Corochȩche Ma̧ȩ 3 - Biblia Pume

A̧dëräpȩ cjiamȩ ba chia pio ju̧i̧ jo̧rȩtariä dopatäreji̧ri̧nȩrȩ

¹ Danȩrȩ ca̧ oti̧, Quiricho pio ju̧i̧ nö̧ta bëdüa̧ oa cjiadiärëreji̧ri̧nȩrȩ peaja̧ri̧ cjo̧ro̧pea̧ oa. Ado pio ju̧i̧iä ba chia maea oa jo̧rȩtariä cjo̧ro̧täreji̧ri̧nȩrȩ, a̧dëräpȩ cjiamȩ ba chia pio ju̧i̧. Jabechji̧ pio ju̧ri̧pȩde Quiricho judi. Pio ju̧ri̧pȩ chade jibëa̧ charea̧ ba chia tjamo̧räpȩ, Ütë tjamo̧ pio ju̧i̧ ja̧ mu̧i̧ chjua cotoro.

² Ado pio ju̧i̧iä chjarapë jo̧rȩtarea̧ decjiari̧ a̧dëräpȩ cjiamȩ maea oa jo̧rȩtatäreji̧ri̧nȩrȩ teracabadë maea oa, dai chirirä ja̧dë maea oa.

³ Jabechji̧ Quiricho pio ju̧i̧ nö̧ta ja̧boa̧nȩrȩ. Ado pio ju̧i̧iä pio yoa chiriri ja̧ tjamo̧dëpe baga̧nȩrȩ. Jabechji̧ peaja̧ri̧ cjo̧ro̧ji̧ri̧pea̧nȩrȩ. Quiricho pio judirimȩ cjo̧ro̧rea̧ra̧ pio ju̧ri̧ra̧ cjo̧ro̧ji̧ri̧pea̧nȩrȩ. Ado Quiricho pio judirimȩ cjo̧ro̧rea̧ üdë, jabechji̧ Quiricho pio ju̧i̧iä chjadëri̧ boea̧ oa cjiade. Tjamo̧ davä. Dibëa̧ cjo̧ro̧rea̧ peaja̧ üdë Ütë tjamo̧ pio ju̧i̧iä chjadëri̧ boea̧ oa cjiade Quiricho pio ju̧i̧ nö̧ta.

⁴ Ado Quiricho pio judi ma̧na̧rä, pio ibë cjo̧ro̧rea̧ peaja̧ oa yürümȩ pio judi ma̧na̧rä, jabechji̧ pio ju̧i̧ nö̧ta cjiadiäparea̧rȩ a̧dëräpȩ ju̧ri̧ Ütë tjamo̧ pio ju̧i̧ nö̧ta.

Pearä jo̧rȩtarërea̧ pio ju̧i̧ a̧dë jo̧rȩtaji̧ri̧pea̧nȩrȩ tjaoëpai̧ dari̧ jo̧rȩtaji̧ri̧rȩ

⁵ Pio ju̧i̧iä dai chirirä ja̧ jo̧rȩtarea̧ oa ja̧bo tänȩmi̧ dari̧ jiadachji̧jo̧ȩ, chjai̧dë pio ju̧i̧ earea̧ oa, dibëa̧ chji̧rä ana̧ri̧ ja̧bepamȩ oa. Jabechji̧ china̧chja pio ji̧ri̧ baë ëba mo̧a̧rea̧ oa, jabë jadü chiadëji̧ri̧ pio ji̧ri̧ baë ëba mo̧a̧rea̧ oa, ja̧bo tänȩmi̧ dari̧ japachji̧vä. Ado idi̧ dari̧ jo̧rȩtarea̧ oa, aurerë japami̧ dari̧ ji̧dë ma gari̧parea̧ oa ja̧bo tänȩmi̧ dari̧ jiadachji̧vä. Ado dibëa̧dë oa dae ja̧bo dae ja̧bo darea̧ pio ju̧i̧bo ja̧bo tänȩmi̧ dari̧ japachji̧vä. Jabechji̧ dae ja̧bo dae ja̧bo damȩ judi ütë pio ju̧i̧ jo̧rȩtarëmi̧ cjiari̧ jo̧rȩtadejȩ. Pio ju̧i̧iä ja̧dimi̧ dari̧ jo̧rȩtadëtäremȩde.

