Coronica Ma̧ȩ 2 5 - Biblia Pume

Ütë tjamo̧ ja̧ bë üdë cji̧däa̧ oa cjiarëremȩde

¹ Ado japamitë ana̧ tjamo̧ chjätä ëte, ja̧bepaji̧ri̧ judiro̧ cji̧dädärärëreji̧ri̧diro̧jo̧ȩ Jeova ja̧ bë oa. Charomo̧ judi yo̧rërea̧mi̧ cji̧dädärärëreji̧ri̧diro̧jo̧ȩ. Ado cji̧dädäräa̧rä, Charomo̧ ja̧ ama̧i̧rea̧ judi, Davi pio judi china̧chjari̧ tutirërea̧ pio ju̧i̧ a̧depea̧diro̧jo̧ȩ Ütë tjamo̧ ja̧ bëräpȩ. Davirea̧ judi china̧chjari̧ tutirërea̧ pio ju̧i̧, Jeova pio ju̧i̧iäpȩmo̧ yürüpea̧ oa boearërea̧ pio ju̧i̧ a̧depea̧diro̧jo̧ȩ chjö̧na̧i̧ oa. Aja̧, Charomo̧ pio judi tänȩa̧ oa a̧depea̧diro̧jo̧ȩ Ütë tjamo̧ ja̧ bëräpȩ ano̧ mire boeapea̧ oa. Ji̧ra̧ tjamo̧ oa a̧depea̧diro̧jo̧ȩ. Ba chiati̧ oa, orora̧ japea̧ oa cjiamȩ pio ju̧i̧, paratara̧ japea̧ oa cjiamȩ pio ju̧i̧ a̧depea̧diro̧jo̧ȩ ba chia tjamo̧ oa boeapea̧ jo̧ tjoräpȩ pio ju̧ri̧ ano̧ mire boeapea̧ oa.

Charomo̧ judi tänȩa̧ oa a̧dera̧pea̧diro̧jo̧ȩ yo̧ë cji̧däa̧ ma̧ȩ chiamȩ to cjara oa Ütë tjamo̧ ja̧ bëräpȩ

² Ja̧dëa ji̧ Charomo̧ judi ma̧ȩ chjadürëremȩdejȩrȩ tjamo̧ yo̧ji̧ri̧ ütëbo oa Jerucharȩräpȩ a̧dopera̧tä. Pio ju̧i̧iä Icharai pio judiri ja̧ji̧ri̧ pio ji̧ri̧ ja̧ tjamo̧ yo̧ji̧ri̧ pio judiro̧ järëreji̧ri̧dirȩ, bë tjamo̧ cjo̧ro̧ji̧ri̧ pio judiro̧borë. Aja̧, Jerucharȩräpȩ ju̧ri̧ järëreji̧ri̧dirȩ Davirë cjo̧ro̧rërea̧ bë ma̧ri̧räpȩ ju̧ri̧. Ado Jerucharȩ bë ma̧ri̧ üdë peaja̧di Chio̧ quȩmȩde. Aja̧, ja̧dira̧ järëreji̧ri̧dirȩ. Jeova ja̧ to cjara pio ju̧i̧ a̧depea̧ oa, yo̧ë cji̧därërea̧ ma̧ȩ chiamȩ to cjara pio ju̧i̧ a̧depea̧ oa järëreji̧ri̧dirȩ pio ju̧i̧ ano̧ mire are a̧ra̧pea̧ oa Ütë tjamo̧ ja̧ bëräpȩ ju̧ri̧.

³ Pio ju̧i̧iä oari judiro̧ ütëborë a̧doparëreji̧ri̧dirȩ chiri ütë cjo̧ro̧mȩ pio ju̧i̧ ja̧ dëbëräpȩ. Aja̧, do chjätäpea̧ doro a̧doparëreji̧ri̧dirȩ yabo baämȩ gupënȩdërä, jabo 6 gupënȩ chjätä ëte a̧rȩmȩ gupënȩrä a̧doparëreji̧ri̧dirȩ do chjätäpea̧ doro, ëba jurapea̧ do chjätäpea̧ doro.

⁴ Ado tjamo̧ yo̧ji̧ri̧ pio judiro̧ ütëborë go̧düdäräa̧rä, Devi pio judiri ja̧ji̧ri̧ pio judiro̧ uëräpȩmo̧ are gatëa̧diro̧jo̧ȩ Ütë ja̧ to cjara pio ju̧i̧.

