ mire yo̧tarëremȩdejȩ Da̧de judi, ja̧di ta̧rëri̧ yo̧mȩrȩ:

¹² —Jabo danȩ, cjäri̧ri̧ cjia daiibe —yo̧a̧dejȩ—. Jabechji̧ jurarea̧ chja maea oa yürütäremȩrenȩibe, go̧a̧dë maea oa —yo̧a̧dejȩ—. Ado bino quȩmȩ ërü oa yürütärea̧ ji̧, jabechji̧ ui chja maea oa yürüibe. Aja̧, ja̧di dari̧ yürü matäremȩrenȩibe 10 do nö̧ta.

¹³ Ado ja̧dëa ji̧ pio jiro japamitë chjätä ëte, jabechji̧ ütëbo oa chjadëri̧ ütarë datäremȩrenȩibe o ji̧ri̧ nö̧ta. Tjamo̧ davä. Ibëa̧ o pio ji̧ri̧, ütërë yürüa̧ jurarea̧ maea oa juraji̧ri̧ pio ji̧ri̧ ütarë datäremȩrenȩjȩrȩ peaja̧di pio ibë nö̧ta. Ado ja̧dëa ji̧ judiro̧ pio ibëiä ji̧dë u̧i̧ chjacjiamȩri̧ cjiarä judi, a̧ro̧rȩ i bëreta̧ cjiarä judi, a̧ro̧rȩ conȩga mapea̧rä judi, jabechji̧ mȩnȩ jo̧rȩtami̧ ano̧ mire jura tänȩpai̧ darenȩibe. Ado mȩnȩ tänȩa̧mi̧, jabechji̧ ütë pio judi jurami̧ dari̧ ano̧ mire juratäreji̧ri̧rea̧rȩ. Aja̧, ja̧di dari̧ japatäremȩrenȩibe 10 do nö̧ta —yo̧mȩrȩ yo̧a̧dejȩ Da̧de judi ado cja̧rȩmo̧ mu̧i̧tjoi̧ pio ju̧i̧iäpȩmo̧, tjamo̧ ja̧bepamȩ pio ju̧i̧ ja̧ oa ja̧bepë yürümȩ pio ju̧i̧iäpȩmo̧.

¹⁴ Ado judi ta̧rëa̧ oaiä, tjamo̧ ja̧bepamȩ pio ju̧i̧ ja̧ mu̧i̧tjoi̧ pio judi ta̧rëa̧ oaiä, 'Aja̧, jabechji̧dida, 10 do chjätä ëte ütarë dapea̧ chiaquiji̧ri̧da' quëna̧ jo̧rȩtamȩpea̧de.

¹⁵ Ado ja̧dëa ji̧ 10 do chjätä ëte, mu̧i̧tjoi̧ tjamo̧ ja̧ oa ja̧bepë yürümȩ pio judi Da̧de pio ju̧i̧ ütarë daea̧ ji̧, jibëa̧ jadü pio ji̧ri̧bo ütarë daea̧ ji̧, cjäri̧ madejȩrȩ, ji̧dë u̧i̧ chjadëri̧ cjo̧ro̧ji̧ri̧mi̧ da oa darëremȩdejȩrȩ o ji̧ri̧iä. Jabechji̧ conȩgaji̧ri̧ oa, chamacho jürüpea̧ji̧ri̧ oa dadëa̧dejȩrȩ, jabo chjadëri̧ cjo̧ro̧ji̧ri̧mi̧ da oa daea̧dejȩrȩ yo̧ cjiaji̧ri̧mi̧ da oa.

¹⁶ Ado pio ju̧i̧iä pio judiri yurori, jabechji̧ o judiro̧ jurami̧ dari̧ jurapea̧ oa yürüdëa̧dejȩrȩ, jabo tjadorimȩ jurarea̧ maea oa yürüriärëremȩdejȩrȩ go̧a̧dë maea oa. Ado bino quȩmȩ ërü oa yürütärea̧ ji̧, jabechji̧ ui chja maea oa yürüriärëremȩdejȩrȩ.