⁶ Danȩrȩ ca̧ oti̧, pio jiro chjai̧dë pio ju̧i̧iä acji jana̧padejȩrȩ davä Ütë ja̧ ërecjiarea̧ üdë. Pio jiro ma̧ȩ oa ta̧rëdiädëri̧ cjiaji̧ri̧ pio ji̧ri̧iäpȩmo̧ acji jana̧padejȩrȩ.

⁷ Ado pio mȩnȩro̧borë ja̧di dari̧ jape chjaoji̧ri̧rȩ cjo̧ro̧rëreji̧ri̧nȩrȩ pearä judi. Tjamo̧ davä. Dai chirirä ja̧ jo̧rȩtarea̧ maeara̧, chjai̧dë goaramȩ chji̧ maeara̧ jo̧rȩtaji̧ri̧rȩ cjo̧ro̧rëreji̧ri̧nȩrȩ, chjai̧dë pio ju̧i̧ ja̧ mu̧i̧tjoi̧ji̧ri̧rȩ.

⁸ Pio ju̧i̧iä yo̧requededibe ca̧ oti̧. Aene jo̧rȩtachji̧vä teracaba jo̧rȩtarea̧ oa. Ma̧ cjüëtüri̧ jo̧rȩtarea̧ oa, goadi ërecjiarea̧ oa, 'ado cja̧rȩmo̧ ju̧i̧iäpȩmo̧ chjai̧dëri̧ japatäcuni̧da' quëna̧ jo̧rȩtarea̧ oa, ya̧rea̧ oa, jabechji̧ aeno̧pea̧ maeade. Ja̧bo tänȩmi̧ dari̧ japapea̧ maeade. Dibëa̧ pumȩ pio ji̧ri̧iäpȩmo̧ aechide ni̧bädë matäreji̧ri̧renȩro̧jȩrȩ. Ado peaja̧di idi̧ ta̧rëri̧ ni̧bädë matäreji̧ri̧nȩrȩ. Jabechji̧ pio jiro ma̧ȩ üdë dibëa̧ yari pio judiri go̧düdë matäremȩde.

⁹ Ado danȩrȩ, ma̧ȩ chjádë yürüdë machji̧vä dibëa̧ dëbëti̧ra̧ chia. Jabechji̧ chjibo ütama̧i̧mi̧ da oa cjüëa ëte mu̧i̧ cürëmi̧ dari̧ japea̧nȩrȩ davä dibëa̧ pumȩrëremȩ pio ju̧i̧, chjai̧dë maea oa jo̧rȩtariä cjo̧ro̧rëremȩ pio ju̧i̧. Pio ju̧i̧iä ma̧ȩ chjádë yürüdë matäreji̧ri̧nȩrȩ dibëa̧ dëbëti̧ra̧ chia.

¹⁰ Jabechji̧ tjaoëpea̧renȩrȩ yaba̧. Ano̧ mire ina̧ oa cjiami̧ dari̧ cjiaji̧ri̧pea̧nȩrȩ pumȩ peaja̧ra̧ pio ju̧ri̧ra̧. Ado pio jiro pumȩ peaja̧ üdë pareapea̧ oa cjiarëremȩde Ütë tjamo̧ ju̧i̧iä, Pareapamȩ tjamo̧ pio ju̧i̧iä. Jabechji̧ pio jënȩmi̧ dari̧ cjia tjamo̧pea̧ oa ji̧dë ma̧ jëdano̧dejȩ Ütë tjamo̧ judi ji̧dë u̧i̧ pea chjai̧pe jäpea̧ oa. Jabechji̧ mȩnȩro̧ Ütë tjamo̧ pio ju̧i̧ tjamo̧ri̧ dabapadärätä eamȩrȩ jëdano̧didibe.

