Corochȩche Ma̧ȩ 4 - Biblia Pume

¹ Ado pio ju̧i̧iä mȩnȩro̧, gatëa̧ mu̧i̧tjoi̧ pio ji̧ri̧ goaji̧ri̧ pio judiro̧, jabechji̧ chjadëri̧ ëba cjo̧ro̧täreji̧ri̧renȩro̧jȩrȩ. Badë dadëchji̧jȩrȩ. Chjai̧dëri̧ japadëchji̧jȩrȩ, jabo coëma cjiari̧ japachji̧jȩrȩ. Jabechji̧ dibëa̧ Ano̧mȩ goanȩrȩ peaja̧di a̧dëräpȩ ju̧ri̧. Ado pio ju̧i̧ ja̧ dachoro cjo̧ro̧renȩrȩ.

Chi̧dëearëremȩdejȩrȩ quëna̧ji̧ri̧ ji̧ri̧ Pablo judi

² Danȩrȩ ca̧ oti̧, ji̧dë ma ni̧bächji̧jo̧ȩ Ütë tjamo̧ ju̧i̧. Na̧e chiaji̧ri̧rȩ ni̧bächji̧jo̧ȩ yadë maeara̧. 'Jabechji̧ Ütë tjamo̧ judi chjadëri̧ japea̧diibëda’ quëna̧ jo̧rȩtariä ni̧bächji̧jo̧ȩ, a̧dë mo̧a̧mi̧ dari̧ jo̧rȩtarea̧ decjiari̧.

³ Ado ibëa̧ Ama̧i̧ ju̧i̧ ni̧bärä, jabechji̧ pio ibë chjiaribo goë cjo̧dëchji̧ibe. Jabechji̧ a̧ro̧rȩ Quiricho pio ju̧i̧ chjiari ma̧ȩ pio ju̧i̧, goadia̧ oa cjiarëremȩ ma̧ȩ pio ju̧i̧ a̧ra̧ano̧rea̧ dapea̧ oa goë cjo̧dëchji̧ibe. Danȩrȩ, cüdë pio jiro ma̧ȩ oa a̧ra̧ano̧a̧ oaiä chaäa̧ oa cjiarequede yaba̧, pio yi chaärea̧ bëräpȩ. Jabo chaäa̧ oa cjiamȩborë, jabechji̧ a̧ra̧ano̧tämi̧ cjiarequede.

⁴ Ado pio ju̧i̧iä jabechji̧, goë cjo̧dëchji̧vä pio coa chjiari, cüdë ütara̧mi̧ a̧ra̧ano̧pea̧ oa, pumȩ judiro̧ chjaodëri̧ dabaparea̧ dapea̧ oa.

⁵ Ado na̧e chiachji̧vä quëna̧dëji̧ri̧ pio ji̧ri̧ nö̧ta dëbëdiärä. Jabechji̧ badë maea oa ni̧bädëchji̧jȩrȩ. Ado danȩrȩ, mȩnȩro̧ pio ji̧ri̧iäpȩmo̧ chjadëri̧ japarea̧ darä, jabechji̧ chjadëri̧ japachji̧jȩrȩ.

⁶ Ado pio ji̧ri̧ nö̧ta ni̧bärä, jabechji̧ ma̧ȩ goae maeara̧ ni̧bä chjaotäreji̧ri̧renȩro̧jȩrȩ. Jabechji̧ ji̧ri̧ chjadëri̧ a̧dopamȩ ma̧ȩ oa ni̧bä chjaochji̧jȩrȩ. Jabechji̧ yagoemȩra̧ mirea̧ oa cjiami̧ dari̧ cjiatäremȩde mȩnȩro̧ pio ji̧ri̧iäpȩmo̧ yo̧pea̧ üdë. Tjamo̧ davä. Goae tjamo̧ri̧ mirea̧mi̧ dari̧ cjiatäremȩde. Ado eami̧ üdë pio dibëiä Ütë tjamo̧ pio ju̧i̧ chjiari iëno̧ë ta̧rërä judi, jabechji̧ coëma cjiari̧ dëbë yo̧rea̧mi̧ dari̧ chia matäreji̧ri̧nȩrȩ, cjapiri̧ cjiarea̧ decjiari̧.