Ütë tjamo̧ judi chjadëri̧ a̧dorëremȩdejȩ Da̧de ju̧i̧, jibëa̧ jadü pio ji̧ri̧bo

¹⁷ Ado Ütë tjamo̧ judi pio jiro oari jadüchiami̧ oa a̧dë chjäte urëdi tjamo̧ oa jo̧rȩtarea̧ yürürëremȩdejȩrȩ. Jabechji̧ chjaodëri̧ dabapadärärea̧ yürürëremȩdejȩrȩ dami̧ti̧ oa. Ado pio ju̧i̧iä Babironiaräpȩ cjo̧ro̧ji̧ri̧ pio judiro̧ dabapea̧ duri pio ju̧i̧, jënȩro̧ go̧ȩparërea̧ duri pio ju̧i̧ chjaodëri̧ dabapadärärea̧ darëreji̧ri̧diro̧jo̧ȩ. Tjamo̧ davä. Jibëa̧ chiri pio ju̧i̧ chjiari ma̧ȩ oa, judiro̧ dabaparërea̧ duri pio ju̧i̧ chjadëri̧ dabapadärärea̧ yürüa̧dejȩrȩ Ütë tjamo̧ judi. Ado pio ju̧i̧ uëri Da̧de pio ju̧i̧iäpȩmo̧ goë ni̧bärea̧ a̧de yürürëremȩdejȩ peaja̧di. Tjamo̧ davä. Eami̧ pumȩ üdë canȩjäa̧ pio ju̧i̧ chjiari chjadëri̧ goë ni̧bäpea̧ oa, Ütë tjamo̧ judi eami̧ pumȩ oa darämi̧ cjia tänȩa̧ pio ju̧i̧ chjiari chjadëri̧ goë ni̧bäpea̧ oa, dabarea̧ yürürëremȩdejȩ peaja̧di.

Da̧de judi, jibëa̧ jadü pio judiro̧borë cjiarëreji̧ri̧dirȩ Nabucodonocho ja̧ dëbëräpȩ

¹⁸ Ado ja̧dëa ji̧ tjarari̧ ui chjätä ëte, chiri ütë cjo̧ro̧mȩ pio judi tänȩa̧ japamitë üdë chjätäa̧rä, jabechji̧ tjamo̧ ja̧bepamȩ pio judi, Apena̧ pio judi ëba järëremȩdejȩrȩ pea ütëpea̧ji̧ri̧ oari ütëbo oa ütë pio ju̧i̧iäpȩ. Aja̧, Nabucodonocho pio ju̧i̧iäpȩ ëba jäa̧dejȩrȩ pio ji̧ri̧ ja̧ dëbëräpȩ cjiapea̧ oa.