¹¹ Ado pio ju̧i̧iä jabechji̧, cja̧rȩmȩ pumȩ maeapea̧rea̧rȩ yaba̧ Quiricho pio ju̧i̧iä, ‘o judiro̧ tjaoëdiro̧da’ quëna̧rea̧mi̧dëri̧. Jabechji̧ judio judiro̧, ado judiodë judiro̧, ado budoa̧ oa cjiaji̧ri̧ judiro̧, ado budoa̧ oa cjiadëji̧ri̧ judiro̧, ado dabaparea̧ bëräpȩ dabapea̧ji̧ri̧ judiro̧, ado go̧ȩ ni̧bärea̧ dabadëji̧ri̧ judiro̧, ado gatëa̧ mu̧i̧tjoi̧ judiro̧, ado mu̧i̧tjoi̧dë judiro̧, ado chjätäti̧ cjiaji̧ri̧ judiro̧, jabechji̧ cja̧rȩmȩ pumȩ mapea̧rea̧rȩ Ütë tjamo̧ pio ju̧i̧iä. Danȩrȩ, a̧dë chjäte ba chiade Quiricho judi. Ado pio ju̧i̧ chiaji̧ri̧pea̧rea̧rȩ. Ado pio ju̧i̧iä cja̧rȩmȩ pumȩ maea oa dadiibe yaba̧ Ütë tjamo̧ judi, ‘o judiro̧ tjaoëdiro̧da’ quëna̧rea̧ decjiari̧.

¹² Danȩrȩ, Ütë tjamo̧ ja̧ pumȩpea̧nȩrȩ. Pio dibë ea tjamo̧mȩrȩ mitërëremȩdidibe china̧chjari̧ tutipea̧ oa, jibëa̧pe bagapea̧ oa. Ado pio ju̧i̧iä chjibo peaja̧ maeara̧ ina̧ oa cjiami̧ dari̧ cjo̧ro̧pea̧ chianȩrȩ dibëa̧ tjoro. Jabechji̧ o ji̧ri̧iäpȩmo̧ cjäri̧ri̧ cjia dachji̧jȩrȩ. Chjaji̧ri̧rȩ dachji̧jȩrȩ. ‘O judiro̧ coa nö̧tadëdiro̧da’ quëna̧dëchji̧vä, jabo ütëbo oa ba chia dachji̧jȩrȩ. Jabechji̧ cjäri̧ri̧ cjia daji̧ri̧rȩ ëba cjo̧ro̧chji̧jȩrȩ dibëa̧ pumȩ ji̧ri̧, ma̧ȩ bücjüi̧ra̧ ni̧bäji̧ri̧rȩ. Ma̧ chjua jo̧rȩtaji̧ri̧rȩ ëba cjo̧ro̧chji̧jȩrȩ. Ado goaedë oa chjätäräbo, jabechji̧ chjuari̧ quëna̧chji̧vä jaepeparea̧ decjiari̧. Ado pio dibëiäpȩmo̧ chjai̧dëri̧ japamȩ pio ju̧i̧ goëdëri̧ cjiape bagadëchji̧jo̧ȩ. Jabechji̧ tjaoëpai̧ dari̧ cjo̧ro̧ji̧ri̧pea̧nȩrȩ. Ado pio jiro cjo̧ro̧rea̧ra̧ pio ju̧ri̧ra̧ ano̧ mire ina̧ oa cjiami̧ dari̧ cjo̧ro̧pea̧ chianȩrȩ.