⁵ Ado ja̧di dari̧ japa ëte ara jäa̧diro̧jo̧ȩ Ütë tjamo̧ ja̧ bëräpȩ. Ado peaja̧di dari̧ japea̧diro̧jo̧ȩ dëbëdiärea̧ jo̧ oa. Chjö̧na̧i̧ oa a̧depea̧diro̧jo̧ȩ tjoro ja̧bo. Ütë tjamo̧ ja̧ bëräpȩ a̧depea̧diro̧jo̧ȩ. Devi pio judiri ja̧ji̧ri̧ judiro̧, goë tuti ja̧bepaji̧ri̧ pio judiro̧borë ja̧di dari̧ japarëreji̧ri̧dirȩ.

⁶ Jabo Ütë ja̧ to cjara oa Ütë tjamo̧ ja̧ bë tjoräpȩ yu̧a̧ tänȩbea yaboi̧, ütëborë a̧doparëreji̧ri̧dirȩ pio ju̧i̧ ja̧ dëbëräpȩ. Charomo̧ judi, ado Icharai pio judiri ja̧ji̧ri̧ ütëborë a̧doparëreji̧ri̧dirȩ. Ado Jeova pio ju̧i̧iäpȩmo̧ chjacjiamȩri̧ jo̧rȩtaji̧ri̧rȩ goe gu̧rori̧ cäë yürürëreji̧ri̧diro̧jo̧ȩ. Aja̧, ütararea̧mi̧dëri̧ yürürëreji̧ri̧diro̧jo̧ȩ oveja buba oa, baca buba oa.

⁷ Ado ja̧di dari̧ japa ëte goë tuti ja̧bepaji̧ri̧ pio judiro̧ tora̧ ara järëreji̧ri̧diro̧jo̧ȩ Ütë tjamo̧ ja̧ bëräpȩ, a̧dë chjäte china̧chja jo̧ tjoräpȩ. Pio ju̧ri̧pȩ are a̧ra̧diro̧jo̧ȩ. Ado ja̧dëa ji̧ tuti cara̧diro̧jo̧ȩ ina̧rea̧ joë yara̧. Jeovarë chamȩräpȩ jidaji̧ri̧ mu̧i̧tjoi̧mi̧ dari̧ chjuroa̧ oa chiamȩ yara̧ pio ju̧ri̧ra̧ tuti cara̧diro̧jo̧ȩ. Ado ja̧di dari̧ japea̧ oaiä, jabechji̧ Jeovarë chamȩräpȩ jidaji̧ri̧ mu̧i̧tjoi̧mi̧ da pio ji̧ri̧ ja̧ chja̧oerä cjiadiärëremȩde to cjara üdë.

⁸ Tjamo̧ davä. Pio ji̧ri̧ ja̧ pjö̧dato ja̧re cjia chja̧oerä cjiadiärëremȩde ina̧rea̧ ya üdë, ararea̧ tobo.

⁹ Ado pio ju̧i̧ ararea̧ to üdë, to cjara pio ju̧i̧ ararea̧ to üdë jabechji̧ go̧a̧ti̧ tjamo̧rëremȩde. Pio ju̧i̧iä eami̧ pumȩ üdë, a̧dë chjäte china̧chja jo̧ tjo dëbëräpȩ dae cjiamȩ pio judi, jabechji̧ chjaodëri̧ daea̧täremȩdejȩ pio jiro to oa. Ado pio jiro to üdë, jabechji̧ pio ju̧ri̧pȩ cjiade. Aja̧, pio ju̧ri̧de yaba̧.

¹⁰ Ado Ütë ja̧ to cjara üdë, jabechji̧ pio ju̧i̧mo̧i̧ chiarëremȩde, yo̧a̧ri̧ ta̧dë pjatë oa, chjuroa̧ oa cjiaremȩ ta̧dë pio ju̧i̧mo̧i̧. Jabechji̧ Jeovarë Moiche pio ju̧i̧iäpȩmo̧ yürüa̧ ma̧ȩ pio ju̧i̧mo̧i̧, Ütë tjamo̧ judi yo̧ë cji̧därërea̧ ma̧ȩ pio ju̧i̧mo̧i̧ chiarëremȩde. Jabechji̧ Moiche pio judi to cjararä are a̧ra̧ oaiä chiarëremȩde. Tjamo̧ davä. Icharai pio judiri ja̧ji̧ri̧ judiro̧ Ejito chiriri pio judiri pearä go̧düdäräa̧ji̧ri̧ oa yürürërea̧ ma̧ȩ pio ju̧i̧mo̧i̧ chiarëremȩde.

