Coronica Ma̧ȩ 1 22 - Biblia Pume

¹ Ja̧dëa ji̧ Davi judi yo̧rëremȩdejȩrȩ icharaita ji̧ri̧: —Pio yi cji̧däpea̧de Ütë tjamo̧ ja̧ bë üdë, Jeova ja̧ bë üdë. Pio yi cji̧däpea̧de gu̧na̧rea̧ mechja üdë, Icharai pio judiri ja̧ji̧ri̧ pio judiro̧ goe gu̧rori̧ cäë yürüpea̧ oa. Aja̧, ja̧di ta̧rëri̧ yo̧mȩrȩ yo̧rëremȩde Davi judi icharaita pio ji̧ri̧iäpȩmo̧.

Davi judi jabërä dami̧ti̧ oa chjadëri̧ a̧doparëremȩde Jeova ja̧ bë oa chjadëri̧ cji̧däpea̧ oa

² Ado Davi judi ja̧di ta̧rëri̧ yo̧ ëte ma̧ȩ chjadürëremȩdejȩrȩ icharaitadë pio ji̧ri̧iäpȩmo̧, tjaoë pio ji̧ri̧iäpȩmo̧. A̧dopera̧tä yo̧mȩrȩ ma̧ȩ chjadürëremȩdejȩrȩ. Icharaitarë cjo̧ro̧mȩ chiriräpȩ cjo̧ro̧ji̧ri̧ pio ji̧ri̧iäpȩmo̧, jabo Icharai pio judiri ja̧dëji̧ri̧ pio ji̧ri̧iäpȩmo̧ ma̧ȩ chjadürëremȩdejȩrȩ a̧dopera̧tä. Ado ja̧dëa ji̧ a̧dopera̧pea̧ji̧ri̧ oa ja̧bepa tänȩrëremȩdejȩrȩ ta̧dë oa. Bori̧dë tjamo̧ oa, choco chocoa oa chjuro tänȩrëremȩdejȩrȩ Ütë tjamo̧ ja̧ bë oa japapea̧ oa.

³ Ado iero quȩmȩ chjiparari ji̧ra̧ tjamo̧ oa yürürëremȩdejȩrȩ cjae gu̧na̧rea̧ no̧i̧dë tjamo̧ oa jëdano̧pea̧ oa. Aja̧, tuti cararea̧ joë ya oa cji̧däpea̧ oa iero ji̧ra̧ oa yürürëremȩdejȩrȩ. Ado boro̧che quȩmȩ chjiparari oa peaja̧di yürürëremȩdejȩrȩ a̧dë chjäte chacha oa, mö̧reda̧rea̧mi̧dë oa. Aja̧, Ütë tjamo̧ ja̧ bë oa cji̧därea̧ oa jo̧rȩtamȩrȩ yürürëremȩdejȩrȩ.

⁴ Ado chedoro quȩmȩ to ji̧ra̧ tjamo̧ oa yürürëremȩdejȩrȩ peaja̧di, ütararea̧mi̧dë oa. Jabechji̧ Chido̧ quȩmȩräpȩ cjo̧ro̧ji̧ri̧ pio judiro̧ jibëa̧ chiriri pio judiri chia jana̧ oaiä, Tiro quȩmȩräpȩ cjo̧ro̧ji̧ri̧ pio judiro̧borë chia jana̧ oaiä, jabechji̧ chedoro to no̧i̧dë tjamo̧ oa mitërëremȩde Davi judi Ütë tjamo̧ ja̧ bë oa cji̧däpea̧ oa.

⁵ Ado Davi judi, 'Aja̧, ca̧ ja üdë, Charomo̧ pio judi cji̧däpadiji̧da, Ütë tjamo̧ ja̧ bë pio ju̧i̧ cji̧däpadiji̧da, a̧dë chjäte chjacjiamȩ tjamo̧ oa cji̧däpea̧ chiadiji̧da, ado chiriräpȩti̧ oa cjo̧ro̧ji̧ri̧ judiro̧ pio jiro bë pio ju̧i̧ chjiari goë goë ta̧rë ëte ba chia jo̧rȩtapadiro̧ju̧i̧da, pio ju̧i̧iä chjadëri̧ a̧dopea̧ chiacuni̧da, jabë pëi̧ chjadida, jabë tjamo̧ri̧ dabadëdida, pio ju̧i̧iä a̧dopea̧ chiacuni̧da, dami̧ti̧ oa jabërä a̧dopatäremȩquëda, to pio ju̧i̧, ta̧dë pio ju̧i̧, chjiparari pio ju̧i̧ jabërä a̧dopatäremȩcuni̧da, chjadëri̧ boea oa goatäremȩcuni̧da, cüdë ja̧bobea yaboi̧ jabërä chjadëri̧ jëdano̧a̧ oa goatäremȩcuni̧da' quëna̧ jo̧rȩtamȩrȩ chjö̧na̧i̧ oa jëdano̧rëremȩde Davi judi jabërä, jibëa̧ ja üdë Ütë tjamo̧ ja̧ bë oa ji̧dë duri oa chjadëri̧ cji̧därea̧ dapea̧ oa. Pio ju̧i̧iä dami̧ti̧ oa boearëremȩdejȩ chjiparari oa, ta̧dë oa, to oa, judi ja̧bobea yaboi̧.

⁶ Ado ja̧di dari̧ japa ëte, to̧bari̧ yo̧rëremȩdejȩ jibëa̧ ja oa: —Danȩ, Jeova ja̧ bë oa japavä ca̧ ja. Icharai pio judiri ja̧ji̧ri̧ ja̧ Ütë ja̧ oa cji̧dë yürüjo̧ȩ —yo̧mȩrȩ yo̧rëremȩdejȩ jibëa̧ ja oa, Charomo̧ pio ju̧i̧. Ja̧di ta̧rëri̧ yo̧a̧dejȩ joja oa.