¹³ Aja̧, ba chia dachji̧jȩrȩ o ji̧ri̧, pio mȩaiäpȩmo̧ chjadëri̧ japadëräbo. Chjaodëri̧ goëdëri̧ cjiape bagadëchji̧jȩrȩ. Jabechji̧ judiro̧ dibëiäpȩmo̧ chjai̧dëri̧ japea̧ pio ju̧i̧ ji̧dë ma jo̧rȩtadëchji̧vä, jabo duridëparȩmi̧ dari̧ jo̧rȩtachji̧jȩrȩ cjatäcjie jo̧rȩtarea̧mi̧ dari̧. Peaja̧di dari̧ duridëparȩa̧diibe Ano̧mȩ judi. Ado pio ju̧i̧iä peaja̧di dari̧ japatäreji̧ri̧rea̧rȩ o ji̧ri̧iäpȩmo̧.

¹⁴ Ado danȩrȩ, earea̧ra̧ pio ju̧ri̧ra̧ ina̧ oa cjiami̧ dari̧ cjo̧ro̧chji̧vä. Jabechji̧ earea̧ üdë a̧dë chjäte ba chia tjamo̧de. Jabechji̧ a̧ro̧rȩ eaji̧ri̧rȩ cjo̧ro̧a̧ oaiä, ȩrüa̧ oa cjiami̧ dari̧ cjiade ibëa̧ chji̧ üdë, cja̧rȩmȩ bubami̧ dari̧, cja̧rȩmȩ jo̧rȩtarea̧ chiami̧ dari̧. Jabechji̧ eariä cjo̧ro̧a̧ üdë goae tjamo̧de.

¹⁵ Ado Quiricho pio judirimȩ ma̧ chjupi̧ cjiari̧ jo̧rȩtarea̧ üdë chjadëri̧ chatäremȩde dibëa̧ chji̧rä. Jabechji̧ chjadëri̧ jidatäremȩdejȩ dibëa̧ chji̧ oa, mȩnȩro̧ oëra̧diächea oa, dibëa̧ chji̧ üdë goaedëpe bagachea oa. Jabechji̧ ja̧di dari̧ cjo̧ro̧pea̧ oa ëndiärëremȩdiibe Ütë tjamo̧ judi, a̧ro̧rȩ cja̧rȩmȩ icjararä cara̧ oa cjiami̧ dari̧ cjo̧ro̧pea̧ oa. Ado pio ju̧i̧iä ji̧dë ma ma̧ chiadëri̧ cjiari̧ jo̧rȩtachji̧jo̧ȩ Ütë tjamo̧ ju̧i̧, ‘chjadëri̧ japea̧diibëda’ quëna jo̧rȩtaji̧ri̧rȩ.

¹⁶ Ado Quirichorë a̧ra̧ano̧a̧ ma̧ȩ üdë urëdi tjamo̧ oa chatäremȩde dibëa̧ chji̧rä, mȩnȩro̧ ta̧rëdiätämi̧ cjiarea̧mi̧ dari̧, pio jiro ma̧ȩrä ma̧ chiadëri̧ cjiari̧ cjo̧ro̧rea̧mi̧ dari̧. Jabechji̧ dibëa̧ dëbëti̧ra̧ chia a̧ra̧ano̧rea̧mi̧ dari̧, dibëa̧ dëbëti̧ra̧ chia chi̧dëearea̧mi̧ dari̧ chatäremȩde, mȩnȩro̧ o ji̧ri̧ chjadëri̧ a̧dopea̧ oa. Ado danȩrȩ, chjacjiamȩri̧ jo̧rȩtariä go̧a̧chji̧vä. Mȩnȩro̧ Ütë ja̧ ma̧ȩ oa dabapea̧ pio ju̧i̧ jo̧rȩtariä go̧a̧chji̧vä. Jechu pio ju̧i̧iäpȩmo̧ jo̧rȩtaji̧ri̧rȩ chjacjiamȩri̧ go̧a̧chji̧vä. Ado Tjo tjamo̧ judi pio dibë dabapa tänȩa̧ pio ju̧i̧bo go̧a̧chji̧va. 'Jabechji̧ Ütë tjamo̧ judi chjadë tjamo̧diibëda’ quëna̧ jo̧rȩtariä go̧a̧chji̧vä pio ju̧i̧iäpȩmo̧.