^19-20 Ado chiri ütë cjo̧ro̧mȩ pio judi ano̧ mire ni̧bä chjaorëremȩde pio ji̧ri̧ nö̧ta. Cja̧rȩmȩ pio ju̧i̧ nö̧ta ni̧bä chjao ëte, ado cja̧rȩmo̧ pio ju̧i̧ nö̧ta ano̧ mire ni̧bä chjaorëremȩde. Ado ütëbo oa chjadëri̧ ano̧ mire ni̧bä chjao ëte, jabechji̧ chjaodëri̧ mitërëremȩdejȩ Da̧de pio ju̧i̧, jibëa̧ jadü pio ji̧ri̧bo. Tjamo̧ davä. O judiro̧ nö̧tadëa̧ oaiä, Da̧de judi, jibëa̧ jadüborë dabapea̧ pio ju̧i̧ nö̧tadëa̧ oaiä, jabechji̧ chjaodëri̧ mitëa̧dejȩrȩ Da̧de pio ju̧i̧, Anania pio ju̧i̧, Michae pio ju̧i̧, ado Acharia pio ju̧i̧. O ji̧ri̧bo mitëtärea̧ ji̧, cjäri̧ madejȩrȩ, mitëdëa̧dejȩrȩ. Jabo Da̧de judi, jibëa̧ jadü pio judiro̧borë chjadëri̧ dëbë yo̧a̧ oaiä, ütë judi eami̧ oa iëno̧ë ta̧rëa̧rä chjadëri̧ ütarë jo̧rȩtaji̧ri̧rȩ dëbë yo̧a̧ oaiä, jabechji̧ mitëa̧dejȩrȩ. Tjamo̧ davä. Chiri ütë judi pio ji̧ri̧iä eami̧ oa chi̧dëeatä yo̧a̧rä, jabechji̧ urëdi tjamo̧ oa jo̧rȩtarea̧ra̧ dëbë yo̧a̧diro̧jo̧ȩ. Ado pio ju̧i̧iä chjaodëri̧ mitëa̧dejȩrȩ Nabucodonocho judi. Jabechji̧ pio ji̧ri̧ nö̧ta dabape jäa̧ji̧ri̧ pio ji̧ri̧iä ji̧dë u̧i̧ dabarëreji̧ri̧dirȩ. Jabo danȩrȩ, pio ji̧ri̧iämo̧i̧ ji̧dë u̧i̧ dabadërëreji̧ri̧dirȩ, jabo o pio ji̧ri̧iäbo dabarëreji̧ri̧dirȩ. Jabechji̧ Nabucodonocho judi pio ji̧ri̧ ütarë ta̧rëa̧ ji̧, 'jabo cjäri̧ madiro̧da, a̧dë chjäte ji̧ra̧ tjamo̧ oa dabadiro̧da, no̧mȩ tjamo̧ri ja̧ ca̧ea̧ oa ja̧beparëreji̧ri̧ mu̧i̧tjoi̧ pio ji̧ri̧iäbo ji̧dë u̧i̧ dabadiro̧da, peadëri ja̧ ca̧ea̧ pio ju̧i̧ ja̧beparëreji̧ri̧ pio ji̧ri̧iäbo ji̧dë u̧i̧ dabadiro̧da, to̧je go̧a̧rea̧ chiaji̧ri̧ pio ji̧ri̧iäbo ji̧dë u̧i̧ dabarea̧ chiadiro̧da, ado chjai̧dë üdë ma̧na̧na̧ra̧chea oa to̧je tuti go̧a̧rea̧ chiaji̧ri̧ pio ji̧ri̧iäbo ji̧dë u̧i̧ dabadiro̧da, jabechji̧ a̧dë chjäte ji̧ra̧ri̧ dabadiro̧da' quëna̧ jo̧rȩtamȩpea̧de davä pio ji̧ri̧ ütärë ta̧rëa̧ oaiä. Jabechji̧ Nabucodonocho ja̧ oa no̧mȩ tjamo̧ri ja̧ ja̧beparëreji̧ri̧ pio judiro̧ jabomo̧ jabëtari̧mi̧mi̧ da oa dabarërea̧ ji̧, pio jiro oari pëi̧ chja pio judiro̧ jadüchiami̧rȩ a̧dë chjäte ji̧ra̧ri̧ dabami̧ dari̧ dabarëreji̧ri̧dirȩ o ji̧ri̧iä. Ado pio ju̧i̧iä Babironiaräpȩ cjo̧ro̧mȩ ütë pio judi chjaodëri̧ mitëa̧dejȩrȩ.

²¹ Ado Da̧de pio judi, jabechji̧ japamitë ana̧ tjamo̧ nö̧ta ja̧beparëremȩde pio jiro ütë ja̧ oa. Jabechji̧ ja̧beparëremȩde Nabucodonocho ja̧ oa ado cja̧rȩmo̧rȩ ano̧ mire ütëmȩpea̧rä yuro, Chiro quȩmȩ pio judi ano̧ mire ütëmȩpea̧rä yuro. Ado ja̧dëa̧ ji̧ pio ju̧i̧ ja̧ oa peaja̧di ano̧ mire ja̧beparëremȩde pio judi cja̧rȩmȩ ui nö̧ta ütëmȩrȩ cjo̧ro̧mȩpea̧rä yuro.