Ütë tjamo̧ judi ana̧ri̧ na̧rȩrëremȩdejȩ jibëa̧ jauëchja oa

¹¹ Ado goë tuti ja̧bepaji̧ri̧ pio judiro̧ Ütë ja̧ to cjara oa a̧dë chjäte china̧chja jo̧ tjoräpȩ are a̧ra̧ ëte, jabechji̧ dairäpȩmo̧ go̧dürëreji̧ri̧dirȩ. Jabo judiro̧ ütëborȩ Ütë tjamo̧ ja̧ bëräpȩ yu̧a̧bea yaboi̧, jabechji̧ jabërä jëdano̧a̧ oa cjia marëreji̧ri̧dirȩ judiro̧ chjai̧dë gȩrȩ chiadëji̧ri̧mi̧ dari̧ cjiadiäpea̧ oa. Aja̧, o judiro̧borë, jibëa̧ ja̧beparea̧ dodëräbo, jabechji̧ chjadëri̧ jëdano̧a̧ oa cjia marëreji̧ri̧dirȩ.

¹² Ado Devi pio judiri ja̧ji̧ri̧ judiro̧ orë, tjamo̧ to̧ je go̧a̧ji̧ri̧rëreji̧ri̧dirȩ. Aja̧, Achapja quȩmȩ judi, Ema̧ quȩmȩ judi, Jedutu̧ quȩmȩ judi tjamo̧ go̧a̧ji̧ri̧rȩ cjo̧ro̧rëreji̧ri̧dirȩ pio ji̧ri̧di ja̧ji̧ri̧borë, jibëa̧ u̧ri̧borë. Ado chjibo bërebërea maeara̧ ina̧ oa cjiarëreji̧ri̧dirȩ, dino quȩmȩ chjibora̧. Ado gu̧na̧rea̧ mechjari pio judiri dorë cjitëmȩräpȩmo̧ cjiarëreji̧ri̧dirȩ Ütë tjamo̧ pio ju̧i̧iäpȩmo̧ chjacjiamȩri jo̧rȩtaji̧ri̧rȩ go̧a̧pea̧ oa. Pio ju̧i̧iä judiro̧ orë chjiparari pjatë biderea̧ oa goarëreji̧ri̧dirȩ. Ado o judiro̧ care care guarea̧ oa goarëreji̧ri̧dirȩ. Ado goë tuti ja̧bepaji̧ri̧ judiro̧, 120rë, goarëreji̧ri̧dirȩ ea cjiari̧ pjurarea̧ pio ju̧i̧.

¹³ Ado judiro̧ ütëborë, jabechji̧ ji̧mo̧ japaji̧ri̧rȩ chacjiamȩri̧ jo̧rȩtarëreji̧ri̧diro̧jo̧ȩ Jeova pio ju̧i̧. Chjiparari pjatë biderea̧ chiaji̧ri̧ judiro̧ goae tarari̧ dëbë bide cjaeärëreji̧ri̧dirȩ. Ado care care guaji̧ri̧ judiro̧ chjacjiamȩri̧ care care guarëreji̧ri̧dirȩ. Ado ea cjiari̧ pjurarea̧ chiaji̧ri̧ pio judiro̧ peaja̧di pjurarëreji̧ri̧dirȩ goaeri̧ baäri̧. Ado to̧ je go̧a̧ji̧ri̧ judiro̧ go̧a̧rëreji̧ri̧dirȩ chjadëri̧. Aja̧, ji̧mo̧ japaji̧ri̧rȩ, cja̧rȩmȩ chji̧ chiami̧ dari̧ japarëreji̧ri̧dirȩ, oëra̧ baämi̧ tarari̧ ta̧rërea̧ decjiari̧ japarëreji̧ri̧dirȩ, goaeri̧ ta̧rërea̧mi̧ dari̧. 'Aja̧, Jeova judi chjadë tjamo̧dida, chacjiamȩri̧ jo̧rȩtapea̧dida, bucho ana̧ eamȩrȩ dadiibëda, eadëpe bagarea̧ decjiari̧ eadiibëda, chjadë tjamo̧ pio judidibëda' quëna̧ jo̧rȩtaji̧ri̧rȩ yo̧ë cji̧adäriä go̧a̧rëreji̧ri̧dirȩ. Ado Ütë tjamo̧ ja̧ jauëchja üdë chjaodëri̧ birarëremȩde go̧a̧ra̧ ë oaiä. Aja̧, Ütë tjamo̧ ja̧ bë oa birarëremȩdejȩ, tjorobo boami̧ dari̧.

¹⁴ Ado pio ju̧i̧iä goë tuti ja̧bepaji̧ri̧ pio judiro̧ go̧a̧därätärea̧ ji̧, jabechji̧ go̧a̧därädëa̧dirȩ. Jabechji̧ Jeova ja̧ jauëchja pio ju̧i̧ daea̧ oaiä, a̧dë chjäte tatari̧ cjiamȩ jauëchja pio ju̧i̧ daea̧ oaiä, jabechji̧ chjaodëri̧ cjiadieno̧a̧dirȩ go̧a̧därärea̧ dadëji̧ri̧rȩ.