¹⁷ Ado mȩnȩro̧ Ano̧mȩ Jechu pio ju̧i̧iäpȩmo̧ quëna̧ji̧ri̧pea̧ oaiä, jabechji̧ Jechu pio judirimȩ cjo̧ro̧rea̧ peaja̧ra̧ na̧rȩriä cjo̧ro̧täreji̧ri̧nȩrȩ pumȩ pio ji̧ri̧iäpȩmo̧. Ado pio ju̧i̧iä mȩnȩro̧ eami̧ oa yo̧ro, mȩnȩro̧ eami̧ oa japarä, jabechji̧ Jechu pio judirimȩ cjo̧ro̧rea̧ maeara̧ na̧rȩriä cjo̧ro̧täreji̧ri̧renȩro̧jȩrȩ. Aja̧ ca̧ oti̧, ja̧di dari̧ cjo̧ro̧chji̧vä, ‘Ama̧i̧ Ütë judi Jechu pio ju̧i̧iä chjadëri̧ japea̧diibëda’ quëna̧ jo̧rȩtaji̧ri̧rȩ.

Pablo judi ma̧ȩ yürürëremȩde üi̧ pio ju̧i̧ chjiari, iei̧ pio ji̧ chjiari, ado bori̧ pio ji̧ri̧ chjiari

¹⁸ Ado yaba̧ ni̧bäquidibë oari chiaji̧ri̧ pio ji̧ri̧. Danȩro̧, dibëa̧ oarirë yo̧a̧ chja̧oerä cjo̧ro̧nȩro̧. Ado pio ju̧i̧iä jabechji̧, ‘Ca̧ üi̧ üdë tjamo̧ yo̧mȩdida, pio ju̧i̧ ta̧rëdiäpea̧ chiacuni̧da’ quëna̧ jo̧rȩtatäreji̧ri̧nȩro̧. Jabechji̧ mȩnȩro̧ Ano̧mȩ pio ju̧i̧ ja̧ pumȩpea̧ oaiä, jabechji̧ chjadëdi mȩnȩro̧ ja̧di dari̧ cjo̧ro̧pea̧ ji̧.

¹⁹ Ado yaba̧ ano̧ mire ni̧bä chjaorequededibe ivi chiaji̧ri̧ pio ji̧ri̧iäpȩmo̧. Danȩrȩ, ea tjamo̧chji̧vä dibëa̧ ivi pio ji̧ri̧. Ba chia dachji̧jȩrȩ. Chjadëri̧ jidachji̧jȩrȩ. Ado ëcarami̧ tarari̧ yürüdëchji̧jȩrȩ jabo jabechji̧, ma̧ȩ goae maeara̧ ni̧bächji̧jȩrȩ. Jabechji̧ ya̧dëchji̧jȩrȩ.

²⁰ Ado yaba̧ ano̧ mire ni̧bärequededibe bori̧ pio ji̧ri̧. Danȩrȩ, chjadëri̧ ta̧rëdiächji̧jȩrȩ dibë nö̧riji̧ri̧ pio ji̧ri̧. Tjaoërämo̧dë, jabo ji̧dë ma chjadëri̧ ta̧rëdiäpea̧ chiarenȩro̧jȩrȩ. Mȩnȩro̧ ja̧di dari̧ japea̧ üdë goae tjamo̧padejȩ Ütë tjamo̧ ju̧i̧iä.

²¹ Ado yaba̧ ano̧ mire ni̧bärequededibe jäjäa pio ji̧ri̧, dibëa̧ bori̧ ëbaji̧ri̧ oari pio ji̧ri̧. Danȩrȩ, dibëa̧ bori̧ pio ji̧ri̧ chjadëri̧ a̧ra̧ano̧dëa̧ oaiä järidëpe baga tänȩdëtäreji̧ri̧renȩro̧jȩrȩ. Tjamo̧ davä. Pio ji̧ri̧ nö̧tadäräri̧ a̧dodëa̧ oaiä chji̧ goaedëra̧ jo̧rȩta tänȩdëtäreji̧ri̧renȩro̧jȩrȩ, jabo jabechji̧ chjadëri̧ a̧dojȩrȩ nȩmȩparea̧ decjiari̧.