Cjiadiärea̧ Ma̧ȩ

⁷ Danȩrȩ, Tiquico quȩmȩ üdë pio yide. Ea tjamo̧rea̧ro̧jo̧ȩ. Pio ibë nö̧ta ja̧bepade, Ano̧mȩ pio ju̧i̧ ja̧ oa ja̧bepamȩrȩ. Jabechji̧ badë oaiä oëra̧diärea̧ decjiari̧ ja̧bepamȩde, cja̧rȩmȩ jo̧rȩtarea̧ maeara̧ jo̧rȩtamȩrȩ. Ado pio judi ma̧ȩ yürë jäpadidibe pio coa chjiari. Pio ju̧i̧iä chjö̧na̧i̧ oa chjadëri̧ ta̧rërea̧ dapanȩrȩ.

⁸ Pio ju̧i̧iä chjadüpareconȩ pio dibëiäpȩ. Mȩnȩro̧ pio coa chjiari ana̧ri̧ jo̧rȩtachea oa, mȩnȩro̧ cjatäcjie jo̧rȩtarea̧ dapea̧ oa chjadüpareconȩ, pio ibë chjiari chjö̧na̧i̧ oa chjadëri̧ ta̧rë tänȩpea̧ oa.

⁹ Ado jibëa̧ma̧i̧ jächea oa, chjadüpareconȩ Onechimo̧ quȩmȩ pio ju̧i̧bo. Dabarenȩro̧jo̧ȩ ju̧i̧. Dibëa̧ chjarerärëremȩ pio judide. Ea tjamo̧reconȩ ju̧i̧. Ca̧ jadüde. Badë oaiä oëra̧diärea̧ decjiari̧ ja̧bepamȩde peaja̧di, cjiadiärea̧ decjiari̧ ja̧bepamȩrȩ. Aja̧, pio ju̧i̧bo chjadüpareconȩ. Ado pio ji̧ri̧iä chjö̧na̧i̧ oa ta̧rëpanȩrȩ pio ibë chjiari, a̧ro̧rȩ chjätäa̧ pio ju̧i̧ chjiari.

¹⁰ Danȩrȩ, Aritaco judi pio coa nö̧ta chaäa̧ oa cjiamȩ pio judiborë jearea̧ chjadüdidibe. Ado Marco judi, Bernabe pio ju̧i̧ ja̧ ayi̧ma̧i̧ judiborë jearea̧ chjadüdidibe. Ado danȩrȩ, Marco judi pio dibëiäpȩ go̧düdärärea̧ darä judi, jabechji̧ cjäri̧ri̧ cjia dachji̧jo̧ȩ. Jabechji̧ peadë ma̧ȩ chjadüa̧requededibe pio ju̧i̧ chjadëri̧ jeapea̧ pio ju̧i̧ chjiari. Ja̧di tara jabechji̧ chjadëri̧ dachji̧jo̧ȩ.

¹¹ Ado Jechu Jutu quȩmȩ pio judiborë jearea̧ chjadüdidibe. Aja̧ ca̧ oti̧, cüdë pio yabo yo̧a̧ pumȩ pio judiro̧ tjamo̧dirȩ pio coa nö̧ta ja̧bepaji̧ri̧ judiro̧ Ütërë yo̧a̧ chja̧oerä. Aja̧, tjarari̧dirȩ. A̧dë chjäte chjadëri̧ a̧dodiro̧coe. Judio judiro̧ orë pio coa nö̧ta ja̧bepadë madirȩ, jabo pio judiro̧mo̧rȩ a̧dodiro̧coe. Aja̧, pio judiro̧mo̧dirȩ pio coa nö̧ta ja̧bepaji̧ri̧ judio judiro̧.

¹² Ado Epapara quȩmȩ judi, peaja̧di dibëa̧ charerä cjo̧ro̧rëremȩ pio judi, peaja̧di jearea̧ chjadüdidibe. Jechu Quiricho pio ju̧i̧ ja̧ mu̧i̧tjoi̧de. Ado pio ju̧i̧iä ji̧dë ma goë cjo̧dëde pio dibë chjiari, goë cjo̧dë ano̧rea̧ decjiari̧. Jabechji̧ ibë eadëji̧ri̧ pio ji̧ri̧ nö̧ta goae tarari̧ japatamȩmi̧ dari̧ goë cjo̧dë chjaode pio dibë chjiari, ana̧ri̧ ja̧bepamȩrȩ. Jabechji̧ mȩnȩro̧ to̧bari̧ cjiami̧ dari̧ cjiatä eamȩrȩ goë cjo̧dëde mȩnȩro̧ üi̧padärämi̧ dari̧ cjiapea̧ oa, mȩnȩro̧ chjuari̧ quëna̧pea̧ oa. Aja̧, mȩnȩro̧ chjarapë jo̧rȩtachea oa, mȩnȩro̧ Ütërë ea̧ pio ju̧i̧mo̧ japariä cjo̧ro̧pea̧ oa goë cjo̧dë chjaode, ana̧ri̧ ja̧bepamȩrȩ.