Pablo judi ma̧ȩ yürürëremȩde gatëa̧ mu̧i̧tjoi̧ pio ji̧ri̧iäpȩmo̧

²² Ado yaba̧ ano̧ mire ni̧bärequededibe gatëa̧ mu̧i̧tjoi̧ pio ji̧ri̧iäpȩmo̧. Danȩrȩ, dibëa̧ ano̧mȩ judi, dai chirirä cjo̧ro̧mȩ pio judi, jabomo̧ pumȩde. Jabomo̧ pumȩbo, jabechji̧ nö̧tadäräri̧ ta̧rëdiächji̧jo̧ȩ dibëa̧ ano̧mȩ tara. Aja̧, pio dibë ütarë dadëräbo chjadëri̧ ta̧rëdiächji̧jo̧ȩ judi dibë chjiari chjadëri̧ dabapea̧ oa, ‘ca̧ mu̧i̧tjoi̧ üdë chjadë tjamo̧dida’ quëna̧ dabapea̧ oa. Danȩrȩ, ‘a̧dëräpȩ cjiamȩ Ano̧mȩ judi ba chia tjamo̧dida’ quëna̧ jo̧rȩtaji̧ri̧rȩ chjadëri̧ ta̧rëdiärenȩro̧jo̧ȩ, pio ju̧i̧iäpȩmo̧ tjamo̧ri̧ ma̧ chiadëri̧ cjia jo̧rȩta tänȩtämi̧ cjiaji̧ri̧rȩ. Ado peaja̧di dari̧ ja̧bepë yürütäreji̧ri̧renȩro̧jo̧ȩ dibë tänȩmȩ ja̧ oa.

²³ Jabechji̧ mȩnȩro̧ eami̧ oa japarä, ‘jabechji̧ pumȩ ja̧ oa ja̧bepaquëda’ quëna̧dëchji̧vä, jabo jabechji̧ mȩnȩro̧ nö̧tarä yuro chjadëri̧ japaji̧ri̧rȩ cjo̧ro̧chji̧vä, a̧dëräpȩ cjiamȩ Ano̧mȩ pio ju̧i̧ ja̧ oa ja̧bepë yürüji̧ri̧mi̧ dari̧.

²⁴ Ado ja̧dëa ji̧ mȩnȩro̧ a̧dëräpȩ go̧düdäräa̧rä, jabechji̧ Ano̧mȩ pio judi ba ano̧mi̧ dari̧ yürüpadidibe jënȩ jibëa̧ pumȩ ja̧ oa china̧chjari̧ goë boea̧ pio ju̧i̧. Jabechji̧ pio judi tjamo̧de dibëa̧ Ano̧mȩ judi. Dai chiririmȩ ja̧ oa ja̧bepaji̧ri̧borë tjamo̧ri̧ ja̧bepanȩrȩ Ano̧mȩ Quiricho pio ju̧i̧ ja̧ oa. Pio ju̧i̧ a̧dë jo̧rȩtadëchji̧vä ca̧ oti̧.

²⁵ Jabechji̧ chjadëri̧ ba ano̧padejȩrȩ chjadëri̧ japaji̧ri̧ pio ji̧ri̧, jabo chjai̧dëri̧ japaji̧ri̧ pio judiro̧ bape chjaoa̧ oa cjiapadirȩ judiro̧ chjai̧dëri̧ japea̧ ba oa. Jabechji̧ ütëbodärä oa cja̧rȩmȩ ütararea̧ maeara̧ ütarë ta̧rëpadejȩrȩ Ütë tjamo̧ judi. Tjamo̧ davä. Ja̧di dari̧ japapadejȩrȩ, ‘pio coamo̧i̧ bape chjaodëpa jirodicoada’ quëna̧rea̧mi̧dëri̧.