¹³ Aja̧ ca̧ oti̧, pio dibë chjiari ji̧dë ma goë cjo̧dëmȩ pio ju̧i̧ tjamo̧ri̧ dabareconȩ Epapara pio ju̧i̧. Ado Daodichea quȩmȩräpȩ quëna̧ji̧ri̧ pio ji̧ri̧ ja̧bo ana̧ri̧ goë cjo̧dërëremȩde, Erapori quȩmȩräpȩ quëna̧ji̧ri̧ pio ji̧ri̧ ja̧bo. Aja̧, judi pio dibë chjiari ana̧ri̧ ja̧bepea̧ pio ju̧i̧ chjiari tjamo̧ri̧ dabarequede.

¹⁴ Ado a̧ro̧rȩ ea̧ üdë, chjaparȩmȩ pio judi, Uruca quȩmȩ pio judi peaja̧di jearea̧ chjadüdidibe, Dema quȩmȩ pio judiborë.

¹⁵ Ado danȩrȩ, Daodichea quȩmȩräpȩ quëna̧ji̧ri̧ pio ji̧ri̧bo cjäri̧ri̧ cjia jo̧rȩtarea̧ro̧jȩrȩ. Ado Nipa quȩyi̧ pio ji̧bo jo̧rȩtarea̧ro̧jȩ, pio ji̧ ja̧ bëräpȩ a̧dopaji̧ri̧ pio ji̧ri̧bo. Aja̧, pio dibëiä jearea̧ chjadürea̧ro̧jȩrȩ ütëbo oa.

¹⁶ Ado mȩnȩro̧ pio yoa ma̧ȩ oa go̧ȩ ni̧bäa̧ duri oa, jabechji̧ ano̧ mire chjadüchji̧jo̧ȩ Daodichea quȩmȩräpȩ a̧dopaji̧ri̧ pio ji̧ri̧iäpȩmo̧. Ado judiro̧ bapë chjadüpadiro̧dibe ado cja̧rȩmo̧ ma̧ȩ oa, cüdë pio ji̧ri̧iäpȩmo̧ jabërä chjadüa̧ pio ju̧i̧. Dibëa̧bo tara, jabechji̧ pio ju̧i̧bo go̧ȩ ni̧bäpea̧ chiarenȩro̧jo̧ȩ.

¹⁷ Ado pio dibëiä ma̧ȩ chjadütämi̧ cjiareconȩ Aquipo quȩmȩ pio ju̧i̧iäpȩmo̧bo. Danȩrȩ, ja̧di ta̧rëri̧ yo̧chji̧jo̧ȩ. “Danȩ Aquipo, Ano̧mȩ judi mȩa yürüa̧ ja̧beparea̧ pio ju̧i̧ chjadëri̧ ja̧bepadäräjo̧ȩ, oëra̧diärea̧ decjiari̧.” Aja̧, pio ju̧i̧mo̧i̧ ma̧ȩ oa chjadüreconȩ pio ju̧i̧iäpȩmo̧.

¹⁸ Ado yaba̧ ca̧ ichira̧ pio yoamo̧i̧ ma̧ȩ oa go̧ȩparequededibe. Jearea̧ chjadürequededibe. Ado danȩrȩ, a̧dë jo̧rȩtadë machji̧coe chaäa̧ oa cjiamȩ oa, chatu chiamȩ chjipararira̧ cji̧däa̧ oa cjiamȩ oa. Cjäri̧ri̧ cjia jo̧rȩtachji̧coe. Aja̧, goë cjo̧dërequede Ütë tjamo̧ pio ju̧i̧iä, judi pio dibë cjäri̧ri̧ cjiamȩrȩ a̧dopea̧ oa. Aja̧, pio yoamo̧i̧ ma̧ȩ oa go̧ȩpe chjadürequededibe ca̧ oti̧. Dibëa̧ omȩ, Pablo